1, 2. Fakaasi mai a nisi tala o tino kolā ne fai mo fai ne taugasoa ‵pili o Ieova.

SE A te vaegā tino telā ka filifili ne koe ke fai mo fai tou taugasoa? Kāti ka fiafia loa koe ki se tino telā e ‵pau lū manatu, mea kolā e fia‵fia koulua ki ei, kae e ‵pau foki lū amioga. Kae ka fia fai taugasoa foki koe ki se tino telā e ‵gali ana uiga, e fakamaoni kae e kaimalie.

² Ne filifili sāle ne te Atua a nisi tino ke fai mo fai ana taugasoa ‵pili. E pelā mo Apelaamo, ne taku ne Ieova me ko tena taugasoa. (Faitau te Isaia 41:8; Iakopo 2:23) Ne faipati te Atua e uiga ki a Tavita e pelā me “ko te vaegā tagata tenā e manako au ki ei,” me tenā eiloa te vaegā tino e alofa ki ei Ieova. (Galuega 13:22) Kae ne “alofa eiloa” a Ieova ki te pelofeta ko Tanielu.—Tanielu 9:23.

3. Kaia ne filifili ei ne Ieova a nisi tino ke fai mo fai ana taugasoa?

³ Kaia ne manatu aka ei a Ieova me i a Apelaamo, Tavita, mo Tanielu ko ana taugasoa? Ia, ne fai atu a ia ki a Apelaamo, penei: “E pogai mea katoa i tou fakalogo ki aku fakatonuga.” (Kenese 22:18) Tela la, e fakapilipili atu eiloa a Ieova ki tino loto maulalo kolā e fai ne latou a mea e manako a ia ke fai ne latou. Ne fai atu a ia ki te kau Isalaelu, penei: ‘Faka‵logo mai ki a au, ko te mea ke fai au mo Atua o koutou, ka ko koutou ke fai mo oku tino.’ (Ielemia 7:23) Kafai e fakalogo koe ki a Ieova, e mafai foki o fai koe mo fai tena taugasoa!

4, 5. E tuku atu pefea ne Ieova te malosi ki ana tino?

⁴ Mafaufau la me se a te mea e fakauiga ki ei a te fai mo fai te taugasoa o te Atua. E fai mai te Tusi Tapu me e salasala a Ieova ki avanoaga ke “ave ne ia a te malosi ki tino kolā e fakamaoni ki a ia.” (2 Nofoaiga Tupu 16:9) E mafai pefea o tuku atu ne Ieova te malosi ki a koe? E fakaasi mai te auala e tasi i te Salamo 32:8, telā e fai‵tau tatou, penei: “Ka akoako atu ne au [Ieova] ki a koe te auala e ‵tau o fano koe i ei; ka fakatonutonu kae akoako ne au a koe.”

⁵ Ko tafaga la te gali o te fakamaoniga tenā o te atafai o Ieova! Ka fakatonutonu kae puipui ne ia koe māfai e fakagalue aka ne koe a mea konā i tou olaga. E manako te Atua o fesoasoani atu ke manumalo koe i ou fakalavelave mo tofotofoga. (Faitau te Salamo 55:22) Tela la, kafai e tavini atu koe ki a Ieova mo tou loto kātoa, ka mafai eiloa o talitonu koe ki pati konei a te faisalamo: “E iloa faeloa ne au i te Aliki [ko Ieova] e pili mai ki a au. . . . Ka ko tou lima e ola ei au.” (Salamo 16:8; 63:8) E tonu, e mafai o fesoasoani atu a Ieova ke ola koe i se vaegā olaga telā e fiafia a ia ki ei. Kae e iloa ‵lei ne koe, me e isi se fili o te Atua telā e fia taofi ne ia koe mai te faiga o te mea tenei.

6. Ne losi atu pefea Satani ki tino?

⁶ Ne fakamatala mai i te Mataupu e 11 o te tusi tenei a te auala ne ‵teke atu ei a Satani te Tiapolo ki te pulega sili a te Atua. Ne ‵losi atu a Satani me e pati loi te Atua kae e se ‵lei foki ana faiga me ne seki talia ne ia Atamu mo Eva ke fakaiku aka ne laua i a laua eiloa a te mea ‵lei mo te mea masei. Mai tua o te taimi ne agasala ei a Atamu mo Eva kae ko kamata o tokouke lā tama‵liki, ne fakafesili foki ne Satani te fakamaoni o tino katoa. Ne fai pelā me ne ‵losi atu Satani, penei: ‘E se tavini atu a tino ki te Atua ona ko te mea e a‵lofa latou ki a ia. Tuku mai aka se avanoaga ki a au, kae ka ‵fuli keatea ne au a tino katoa mai te Atua.’ E fakaasi mai i te tala o Iopu me tenei eiloa te mea ne talitonu ki ei a Satani. Ko oi a Iopu, kae ne aofia pefea a ia i te kinauga tenei a Satani?

