1, 2. Ru huma hénpulu hawagu gürigia ha uágubaña lariñaga Bungiu lumadagu hamá.

KABA hamuga san luwuyeri umadaü hanúadira? Háfuga hanúadiruña hamuga aban gürigia le saminati, áfaaguati luagu ligíameme katei, ani harumati ligaburi kei hugía. Chóuruti himeibadün lan aban gürigia le buiti ligaburi; kéiburi lun hínsiñehabu lan richagua ligía.

² Lidan sun dan le sügühalibei anúadiraali Heowá fiú gürigia lun lumadagume. Ariñagati meha Bungiu lumada lan Abüraámü (aliiha huméi Isaíasi 41:8; Santiagu 2:23). Ariñagati giñe luagu Dawidi “aban wügüri le aubei nagundaara” (Adügaü 13:22). Ariñawagúati lun Danieli: “Wéiriti bínsiñe lun wabungiute” (Danieli 9:23).

3. Ka uagu lanúadira Heowá somu burí gürigia lun lumadagume?

³ Ka uagu lariñaga Heowá lumada lan Abüraámü, Dawidi, luma Danieli? Ariñagati lun Abüraámü: “Adüga baali le nubeibei” (Agumesehani 22:18). Anha, yarafati Heowá houn ha adügübalin lau ǘnabuguni le lamuriahabei hama. Ariñagati houn ísüraelina lunti lan ‘gaganbadi hamá lun ítara luba lan ligíaba lan Habungiute, hagíame lumutuniña’ (Heremíasi 7:23). Ánhadün gaganbadi lun Heowá, gayarabei giñe lumada humá.

4, 5. Ida luba gayara lan líchugun Heowá erei houn lumutuniña?

⁴ Samina humá luagu le mini lubéi umadaguaü luma Bungiu. Ariñagatu Bíbülia áluaha lan Heowá chansi “lun líchugun erei houn ha hemenigibaña luagu le tímatimaati” (2 Krónikasi 16:9). Ida luba líchugun Bungiu erei hun? Arufudati Sálumu 32:8 aban manera: “[Au, Heowá,] buágunñein narihin. Narufudahaba bun; níchuguba dimurei buíduti bun; narufudubei üma le lunbei bafalaruni bun”.

⁵ Ma lubuidun ligaburi lariñaguni Heowá ida luba lan lóunigirunün! Líchugubei eweridihani le hemegeirubei, ánheinti hadüga, lóunigirubadün. Busenti Bungiu líderagunün lun hiñuragun lídangiñe furumiñeguarügü óuchawaguni luma turóbuli (aliiha huméi Sálumu 55:22). Ánhadün eseriwida lun tau sun hanigi, chourubei hasandiragun hungua kei le abürüdübalin Sálumu le ariñagubei: “Súnwandan anihein lan Nabureme nigibugiñe, lau Bungiu luéigiñe nóunwenren, úabei éiguadagüdütina” (Sálumu 16:8; 63:8). Gayarati líderagunün Heowá anügei ibagari le aubei lagundaara. Gama lumoun, subudi humaali anihein lan aban lágani Bungiu le busenbei leredehanün.

6. Ka lariñagubei Satanási hawagu gürigia?

⁶ Furendeitiwa lidan kapítulu 11, eyeeha lan Satanási luagu Liricha Bungiu lun larúeihan. Ariñagati yee lan Heowá, lidan amu dimurei aban lan urúei marichati, ladüga mígirun lan lun desidírü lani Adán tuma Ewa le buídubei lumoun le wuribabei. Lárigiñe hafigouhan furumiñetiña wagübürigu, aba lagumeserun Ubóu abuincha hau hadügawagun. Ábati lasigenehan Satanási luagu lébuna háhuduragun gürigia lun Heowá. Kéisigubeirügü lariñaguña lan: “Mama ladüga línsiñe Bungiu houn gürigia heseriwidunbei lun. Anhein ichugúa chansi nun, gayarati nadügün lun lágarabaagun furumiñeguarügü gürigia luagun Bungiu”. Arufudati abahüdaguni luagu Hobu ligía lan lasaminarubei Mafia. Kati Hobubei ani ka lánibei lidan lasigenehan Satanási luma Heowá?

7, 8. a) Ka uagu buídutima lubéi Hobu sügǘ hau ha awinwandubaña lidan lidaani? b) Ida liña lasigenehan Satanási luagu lébuna leseriwidun Hobu lun Bungiu?

