1, 2. მუშენ იტანჯებუ ხალხი დო მუნერ კითხვეფ ურჩქინდუ ბრელს?

ართ ქიანას საცოდება ჩხუპიშ დროს მუთუნ ბრალ ვაუღუდუნ ფერ ანთასობით ოსურკოჩიქ დო ბაღანაქ გოჭყორდუ. თინეფ არძა ართ საერთო სასაფლას დონთხორეს. თე სასაფლა ჯვარეფით გეშაჭოფეს, სოდეთ მიკოჭარუდ: „მუშენ?“ მინშა თე კითხვაშე დიდ გურჭუა იძირე. განწარებულ ხალხის თე კითხვა ურჩქინდუ, მუჟამს ჩხუპიშ, სტიქიურ უბედრობაშ, ლახალაშ დო დამნაშავეობაშ გურშენ უღურუნა სოჸოროფო კოჩ, უდინუნა ოზე დო კარი, ვარდა უიმენდოთ რენა. თინეფს ოინტერესნა, მუშენ გიოტირხუნა დუდის თეცალ უბედრობეფი.

² მუშენ უშვენს ღორონთი კოჩიშ ტანჯებას? იეჰოვა ღორონთი ირფელიშ შემალებე, მოჸოროფე, ბრძენი დო სამართლიან ქორენ-და, მუშენ რე მსოფლიოს თესხი უსამართლობა დო მუშენ ჯოგუ ხალხის ართიან? დღას ქოიფიქრებნო თეცალ საკითხეფშენ?

3, 4. ა) სოვრეშე იძირე, ნამდა მუთუნ გლახა ვა რე, მოინტერესდან, მუშენ უშვენს ღორონთი უბადობას? ბ) მუჭო უჯინე იეჰოვა უბადობას დო ხალხიშ ტანჯებას?

³ ქორენო სწორ თიშ კითხირ, მუშენ უშვენს ღორონთი კოჩიშ ტანჯებას? ნამთინე ფიქრენს, ნამდა თეშ შეკითხირ რწმენაშ  ნაკლებობას ვარდა ღორონთიშ უპატიცემუობას ნიშნენს. მარა ბიბლიაშ კითხირიშ დროს ქოძირუნქ, ნამდა ღორონთიშ მოშიშ დო ართგურ ხალხის ხოლო ურჩქინდუდ თეშნერ კითხვეფი. მაგალთო, წინასწარმარაგადე აბაკუმქ იეჰოვას კითხუ: „მუშენ მოჯინუანქ სიავეშა დო მუშენ უჯინექ უბადობას? მუშენ მუთმოხვადუ გორჩუალა დო ნძალება ჩქიმ თოლიშ წოხლე? მუშენ ჩხუპენა დო მუშენ ნირზენა?“ (აბაკუმი 1:3).

⁴ განჭყორუო იეჰოვაქ ართგურ წინასწარმარაგადეს თეცალ შეკითხირშენ? ვარ. პირიქით, აბაკუმიშ ალალ გურით ნარაგად სიტყვეფქ ღორონთიშ შთაგონებათ ბიბლიას ქენიჭარუ. ღორონთიქ აბაკუმს მეხვარ, მეტი ქუგუგებუდკო თე საკითხიშ გურშენ დო რწმენა უმოსო გამანგარებუდკონ. იეჰოვას ოკო, ნამდა სი ხოლო ქიმგეხვარას. ქიგიშინ, ბიბლია მუს იჩიებუნ, „თინა [ღორონთი] ზრუნენს თქვანო“ (1 პეტრე 5:7). ღორონთის ირ კოჩიშ უმოსო ჯოგუ უბადობა დო ჩქინ უმოსის აწუხენს ხალხიშ ტანჯებაშ ჯინა (ესაია 55:8, 9). აბა მუშენ რე თესხი უბედრობა თე ქიანას?

5. მინშა მუჭო ეთმონწყუნა ხალხიშ ტანჯებაშ მიზეზის, მარა მუს მოგურუანა ბიბლია?

