1, 2. Fó toʼok ezemplu balu kona-ba ema neʼebé sai Maromak Jeová nia belun.

ITA hakarak hili ema hanesan saida atu sai Ita-nia belun? Karik, Ita hili ema neʼebé iha hanoin no hakarak hanesan Ita-nian. No mós, Ita sei gosta ema neʼebé iha hahalok diʼak, hanesan laran-moos no laran-diʼak.

² Iha ema nia istória, Maromak hili ema balu atu sai ninia belun. Porezemplu, Maromak Jeová bolu Abraão nuʼudar nia belun. (Isaías [Yesaya] 41:8; Tiago 2:23) Maromak mós koʼalia kona-ba David nuʼudar ‘ema neʼebé monu loos ba nia laran’. (Apóstolu 13:22) No Maromak Jeová haree profeta Daniel nuʼudar “ema neʼebé Maromak hadomi”.—Daniel 9:23.

3. Tanbasá mak Maromak Jeová hili ema balu atu sai ninia belun?

³ Tanbasá mak Maromak Jeová haree Abraão, David, no Daniel nuʼudar ninia belun? Nia hatete ba Abraão: “Ó rona tiha mai haʼu-nia lian.” (Gênesis [Kejadian] 22:18) Ida-neʼe hatudu katak Maromak  Jeová hakbesik ba ema haraik-an neʼebé halo tuir ninia hakarak. Nia hatete ba ema Izraél: “Halo tuir haʼu-nia liafuan, no haʼu sei sai imi-nia Maromak, no imi sei sai haʼu-nia povu.” (Jeremias [Yeremia] 7:23) Se Ita halo tuir Maromak Jeová, Ita mós bele sai ninia belun!

4, 5. Oinsá mak Maromak Jeová hatudu nia forsa atu ajuda ninia povu?

⁴ Hanoin toʼok kona-ba bensaun balu neʼebé Maromak nia belun sira simu. Bíblia hatete katak Maromak Jeová buka atu “hatudu ninia forsa hodi ajuda sira neʼebé fó sira-nia laran tomak ba nia”. (2 Crônicas [Tawarikh] 16:9) Oinsá mak Maromak Jeová hatudu nia forsa atu ajuda ita? Dalan ida mak esplika iha Salmo (Mazmur) 32:8, neʼebé dehan: “Haʼu [Jeová] sei halo ó sai matenek no hanorin ó kona-ba dalan neʼebé ó tenke tuir. Haʼu sei fó konsellu hodi tau matan ba ó.”

⁵ Liafuan neʼe hatudu Maromak Jeová nia sentimentu no book ita-nia fuan, loos ka lae? Nia sei hatudu matadalan ba ita no tau matan ba ita nuʼudar ita halo tuir. Maromak hakarak ajuda ita kuandu ita hasoru tentasaun ka susar. (1 Pedro 5:7) Tan neʼe, se ita halo tuir Maromak Jeová ho laran tomak, ita bele iha fiar hanesan fiar-naʼin ida neʼebé hatete: “Haʼu sempre haree Jeová iha haʼu-nia oin; no haʼu sei nunka nakdedar tanba nia iha haʼu-nia liman-loos.” (Apóstolu 2:25; Salmo [Mazmur] 63:8) Sin, Maromak Jeová bele ajuda ita atu moris tuir ninia hakarak. Maibé, hanesan ita hatene tiha ona,  Maromak nia inimigu hakarak hapara ita atu halo nuneʼe.

6. Saida mak Satanás hanoin kona-ba ema?

⁶ Iha Kapítulu 11 husi livru neʼe, esplika tiha ona kona-ba lia neʼebé Satanás hasaʼe kona-ba Maromak nia direitu atu ukun. Satanás duun katak Maromak mak bosok-teen, no diʼak liu Adão ho Eva rasik mak foti desizaun kona-ba buat neʼebé loos no sala, laʼós Maromak. Depois Adão ho Eva halo sala no sira-nia oan no bei-oan sai barak iha mundu, Satanás mós hasaʼe lia kona-ba ema hotu. Satanás hanoin: ‘Dala ruma ema halo tuir Maromak, maibé neʼe laʼós tanba sira hadomi nia. Se haʼu iha oportunidade, haʼu bele halo ema hotu kontra hasoru Maromak.’ Ita hatene katak Satanás hanoin hanesan neʼe tanba istória kona-ba ema ida naran Job. Sé mak Job? Oinsá mak lia neʼebé Satanás hasaʼe envolve mós nia?

