1, 2. ¿Baʼaxoʼob beetik k-muʼyaj, yéetel baʼax kʼáatchiʼiloʼob ku beetik yaʼab máak?

TIʼ UPʼÉEL nojoch baʼateʼel úuch tiʼ upʼéel luʼum tuʼux táan u sen yúuchul baʼateleʼ, u milesi paalal yéetel koʼoleloʼob kíimoʼobiʼ. Tuláakal le máaxoʼob kíimoʼobaʼ muʼukoʼob tiʼ upʼéel nojoch zanja pakʼaʼan mejen cruzoʼob tu baʼpaach. Tiʼ cada upʼéel cruzeʼ tsʼíibtaʼab: «¿Baʼaxten?». Lelaʼ letiʼe baʼax ku jach kʼáatik le máaxoʼob táan u muʼyajoʼoboʼ. Wa yoʼolal upʼéel baʼateʼel, upʼéel nojoch loob wa yoʼolal upʼéel kʼojaʼanil, kíim utúul u láakʼtsiloʼob, kʼaschaj u yotochoʼob bey xan wa táan u jach muʼyajoʼob tu yoʼolal le baʼaloʼobaʼ, yéetel yaj óolaleʼ ku kʼáatkoʼob «¿Baʼaxten?». U kʼáat u yojéeltoʼob baʼaxten ku yúuchul le yaayaj baʼaloʼobaʼ.

² ¿Baʼaxten ku chaʼik Dios u yantal muʼyajil? Wa jach nojoch u páajtalil, u yaabilaj, u naʼat yéetel u yutsileʼ, ¿baʼaxten jach yaan pʼektajil yéetel kʼasaʼanil teʼ yóokʼol kaabaʼ? ¿A beetmaj wa le kʼáatchiʼobaʼ?

3, 4. 1) ¿Baʼax eʼesik maʼ kʼaas u taaktal u yojéeltaʼal baʼaxten ku chaʼik Dios u yantal muʼyajiliʼ? 2) ¿Bix u yilik Jéeoba le kʼaas yéetel le muʼyajiloʼ?

³ ¿Kʼaas wa u taaktal u yojéeltaʼal baʼaxten ku chaʼik Dios u yantal muʼyajil? Yaan máax tuklikeʼ wa ku kʼáatik baʼaxteneʼ bey táan u yeʼesik minaʼan u fejeʼ wa xan minaʼan u tsiikil  tiʼ Dios. Baʼaleʼ le Bibliaoʼ ku yeʼesikeʼ tak máaxoʼob meyajtik Dios úucheʼ tu beetoʼob kʼáatchiʼob jeʼex leloʼobaʼ. Jeʼex le profeta Habacucoʼ tu kʼáataj tiʼ Jéeoba: «¿Baʼax oʼolal ka beetik in wilik sen yaʼab yaj óolal yéetel kʼasaʼanil? [...] Tuláakal tuʼux yaan x-woʼokin bey xan baʼateloʼob» (Habacuc 1:3).

⁴ Jéeobaeʼ, ¿tu kʼeyaj wa Habacuc úuchik u kʼáatik lelaʼ? Maʼatech. Baʼaxeʼ tu beetaj u tsʼíibtaʼal teʼ Biblia le baʼax tu kʼáatoʼ. Tu yáantaj xan u naʼat baʼaxten yaan muʼyajil yéetel tu yáantaj ka maas muʼukʼanchajak u yoksaj óolal. Jéeobaeʼ u kʼáat xan u yáantech. Kʼaʼajaktecheʼ le Bibliaoʼ ku kaʼansikeʼ Dioseʼ «u tsʼaamaj u yóol u kanáant[oʼon]» (1 Pedro 5:7). Mix máak pʼekmil le kʼaas yéetel le muʼyaj, jeʼex pʼektaʼanil tumen Diosoʼ (Isaías 55:8, 9). Wa beyoʼ, ¿baʼaxten túun jach yaan muʼyajil teʼ yóokʼol kaabaʼ?