⁵ შხვადოშხვა რწმენაშ ხალხი მინშა მუნეფიშ მოძღვარს  ოკითხუნა, მუშენ რე თესხი უბედრობა? ხშირას თინეფი პასუხენა, ნამდა თენა ღორონთიშ ნება რე დო თის წინასწარ აფუდ გინოჭყვადილ ირფელი, მუთ მსოფლიოს მუთმოხვადუ დო თეწკუმა ართო ბრელ ტრაგიკულ შემთხვევა ხოლო. ხალხის ურაგადნა, ნამდა ღორონთიშ შარა მითინს ვაგაგინე დო თიშ ნება რე კოჩიშ ღურა — ბაღანეფიშ ხოლო — მუწკუმა ზეცაშა მიდეჸონასინ თიშენ. მარა მუჭოთ მიჩქნა, ღორონთშე დღას ვა მურს უბადობა. ბიბლია იჩიებ: „შორს რე ღორონთშე უბადობა დო ირფელიშ შემალებეშე — უსამართლობა!“ (იობი 34:10).

6. მუშენ აბრალუაფ ხალხი ღორონთის თი უბედრობეფს, მუთ მსოფლიოს მუთმოხვადუ?

⁶ ქოიჩქუნო, მუშენ აბრალუაფ ხალხი ღორონთის თი უბედრობეფს, მუთ მსოფლიოს მუთმოხვადუ? მუშენდა ირფელიშ შემალებე ღორონთი მიორჩქუნა თე ქიანაშ მართველო. თინეფს ვა უჩქუნა ართ უბრალო ჭეშმარიტება, მუდგას ბიბლია მოგურუანა. თე წიგნიშ მა-3 დუდშე ქიგებგით, ნამდა სინამდვილეს სატანა ეშმაკ განაგენს თე ქიანას.

7, 8. ა) სოვრეშე იძირე, ნამდა თე ქიანა მუშ თვისებეფით მუშ მართველს გუ? ბ) მუჭო შილებე რდას ხალხიშ ტანჯებაშ მიზეზი არასრულყოფილება დო „დრო დო შემთხვევა“?

⁷ ბიბლია გასაგებო იჩიებ: „მთელ ქიანა უბადოშ ხეს რე“ (1 იოანე 5:19). დეფიქრი, დასურო თაშ ვა რენო თენა? თე ქიანას მახორუ ხალხი მუშ თვისებეფით ზუსტას თი სულიერ ქმნილებას გუ, მიდგას „შეცდომაშა მიშმაჸუნს მსოფლიო“ (გამოცხადება 12:9). სატანა უბადო, მეტყურე დო უდუნდებელ რე. თეშ შედეგი თინა რე, ნამდა თე ქიანა, ნამუთ თიშ გავლენაშ თუდო რენ, ეფშა რე ტყურათ, ართიანიშ გოჯოგაფათ დო უდუნდებუობათ. თენა რე ართ-ართ მიზეზ, მუშ გურშენ რე თესხი უბედრობა.

⁸ მაჟია მიზეზი, მუჭოთ მა-3 დუდშე ბძირითინ, თინა რე, ნამდა ხალხიქ არასრულყოფილო დო ცოდამო გინირთ, ადამ დო ევაქ ღორონთის ვა დუჯერესინ თიშ უკულ. ცოდა უღუნ თი ხალხის შურ ოლუ ძალაუფლებაშა; თეს ხალხიშ არდება დო წვალება მოჸუნს (ეკლესიასტე 4:1; 8:9). მასმა მიზეზ რე „დრო დო შემთხვევა“ (წეკითხი ეკლესიასტეშ 9:11). ქიანას, სოდეთ იეჰოვა  ვა რე მართველინ, კოჩიქ შილებე სოდგაინ გლახა დროს გლახა ადგილს ქუმოხვადას დო ათეშგურშენ გლახაქ ქაღოლას.

9. მუშენ ოკო ვორდათ დარწმუნებულ, ნამდა იეჰოვას უღუ სერიოზულ მიზეზ, მუშ გურშენით უშვენს ხალხიშ ტანჯებას?

