1, 2. Tikʼaxki̱la kʼai je chjota xi miyo kitsole Jeobá.

ʼYÁ CHJOTANI xi chjoéjin xi miyoli koa̱n. Jejin kjoásjai xi kʼoatisʼin síkjaʼaitsjen josʼin nikjaʼaitsjain, xi kʼoati kui mandosinle xi mandosinli, kʼoa xi kui fitjenngi xi ndatjín joni tsa ji. Tonga xi ngisa koa̱nmeli nga miyoli koa̱n jejin jngo xi nda chjota. Tobʼelañá, jngo xi kixi kʼoa xi ndʼé.

² Jokji tífaʼato nichxin, je Niná tíkjoejin kʼa chjota nga miyole katama. Tobʼelañá, je Abraham miyo kitsole (tʼexkiai Isaías 41:8; * Santiago 2:23). Kʼoa xi tʼatsʼe David i kitso: “Jngo chjotaxʼin xi tjínjngole kon ni̱ma̱na”. Kuinga kʼoakitsosíni nga nda kisʼin David (Hechos 13:22). Kʼoa kʼoati kitso nga nʼio nda kisasenkon je Daniel (Daniel 9:23).

3. Ánni nga miyo tso kʼasínile chjota je Jeobá.

³ Ánni nga miyo kitsosínile Jeobá je Abraham, David kʼoa kao Daniel. Kʼianga tsakjákao Abraham i kitsole: “Kanitjosonní énna” (Génesis 22:18). Kui xi bakóná jebi nga Jeobá jé síchriantʼale ʼyani xi kao kjoanangitokon sítjosonle. “Titjoson énna, kʼoa an koa̱n Nináno, kʼoa jon koa̱on  naxinandána”, kitsole je chjota israelita (Jeremías 7:23). Tsa si̱tjosonlai Jeobá kʼoati miyole koai̱n.

4, 5. Jósʼin bakó nganʼiole Jeobá xi tʼatsʼe naxinandále.

⁴ Tikjaʼaitsjenlai jókji chjíle nga miyole koaan je Niná. Je Biblia kʼoatso nga je Jeobá básjaile nga “koako je nganʼiole xi tʼatsʼe je xi tjíojngo ni̱ma̱le xi kao je” (2 Crónicas 16:9). Jósʼin koako je nganʼiole Niná nga koasenkaoli. Ya Salmo 32:8 jngo koya síkʼaxki̱: “[An Jeobá,] sichoyale, kʼoa xínyale jokji ndiaa xi kʼuínyai. Kʼoa kʼianga tsjoale kjoafaʼaitsjen skotsenle”.

⁵ ¡Jmé naskánatsoni én jebi josʼin sikuindali Jeobá! Je Jeobá tsjoáli je kjoafaʼaitsjen xi koa̱nchjénli, kʼoa tsa si̱tjosuin nda kuijnai. Niná mele nga koasenkaoli kʼianga kjoa kuitjátojin kʼoa tsa chótʼayakaoli (tʼexkiai Salmo 55:22). * Tsa ñaki kao ni̱ma̱li si̱xálai, kʼoasʼe tokuin jokisʼe kon je xi kiski Salmo, kitso: “Jé Jeobá sʼian kuenta ngantsjai. Nga je tíjna ngakixina, alikui jme xi koa̱nna” (Salmo 16:8; 63:8). Kʼoatjín, je Jeobá koasenkaoli nga kʼoasʼin kʼuínkoai yaoli josʼin sasénle. Tonga tojosʼin jeʼyai, tíjna jngo kontrale Niná xi likui mele nga kʼoasʼiain.

