1, 2. Bantfu lamuhla babhekana nakuphi kuhlupheka, futsi ngumiphi imibuto labaye batibute yona?

NGEMUVA kwemphi lematima kulelinye live lokuliwa timphi letinyenti kulo, bafati nebantfwana labatikhulungwane lebebabulewe, bangcwatjelwa ethuneni linye lelikhulu lelitungeletwe tiphambano. Siphambano ngasinye besibhalwe kutsi: “Senteni?” Loyo ngumbuto lobuhlungu kakhulu. Bantfu bayawubuta badzabukile ngemuva kwekuba imphi, inhlekelele, tifo, nobe bugebengu kubulele tihlobo tabo letingenacala, kubhubhise imiti yabo nobe kubaletsele kuhlupheka lokukhulu. Bafuna kwati kutsi kungani behlelwa tinhlekelele letinjena.

² Kungani Nkulunkulu avumele kuhlupheka? Nangabe Nkulunkulu Jehova anawo onkhe emandla, anelutsandvo, futsi ahlakaniphile kungani umhlaba ugcwele kutondzana nekungalungi lokungaka? Uke watibuta yini lemibuto?

3, 4. (a) Yini lekhombisa kutsi akusiyo intfo lembi kubuta Nkulunkulu kutsi ukuvumeleleni kuhlupheka? (b) Jehova utiva njani ngebubi nekuhlupheka?

³ Kubi yini vele kubuta kutsi Nkulunkulu ukuvumeleleni kuhlupheka? Labanye bacabanga kutsi kubuta lombuto  kungasho kutsi abakholwa nobe abamhloniphi Nkulunkulu. Noko, lapho ufundza liBhayibheli utawubona kutsi letinye tinceku taNkulunkulu letetsembekile futsi letimesabako take tatibuta lombuto. Nasi sibonelo: Umphrofethi Habakhuki wabuta Jehova watsi: “Wentelani kutsi ngibone bubi lobungaka? Ukubeketelelani kuhlushwa kwalabacindzetelekile?”—Habakhuki 1:3.

⁴ Jehova wamtsetsisa yini umphrofethi Habakhuki ngekubuta lemibuto? Cha, akazange. Esikhundleni saloko lamavi aHabakhuki wawafaka emlandvweni lophefumulelwe weliBhayibheli. Nkulunkulu waphindze wamsita kutsi afundze lokunyenti futsi waba nekukholwa lokucinile. Jehova ufuna kwenta lokufananako nakuwe. Khumbula, liBhayibheli lifundzisa kutsi “yena uyanikhatsalela.” (1 Phetro 5:7) Nkulunkulu uyabutondza bubi nekuhlupheka ngetulu kwanobe ngumuphi lomunye umuntfu. (Isaya 55:8, 9) Kungani pho kunekungalungi lokungaka emhlabeni?

5. Ngaletinye tikhatsi bantfu baniketwa tiphi tizatfu tekutsi kungani sihlupheka, kodvwa liBhayibheli lifundzisani?

⁵ Bantfu betinkholo letehlukahlukene babutile kubafundisi babo kutsi kungani kunekuhlupheka lokungaka.  Imvamisa, baphendvulwa ngekutsi kuhlupheka kuyintsandvo yaNkulunkulu futsi wavele watihlela kadzeni tonkhe tintfo letihlanganisa netentakalo letibuhlungu. Bantfu labanyenti batjelwa kutsi tindlela taNkulunkulu awunawumane uticondze. Baphindze batjelwe kutsi nguye lobulala bantfu nebantfwana khona bayohlala naye ezulwini. Njengobe ufundzile, Nkulunkulu Jehova angeke ente tintfo letimbi. LiBhayibheli litsi: “Akube khashane naNkulunkulu kuba ngumenti walokubi, kwenta bubi akube khashane naSomandla.”—Jobe 34:10.

6. Kungani bantfu labanyenti benta liphutsa lekusola Nkulunkulu ngato tonkhe tinhlupheko letisemhlabeni?

⁶ Uyati kutsi kungani bantfu benta liphutsa lekusola Nkulunkulu ngako konkhe kuhlupheka lokusemhlabeni? Etimeni letinyenti, basola Nkulunkulu Somandla ngobe bacabanga kutsi nguye lobusa lomhlaba. Abayati imphendvulo lesebaleni kodvwa lebalulekile lefundziswa liBhayibheli. Ulifundzile leliciniso eSehlukweni 3 salencwadzi. Liciniso kutsi nguSathane Develi umbusi walelive.