⁹ გურს მომჰამუანა თიშ რჩქინა, ნამდა ტანჯება დო წამებაშ მიზეზ ღორონთი ვა რე. ღორონთის ვემშუძ ბრალ ჩხუპეფშა, დამნაშავეობაშა, ჩაგრებაშა დო სტიქიურ უბედრობეფშა. მარა იშენ ოკო მიჩქუდან პასუხი, მუშენ უშვენს ღორონთი ტანჯებას. ირფელიშ შემალებე ღორონთის თიშ ძალა ხოლო უღუ, ბოლო მუღას თეს. მარა მუშენ ვართ მუთუნს? ღორონთის ნამდვილო უღუ თეშ სერიოზულ მიზეზი, მუშენდა მუჭოთ ბიბლიაშე გებგითინ, თინა მოჸოროფე რე (1 იოანე 4:8).

10. მუ საკითხ გინართინუ სატანაქ ონირზებელო დო მუჭო?

¹⁰ მორთ ქიგებგათ, მუშენ უშვენს ღორონთი კოჩიშ ტანჯებას. თეშ გურშენ ქიგიფშინათ, მუქ მოხვად კაცობრიობაშ ისტორიაშ დაჭყაფუს დო მუჭო დიჭყუ წვალებურ ცხოვრებაქ. მუჟამს სატანაქ ადამ დო ევა მიოჩილითუ დო თინეფქ იეჰოვას ვა დუჯერესინ, გორჩქინდ ონირზებელ საკითხიქ. სატანას იეჰოვაშ დიდ ძალა ვეგურინუაფ ეჭვიშ თუდო, მუშენდა თის გვალო ჯგირო უჩქუ, ნამდა იეჰოვას უზომეთ დიდ ძალა უღუ. სატანაქ ონირზებელო გინაშქუ საკითხი, ქოუღ დო ვარ იეჰოვას მართველობაშ უფლება (წეკითხი დაბადებაშ 3:2—5). სატანაშ სიტყვეფშე იძირედ, ნამდა ხალხი ღორონთიშ მართველობაშ უმშო უჯგუშო იჸიდეს. თენა იეჰოვაშ უზენაესობაშ დო მართველობაშ უფლებაშ წინააღმდეგ ულას ნიშნენდ.

11. მუშენ ვა მოსპუ იეჰოვაქ მუშ მოწინააღმდეგეეფი?

¹¹ ადამ დო ევაქ დეპირისპირეს იეჰოვას. ფაქტობრივო თინეფქ თქუეს: „ჩქი ვა მოსაჭირნა იეჰოვა ჩქინ მართველ რდასინ. ჩქი ჩქინით შემლებნა გინობჭყვიდათ, მუ რე ჯგირ დო მუ რე ფური“. მუჭო ოკო გინოჭყვიდუკო იეჰოვაქ თე მნიშვნელოვან საკითხი, ნამუქით ონირზებელო გინირთ? მუჭო ოკო უძირაფუდკო არძა გონიერ ქმნილებაშა, ნამდა მოწინააღმდეგეეფი ვა  რდეს მართალ დო მუშ მართველობაშა ნამთინ მართველობას ვემიართედ? მითინქ შილებე იფიქრას, ნამდა ღორონთის უბრალოთ მასპალ აფუდ მუშ მოწინააღმდეგეეფ დო ირფელ დუდშე დაჭყაფალი. მარა იეჰოვას უკვე დოჭყაფილ აფუდ მუშ განზრახვაშ შესრულება, ნამდა ადამ დო ევაშ გამნარყის დედამიწას დოუხორინუდკო დო სამოთხეშ პირობეფს უცხოვრებუდკო (დაბადება 1:28). იეჰოვა მუდგას განიზრახენსინ, თის ირო ასრულენს (ესაია 55:10, 11). თეშ გარდა, მოწინააღმდეგეეფიშ მოსპუალათ პასუხი ვემიაჩამუდ თი კითხვას, ნამდგაქ ეჭვიშ თუდო გიორინუ იეჰოვაშ მართველობაშ უფლება.

12, 13. მაგალითით გენწყი, მუშენ მეჩუ იეჰოვაქ სატანას საშვალება, ქოჸოფედკო თე ქიანაშ მართველ დო მუშენ მიაშკუ ხალხი მუნეფიშ ნებაშა.

