1, 2. Gandja iiholelwa yontumba yaantu mboka Jehova a li a tala ko ye li ookuume ke kopothingo.

NATU tye andola oto hogolola omuntu a kale kuume koye, ando oto ka hogolola omuntu a tya ngiini? Osha yela kutya ando oto ka kala wa hala okukala nakuume ngoka e na etaloko lya fa lyoye, e hole shoka u hole noha kala pamithikampango dha fa dhoye. Oto ka kala wo wa hala gumwe ngoka e na omaukwatya omawanawa, ngaashi okupopya oshili nokukala omunambili.

² Momukokomoko gwondjokonona yaantu, Kalunga okwa kala ha hogolola aantu yontumba ya kale ookuume ke kopothingo. Pashiholelwa, Jehova okwi ithana Abraham kuume ke. (Jesaja 41:8; Jakob 2:23) Okwa popi kombinga yaDavid a ti kutya ‘oye omulumentu ngoka a hokwa,’ molwaashoka okwa li e na omaukwatya ngoka Jehova e hole. (Iilonga 13:22) Jehova okwa li wo a tala ko omupolofeti Daniel e li omuntu ngoka ‘e hole.’—Daniel 9:23.

3. Omolwashike Jehova ha hogolola aantu yontumba oyo ya kale ookuume ke?

³ Omolwashike Jehova a li a tala ko Abraham, David naDaniel ye li ookuume ke? Okwa li a lombwele Abraham a ti: “Owa vulika kelombwelo lyandje.” (Genesis 22:18) Onkee ano, Jehova oha hedha popepi naamboka haya longo neifupipiko shoka ta pula ya ninge. Okwa li a lombwele Aaisraeli a ti: “Vulikeni kungame,  notandi ningi Kalunga keni, one notamu ningi aantu yandje.” (Jeremia 7:23) Ngele owa kala ho vulika kuJehova, nangoye oto vulu okuninga kuume ke.

4, 5. Jehova oha longitha ngiini oonkondo dhe okunkondopaleka aapiya ye?

⁴ Dhiladhila shoka okukala kuume kaKalunga taku ti. Ombiimbeli otayi ti kutya Jehova ota kongo ompito a “nkondopaleke mboka ye na omitima dhe mu inekela.” (2 Ondjalulo 16:9) Ongiini Jehova ta vulu okulongitha oonkondo dhe oku ku nkondopaleka? Omukalo gumwe moka ta vulu oku shi ninga ogwa popiwa mEpisalomi 32:8, moka tatu lesha taku ti: “[Ngame Jehova] otandi ku ulukile ondjila ndjo u na okulandula; otandi ku wilike e tandi ku tonatele.”

⁵ Oohapu ndhoka tadhi popi esiloshimpwiyu lyaJehova itadhi gumu tuu omitima dhetu! Ote ku pe ewiliko ndyoka wa pumbwa noku ku tonatela ngele to li tula miilonga. Kalunga okwa hala oku ku kwathela u idhidhimikile omamakelo nomupondo. (Episalomi 55:22) Onkee ano, ngele oto longele Jehova nomutima aguhe, oto vulu okukala neinekelo ngaashi omupisalomi ngoka a ti: “Aluhe ondu uvite, OMUWA e li ndje popepi; oku li popepi, nokaku na shoka tashi hindi ndje.” (Episalomi 16:8; 63:8) Eeno, Jehova ota vulu oku ku kwathela u kale nonkalamwenyo ndjoka tayi mu nyanyudha. Ihe ngaashi u shi shi, opu na omutondi gwaKalunga ngoka a hala oku ku keelela waahe shi ninge.

6. Satana okwa ti shike shi na ko nasha nokulongela Kalunga kwaantu?

⁶ Ontopolwa onti-11 yembo ndika otayi yelitha nkene Satana Ondiaboli a li a pataneke uunamapangelo waKalunga. Satana okwa ti kutya Kalunga omufundja nonokutya ka li omuyuuki sho inee etha Adam naEva ya tokole kuyo yene shoka shi li mondjila naashoka sha puka. Konima sho Adam naEva ya yono nevi lya tameke okuudhithwa oluvalo lwawo, Satana okwa tula momalimbililo omainyengotompelo gaantu ayehe. Satana okwa li lelalela ta ti: “Aantu ihaya longele Kalunga molwaashoka ye mu hole. Ngele onda pewa ompito, otandi vulu okugamuna ko kehe gumwe  kuKalunga.” Ehokololo lyomulumentu gwedhina Job otali ulike kutya shoka osho Satana a li i itaala. Job okwa li lye nokwa li a kwatelwa mo ngiini mompata yaSatana okupataneka Jehova?

7, 8. (a) Oshike sha li sha ningitha Job a kale a tongomana mokati kaantu yopethimbo lye? (b) Ongiini Satana a li a tula omainyengotompelo gaJob momalimbililo?

