1, 2. Ino ty raha mampijaly ty olo, le ino ty fanontanea apetrakin’olo maro baka amy raha zay?

NIARAKY nalevy tamy lavaky raiky voahodidy lakroa ty ampela noho ty ajà an’arivony, maty tamy aly be tamy tany raiky. Nisy soratsy tamy ty lakroa kiraidraiky hoe: “Nanino lahy?” Matetiky ro manontany ho zay ty olo lafa mijaly. Manontany manahaky zay rozy lafa misy aly, loza, arety na halatsy miharo vonoan’olo, ka nahafaty ty longony, na nanimba ty tranony, na nanday fahavoaza marè ho azy. Teany ho hay hoe nanino ie ro voan-doza manahaky zay.

² Manino ro engà Jehovah Ndranahary hisy ty fijalea? Laha ie ro farany ze mahery sady be fitiava noho hendry voho manao ty rariny, manino ro maro ty fankalaina noho ty tsy rariny an-tany etoa? Fa nieritseritsy ho zay va iha?

3, 4. a) Ino ty mampiseho fa tsy diso tsika laha manontany ty antony anengà Ndranahary ty fijalea hisy? b) Manao akory ty fahità Jehovah ty raha raty noho ty fijalea?

³ Diso va tsika laha manontany ty antony anengà Ndranahary ty fijalea hisy? Misy mieritseritsy fa tsy ampy finoa na tsy manaja Ndranahary ie, laha manontany raha zay.  Fe ho hitanao amy Baiboly ao, fa nametraky fanontanea manahaky zay ty olo nanam-pinoa sady natahotsy a Ndranahary. Nanontany any Jehovah ohatsy Habakoka mpaminany hoe: “Manino ro ataonao mahita raha raty aho, sady henteanao avao ty haratia? Manino ro misy fandravà noho hasatà anilako eto, voho manino ro misy fifamalea noho fifanohera ty eto?”—Habakoka 1:3.

⁴ Nihelofa Jehovah va mpaminany tsy nivaliky io, lafa nametraky fanontanea zay? Aha. Nampanoratiny tamy Baiboly ao safà Habakoka reo. Nihazavaniny soa tamy Habakoka koa ty raha teany hatao sady nampeany ie, mba hitombo finoa. Ho zay koa ty tea Jehovah hatao ho anao. Ka halino fa mivola ty Baiboly hoe ‘mikarakara anao ie.’ (1 Petera 5:7) Mandilatsy lavitsy ty falainan’olo ty raha raty noho ty fijalea, ty falaina Ndranahary raha zay. (Isaia 55:8, 9) Ka manino ro maro marè ty fijalea?

5. Ino matetiky ro volany fa mahavy ty olo hijaly? Fe ino ro ampianary ty Baiboly?

⁵ Olo baka amy finoa samby hafa ro manontany ty mpitariky fivavaha amy fiangona misy azy ao hoe manino ro  manjeky ty fijalea. Matetiky rozy ro mamaly hoe zay ty sitrapo Ndranahary. Fa nalahatsiny sandrany ty raha iaby hoy ty asan-drozy, tafilitsy amy zay ty loza. Olo maro koa ro ivolana hoe tsy hay hazavà ty lala Ndranahary, sady Ndranahary ro mahavy ty olo ho maty ndre be ndre kely mba hiaraky aminy an-danitsy any. Fe nianaranao fa tsy Jehovah mihintsy ro mahavy ty raha raty. Hoy ty Baiboly: “Sanatria amy Ndranahary marina ty hanao raha raty, sady sanatria amy azy Farany Ze Mahery iny ty hanao ty tsy rariny!”—Joba 34:10.

6. Manino ty olo ro mivola fa Ndranahary ro mahavy ty fijalea?

⁶ Ka manino ty olo ro manome tsiny Ndranahary, lafa mahita ty fijalea maro? Satria maro amin-drozy ro mihevitsy, fa Ndranahary azy Farany Ze Mahery iny ro manday tontolo misy antsika toy. Tsy hain-drozy fa Satana Devoly ro manday tontolo toy. Tsy sarotsy, fe misy dikany bevata ty fahamarina nianaranao baka amy Baiboly ao, tamy Toko faha-3 ao iny.

7, 8. a) Ino ty ahità fa manahaky ty mpanday azy tontolo toy? b) Manino ro volany hoe mahavy ty fijalea ty tsy fahalavoraria noho ty ‘raha raty sendra miseho amy fotoa tsy ampoizy’?