¹² ქიმიპჸონათ მაგალითი: მასწავლებელი მოწაფეეფს ეუნწყუნს, მუჭო გიმიჸონან ძნელ ამოცანა. ართ ჭკვერ, მარა ბუნტიშ დუდ მოწაფე იჩიებ, ნამდა მასწავლებელ სწორას ვეთმონწყუნს ამოცანას. თე მოწაფექ ეჭვიშ თუდო ქიგიორინუ მასწავლებელიშ რჩქინა დო იჩემენს, ნამდა მუს უჯგუშ შარა უჩქუ თე ამოცანაშ გიმაჸონაფალო. ნამთინე მოწაფე ფიქრენს, თე ბაღანა მართალ რენ დო თინეფქ ხოლო თიშ მხარე ქიდეკინეს. მუჭო  ოკო მიქცუას მასწავლებელქ? კლასის ქუდატებაფუანს ბუნტიშ დუდებს-და, მუს იფიქრენა შხვა მოწაფეეფი? ვეფიქრენანო თინეფ, კლასელეფ მართალ რდესინ? დანარჩენ მოწაფეეფქ შილებე მასწავლებელიშ პატიცემა მიოდინუან დო იფიქრან, ნამდა თის აშკურინ, სიმართლექ ვეგმორჩქინდუკო. წერმიბდგინათ თეცალ მუდგარენ: მასწავლებელ პირველ მოწაფეს საშვალებას არზენს, კლასიშ წოხოლე მუშობურო გენწყას თე ამოცანა.

¹³ იეჰოვაქ ხოლო თე მასწავლებელცალო მიქცუ. ქიგიშინ, მილიონობით ანგელოზი ოკვირუდ თის, მუდგაქ ედემიშ ბაღის მოხვადუნ (იობი 38:7; დანიელი 7:10). ანგელოზეფ დო არძა გონიერ ქმნილებეფწკუმა მანგარო იმოქმედენდ თინა, მუჭო მექციებუდ იეჰოვა მოწინააღმდეგეეფს. მუჭო მიქცუ იეჰოვაქ? ღორონთიქ სატანას ქიმეჩ საშვალება, ქუძირაფუდკო, მუნერ მართველ იჸუაფუდუნ. ღორონთიქ ხალხის ხოლო ქიმეჩუ თიშ ნება, მუჭოთ მუნეფს ოკოდეს თეშ უცხოვრებდესკო სატანაშ ხენჯღვერუაშ თუდო.

14. მუ ჯგირობუა მაჸუნუ თის, ნამდა იეჰოვაქ ხალხის ნება მეჩუ მუნეფიშით იჸონან ცხოვრება?

¹⁴ ჟიშე მოჸონაფილ მაგალითშე მასწავლებელს უჩქუ, ნამდა მუს ონირზუნა თი მოწაფეეფი ვარენა მართალი. მარა მასწავლებელს არჩქილე მთელ კლასშო მუჭომ ჯგირ იჸუაფ, თე მოწაფეეფს მუნეფიშ აზრიშ დამტკიცებაშ საშვალებას ქიმეჩანს-და. მუჟამს ბუნტიშ ემატახალეფს მუთუნ ვეგშალენან, სიმართლე ოინტერესნა თი მოწაფეეფ დერწმუნებუნა, ნამდა ხვალე მასწავლებელს შეულებ კლასიშ ჯგირ ხენჯღვერუა. თეშ უკულ მოწაფეეფს ვაგუკვირდუნა, მუშენ დატებაფუანს მასწავლებელ კლასის თე ურჩ მოწაფეეფს. ათეშნერო, იეჰოვას უჩქ, ნამდა მუშ არძა ალალ მსახურშო დო ანგელოზშო ჯგირ იჸუაფ, ქოძირან მუჭო სატანა დო თიშ ხუჯიშდუმაკინალეფს ვამაღინენა ჯგირობუა დო ვართ ხალხის შეულებ მუნეფიშით იჸონან ცხოვრება. არძა ქოძირუნს, ნამდა ჯვეშ დროშ მაცხოვრებელ წინასწარმარაგადე იერემიაშ სიტყვეფ მართალ რე: „მიჩქუ, იეჰოვა, ნამდა კოჩიშ ნებაშა ვა რე თიშ შარა; მიმალ კოჩის ვანჯღვარებე მუშ ნაბიჯეფშა“ (იერემია 10:23).