⁷ Job okwa li ko oomvula 3 600 dha piti. Okwa li omulumentu e li nawa, omolwaashono Jehova e mu popi a ti: “Kombanda yevi kaku na omuntu e shi kwiinekelwa e mu fa, omulumentu ha tila Kalunga noha tondo uuwinayi.” (Job 1:8) Job okwa li a hokiwa kuKalunga.

⁸ Satana okwa li a tula momalimbililo omainyengotompelo gaJob ge na ko nasha nokulongela Kalunga. Ondiaboli oya ti kuJehova: “Ho [gamene Job] pamwe negumbo lye naashihe shoka e shi na. Owa yambeke iilonga ye nowe mu pe iimuna yi indjipala moshilongo ashihe. Ando u yelekele e to ganeke oshikaha shoye, u yone po eliko lye, nena ote ku iteka po mbala.”—Job 1:10, 11.

9. Jehova okwi inyenge ngiini sho a patanekwa kuSatana, nomolwashike?

⁹ Kungawo, Satana okwa ti kutya Job okwa li owala ta longele Kalunga omolwuuwanawa mboka Kalunga te mu ningile. Ondiaboli oya ti wo kutya ngele Job okwa makelwa, ote ki iteka po Kalunga. Jehova okwi inyenge ngiini kepataneko ndika lyaSatana? Molwaashoka epataneko ndyoka olya li lya kwatela mo omainyengotompelo gaJob, Jehova okwe etha Satana a makele Job. Kungawo, uushili kutya Job okwa li e hole Kalunga nenge hasho owa li tau ka yela mo nawa.

10. Omamakelo geni ga li ga adha Job, nokwa li i inyenge ngiini?

¹⁰ Konima yokathimbo, Satana okwa ka makela Job momikalo dhi ili nodhi ili. Iimuna yimwe yaJob oya li ya yakwa po nayilwe oya li ya dhipagwa. Aapiya ye oyendji oya li ya dhipagwa. Shoka osha li she etitha uudhigu wopamahupilo. Natango opwa li pwa holoka oshiponga sho aanona yaJob omulongo ya li ya sile moshikungulu. Ihe nonando opwa li pwa ningwa iiningwanima mbyoka iinyanyalithi, “Job ina yona a pe ando Kalunga ombedhi.”—Job 1:22.

11. (a) Satana okwa li a lundile Job olutiyali a ti ngiini, na Jehova okwi inyenge ngiini? (b) Job okwa li i inyenge ngiini komukithi gwe omweehameki?

 ¹¹ Satana ka li a sholola. Okwa li a dhiladhila kutya nonando Job okwa li a vulu okwiidhidhimikila okukanitha iiniwe ye nokusilwa aapiya ye naanona ye, okwa li te ki iteka po Kalunga ngele okwa kwatwa komukithi. Jehova okwe etha Satana e etele Job omukithi gunyanyalitha nomweehameki. Ihe naashoka kasha li nokuli she ethitha po Job eitaalo lye muKalunga. Pehala lyaashono, okwa popi a tokola toko a ti: “Sigo okusa itandi ki idhimbika uuyuuki wandje.”—Job 27:5.

12. Einyengo lyaJob olya li lyu ulike ngiini kutya ompata yOndiaboli oya li yiifundja?

¹² Job ka li e shi kutya Satana oye a li e etitha omaupyakadhi ge. Molwaashoka Job ka li e shi kutya Ondiaboli oya pataneka uunamapangelo waJehova, okwa li ta dhiladhila kutya Kalunga oye a li e etitha omaupyakadhi ge. (Job 6:4; 16:11-14) Ihe nando ongaaka, okwa li a kakatela uudhiginini we kuJehova. Epopyo lyaSatana kutya Job okwa li ta longele Kalunga omolwomatompelo gokwiihola mwene inali anekwa tuu pomutenya kuudhiginini waJob kutya kalya li lyoshili!

13. Oshike sha ningwa po omolwuudhiginini waJob kuJehova?

¹³ Uudhiginini waJob owa li wa pe Jehova ompito a gandje eyamukulo lya yela kompata yaSatana yondhino. Job okwa li shili kuume kaJehova, na Jehova okwa li e mu pe ondjambi omolwuudhiginini we.—Job 42:12-17.

14, 15. Omolwashike tatu vulu okutya kutya elundilo ndyoka Satana a lundile nalyo Job olya kwatela mo aantu ayehe?

