1, 2. Jehova upla kum kum ra ai panika latwankira baku saki brin ba dahra aisas.

YAURA panikam baku pliki brisma ki? Rait apia upla kum man dia lukisma, want sma bara iwisma satka bri kaka plikisma? Bara upla ba daukanka yamni, kupia latan painkira bri kaka bitar sa.

² Patitara wina, Gâd bui upla kum kum ai panika latwankira kabia wisi saki brin. Naha tanka ra, Gâd bui Ebraham ra ai panika baku kulkan (Aiseya 41:8; Jems 2:23). “Debit sakri ba yang pain kaikisna” —Gâd bui win—. Baku win, kan Debit satka ba yamni kaikan (Wark nani 13:22). Bara prapit Danyal ra sin “uya pali latwan” kaikan wisa (Danyal 9:23).

3. Jehova ba, dia muni upla kum kum ra ai panika kabia wisi saki brisa ki?

³ Jehova ba, dia muni Ebraham, Debit bara Danyal ra ai panika baku kulkan? Wel, Gâd Ebraham ra naku win: “Man yang bili wali daukram ba mita” (Blasi sturka 22:18). Baku bamna, Jehova makabi ba kat, ya ya bauikira alki dauki ba ai lamara wisa. Israel uplika nani ra win: “Yang bili wali kaia, bara yang witin nani ai Gâdka kamna, baku witin  nani sin yang upliki nani kabia” (Jirimaia 7:23). Bara man sin, Jehova bila walma kaka ai panika takma!

4, 5. Jehova ai uplika ra nahki ta baikisa ki?

⁴ Gâd wal pana kaia ba nahki yamni wan munisa sapa wira luki kais. Baibil bila Jehova ba, ya nani “witin ra bila kaikanka bri nani ra, ta baikisa” wisa (2 Kronikas 16:9). Bara man ra, Gâd nahki tam baikaia sip sa ki? Tnatka kum ba, Lawana 32:8 ra naku marikisa: “Man kat, yang [Jehova,] mai kaikisni. Yang mai smalki mai wimna yabal ba mamrikamna man anik waia sma ba”.

⁵ Jehova mita kainam kahbia nahki painkira mai aisi ba luki kais! Witin bui lâ bila smalkanka nit sma ba maikbia, bara alki brih daukma kaka yamnikam brima aihwakbia. Trabilkam nani pura luma dukyara Gâd tam baikaia want sa (Lawana 55:22). Bahamna, man kupiam aiska ni Gâd dukya daukma kaka, Lawana aîulbra kum lukan baku man sin nan lukma: “Dawan ba yang laima kat brisni; witin yang mihti aihkika ra sa, bamna diara kumi sin yang purira yaka kauhwbia apia” (Lawana 16:8; 63:8). Au sika! Iwanka satka Gâd yamni kaiki ba alki brima dukyara witin tam baikaia sip sa. Sakuna nu bas, Gâd waihlka ba kainam dakbaia plikisa.

6. Setan bui tasba uplika ba mapara dia latuban?

⁶ Saptika 11 ra lan takan, Setan ba Gâd King aimakaia raitka bri ba dukyara dusa kuhban. Jehova ba kuninkira sa latuban. Bara Gâd ba Wihta saura kum Adam Iv wal selp dia pain dia saura ba luki daukbia swiras kan laka ra aisan. Adam Iv wal Gâd bila lulkan ningkara, ai kyamka sahwi tasba ba bangki takan. Bara tasba uplika ba dia lukanka ni Jehova ra mayunisa sapa Setan bui mahka latuban. Naku laka ra latuban: “Ani uplika Gâd dukya dauki ba, Gâd ra latwan kaiki ba tawan lika daukras. Ai swibia kaka, ya  kabia sin Gâd mapara bukaisna”. Job sturka ba mita Debil ba baku luki kan ba marikisa. Kuna, Job ba ya kan, bara Setan latuban ba wina Job rayaka ra dia takan ki?

7, 8. a) Dia muni ai pyua uplika tila wina Job ba sat wala kan? b)Setan bui nahki Job ra latuban?

