1, 2. Tongola yimwe yilweza ya atu waze te Yehova akuvuluka ngwenyi masepa jenyi.

 UTU muka yena muhasa kusakula apwe sepa lie? Yena muhasa kulikata ni yoze uli ni manyonga, zango ni yitanga yize yena wakuzanga. Muhasa nawa kulikata ni yoze uli ni mbunge yipema ni umbovu ni yitanga yikwo yipema.

² Chize ku mashimbu akunyima, Zambi kakusakula amwe atu hanga apwe masepa jenyi. Chakutalilaho, Yehova yavuluka Apalahama ngwenyi sepa lienyi. (Tanga Izaia 41:8; Tiangu 2:23.) Zambi yavuluka Ndawichi ngwo “lunga wa kulita ni mbunge yami” mumu iye te kakwete yitanga yize Yehova akuzanga. (Yilinga 13:22) Yehova yavuluka nawa profeta Daniele ngwenyi kali mutu yoze ‘akuzanga chikolo.’—Daniele 9:23.

3. Mumu liaka Yehova wasakwile amwe atu hanga apwe masepa jenyi?

³ Mumu liaka Yehova te akuvuluka Apalahama, Ndawichi ni Daniele ngwenyi masepa jenyi? Iye kambile kuli Apalahama ngwenyi: “Hiunononoka ku liji liami.” (Uputukilo 22:18) Chochene, Yehova kakulikata ni waze akulinga yize iye anatumu. Iye yamba kuli A-Izalele ngwenyi: “Ononokenu ku liji liami, mba mungupwa Zambi yenu ni yenu munupwa  atu jami.” (Jeremia 7:23) Nyi wononokena Yehova, ni yena muupwa sepa lienyi!

4, 5. Kuchi Yehova akusolola tachi jenyi hanga akwase atu jenyi?

⁴ Achinyonga kama chize chinalumbunuka kupwa sepa lia Zambi. Mbimbiliya yinambe ngwo Yehova kakutala hano hashi, “akalisolole mukwa tachi kukwasa yoze uli ni mbunge yingunu kuli iye.” (2 Sango ja Mianangana 16:9) Kuchi Yehova mahasa kusolola tachi jenyi hanga akukwase? Mukanda wa Samu 32:8 unasolola chize iye akuchilinga hakwamba ngwo: “[Yami Yehova] mungukufumba, mungukulongesa jila yize chakutamba kwenda. Mungukwaha mana nikukutala ni liso liami.”

⁵ Maliji wano apema kanasolola ngwo Yehova kakutufunga! Iye makusongwela ni kukufunga nyi mukaula shimbi jenyi. Zambi kanazange kukukwasa hanga ujikize hakupalika mu yeseko. (Tanga Samu 55:22) Chochene, nyi wawayila Yehova ni mbunge yeswe, muhasa kupwa ni ushindakenyo ngwe uze apwile nawo mukwa-kwimba masamu, ngwenyi: “Hingunasela Yehova kumeso jami matangwa eswe. Chichi kakokoloka mumu iye kanamana ku chindume chami.” (Samu 16:8; 63:8.) Ewa, Yehova mahasa kukukwasa hanga utwame ni mwono uze muuvwisa mbunge yenyi kuwaha. Alioze, ngwe chize unanyingika kulu, kuli mukwa-kole wa Zambi yoze unazange kukupiangula.

6. Yika Satana alamikijine atu?

⁶ Kapitulu 11 wa mukanda uno kalumbununa chize Satana Ndiapu ahamikine wata wa Zambi. Satana yalamikiza Zambi ngwenyi kali mukwa-saki ni kusolola ngwenyi Yehova kanaswekela Alama ni Eva uhashi wo wa kusakula ene chipi ni chipema. Muze Alama ni Eva havulumuna, hashi nawa hihazala too ni atu, Satana yahamika nawa ngwenyi atu keshi ni zango liamwenemwene muli Zambi. Satana yalamikiza atu  ngwenyi, ayo keshi kuwayila Zambi ni mbunge jo jeswe. Nawa ngwenyi, nyi mamutayiza, kupiangula atu kuli Zambi iye mahasa kuchilinga. Sango ja umwe lunga yoze te akuvuluka ngwo Yombi jinasolola ngwo Satana che akunyonga. Yombi te iya, nawa kuchi kuhamika cha Satana chakwachile hali iye?