7, 8. (a) Live libubonisa njani buntfu bembusi walo? (b) Kungapheleli kwebantfu kanye ‘nesikhatsi nematfuba’ kuholela njani ekuhluphekeni?

⁷ LiBhayibheli litsi: “Umhlaba wonkhe ungephansi kwemandla aLomubi.” (1 Johane 5:19) Nembala nawubuka kuliciniso loku. Lelive liveta buntfu balesidalwa semoya ‘lesinguMkhohlisi wemhlaba wonkhe.’ (Sembulo 12:9) Sathane unentondvo, ngumkhohlisi futsi unelunya. Ngako live lingephansi kwemandla akhe, ligcwele intondvo, kukhohlisa kanye nelunya. Lesi ngulesinye setizatfu lesenta kube nekuhlupheka lokungaka emhlabeni.

⁸ Sizatfu sesibili lesenta kutsi kube nekuhlupheka lokungaka kutsi solomane bantfu abakapheleli futsi banesono kusukela ekuhlubukeni esimini yase-Edeni, njengobe sifundzile eSehlukweni 3. Bantfu labanesono behlulekile kubusa, ngako loko kuholele ekutseni kube netimphi, kucindzeteleka,  kanye nekuhlupheka. (Umshumayeli 4:1; 8:9) Sizatfu sesitsatfu lesenta kube nekuhlupheka kutsi “sikhatsi nematfuba kubehlela bonkhe.” (Umshumayeli 9:11) Eveni lelingabuswa nguJehova njengeNkhosi, bantfu labanyenti bayahlupheka ngekutsi babe sendzaweni leyingoti ngesikhatsi lesibi.

9. Kungani singaciniseka kutsi Jehova unaso sizatfu sekuvumela kuhlupheka kuchubeke?

⁹ Kuyasidvudvuta kwati kutsi akusiye Nkulunkulu lobangela kuhlupheka. Akusiye lobangela timphi, bugebengu, nekucindzeteleka, nobe tinhlekelele letibangele kutsi bantfu labanyenti bahlupheke. Nobe kunjalo, sidzinga kwati kutsi kungani Jehova ayekela konkhe lokuhlupheka? Nangabe anguSomandla, unawo emandla ekukucedza. Ngako, kungani angakucedzi lokuhlupheka? Nkulunkulu welutsandvo lesifundze ngaye kufanele kube unaso sizatfu lesihle sekungakucedzi lokuhlupheka.—1 Johane 4:8.

10. Yini Sathane abeyingabata, futsi loko wakwenta njani?

¹⁰ Kute sitfole kutsi kungani Nkulunkulu avumela kuhlupheka kudzingeka sitfole kutsi kuhlupheka kwacala kanjani. Lapho Sathane abangela kutsi bo-Adamu na-Eva bangamlaleli Jehova kwacalisa imphikiswane lenkhulu. Sathane abengangabati kutsi Jehova unemandla. Nembala Sathane abati kutsi Jehova unemandla langapheli. Kunaloko, Sathane abengabata ligunya laJehova lekubusa. Ngekutsi Nkulunkulu ngumcalimanga logodlela bantfu lokulungile, Sathane abetsi Jehova ungumbusi longakalungi. (Genesisi 3:2-5) Sathane wase utsi umuntfu angaphila ncono nakangabuswa nguNkulunkulu. Loko kwakukuhlaselwa kwebukhosi baJehova, ligunya lakhe lekubusa.

11. Kungani Jehova angazange atibhubhise tihlubuki e-Edeni?

¹¹ Adamu na-Eva bavukela Jehova. Ecinisweni batsi: ‘Asimdzingi Jehova njengeMbusi wetfu. Singatincumela loko  lokulungile naloko lokungakalungi.’ Jehova abetayicatulula njani lemphikiswane? Abetabafundzisa njani bantfu bonkhe kutsi letihlubuki beticala emanga, futsi indlela yakhe yekubusa kwakungiyo lelungile? Lomunye abengase atsi Nkulunkulu abefanele atibhubhise letihlubuki bese ucala yonkhe intfo kabusha. Kodvwa Jehova abesayishito injongo yakhe yekugcwalisa umhlaba ngentalelwane ya-Adamu na-Eva, futsi abefuna kutsi bahlale emhlabeni lolipharadisi. (Genesisi 1:28) Jehova uhlale atigcwalisa tinjongo takhe. (Isaya 55:10, 11) Ngetulu kwaloko, kubhubhisa tihlubuki e-Edeni bekungeke kuyicatulule imphikiswane lephatselene neligunya laJehova lekubusa.