⁷ Job ba mani 3.600 luan ba lamara iwan. Uba upla pain kan ba mita, Job dahra Jehova bui win: “Tasba ra witin baku wala apu sa, waitna kumi kasakka laka kat yang duki dauki ba, ai rayaka wapni, taski apu, upla ra saura munras, yamni man dauki ba” (Job 1:8). Kasak sika! Jehova Job ra yamni kaiki kan.

⁸ Setan bui, Job dia luki Jehova ra mayuni kan sapa latubisi, Jehova ra naku win: “Man mita swiram upla kumi sin [Job] wîna ra kangbras sa; ai watla uplika nani ra bara diara sut bri bara sin apia. Diara witin dauki ba sut yamni man munisma. Witin sika daiwan kau ailal brisa, lalma tasbaia uplika sut bri ba wal. Sakuna diara nani sut bri ba, ai mihta wina daks, bara man kaikma nahki mamwan kat saura mai wibia” (Job 1:10, 11).

9. Setan latuban ba mapara Jehova dia daukan, bara dia muni ki?

⁹ Setan bila Job ba Gâd dukya dauki kan Gâd Job ra panaura yamni munbia dukyara, sakuna Job ra traika kaikbia sa kaka, Gâd mapara bubia win. Setan latuban ba mapara Jehova dia daukan ki? Job kupia munuhtara dia bara ba dukyara latuban ba mita, Jehova swin Setan Job ra traika kaikbia. Baku lika, Job ba Gâd ra rait latwan kaiki kan sapa param takaia kan.

10. Job ra dia sat traika kaikan, bara pât tilara Job ba nahki takan ki?

¹⁰ Minitka ra Job ra tnatka sat sat ra traika kaikan. Pas pali, Job daiwra nani kum kum implikan, bara taka wala ba prubia yaban. Bara ai suliarka aihkika ra ikan. Naha taka, Job ba lalah trabilka wauhwan. Ningkara Debil mita pât wala kum wal prukan, kan pasa tara kum bribal Job luhpia 10 kan ba sut ra ikan. Sakuna “baha sut tilara, Job saura  kumi sin yaras, ai bila ni sin Gâd mapara saura aisaras kata” (Job 1:22).

11. a) Job dahra dia wala Setan marikaia want kan ki, bara Jehova dia daukan? b)Siknis saura brin ba mapara, Job ba dia daukan?

¹¹ Setan ba, Job ra pri swiaia lukras kan. Witin kaikan Job ai dukya, ai suliarka bara ai luhpia nani lus tiwi, ban bapi buan. Sakuna Setan lukan kaia sa Job wîna ra siknis kum wal prukbia kaka lika, Gâd mapara bubia. Baha mita, Jehova swin Debil mita Job ra siknis saura kum wal prukbia. Kuna baha ra kat sin, Job Gâd ra ban kasak lukan. Kau pali, ai kupia tahplu ni win: “Yang raya kamna yua sut ra, pâtkas sna ba, ban kamna [...]!” (Job 27:5).

12. Setan latuban ba mapara Job ba dia marikan?

¹² Job nu apu kan Setan bui pâtka nani buki kan. Bara Setan Jehova ra latuban ba Job ba ai tanka briraskira, Gâd bui ai pâtka nani buki kan lukan (Job 6:4; 16:11-14). Baku kat sin, witin Jehova mawanra ban kasak kan. Bara Job daukanka wapni ba taka, yamni briaia wisi upla ba Gâd dukya daukisa Setan latuban ba kunin sa marikan.

13. Job Gâd ra kasak kan ba tawan dia takan?

¹³ Setan kunin aisi ba, Job wapnika laka ba mita Jehova latan marikan. Job ba rait pali Jehova panika kan, bara ban kasak kan ba mita, Gâd witin ra pana yamni munan (Job 42:12-17).

14, 15. Setan ba Job mapara baman latubras, upla sut mapara latuban ba nahki nu sa ki?

