1, 2. Abantu baina kubonabona kwa mulingo ki, kubaletire kwekaguza bikaguzo bya mulingo ki?

HANYUMA y’obulemu obw’amaani muno omu ihanga erimu, abantu babulikiro abakazi n’abaana ababuferiremu bakazikwa omu kituro kimu ekikoto kyehingulirizibwe obusalaba. Buli kasalaba karoho ekikaguzo: “Habwaki?” Ekikaguzo kinu baingi nikyo bakira kwekaguza obu babonesebwa bataina musango. Baina ennaku nyingi bekaguza ekikaguzo kinu hanyuma y’obulemu, ebigwa bitaragire, oburwaire, obucwi bw’ebiragiro okubaitira abagonzebwa babu, okubasisira amaka gaabu, n’okubaletera okubonabona okw’omulingo gundi gwoona. Baba nibagonza kumanya habwaki akabi nk’ako kabahikireho.

² Habwaki Ruhanga alekereho okubonabona? Yahwe Ruhanga bwaraba ali w’amaani, w’engonzi, w’amagezi, kandi w’obwinganiza, habwaki ensi ijuire kunobangana n’obutali bwinganiza? Wakekaguzahoga ebikaguzo binu?

3, 4. (a) Kiki ekikwoleka ngu teri nsobi kukaguza habwaki Ruhanga alekereho okubonabona? (b) Yahwe ahu’ra ata obwarora obubi n’okubonabona?

³ Eri nsobi kukaguza habwaki Ruhanga alekereho okubonabona? Abamu batekereza ngu kukaguza ekiguzo ky’amulingo  ogwo nikisobora kumanyisa ngu tibaina kwikiriza okugumire rundi tibakuha Ruhanga ekitiinisa. Obworaba n’osoma Baibuli noija kusanga ngu abahereza ba Ruhanga abaira abesigwa, kandi abatiinaga Ruhanga, bakaba n’ebikaguzo nk’ebyo. Nk’eky’okurorraho, nabbi Habakuki akakaguza Yahwe: “Kiki onyoleka okutahiki’ra, norora ha butigi? Baitu okunyaga nitima biri omu maiso gange, kandi haroho empaka, nenkungani imuka.”—Habakuki 1:3.

⁴ Yahwe akafubira nabbi Habakuki habw’okukaguza ebikaguzo bya mulingo ogwo? Nangwa. Baitu Ruhanga akaikiriza ebigambo bya Habakuki kuhandiikwa omu kigambo kye Baibuli. Kandi Ruhanga akamukonyera kwetegereza kurungi ensonga ezo yagumya n’okwikiriza kwe. Yahwe akugonza kukuko’ra ekintu nikyo kimu. Kijuke ngu Baibuli egamba ngu ‘akufaho.’ (1 Petero 5:7) Ruhanga nuwe akira abantu boona kunoba obubi n’okubonabona. (Isaya 55:8, 9) Obukiraba kiri kityo, habwaki haroho okubonabona kwingi omu nsi?

5. Obundi n’obundi bulyo ki obuhebwa kulengaho kusoborra habwaki abantu nibabonabona, baitu yo Baibuli eyegesa ki?

⁵ Abantu ab’amadiini agakwahukana bahiki’ra abebembezi  n’abegesa b’amadiini gaabu nibabakaguza habwaki haroho okubonabona kwingi. Emirundi nyingi, babagarukamu ngu okubonabona eri ntekaniza ya Ruhanga ngu kandi akatekaniza ira buli kintu ekibaho otwaliremu n’ebintu ebibi muno ebitugwera. Baingi babagambiira ngu emiringo ya Ruhanga tekusobora kwetegerezebwa, ngu nuwe aletera abantu—n’abaana abato okufa—abatwale omuiguru aikale nabo. Baitu nkoku omazire ira kwega, Yahwe Ruhanga tali nuwe ndugi’ro y’okubonabona. Baibuli egamba: “Kimuli hara Ruhanga okukora obubi, kandi Owobusobozi bwona okukora okutahiki’ra.”—Yobu 34:10.