¹⁴ Ompata yuudhiginini kuKalunga ndjoka ye etithwa po kuSatana kaya li yi na ko nasha naJob oye awike. Nangoye owa kwatelwa mo. Shoka oshu ulikwa nawa mOmayeletumbulo 27:11, moka Oohapu dhaJehova tadhi ti: “Mumwandje, ninga oondunge, u nyanyudhe omwenyo gwandje, opo ndi wape okuyamukula ngoka ta sitha ndje ohoni.” Oohapu ndhoka dha nyolwa pwa pita oomvula omathele konima yeso lyaJob, otadhi ulike kutya Satana ota sitha natango Kalunga ohoni nenge te mu  lundile nosho wo aapiya Ye. Ngele otatu kala nonkalamwenyo ndjoka tayi nyanyudha Kalunga, otatu kwathele mokugandja eyamukulo komapopyo giifundja gaSatana, nokomukalo ngoka otatu nyanyudha omutima gwaKalunga. Mbela shika ou shi uvitile ngiini? Mbela itashi ka kala oshiwanawa noonkondo okukala u na ombinga mokuyamukula omapopyo giifundja gOndiaboli, nokuli nonando otashi pula okuninga omalunduluko gontumba monkalamwenyo yoye?

¹⁵ Ndhindhilika kutya Satana okwa ti: ‘Omuntu ota gandja po iinima ye ayihe, opo a kale e na omwenyo.’ (Job 2:4) Mokupopya oshitya “omuntu,” Satana oku ulike sha yela kutya ka li owala a lundile Job ihe aantu ayehe. Shoka oshi li oshitsa sha simana noonkondo. Satana okwa tula momalimbililo uudhiginini woye kuKalunga. Ondiaboli oya hala oku ku ningitha u kale itoo vulika kuKalunga nou ethe po onkalamwenyo yi li pauyuuki ngele to adhika komaudhigu. Ongiini Satana ta kambadhala oku shi ninga?

16. (a) Omomikalo dhini Satana ta kambadhala okugamuna ko aantu kuKalunga? (b) Ongiini Ondiaboli tayi vulu okulongitha omikalo ndhoka oku ku gamuna ko kuKalunga?

¹⁶ Ngaashi sha kundathanwa mOntopolwa onti-10, Satana oha longitha omikalo dhi ili nodhi ili okukambadhala okugamuna ko aantu kuKalunga. Poompito dhimwe, ohe ya ponokele “ta ndunduma a fa onime, ta kongo omuntu gwontumba, e mu ketsule po.” (1 Petrus 5:8) Ano enwethomo lyaSatana otali vulu okumonika ngele ookuume, aapambele nenge yalwe yi ili taya pataneke oonkambadhala dhoye dhokukonakona Ombiimbeli nokutula miilonga shoka to ilongo. * (Johannes 15:19, 20) Poompito dhimwe natango, Satana ohi ‘ishitukitha, a kale a fa omuyengeli guuyelele.’ (2 Aakorinto 11:14) Ondiaboli otayi vulu okulongitha omikalo dhomonanguwi yi ku pukithe noyi ku hile mo monkalamwenyo yopakalunga. Otayi vulu wo okulongitha  etekomukumo, tashi vulika yi ku ningithe u kale u uvite kutya ito vulu okunyanyudha Kalunga. (Omayeletumbulo 24:10) Kutya nduno Satana ote ku ponokele a fa ‘onime tayi ndunduma’ nenge oti ifetha “omuyengeli guuyelele,” elundilo ndyoka te ku lundile nalyo olyo owala ndyoka kutya: Ngele owa adhika komamakelo, oto ke etha po okulongela Kalunga. Ongiini to vulu okuyamukula elundilo lye nokukala omudhiginini kuKalunga ngaashi Job a ningi?

VULIKA KIIPANGO YAJEHOVA

17. Etompelo lya simanenena lyokuvulika kiipango yaJehova olini?

¹⁷ Oto vulu okuyamukula elundilo lyaSatana mokukala nonkalamwenyo ndjoka tayi nyanyudha Kalunga. Shoka osha kwatela mo shike? Ombiimbeli otayi yamukula tayi ti: “Hola OMUWA Kalunga koye komutima gwoye aguhe, komwenyo gwoye aguhe nonoonkondo dhoye adhihe.” (Deuteronomium 6:5) Sho ohole yoye yokuhola Kalunga tayi koko, oto ka kala wa halelela okuninga shoka ta pula kungoye. Omuyapostoli Johannes okwa nyola a ti: “Ohole yokuhola Kalunga oyo okuvulika kiipango ye.” Ngele ou hole Jehova nomutima gwoye aguhe, oto ka mona kutya “iipango ye kayi shi iidhigu.”—1 Johannes 5:3.

18, 19. (a) Iipango yaJehova yimwe oyini po? (Tala oshimpungu pepandja 122.) (b) Otu shi shi ngiini kutya Kalunga ite tu pula oshindji shoka itaatu vulu okuninga?