⁷ Hoy ty Baiboly: “Zao tontolo zao iaby, le ambany fahefà azy raty iny eo.” (1 Jaona 5:19) Mety hivola iha hoe tsy marina zao. Mitovy amy anjely “mamitaky ty tany iaby misy olo” iny tontolo toy. (Apokalypsy 12:9) Feno fankalaina Satana, sady mamitaky noho masiaky marè. Zay mahavy tontolo toy ho feno fankalaina noho fitaky voho haromota io, satria ambany fahefàny. Antony raiky mampanjeky ty fijalea raha zay.

⁸ Hitantsika tamy Toko faha-3 ao ty antony faharoe. Nanjeky ty fijalea satria nanjary tsy lavorary noho mpanota ty olo tafara ty fanohera nisy ta Edena tao. Matetiky ty olo ro miezaky marè hahazo fahefà, ka manday aly noho fampijalea raha zay. (Vakio Mpitoriteny 4:1; 8:9.) ‘Raha raty  sendra miseho amy fotoa tsy ampoizy’, ty antony fahatelo mahavy ty fijalea. (Mpitoriteny 9:11) Tsy manday na miaro tontolo toy Jehovah. Midika zay, fa mety hijaly ty olo laha sendra amy pilasy misy loza eo ty misy azy.

9. Manino tsika ro mahazo antoky fa misy antony soa, kanao mbo engà Jehovah hisy ty fijalea?

⁹ Mampahery antsika ty mahay hoe tsy Ndranahary ro mahavy ty fijalea. Tsy baka aminy ty aly, ty halatsy miharo vonoan’olo, ndre ty loza hafa manahaky sikolony na ty horohoron-tany. Fe mila haintsika hoe nanino ro mbo engà Ndranahary hisy ty fijalea? Azony atao ty tsy mampisy fijalea sasy satria ie ro Farany Ze Mahery. Manino ie ro mbo tsy manao raha zay? Azo antoky fa misy antony soa, kanao mbo mandiny, Ndranahary fitiava io.—1 Jaona 4:8.

10. Nahavy ty olo hisalasala mikasiky ino Satana, le manao akory ty nanaovany raha zay?

¹⁰ Mila mieritseritsy ty fotoa nanomboha ty fijalea tsika, mba hahaiza hoe nanino ro mbo engà Ndranahary hisy raha io. Nanjary nisy raha bevata nialia hevitsy, lafa nitaomy Satana tsy hanoriky ty safà Jehovah, Adama noho Eva. Tsy nialy hevitsy mikasiky ty hery Jehovah, Satana, satria hainy fa tsy misy fitamperany ty heriny. Ino ty nataony? Nataony ze hahavy ty olo hisalasala mikasiky ty hoe mana zo handay va Jehovah. Nivola ie fa mpavandy Ndranahary sady misy raha soa tsy ameany ty vahoakiny. Ta hivola Satana fa tsy mahay manday Ndranahary. (Vakio Genesisy 3:2-5.) Ta hivola koa ie, fa ho soasoa ty fiainan’olo, laha tsy Jehovah ro manday an-drozy. Fanohera ty zo Jehovah handay raha zay.

11. Nanino ro tsy avy le nivonoa Jehovah mpanohitsy ta Edena tao reo?

¹¹ Niala tamy Jehovah Adama noho Eva. Sahala nivola rozy hoe: ‘Tsy mila any Jehovah handay anay zahay.  Mahavita mifily ty soa noho ty raty amy ty fiainanay zahay.’ Ino ty natao Jehovah mba handamina raha zay? Manao akory ty hampisehoany amy ty anjely noho ty olo, fa diso mpanohitsy reo, fa ie ro mahay manday? Mety hisy hivola hoe tokony ho nivonoa mpanohitsy reo, le namboatsy olo vaovao ndraiky ie. Fe tea Jehovah ho feno taranaky Adama noho Eva tany toy sady teany hiay zisiky farany amy paradisa an-tany etoa rozy. (Genesisy 1:28) Manatanteraky ty raha teany hatao avao Jehovah. (Isaia 55:10, 11) Laha avy le nivonoany koa mpanohitsy reo, le tsy ho nisy porofo ahaiza hoe mana zo handay va ie sa tsy mana.