6. Habwaki abantu baingi bakora ensobi y’okujunana Ruhanga habw’okubonabona okuli omu nsi?

⁶ Omanyire habwaki abantu bakora ensobi ey’okujunana Ruhanga habw’okubonabona okuli omu nsi? Emirundi nyingi bajunana Ruhanga ow’Obusobozi Bwoona nibatekereza ngu nuwe mulemi wensi enu. Tibamanyire ekintu ekikuru muno Baibuli eky’eyegesa. Okakyegaho omu Suura 3 ey’ekitabu kinu. Omulemi w’ensi enu wonyini ali Setani Omuhangirizi.

7, 8. (a) Ensi eyoleka eta emiringo y’omulemi wayo? (b) Okutahiki’ra kw’omuntu, ‘obusumi n’obutandwa’ by’ongerize bita ha kubonabona kw’abantu?

⁷ Baibuli eyoleka kurungi ngu: ‘Ensi yoona ikaire omu mubi.’ (1 Yohana 5:19) Obwo kukitekerezaho, tokurora ngu ekyo kihikire? Ensi enu ekwoleka emiringo y’ekihangwa ky’omwoyo ekitarukurorwa “arukubihabiha ensi zona.” (Okusuku’rwa 12:9) Setani taina kugonza, w’ebisuba, kandi aine itiima. Nahabwekyo ensi enyakuli hansi y’obusobozi bwe, ijuire enobi, ebisuba, n’ebikorwa by’itiima. Bunu nubwo bulyo bw’okubanza habwaki haroho okubonabona kwingi.

⁸ Nkoku twayegere omu Suura 3 ensonga ey’akabiri habwaki haroho okubonabona kwingi eri, abantu baikaire batahikirire kandi bali basiisi kuruga ha kujeema okwabaire omu rugonjo rw’Adeni. Abantu baikara nibarwanira obwebembezi kandi kinu kirugamu obulemu, okumigiriza abaandi n’okubonabona. (Omugambizi 4:1; 8:9) Obulyo bw’akasatu oburugi’raho  okubonabona buli nti, ‘baitu bona bagwerwa kwonka obusumi nobutandwa.’ (Omugambizi 9:11) Omu nsi etaina obulemi n’obulinzi bwa Yahwe, abantu nibasobora kubonabona habw’okusangwa omu kiikaro n’akasumi akatahikire.

9. Habwaki nitusobora kukigumya ngu Ruhanga aina ensonga nnungi ey’okulekaho okubonabona?

⁹ Kitugarramu amaani kumanya ngu Ruhanga tali nuwe ndugirro y’okubonabona kwaitu. Tali nuwe aletaho obulemu, obucwi bw’ebiragiro, okumigirizibwa, n’ebyo ebigwa bitaragire ebiretera abantu kubonabona muno. Nabwo, nitugonza tumanye, Habwaki Yahwe alekereho okubonabona kunu kwoona? Obwaraba ali nuwe arukuki’rayo kimu amaani, aina obusobozi kukwihaho. Baitu, habwaki atabaho n’ekyakoraho? Ruhanga waitu ow’engonzi ou tumanyire kurungi atekwa kuba aina ensonga ennungi.—1 Yohana 4:8.

10. Setani akaletaho kugurukyagurukya kwa mulingo ki, kandi ata?

¹⁰ Kwetegereza habwaki Ruhanga aikiriza okubonabona kukabaho, twina kugarukireyo kimu okubonabona nambere kwatandikiire. Setani obu yaletiire Adamu na Hawa kujemera Yahwe, haroho ensonga enkuru muno eyaizireho. Setani atagurukyegurukye amaani ga Yahwe. Nawe akimanyire ngu amaani ga Yahwe tigaina nkango. Oihireho, akagurukyagurukya obukuru bwa Yahwe kulema. Kweta Ruhanga w’ebisuba atarukugondeza abahereza be ebirungi, Setani akagamba ngu Yahwe mwebembezi mubi. (Okubanza 3:2-5) Akaba nk’akugamba ngu abantu bakubaire kurungi muno batali hansi y’obwebembezi bwa Ruhanga. Kunu kukaba kusonsoimya hali obukuru bwa Yahwe kulema.

