SORTU sma yu ben o teki leki mati? A no de fu taki dati yu ben o wani de mati nanga wan sma di e denki soleki fa yu e denki, di lobi den srefi sani di yu lobi, èn di e hori ensrefi na den srefi markitiki leki yu. Èn yu ben o wani de mati nanga wan sma di abi moi maniri soleki switifasi èn di no e bedrigi sma.

² Na ini a heri historia, Gado teki son libisma leki en bun mati. Fu eksempre, Yehovah ben kari Abraham en mati (Yesaya 41:8; Yakobus 2:23). Gado ben taki dati David ben de ’wan man di a lobi’ fu di a ben e tyari ensrefi na wan fasi di e plisi Yehovah (Tori fu den Apostel 13:22). Èn Yehovah ben si a profeiti Danièl leki ’wan sma di a ben lobi srefisrefi’.—Danièl 9:23.

³ Fu san ede Yehovah ben e si Abraham, David, nanga Danièl leki en mati? We, Yehovah ben taigi Abraham: "Yu arki mi sten” (Genesis 22:18). Sobun, Yehovah e kon krosibei na den wan di abi sakafasi èn di e du san a e aksi fu den. A ben taigi den Israelsma: "Gi yesi na mi sten, èn mi sa tron un Gado, èn unu srefi sa tron mi pipel” (Yeremia 7:23). Efu yu gi yesi na Yehovah, dan yu kan tron wan mati fu en tu!

YEHOVAH E GI DEN MATI FU EN KRAKTI

⁴ Prakseri san a wani taki fu de wan mati fu Gado. Bijbel e taki dati Yehovah e suku okasi "fu gebroiki a krakti fu en fu a bun fu den sma di lobi en nanga den heri ati” (2 Kroniki 16:9). Fa Yehovah kan gebroiki en krakti gi a bun fu yu? Psalm 32:8 e taki fu wan fasi fa a e du dati. Drape wi e leisi: "Mi [Yehovah] sa meki yu kisi a koni fu man si sani krin èn mi sa leri yu a pasi di yu musu waka. Mi sa gi yu rai nanga mi ai na yu tapu.”

⁵ A e naki wi ati trutru fu si taki Yehovah e broko en ede nanga wi! A sa gi yu rai di yu abi fanowdu èn a sa kibri yu te yu e fiti a rai dati na ini yu libi. Gado wani yepi yu fu horidoro te yu kisi tesi (Psalm 55:22). Sobun, efu yu dini Yehovah nanga yu heri ati, dan yu kan abi a srefi frutrow leki a psalm skrifiman di ben taki: "Mi poti Yehovah na mi fesi doronomo. Fu di a de na mi reti-anu, sma no sa meki mi degedege” (Psalm 16:8; 63:8). Iya, Yehovah kan yepi yu fu libi na wan fasi di a feni bun. Ma soleki fa yu sabi, Gado abi wan feanti di no wani taki yu du dati.

A TYALENSI FU SATAN

⁶Kapitel 11 fu a buku disi ben sori fa Satan Didibri ben tyalensi a reti di Gado abi fu tiri. Satan ben taki dati Gado ben e lei èn a ben feni taki Yehovah no ben e handri na wan reti fasi, fu di A no ben meki Adam nanga Eva bosroiti gi densrefi san bun èn san ogri. Baka di Adam nanga Eva sondu èn a heri grontapu ben e kon furu nanga den bakapikin fu den, dan Satan ben feni taki nowan libisma e dini Gado na wan opregti fasi. Te yu luku en bun, dan Satan ben taki: ’Libisma no e dini Gado fu di den lobi en. Efu yu gi mi na okasi, dan mi sa meki taki ibriwan sma drai baka gi Gado.’ A tori fu a man di ben nen Yob, e sori taki disi na san Satan ben e bribi. Suma ben de Yob, èn san a ben abi fu du nanga a tyalensi fu Satan?

⁷ Yob ben e libi sowan 3600 yari pasa. A ben de wan bun man, fu di Yehovah ben taki: "Nowan sma no de na grontapu di de leki en, wan man di de sondro fowtu èn di de opregti, di e frede Gado èn di e wai pasi gi san ogri” (Yob 1:8). Gado ben lobi Yob.