7, 8. (a) Yika yapwishile Yombi mutu walisa ni atu akwo? (b) Yika Satana ambile hakutwala kuli Yombi?

⁷ Kuputuka ha shimbu lize kwapwile Yombi hikwapalika miaka 3,600. Iye kapwile lunga mupema, kashika Yehova ambile ngwenyi: “Kuheshi niumwe hashi wa kulifwa nenyi; mumu aye keshi kapalia; mukwa ululi; mukwa kuvwila woma Zambi; keshi kutala ku chuma chipi.” (Yombi 1:8) Zambi te kakuzanga chinji Yombi.

⁸ Satana yahamika ngwenyi Yombi keshi kuwayila Zambi ni umwenemwene. Ndiapu yamba kuli Yehova ngwenyi: “Ngwami, Hiwamushichila chipanga cha kumufunga [Yombi] sali ni sali, ni zuwo lienyi, ni upite wenyi weswe. Hiwawahisa milimo ya moko jenyi, ni yikumba yenyi hiyoka mu chifuchi. Alioze olola kwoko lie haliapwila, usunge ku upite wenyi weswe mba makutuka kwe kumeso je.”—Yombi 1:10, 11.

9. Kuchi Yehova alingile ha yilamikizo ya Satana, nawa mumu liaka?

⁹ Ha chino, Satana yalamikiza Yombi ngwenyi kakuwayila Zambi ha mukunda wa yuma yize apwile nayo. Ndiapu yahamika nawa ngwenyi Yombi mahasa kwehuka Zambi nyi mamweseka. Kuchi Yehova alingile ha yilamikizo ya Satana? Satana kalamikijine Yombi, kashika Yehova echele Satana hanga eseke Yombi. Ha chino, Yombi te masolola nyi kakwete zango kuli Zambi nyi ka.

10. Yeseko yika Yombi apwile nayo, nawa yika alingile?

¹⁰ Hazehene, Satana yeseka Yombi ni yuma yeka ni yeka. Yimuna ya Yombi yimwe ya yiya, yikwo ya yishiha. Tuvumbi twenyi amwe yaashiha. Yino yeswe yimupwisa chiswale. Luyinda mukwo kejile hali Yombi muze chijimbi  chashihile kumi lia anenyi. Ha upi weswe au, nihindu “Yombi kavulumwine, chipwe kusuma Zambi mulonga wa chize kuchalitele.”—Yombi 1:22.

11. (a) Cheseko chika chamuchiali Satana esekele Yombi, nawa kuchi Yehova alingile? (b) Yika Yombi alingile muze ayijile chipi?

¹¹ Satana kakahongele. Iye kota kanyongene ngwenyi Yombi kehukile Zambi ha kutokesa upite, tuvumbi ni anenyi, alioze mahasa kwehuka Zambi nyi mayiza. Yehova yecha Satana hanga eseke Yombi kamuchiali ni yikola yipi chinji. Nihindu Yombi kakechele kufuliela Zambi. Alioze ni hamu lieswe Yombi yamba ngwenyi: “Ndo kufwa chami chichi kwecha ungunu wami!”—Yombi 27:5.

12. Kuchi Yombi asolwele ngwenyi Ndiapu kali mukwa-mahuza?

¹² Yombi kakanyingikine ngwenyi Satana mwe unamunehena luyinda wacho. Yombi yanyonga ngwenyi Zambi mwe unamunehena luyinda wacho, mumu te kanyingikine kuhamika cha Satana ha wata wa Yehova. (Yombi 6:4; 16:11-14) Nihindu, yanunga ni ungunu wenyi kuli Yehova. Ungunu wenyi yiusolola ngwo Satana mukwa-mahuza, hakwamba ngwenyi Yombi kakuwayila Zambi ha mukunda wa upite!

13. Yika yasolokele ha mukunda wa ushishiko wa Yombi kuli Zambi?

¹³ Kushishika cha Yombi chahanyine kumbululo lingunu kuli Yehova ha yilamikizo ya Satana. Chochene, Yombi te sepa lia Yehova, kashika Zambi yamukwasa ha mukunda wa ushishiko wenyi.—Yombi 42:12-17.

¹³ Kushishika cha Yombi chahanyine kumbululo lingunu kuli Yehova ha yilamikizo ya Satana. Chochene, Yombi te sepa lia Yehova, kashika Zambi yamukwasa ha mukunda wa ushishiko wenyi.—Yombi 42:12-17.