11. Habwaki Yahwe atarahwerekeririzeho abajeemu omu Adeni?

¹¹ Adamu na Hawa b’akajemera Yahwe. Omu kukora ekyo, bakaba nk’abakugamba ngu: ‘Titukwetaga Yahwe kuba Mulemi waitu. Nitusobora kwecweramu ekihikire n’ekitahikire.’ Yahwe yakujangurwire ata ensonga enu? Yakumanyisize ata ebihangwa eby’amagezi ebindi ngu abajemu banu basobya, kandi  ngu obwebembezi bwe nubwo bukuki’rayo kimu oburungi? Omuntu omu yakugambire ngu Yahwe yakubaire ahwerekerize abajemu abo murundi gumu, kandi atandika buhyaka. Baitu Yahwe akaba ayolekere ira ekigendererwa kye kwijuza ensi n’oruzaro rwa Adamu na Hawa kandi akaba nagonza baikale omu rugonjo ha nsi. (Okubanza 1:28) Yahwe bwoona ahikiriza ebigendererwa bye. (Isaya 55:10, 11) Ekyo okiteire ha rubaju, kuhwerekereza abajeemu abo omu Adeni tikikwihireho ensonga enkuru eyabaire eresirweho ekwatiraine n’obukuru bwa Yahwe kulema.

12, 13. Hayo eky’okurroraho ekikwoleka habwaki Yahwe aikirize Setani kuba mulemi w’ensi enu kandi habwaki akirize n’abantu kwerema bonka?

¹² Katurole eky’okurorraho. Tekereza ha mwegesa akusoborra abeegi be omulingo gw’okubaramu omuhendo ogugumire. Omwana omugezi kyonka ali mujeemu, we n’agamba ngu eky’okurorraho omwegesa ekyabahaire tikihikire. N’alengaho kumanyisa ngu omwegesa onu tahikire, omujeemu onu n’agenda omu maiso n’okugamba ngu uwe amanyire omulingo ogukukiraho oburungi ogw’okubaramu omuhendo ogwo. Abeegi abamu nibatekereza ngu omwegi mugenzi waabu ahikire,  kandi bamweteranizaho omu bujeemu bwe. Omwegesa yakukozire ki? Kakusangwa abinga abajeemu banu kuruga omu kitebe abeegi abaandi barakitwara bata? Tibaratekereze ngu rundi omwegi mugenzi waabu n’abaandi abamweteranizeho babaire bahikire? Abeegi abaandi n’abo nibasobora kulekeraho kuhereza omwegesa onu ekitiinisa, nibatekereza ngu atinire omwana atamwoleka nk’oku atarukusobora kwegesa kurungi. Omwegesa acwamu kuhereza omwana omujeemu ogwo akagisa kwoleka omulingo ogu yakusoboroiremu omuhendo ogwo.

¹³ Yahwe akozere ekintu nikyo kimu nk’omwegesa akozire. Ijuka ngu abajeemu b’omu Adeni tibali nibo bonka abakaba nibakwatwaho. Obukaikuru n’obukaikuru bwa bamaraika bakaba nibarora ebirukugenda omu maiso. (Yobu 38:7; Danieri 7:10) Omulingo Yawe yakukwasiremu obujeemu obwo gwakubaire nakikoto eki gukukozire ha ntekereza y’abamaraika kandi hanyuma na n’abantu boona. Yahwe akozire ki? Aikirize Setani ayoleke omulingo yakwebembiremu abantu. Aikirize n’abantu kwerema bonka hansi y’oburagirizi bwa Setani.

