1, 2. Xi guiráʼ runiná laanu, ne xi rinabadiidxaʼ binni laa.

TI GUIDXI ra nabé gudíndecabe guti stale gunaa ne baʼduhuiiniʼ. Guiráʼ binni riʼ bigaachicaʼ ndaaniʼ ti baʼ si ne bizuhuaacabe caadxi cruz ne lúcani cá: «Xiñee pue». Nga nga ni nabé rinabadiidxaʼ binni ni cadiʼdiʼ lu yuubaʼ. Rinabadiidxacabe ni ora gatiʼ ca binni nadxiicabe lu ti guendaridinde, ora guiaba ti nisaguié naroʼbaʼ o guníticabe lídxicabe ora gaca ti xu o pur ti guendahuará ni guniná laacabe stálepeʼ. Racaláʼdxicabe gánnacabe xiñee cazaacacabe ca guendananá ca.

² Xiñee cudii Jiobá lugar nuu guendananá yaʼ. Pa laabe nga ni jma nadipaʼ, ni rannaxhii, ni jma nanna ne ni runi ni jneza, xiñee nuu guendaracananalaʼdxiʼ ne guendaquéruni jneza lu Guidxilayú riʼ yaʼ. Huanabadiidxaluʼ nga la?

3, 4. 1) Xi ejemplu rusihuinni gastiʼ naca nga guinabadiidxanu xiñee cudii Dios lugar nuu guendananá. 2) Xi riníʼ ique Jiobá de guendaquéiquiiñeʼ ne de guendananá.

³ Ñee jneza nga guinabadiidxanu xiñee cudii Dios lugar nuu guendananá la? Nuu tu riníʼ pa guinabadiidxaʼ zusihuinni huaxiéʼ fe napa o qué gapa respetu Dios. Peru ora gúʼndaluʼ Biblia, zuuyaluʼ guyuu xpinni Dios ni bizuubaʼ  stiidxabe ne laaca zacagá ni gunabadiidxaʼ. Casi profeta Habacuc gudxi Jiobá: «Xiñee cucaaluʼ naa guuyaʼ stale guendaridinde ne ni cadi jneza. Guiráʼ ladu cayuuyaʼ nisi cadinde diidxaʼ binni ne cadíndecaʼ; guiráʼ ladu cayuuyaʼ nisi guendaridinde ne cunitilucaʼ» (Habacuc 1:3, Traducción en lenguaje actual).

⁴ Ñee gudindené Jiobá Habacuc pur ni gunabadiidxaʼ ca la? Coʼ, qué nidindené Jiobá laabe. Ni biʼniʼ Jiobá nga guluu ca diidxaʼ guniʼbe ca ndaaniʼ Biblia. Ne gucanebe Habacuc guiene ni canabadiidxaʼ ne gaca fe stiʼ jma naguidxi. Laaca racalaʼdxiʼ Jiobá gacané lii zacá. Bietenalaʼdxiʼ, Biblia na «cayapa be» laanu (1 Pedro 5:7). Dios nga ni jma nanalaʼdxiʼ ca guendaquéiquiiñeʼ ne guendananá redané cani (Isaías 55:8, 9). Yanna, xiñee nuu stale guendananá lu Guidxilayú riʼ yaʼ.

5. Xi riníʼcabe para gusiénecabe xiñee ridídinu lu guendananá, peru xi rusiidiʼ Biblia yaʼ.

⁵ Stale binni huanabadiidxaʼ cani zaniruʼ ndaaniʼ ca religión ca xiñee nuu stale guendananá. Ni ricábicabe binni nga zacá na Dios ne nácabe maʼ xadxí gudíxhebe guiráʼ  ni chigaca, dede né ca desgracia. Stale tu huasiidicabe laa qué zanda guiene neza stiʼ Dios o laabe nga rinebe binni, dede né ca baʼduhuiiniʼ, para chúʼnecaʼ laabe guibáʼ. Peru casi maʼ biziidiluʼ, qué lica runi Jiobá cosa malu. Biblia na: «Zitu zuhuaa de ndaaniʼ ique Dios ni dxandíʼ guni ni malu, ne zitu zuhuaa de ndaaniʼ ique ni jma napa poder guni ni cadi jneza» (Job 34:10).