14, 15. Mumu liaka mutuhasa kwamba ngwetu kulimika cha Satana hali Yombi chinakwate hali atu eswe?

¹⁴ Chikuma cha kupwa ni ungunu kuli Zambi chize Satana avundwile kuchakwachile wika hali Yombi. Ni yena chinakukwate. Chino chinasoloka kanawa mu mukanda wa Yishima 27:11, haze Liji lia Yehova linambe ngwo: “Mwanami pwako ni mana ukawahise mbunge yami, ngukahase kukumbulula yoze manguchoka.” Maliji wano asonekene miaka yinji kunyima muze te Yombi hafwa kulu, kanasolola ngwo Satana  nihindu machichoka Zambi ni tuvumbi twenyi. Nyi twapwa ni yitanga yize Yehova azanga, mutuhasa kuhana kumbululo ku mahuza a Satana ni kuvwisa Zambi kuwaha. Kuchi yena wanyonga ha maliji wano? Chili chipema ni yena kuhana kumbululo ku mahuza a Ndiapu, ha kwalumuna yimwe yitanga ye.

¹⁵ Nyingika ngwe Satana kambile ngwenyi: ‘Mutu mecha yeswe ali nayo ha kulamwina mwono wenyi.’ (Yombi 2:4) Satana ha kwamba ngwenyi “mutu,” yasolola ngwenyi hi Yombi wika ko analamikiza alioze atu eswe. Chikuma chino chili chilemu chinji. Satana kakuhamika ha ungunu we kuli Zambi. Ndiapu mevwa kuwaha nyi wavulumuna kuli Zambi ni kwehuka shimbi jenyi chipi-chipi muze mumona lamba. Kuchi Satana akweseka kulinga chocho?

16. (a) Miheto yika Satana akuzachisa hanga apiangule atu akatuke kuli Zambi? (b) Kuchi Ndiapu mahasa kuzachisa miheto yacho hanga akupiangule?

¹⁶ Ngwe chize twalilongesanga mu Kapitulu 10, Satana kakuzachisa miheto yeka ni yeka hanga apiangule atu akatuke kuli Zambi. Nawa, iye kapwa “ngwe ndumba wa kuhanjika ni lundunjila kakwendangana nikufupa yoze mahasa kuumbula.” (1 Petulu 5:8) Kashika, Satana mahasa kuzachisa masepa, usoko hanji mutu mweswawo alimike ni yena hanga weche kulilongesa Mbimbiliya ni kukaula yize unalilongesa. a (Yoano 15:19, 20) Chikwo nawa, Satana kakulipwisa “ngwe mungelo wa pangu.” (2 A-Korindu 11:14) Ndiapu mahasa kuzachisa muheto hanga akupiangule ni kukutwala mu jila yize Zambi keshi kuzanga. Iye mahasa kuzachisa nawa kuhonga cha ku mbunge ye hanga unyonge ngwe yena kuwatelele kuwayila Zambi. (Yishima 24:10) Chipwe Satana malipwisa  ngwe “ndumba wa kuhanjika ni lundunjila” hanji malitenga “ngwe mungelo wa pangu,” nihindu kuhamika chenyi chochene: Ngwo, nyi wapwa mu lamba hanji mu yeseko, yena mwecha kuwayila Zambi. Kuchi muhasa kukumbulula mahuza a Satana ni kusolola ungunu we kuli Zambi ngwe chize Yombi alingile?

17. Yika muyikulingisa hanga wononokene shimbi ja Yehova?

¹⁷ Muhasa kuhana kumbululo ku mahuza ja Satana ha kwononokena shimbi ja Zambi. Yika chino chinalumbunuka? Mbimbiliya yinakumbulula ngwo: “Nuzange Yehova Zambi yenu ni mbunge jenu jeswe ni alma jenu jeswe, ni ndundo jenu jeswe.” (Shimbi Yamuchiali 6:5) Muze muzanga chinji Zambi, muupwa ni nyonga lia kulinga yize iye anazange kuli yena. Kashika postolo Yoano asonekene ngwenyi: “Mumu lino lie zango lia Zambi ngwo, Tukafunge shimbi jenyi.” Nyi muzanga Yehova ni mbunge ye yeswe, mumona ngwe “shimbi jenyi hi jikalu ko.”—1 Yoano 5:3.

18, 19. (a) Shimbi ja Yehova jimwe jika? (Tala mu kasha ha lifwo 122.) (b) Kuchi tunanyingika ngwetu Yehova keshi kutwita yuma yize kutuchi kuhasa kulinga?