5. ¿Bix suuk u núukaʼal ken kʼáataʼak baʼaxten yaan muʼyajil, baʼaleʼ baʼax ku kaʼansik le Bibliaoʼ?

⁵ Yaʼab máak tiʼ jejeláas religionoʼobeʼ tsʼoʼok u kʼáatkoʼob tiʼ máaxoʼob ku nuʼuktajoʼob tu religionoʼob baʼaxten jach yaan muʼyajil. Ku yaʼalaʼaltiʼobeʼ bey bin u kʼáat Dios ka úuchkoʼ yéetel Dioseʼ tsʼoʼok bin u yaʼalik tuláakal baʼax kun úuchul, tak le nojoch looboʼoboʼ. Tiʼ xan yaʼab máakeʼ ku yaʼalaʼaleʼ u  bejiloʼob Dioseʼ maʼ tu jáan naʼataʼal, wa xan ku yaʼalaʼaltiʼob Dios bin chʼaʼik máak, bey xan mejen paalal, utiaʼal ka yanakoʼob tu yéetel teʼ kaʼanoʼ. Baʼaleʼ, jeʼex tsʼoʼok a kanikoʼ, Jéeobaeʼ mix utéen ku beetik baʼal kʼaas. Le Bibliaoʼ ku yaʼalik: «¡Mix a chéen tukultikeʼex wa jeʼel u beetik [Dios] [...] jumpʼéel baʼal kʼaas, wa baʼax maʼ tu beeliʼ!» (Job 34:10).

6. ¿Baʼaxten yaʼab máakeʼ ku tuklik Dios beetik u yantal tuláakal muʼyajil?

⁶ ¿A wojel wa baʼaxten yaʼab máakeʼ ku tuklik Dios beetik u yantal tuláakal muʼyajil? Yaʼab tiʼ letiʼobeʼ tumen ku tuklikoʼob Dios ku gobernar teʼ yóokʼol kaabaʼ. Maʼ u yojloʼob wa le Bibliaoʼ ku kaʼansikeʼ Satanás ku tusbel way yóokʼol kaabeʼ, jeʼex ta kanil tu 3 xookil le libroaʼ.

7, 8. 1) Le bix le yóokʼol kaabaʼ, ¿bix u yeʼesik bix le máax gobernartikoʼ? 2) Le kʼeban yéetel u jáan úuchul wa baʼaxeʼ, ¿bix u beetik u yantal muʼyajil?

⁷ Le Bibliaoʼ ku yaʼalikeʼ «u túulisil yóokʼol kaabeʼ tiʼ yaan yáanal u páajtalil kʼaasibaʼaleʼ» (1 Juan 5:19). ¿Máasaʼ lelaʼ ku yáantkoʼon k-naʼat baʼaxten jach yaan muʼyajil? Le bix kuxlik yaʼab máakoʼob bejlaʼoʼ táan u yeʼesik bix le kʼasaʼan ángel «tusik tuláakal yóokʼol kaaboʼ» (Apocalipsis 12:9). Satanaseʼ chéen tuus u kaʼaj, u pʼekmaj máak yéetel jach kʼasaʼan. Le oʼolal le yóokʼol kaab yaan yaanal u kʼabaʼ jach chuup yéetel tuus, pʼektajil yéetel kʼasaʼanil. Lelaʼ u yáax baʼax oʼolal jach yaan muʼyajil.