12, 13. Nanino ro nengà Ndranahary handay tontolo toy Satana, sady nengany hifanday ty olo? Hazavao amy ohatsy.

¹² Toy misy ohatsy, ndao hatao hoe manampy ty mpianatsiny hanao kalikily sarotsy ty mpampianatsy raiky. Fe nisy mpianatsy raiky mahay raha, nanohitsy azy, le nivola fa diso ty raha atorony. Tsy nanekineky mpianatsy iny, fa nao ie mahita hevitsy soa marè hanaova kalikily io, mba hanaporofoany hoe tsy mahay mpampianatsy io. Nanaraky  azy koa ty mpianatsy sisany satria mihevitsy fa marina ty azy. Ino ty tokony hatao mpampianatsy io? Ino ty ho vokany laha avy le aboakiny, mpianatsy mpanohitsy reo? Tsy hieritseritsy va ty mpianatsy hafa hoe marina ty ahy mpanohitsy iny noho ze niaraky taminy? Mety hieritseritsy rozy fa mavaka mpampianatsy iny tsy no ho hita fa tsy mahay, mety tsy hanaja azy sasy koa ty mpianatsy hafa. Fe hanao akory laha engany hanao kalikily io mpianatsy nanohitsy iny?

¹³ Mitovy amy raha atao mpampianatsy io ty raha atao Jehovah. Ka halino fa tsy azy mpanohitsy ta Edena tany reo avao ro tafilitsy amy alihevitsy io. Nisy anjely maro koa nandiniky ty raha niseho. (Joba 38:7; Daniela 7:10) Hisy vokany bevata amy ty anjely iaby noho ty olo iaby ty raha hatao Jehovah, mba handamina fanohera io. Ka ino ty nataony? Nengany Satana hampiseho hoe manao akory ty fandaisany ty olo. Nengany hifanday ambany fahefà Satana eo koa ty olo.

14. Ino ty vokatsy soa niazo, lafa nengà Jehovah hana ty fanjakany ty olombelo?

¹⁴ Hay mpampianatsy io, fa diso mpianatsy nanohitsy iny noho ze niaraky taminy. Fe hainy koa, fa laha engany hanaporofo ty hevitsiny rozy, le hahasoa ty mpianatsy hafa raha zay. Lafa tsy mahavita raha mpanohitsy reo, le ho hita ty mpianatsy mahity fo, fa mpampianatsy iny avao ro mahay mitariky an-drozy. Fa tsy ho taitsy sasy ty mpianatsy sisany lafa aboaky mpampianatsy iny mpanohitsy reo satria fa hain-drozy ty antony. Ho zay koa ty natao Jehovah. Hainy fa hahasoa ty olo noho ty anjely mahity fo ty fahità hoe tsy mahavita raha Satana noho ty mpanohitsy niaraky taminy voho ty fanjakà andesin’olo. Haneky manahaky Jeremia rozy hoe: “Haiko soa lahy Jehovah, fa tsy ahin’olombelo ty lala ombany. Sady tsy natao handay raiky ty fiainany koa ty olo.”—Jeremia 10:23.

15, 16. a) Manino ro nengà Ndranahary haharitsy ela ty fijalea? b) Manino ro tsy nisakana Jehovah ty halatsy miharo vonoan’olo?

¹⁵ Fe manino ro nengà Jehovah haharitsy ela ty fijalea? Sady manino ro tsy sakanany ty raha raty miseho? Misy raha roe tsy hatao mpampianatsy iny mihintsy. Voalohany, tsy hosakanany mpianatsy nanohitsy iny, lafa hanazava ty fanaovany kalikily io. Faharoe, tsy hanampy azy hanaporofo ty hevitsiny ie. Misy raha roe mitovy amy zay koa tsy atao Jehovah. Voalohany, tsy sakanany Satana noho ty mpanaraky azy, fa engàny hanaporofo ty hevitsiny. Mila fotoa raha zay. Nampiasa fandaisa sankarazany ty olombelo, fa an’arivo tao lasa zay. Nisy fivoara vitan-drozy tamy ty siansy noho ty raha hafa, fe mihamanjeky avao ty raha raty, ty fahantrà, ty halatsy miharo vonoan’olo, noho ty aly. Voaporofo henanizao fa tsy mahavita raha ty fanjakà andesin’olombelo.