7, 8. (a) Tanbasá mak Job ema espesiál? (b) Satanás hatete saida hodi duun katak Job la hadomi Maromak Jeová?

⁷ Job moris maizumenus tinan 3.600 liubá. Nia mak ema diʼak, tanba Maromak Jeová hatete: “La iha ema hanesan nia iha mundu, ema neʼebé hamriik metin no laran-moos, taʼuk ba Maromak no sees husi buat aat.” (Jó [Ayub] 1:8) Job halo Maromak kontente.

⁸ Satanás hanoin katak Job la hatudu domin neʼebé loos ba Maromak. Diabu hatete ba Maromak Jeová: “Ita tau lutu hodi haleʼu Job no haleʼu ninia uma no buat hotu neʼebé nia iha, loos ka lae? Ita fó bensaun ba serbisu neʼebé nia halo ho ninia liman,  no ninia animál sira sai barak iha rai. Maibé, ba dala ida, lolo Ita-nia liman no kona ninia sasán hotu, no haree toʼok, nia sei hatete aat ba Ita-nia oin.”—Jó (Ayub) 1:10, 11.

9. Oinsá mak Maromak Jeová hatán ba lia neʼebé Satanás hasaʼe? Tanbasá?

⁹ Satanás duun katak Job halo tuir Maromak tan deʼit Maromak ajuda nia. Diabu hasaʼe lia katak se Job hetan susar, Job sei kontra hasoru Maromak. Oinsá mak Maromak Jeová hatán ba lia neʼe? Nia husik Satanás atu koko Job, tanba Satanás hasaʼe lia kona-ba Job nia domin ba Maromak. Hanesan neʼe, Job bele hatudu ho klaru se nia hadomi duni Maromak ka lae.

10. Job hasoru susar saida deʼit? Saida mak Job la halo?

¹⁰ Lakleur, Satanás komesa koko Job iha dalan oioin. Ema naʼok Job nia animál balu, no Satanás oho animál seluk. Satanás mós oho Job nia atan barak. Tan neʼe, Job triste tebes no hasoru problema ekonomia. Nia triste liután bainhira ninia oan naʼin-10 mate tanba anin-fuik. Maski Job hasoru terus barak hanesan neʼe, maibé “Job la halo sala no la duun buat naran deʼit neʼebé laloos ba Maromak”.—Jó (Ayub) 1:22.

11. (a) Satanás hasaʼe lia saida tan kona-ba Job? Oinsá mak Maromak Jeová hatán? (b) Maski Job hetan moras aat, saida mak nia hatete?

¹¹ Satanás la rende an. Karik Satanás hanoin Job bele tahan susar hanesan lakon ninia rikusoin, atan sira, no oan sira, maibé se nia rasik hetan moras, nia sei kontra Maromak. Jeová husik Satanás halo Job hetan moras aat. Maibé susar neʼe mós la halo Job  lakon ninia fiar ba Maromak. Job hatete: “Toʼo haʼu mate, haʼu sei nunka lakon haʼu-nia hahalok loos!”—Jó (Ayub) 27:5.

12. Oinsá mak Job hatudu katak Diabu nia hanoin mak sala?

¹² Job la hatene katak susar sira-neʼe mai husi Satanás. Job hanoin katak susar sira-neʼe mai husi Maromak, tanba nia la hatene lia neʼebé Satanás hasaʼe kona-ba Maromak Jeová nia direitu atu ukun. (Jó [Ayub] 6:4; 16:11-14) Maski nuneʼe, nia laran-metin nafatin ba Maromak Jeová. Satanás hatete katak Job la hadomi Maromak, no Job halo tuir tan deʼit Maromak ajuda nia. Maibé hodi laran-metin nafatin, Job hatudu katak ida-neʼe laloos!

13. Saida mak akontese tanba Job laran-metin nafatin ba Maromak Jeová?

¹³ Tanba Job laran-metin nafatin ba Maromak Jeová, Maromak bele hatudu ho klaru katak lia neʼebé Satanás hasaʼe mak sala duni. Loos, Job mak Maromak Jeová nia belun, no Maromak fó bensaun ba Job tanba nia laran-metin nafatin.—Jó (Ayub) 42:12-17.

14, 15. Tanbasá mak ita bele dehan katak lia neʼebé Satanás hasaʼe kona-ba Job mós kona ema hotu?