⁸ U kaʼapʼéel baʼax oʼolal yaan muʼyajileʼ letiʼ lelaʼ: wíinikeʼ kʼebanchaj ikil maʼ tu yuʼubaj u tʼaan Dios tu jardinil Edeniʼ, jeʼex t-ilij teʼ 3 xookoʼ. Le oʼolal u kʼáat mandar yóokʼol u maasil yéetel ku baʼateltik u beetik; lelaʼ tsʼoʼok u beetik u sen yantal baʼateʼel yéetel muʼyajil (Eclesiastés 4:1; 8:9). U yóoxpʼéel baʼax oʼolal k-muʼyajeʼ, tumen le Bibliaoʼ ku yaʼalikeʼ «u súutuk u jáan úuchul wa baʼax» (Eclesiastés 9:11, Nuevo Mundo). Tumen maʼ Jéeoba gobernartik le yóokʼol kaabaʼ, maʼatech u kanáantik tiʼ baʼaxoʼob ku yúuchul yóokʼol. Le oʼolal wa máak tiaʼan tuʼux ku jáan úuchul upʼéel loobeʼ, maʼ xaaneʼ jeʼel xan u yúuchul loob tiʼeʼ.

9. ¿Bix k-ojéeltik Jéeobaeʼ yaan baʼax oʼolal ku chaʼik u yantal le muʼyajiloʼ?

 ⁹ Ku taasiktoʼon kiʼimak óolal k-ojéeltik maʼ Dios beetik u yantal le muʼyajiloʼ. Maʼ letiʼ beetik u yantal le baʼateloʼoboʼ mix le sen kíimsajiloʼ mix le pechʼ óolaliloʼ mix le nojoch loobiloʼob taasiktoʼon yaʼab muʼyajiloʼ. Kex beyoʼ láayliʼ unaj k-núukik baʼaxten ku chaʼik u yantal tuláakal le muʼyajiloʼ. Wa Dios minaʼan u xuul u páajtalileʼ, u kʼáat u yaʼaleʼ jeʼel u páajtal u xuʼulsikeʼ. ¿Baʼaxten túun maʼ u beetiʼ? Tsʼoʼok k-kanikeʼ Jéeobaeʼ utúul Dios jach yaan u yaabilaj, le beetik yaan baʼax oʼolal maʼ u xuʼuls le muʼyajiloʼ (1 Juan 4:8).

10. ¿Baʼax tu tsʼáaj naʼatbil Satanás, yéetel bix tu beetil?

¹⁰ Utiaʼal k-ojéeltik baʼaxten ku chaʼik Dios u yantal muʼyajileʼ, kʼaʼabéet k-kʼaʼajsik bix káajik le talamiloʼoboʼ. Satanaseʼ, úuchik u beetik maʼ u yuʼubaʼal u tʼaan Dios tumen Adán yéetel Evaeʼ, tu tsʼáaj naʼatbil upʼéel baʼal unaj u yeʼesaʼal wa jaaj. Maʼ tu tsʼáaj naʼatbil wa minaʼan u páajtalil Jéeobaiʼ, tumen u yojel minaʼan u xuul u páajtalil. Baʼaxeʼ tu tsʼáaj naʼatbil maʼ Jéeoba unaj u gobernariʼ. Satanaseʼ tu yaʼalaj maʼ maʼalob bix u gobernar Diosiʼ, tumen tu yaʼalaj táan u tuus yéetel maʼ tu chaʼik tiʼ máaxoʼob meyajtik ka yanak maʼalob baʼaloʼob tiʼob (Génesis 3:2-5). Tu tsʼáaj xan naʼatbil maas jeʼel u bin utsil tiʼ wíinikoʼob wa maʼ u nuʼuktaʼaloʼob tumen Dioseʼ. Bey tʼaanajik kʼaas tiʼ u gobernación Jéeobaoʼ.