15, 16. ა) მუშენ დუშვუ იეჰოვაქ, ნამდა ხალხიშ ტანჯებაქ თესხი ხანს გეგრძელკონ? ბ) მუშენ ვართ იეჰოვა მუთუნს, ნამდა ვა დუშვას უბედრობეფი?

¹⁵ მუშენ დაუშვუ იეჰოვაქ, ნამდა ხალხიშ ტანჯებაქ თესხი ხანს გეგრძელუკო? მუშენ ვართ მუთუნს, ნამდა ვა მოხვადას უბედრობებქ? დეფიფქრათ, მუ ვაქიმინ მასწავლებელქ ჟიშე მოჸონაფილ მაგალითის. პირველი, თის ვაუცილებ მოწაფეშა ამოცანაშ ენწყუმაშ დროს. მაჟია, ვართ ამოცანაშ ენწყუმას მოხვარებუ. ათეშნერო იეჰოვაქ გეგნოჭყვიდ, მუ ვა უკეთებუდკო. პირველ, იეჰოვაქ ვაგაჩერ სატანა დო თიშ ხუჯიშელმარინეფი, ნამდა ქიძირკო, ქორდეს დო ვარ თინეფ მართალი. თეშ გურშენ საჭირო რდუ დროშ მიკულა. ანთასწანეფიშ დინახალე ხალხის უღუდ საშვალება, ღორონთშე დამოუკიდებელო მოსინჯესკო კოჩიშ მართველობაშ არძანერ ფორმა. კაცობრიობაქ მნიშვნელოვან წარმატებას მიოჭირინუ მეცნიერებას დო შხვა სფეროეფს, მარა უსამართლობა, უღონობა, კრიმინალ დო ჩხუპეფიშ გურშენ მდგომარეობა უმოსო იუარესებუ. ამდღა უკვე არგამათ იძირე, ნამდა კოჩიშ მართველობაქ ვა გამართ.

¹⁶ მაჟია: იეჰოვა ვა მოხვარებ სატანას თე ქიანაშ მართუას. ღორონთი ჩარიებედკო დო ვა დუშვებუდკო, მაგალთო, უბედრობეფ, თეთ ხეს ვეშუნწუნდუო მუშ მოწინააღმდეგეეფს? ვეფიქრენდუო ხალხი, ნამდა თინეფს შეულებნა მუნეფიშ დუდიშ მართუა გლახა შედეგეფიშ უმშო? იეჰოვას თაშ ქუმუქციებუდკონ, თინა ტყურაშ მონაწილე იჸუაფუდუ. მარა ბიბლია იჩიებ, ნამდა „დღას ვა მოხვადუ ღორონთიქ ტყურა ქოთქუას“ (ებრაელები 6:18).

17, 18. მუს აკეთენს იეჰოვა, ტანჯებაშ ირნერ კვალიშ მასპალო, ნამუქით კოჩიშ მართველობას დო სატანაშ გავლენას მაჸუნ?

¹⁷ მუ ირაგადე თი დუდიშოტახალ შედეგეფშენ, ნამდგაქ სატანაშ ბრელ ხანიშ მართველობას მაჸუნ? ვა გუმოჭყორდან, ნამდა იეჰოვა ირფელიშ შემალებე რე. ღორონთის უღუ ძალა დო ოკო კოჩიშ ტანჯებაშ ირნერ კვალ დოლასას. მუჭოთ გებგითინ, ჩქინ პლანეტაშ გაპარტახებას ბოლო მეღებუ დო დედამიწა  სამოთხეთ გინირთუ. იესო ქრისტეშ გიშაჸიდირალიშ რწმენათ ხალხი ცოდაშ შედეგეფშე გენთავისუფლებუ დო ღურელეფიშ გათელებათ ღურაშ ირნერ შედეგი დილასუ. თეგვარო, იესო ღორონთშე მოჩამილ ძალაუფლებათ აკარღვანს „ეშმაკიშ საქმეეფს“ (1 იოანე 3:8). თეს იეჰოვა მუშ დროს გაკეთენს. ჩქი მარდიელეფ ოკო ვორდათ, ნამდა ღორონთი ვა ჩქარენს, მუშენდა თიშ მოთვინება ჭეშმარიტებაშ გაგებაშ დო თის ქივემსახურათინ თიშ საშვალებას მარზენა (წეკითხი 2 პეტრეშ 3:9, 10). ონდო უბადობაშ აღსასრული დოდირთუ, ღორონთი შაყარანს გურალალ თაყვანიშმცემელეფს დო ოხვარ თინეფს, ქუგურზან ირნერ გაჭირებას თე პრობლემეფით ეფშა მსოფლიოს (იოანე 4:23; 1 კორინთელები 10:13).

