1, 2. Gava yihonena yimwe yovantu ava ga tere Karunga asi vakaume vendi wovanene.

MUNTU musinke ngano no horowora a kare kaume koge? Narunye, ngano no hara gumwe ogu ga kara nomagazaro ngwendi goge nokuhafera yininke yokulifana ntani nonontambo ngwendi doge. Ntani ove ngano ngo horowora gumwe ogu ga kara noyikara yoyiwa ngwendi unongo nonkenda.

² Mohistoli nazinye, Karunga kwa horowora vantu vamwe va kare vakaume vendi wovanene. Pasihonena, Jehova nga tumbura Abirahamu asi mukwawo zendi. (Jesaya 41:8; Jakopo 2:23) Karunga kwa tumbwire Ndafita asi “mugara ga za nge komutjima” morwa age yige muntu gumwe ga here Jehova. (Yirugana 13:22) Ntani Jehova kwa tere muporofete Ndaniyera asi ‘ogu ga here.’—Ndaniyera 9:23.

3. Morwasinke a horowere Jehova vantu vamwe mokukara vakaume vendi?

³ Morwasinke ga horowerere Jehova Abirahamu naNdafita ntani naNdaniyera va kare vakaume vendi? Age kwa tanterere Abirahamu asi: “Ono purakene ezwi lyange.” (Genesis 22:18) Yimo, Jehova kuhedera pepi nowo ava linunupike mokurugana eyi a va tantere. Kombinga zoVaisraeli ga uyungire asi: “Ame  kwa va pangerere asi va limburukwe kwange, asi ngani kare Karunga gwawo, ano awo va kare vantu vange.” (Jeremiya 7:23) Nsene o limburukwa Jehova, nove kuvhura ngo kare kaume kendi!

4, 5. Ngapi omu a gava Jehova nonkondo kovantu vendi?

⁴ Gazadara kuhamena mauwa gokukara kaume kaKarunga. Bibeli kuuyunga asi Jehova kwa kupapara nompito mokugava “nonkondo kwanavenye ava ava hama kwendi nomutjima nagunye.” (2 Histoli 16:9) Ngapi omu na vhura Jehova kugava nonkondo koge? Nkedi zimwe kwa zi tura mEpisarome 32:8, omu atu resa asi: “Ame [Jehova] tani ku rongo nzira ezi no genda; ngani ku pukurura oku tani ku takamesa.”

⁵ Eh, elikido musi lyepakerombili lyaJehova! Age nga ku pa mavyukiso gohepero nokukutakamesa omu ono kugasikisa mo. Karunga ana hara kukuvatera o didimike maudigu nomaheteko goge. (Episarome 55:22) Nsene o kerera Jehova nomutjima nagunye, ngo vhura kukara nehuguvaro ngwendi muepisarome ogu ga uyungire asi: “Ame kupaka HOMPA nkenye apa komeho zange; moomu ga kara korulyo rwange, neisi hena ngayi nyunganga nge.” (Episarome 16:8; 63:8) Yimo, Jehova kuvhura kukuvatera mokuparuka monkedi ezi azi mu hafesa. Nye, ngamoomu wa yi diva, pwa kara nkore zaKarunga ogu ana hara a ku kondere mokuyirugana.

6. Ngapi omu ga rundilire Satana vantu?

⁶ Egaununo 11 mobuke ezi kwa faturura omu ga homona Satana Muzonaguli upangeli waKarunga. Satana kwa rundilire Karunga noyimpempa nokutanta asi Jehova kapi ga wapa mokudira kupulisira oAdamu naEva mokuhorowora vene eyi yoyiwa neyi yoyidona. Konyima zokuzona oAdamu naEva ntani napa lya tamekere evhu kuvhuka novana vawo, Satana kwa homwene konda zovantu zokukerera Karunga. Satana kwa rundilire  asi: “Vantu kapi ava kerere Karunga morwa va mu hara. Peni nge mpito ntani ame kuvhura kugusa nkenye ogu kwaKarunga.” Sihorokwa somugara gedina Joba kulikida asi eyi yiyo ga pulire Satana. Yilye ga kere Joba, ntani ngapi omu ga hamenene mo mehomono lyaSatana?

7, 8. (a) Yinke ya ninkisire Joba a likerere movantu womosiruwo sina? (b) Ngapi omu ga homwene Satana konda zaJoba zokukerera Karunga?