6. Jmé xi kitso je Na̱i xi tʼatsʼe chjotasonʼnde.

⁶ Tojosʼin jetsaʼyaa ya kjoaʼmiya tejngo, je Na̱i kui tsakʼejnachjoale nga toje Niná xi tiʼndele koatexoma. Énndiso tsakáne Jeobá kʼoa kuikjoánni xi kitso nga tsín nda batéxoma, nga tsín kitsjoaʼndele Adán kao Eva nga je kiskoejin xi ndatjín kao xi chʼaotjín. Kʼianga jetsakajngijée xijcháná xi títjon, kʼiaa koannkjínya xtile i̱ Sonʼnde. Je Na̱i kʼoakitso nga tsín tokjoatjao síxále Jeobá je chjotasonʼnde. Joxi i̱ kjoanni kitso: “Je chjota ali tsakuijin nga tsjoake Niná nga síxánile.  Tsa tjóʼndena, koaanna kontra sikatíole Niná ngatsʼi chjota”. Jme xi koantʼain Job kui xi bakó nga kʼoasʼin síkjaʼaitsjen tsakai je Na̱i. Tonga, ʼyáni xi Job tsakʼin, kʼoa jósʼin tsʼakaotʼale jme xi kitso je Na̱i.

7, 8. 1) Ánni nga nʼio nda bʼaxki̱síni Job tikʼoajinni chjota xi kʼoati kʼia tsakatio. 2) Jókitso je Na̱i nga mele chʼaosʼin sikʼéjna je Job.

⁷ Jela jan jmi kaoni jaon siento nó tjínle nga tsakʼejna je Job. Nʼio nda chjota koan kʼoa Jeobá saʼnda i kitso xi tʼatsʼe: “Niʼyajinla xi tjín sonʼnde xi kʼoasʼín joni tsa je. Nʼio kixi tífitʼana, tsokjónkena kʼoa xin tíjnale xi chʼaotjín” (Job 1:8). Je Jeobá kisasenle jokisʼin je Job.

⁸ Je Na̱i kʼoakitso nga tsín tokjoatjao kisixále Niná je Job. I kitsole Jeobá: “A tsí tsa ji tinikuindai jngotjondaile [Job] kʼoa jngotjondaile niʼyale kʼoa jngotjondaile ngayeje xi tjínle. Ngayeje jme xi sʼín nichikontʼainní, kʼoa je cho̱ntjele kjimankjínya ya sonʼnde. Tonga, chja̱ʼalalai ngayeje jme xi tjínle, a tsílaxó ñaki ngixkuin kuinchja̱ʼaonli” (Job 1:10, 11).

9. Jókisʼin Jeobá tʼatsʼe jmeni xi kitso je Na̱i xi tʼatsʼe Job kʼoa ánni.

⁹ Je Na̱i kʼoakitso nga totjín xi kisʼinnile Job nga kʼoasʼin kisixále Niná. Kʼoati kitso nga kontra koaile Niná je Job kʼiatsa chótʼayakao. Jókisʼin Jeobá kʼianga kʼoakitso je Na̱i. Makjoanni nga je Job xi chʼaosʼin tsakʼasje je Na̱i, je Jeobá kitsjoaʼnde nga kiskotʼayakao. Kʼoasʼin tsaʼyanile tsa tsjoake kjoaixi Niná je Job kʼoa tsa mai.

10. Jósʼin kichotʼayakao je Job kʼoa jókisʼin.

¹⁰ Je Na̱i kjitʼanangi kiskotʼayakao je Job. Jé xokisʼin nga koanché kʼoa nga kinikʼien cho̱ntjele Job kʼoa nga me kinikʼien ngatsʼi choʼndale. Ñaki kisicha jme xi tjínle. Xijekoan, tosa ntjao̱nʼio kisikasénnengá nga te xtile Job kʼoa kʼien ngatsʼi. Ninga kʼoasikji kjoaxkón kichone, je Job “alikui jée tsakajngi kʼoa ni chʼaojinla tjín xi tsakánele Niná” (Job 1:22).

11. 1) Jmésa xi koanmele tsakakó je Na̱i xi tʼatsʼe Job kʼoa jókisʼin Jeobá. 2) Jókisʼin je Job ninga nʼio táo chʼin xi kitsjoale je Na̱i.

 ¹¹ Je Na̱i alikui tsakʼéjngo kon. Ninga kiskale je Job nga kisicha ngayeje xi tjínle, nga kʼien choʼndale kao xtile, kʼoajinsʼin kisikjaʼaitsjen nga kuinchja̱ʼaonle Niná tsa chʼin ska̱tʼale. Kuinga kitsjoaʼndesínile Jeobá je Na̱i nga jngo chʼin xi nʼio táo kitsjoale Job. Ninga kʼoakoantʼain alikui kisicha kjoamakjain xi kisʼele kao Niná. Tosa i̱ kitso: “¡Saʼnda nga an xi kuiyá kixi koa̱n!” (Job 27:5).

