Kuyoya Mujila Yakwivwisa Kalunga Kuwaha
Kapetulu 12
Kuyoya Mujila Yakwivwisa Kalunga Kuwaha
Uno unahase kupwa ngachilihi usepa lyaKalunga?
Uno chihande akatwile Satana chakwata ngachilihi hali ove?
Vilinga muka vyeji kwivwisanga Yehova kupihya?
Nauhasa kuyoya ngachilihi mujila nayivwisa Kalunga kuwaha?
1, 2. Hana vyakutalilaho vyavatu vaze avulukile Yehova kupwa masepa jenyi.
UNO mutu wamuyachi muka muhasa kulikwata nenyi usepa? Chikupu vene musaka kulikwata usepa namutu uze akwechi vilinga navishinganyeka ngana vyayove. Ngocho, mufwila kulikata namutu akwechi vilinga vyamwaza vyakufwana nge kulyononona, nalikoji.
2 Kumyaka yosena, Kalunga nasakulanga vatu vamwe kupwa masepa jenyi. Chakutalilaho, Yehova avulukile Apalahama kupwa sepa lyenyi. (Isaya 41:8; WaYakova 2:23) Kalunga avulukile Ndavichi ngwenyi apwile “lunga wakuya haya muchima wami” mwomwo apwile himutu uze asolwelenga vilinga vize azangile Yehova. (Vilinga 13:22) Kaha nawa Yehova amwene kapolofweto Ndanyele kupwa himutu ‘vazanga chikuma.’—Ndanyele 9:23.
3. Mwomwo ika Yehova eji kusakwilanga vatu vamwe vapwenga masepa jenyi?
3 Mwomwo ika Yehova avulukilile Apalahama, Ndavichi, naNdanyele ngwenyi masepa jenyi? Ivene alwezele Apalahama ngwenyi: “Unononoka mulizu lyami.” (Kuputuka 22:18) Ngocho, Yehova eji kupandamanga kuli vaze veji kwononokanga nakulinga vyuma mwavalweza. Alwezele vaIsalele ngwenyi: “Ivwililenunga mulizu lyami, kaha nangupwanga nguKalunga kenu, kahenu namupwanga muvatu jami.” (Yelemiya 7:23) Shikaho, nayove nawa unahase kupwa sepa lyaYehova nge naumwononokanga.
YEHOVA EJI KUJIKIJISANGA MASEPA JENYI
4, 5. Uno Yehova eji kusololanga ngachilihi ngolo hali vatu jenyi?
4 Achishinganyeke hanganyo yatwama hakupwa sepa lyaKalunga. Mbimbiliya yamba ngwayo Yehova eji kuhitangananga “mangana alisolole nangolo hali vakwechi michima yakukupuka mwosena kuli Ikiye.” (Mijimbu 2, 16:9) Uno Yehova nahase ngachilihi kusolola ngolo jenyi hali ove? Jila yimwe vayivuluka hali Samu 32:8, ngwavo: “[Ami Yehova] nangukunangulanga nakukwinyikilanga mujila nauya, nangukulwezanga mangana nakukulamanga naliso lyami.”
5 Chuma kana chasolola chikupu nge Yehova eji kuzakamanga vatu! Mwahasa kukutwaminyina nakukulama omu mukavangiza vyuma mwakulweza. Kalunga nasake akukafwe umike muvyeseko vyove. (Samu 55:22) Ngocho, nge muzachila Yehova namuchima wosena kaha mupwa ngana mwamuka-kwimba jisamu uze ambile ngwenyi: “Ngunamuhake Yehova makumbi osena kumeso ami, mwomwo ali kulivoko lyami lyachilyo, shikaho kangweshi kukapelyangilako.” (Samu 16:8; 63:8) Enga, Yehova nahase kukukafwa uyoye mujila nayimwivwisa kuwaha. Oloze nganomu unejiva lyehi, kwatwama muka-kole waKalunga uze ali nakusaka kukuhonesa kulinga chuma kanechi.