14. Yahwe kucwamu kuleka abantu kwerema kirabagasira kita?

¹⁴ Omu ky’okurorraho kyaitu omwegesa amanyire ngu omujeemu n’abeegi bagenzi be abakumusemba tibahikire. Kyonka kandi akimanyire ngu kubaha omugisa kulengaho kwoleka obusobozi bwaabu nikisobora kukonyera ekitebe kyoona. Abajeemu obu baralemwa, abaana abesigwa boona nibaija kukirora ngu omwegesa nuwe wenka akugukire kwebembera ekitebe. Hanyuma obwarabinga abajeemu banu omu kitebe abeegi boona nibaija kwetegereza habwaki akikozere. Omu mulingo nugwo gumu, Yahwe akimanyire ngu abantu boona abesigwa hamu n’abamaraika obu bararora Setani n’abantu boona abajeemu balemerwe, nibaija kukimanya ngu abantu tibarukusobora kwerema. Okusisanaho Yeremiya owaira, nibaija kwega ekintu kinu ekikuru muno: “Ai Mukama, manyire nti omuhanda ogwomuntu tiguli omuluwe wenka: tikiri omu muntu arukugenda okuterekereza ebigerebye.”—Yeremiya 10:23.

15, 16. (a) Habwaki Yahwe alekereho okubonabona kumara akasumi karaira? (b) Habwaki Yahwe atatangire ebikorwa ebibi muno nk’okucwa ebiragiro kubaho?

¹⁵ Baitu habwaki Yahwe alekereho okubonabona kumara akasumi karaira? Kandi habwaki tatangira ebintu ebibi kubaho? Wetegereze ebintu bibiri omwegesa w’omu ky’okurorraho ky’aitu ebyatakukozere. Eky’okubanza, takuhakaine omweegi omujeemu kwoleka ensonga ye. Eky’akabiri, omwegesa tiyakukonyire omujeemu onu nasoborra ensonga ye. Omu mulingo nugwo gumu na Yahwe amalirire butakora ebintu bibiri. Eky’okubanza, tahakaine Setani naabo abakumweteranizaho kulengaho kwoleka ngu bahikire. Kibaire nikyetagisa kuleka omwanya gukarabaho. Emyaka nkumi n’enkumi eyakarabaho omu byafayo by’omuntu, abantu balengereho gavumenti ez’enyahukana. Abantu bakozere enkurakurana omu by’asayansi n’omu bintu ebindi, kyonka obutali bwinganiza, obunaku, obucwi bw’ebiragiro hamu n’obulemu bikweyongera bweyongera. Kyeyolekere kurungi ngu obulemi bw’abantu bulemerwe.

¹⁶ Eky’akabiri, Yahwe takonyire Setani kulema ensi enu. Kakusangwa Ruhanga atanga ebikorwa ebibi kubaho tiyakubaire omu mulingo ogwo n’asagika obulemi bw’abajeemu? Ruhanga tiyakubaire n’aletera abantu kutekereza ngu nibasobora kwerema bonka batatungire mitalibaine yoona? Kakusangwa Yahwe akora atyo, kyakumanyisize ngu nawe akusagika ebisuba. Kyonka ‘tikisoboka Ruhanga kubiiha.’—Abaheburaniya 6:18.

17, 18. Yahwe arako’ra ki obubi bwoona oburugire omu bulemi bw’abantu n’ebyo Setani eby’akozere?

