1, 2. Mivolana olo nama Jehovah marìny azy.

OLO manao akory ro teanao hinamà? Azo inoa fa olo mitovy hevitsy aminao na tea ty raha teanao na manaja ty raha vatan-draha aminao. Ho teanao koa ty hinama amin’olo mahalala fomba, mivola noho manao ty marina, voho soa fanahy.

² Nisy olo sisany finily Jehovah ho namany marìny azy. Nikaihiny hoe namany ohatsy Abrahama. (Vakio Isaia 41:8; Jakoba 2:23.) Nivolaniny koa hoe ‘lahilahy ekè ty fony’ Davida, satria teany ty toetsiny. (Asan’ny Apostoly 13:22) Nikaihiny hoe “farany ze teany” Daniela mpaminany.—Daniela 9:23.

3. Nanino Jehovah ro nifily olo sisany ho namany?

³ Manino Abrahama noho Davida voho Daniela ro natao Jehovah hoe namany? Hoy ie tamy Abrahama: “Naneky ty safàko iha.” (Genesisy 22:18) Midika zay, fa mihariny ty olo miambany noho manao ze raha teany Jehovah. Hoy koa ie tamy Israelita reo: “Oriho ty safàko, le ho Ndranaharinareo aho, le nareo ho oloko.” (Jeremia  7:23) Hanjary nama Jehovah koa iha, laha manoriky ty safàny!

4, 5. Manao akory ty ampiasà Jehovah ty heriny mba hanampea ty vahoakiny?

⁴ Eritsereto ty raha soa ho azonao laha minama amy Jehovah. Mivola ty Baiboly fa mila hevitsy ‘hampisehoany ty heriny hamonjea ze olo mivahatsy aminy amy ty fony iaby’ ie. (2 Tantara 16:9) Manao akory ty ampisehoa Jehovah ty heriny mba hanampea anao? Hoy ty Salamo 32:8: “Hanoviko ze hahavy anao hahiratsy, le hatoroko anao ty lala tokony hombanao. Hanoro hevitsy anao aho le hijilo anao ty masoko.”

⁵ Soa vatany fikarakarà baka amy Jehovah zao! Hanoro hevitsy anao ie sady hiaro anao, lafa orihinao torohevitsy io. Teany ho tafaboaky amy fitsapà mahazo anao iha. (Vakio Salamo 55:22.) Laha manompo azy amy ty fonao iaby iha, le hahazo antoky manahaky mpanao salamo iny hoe: “Nataoko talohako teo avao Jehovah. Tsy hihozonkozo aho satria ankavanako eo ie.” (Salamo 16:8; 63:8) Afaky manampy anao hanao ze raha mahafalifaly azy Jehovah. Fe misy mpanohitsy ta hanelingely anao tsy hanao raha zay.

6. Ino ty fanasarà natao Satana tamin’olombelo?

⁶ Nianara tamy Toko faha-11 ao ty raha natao Satana Devoly mba hanohera ty zo Ndranahary handay. Nivola ie fa mpavandy Ndranahary sady tsy nanao ty rariny satria tsy nengany hanapa-kevitsy raiky amy ze soa noho raty Adama noho Eva. Lafa nanota rozy morovaly, ka nanomboky nameno tany toy ty taranakin-drozy, le nivola ndraiky Satana hoe raty ty antony mahavy ty olo iaby hanompo Jehovah. Sahala nivola ie hoe: “Tsy fitiava ro mahavy ty olo hanompo Ndranahary. Mba engao moa hisy fitsapà hataoko  amin-drozy, kanao tsy ho vitako ty hampiala an-drozy iaby aminy!” Ninoa Satana vatany raha zay, lafa hentea ty tantara Joba. Ia Joba zao? Ino ty raha nasara Satana azy?

7, 8. a) Ino ty nampiavaky Joba tamin’olo niaraky niay taminy? b) Ino hoy Satana ty antony mahavy Joba hanompo Ndranahary?

⁷ Fa ho 3 600 tao lasa zay ro niainany Joba. Lahilahy soa ie, satria hoy Jehovah: “Tsy misy manahaky azy ty an-tany eny. Lahilahy tsy misy tsiny ie, sady marina noho matahotsy Ndranahary voho mifaly ty raty.” (Joba 1:8) Nanao ze raha nahafalifaly Ndranahary, Joba.