11. Jéeobaeʼ, ¿baʼaxten maʼ tu xuʼulsaj máaxoʼob binoʼob tu contra tu jardinil Edeniʼ?

¹¹ Adán yéetel Evaeʼ, úuchik maʼ tu yuʼuboʼob u tʼaan Jéeobaeʼ, bey ka u yaʼaloʼob: «Maʼ kʼaʼabéettoʼon u nuʼuktaj Diosiʼ. Toʼon unaj k-aʼalik baʼax uts yéetel baʼax kʼaas». Jéeobaeʼ, ¿bix jeʼel u yeʼesik maʼ jaaj baʼax ku yaʼalik le máaxoʼob tu tsʼáajubaʼob tu contraoʼ? ¿Bix jeʼel u yeʼesik u nuʼuktajeʼ letiʼe u maas maʼalobiloʼ? Yaan máax aʼalikeʼ Dioseʼ unaj kaʼach u xuʼulsik le máaxoʼob binoʼob tu contraoʼ yéetel u beetik u jeel wíinikoʼob. Baʼaleʼ letiʼeʼ u yaʼalmaj u kʼáat ka suunak upʼéel paraíso  le Luʼumaʼ yéetel ka chuʼupuk yéetel u paalal Adán yéetel Eva (Génesis 1:28). Jéeobaeʼ mix utéen ku pʼáatal maʼ u tsʼoʼokbesik baʼax ku yaʼalik (Isaías 55:10, 11). Wa xan ka u xuʼuls le máaxoʼob binoʼob tu contra tu jardinil Edenoʼ, bejlaʼa maʼ tu béeytal u yeʼesik wa jaaj letiʼ unaj u gobernareʼ.

12, 13. ¿Bix u keʼetel utiaʼal k-naʼatik baʼaxten Jéeobaeʼ tu chaʼaj tiʼ Satanás u gobernartik le yóokʼol kaabaʼ yéetel ka u nuʼuktuba wíinikoʼob tu juunaloʼob?

¹² Koʼox ketik yéetel utúul maestro táan u tsolik tiʼ u j-xoknáaloʼob bix jeʼel u jóoʼskoʼob upʼéel cuenta jach talameʼ. Utúul j-xoknáal jach yaan u naʼat yéetel nojbaʼal u taaskubaeʼ ku yaʼalik maʼ maʼalob bix u jóoʼsaʼal le cuenta tumen le maestrooʼ, bey túunaʼ ku tsʼáaik naʼatbileʼ maʼ maʼalob u kaʼansajiʼ. Le j-xoknáalaʼ maʼ tu xuʼulul u yaʼalik maas u yojel bix jeʼel u jóoʼsik le cuentaoʼ. Yaan u yéet xookoʼobeʼ ku tuklikoʼob jaaj baʼax ku yaʼalik, le oʼolal ku tsʼáaikubaʼob tu tséel. ¿Baʼax unaj u beetik le maestrooʼ? Jeʼel u páajtal u jóoʼsik tuláakal le yanoʼob tu contraoʼ, baʼaleʼ ¿baʼax jeʼel u yaʼalik u maasileʼ? Maʼ xaaneʼ jeʼel u tuklikoʼobeʼ jaaj le baʼax ku yaʼalaʼal tu yoʼolal le maestrooʼ. Yoʼolal lelaʼ jeʼel u jáawal u yeʼeskoʼob tsiikil tiʼeʼ yéetel jeʼel u tuklikoʼobeʼ le maestrooʼ sajak  u yeʼesaʼal maʼ maʼalob bix u kaʼansajiʼ. Baʼaleʼ le maestrooʼ ku chaʼik tiʼ le j-xoknáal ku tʼaan kʼaasoʼ ka u yeʼes bix jeʼel u jóoʼsik le cuenta letiʼoʼ.

¹³ Jéeoba xaneʼ tu beetaj jeʼex le maestrooʼ, tumen u millonesi angeloʼobeʼ tu yiloʼob le baʼax úuch tu jardinil Edenoʼ (Job 38:7; Daniel 7:10). Yoʼolal túun baʼax ken u beet Jéeobaeʼ, le angeloʼob yéetel u maasil wíinikoʼob kun yantaloʼ, jeʼel u tuukuloʼob uts wa kʼaaseʼ. ¿Baʼax túun tu beetaj Jéeoba? Tu chaʼaj tiʼ Satanás ka u yeʼes bix jeʼel u gobernartik wíinikoʼobeʼ. Tu chaʼaj xan tiʼ wíinikoʼob ka u nuʼuktubaʼob tu juunaloʼob yáanal u kʼab Satanás.