¹⁶ Faharoe, tsy nanampy Satana handay tontolo toy Jehovah. Laha ohatsy nisakanany tsy hiseho ty halatsy miharo vonoan’olo, tsy sahala manampy mpanohitsy reo va ie amy zay? Tsy hieritseritsy va ty olo, fa mahay manday an-drozy avao mpanohitsy reo sady soa ty fandaisany? Manampy ty mpavandy Jehovah laha manao raha zay, kanefa ie ‘tsy mahay mavandy.’—Hebreo 6:18.

17, 18. Hatao Jehovah akory ty raha raty iaby baka amy fanjakà andesin’olo noho ty hery Satana?

¹⁷ Nanomboky ty raha raty lafa nisy nanohitsy Ndranahary. Ka hanao akory ty hiafarà raha raty rezay? Ka halino fa Jehovah ro farany ze mahery. Midika zay, fa vitany ty mangalaky ty raha mampijaly ty olo sady hataony vatany raha zay. Hovà ho Paradisa ndraiky tany fa sinimban’olo toy, araky ty fa nianarantsika. Tsy ho azo ty raha raty baka amy fahotà sasy ty olo marina mino ty sorom-panavota natao Jesosy. Hovelomy ndraiky ty maty ka tsy hisy sasy ty  fijalea baka amy fahafatesa. “Handrava ty asa ty Devoly” Ndranahary amy alala Jesosy. (1 Jaona 3:8) Hotanterahy Jehovah amy fotoa mety soa raha iaby rezay. Falifaly tsika fa tsy nalisa marè Ndranahary, fa mbo nanome fotoa hianarantsika ty fahamarina noho hanompoantsika azy. (Vakio 2 Petera 3:9, 10.) Mila olo mahity fo Ndranahary henanizao mba hivavaky aminy. Ampeany koa rozy hiaritsy ty fijalea amy tontolo feno fahasahirana toy eto.—Jaona 4:23; 1 Korintianina 10:13.

¹⁸ Mety hisy hivola hoe: ‘Manino laha niforony Ndranahary mba haneky avao ze raha volaniny Adama noho Eva? Tsy ho nisy ty fijalea amy zay sady tsy ho niafaky nanohitsy rozy.’ Mba hahaiza ty valy fanontanea zay, le soa laha tiarovinao fanomeza raiky soa marè namea Jehovah anao toy.

19. Ino ty fanomeza soa marè namea Jehovah antsika? Manino ro tokony ho teantsika marè raha zay?

¹⁹ Nianarantsika tamy Toko faha-5 tao, fa namea fahalalaha hifily ty olo. Hainao va hoe manino ro soa marè fanomeza zay? Namboatsy biby maro Ndranahary, le ty raha fa voajanahary aminy avao ro mikomandy azy amy ty raha ataony. Ho niteantsika va laha manahaky zay ty nanamboara Ndranahary antsika? Aha. Falifaly tsika fa afaky mifily ty toetsy teantsika hanana, ty fiaina teantsika horihy, ty olo ho namantsika noho ty raha hafa. Teantsika vatany ty mana fahafaha, sady tea Ndranahary ty hananantsika raha zay.

20, 21. Manao akory ty ampiasantsika soa ty fahalalaha hifily ananantsika, le manino tsika ro tokony haniry hanao raha zay?

 ²⁰ Tsy tea Jehovah hoforosèva hanompo azy ty olo. (2 Korintianina 9:7) Toy misy ohatsy: Laha misy olo mana anaky. Ino ty ho teany? Anakiny iny forosèva hisaotsy azy va, sa hisaotsy azy an-tsitrapo? Soa laha mandiniky tsika hoe: Namea Jehovah fahalalaha hifily aho, ka manao akory ty hampiasako raha zay? Farany ze raty ty nampiasà Satana noho Adama voho Eva ty fahalalahany hifily. Nialan-drozy, Jehovah Ndranahary. Ka iha, ino ty hataonao?

²¹ Afaky mampiasa soa ty fahalalahanao hifily iha. Azonao atao ty mifily hoe Jehovah ro mana zo handay. Olo an-tapitrisany ro manao raha zay. Mahafalifaly Jehovah ty raha ataon-drozy satria manome porofo amy ty raha ataony rozy fa mpavandy Satana sady tsy soa ty fandaisany. (Ohabolana 27:11) Manao manahaky zay koa iha laha mifily ty hanaraky fiaina soa. Hiresaky mikasiky raha zay tsika amy toko manaraky.