¹⁷ Kandi kiri kita ha bintu ebibi byoona ebikozerwe kuruga okujeemara Ruhanga obu kwatandikire? Twina kukiijuka ngu Yahwe ali w’obusobozi bwoona. Nahabwekyo nasobora, kandi naija kwihaho byoona ebikurugi’raho okubonabona. Nkoku tumazire kwega, okusiswa kw’obuhangwa kwija kumarwaho ensi obw’erafooka Rugonjo rwa Ruhanga. Kuraba omu kwikiririza omu kicunguro kya Yesu byoona ebiruga omu kibi nibija kumarwaho,  kandi kuraba omu kuhumbuka, n’okufa nikwija kumarwaho. Ruhanga alikozesa Yesu “ahwerekereze emirimo ya Setani.” (1 Yohana 3:8) Binu byoona Yahwe alibikora omu kasumi ke akasemerire. Nitusiima habwokuba okugumisiriza kwe, kumuleteire kulindaho kukikora kinu kyatuhereza omugisa kwega amananu n’okumuhereza. (2 Petero 3:9, 10) Omu kasumi niko kamu, Ruhanga aikaire n’aserra abaramya abesigwa kandi n’abakonyera kugumisiriza okubonabona kwoona okubakutunga omu nsi enu embi.—Yohana 4:23; 1 Abakolinso 10:13.

¹⁸ Abamu basobora kwekaguza, okubonabona kwakubaire kutangirwe kakuba Ruhanga yahangire Adamu na Hawa batarukusobora kumujeemera? Kugarukamu ekikaguzo ekyo, noyetaga kwijuka ekisembo eky’omuhendo Yahwe eki yakuhaire.

19. Kisembo ki eky’omuhendo Yahwe ekyatuhaire, kandi habwaki twine kukisiima?

¹⁹ Nkoku twarozere omu Suura eya 5, abantu bakahangwa n’obugabe bw’okwecweramu. Okimanyire ngu ekyo kisembo ky’omuhendo mwingi muno? Ruhanga akahanga ebisoro bingi muno, kyonka bihondera buhondera magezi agabihangirwemu. (Enfumu 30:24) Abantu nabo bakozere ebyooma ebikusobora kukora buli kimu ekyabitegekiirwe kyonka bitaina magezi g’okwecweramu. Twakusemerirwe kakuba Ruhanga yabaire atuhangire mulingo ogwo? Nakataito, twina kusiima obugabe bw’okusobora kwecweramu muntu wa mulingo ki ou tukugondeze tube, bw’omezi bw’amulingo ki obu tukugondeze, bantu ba  mulingo ki aba twakugondeze kufora banywani baitu n’ebindi bingi. Tugonza muno kuba n’obugabe bw’okwecweramu kandi na Ruhanga nikyo arukutugondeza.

20, 21. Twakukozeseze tuta ekisembo ky’okwecweramu omu mulingo ogurukuki’rayo kimu oburungi, kandi habwaki twakugondeze kukora tutyo?

²⁰ Yahwe agonza tumuhereze tutakuhambirizibwa. (2 Abakolinso 9:7) Nk’eky’okurorraho, kiki ekyakukizire kusemeza omuzaire—omwana kumugamba “Ninkugonza” habw’okuba bamugambire akimugambe rundi ki kirugirre kimu ha mutima gwe? Hati ekikaguzo kiri, orakozesa ota obugabe bw’okwecweramu Yahwe obw’akuhaire? Setani, Adamu, na Hawa bakakozesa kubi ekisembo kinu eky’okwecweramu. Bakanga Yahwe Ruhanga. Iwe orakora ota?

²¹ Oina omugisa gw’okukozesa ekisembo ky’okwecweramu omu mulingo ogukuki’rayo kimu oburungi. Nosobora kweteraniza ha bukaikuru n’obukaikuru bw’abantu abakomeremu kuba harubaju rwa Yahwe. Baletera Ruhanga kusemererwa kwingi habwokuba bakyoleka ngu Setani mubiihi kandi alemerwe nk’omulemi. (Enfumo 27:11) Naiwe nosobora kukora nikyo kimu n’ocwamu kurubasa obw’omezi bwaawe omu mulingo ogukukirayo oburungi. Kinu nikyo ekirabazibwaho omu suura eragarukaho.