14. ¿Baʼax utsiloʼob ken u taas úuchik u chaʼik Jéeoba ka u nuʼuktuba wíinik tu juunal?

¹⁴ Le maestro tiʼ le tʼaanajoʼoneʼ, u yojel maʼ jaaj baʼax ku yaʼalik le máaxoʼob tu tsʼáajubaʼob tu contraoʼ. Baʼaleʼ u yojel wa ku chaʼik u jóoʼskoʼob le cuenta le bix u tuklikoʼoboʼ, tuláakal le j-xoknáaloʼob kun jóoʼsik u yutsiloʼ. Le ken chíikpajak maʼ jaaj baʼax ku yaʼalaʼal tu yoʼolaleʼ, le j-xoknáaloʼob uts u puksiʼikʼaloʼoboʼ yaan u yilkoʼobeʼ chéen letiʼ jach u yojel bix jeʼel u tsʼáaik le xookoʼ. Yaan xan u naʼatkoʼob baʼaxten yaan u jóoʼsik teʼ xook le máaxoʼob tʼaanajoʼob kʼaasoʼ. Jéeoba xaneʼ u yojeleʼ tuláakal le utsul angeloʼob yéetel le utsul wíinikoʼoboʼ yaan u jóoʼskoʼob u yutsil ken u yiloʼob maʼ jaaj baʼax tiaʼalaj Satanás yéetel u kʼasaʼan angeloʼobiʼ, bey xan ken u yiloʼob wíinikeʼ maʼ tu páajtal u gobernarkuba chéen tu juunal. Yaan u yilkoʼob jach jaaj baʼax u yaʼalmaj le profeta Jeremíasaʼ: «Yuumtsil, teneʼ in wojeleʼ xiibeʼ maʼ u yuumil u kuxtaliʼ», wa maʼ beetaʼan utiaʼal u nuʼuktik u kuxtal chéen tu juunaliʼ (Jeremías 10:23).

15, 16. 1) ¿Baʼaxten tsʼoʼok u chaʼik Jéeoba u sen xáantal le muʼyajiloʼ? 2) ¿Baʼaxten ku chaʼik u yúuchul le baʼaloʼob kʼaastak yéetel le nojoch looboʼoboʼ?

¹⁵ Jéeobaeʼ, ¿baʼaxten tsʼoʼok u chaʼik u sen xáantal le muʼyajiloʼ? ¿Baʼaxten xan ku chaʼik u yúuchul baʼaloʼob kʼaastak?  Utiaʼal k-naʼatikeʼ koʼox ilik kaʼapʼéel baʼal maʼ tu beetaʼal tumen le maestro tsʼoʼok aʼalikeʼ. Yáaxeʼ, maʼ tu yaʼalik tiʼ le kʼasaʼan j-xoknáal maʼ u yeʼesik bix jeʼel u jóoʼsik le cuentaoʼ, baʼaleʼ mix xan tu yáantik u jóoʼse. Jéeoba xaneʼ tu chʼaʼatuklaj maʼ u beetik kaʼapʼéel baʼal. Yáaxeʼ, maʼ u luʼs tiʼ le Kʼaasilbaʼal yéetel tiʼ le máaxoʼob yanoʼob tu yéetel ka u yil u yeʼeskoʼob wa jaaj baʼax ku yaʼalikoʼoboʼ. Utiaʼal lelaʼ tsʼoʼok u kʼaʼabéettal u chaʼik u máan yaʼab jaʼaboʼob. Teʼ milesi jaʼaboʼob tsʼoʼok u máan yanak wíinikoʼ, wíinikeʼ jejeláas bix tsʼoʼok u yilik u gobernar, yéetel tsʼoʼok u kaʼantal u naʼat tiʼ yaʼab baʼaloʼob. Baʼaleʼ maʼ xuʼuluk u yaʼabtal u beetaʼal kʼaasiʼ, u yantal óotsilil yéetel u yantal baʼateloʼob. Jach tsʼoʼok u chíikpajleʼ wíinikeʼ maʼ tu páajtal u gobernarkuba tu juunal.