12. Jméni xi tsakakó je Job nga kixi kitʼale Niná.

¹² Je Job alikui be tsa jeni Na̱i xokisikao. Makjoanni nga tsín be kʼianga kʼoakitso je Na̱i nga tsín nda batéxoma Jeobá, kʼoasʼin kisikjaʼaitsjen nga tʼatsʼe Niná kinroani jmeni xi koantʼain (Job 6:4; 16:11-14). Ninga kʼoalani, kixi koan ngixko̱n Jeobá. Xi ijngosani, kʼianga kixi kitʼale Niná, tsakakó nga to énndiso jmeni xi kitso je Na̱i, nga tokui nga nda tíjna nga kisixánile Niná.

13. Jósʼin kichomani nga kixi kitʼale Niná je Job.

¹³ Je Job alikui yátsʼi̱n tsakasénle Jeobá. Kʼoa je Jeobá kao kui tsakakónile je Na̱i nga tsín kʼoatjín jmeni xi kitso. Je Job ñaki kjoaixi nga miyole koan Jeobá, kʼoa je Jeobá kisichikontʼain nga kixi kitʼale (Job 42:12-17).

14, 15. Ánni kʼoabixónsíñá nga bʼakaotʼale ngatsʼi chjotasonʼnde jmeni xi kitso je Na̱i tʼatsʼe Job.

¹⁴ Kʼianga kʼoakitso je Na̱i nga kontra koaile Niná je Job kʼiatsa chótʼayakao, ali tsa tojejin Job xokitsole. Kʼoati bʼakaotʼaná nga jngó jngoá. Je Énle Niná ya Proverbios 27:11 kʼoatso: “Chjine katamai, ʼndí xi tsʼan, kʼoa tjayatsjoai ni̱ma̱na, ánni koa̱n kʼoekjaoʼakaosíña je xi tíbesinna”. Je nkjín siento nó kʼien je Job kʼianga kichji én jebi kʼoa kui xi bakóná nga tojo tíbʼékjaoʼakao Niná je Na̱i kʼoa nga tojo kʼoatítsole choʼndale. Kʼianga kʼoasʼin mangínkoaa yaoná josʼin sasénle Jeobá, nitsjoayañá ni̱ma̱le kʼoa bakoñá nga toxokʼoakitso je Na̱i. Jósʼin nikjaʼaitsjain xi tʼatsʼe jebi. A tsí  naskánatjín nga kʼoati kʼoainganʼiui nga to énndisoni jmeni xi kitso je Na̱i ninga nʼio tse xi si̱kʼantjaiyai yaoli.

¹⁵ Tʼianlai kuenta nga i̱ kitso je Na̱i: “Je chjota tsjoántjai tojmeni xi tjínle xi totʼatsʼe kjoabijnachonle” (Job 2:4). Kʼianga “je chjota” kitso je Na̱i kui xi tsakakó nga li tsa tojejin Job xokitsole, ngatsʼi chjota nga kʼoakitsole. Nʼio tjínle kjoandosin én jebi, nga̱ kʼoati títsoli tsanda ji je Na̱i, nga kontra kʼuínlai Niná kʼiatsa chótʼayakaoli. Nʼio tsjoa koa̱nle tsa tsín tisi̱tjosonnilai Niná kʼoa tsa tsín tikʼoasʼianni josʼin mele kʼianga kjoa kuitjátojin. Jméni xi síchjén je Na̱i kʼianga bitjoson josʼin mele.

16. 1) Jméni xi síchjén je Na̱i nga síkinyátʼaxinle Niná je chjota. 2) Kʼoa jósʼin sichjén kjoamaña jebi xi kao ji.