¹⁴ Upla ba Gâd ra wapni kabia sapa Setan latuban ba, Job mapara baman apia kan. Man mampara sin latuban. Naha tanka ra Sins laka 27:11 ra Gâd Bila ba naku wisa: “Luhpi, sinskira bas, bara kupi lilia daukma, bara laitubi uplika ra pana diara aisaia sip kamna”. Bila nani na Job pruan mani ailal luan ningkara ulban ba sika, Setan ba ban Gâd dusa kuhbi, ai napakanka nani ra latubi ba tanka marikisa.  Iwanka satka Jehova yamni kaiki ba kat yawan brisa taim, Setan latubi ba mapara tanka kum mangki, Gâd kupia lilia daukisa. Man baha nahki lukisma? Rayakam ba lakaia nit kama sin, rait apia painkira kabia Debil latubi ba kunin man sa marikma?

¹⁵ Sakuna Setan aisan ba aman luki kais. Kan witin win: “Uplika ba wilin pali sa dia sip ba kat daukaia, ai rayaka swaki sakaia mata” (Job 2:4). Setan mita “uplika ba” win taim, Job mapara baman latubras, upla sut mapara latuban. Naha tanka briaia nit pali sa. Man Gâd ra wapni kama sapa, Debil bui latubisa. Man pât nani tilara sma taim Gâd bila lulkma kaikaia ba, Setan laik kabia. Baha kaikaia dukyara witin dia daukisa ki?

16. a) Gâd wina upla ra saitra sakaia wisi, Setan ba dia yus munisa? b)Baha tnatka nani ba Debil mita mampara nahki yus munaia sip sa?

¹⁶ Saptika 10 ra kaikan baku, Setan ba Gâd wina upla ra saitra sakaia wisi tnatka sat sat yus munisa. Sam taim “ya ya piaia wisi, layan ihbi baku pliki taukisa” (1 Pita 5:8). Baku laka ra, Baibil stadi taki alki brih daukma apia wisi, ban kra panikam, tamya nani, apia kaka upla wala mampara buisa kaka, Setan wark taki ba nu bas (Jan 15:19, 20). * Sam taim Setan ba “ingni insal baku takisa” (2 Korint 11:14). Baku laka ra, kunin mai muni Gâd yamni kaiki iwanka ba alki brima kainam dakbaia wisi, auyamaira laka ra diara sat sat daukaia sip sa. Kum dauki ba sika, dring swapan baku damra walma. Ban kra man Gâd dukya daukaia sip apia pali sma baku maikka lukma (Sins laka 24:10). “Layan ihbi baku”, apia kaka “ingni insal baku” wark taki kabia sin, Setan bila man trabil tilara, apia kaka traika kaikanka tilara kama taim, Gâd bila lulkma wisa. Job daukan baku, Setan lamtubi ba kunin sa nahki marikaia sip sma ki?

17. Dia ba mita yawan Jehova lâka alki daukisa ki?

 ¹⁷ Gâd yamni kaiki iwanka brisma kaka, Setan latubi ba kunin sa marikaia sip sma. Baha sat iwanka briaia ba dia tanka sa ki? Baibil bila: “Dawan Gâdkam ra latwan kaikma kupiam aiskakira; solkam aiskakira bara karnikam aiskakira sin” (Kli smalkan 6:5). Gâd ra kau latwan kaiki auma bara, witin mamkabi yaba daukaia sin kau brinkam kabia. Apastil Jan ba ulbi win: “Gâd ra latwan kaikaia ba lika, ai lâka bila nani sin wali daukaia sa”. Bara Jehova ra kupiam aiska ni latwan kaikisma kaka, “ai lâka bila nani ba mita wihra wan taibras sa” kaikma (1 Jan 5:3).

18, 19. a) Jehova lâka kum kum wis [wahya 122 ba kais] b)Gâd mita yawan diara sip daukras makabras ba, nahki nu sa ki?