¹⁶ U kaʼapʼéeleʼ, Jéeobaeʼ maʼatech u yáantik Satanás u gobernart le yóokʼol kaabaʼ. Wa Dios ka u kanáant maʼ u yúuchul le baʼaloʼob kʼaastak yéetel le nojoch looboʼob ku yilaʼaloʼoboʼ, bey ka u yáant le máaxoʼob u tsʼáamubaʼob tu contraoʼ. ¿Baʼaxten? Tumen maʼ xaaneʼ jeʼel k-tuklik jeʼel u páajtal k-gobernartikba t-juunal minaʼan u bin kʼaasil toʼoneʼ. Wa Jéeoba ka u yáant máaxoʼob u tsʼáamubaʼob tu contraeʼ, bey ka táakpajak tiʼ upʼéel tuuseʼ. Baʼaleʼ Dioseʼ «maʼ tu páajtal u tuus» (Hebreob 6:18).

17, 18. ¿Baʼax ken u beet Jéeoba yéetel tuláakal le muʼyaj tsʼoʼok u taasik le máaxoʼob u tsʼaamubaʼob tu contraoʼ?

¹⁷ Baʼaleʼ ¿kux túun tuláakal le kʼaas tsʼoʼok u taasik le máaxoʼob tu tsʼáajubaʼob tu contra Diosoʼ? Kʼaʼajaktoʼoneʼ Jéeobaeʼ minaʼan u xuul u páajtalil. Le oʼolaleʼ jeʼel u páajtal u yutskíintik tuláakal le kʼaas tsʼoʼok u yantaloʼ, yéetel yaan xan u beetik. Jeʼex tsʼoʼok k-kanikoʼ, le Luʼumaʼ yaan u yutskíintaʼal yéetel yaan u suut upʼéel paraíso. Máaxoʼob ku tsʼáaik u fejoʼob tiʼ Jesuseʼ, yaan u toʼokloʼob tiʼ le muʼyajil ku taasik le kʼebanoʼ. Tuláakal xan le kʼaas tsʼoʼok u taasik le kíimiloʼ yaan u yutskíintaʼal ken kaʼa líiʼsaʼak le kimenoʼoboʼ. Bey túunoʼ, yéetel u yáantaj Jesuseʼ, Dioseʼ yaan «u mixbaʼalkúunt[ik] le baʼax u beetmaj [le] kʼaasibaʼaloʼ» (1 Juan 3:8). Jéeobaeʼ, le  kʼiin ku tukultik maas maʼalobeʼ, tiʼ ken u beet tuláakal lelaʼ. Jach ku taasiktoʼon kiʼimak óolal ikil maʼ tu jáan luʼsaj le máaxoʼob tu tsʼáajubaʼob tu contraoʼ, tumen tu yoʼolal leloʼ ku páajtal k-kanik u jaajil yéetel k-meyajtik Dios jeʼex utstutʼaaneʼ (2 Pedro 3:9, 10). Maʼiliʼ kʼuchuk le kʼiin jeʼeloʼ, Jéeobaeʼ táan u kaxtik le máaxoʼob jach tu jaajil taak u meyajtikoʼob Diosoʼ yéetel ku yáantkoʼob utiaʼal ka chúukpajak u yóoloʼob tu táan le muʼyajiloʼob yaan teʼ yóokʼol kaab chuup yéetel talamiloʼobaʼ (Juan 4:23; 1 Corintoiloʼob 10:13).