⁸ Nivola Satana fa antony raty ro nahavy Joba hanompo Ndranahary. Hoy Satana tamy Jehovah: “Tsy iha moa ro niaro azy noho ty tranony voho ty hananany iaby? Iha ro nitahy ty asan-tanany, le nanjary atsiky ty biby hareny tany toy. Fa mba amparo tse moa ty tananao, azafady, le kitiho iaby ty raha ananany, le henteo kanao tsy hanozo anao amasonao eo ie!”—Joba 1:10, 11.

9. Ino ty natao Jehovah tamy fanasarà natao Satana io, le ino ty antony?

⁹ Tsy nanekineky Satana fa nao fitamanan-draha ty antony nahavy Joba hanompo Ndranahary. Nivola koa ie, fa hivaliky amy Ndranahary Joba laha misy fitsapà mahazo azy. Ino ty natao Jehovah tamy fanasarà natao Satana io? Nengàny hitsapa any Joba, Satana mba hahità ty antony mahavy Joba hanompo azy. Ho hita soa amy zay, laha teany vatany Ndranahary na tsy teany.

10. Ino iaby ty fitsapà nahazo any Joba, le ino ty nataony lafa niazo raha zay?

¹⁰ Nanao raha maromaro Satana mba hampijalea any Joba. Nisy nangalatsy ty bibiny sisany, nisy nandripaky ty ilany. Nisy namono koa ty maro tamy ty mpanompony. Nanjary tsy nanan-drala ie. Fe tsy nijano teo avao raha zay, fa mbo nimatiny tsioky mahery koa ty anakiny folo. Fa tsy hay  volany ty loza nahazo any Joba. Fe ndre teo zay, le “tsy nanota na nanome tsiny a Ndranahary” ie.—Joba 1:22.

11. a) Ino koa ty fanasarà hafa natao Satana tamy Joba, le ino ty natao Jehovah? b) Ino ty natao Joba lafa nampijaly azy marè ty aretiny?

¹¹ Tsy vitavita Satana. Nieritseritsy vasa ie hoe mbo tantiny Joba ty rava fanana noho maty mpanompo voho maty anaky, fa tsy hotantiny laha ty vatany mihintsy ro marary ka hiala amy Ndranahary ie. Nengà Jehovah hanisy arety raty noho mangirifiry tamy Joba, Satana. Fe ndre teo aretim-be zay, le mbo tsy niala tamy Ndranahary avao Joba. Tsy naviombiony ty safàny hoe: “Tsy haneky hivaliky mihintsy aho, zisiky itampera ty aiko.”—Joba 27:5.

12. Manao akory ty nanaporofoa Joba fa diso ty fanasarà natao ty Devoly?

¹² Tsy hay Joba fa baka amy Satana ty fijalea nahazo azy. Nieritseritsy ie hoe mety baka amy Ndranahary raha zay, satria tsy hainy soa ty mikasiky fanohera Devoly ty zo Ndranahary handay. (Joba 6:4; 16:11-14) Fe ndre zay, le mbo tsy nivaliky tamy Jehovah avao ie. Porofo zay fa diso ty fanasarà natao Satana, hoe fitamanan-draha avao ro antony nahavy any Joba hanompo Ndranahary!

13. Ino ty vokany lafa tsy nivaliky tamy Jehovah, Joba?

¹³ Lafa tsy nivaliky Joba, le afaky nanome porofo mazava soa Jehovah hoe tsy marina ty fanasarà atao Satana. Nama Jehovah vatany Joba, ka nameany raha soa satria tsy nivaliky.—Joba 42:12-17.

14, 15. Manino ro volany fa ty olo iaby ro tafilitsy amy fanasarà atao Satana, fa tsy Joba raiky avao?