⁷ Joba kwa parukire nare nomvhura dokusika po-3 600. Age kwa kere mugara gomuwa, yiyo ga uyungire Jehova asi: “Pevhu patupu nampili gumwe ga limburukwa age ga hungama ngwendi yige. Age kukerera nge, ga nyenga kurugana udona nkenye ou.” (Joba 1:8) Joba kwa hafesere Karunga.

⁸ Satana kwa homwene konda zaJoba zokukerera Karunga. Muzonaguli kwa tanterere Jehova asi: “Ove kumugamena narunye kumwe nepata lyendi noyiweka yendi. Ove hena kutungika nkenye eyi a rugana, yiyo wa mu pa noyimuna yoyinzi eyi ya zwida sirongo nasinye. Nye nsene o mu gusa nkenye aka ga weka, ngano ta teka koge, ove kuna kutara!”—Joba 1:10, 11.

9. Ngapi omu ga limbwilire Jehova ehomono lyaSatana, ntani morwasinke?

⁹ Satana kwa tente asi Joba kwa kererere Karunga mokugwana tupu yuma. Muzonaguli kwa rundilire hena asi nsene Joba va mu heteka, age ngano ta sigi Karunga. Ngapi omu ga limbwilire Jehova ehomono lyaSatana? Konda zaJoba zokukerera Karunga kwa hamenene mo monompata, yipo nye Jehova kwa pulisilire Satana mokuheteka Joba. Monkedi ezi, eharo ndi epiro eharo lyaJoba kwaKarunga ngano tava li likida sili.

10. Maheteko musinke ga horokerere Joba, ntani ngapi omu ga rugene?

¹⁰ Satana kwa hetekere Joba mononkedi dokulisiga-siga. Yimuna yimwe yaJoba kwa yi veke, ntani yimwe kwa yi dipagere. Sinzi sovakereli vendi kwa va dipagere. Eyi kwa retere udigu woyikweparu. Simpagwa kwa horokere apa vana vaJoba murongo va fire mekundungu. Moyihorokwa eyi yoyidona “Joba kapi ga zonene asi a pe Karunga usima.”—Joba 1:22.

11. (a) Erundiro musinke lyauvali ga tulire po Satana kuhamena Joba, ntani ngapi omu ga limbwilire Jehova? (b) Ngapi omu ga kere Joba mouvera vendi wokukora?

 ¹¹ Satana kapi ga hagekere. Age kwa gazarere asi nampili ngano Joba a lididimikire ezumbaneso lyoyiweka novakareli ntani novana vendi, ngano nga siga Karunga nsene a vera. Jehova ga pulisilire Satana mokuzuguma Joba nouvera woudona wokukora. Nampili ngoso, oyo kapi ya ninkisire Joba a zumbanese epuro mwaKarunga. Nye, age kwa uyungire noupampi asi: “Ame ngani kara ngorooro mokupira unzoni wange dogoro kezuva lyonomfa dange.”—Joba 27:5.

12. Ngapi omu ga limbwilire Joba ehomono lyoMuzonaguli?

¹² Joba kapi ga divire asi Satana yige ga retesere po maudigu gendi. Mokudira kudiva kuhamena ehomono lyoMuzonaguli koupangeli waJehova, Joba kwa gazarere asi Jehova ga retesere po maudigu gendi. (Joba 6:4; 16:11-14) Nye simpe age kwa kere noulimburukwi kwaJehova. Erundiro lyaSatana asi Joba kukerera Karunga mokugwana tupu yuma kwa li likidire asi yimpempa meparu lyoulimburukwi waJoba!

13. Morwa ulimburukwi waJoba kwaKarunga, yinke ya horokere?

¹³ Ulimburukwi waJoba wa pere Jehova elimbururo lyononkondo kerundiro lyehomono lyaSatana. Joba sili kwa kere kaume kaJehova, ntani Karunga ga mu tungikire koulimburukwi wendi.—Joba 42:12-17.

14, 15. Morwasinke natu vhulira kutanta asi ehomono lyaSatana kwaJoba kwa hamena kovantu navenye?