12, 13. Fananisa kutsi kungani Jehova avumele Sathane kutsi abuse live, nekutsi kungani avumele bantfu kutsi batibuse.

¹² Ase sifananise. Ase sitsi thishela ubonisa bafundzi indlela yekubala sibalo lesimatima. Umfundzi lohlakaniphile kepha longalaleli utsi indlela yathishela yekubala lesibalo akusiyo. Loku kusho kutsi thishela akakwati kufundzisa futsi lomfundzi utsi yena ukwati ncono kubala lesibalo. Labanye bafundzi bacabanga kutsi ucinisile futsi nabo bacala  kungamlaleli thishela. Yini lokufanele yentiwe nguthishela? Nakabacosha bonkhe labafundzi labangalaleli, batawucabanga kutsini laba labanye bafundzi? Awucabangi yini kutsi bangatsi lomfundzi abecinisile futsi nalabo labamsekele bente kahle? Bonkhe laba labanye bafundzi bangase bangamhloniphi thishela bacabange kutsi wesaba kubonakala kutsi uneliphutsa naye. Kodvwa ase sitsi thishela uvumela lomfundzi longalaleli kutsi asibale lesibalo kute labanye babone.

¹³ Jehova wenta lokufananako naloko lokwentiwe ngulothishela. Khumbula kutsi lemphikiswane beyingatsintsi letihlubuki todvwa e-Edeni. Tigidzi tetingilosi nato tatibukele. (Jobe 38:7; Danyela 7:10) Indlela Jehova abetawusebentelana ngayo naletihlubuki beyiyotitsintsa kakhulu leto tingilosi, nebantfu ekugcineni. Ngako-ke, yini Jehova layentile? Uvumele Sathane kutsi abonise indlela abetawubusa ngayo bantfu. Nkulunkulu uvumele nekutsi bantfu batibuse bacondziswa nguSathane.

14. Bafundzani bantfu ekuvumeleni kwaJehova kutsi batibuse?

¹⁴ Thishela lesikhulume ngaye wati kancono kutsi bafundzi labangalaleli baneliphutsa. Kodvwa uyabavumela kutsi babonise bafundzi bonkhe loko labebatsi bangakwenta. Lapho behluleka, bonkhe laba labanye bafundzi labalalelako batawubona kutsi thishela nguye kuphela lokwati kufundzisa. Ngemuva kwaloko bangacondza kutsi kungani thishela abacosha bafundzi labangalaleli esikhatsini lesitako. Ngalokufanako, Jehova uyati kutsi bonkhe bantfu labatsembekile netingilosi bayojabula nababona kutsi Sathane netihlubuki letikanye naye behlulekile nekutsi bantfu nabo abakwati kutibusa. NjengaJeremiya wasendvulo, bayofundza emaciniso labalulekile: “Awu, Simakadze [Jehova], ngiyati kutsi kute umuntfu lotiphatsele yena imphilo yakhe. Akusiko kwemuntfu kutsi aticondzisele yena tinyatselo takhe.”—Jeremiya 10:23.

15, 16. (a) Kungani Jehova avumele kuhlupheka kwachubeka sikhatsi lesidze kangaka? (b) Kungani Jehova angakabuvimbeli bugebengu?

¹⁵ Kungani pho Jehova ayekele kuhlupheka sikhatsi lesidze kangaka? Kungani angativimbeli tintfo letimbi kutsi tenteke? Ase ucabangele tintfo letimbili thishela lesikhulume ngaye nasifananisa langeke atente. Kwekucala, angeke amvimbele lomfundzi lovukelako kutsi asho loko lafuna kukusho. Kwesibili, thishela angeke amsite ekubaleni lesibalo. Ngendlela lefananako, ase sicabangele tintfo letimbili Jehova lavele watimisela kutsi angeke atente. Kwekucala, akamvimbeli Sathane nalabo labamsekelako kutsi betame kukhombisa kutsi loko labakushoko kuliciniso. Loko kudzinge lichi. Kuleminyaka letikhulungwane leyendlulile, bantfu betame tonkhe tinhlobo tekutibusa, kanye netinhlobo tabohulumende bebantfu. Bantfu batfutfuke benela etindzabeni tesayensi nakuletinye tici, kodvwa kungalungi, buphuya, bugebengu, kanye netimphi kube kubi kakhulu. Kubonakele kutsi bantfu bayehluleka kutibusa.