 ⁷ Sügühali 3,600 irumu lúmagiñe lawinwandun Hobu. Buiti meha ligaburi darí lun lariñagun Heowá: “Úati ni aban gürigia kei ligía ubouagu, seriwi lumutina lau úarani ani suruti labagaridun, ani áfaaguati lun madügün lan wuribani ni ka un” (Hobu 1:8). Anha, gúndaati meha Heowá lau Hobu.

⁸ Asigenehati Satanási luagu lébuna leseriwidun Hobu lun Bungiu. Ariñagati lun Heowá: “Ladüga mígiruntibu lun laguurun ni aban luagu [Hobu], ni hawagu liduheñu, ni luagu ni kata lídangiñe le lánibei, biní bumuti sun le ladügübei, ani ligía gíbetimabaña ibiñanigu hádangiñe sun lílana fulasu. Gidabei san sun le lúmabei luéi, ariha báamugei líñaragunibu bigibuagun” (Hobu 1:10, 11).

9. Ida liña lóunabun Heowá lun lasigenehan Satanási, ani ka uagu?

⁹ Ariñagati Satanási leseriwiduña lan meha Hobu lun Bungiu luagu sun le leresibirubei lúmagiñe ani anhein lan óuchawagua lagarabaagúba lan luagun Bungiu. Ida liña lóunabun Heowá lun le lariñagubei Satanási? Kei lébuna lubéi leseriwidun Hobu lun Bungiu uágubei lasigenehóua, ígirati Heowá lun lóuchaguni Satanási Hobu. Ítara luba meha lerederun furangu anhein hínsiñe lubéi Bungiu lun Hobu o mínsiñe lan.

10. Ka óuchawaguni lasufurirubei Hobu, ani ida liña lóunabun lun?

¹⁰ Hóuchagua lumuti Satanási Hobu saragu. Adügati lun híweruhoun híbiri libiñanigu afarúa hagía ha híbiri, afarúatiña giñe besafu lubúeingu. Sun le barüti gudemei lun Hobu. Lárigiñe, ábaya lagayuahan Mafia lau amu lamiselu, ladüga hilatiña diisigubei lisaanigu Hobu lidan aban durumandei. Íbini lasuseredun sun lamiselu le, “mafigounhanti Hobu, mariñagun ligía ni kata wuribati luagu Bungiu” (Hobu 1:22).

11. a) Ka labusenrubei Satanási larufudun luagu Hobu ani ida liña lóunabun Heowá? b) Ida liña lóunabun Hobu dan le ladagarunbei aba sandi wéiriti ligari luagu?

¹¹ Mararamagunti Satanási. Saminati funa, íbini lan awanda  lani Hobu leferidiruni sun lumegegun, lubúeingu hama lirahüñü, lagarabaagúba lan luagun Bungiu anhein asandira. Ligía lígirunbalin Heowá lun líchugun aban sandi wuribati ani wéiriti ligari luagun Hobu. Ni ítara meferidirun lumuti Hobu lafiñen luagu Bungiu. Ligía tariñagunbei Bíbülia: “Lau sun le susereelibei, mafigounhanti Hobu ni íbini lau dimurei” (Hobu 2:10).

12. Ka óunabagülei líchugubei Hobu lun lasigenehan Mafia?

¹² Ibidiñeti meha lun Hobu Satanási lan lébunabei lilamiserun. Kei ibidiñe lubéi lun luáguti lasigeneruni Mafia liricha Heowá lun larúeihan, saminati yebe Bungiu lan anügübalin sun turóbuli le lun (Hobu 6:4; 16:11-14). Íbini ítara, kiputi úaraguni ligibugiñe Heowá. Arufudati ítara leyeehaña lan Satanási dan le lariñagun leseriwiduña lan Hobu lun Bungiu luágurügü le líchugubei lun.

13. Ka resultóu lánibei lúaragun Hobu lun Bungiu?

¹³ Kei úaragua lubéi Hobu, adügati lun gayara lan líchugun Heowá aban óunabagülei buiti lun lasigenehan Satanási. Inarüni lumada lan meha Heowá Hobu, ani ladüga úaragua lan ruti lafayeiruaha (Hobu 42:12-17).

14, 15. Ka uagu wariñaga gádan lániña lasigenehan Satanási sun gürigia, mámarügü Hobu?