6. Xiñee rugaaniʼ stale binni donda Dios pur ca guendananá nuu lu guidxilayú.

⁶ Nánnaluʼ xiñee ruchee binni ora rugaaniʼ donda Dios pur ca guendananá ca la? Stale biaje riníʼcabe zacá purtiʼ nácabe Dios ni jma nandxóʼ nga cayuni mandar guidxilayú. Qué gánnacabe xipeʼ ndiʼ cusiidiʼ Biblia, peru lii maʼ biziidiluʼ ni lu capítulo 3 stiʼ libru riʼ. Raqué bizíʼdinu Binidxabaʼ nga cayuni mandar ndaaniʼ guidxilayú.

7, 8. 1) Ximodo rusihuinni binni tu cayuni mandar lu guidxilayú riʼ. 2) Xiñee cayacaná binni pur guendaruchee ne pur «rizaacanu cosa ni cadi caníʼ íquenu ne ora cadi cabézanu cani».

⁷ Biblia cayabi laanu «naaze dxiichi binidxaba idubi guidxilayú» (1 Juan 5:19). Cadi dxandíʼ rusiene nga guiráʼ ni rinabadiidxanu la? Binni guidxilayú ne xpiaʼ rusihuinni ximodo nga Binidxabaʼ «ni rusiguii iráʼ binni» (Apocalipsis 12:9). Lu guiráʼ ni runi Binidxabaʼ rihuinni rusiguii, racananalaʼdxiʼ ne runiná. Nga runi, cumu ndaaniʼ nabe nuu guidxilayú riʼ la? nabé rusiguii binni, racananalaʼdxiʼ ne runiná. Ndiʼ nga primé razón pur nuu stale guendananá.

⁸ Guiropa razón nga casi bidúʼyanu lu capítulo 3, dede dxi bicaalú hombre Dios ndaaniʼ jardín stiʼ Edén que, binni ruchee laa ne napa donda. Nga runi, riuulaʼdxiʼ guendanandxóʼ ne rucaalú para ugaanda ni, pur nga nuu guendaridinde stiʼ ca guidxi, ruquiichinácabe binni ne runinácabe laa (Eclesiastés 4:1; 8:9). Guionna razón nga casi na Biblia «guiranu rizaacanu cosa ni cadi caníʼ íquenu ne ora cadi cabézanu cani». Biblia na: «Biiyaruáʼ  ni cayaca lu guidxilayú, biiyaʼ cadi guiráʼ diʼ ora runi ganar cani ruxooñeʼ reciu, nin cani nadipaʼ qué runi ganarcaʼ xiixa guendaridinde, nin cani nuu xpiaaniʼ qué gápacaʼ ni gocaʼ guiráʼ ora, nin cani riene qué gápacaʼ cosa risaca guiráʼ ora, nin cani nanna qué rireendú ni rúnicaʼ guiráʼ ora, purtiʼ guiranu rizaacanu cosa ni cadi caníʼ íquenu ne ora cadi cabézanu cani» (Eclesiastés 9:11). Cumu cadi Jiobá cayuni mandar ndaaniʼ guidxilayú riʼ la? cadi cayápabe binni. Nga runi, racaná binni purtiʼ rigaa paxaraa ora málasi gaca xiixa cosa malu.

9. Xiñee nanna dxíchinu nuu xi pur cudii Jiobá lugar nuu guendananá.

⁹ Ratadxí ladxidoʼno gánnanu cadi Dios cutiidiʼ laanu lu guendananá. Qué gápabe donda pur ridinde ca guidxi ca, pur cayuuticabe binni ne cuquiichinácabe laacaʼ, o pur xiixa ni runiná casi nisaguié ne xu. Peru chiguicábirunu xiñee cudiibe lugar nuu guendananá. Pa nápabe poder la? zanda cueebe cani. Yanna, xiñee qué gúnibe ni yaʼ. Cumu maʼ runibiaʼnu Jiobá ne maʼ bidúʼyanu ti Dios ni rannaxhii laabe la? nanna dxíchinu nuu xi pur cayúnibe ni (1 Juan 4:8).