¹⁴ Lia neʼebé Satanás hasaʼe laʼós kona Job deʼit, maibé kona mós ita ida-idak. Nia hasaʼe lia katak ita hotu sei la halo tuir Maromak. Eskritura iha Provérbios (Amsal) 27:11 hatudu ho klaru kona-ba ida-neʼe. Maromak Jeová nia Liafuan hatete: “Haʼu-nia oan, sai matenek bá, no halo haʼu-nia laran kontente, atu haʼu bele hatán ba ida neʼebé koʼalia aat mai haʼu.” Liafuan sira-neʼe hakerek tinan atus ba atus depois Job mate, ida-neʼe hatudu katak Satanás kontinua atu  koʼalia aat Maromak no duun sala Ninia atan sira. Kuandu ita halo tuir Maromak Jeová, ita hola parte atu hatudu katak lia neʼebé Satanás hasaʼe mak sala, no ita halo Maromak nia laran kontente. Ita sente oinsá kona-ba ida-neʼe? Sin, ita hakarak tebes atu hatudu katak lia neʼebé Satanás hasaʼe mak sala, maski ita presiza halo mudansa ruma iha ita-nia moris atu halo ida-neʼe.

¹⁵ Hanoin toʼok, Satanás hatete: “Buat hotu neʼebé ema iha, nia sei fó atu salva nia moris.” (Jó [Ayub] 2:4) Hodi hatete “ema”, Satanás hasaʼe lia laʼós kona-ba Job deʼit, maibé kona-ba ema hotu. Ida-neʼe importante tebes tanba hatudu katak Satanás mós hasaʼe lia kona-ba ita-nia domin ba Maromak. Bainhira problema sira mosu, Diabu hakarak ita atu la halo tuir Maromak, maibé atu kontra Maromak. Hodi halo nuneʼe, saida deʼit mak Satanás halo?

16. (a) Satanás uza dalan saida deʼit atu halo ema la serbí Maromak? (b) Oinsá mak Satanás bele uza dalan sira-neʼe atu hasoru Ita?

¹⁶ Hanesan ita aprende ona iha Kapítulu 10, Satanás uza dalan oioin atu halo ema la serbí Maromak. Iha parte ida, nia ataka “hanesan leaun ida neʼebé hasai lian makaʼas no buka atu han ema ruma”. (1 Pedro 5:8) Nuneʼe, Satanás bele book ita-nia kolega, família, ka ema seluk atu kontra hasoru ita kuandu ita estuda Bíblia no halo tuir buat neʼebé ita estuda. * (João 15:19, 20) Iha parte seluk, “Satanás rasik  kontinua hatudu nia an nuʼudar anju naroman nian”. (2 Korinto 11:14) Diabu bele lohi ita no dada ita atu la moris tuir Maromak nia hakarak. No mós, kuandu ita sente triste, nia koko atu halo ita sente katak ita ema aat neʼebé la bele halo Maromak kontente. (Provérbios [Amsal] 24:10) Maski dala ruma Satanás nia hahalok hanesan “leaun” no dala ruma hanesan “anju naroman nian”, nia duun nafatin katak bainhira ita hasoru tentasaun ka susar, ita sei la serbí tan Maromak. Oinsá mak ita bele sai hanesan Job hodi laran-metin nafatin ba Maromak no hatudu katak Satanás mak sala?

17. Saida mak razaun importante liu atu halo tuir Maromak Jeová nia ukun-fuan sira?

¹⁷ Hodi moris tuir Maromak nia hakarak, ita bele hatudu katak Satanás mak sala. Maibé ida-neʼe katak sá loos? Bíblia hatán: “Ó tenke hadomi Jeová ó-nia Maromak ho ó-nia laran tomak, ho ó-nia moris tomak, ho ó-nia neon tomak, no ho ó-nia kbiit tomak.” (Marcos 12:30) Nuʼudar ita-nia domin ba Maromak sai boot liu, ita-nia hakarak atu halo tuir Maromak mós sei sai boot. Apóstolu João hakerek: “Basá domin ba Maromak katak ita halo tuir ninia ukun-fuan sira; no ninia ukun-fuan sira la todan.”—1 João 5:3.

18, 19. (a) Maromak Jeová fó ukun-fuan balu kona-ba saida? (Haree  kaixa iha pájina 140.) (b) Tanbasá mak ita hatene katak Maromak nunka husu buat neʼebé susar liu mai ita atu halo?