⁸ Satan ben taki dati Yob no ben e dini Gado na wan opregti fasi. Didibri ben taigi Yehovah: "A no yusrefi poti wan skotu lontu [Yob] èn lontu en oso èn lontu ala san a abi? Yu blesi a wroko fu en anu, èn srefi den meti fu en kon furu na grontapu. Ma now, grantangi, langa yu anu, èn fasi ala san a abi èn luku efu a no sa fluku yu leti na ini yu fesi.”—Yob 1:10, 11.

⁹ Na so fasi Satan ben wani sori taki Yob ben e dini Gado soso fu di a ben e kisi sani fu Gado. Didibri ben taki tu dati Yob ben o drai baka gi Gado efu a ben o kisi tesi. San Yehovah du di Satan tyalensi en? Fu di a tori disi ben abi fu du nanga na opregtifasi fu Yob, meki Yehovah gi pasi taki Satan tesi Yob. Na a fasi disi, a ben o kon na krin efu Yob ben lobi Gado, noso efu a no ben lobi En.

YOB E KISI TESI

¹⁰ Heri esi, Satan bigin tesi Yob na difrenti fasi. Sma ben fufuru wan tu meti fu Yob, èn den ben kiri sonwan fu den meti fu en. Den ben kiri furu fu den futuboi fu Yob sosrefi. Disi ben meki taki Yob kisi problema na moni sei. Wan tra rampu di ben pasa, na taki wan bigi winti kiri den tin pikin fu Yob. Ma aladi den takru sani disi ben miti en, toku "Yob no ben du sondu, èn a no ben sori taki na Gado meki taki ogri de”.—Yob 1:22.

¹¹ Satan no ben kaba nanga Yob. A ben si taki Yob ben horidoro di a lasi den gudu fu en, den futuboi fu en, nanga den pikin fu en. Ma kande Satan ben e prakseri taki Yob ben drai baka gi Gado efu a ben sa kon siki. Yehovah ben gi pasi taki Satan meki Yob kisi wan takru siki di ben e gi en furu skin-ati. Ma dati srefi no ben meki taki Yob lasi bribi na ini Gado. Na presi fu dati, a ben taki nanga overtoigi: "Teleki mi lasti bro, mi no sa libi mi soifri retifasi!”—Yob 27:5.

¹² Yob no ben sabi taki na Satan ben e meki a kisi den problema dati. Fu di Yob no ben sabi taki Didibri ben tyalensi a reti di Yehovah abi fu tiri, meki a ben prakseri taki na Yehovah ben e meki taki a kisi den problema dati (Yob 6:4; 16:11-14). Toku a tan getrow na Yehovah. Èn fu di Yob ben tan getrow na Gado, meki a buweisi taki Satan no ben abi leti di a taki dati Yob ben e dini Gado nomo fu man kisi wini gi ensrefi!

¹³ Fu di Yob ben tan getrow, meki Yehovah ben kan gi wan krin piki tapu na asranti fasi fa Satan tyalensi En. Yob ben de Yehovah en mati trutru, èn Gado ben blesi en fu di a tan getrow.—Yob 42:12-17.

SAN DISI ABI FU DU NANGA YU

¹⁴ Satan no ben taki fu Yob wawan taki a no ben o tan getrow na Gado, ma a taki dati fu yu sosrefi. Disi e kon na krin na ini Odo 27:11, pe a Wortu fu Yehovah e taki: "Sori taki yu koni, mi manpikin, èn prisiri mi ati, so taki mi kan gi wan piki na a sma di e spotu mi.” Den wortu disi di skrifi hondrohondro yari baka di Yob dede, e sori taki Satan tan spotu Gado èn taki a tan taki takru fu den futuboi fu En. Te wi e libi na wan fasi di e plisi Yehovah, dan fu taki en leti, wi e yepi fu gi piki tapu den lei fu Satan, èn na so fasi wi e prisiri na ati fu Gado. Fa yu feni a pisi tori dati? Yu no denki taki a ben o de wan tumusi moi sani fu de wan fu den sma di e yepi fu gi piki tapu den lei fu Satan, srefi te dati wani taki dati yu musu tyari kenki kon na ini yu libi?