10. Xi bicaa Binidxabaʼ binni guiníʼ ique, ne ximodo bíʼnibe ni.

¹⁰ Para gánnanu nuu xi pur cudii Dios lugar nuu guendananá, naquiiñeʼ guzéʼtenu ra bizulú guiráʼ cani. Ora bicaa Binidxabaʼ Adán ne Eva gucheenecaʼ Jiobá la? biale ti cuestión. Cadi na diʼ Binidxabaʼ qué gapa Jiobá poder, purtiʼ nánnabe zanda guni Dios guiráʼ ni gacalaʼdxiʼ. Ni bicaabe binni guiníʼ ique nga pa jneza modo runi mandar Dios. Ra guniʼbe rusiguii Dios ne rucueeza binni gapa ni galán la? casi ora niníʼ Binidxabaʼ qué gánnabe guni mandarbe. Biblia na: «Beendaʼ que bicabi gunaa que: “Dxandipeʼ qué zátitu. Purtiʼ nanna Dios zaxeleʼ lutu dxi goto cuananaxhi  stini ne zácatu casi Dios ne zánnatu xii nga jneza ne ni cadi jneza”» (Génesis 3:4, 5). Casi ora niniʼbe jma galán ziuu binni pa qué guni mandar Dios laacaʼ. Zacá nga bicaalube derechu napa Jiobá para guni mandar.

11. Xiñee qué ñuuti Jiobá cani bicaalú laa ndaaniʼ jardín stiʼ Edén que.

¹¹ Ora bicaalú Adán ne Eva Jiobá, casi ora ñábicaʼ laabe: «Cadi caquiiñedu guni mandarluʼ laadu. Laasidu zanda cuidu gúnidu ni jneza ne ni cadi jneza». Xi zuni Jiobá yaʼ. Ximodo guluiʼbe guiráʼ binni qué gapa cani cucaalú laabe que razón ne guluiʼbe jma jneza cani rúnibe yaʼ. Nuu tu na riquiiñeʼ ñuutibe cani bicaalú laabe que ne nuzaʼbe sti hombre ne sti gunaa. Peru laabe maca guniʼbe racaláʼdxibe gaca Guidxilayú riʼ ti paraísu ne guidxá ni de xiiñiʼ Adán ne Eva (Génesis 1:28). Ne Jiobá runi guiráʼ ni maʼ gudixhe ique (Isaías 55:10, 11). Pa ñuutibe cani bicaalú laabe ndaaniʼ jardín stiʼ Edén que la? maʼ qué ñánnacabe pa dxandíʼ nápabe derechu guni mandarbe.

12, 13. Xi ejemplu rusihuinni xiñee cudiiruʼ Jiobá lugar Binidxabaʼ guni mandar binni ne xiñee cudiibe lugar guni mandarsaa binni laa.

¹² Chiguchaaganu ni né ti maestru ne cani rusiidiʼ.  Maestru riʼ cusiene ximodo guiree jneza ti cuenta nabé nagana. Peru tobi de cani rusiidibe ni jma nanna málasi gucaalú laabe ne na cadi jneza modo cayúnibe ni, zaqué nga casi ora niníʼ qué ganna maestru que gusiidiʼ. Baʼduʼ que cá tema laa nga jma nanna modo cuee jneza ni. Caadxi baʼduscuela que na dxandíʼ ni nabe, ngue runi laaca rucaalucaʼ maestru que. Xi naquiiñeʼ guni maestru riʼ yaʼ. Ñanda niládxibe laacaʼ, peru xi guiníʼ ique xcaadxi que yaʼ. Zándaca niníʼ íquecabe dxandíʼ ni na xcompañérucabe né cani zinanda laa que xa. Ne ñándaca maʼ qué ñápacabe respetu laabe ne niníʼ íquecabe cadxíbibe guihuinni bicheebe. Peru yanna guníʼ ique nudii maestru riʼ lugar nuluíʼ ni cucaalú laa que ximodo nga na cuee jneza cuenta que.

¹³ Zacagá nga biʼniʼ Jiobá. Bietenalaʼdxiʼ cadi cani bicaalú si laabe ndaaniʼ jardín stiʼ Edén que nga nuu ganna tupeʼ nga caníʼ ni dxandíʼ. Stale ángel biiyaʼ ni guca que (Job 38:7; Daniel 7:10). Modo guicabi Jiobá cani cucaalú laa que nga zacané ni ca ángel ne despué laaca zacané ni guiráʼ binni. Yanna, xi biʼniʼ Jiobá yaʼ. Cudiirube lugar guluíʼ Binidxabaʼ ximodo nga guni mandar binni. Laaca cudiirube lugar guni mandarsaa binni laa modo na Binidxabaʼ.