¹⁶ Tojosʼin tsaʼyaa ya kjoaʼmiya te, je Na̱i nkjín koya jmeni xi síchjén nga síkinyátʼaxinle Niná je chjota. Sakʼoa kʼoasʼín “joni tsa xa xi tíbaté, [...] [nga] tíbásjai ʼya xi ski̱ne” (1 Pedro 5:8). Jósʼin jchani tsa je Na̱i tíbʼétʼali. Tsakui nichxin kontra koatioli je miyoli, yaniʼyali kʼoa xi kjaʼaísa chjota kʼianga Biblia tichotʼayai kʼoa nga kʼoatinʼiai jmeni xi jekjimajinli (Juan 15:19, 20). * Xi ijngosani, je “Satanás síkʼantjaiya yaole joni tsa jngo ánkje xi síʼisen” (2 Corintios 11:14). Tojosísʼin tiʼyaa, je Na̱i koaanle nkjín kjoamaña sichjén nga kʼoanachali kʼoa nga tsín kʼoasʼin kʼuínkoai yaoli josʼin sasénle Niná. Jngo xi síchjén kuinga síkinroajen tokoán. Tsakui nichxin kʼoasʼin si̱kjaʼaitsjain nga tsínkʼia kuitjosonli josʼin mele Niná (Proverbios 24:10). Ninga joni tsa “xa xi tíbaté” kʼoa ninga joni tsa “jngo ánkje xi síʼisen” sikʼóya yaole je Na̱i, tojo kui kʼoatítso nga tsín tisi̱xánilai Niná kʼianga kjoa sʼe̱li kʼoa tsa jme xi sʼe̱jnabasenli. Jósʼin koakui nga to énndiso xi tínchja̱ kʼoa nga kixi ʼmitʼalai Niná jokisʼin tsa Job.

17. Ánni nga nitjosonsíñá je kjoatéxomale Jeobá.

¹⁷ Koaan koakui nga toxokʼoakitso je Na̱i kʼiatsa kʼoasʼin kʼuínkoai yaoli josʼin sasénle Niná. Jmé xi kitjenkao jebi. Je Biblia kʼoatso: “Katamatsjoachai tsokʼoa je Nainá Nináli. Katamatsjoachani ngayije ni̱ma̱li, kao ngayije kjoatsjoali, kao ngayije kjoafaʼaitsjenli, kao ngayije nganʼioli” (Marcos 12:30). Kʼianga nʼiosa koa̱ntsjoachai Niná ngisa nʼio koa̱nmesali kʼoasʼiain josʼin mele. Je pastro Juan kitso: “Kʼoasʼin tjaochaa Niná, nga nikjitjosoán kjoatéxomale”. Tsa ñaki kao ni̱ma̱li tsjoachani Jeobá jchaní nga “je kjoatéxomale ali ñʼaijin tjín” (1 Juan 5:3).

18, 19. 1) Tikʼaxki̱ kʼai kjoatéxomale Jeobá (chótsenlai ya jñani tso: “ Kʼoéchjoalee yaoná jmeni xi jtike Jeobá”). 2) Jósʼin ʼyañá nga tsín nʼiojin tse jmeni xi síjéná Niná.

¹⁸ Jñánile kjoatéxoma jebi. Tjínkʼa xi kui kʼoatsoná jmeni xi tsín koa̱n kʼoasʼiaan. Tobʼelañá xi faʼaitʼa ya jña tso: “ Kʼoéchjoalee yaoná jmeni xi jtike Jeobá”. Yaa faʼaitʼa jmeni xi kʼoatso Biblia nga chʼaotjín. Kʼianga sʼa jchai tochale likui chʼaotjín koa̱n kʼali. Tonga kʼianga jesi̱kjaʼaitsjenjin jotso je testo xi faʼaitʼa, jchaní nga kʼoatjín jotso kjoatéxomale Niná. Tsakui nichxin nʼio ñʼai koa̱nli nga si̱katío kʼai jmeni xi nʼiai tsakai. Tonga, je xi kʼoasʼin fikao yaole josʼin sasénle Niná nʼio nda satío kon kʼoa nʼio tsjoa sʼele (Isaías 48:17, 18). Kʼoa ji koaan kʼoasʼe tokuin. Jósʼin ʼyañá.