CHIHANDE AKATWILE SATANA
6. Vyuma muka Satana avangijikilile vatu?
6 Kapetulu 11 mumukanda uno alumbununanga omwo Satana Liyavolo afumbukilile wata waKalunga. Satana ahanyine Kalunga mulonga ngwenyi apwa muka-kwonga kaha ngwenyi Yehova apihishile hakuhona kwecha vaAlama naEve valisakwile vavene vyuma vyakwoloka nevi vyakuhenga. Omu vaAlama naEve vavulumwine, nomu nawa kaye kazalile navana vavo, Satana avangijikilile vatu ngwenyi veji kuzachilanga Kalunga namuchima wakuhenga. Satana ambile ngwenyi: “Vatu kavazachila Kalunga mwomwo vamuzangako. Achinguhane lwola, kaha ngunahase kulingisa kala mutu afumbukile Kalunga.” Mujimbu waYopa wasolola nge omu mukiko ashinganyekelenga Satana. Uno Yopa apwile iya, kaha chihande akatwile Satana chakwachile ngachilihi hali ikiye?
7, 8. (a) Vyuma muka vyalingishile Yopa kupwa wakulipwila havatu vapwileko halwola luze? (b) Vyuma muka Satana avangijikilile Yopa?
7 Yopa apwileko myaka 3,600 kunyima. Apwile mutu wamwaza, mwomwo Yehova ambile ngwenyi: “Hamavu kaheshi weka wakumufwanako, ikiye lunga wakulonga, wakusungama, wakungwivwAmi Kalunga woma nakulihenda kukupihya.” (Yopa 1:8) Yopa evwishile Kalunga kuwaha.
8 Satana avangijikilile Yopa ngwenyi azachililenga Kalunga namuchima wakuhenga. Liyavolo alwezele Yehova ngwenyi: “Ove unamujingulwisako chipato che ndo nyi? nakuzuvo yenyi nakuvyuma vyosenovyo ali navyo unajingulwisako nawa che ndo. Vilinga vyamavoko enyi unaviwahisa, kaha vikumba vyenyi vinazevumuka mulifuchi. Oloze jino acholole livoko lyove ulinangike havyuma vyosenovyo ali navyo, kaha mwakwangula kumeso ove.”—Yopa 1:10, 11.
9. Yehova akumbulwile ngachilihi kuchihande akatwile Satana, kaha nawa mwomwo ika?
9 Enga, Satana avangijikilile Yopa ngwenyi azachililenga Kalunga mwomwo yavyuma vamuhanyine. Kaha ambile nawa ngwenyi nge Yopa navamweseka kaha mwafumbukila Kalunga. Jino Yehova akumbulwile ngachilihi kuchihande kanechi akatwile Satana? Yehova etavishile Satana eseke Yopa mwomwo chihande kana chakwachile hakulonga chaYopa. Yopa hakumweseka, chahashile kusolola hatoma nge azangilenga chikupu Kalunga nyi chiku.
YOPA NAVAMWESEKA
10. Vyeseko muka vyawanyine Yopa, kaha alingile ngachilihi?
10 Satana esekele Yopa mujijila jajivulu. Vimuna jaYopa vamwe vavevile, kaha veka vavajihile. Vangamba jenyi vavavulu vavajihile. Echi chakaluhwishile chikuma chiyoyelo chaYopa. Kaha ukalu weka nawa wejile omu vana vaYopa likumi vafwile napeho yanyamanganda. Oloze, chamokomoko naukalu wosenou, “Yopa kavulumwinekoko, chipwe kumuvulukila Kalunga kuhulama.”—Yopa 1:22.
11. (a) Chuma muka chikwavo chize Satana avangijikilile Yopa, kaha Yehova amukumbulwile ngachilihi? (b) Yopa alingile muka omu avijile musongo waupi?
11 Satana kakuminyinyine aha kahako. Ashinganyekele pamo ngwenyi numba tuhu Yopa nomika hakujimbalisa vikumba vyenyi, navangamba jenyi, navana venyi, oloze nahase kwalumukila Kalunga nge mwaviza. Yehova etavishile Satana avete Yopa namusongo waupi chikuma. Oloze nachuma kanechi nawa kachalingishile Yopa ahone kufwelela Kalungako. Yopa ahanjikile nakumika ngwenyi: “Kangweshi kulifumisa kulonga chamiko palanga nomu naungufuma mwono wami.”—Yopa 27:5.
12. Uno Yopa akumbulwile ngachilihi chihande chaLiyavolo?
12 Yopa kejivile ngwenyi Satana ikiye anehelenga ukalu kanako. Hakuhona kwijiva kanawa omu Liyavolo afumbukilile wata waYehova, Yopa ashinganyekele ngwenyi pamo Kalunga ikiye anehelenga ukalu kana. (Yopa 6:4; 16:11-14) Chipwe ngocho, atwalileho lika kupwa wakulonga kuli Yehova. Ngocho, kulonga chaYopa chasolwele nge vishinganyeka vyaSatana vyakwamba ngwenyi Yopa azachilililenga nganyo kuli Kalunga, vyapwile vyamakuli.