¹⁸ Maromak Jeová nia ukun-fuan sira kona-ba saida deʼit? Balu kona-ba sees husi hahalok aat.  Porezemplu, haree ba kaixa iha kraik, ho títulu “ Hadook an husi buat neʼebé Maromak Jeová odi”. Iha neʼebá, ita bele lee buat balu neʼebé Bíblia bandu. Se haree liu deʼit, ita sente katak hahalok balu neʼebé hakerek iha neʼebá ladún aat. Maibé bainhira ita hanoin kleʼan kona-ba eskritura sira neʼebé hakerek iha kaixa neʼe, karik ita sei hatene katak Maromak Jeová nia ukun-fuan sira mak loos no diʼak. Karik susar tebes atu troka ita-nia hahalok balu. Maibé, moris  tuir Maromak nia hakarak sei halo ita kontente loos. (Isaías [Yesaya] 48:17, 18) No ida-neʼe la susar liu ba ita. Oinsá mak ita hatene katak ita bele duni serbí Maromak?

¹⁹ Maromak Jeová hatene kona-ba ita-nia kbiit no matenek, no mós kona-ba ita-nia fraku. (Salmo [Mazmur] 103:14) No nia nunka husu buat neʼebé susar liu mai ita atu halo. (Deuteronômio [Ulangan] 30:11-14) Liután neʼe, Maromak Jeová bele fó forsa  mai ita hodi ita bele halo tuir nia. Apóstolu Paulo hakerek: “Maromak mak laran-metin, no nia sei nunka husik imi atu hetan tentasaun liu fali buat neʼebé imi bele tahan, maibé kuandu imi hasoru tentasaun neʼe nia mós sei hatudu dalan ba imi atu sai, atu nuneʼe imi bele tahan nia.” (1 Korinto 10:13) No mós, Maromak Jeová bele fó forsa atu nuneʼe “kbiit neʼebé la hanesan baibain mosu mai” atu ajuda ita tahan. (2 Korinto 4:7) Paulo tahan hasoru susar barak, no nia dehan: “Iha buat hotu haʼu hetan forsa liuhusi nia neʼebé fó kbiit mai haʼu.”—Filipe 4:13.

20. Ita tenke haburas hahalok saida deʼit? Tanbasá?

²⁰ Klaru katak atu halo tuir Maromak Jeová nia hakarak, ita tenke halo buat seluk tan duké sees deʼit husi buat neʼebé nia odi. Ita mós tenke hadomi buat neʼebé nia hadomi. (Roma 12:9) Ita gosta ema neʼebé iha hanoin hanesan ita-nian ka lae? Maromak Jeová mós gosta ema neʼebé iha hanoin hanesan ninian. Tan neʼe, treinu ita-nia an atu hadomi buat neʼebé Maromak Jeová hadomi. Iha Salmo (Mazmur) 15:1-5 ita bele lee kona-ba Maromak nia belun nia hahalok sira. Maromak Jeová nia belun sira mós hatudu “hahalok sira neʼebé mai husi espíritu santu”. Bíblia hatete katak hahalok sira-neʼe hanesan “domin, kontente, dame, pasiénsia, laran-diʼak, hahalok diʼak, fiar, laran-maus, no kontrola an”.—Galásia 5:22, 23.

21. Oinsá mak ita bele haburas hahalok sira neʼebé Maromak simu?

²¹ Ita bele haburas hahalok sira neʼebé Maromak simu hodi kontinua atu lee no estuda Bíblia. No  mós, kuandu ita aprende saida mak Maromak hakarak ita atu halo, ita bele iha hanoin hanesan Maromak nian. (Isaías [Yesaya] 30:20, 21) Nuʼudar ita hametin ita-nia domin ba Maromak, ita-nia hakarak atu halo tuir Maromak sei sai boot liu.

22. Tanbasá mak diʼak atu moris tuir Maromak nia hakarak?

²² Atu moris tuir Maromak Jeová nia hakarak, ita tenke hakaʼas an. Bíblia dehan katak troka ita-nia moris mak hanesan hasai tiha husi ita-nia an ema tuan nian no tau fali ema foun. (Koloso 3:9, 10) Maski dala ruma la fasil atu halo tuir Maromak Jeová nia ukun-fuan sira, maibé Bíblia hatete: “Hodi halo tuir sira-neʼe, iha bensaun boot.” (Salmo [Mazmur] 19:11) Ita sei sai kontente tebes hodi moris tuir nafatin Maromak nia hakarak. No hodi halo nuneʼe, ita mós sei hatudu katak lia neʼebé Satanás hasaʼe mak sala, no ita sei halo Maromak Jeová nia fuan kontente!