14. Ra bidii Jiobá lugar guni mandarsaa binni laa, ximodo zacané ni ca ángel ne binni.

¹⁴ Nanna maestru bizéʼtenu que cadi dxandíʼ ni na baʼduscuela cucaalú laa que ne cani zinanda laa. Peru laaca nánnabe pa gudiibe lugar ca baʼduʼ que gúnicaʼ cuenta que modo na íquecaʼ la? zacané ni guirácabe. Ora guihuinni bichee cani cucaalú laabe que, ca baʼduscuela ni dxandíʼ nanna bichee la? zaniʼcaʼ maestru que si nga zanda gusiidiʼ laacaʼ. Ziénecabe xiñee chiládxibe cani bicaalú laabe. Laaca nanna Jiobá zabeendú ca ángel ne binni nayá ladxidóʼ xiixa ni galán ora gúʼyacaʼ cadi dxandíʼ ni na Binidxabaʼ ne ca ángel bicaalú laabe que ne qué zanda guni mandarsaa binni laa. Zánnacabe dxandíʼ ni guníʼ profeta Jeremías:  «Nannaʼ dxicheʼ Jiobá, cadi lu náʼ diʼ binni nuu neza stiʼ. Cadi lu náʼ diʼ binni nuu guni mandar ra guzuhuaa ñee» (Jeremías 10:23).

15, 16. 1) Xiñee cudiiruʼ Jiobá lugar guniná yuubaʼ binni. 2) Xiñee qué gucueezabe guendaquéiquiiñeʼ ne guiráʼ desgracia.

¹⁵ Peru, xiñee cudiiruʼ Jiobá lugar guniná yuubaʼ binni yaʼ. Xiñee qué gucueezabe guendaquéiquiiñeʼ yaʼ. Guiníʼ íquenu chupa cosa ni qué zuni maestru bizéʼtenu que. Qué zucueezabe ni bicaalú laabe que guluíʼ ximodo cuee cuenta que, peru laaca qué zacanebe laa guni ni. Zaqueca nga Jiobá, nuu chupa cosa ni qué zúnibe. Primé la? cadi cucueezabe Binidxabaʼ ne cani zinanda laa para guluiʼcaʼ pa dxandíʼ nápacaʼ razón. Peru para gaca nga naquiiñeʼ tiidiʼ stale tiempu. Stale mil iza ni maʼ gudiʼdiʼ dede dxi nuu binni lu Guidxilayú, gadxé gadxé modo huayuni mandarcaʼ ne jma maʼ nánnacaʼ de ciencia ne de xcaadxi cosa. Peru zeʼ dxi jma cayaca ni cadi jneza, jma nuu guendapobre, jma cucheenécabe ley ne nabé nuu guendaridinde. Rihuinni dxichi qué zanda guni mandarsaa binni laa.

¹⁶ Guiropa la? qué huayacané Jiobá Binidxabaʼ guni mandar lu Guidxilayú riʼ. Pa nucueeza Dios guiráʼ modo cayuuticabe binni ne guiráʼ desgracia, ñee cadi dxandíʼ nuluíʼ casi ora napa cani cucaalú laabe razón la? Ñee cadi dxandíʼ niníʼ íquenu zanda guni mandarsaa binni laa sin gapa guendanagana la? Pa ñuni Jiobá zacá la? casi ora laaca nusiguii. Peru «nanna nu qué zusiguii» Dios (Hebreos 6:18).

17, 18. Xi chiguni Jiobá guiráʼ ra maʼ bininá ca gobiernu stiʼ guidxilayú ne Binidxabaʼ.