¹⁴ Tsy Joba raiky avao ro asara Satana hoe hivaliky amy Ndranahary, fa iha koa. Manaporofo raha zay safà Jehovah amy Ohabolana 27:11 hoe: “Mihendrea anako, le ampifaleo ty foko, mba hamaleako azy manaraty ahy iny.” Tao maro tafara ty nahafaty any Joba ro nanorata safà reo. Hita baka amy zay, fa mbo manaraty a Ndranahary noho manasara raha  raty ty mpanompony avao Satana. Fe lafa manao raha mahafalifaly any Jehovah avao tsika, le afaky manaporofo fa diso ty fanasarà atao Satana. Parè va iha? Mety hisy fanovà tsy maintsy ataonao amy ty fiainanao. Fe tsy ho teanao va ty hanome porofo fa diso ty Devoly?

¹⁵ Diniho ty safà Satana hoe: “Ty raha iaby ananan’olo, le hameany hiarova ty ainy.” (Joba 2:4) Hita baka amy safà hoe “olo” fa ty olo iaby mihintsy ro tafilitsy amy fanasarà atao Satana io, fa tsy Joba raiky avao. Bevata vatany hevitsy io. Nivola Satana fa hivaliky amy Ndranahary koa iha. Teany laha tsy manoriky ty safà Ndranahary sasy iha, noho miala amy fahamarina, lafa misy fahasahirana mahazo anao. Ino iaby ty raha mety hatao Satana mba hampialany anao amy Ndranahary?

16. a) Ino iaby ty tetiky ampiasà Satana mba hampialà ty olo amy Ndranahary? b) Manao akory ty mety hamandrihany Devoly anao amy tetiky reo?

¹⁶ Nianarantsika tamy Toko faha-10, fa mampiasa tetiky sankarazany Satana, mba hahavy ty olo hiala amy Ndranahary. Voalohany, manafiky “manahaky liona masiaky miriorio mila olo hakapany” ie. (1 Petera 5:8) Mety ho Satana ro mampirisiky ty namanao noho ty longonao voho ty olo hafa hisaka anao tsy hianatsy Baiboly sasy noho tsy hiay mifanaraky amy ty raha nianaranao. * (Jaona 15:19, 20) Faharoe, ‘miseho ho soa manahaky ty anjely ty mazava’ ie. (2 Korintianina 11:14) Mety hampiasa hafetsea ie, mba hahavy anao ho voafitaky noho hahavy anao tsy hanoriky sasy ty fiaina mahafalifaly Jehovah. Mety hataony koa ze hahavy anao ho kivy, ka hieritseritsy hoe tsy ho vitanao mihintsy ty hanao raha mahafalifaly Ndranahary. (Ohabolana 24:10) Fe ndre  “manahaky liona masiaky” Satana, ndre manahaky “anjely ty mazava”, le tsy miova ty fanasaràny, tsy ino zay fa hoe: Tsy hanompo a Ndranahary sasy hoy iha, lafa misy fitsapà na fakam-panahy mahazo anao. Manao akory ty hanaporofoanao fa diso raha zay, ka tsy hivaliky manahaky Joba iha?

17. Ino ty antony mahavy antsika hanoriky ty didy Jehovah?

¹⁷ Laha mana fiaina mahafalifaly Ndranahary iha, le afaky manaporofo fa diso ty fanasarà atao Satana. Ino ty dika raha zay? Hoy ty Baiboly: “Tiavo Jehovah Ndranaharinao amy fonao iaby noho ty vatanao iaby voho ty herinao iaby.” (Deoteronomia 6:5) Ho teanao ty hanao ty sitrapo Ndranahary, lafa mitombo ty fitiavanao azy. Hoy ty apostoly Jaona: “Ho zao fitiava Ndranahary zao, le ty hanorihantsika ty didiny.” Ho hitanao fa ‘tsy mavesatsy ty didy Jehovah’, laha tea azy amy fonao iaby iha.—1 Jaona 5:3.

18, 19. a) Ino ty sisany amy ty didy Jehovah? (Henteo efajoro hoe “ Ka Atao ze Raha Tsy Tea Jehovah.”) b) Ino ty ahaizantsika hoe tsy mitaky raha tsy hovitantsika Ndranahary?