¹⁴ Mámarügüñein luagu Hobu ladimureha Satanási lidan luáguti úaraguni lun Bungiu. Gadan lumutiwa giñe. Furanguti tariñaguni Bíbülia lidan Ariñawagúni 27:11: “Chula bau, niráü, ábame bagundaaragüdünina; ítara luba gayara lan nóunabuniña ha anabagutina”. Dimurei burí le abürüdǘbei saragu sígulu lárigiñe lóunwen Hobu, arufudati Satanási lan méinitimabei hádangiñe ha anabagubani Bungiu, ru ligía hadurun lubúeingu. Dan le wawinwandun kei aubei lagundaara Heowá, wídehaña lun lounabún iyeeni le lariñagubei Satanási, ani gúndaagüda wamutu lanigi Bungiu. Ka hasaminarubei luagu le? Íbini mosu lan hasansirun somu katei lidan hibagari, ma buiti hamuga lun gayara lan hídehan lun lóunabun Bungiu lun leyeehan Mafia?

 ¹⁵ Ariha huméi ka lan lariñagubei Satanási: “Aranseñu liña gürigia lun ladügüni liyaraati lun lesefuruni libagari” (Hobu 2:4). Lau lariñagun “gürigia”, lígiruñei Satanási furangu mámarügüñein lan luagu Hobu ladimureha, ladimurehaña hawagu sun gürigia. Súdiniti ariñahani le. Asigenehati Satanási múaranbadün lan lun Bungiu. Hínsiñeti hamuga lun, danme lan liabin turóbuli burí hun, lun maganbadi humá lun Bungiu móuserun hugíame keisi lubudubu. Ka burí katei gayarabei layusuruni Satanási lun libihini le labusenrubei?

16. a) Ka burí manera layusurubei Satanási lun ladisedagüdüniña gürigia luéi Bungiu? b) Ida luba gayara lan layusuruni Mafia ligíameme burí manera huagu?

¹⁶ Kei wafurendeiruni lidan kapítulu 10, yusuti Satanási ámuñegueinarügü manera lun ladisedagüdüniña gürigia luéi Bungiu. Anihein dan agayuahati kei aban “liñún gáñiti áluaha kaba lan lagünrinchagua” (1 Féduru 5:8). Harihibei lubafu, danme le maha hamá humadagu, hufamilia o amu gürigia lun haturiahanu Bíbülia o lun hadügüni le hafurendeirubei tídangiñe (Huan 15:19, 20). * Súnwandan larufudagun Mafia lungua kamá hamuga “ánheli le íchugub[bei] larugounga” ligía (2 Korintuna 11:14). Ítarati gayarabei layusurun Mafia manera súmaditi lun leyeedunün luéi hanügüni ibagari le aubei lagundaara Bungiu. Maguraasuni aban lídangiñe. Gayarati ladügün lun hasaminarun maweiyasunbadün lan agundaaragüdei Bungiu (Ariñawagúni 24:10). Ani, íbini lóuserun kei “liñún gáñiti” o kei aban “ánheli le íchugubalin larugounga”, ábanrügüñein katei labusenrun libihin: Chouru lumuti danme lan hagagibudagun luma turóbuli o óuchawaguni meseriwidunhadün lanme lun Bungiu. Ida lubati hóunabun lun lasigenehan, arufuda huméime úaragua humá lun Bungiu kei Hobu?

17. Ka san resun súdinibei lun gaganbadi wamá lun lilurudun Heowá?

¹⁷ Gayarati hóunabun lun lasigenehan Satanási ánhadün anüga aban ibagari le auti lagundaara Bungiu. Ka mini lubéi le? Óunabatu Bíbülia: “Hínsiñela Babureme le Bubungiute bun tau sun banigi, tau sun buani luma lau sun bere” (2 Lúrudu 6:5). Eibume línsiñedun Bungiu hun, busenbadün hadügüni le labusenrubei. Abürühati apostolu Huan: “Ladügǘniwa le lubeibei Bungiu, ligía ínsiñehabunibei lun”. Ánhein hínsiñe lubéi Heowá hun tau sun hanigi, harihibei “ménrenguti [lan] lagunfulirúniwa lugumadin” mini lan le mama lan aban ihürügu (1 Huan 5:3).

18, 19. a) Ariñaga humá fiú lídangiñe lilurudun Heowá (ariha huméi páhina 122). b) Ida liña wasubudiruni mamuriahan lan Bungiu katei le siñá wamuti adüga?