¹⁸ Yaan máax jeʼel u tuklikeʼ, tuláakal le muʼyajiloʼ, bejlaʼa maʼ tu yantal wa Dios ka u beet kaʼach Adán yéetel Eva upʼéel bix jach upuliʼ maʼ tu páajtal u tsʼáaikubaʼob tu contraeʼ. Utiaʼal k-núukik baʼaxten maʼ tu beeteʼ, kʼaʼajaktecheʼ Jéeobaeʼ u siimajtoʼon upʼéel baʼal jach maʼalob.

19. ¿Baʼax jach maʼalob baʼal u siimajtoʼon Jéeoba, yéetel baʼaxten kʼaʼabéet k-ilik jach maʼalob?

¹⁹ Jeʼex t-ilaj teʼ 5 xookoʼ, yoʼolal bix beetaʼanikoʼoneʼ ku páajtal k-yéeyik baʼax k-kʼáat k-beete. ¿Ka naʼatik wa bukaʼaj maʼalobil le baʼax siibaʼantoʼonaʼ? Dioseʼ tu beetaj yaʼabach baʼalcheʼob, baʼaleʼ tiʼ letiʼobeʼ tsʼaʼantiʼob baʼax unaj u beetkoʼob. Wíinik xaneʼ tsʼoʼok u beetik robotoʼob ku beetkoʼob jach baʼax ku yaʼalaʼaltiʼob. Wa Dios ka u beetoʼon kaʼach beyoʼ, ¿jeʼel wa u taasiktoʼon kiʼimak óolaleʼ? ¿Máasaʼ maʼatan? Le beetikeʼ kiʼimak k-óol beetaʼanikoʼon yéetel u páajtalil k-yéeyik bix k-kʼáat k-beetba, bix le kuxtal k-kʼáat bisoʼ bey xan yéetel máaxoʼob kʼáat k-bisba. Toʼoneʼ jach kiʼimak k-óol beetaʼanikoʼon yéetel u  páajtalil k-yéeyik baʼax kʼáat k-beete, Dios xaneʼ u kʼáat ka yanaktoʼon le páajtalilaʼ.

20, 21. ¿Bix jeʼel u meyajtoʼon maʼalobil le páajtalil u tsʼaamajtoʼon Diosoʼ, yéetel baʼaxten kʼaʼabéet k-ilik u meyajtoʼon tubeel?

²⁰ Jéeobaeʼ u kʼáat ka síijik t-puksiʼikʼal k-meyajtik (2 Corintoiloʼob 9:7). ¿Baʼax maas utstutʼaan utúul taatatsil: ka aʼalaʼak yaabiltaʼan tumen u hijo tumen tu obligartaj u yaʼale, wa ka síijik tu puksiʼikʼal u hijo u yaʼalik «Jach in yaabiltmech»? Teech túuneʼ unaj a tuklik lelaʼ: «Tumen beetaʼanen yéetel u páajtalil in yéeyik baʼax in kʼáat in beeteʼ, ¿yaan wa u meyaj maʼalob tiʼ teen le páajtalilaʼ?». Satanás, Adán yéetel Evaeʼ maʼ maʼalob úuchik u meyajtiʼobiʼ, tumen maʼ tu yuʼuboʼob u tʼaan Diosiʼ. Kux teech, ¿baʼax ken a beete?

²¹ Wa a kʼáateʼ, tiʼ techeʼ jeʼel u páajtal u meyaj maʼalob le jach jatsʼuts baʼal u siimajtoʼon Diosaʼ. Jeʼel u páajtal a yéeyik a nupikaba yéetel u millonesi máakoʼob tsʼoʼok u tsʼáaikubaʼob tu tséel Jéeobaeʼ. Letiʼobeʼ jach ku kiʼimakkúuntikoʼob u yóol Dios tumen táan u yeʼeskoʼobeʼ Satanaseʼ táan u tuus yéetel jach maʼ u yojel gobernariʼ (Proverbios 27:11). Teech xaneʼ jeʼel a kiʼimakkúuntik u yóol Dios wa ka yéeyik a bisik le kuxtal utstutʼaan letiʼoʼ. Le uláakʼ xookoʼ yaan u yeʼesik máakalmáak.