¹⁸ Ani ba Jehova lâka nani sa ki? Kum kum ba, yawan daukaia apia dukya nani wi ba tanka sa. Naha tanka ra, wahya 122 ra “ Gâd Dia Misbara Kaiki ba wina Saitra Kap” ulbanka lalka ba kais. Baha ra, Baibil ba saura kulki daukanka nani bara sa. Kum kum pas aisi kaikma taim, ban kra saura apia sa lukma. Sakuna Baibil tikska nani ba aisi kaiki luki kaikma ningkara, Gâd lâka alki briaia sinska ba tankam brima. Ban kra rayakam lakaia nit kama, bara lakanka daukaia ba rayakam aiskara diara kau karna daukram baku kaikma. Ban sakuna, Gâd yamni kaiki iwanka satka bri uplika nani ba, ai auyapah lilia laka ra iwisa (Aiseya 48:17, 18). Bara man sin baha briaia sip sma. Nahki nu sa ki?

¹⁹ Kan Jehova mita yawan diara sip daukras ba makabras (Kli smalkan 30:11-14). Yawan dia daukaia sip ba, bara dia daukaia sip apia ba sin, witin ba kau pain nu sa yawan wal (Lawana 103:14). Bara ai bila walaia mata, yawan karnika nit ba sin wankaia sip sa. Apastil Pâl bui win: “Gâd lika kasak sa, bara man nani wauhwaia sip sma ba purkara kau traika kaikanka nani maikbia apia. Sakuna, traika kaikanka bri bangwma bara, Gâd mita baha ba wina swak takaia karnika sin maikbia, bara baku sip kama baha ba twilkaia”  (1 Korint 10:13). Ban bapi bui kabia dukyara, baha karnika “[yawan] wina apia, sakuna Gâd wina” ba wankaia sip sa (2 Korint 4:7). Pâl sin pât ailal wauhwisi naku win: “Diara nani sut mapara karnika brisni, witinka ba mita karnakira ai saki ba” (Pilipai 4:13, Lâ Raya Wauhkataya [LRW], 1986).

20. Ani nani Gâd laik ba man daukaia sma ki, bara dia muni daukaia nit sma?

²⁰ Jehova yamni wan kaikbia dukyara, witin dia misbara  kaiki ba wina saitra kaia sa. Sakuna witin dia latwan kaiki ba sin, yawan misar latwan kaikaia sa (Rom 12:9). Rait apia upla kum man dia lukisma, want sma bara iwankam satka bri kaka lamara kaia laik sma? Wel, Jehova sin baku laik sa. Baku bamna, witin dia latwan kaiki ba man sin latwan kaikaia lan taks. Lawana 15:1-5 kat, Gâd mita yaura ai panika baku kulki ba dahra aisisa, bara diara kum kum Gâd latwan kaiki ba sin marikisa. Baha purkara, Gâd panika nani ba “spirit ma ba lika” sakisa, baha nani tanka: “Latwan laka, lilia laka, kupia kumi laka, kupia alki takaskaia laka, tanka yamni briaia laka, kupia pain laka, kasak laka, bauaia  laka, [bara] wan wîna alki takaskaia laka” (Galesha 5:22, 23, [LRW], 1974).

21. Gâd laik ba dauki pakma dukyara dia tam baikbia ki?

²¹ Gâd dia laik ba dauki pakma dukyara diara kum tam baikbia ba sika, pat pat Baibil aisi kaiki stadi takaia. Bara Jehova dia mamkabi yaba lan taki wama taim, witin luki ba baku lukma (Aiseya 30:20, 21). Jehova ra kau latwan kaiki auma taim, iwankam satka ba Gâd yamni kaiki ba kat briaia brinka ba sin kau karna kabia.

22. Iwanka satka Gâd yamni kaiki ba kat brisuma kaka, dia takbia ki?

²² Iwanka satka Gâd yamni kaiki ba briaia kaka, yawan kasak trai munaia sa. Baibil bila upla kum ai iwanka satka laki taim, prak almuk kum ai wîna wina daiki, prak raya kum mahka dimi ba baku sa wisa (Kolosi 3:9, 10). Lawana aîulbra kum, Gâd lâka dahra aisi win: “Lâka bila nani wali dauki ba wina, nampakan ra diara yamni uya takisa” (Lawana 19:11). Man sin iwanka satka kum Gâd yamni kaiki ba kat brisuma kaka, yamnika ailal brima. Bara baku sin, man mita Setan latuban ba kunin sa mariki, Jehova kupia lilia daukma.