¹⁷ Peru, xi zanda guininu de guiráʼ guendananá huayaca dede dxi cucaalúcabe Dios yaʼ. Guietenaláʼdxinu Jiobá nga ni jma napa poder. Nga runi, zanda guni chaahuibe guiráʼ ra maʼ gucaná ne nga nga chigúnibe. Casi maʼ bizíʼdinu  que, zaca chaahuiʼ guiráʼ ra maʼ gucaná lu Guidxilayú riʼ ne zaca ni ti paraísu. Pur fe nápanu lu guendaguti stiʼ Jesús, zadxiña dxi maʼ qué zuniná guendaruchee laanu. Ne para cani maʼ guti la? zabánicaʼ sti biaje ne zaree yuubaʼ bedané ni. Zacá nga chiguiquiiñeʼ Dios Jesús para «uchiá xhiiña binidxabaʼ» (1 Juan 3:8). Zuni Jiobá cani ora guʼyaʼ maʼ caquiiñeʼ gaca cani. Zanda guiéchenu purtiʼ qué ñúnibe ni dede ante, purtiʼ cadi nagueenda ridxiichibe, nga runi, cayanda cazíʼdinu ni dxandíʼ ne cayúninu ni nabe (biindaʼ 2 Pedro 3:9). Laga caʼruʼ guedandá dxi ca la? cuyúbiruʼ Dios binni ni dxandíʼ racalaʼdxiʼ guni adorar laa ne racané laacabe guni huantárcabe guendananá stiʼ guendanagana nuu lu guidxilayú (Juan 4:23; 1 Corintios 10:13).

¹⁸ Nuu tu na pa nuzaʼbe Adán ne Eva modo cadi ñanda nucheenecaʼ laabe la? qué ñuu guiráʼ guendananá. Para gánnaluʼ xiñee qué ñúnibe ni la? bietenalaʼdxiʼ xii nga bisigaʼdeʼ Jiobá laanu ni nabé risaca.

19. Xi bisigaʼdeʼ Jiobá laanu ni nabé risaca, ne xiñee naquiiñeʼ gusisácanu ni.

¹⁹ Casi bidúʼyanu lu capítulo 5, bizáʼ Dios binni ne laa zanda guni ni gacalaʼdxiʼ. Ñee nannuʼ pabiáʼ risaca ni bisigáʼdebe laanu riʼ la? Dios laaca bizáʼ stale maniʼ, peru qué riníʼ íquecame xi gúnicame (Proverbios 30:24). Ne binni huayuni robot ni maca nexheʼ xi guni. Ñee nibáninu nayecheʼ pa nuzáʼ Dios laanu zacá la? Coʼ njaʼ. Nga runi, riéchenu purtiʼ zanda cuinu gúninu ni gacaláʼdxinu, casi tu binni gácanu, ximodo guibáninu ne tu guidxaaganu. Laanu  riuuláʼdxinu cuinu gúninu ni gacaláʼdxinu ne Dios racalaʼdxiʼ gúninu ni zacá.

20, 21. Ximodo zanda iquiiñenu guenda bisigaʼdeʼ Dios laanu ca jneza, ne xiñee nga nga ni naquiiñeʼ gacaláʼdxinu gúninu.

²⁰ Qué racalaʼdxiʼ Jiobá gúninu ni na purtiʼ si cucaacabe laanu gúninu ni (2 Corintios 9:7). Xii nga ni jma ziuulaʼdxiʼ bixhoze binni o jñaa: gabi xiiñiʼ laa «Guizáʼ nadxieeʼ lii» purtiʼ bicaacabe laa guiníʼ ni la? o purtiʼ biree ni de ndaaniʼ ladxidóʼ. Yanna, ni zanda guinabadiidxaluʼ nga: «Ximodo zanda iquiiñeʼ guenda bisigaʼdeʼ Jiobá naa riʼ yaʼ». Binidxabaʼ, Adán ne Eva qué niquiiñecaʼ ni jneza, purtiʼ bicaanacaʼ Jiobá Dios. Lii xi gúniluʼ yaʼ.

²¹ Nécapeʼ zanda cuiluʼ gúniluʼ ni gacaláʼdxiluʼ la? zanda iquiiñeluʼ guenda bisigaʼdeʼ Dios lii ca jneza ti cueenduluʼ ni galán. Zanda chuʼluʼ lade millón binni ni nuu lu neza stiʼ Jiobá. Rusiecheʼ ca binni riʼ Jiobá purtiʼ rusihuínnicaʼ rusiguii Binidxabaʼ ne qué ganna guni mandar (Proverbios 27:11). Lii laaca zanda gúniluʼ zacá pa cuiluʼ gúniluʼ ni jneza lu xquendanabániluʼ. Lu sti capítulo ca zazíʼdinu ximodo gúninu ni.