13. Omu Yopa apwile wakulonga kumeso aKalunga, vyuma muka vyasolokele?
13 Kulonga chaYopa chalingishile Yehova akumbulule mwakutamo kuwaji waSatana. Chikupu vene, Yopa apwile sepa lyaYehova, kaha Kalunga akiswile Yopa hachiyoyelo chenyi chakulonga.—Yopa 42:12-17.
OMU CHIHANDE KANA CHAKWATA HALI OVE
14, 15. Mwomwo ika natwambila ngwenyi chihande akatwile Satana hali Yopa chakwata nahali vatu vosena?
14 Chihande chakupwa vakulonga kuli Kalunga chize akatwile Satana kachakwachile hali Yopa kahako. Nayove nawa muwatwama muchihande kanechi. Echi vachisolola hatoma muMazu aYehova ahali Vishimo 27:11, akwamba ngwenyi: “Ove mwanami, twamanga namangana, uwahisenga muchima wami, mangana ngukamukumbulule ou mwangutomba.” Mazu kana awa vasonekele te himunahichi lyehi myaka yayivulu kufuma hakufwa chaYopa, asolola nge Satana achipwile lika nakutomba Kalunga nakuvangijikila vangamba Jenyi. Nge natuyoya mujila nayivwisa Yehova kuwaha, kaha tuli nakumukafwa mwakukumbulwila makuli aSatana, nakwivwisa muchima waKalunga kuwaha. Uno uli nakwivwa ngachilihi hachuma kanechi? Kwazana mumulimo wakukumbulula Liyavolo hamakuli enyi hichuma chamwaza chiyovo, numba tuhu chuma kana nachisakiwa kwalumunako vyuma vimwe mukuyoya chove.
15 Anuka ngwove, Satana ambile ngwenyi: ‘Vyosenovyo ali navyo mutu mwavihana hamwono wenyi.’ (Yopa 2:4) Satana hakwamba ngwenyi “mutu,” alumbunwine hatoma ngwenyi chihande chenyi kachakwachile kaha hali Yopako oloze nahali vatu vosena. Echi hichishina chachilemu chikuma. Satana nakwimanyina nakole hakulonga chove kuli Kalunga. Liyavolo ali nakusaka ulikange kuli Kalunga nakwecha kulinga vyuma vyakwoloka nge uli nakumona ukalu. Uno Satana nahase kutesamo ngachilihi chuma kanechi?
16. (a) Satana eji kuzachisanga jijila muka hakusaka kuhungumwisa vatu vafume kuli Kalunga? (b) Liyavolo nahase kuzachisa ngachilihi jijila kaneji kuli ove?
16 Kapetulu 10 asolola nge Satana eji kuzachisanga jijila jajivulu mangana ahungumwise vatu vafume kuli Kalunga. Kaha nawa eji kulukukanga vatu “nge ndumba wakutahwoka, nakutonda wose mwawana amulye.” (WaPetulu 1, 5:8) Ngocho, unahase kumona vilinga vyaSatana omu navakwimanyina nakole kuli masepa jove, chipwe vausoko wove, chipwe vatu veka mwomwo yakulinangula Mbimbiliya nakulinga vyuma uli nakulinangula. * (Yowano 15:19, 20) Oloze Satana nawa “eji kulyalumuna mweka nge kangelo kamusana.” (Wavaka-Kolinde 2, 11:14) Liyavolo nahase kuzachisa jijila jakulunguluka mangana akutangule nakukuhungumwisa ufume mujila ize yeji kwivwisanga Kalunga kuwaha. Nahase nawa kukuhombesa nakukulingisa ulivwe nge kawatelemoko kwivwisa Kalunga kuwaha. (Vishimo 24:10) Numba Satana mwapwa nge “ndumba wakutahwoka” nyi nge “kangelo kamusana,” oloze achili lika nakuhanjika mwomumwe ngwenyi: Unahase kulitwamina kuzachila Kalunga nge uli muukalu chipwe muvyeseko. Uno naukumbulula ngachilihi chihande kanechi nakupwa wakulonga kuli Kalunga, ngana mwalingile Yopa?