¹⁸ Iipango yaJehova oyini? Yimwe yomuyo oya kwatela mo eihumbato ndyoka tu na okuyanda. Pashiholelwa, tala  oshimpungu pepandja 122, shi na oshipalanyolo “Yanda shoka Jehova e tonde.” Moka oto ka mona mo omusholondondo gwiinima mbyoka ya kwatelwa meihumbato ndyoka lya pangulwa thiluthilu kOmbiimbeli. Tango, omikalo dhimwe ndhoka dhi li momusholondondo ngoka otashi vulika dhi kale dha fa kaadhi shi omiwinayi unene. Ihe konima yokutedhatedha komanyolo ngoka ga gandjwa, oto ka mona kutya oompango dhaJehova odhi li pandunge. Okuninga omalunduluko meihumbato lyoye otashi vulika ku kale oshinima oshidhigu shoka inoo tsakaneka nando onale. Ihe okukala nonkalamwenyo ndjoka tayi nyanyudha Kalunga otaku eta embilipalelo nenyanyu enene. (Jesaja 48:17, 18) Oto vulu lela okukala nonkalamwenyo ya tya ngaaka. Otu shi shi ngiini?

 ¹⁹ Jehova ihe tu pula nando oshindji shoka itaatu vulu okuninga. (Deuteronomium 30:11-14) Okwa tseya e tu vule shoka tatu vulu naashoka itaatu vulu. (Episalomi 103:14) Kakele kaashono, Jehova ota vulu oku tu pa oonkondo tu vulike kuye. Omuyapostoli Paulus okwa nyola a ti: “Kalunga oku shi kwiinekelwa. Onkee ite mú ethele memakelo li vule oonkondo dheni. Ihe ngele ta pitika, mu makelwe, ote mú pe ompito okuza mo mulyo noonkondo dhoku li humbata.” (1 Aakorinto 10:13) Opo Jehova e ku kwathele u idhidhimike, ota vulu oku ku pa “oonkondo” dhe. (2 Aakorinto 4:7) Konima yokwiidhidhimikila omamakelo ogendji, Paulus okwa li a vulu okutya: “Ayihe otandi yi vulu munguka ta koleke ndje.”—Aafilippi 4:13, OB-1954.

20. Omaukwatya gopakalunga geni u na okukala u na, nomolwashike ga simana?

²⁰ Okunyanyudha Jehova okwa kwatela mo lela oshindji kaashi shi owala okuyanda okuninga iinima mbyoka e tonde. Owa pumbwa wo okukala u hole shoka e hole. (Aaroma 12:9) Mbela iho kala u uvite wa hala okukala naamboka ye na etaloko lya fa lyoye, ye hole shoka u hole nohaya kala pamithikampango dha fa dhoye? Jehova naye osho ha kala e uvite ngawo. Onkee ano, ilonga okukala u hole iinima mbyoka Jehova e hole. Yimwe yomuyo oya hokololwa mEpisalomi 15:1-5, moka tatu lesha kombinga  yaamboka Kalunga a tala ko ye li ookuume ke. Ookuume ke ohayu ulike “iiyimati yOmbepo” mbyoka tayi popiwa kOmbiimbeli. Oya kwatela mo omaukwatya ngaashi “ohole, enyanyu, ombili, eidhidhimiko, uukuume, uuwanawa, okukala omwiinekelwa, eifupipiko neikwato nawa.”—Aagalati 5:22, 23.

21. Oshike tashi ke ku kwathela u kale u na omaukwatya gopakalunga?

²¹ Okulesha nokukonakona Ombiimbeli pandjigilile otaku ke ku kwathela u kale u na omaukwatya gopakalunga. Okwiilonga shoka Kalunga ta pula otaku ke ku kwathela opo omadhiladhilo goye ga tse kumwe nomadhiladhilo ge. (Jesaja 30:20, 21) Mpo ngaa pu thike okukoleka ohole yoye yokuhola Jehova, opo ngaa tapu kala pu thike okukala kwoye wa hala okukala nonkalamwenyo ndjoka tayi mu nyanyudha.

22. Oto ka pondola okuninga shike ngele owa kala nonkalamwenyo ndjoka tayi nyanyudha Kalunga?

²² Owa pumbwa okuninga oonkambadhala opo u kale nonkalamwenyo ndjoka tayi nyanyudha Jehova. Ombiimbeli otayi faathanitha okulundulula onkalamwenyo yoye nokwiihula uuntu woye uukulu nokuzala uuntu uupe. (Aakolossa 3:9, 10) Ihe shi na ko nasha niipango yaJehova, omupisalomi okwa nyola a ti: “Okuvulika [kuyo] oku na ondjambi.” (Episalomi 19:11) Nangoye oto ka mona kutya okukala nonkalamwenyo ndjoka tayi nyanyudha Kalunga oshi na ondjambi onene. Ngele to shi ningi, oto ka yamukula epataneko lyaSatana nokunyanyudha omutima gwaJehova.