¹⁸ ნამთინექ შილებე იფიქრას: „ღორონთის ადამ დო ევაშა მუშ წინააღმდეგ ულაშ უფლება ვემუჩამუდკონ, ალბათ მსოფლიოს უბედრობეფ ვა მოხვადუდ“. თე საკითხის უჯგუშო ქენანჭუქ, მუჟამს ქიგიშინანქ, მუ ძვირფას საჩუქარ მუჩეს იეჰოვაქ.

19. მუ დიდებულ საჩუქარ მუჩეს იეჰოვაქ დო მუშენ ოკო დუვაფასათ თინა?

¹⁹ თე წიგნიშ მა-5 დუდშე გებგით, ნამდა ღორონთიქ კოჩის ნებაშ თავისუფლება მეჩუ. ქაფასენქო თე დიდებულ საჩუქარს? ღორონთიქ ანაყუ ცხოველი გაჭყუ; თინეფს ძირითადო ინსტინქტი მართუნს (იგავები 30:24). კოჩიქ გიმიგონ რობოტი, ნამუთ შილებე დაპროგრამე დო მუ გოკო თინა ოკეთებაფუე. ქიპჸუაფუდითო ბედნერ ჩქი ხოლო თაშ ქუვორდითკო გორჩქინელი? მუშო ოკო რაგად, ვარ. ჩქი მობწონა, ნამდა ჩქინით გინობჭყვიდათ, მუნერეფ ოკო ვორდათ, მუჭო იფცხოვრათ, მი რდან ჩქინ მეგობრეფ დო თაშ.  თეცალ თავისუფლება მოჰამუნა დო ღორონთის ხოლო ზუსტას თენა ოკო ჩქინო.

20, 21. მუჭო შემლებნა ნებაშ თავისუფლებაშ სწორას გიმორინაფა დო მუშენ ოკო მიფქცუათ თაშ?

²⁰ იეჰოვას ვაკო ძალით ვემსახურათ თის (2 კორინთელები 9:7). მაგალთო, მუჟამ რე მშობელ უმოს ბედნერ — მუჟამს სქუა მთელ გურით ურაგად მშობლეფს, ნამდა უჸორს თინეფ, დო-ვარ თიმწკუმა, მუჟამს მიდგარენიშ ნაგურეფ სიტყვეფს იმეორენს? თაშ ნამდა, ოკო დეფიქრე, სი მუჭო გიმირინუანქ იეჰოვაშ მოჩამილ ნებაშ თავისუფლებას. სატანაქ, ადამქ დო ევაქ სწორას ვეგმირინეს ნებაშ თავისუფლება. თინეფქ ვეკორინეს იეჰოვა ღორონთი. სი მუშ კეთება გილამუ?

²¹ სი გიღუ საშვალება სწორას გეგმირინუე თე დიდებულ საჩუქარ, ნებაშ თავისუფლება. შეილებ მილონობით ხალხწკუმა ართო იეჰოვაშ მხარე ქიდეკინე. თინეფ გურს უხარენა ღორონთის, მუშენდა მუთ შილებე ოცადნა თიშ დამტკიცებას, ნამდა სატანა მეტყურე რე დო თიშ მართველობაქ ვა გამართ (იგავები 27:11). სი ხოლო შეილებ თეშ კეთება; საჭირო რე სწორ შარაშ გიშაგორუა. თეშ გურშენ რაგად იჸუაფ ანწიან დუდის.