¹⁴ Nompata doulimburukwi kwaKarunga edi ga tulisire po Satana kapi da vyukilire tupu kwaJoba gelike. Nove wa hamena mo. Eyi va yi likida nawa moYisewe 27:11, omu adi uyunga Nonkango daJehova asi: “Munwange kara munongo, makura ame tani hafa. Ame ngani limburura nkenye ogu nga pa nge usima.” Unene po Satana yige ogu a pe Karunga usima nokurundira vakereli vendi, ngamoomu adi likida nonkango edi va tjenge nomvhura mafere konyima zonomfa daJoba. Nsene tu paruka monkedi ezi azi hafesa Jehova, ose sili kuvatera  mokugava elimbururo komarundiro goyimpempa gaSatana, ntani monkedi ozo ose kuhafesa Karunga. Ngapi oyo omu ayi ku ninkisa o lizuvhe? Ngano kapi ya wapa mokukara noruha mokulimburura marundiro goyimpempa goMuzonaguli, nampili yi kare asi hepero kutura po marunduruko meparu lyoge?

¹⁵ Nongonona eyi ga uyungire Satana: ‘Muntu kugava nkenye eyi, morwa kuhara a paruke.’ (Joba 2:4) Mokuuyunga asi “muntu,” Satana ga yi zeresere nawa-nawa asi erundiro lyendi kapi lya hamenene tupu kwaJoba nye kovantu navenye. Olyo egano lyomulyo unene. Satana kwa homona ulimburukwi woge kwaKarunga. Muzonaguli kuna hara a ku mone o dire kulimburukwa Karunga ntani o sige nzira zouhunga nsene maudigu ga horoka. Ngapi omu na vhura kuhetekera Satana kuyisikisa mo eyi?

16. (a) Mononkedi musinke a heteke Satana mokugusa vantu kwaKarunga? (b) Ngapi na vhura Muzonaguli kuruganesa nonkedi edi koge?

¹⁶ Ngomu va yi zogera mEgaununo 10, Satana kuruganesa nongendeseso dokulisiga-siga mokuheteka kugusa vantu kwaKarunga. Pamwe, age kuhomokera “ngwendi nyime gokununga, a papare ogu na lipapagwira.” (1 Peturusa 5:8) Yipo nye, epukiso lyaSatana kuvhura kulimona apa vakaume novanekoro ndi vapeke ava rwanese elituromo lyoge mokulironga Bibeli nokusikisa mo eyi ono kulironga. * (Johanesa 15:19, 20) Ano pamwe, Satana “kulipirura ta kara ngwendi muengeli gouzera.” (2 Vakolinte 11:14) Muzonaguli kuvhura kuruganesa nonkedi dokudira kudimburura mokukupukisa ntani nokukukoka ko mokuparuka monkedi zokuhafesa Karunga. Age hena kuvhura kuruganesa edompeso, pamwe kukuninkisa o lizuvhe asi kapi ono fire kuhafesa Karunga. (Yisewe 24:10) Yi kare asi Satana ta kara ngwendi “nyime gokununga” ndi a moneke  ngwendi “muengeli gouzera,” ehomono lyendi kukara ngorooro: Age kuuyunga asi, nsene to ligwanekere nomahepeko ndi maheteko, ngo hageka kukerera Karunga. Ngapi no vhura kulimburura ehomono lyendi nokulikida ulimburukwi woge kwaKarunga, ngamoomu ga yi rugene Joba?

17. Konda musinke zonene po zokulimburukwa koyipango yaJehova?

¹⁷ Ove kuvhura kulimburura ehomono lyaSatana mokuparuka monkedi ezi azi hafesa Karunga. Yisinke ya hamena mo? Bibeli kulimburura asi: “O hare HOMPA Karunga goge nomutjima goge nagunye nomwenyo goge nagunye nononkondo doge nadinye.” (Deuteronomium 6:5) Ngamoomu ngali kura eharo lyoge kwaKarunga, ngo kara neharo lyokurugana eyi ga hepa ko koge. Mupositoli Johanesa kwa tjenge asi: “Eharo lyetu lyokuhara Karunga lyeli asi, ose atu sikise mo yipango yendi.” Nsene o hara Jehova nomutjima goge nagunye, ngo ya mona asi “yipango yendi, kapi ya paka udigu.”—1 Johanesa 5:3.

18, 19. (a) Yipango musinke yimwe yaJehova? (Tara kakende pepenuno 122.) (b) Ngapi omu tuna yi diva asi Karunga kapi ana kupura yoyinzi kwetu?