¹⁹ Kuinga nikʼiajinla kui síjéná Jeobá jmeni xi tsín kʼoakoa̱nná (tʼexkiai Deuteronomio 30:11, 14). * Kʼoa je ngisa nda be jokji tjen bichó nganʼioná kʼoa jokji tjen kʼoakoa̱nná tikʼoajinni ñá (Salmo 103:14). Xi ijngosani, koaanle tsjoáná nganʼio xi machjénná nga si̱tjosonlee. Je pastro Pablo i kitso: “Tonga nʼiotʼakon Niná, xi tsí tsa tsjoáʼnde nga ngisa tse si̱kaono kaoni tsa je nganʼiono. Kʼianga  chʼao síkaono, Niná ñatjen tsjoá josʼin kuitjoo, jméni nga koa̱n jchókjoasínino” (1 Corintios 10:13). Kʼianga ska̱ná, je Jeobá koaanle tsjoáná “nganʼio xi nʼio tse” (2 Corintios 4:7).

20. Jméni xi tjínnele koakui kʼianga sa̱sénle Niná kʼoa ánni nga nʼio chjísínile.

²⁰ Kʼianga sa̱sénle Jeobá josʼiaan ali tsa tokuijin xi kʼoéchʼaolee yaoná jmeni xi jtike. Kʼoati machjén nga tsjoacha  katamaa jmeni xi tsjoake (Romanos 12:9). A tsí nda sʼe tokuin kʼianga ya tijnajinlai je chjota xi kʼoatisʼin síkjaʼaitsjen josʼin nikjaʼaitsjain, xi kʼoati kui mandosinle xi mandosinli, kʼoa xi kʼoatisʼin nda fikao yaole josʼin ʼmikoai yaoli. Ngo̱ kʼoati male Jeobá. Kuinga katamatsjoachasíni jmeni xi tsjoake. Ya Salmo 15:1-5 kʼoatso ʼyani xi miyo tsole Niná kʼoa síkʼaxki kʼa jmeni xi tsjoake Jeobá. Je miyole Jeobá kui sʼele “je kjoanda xi tsjoájin ni̱ma̱ná je Espíritu Santo, xi kui: Kjoatjaocha, kjoatsjoa, kjoa xi nyʼán tjín, kʼoa nga nikjaínlee xíngiaa, kjoandʼé, kjoanda, kʼoa nga makjainná,  kjoaʼindajintakon, kʼoa nga chjoéxkoá yaoná” (Gálatas 5:22, 23).

21. Jméni xi koasenkaoli kʼianga kʼoakoa̱nkjoain josʼin mele Niná.

²¹ Je xi koasenkaoli kʼianga kʼoakoa̱nkjoain josʼin mele Niná kuinga kʼoéxkiai kʼoa chótʼayantsjai je Biblia. Xi ijngosani, kʼianga sa koa̱n sa koa̱nsali jmeni xi mele Jeobá xi tʼatsi kʼoati sʼe̱ kjoafaʼaitsjenli jotjín kjoafaʼaitsjenle (Isaías 30:20, 21). Kʼianga sa tse sa tse koa̱ntsjoachai Jeobá ngisa koa̱nmesali nga kʼoasʼin kʼuínkoai yaoli josʼin sasénle.

22. Jmé kjoanda xi so̱koli tsa kʼoasʼin kʼuínkoai yaoli josʼin sasénle Niná.

²² Nganʼio machjén kʼianga kʼoasʼin mangínkoaa yaoná josʼin sasénle Jeobá. Kʼianga nikʼantjaiyaa yaoná jokjoaan, je Biblia kʼoatso nga joxi chjaʼaxinlee yaoná je ni̱ma̱ xi jchínga kʼoa nga kui chjoé ni̱ma̱ xi chjotse (Colosenses 3:9, 10). Kʼoa je xi kiski Salmo i kitso tʼatsʼe kjoatéxomale Niná: “Kʼianga nitjosoán nʼio tse kjoanda tjenkao” (Salmo 19:11). Kʼiatsa kʼoasʼin kʼuínkoai yaoli josʼin sasénle Niná kʼoati nʼio tse kjoanda so̱koli. Xi ijngosani, koakoní nga to énndiso xi kinchja̱ je Na̱i kʼoa kjoáyatsjoaní ni̱ma̱le Jeobá.