¹⁶ Kwesibili, Jehova akamelekeleli Sathane ekubuseni lelive. Nangabe Nkulunkulu abengavimbela bugebengu, bekungeke yini loko kukhombise kutsi usekela luhlangotsi letihlubuki? Bekungeke yini kwente bantfu bacabange kutsi encenye bangakwati kubusa ngendlela lephumelelako? Nangabe Jehova abengenta kanjalo, bekutakusho kutsi ucala emanga. Noko-ke “Nkulunkulu akasiye umuntfu kutsi angacala emanga.”—Numeri 23:19.

17, 18. Yini Jehova latayenta ngawo wonkhe umonakalo lobangelwe kubusa kwebantfu nemoya Sathane lanawo?

¹⁷ Kutsiwani-ke ngalomonakalo lomkhulu kangaka lowentekile kusukela bantfu bahlubuka kuNkulunkulu? Kufanele sikhumbule kutsi Jehova ungusomandla. Ngako angakwati kulungisa simo lesibi lesisemhlabeni futsi utasilungisa. Njengobe sesivele sifundzile, konakala kwemhlaba lesiphila kuwo kuyolungiswa lapho lomhlaba wentiwa liPharadisi.  Imiphumela yesono itawususwa ngekuba nekukholwa emhlatjelweni wesihlengo saJesu, futsi imiphumela yekufa iyocedvwa ngeluvuko. Nkulunkulu utawubese usebentisa Jesu ‘kucitsa imisebenti yaSathane.’ (1 Johane 3:8) Konkhe loku Jehova utakwenta ngesikhatsi sakhe lesifanele. Siyajabula ngekutsi akasitsatsanga ngematata sinyatselo, kodvwa wabeketela, loko kusinikete litfuba lekutsi sifundze ngaye futsi simkhonte. (2 Phetro 3:9, 10) Nyalo, Nkulunkulu ufuna kusita tonkhe tikhonti takhe leticotfo tibeketelele nobe ngukuphi kuhlupheka letingase tibhekane nako kulelive leligcwele tinkinga.—Johane 4:23; 1 Khorinte 10:13.

¹⁸ Labanye bangabuta, konkhe lokuhlupheka bekungeke yini kuvinjelwe kube Nkulunkulu abedale Adamu na-Eva ngendlela yekutsi bangakwati kuvukela? Kuphendvula lombuto, udzinga kukhumbula sipho lesiligugu Jehova lakuphe sona.

19. Ngusiphi sipho Jehova lasiphe sona, futsi kungani kufanele sisatise?

¹⁹ Njengobe sifundzile eSehlukweni 5, bantfu badalwa banenkhululeko yekutikhetsela. Uyabona yini kutsi sipho lesihle leso? Nkulunkulu wadala tilwane letinyenti futsi tona tiphila ngekulandzela imvelo. (Taga 30:24) Umuntfu wente emarobhothi lawente ngendlela yekutsi ente nobe yini latjelwe yona. Besingajabula yini kube natsi Nkulunkulu wasidala saba njalo? Cha, besingeke. Siyajabula ngekuba nenkhululeko yekwenta tincumo letinjengekutsi siyoba bantfu labanjani, siyophila  kanjani nekutsi bobani lesiyobakhetsa babe bangani betfu. Sifuna kujabula futsi nguloko kanye Nkulunkulu lakufunako.

20, 21. Ungasisebentisa njani sipho senkhululeko yekutikhetsela ngendlela lencono kakhulu, futsi kungani kufanele sifune kwenta njalo?

²⁰ Jehova akatsandzi kutsi simkhonte ngekucindzetelwa. (2 Khorinte 9:7) Ase sifananise: Ngukuphi lobekungajabulisa umtali kakhulu—kuva umntfwana atsi “ngiyakutsandza” abe atjelwe ngulotsite nobe lapho loko akusho kusuka kuye enhlitiyweni? Ngako umbuto utsi, wena utayisebentisa njani inkhululeko yekutikhetsela? Sathane, Adamu kanye na-Eva bayisebentisa kabi kakhulu inkhululeko yabo yekutikhetsela. Bamala Nkulunkulu Jehova. Wena uyokwenta njani?

²¹ Unelitfuba lekusebentisa lesipho lesimangalisako senkhululeko yekutikhetsela ngendlela lencono kakhulu. Ungaba sekhatsi kwetigidzi tebantfu letibe seluhlangotsini lwaJehova. Tenta Nkulunkulu ajabule ngekukhombisa kutsi Sathane ucala emanga nekutsi kubusa bantfu kuyamehlula. (Taga 27:11) Nawe ungenta lokufanako ngekukhetsa indlela lekahle yekuphila. Lendlela sitawucoca ngayo esehlukweni lesilandzelako.