¹⁸ Yinke yipango yaJehova? Yimwe kwa hamena mo nkareso ezi twa hepa kunyonkera. Pasihonena, tara  kakende pepenuno 122, oko ka kutanta asi “Nyoka eyi ga nyenga Jehova.” Omo to ka gwana mo nonkareso edi za nyokera Bibeli. Pokuyitara pomuhowo, maruganeso gamwe vana tura mo kuvhura ga dire kumoneka asi madona. Nye konyima zokuteda komatjangwa aga va tura mo, ngano ngo ka mona nawa-nawa unongo womonoveta daJehova. Kutura marunduruko monkareso zoge kuvhura yi kare udigu wounene ou wa ligwanekera nawo. Nye, kuparuka monkedi ezi azi hafesa Karunga kureta uwa noruhafo rorunene. (Jesaya 48:17, 18) Ano ove kuvhura kuyisikisa mo. Ngapi omu twa yi diva oyo?

¹⁹ Jehova kapi ta pura yoyinzi kupitakana nonkondo detu. (Deuteronomium 30:11-14) Age ga diva eyi atu vhuru kurugana ntani nomaunkundi getu kupitakana omu twa yi diva  nyamwetu. (Episarome 103:14) Mokugwederera ko, Jehova kuvhura kutupa nonkondo tu mu limburukwe. Mupositoli Paurusa kwa tjenge asi: “Karunga mulimburukwi, age nokumutarerera si asi ga mu gwane maheteko aga ga pitakana nonkondo deni, nye kumwe nomaheteko age kumuwapaikira evega lyokugahenduka, mu vhure kugadiinina po.” (1 Vakolinte 10:13) Mokukuvatera o lididimike, Jehova kuvhura kukupa “nonkondo edi dononene.” (2 Vakolinte 4:7) Konyima zokulididimikira mahepeko gomanzi, Paurusa ga vhulire kuuyunga asi: “Ame kuvhura nayinye nononkondo dogu a pameke nge.”—Vafilipi 4:13.

20. Yikara musinke yokuhafesa Karunga ngano no vhura kutunga po, ntani morwasinke ya karera mulyo?

²⁰ Yosili, yinzi ya hamena mo mokuhafesa Jehova kupitakana kunyokera yininke eyi ga nyenga. Wa hepa hena kuhara eyi ga hara. (Varoma 12:9) Kapi o lizuvhu pepi kumwe nava va kara nomagazaro ngwendi goge nokuhafera yininke yokulifana ntani nonontambo ngwendi doge ndi? Jehova nage kulizuvha ngoso. Lironga nye mokuhara yininke eyi ga hara Jehova. Yimwe yamo kwa yi faturura mEpisarome 15:1-5, omu natu  resa kuhamena owo ga tumbura Karunga asi vakaume vendi. Vakaume vaJehova kulikida eyi azi tumbura Bibeli “yiyimwa yoMpepo.” Ayo kwa kwatera mo yikara ngwendi “eharo nehafo nombili nezaverero nounongo nouwa noulimburukwi, nougomoki nelipangero.”—Vagarata 5:22, 23.

21. Yinke ngayi ku vatera mokutunga po yikara yokuhafesa Karunga?

²¹ Mokuresa nokulironga Bibeli nkenye apa ngayi ku vatera mokutunga po yikara eyi ga hara Jehova. Ntani kulironga eyi ga hepa Karunga ngayi ku vatera mokuvyukisa magano goge kumwe nomagazaro gaKarunga. (Jesaya 30:20, 21) Moomu ono kunkondopeka eharo lyoge lyokuhara Jehova, yimo ngali nenepa eharo lyoge lyokuhara kuparuka monkedi ezi azi hafesa Karunga.

22. Yinke ngo ka sikisa mo nsene o paruka monkedi ezi azi hafesa Karunga?

²² Pwa hepa elituromo mokuparuka monkedi ezi azi hafesa Jehova. Bibeli kwa fanekesa kurundurura eparu lyoge mokulihutura muntu gomukuru-kuru nokudwara muntu gomupe. (Vakorosi 3:9, 10) Nye kombinga zoyipango yaJehova, muepisarome kwa tjenge asi: “Mfuto zange ngani zi gwanena mokuyilimburukwa.” (Episarome 19:11) Nove ngo ka yi mona asi kuparuka monkedi ezi azi hafesa Karunga kureta matungiko gomanzi. Mokuyirugana ngoso, ngo gava elimbururo kehomono lyaSatana nokuhafesa mutjima gwaJehova!