¹⁸ Shimbi ja Yehova jika? Jimwe jakusolola yitanga yize twatamba kwehuka. Chakutalilaho, tala kasha ha lifwo 122, yize yili ni chikuma chakwamba ngwo “Kanda Ulinga Yuma Yize Yehova Akwivwila Lwaji.” Muwanaho yimwe yitanga yize Mbimbiliya kuyatayijile. Chitangu, muhasa kumona ngwe yitanga yacho yimwe hi yipi ko. Alioze muze mupukuna kanawa ha yisoneko yize yiliho, mumona mana a shimbi ja Yehova. Kwalumuna yitanga ye muchihasa kupwa chikalu chinji ku mwono we. Alioze, nyi mulinga yize Zambi azanga muupwa ni yiwape ni uwahililo unji ku mwono. (Izaia 48:17, 18) Achi chili chuma chize muhasa kulinga. Kuchi tunanyingika chocho?

¹⁹ Yehova keshi kutwita yuma yize kutuchi kuhasa kuyilinga. (Tanga Shimbi Yamuchiali 30:11-14.) Iye kananyingika  kanawa tachi jetu ni haze jasulila kuhiana yetwe ene. (Samu 103:14) Nawa, Yehova mahasa kutwaha tachi hanga tumwononokene. Postolo Paulu yasoneka ngwenyi: “Zambi iye wamwenemwene, mba kechi katayiza akanweseke kuhiana chize munuhasa; alioze hamwe ni cheseko makanumwesa jila ya kutuhukamo hanga nukahase kunyongonona.” (1 A-Korindu 10:13) Yehova mahasa kukwaha ‘tachi jahiana,’ mba uhase kunyongonona. (2 A-Korindu 4:7) Muze te hanyongonona ha yeseko yinji, Paulu yamba ngwenyi: “Kunahasa kulinga yuma yeswe muli yoze wakunguhashisa.”—A-Fwilipu 4:13.

20. Yitanga yika yipema twatamba kupwa nayo, nawa mumu liaka yapwa yilemu?

²⁰ Kuvwisa Yehova kuwaha kuchalumbunukine wika kwehuka yitanga yize iye akuvwila lwaji. Watamba nawa kuzanga yuma yize iye akuzanga. (A-Roma 12:9) Yena wakuzanga kulikata ni waze akwete manyonga, zango ni yitanga ngwe yize yena ulinayo nyi? Ni Yehova neye chenacho azanga. Kashika zanga yitanga yize Yehova akuzanga. Yimwe yili mu Samu 15:1-5, muze twakutanga hakutwala kuli waze Zambi akuvuluka  ngwenyi masepa jenyi. (Tanga Samu 15:1-5.) Masepa ja Yehova kakusolola yitanga yize Mbimbiliya yinavuluka ngwo ‘mihuko ya spiritu.’ Mihuko yacho yili “zango, ni uwahililo, ni sambukila, ni kulihumikiza, ni utu, ni upeme, ni kushishika, ni kushimbika, ni kusuula.”—A-Ngalashia 5:22, 23.

21. Yika muyikukwasa hanga upwe ni yitanga yize Zambi akuzanga?

²¹ Kutanga ni kulilongesa Mbimbiliya mashimbu eswe muchikukwasa hanga upwe ni yitanga yize Yehova akuzanga. Nawa kulilongesa yize Zambi akuzanga muchikukwasa kutesa manyonga je ni a iye. (Izaia 30:20, 21) Nyi muzanga chinji Yehova, mufupa kulinga chinji yize iye akuzanga.

22. Yika muyilingiwa nyi wapwa ni yitanga yize yakuvwisa Zambi kuwaha?

²² Watamba kusa tachi mba upwe ni mwono uze muuvwisa Yehova kuwaha. Kulita ni Mbimbiliya, kwalumuna yitanga chinalumbunuka kuzula mutu mukulu ni kuzala mutu mwaha. (A-Kolosu 3:9, 10) Alioze hakutwala ku shimbi ja Yehova mukwa-kwimba masamu yasoneka ngwenyi: “Ha [kujikaula] kuchili kwononona chinene.” (Samu 19:11) Ni yena mumona ngwe chili chipema chinji kupwa ni yitanga yize yakuvwisa Zambi kuwaha. Ha kulinga chino, muhana kumbululo ku mahuza ja Satana ni kuvwisa Yehova kuwaha!