KUKAVANGIZA JISHIMBI JAYEHOVA
17. Chuma muka chachilemu chatela kutulingisa twononoke jishimbi jaYehova?
17 Unahase kukumbulula chihande akatwile Satana hakuyoya mujila ize nayivwisanga Kalunga kuwaha. Uno echi chasakiwa kulinga ika? Mbimbiliya yakumbulula ngwayo: “Zangenunga Yehova Kalunga kenu namichima yenu yosena, namyono yenu yosena, nangolo jenu josena.” (Lushimbi lwamuchivali 6:5) Omu zangi yove yakuzanga Kalunga nayitohwa, naufwilanga jino kulinga vyuma asaka kuli ove. Kaposetolo Yowano asonekele ngwenyi: “Echi chikiko vene kumuzanga Kalunga, kulamanga jishimbi jenyi.” Nge wazanga Yehova namuchima wove wosena, kaha muwana nge “jishimbi jenyi kajeshi jajikaluko.”—WaYowano 1, 5:3.
18, 19. (a) Uno jishimbi jimwe jaYehova japwa jika? (Tala lipwata halifwo 122.) (b) Tunejiva ngachilihi ngwetu Kalunga keshi nakusaka vyuma vyavivulu kuli etuko?
18 Uno jishimbi jaYehova japwa jika? Jishimbi jimwe jasolola vilinga vize twatela kulihendako. Chakutalilaho, tala lipwata lili halifwo 122, lyakwamba ngwavo “Lihende kuVyuma Ahunga Yehova.” Mulipwata kana muli vilinga vize vakanyisa muMbimbiliya. Muwashiwashi, vilinga vimwe vinahase kusoloka nge kavyeshi vyavipi chikumako. Oloze hakuhunanana havisoneka vanenyikilako, naumona mangana ajishimbi jaYehova. Kwalumuna vilinga vyove mukuyoya chove chinahase kupwa chachikalu chikuma. Oloze kuyoya mujila ize yeji kwivwisanga Kalunga kuwaha cheji kusuulwisanga nakwivwisa mutu kuwaha. (Isaya 48:17, 18) Kaha chuma kana unahase kuchilinga chikupu. Tunejiva ngachilihi ngocho?
19 Yehova keshi kutulweza tulinge vyuma vize katweshi kuhasa kulingako. (Lushimbi lwamuchivali 30:11-14) Ejiva kanawa vyuma tunahase kulinga noho natukumina, kuhambakana nomu twalijiva etu vavene. (Samu 103:14) Kaha nawa Yehova nahase kutuhana ngolo mangana tumwononoke. Kaposetolo Paulu asonekele ngwenyi: “Kalunga napu Kavitakamwamba-limwe, Ikiye keshi kwitava vamyeseke kuhambakanomu munahashila, oloze hamwe nakweseka kana mwamisela kuulovokelo mangana muchihase.” (Wavaka-Kolinde 1, 10:13) Yehova hakusaka kukukafwa umike muvyeseko, nahase kukuhana “[na]kumbwambumuka changolo.” (Wavaka-Kolinde 2, 4:7) Paulu hakumika muvyeseko vyavivulu ahashile kwamba ngwenyi: “Ngunahase vyuma vyosena muli Ou eji kunguhananga ngolo.”—Wavaka-Fwilipi 4:13.
KUPWA NAVILINGA AZANGA KALUNGA
20. Vilinga muka azanga Kalunga vize watela kupwa navyo, kaha mwomwo ika vilinga kana vyapwila vyavilemu?
20 Kwivwisa Yehova kuwaha kachakumina kaha hakulihenda kuvilinga vize ahungako. Oloze watela nawa kuzanga vyuma azanga. (Wavaka-Loma 12:9) Wasaka kupandama kuli vaze vakwechi vilinga, navishinganyeka ngana vyayove, ngwetu? Omu mukiko asaka naYehova nawa. Ngocho linangule kuzanganga vyuma vize azanga Yehova. Vyuma kanevi vimwe vavilumbununa hali Samu 15:1-5, haze tweji kutanganga vyavaze Kalunga avuluka kupwa masepa jenyi. Masepa jaYehova veji kusololanga vyuma vize Mbimbiliya yavuluka ngwavo “mihako yashipilitu.” Hamihako kana hatwama navilinga vyakufwana nge “zangi, nakuwahilila, nakuunda, nakutalilila vakwavo chikiko, nakeke, nakukokweza, nakushishika, nakuvova, nakulyononona.”—Wavaka-Ngalesha 5:22, 23.