¹⁵ Luku taki Satan ben taki: "Ala san wan libisma abi, a sa gi fu kibri en sili” (Yob 2:4). Fu di Satan ben taki "wan libisma”, meki a sori taki a no ben taki fu Yob wawan, ma fu ala libisma. Dati na wan tumusi prenspari sani. Satan taki dati yu no sa tan getrow na Gado. Didibri wani taki yu trangayesi Gado èn a wani taki yu no libi moro na wan regtfardiki fasi, te yu kisi tesi. Fa Satan kan pruberi fu meki dati pasa nanga yu?

¹⁶ Soleki fa wi ben taki na ini kapitel 10, dan Satan e gebroiki difrenti sani fu pruberi fu meki sma drai baka gi Gado. Na a wan sei, a e kon na wi tapu "leki wan lew di e bari, fu di a e suku fu swari wan sma” (1 Petrus 5:8). Sobun, te mati, famiriman, noso trawan wani tapu yu fu studeri Bijbel èn fu du san yu e leri, dan na Satan e suku fu gens yu (Yohanes 15:19, 20).* Na a tra sei, Satan "e tan kenki ensrefi kon tron wan engel fu leti” (2 Korentesma 11:14). Didibri kan gebroiki ala sortu triki fu kori yu èn fu meki taki yu no libi moro na wan fasi di e plisi Gado. A kan meki yu lasi-ati tu, kande fu di a e meki yu firi leki yu no o man plisi Gado noiti (Odo 24:10). Awinsi Satan e tyari ensrefi leki "wan lew di e bari”, noso leki "wan engel fu leti”, toku a tyalensi fu en e tan a srefi: A e taki dati yu sa tapu fu dini Gado te yu e kisi tesi. Fa yu kan gi piki tapu a tyalensi fu en èn fa yu kan sori taki yu de getrow na Gado, neleki Yob?

GI YESI NA DEN KOMANDO FU YEHOVAH

¹⁷ Yu kan gi piki tapu a tyalensi fu Satan fu di yu e libi na wan fasi di e plisi Gado. San disi wani taki? Bijbel e piki: "Yu musu lobi Yehovah, yu Gado, nanga yu heri ati, nanga yu heri sili èn nanga ala yu krakti” (Deuteronomium 6:5). Te yu e kon lobi Gado moro nanga moro, dan yu sa kisi a winsi fu du san a e aksi fu yu. Na apostel Yohanes ben skrifi: "Disi na san a lobi fu Gado wani taki, dati wi e hori wisrefi na den komando fu en.” Efu yu lobi Yehovah nanga yu heri ati, dan yu sa si taki "den komando fu en no de wan hebi”.—1 Yohanes 5:3.

¹⁸ San na den komando fu Yehovah? Sonwan fu den abi fu du nanga sani di wi no musu du. Fu eksempre, luku a faki di nen "Wai pasi gi sani di Yehovah no lobi kwetikweti”. Drape yu kan leisi fu sani di Bijbel e krutu krinkrin. Kande yu o feni taki wan tu fu den sani di kari na ini a faki dati, no de so ogri. Ma baka te yu prakseri dipi fu den tekst di kari, dan a no de fu taki dati yu sa si fu san ede a bun taki Yehovah gi wi den wet disi. Kande a moro muilek sani di yu musu du, na fu tyari kenki kon na ini a fasi fa yu e tyari yusrefi. Ma te yu e libi na wan fasi di e plisi Gado, dan dati e gi yu furu prisiri èn a e meki yu de koloku trutru (Yesaya 48:17, 18). Èn a de wan sani di yu man du. Fa wi du sabi dati?