¹⁸ Ka burí lilurudunbei Heowá? Fiú lídangiñe, adimurehati luagu igaburi le lunbei madügün wamani. Kéiburi le lídanbei lábugiñe iri “ Madügüwalá le iyereegubei lun Heowá”. Anuhein aban lísüta ñein lau burí igaburi le tasiadirubei Bíbülia lau furangu. Láurügü harihini, gayarati genege lan hun mariban lan fiú lídangiñe. Gama lumoun, lárigiñeme hasaminarun buidu luagun burí bérusu tídangiñeti Bíbülia, harihubei sábiu lan lilurudun Bungiu. Gayarati mosu lanme hadügün asansiruni lidan hibagari, ani ligíaba lan aban katei le hénrengutimabei hun. Gama lumoun, wéiriti hagundan ha anügübani ibagari le aubei lagundaara Bungiu ani buiti hasandiragun houngua (Isaíasi 48:17, 18). Gayarabei hibihini katei le. Ida liña wasubudiruni?

¹⁹ Ladüga maweiyasunti Heowá amuriaha katei le siñá wamuti adüga (aliiha huméi 2 Lúrudu 30:11-14). Subudi lumuti le wayaraabei lumoun le wasiñarubei adüga sügǘ wau (Sálumu 103:14). Gabafuti giñe lun líchugun erei woun lun gaganbadi wamá lun. Abürühati apostolu Pábulu: “Gúnfuliti Bungiu, mígirunbei lun hibihin óuchawaguni le hásiñarun awanda. Lubaragiñe lira, danme liabin óuchawaguni, larufudubei giñe Bungiu  hun ida luba lan háfuridun lídangiñe; ítara luba gayara lan hawanduni” (1 Korintuna 10:13). Gayarati líchugun “óunwenbu ubafu” woun lun líderaguniwa awanda (2 Korintuna 4:7).

20. Ka igaburi le aubei lagundaara Bungiu lunbei hibihini, ani ka uagu súdini lubéi?

²⁰ Lun wagundaaragüdüni Heowá úati buídürügü lan wadisedun luéi le iyereegubei lun. Mosu giñe hínsiñe lan le hínsiñebei  lun woun (Rómana 12:9). Ma buiti hasandiragun hungua hama gürigia ha saminatiña kei hugía, áfaaguatiña luagu ligíameme katei ani harumati hagaburi? Ítarameme liña Heowá. Ligíati, furendei humá lun lahínsiñedun katei le hínsiñebei lun hun. Ariñawagúati lidan Sálumu 15 ka lan lumadagubaña Bungiu luma fiú lídangiñe katei le hínsiñebei lun (aliiha huméi Sálumu 15:1-5). Gagaburi hamuti lumadagu Heowá le unbei tagúaha Bíbülia “igaburi le líchugubei sífiri” anihán igaburi burí ligía: “Ínsiñehabuni, ugundani, darangilaü, gaguraasuni, areiduni, lubuidun igaburi [luma] ragüguaü unguaü” (Galasiana 5:22, 23).

21. Kaba san íderaguaün lun hibihini igaburi le aubei lagundaara Bungiu?

 ²¹ Taliihoun luma taturiahoun Bíbülia estodi líderagubadiwa lun wibihini igaburi le hínsiñebei lun Heowá. Eibume giñe hafurendeiruni le lagurabubei Heowá humagiñe, hasaminaruba kei ligía (Isaíasi 30:20, 21). Eibume línsiñedun Heowá hun, busentimabadün línsiñedun hibagari lun.

22. Kaba hibiha ánhadün anüga aban ibagari le auti lagundaara Bungiu?

²² Mégeiwati áfaaguni lun lanügǘn aban ibagari le auti lagundaara Heowá. Ariñagatu Bíbülia dan lan le hadügüni óunwenbu asansiruni ligía lidan hibagari, hígiruñein binadu higaburi ábameti iserihali lan (Kolosana 3:9, 10). Gama lumoun, ariñagati abürühati Sálumu luagu lilurudun Bungiu: “Buiti nun lun nafalaruni” (Sálumu 19:11). Ánhadün anüga aban ibagari le auti lagundaara Bungiu, heresibirúba saragu afayeiruahaü.Hóunabuba giñe lun lasigenehan Satanási, ani hagundaaragüdüboun lanigi Heowá.