21. Vyuma muka navikukafwa kupwa navilinga vize azanga Kalunga?
21 Kutanga Mbimbiliya nakulinangulayo kanawa lwola lwosena nachikukafwa upwenga navilinga vize azanga Kalunga. Kaha kulinangula vyuma asaka Kalunga nachilingisa nawa vishinganyeka vyove vilitote navize vyaKalunga. (Isaya 30:20, 21) Nge nautohwesa zangi yove yakuzanga Yehova, kaha naufwila chikuma kuyoya mujila ize eji kwivwilanga kuwaha.
22. Vyuma muka naunganyala hakuyoya mujila yize yeji kwivwisanga Kalunga kuwaha?
22 Enga, twatela kukilikita numbanyi tuyoye mujila yakwivwisa Yehova kuwaha. Mbimbiliya yafwanyisa kwalumuna chiyoyelo chove kukuzula mutu wamwaka nakuvwala wamuhya. (Wavaka-Kolose 3:9, 10) Oloze muka-kwimba jisamu asonekele kutalisa kujishimbi, chipwe ngwetu mazu aYehova ngwenyi: “Hakuwalama hali vyakuwanyinaho vyavivulu.” (Samu 19:11) Nayove nawa nauchiwana nge kuyoya mujila ize yeji kwivwisanga Kalunga kuwaha chikwechi nganyo chikuma. Kaha hakulinga ngocho uli nakukumbulula chihande akatwile Satana nakwivwisa muchima waYehova kuwaha!
[Kwinyikila chamwishi]
^ par. 16 Echi kacheshi nakulumbununa nge mutu himutu mwakwimanyina nakole vali nakumuzachisa kuli Satanako. Oloze Satana ikiye kalunga wamyaka yino, kaha vaka-mavu vosena vatwama mungolo jenyi. (Wavaka-Kolinde 2, 4:4; WaYowano 1, 5:19) Shikaho, twatela kwijiva ngwetu vatu vavavulu kavasaka kuyoya mujila yauKalungako, ngocho vamwe navakwimanyina nakole.
VYUMA YANANGULA MBIMBILIYA
▪ Naupwa usepa lyaKalunga nge naumwononoka.—WaYakova 2:23.
▪ Satana afumbukilile kulonga chavatu vosena.—Yopa 1:8, 10, 11; 2:4; Vishimo 27:11.
▪ Twatela kulihenda kuvilinga vize vyeji kwivwisanga Kalunga kupihya. —Wavaka-Kolinde 1, 6:9, 10.
▪ Natwivwisa Yehova kuwaha hakuhunga vyuma ahunga nakuzanga vize azanga. —Wavaka-Loma 12:9.
[Vihula vyaChilongesa]
[Lipwata/Mivwimbimbi halifwo 122, 123]
LIHENDE KUVYUMA AHUNGA YEHOVA
Kujiha mutu.—Kulovoka 20:13; 21:22, 23.
Ujila.—VyavaLevi 20:10, 13, 15, 16; Wavaka-Loma 1:24, 26, 27, 32; Wavaka-Kolinde 1, 6:9, 10.
Kupanda.—Lushimbi lwamuchivali 18:9-13; Wavaka-Kolinde 1, 10:21, 22; Wavaka-Ngalesha 5:20, 21.
Kulemesa makombelo. —Wavaka-Kolinde 1, 10:14.
Kupenda. —Wavaka-Kolinde 1, 5:11.
Kwiva.—VyavaLevi 6:2, 4; Wavaka-Efwesu 4:28.
Kwonga.—Vishimo 6:16, 19; Wavaka-Kolose 3:9; Kusoloka 22:15.
Lwiso.—Wavaka-Kolinde 1, 5:11.
Ulyanyi.—Samu 11:5; Vishimo 22:24, 25; Malaki 2:16; Wavaka-Ngalesha 5:20.
Kuhanjika chachipi. —VyavaLevi 19:16; Wavaka-Efwesu 5:4; Wavaka-Kolose 3:8.
Kuzachisa manyinga mujila yakuhenga.—Kuputuka 9:4; Vilinga 15:20, 28, 29.
Mutu kukana kuvatalila vaka-tanga yenyi. —WaChimoteu 1, 5:8.
Kwazana mujijita chipwe muvilika vyamapolitiki vyamuno mukaye.—Isaya 2:4; Yowano 6:15; 17:16.
Kunwa makanya chipwe maundu akupendesa akunwina chiseke.—Mako 15:23; Wavaka-Kolinde 2, 7:1.
[Mivwimbimbi halifwo 118]
Yopa vamuhanyine fweto hachiyoyelo chenyi chakulonga