¹⁸ Ino iaby ty didy Jehovah? Mivola ty raha tsy azontsika atao ty sisany amy raha rey. Mba henteo ohatsy efajoro hoe: “ Ka Atao ze Raha Tsy Tea Jehovah.” Hita eo ty fiaina rarà ty Baiboly mivanta. Tsy raty loatsy vasa ty fahitanao ty sisany amy raha reo. Fe lafa dinihinao soa andinin-teny amea eo reo, le azo inoa fa haneky iha hoe misy fahendrea vatany ty didy Jehovah. Ty manova ty fandaisam-batanao vasa ro sarotsy marè aminao. Fe ho afa-po noho ho sambatsy ze mana fiaina mahafalifaly Ndranahary. (Isaia 48:17, 18) Matokisa fa ho vitanao ty hiova. Manino tsika ro mivola raha zay?

¹⁹ Satria tsy mitaky raha tsy ho vitantsika Jehovah. (Vakio Deoteronomia 30:11-14) Mahay soa antsika mandilatsy ty vatantsika ie. Hainy ty raha ho vitantsika, noho ty raha tsy ho vitantsika. (Salamo 103:14) Afaky manome hery antsika  koa ie, mba hanorihantsika ty didiny. Hoy ty apostoly Paoly: ‘Tsy mivaliky amy ty safàny Ndranahary, ka tsy hengany hisy fakam-panahy hahazo anareo mihoatsy ze zakanareo, fa lafa misy fakam-panahy, le hasiany lala hiboaha koa, mba hahazakanareo azy.’ (1 Korintianina 10:13) Afaky manome anao “hery fanampiny” mihintsy aza ie, mba hanampea anao hiaritsy. (2 Korintianina 4:7) Lafa baka niaritsy fitsapà maro Paoly, le afaky nivola hoe: “Mana hery handesiko mialy amy ty raha iaby aho, amy alala azy manome hery ahy iny.”—Filipianina 4:13.

20. Ino iaby ty toetsy tokony hiezahanao hanana? Manino raha zay ro ilà?

²⁰ Mbo tsy ampy ty tsy manao ty raha tsy tea Jehovah, laha ta hampifalifaly azy. Mila teanao koa ze raha teany. (Romanina 12:9) Tsy ho teanao va ty hinama amin’olo mitovy hevitsy aminao noho tea ty raha teanao voho manaja ty raha vatan-draha aminao? Mitovy amy zay koa Jehovah. Ataovo ze hitiavanao ty raha teany. Hita amy Salamo faha-15 ao ty sisany amy raha teany zay. Volaniny ao ty toetsin’olo ekè  Ndranahary ho namany. (Vakio Salamo 15:1-5.) Ananan-drozy ty toetsy kaihy ty Baiboly hoe “vokatsy ty fanahy.” Retoa iaby toetsy reo: “Fitiava, fifalea, fiadana, fahari-po, hasoa fanahy, hasoa toetsy, finoa, fahalemeam-panahy, fifehezam-bata.”—Galatianina 5:22, 23.

21. Ino ty hanampy anao hana toetsy tea Ndranahary?

²¹ Hana toetsy tea Ndranahary reo iha, laha mamaky noho mianatsy Baiboly avao. Hahavy anao hitovy hevitsy amy Ndranahary ty fianaranao ze raha ampanaoviny anao. (Isaia 30:20, 21) Lafa mitombo ty fitiavanao Ndranahary, le hitombo koa ty fanirianao hana fiaina mahafalifaly azy.

22. Hanaporofo ino iha lafa mana fiaina mahafalifaly Ndranahary?

²² Mila fiezaha ty fanana fiaina mahafalifaly Jehovah. Ampitovizy Baiboly amy ty hoe manary ty toetsy taloha noho misiky toetsy vaovao, ty fanaova fanovà amy fiaina. (Kolosianina 3:9, 10) Fe, hoy ty mpanao salamo, mikasiky ty didy Jehovah: “Ahazoa raha soa bevata ty fanoriha azy.” (Salamo 19:11) Hohitanao koa raha zay, laha manoriky fiaina mahafalifaly Ndranahary iha. Hanaporofo iha amy zay, fa diso ty fanasarà atao Satana, sady hampifalifaly Jehovah iha!