WAI PASI GI SANI DI YEHOVAH NO LOBI KWETIKWETI

• A kiri di sma e kiri trawan.—Exodus 20:13; 21:22, 23.
• Hurudu.—Lefitikus 20:10, 13, 15, 16; Romesma 1:24, 26, 27, 32; 1 Korentesma 6:9, 10.
• Afkodrei.—Deuteronomium 18:9-13; 1 Korentesma 10:21, 22; Galasiasma 5:20, 21.
• Na anbegi fu kruktugado.—1 Korentesma 10:14.
• Dringi sopi te fu drungu.—1 Korentesma 5:11.
• Fufuru.—Lefitikus 6:2, 4; Efeisesma 4:28.
• Lei.—Odo 6:16, 19; Kolosesma 3:9; Openbaring 22:15.
• Gridifasi.—1 Korentesma 5:11.
• Ogri di sma e du nanga tranga.—Psalm 11:5; Odo 22:24, 25; Maleaki 2:16; Galasiasma 5:20, 21.
• A taki di sma e taki sani di no fiti.—Lefitikus 19:16; Efeisesma 5:4; Kolosesma 3:8.
• A fowtu fasi fa sma e gebroiki brudu.—Genesis 9:4; Tori fu den Apostel 15:20, 28, 29.
• A weigri di wan sma e weigri fu sorgu gi na osofamiri fu en.—1 Timoteyus 5:8.
• Te sma e teki prati na orloku fu grontapu, èn na trobi na politiek sei.—Yesaya 2:4; Yohanes 6:15; 17:16.
• A gebroiki di sma e gebroiki tabaka noso drugs di e meki sma firi prisiri.—Markus 15:23; 2 Korentesma 7:1.

¹⁹ Noiti Yehovah e aksi wi fu du moro leki san wi man du (Deuteronomium 30:11-14). A sabi moro bun leki wi srefi, san wi man du èn san wi no man du (Psalm 103:14). Boiti dati, Yehovah kan gi wi a krakti fu gi yesi na en. Na apostel Paulus ben skrifi: "Gado de getrow, èn a no sa meki unu kisi tesi di hebi moro leki san unu man frudrage; ma te tesi miti unu, dan a sa tyari wan frulekti kon, so taki unu man horidoro” (1 Korentesma 10:13). Yehovah kan gi yu "a krakti di bigi pasa marki” srefi, fu yepi fu yu horidoro (2 Korentesma 4:7). Baka di Paulus horidoro ondro furu tesi, a ben kan taki: "Mi man du ala sani nanga yepi fu a sma di e gi mi krakti.”—Filipisma 4:13.

KON KISI DEN FASI DI E PLISI GADO

²⁰ A no de fu taki dati efu yu wani plisi Yehovah, dan yu no musu wai pasi nomo gi sani di a no lobi kwetikweti. Yu musu lobi den sani tu di en lobi (Romesma 12:9). A no de fu taki dati yu wani de mati nanga sma di abi a srefi denki leki yu, di lobi den srefi sani leki yu, èn di e hori densrefi na den srefi markitiki leki yu, a no so? We, na dati Yehovah wani tu. Sobun, leri fu lobi den srefi sani di Yehovah lobi. Sonwan fu den sani disi skrifi na ini Psalm 15:1-5, pe wi e leisi fu sma di Gado e si leki en mati. Den mati fu Yehovah e sori san Bijbel e kari "den froktu fu a yeye”. Den froktu disi na sani soleki "lobi, prisiri, vrede, langa pasensi, bun-ati, bunfasi, bribi, safri-ati, dwengi yusrefi”.—Galasiasma 5:22, 23.

²¹ Te yu e leisi èn e studeri Bijbel doronomo, dan dati sa yepi yu fu kon kisi den fasi di Gado lobi. Èn te yu e kon sabi san Gado e aksi fu yu, dan dati sa yepi yu fu denki na a srefi fasi leki Gado (Yesaya 30:20, 21). O moro yu e kon lobi Yehovah, o moro yu o wani libi na wan fasi di e plisi Gado.

²² Yu musu meki muiti fu kan libi na wan fasi di e plisi Yehovah. Bijbel e agersi den kenki di yu e tyari kon na ini yu libi èn na ini a fasi fa yu de, nanga a puru di yu e puru owru krosi fu kan weri nyunwan (Kolosesma 3:9, 10). Ma a psalm skrifiman ben skrifi fu den komando fu Yehovah: "Furu pai de gi den sma di e hori den” (Psalm 19:11). Yu sa si tu taki yu sa kisi furu blesi te yu e libi na wan fasi di e plisi Gado. Te yu e du dati, dan yu sa gi wan piki tapu a tyalensi fu Satan èn yu sa prisiri na ati fu Yehovah!

*  Disi no wani taki dati Satan srefi abi krakti tapu ibriwan sma di e gens yu. Ma Satan na a gado fu a grontapu sistema disi, èn heri grontapu de na ini en makti (2 Korentesma 4:4; 1 Yohanes 5:19). Sobun, wi kan fruwakti taki furu sma no sa wani libi soleki fa Gado wani, èn taki sonwan fu den o suku fu gens yu.