7, 8. (a) Kaia ne tu ‵kese ei a Iopu mai nisi tino i aso konā? (e) Ne fakafesili aka pefea ne Satani te pogai tonu ne fia tavini atu ei a Iopu ki te Atua?

⁷ Kāti ko ‵tusa nei mo te 3,600 tausaga ko ‵teka atu nei talu mai  te taimi ne ola ei a Iopu. A ia se tagata ‵lei, me ne fai mai a Ieova e uiga ki a ia, penei: “E seai se tino i te lalolagi e ‵pau mo ia i te ‵lei mo te fakatuanaki. E tapuaki a ia ki a au, kae ko ia eiloa ko fakaeteete i a ia ma agasala mai ki a au.” (Iopu 1:8) Ne fakafiafia atu eiloa a Iopu ki te Atua.

⁸ Ne fakafesili ne Satani a te pogai ne tavini atu ei a Iopu ki te Atua. Ne fai atu te Tiapolo ki a Ieova, penei: “Ne puipui faeloa ne koe a ia [Iopu] mo tena kāiga, mo ana mea katoa. Ne fakamanuia ne koe ana mea katoa e fai, kae ko oko foki eiloa i te uke o pulumakau ne tuku ne koe ma ia. I te taimi nei, se taumate kafai e ave keatea ne koe ana mea katoa, e iku eiloa o muna masei ne ia a koe!”—Iopu 1:10, 11.

9. Ne saga atu pefea a Ieova ki pati ‵toa a Satani, kae kaia?

⁹ Ne kinau atu Satani me ne tavini atu fua Iopu ki te Atua ko te mea ke fakamanuia atu te Atua ki a ia. Ne toa atu foki a Satani me kafai e tofotofo aka Iopu, ka ‵fuli keatea a ia mai te Atua. Ne saga atu pefea a Ieova ki pati ‵toa konā a Satani? Ona ko te mea ne aofia a lagonaga o Iopu i te kinauga tenei, ne talia ei ne Ieova ke tofotofo ne Satani a Iopu. E fakamaoni aka i ei me e alofa tonu Iopu ki te Atua io me ikai.

10. Ne a fakalavelave ne oko atu ki a Iopu, kae ne a ana mea ne fai?

¹⁰ Se mea vave eiloa o tofotofo ne Satani a Iopu i auala kese‵kese. Ne kaisoa kae tamate a nisi manu a Iopu. Ne tamate foki a te tokoukega o ana tavini. Ne ‵galo atu i ei ana koloa katoa. E se gata i ei, ne tupu se matugā fakalavelave lasi eiloa i te taimi ne ‵mate atu ei a tama‵liki e toko sefulu a Iopu i se afā. Faitalia eiloa a fakalavelave fakama‵taku konei, “ka ko Iopu e seki agasala eiloa o ‵lou me ko te Aliki e pogai ei a mea konā ne ‵tupu.”—Iopu 1:22.

11. (a) Se a te lua o ‵losiga ne fai ne Satani e uiga ki a Iopu, kae ne saga atu pefea a Ieova ki ei? (e) Ne a mea ne fai ne Iopu i te taimi ne maua ei ne ia se masaki matagā?

¹¹ Ne seki gata i konā a taumafaiga a Satani. Kāti ne mafaufau tou tagata me e tiga eiloa ne mafai o kufaki a Iopu i te ‵galo o ana koloa, ana tavini, mo ana tama‵liki, ka fulitua atu eiloa a Iopu ki  te Atua māfai ko masaki a ia. Ne talia ne Ieova ke fakaoko atu ne Satani se masaki matagā kae fakalogo‵mae ki a Iopu. Kae ne seki fai foki eiloa ne te mea tenei ke galo atu te fakatuanaki o Iopu ki te Atua. I lō te fai penā, ne fai atu a ia mo te mautinoa, penei: “Au e makeke eiloa i a au e se ‵se ke oko eiloa ki te aso e mate ei au.”—Iopu 27:5.

12. Ne tali atu pefea a Iopu ki pati ‵toa a te Tiapolo?

¹² Ne seki iloa ne Iopu me i a Satani ko te māfuaga o ana fakalavelave. Ona ko te mea ne seki iloa ne Iopu a pati katoa konā a te Tiapolo e uiga ki te pulega sili a Ieova, ne manavase tou tagata me i te Atua ko te māfuaga o ana fakalavelave. (Iopu 6:4; 16:11-14) Kae ne tumau eiloa tena fakamaoni ki a Ieova. Ne fakamautinoa katoatoa aka ei ne te fakamaoni o Iopu a te ‵se o pati a Satani me ne tavini atu fua a Iopu ki te Atua ona ko ana manakoga kaimanako!

13. Ne a mea ne ‵tupu ona ko te fakamaoni o Iopu ki te Atua?

¹³ Ona ko te fakamaoni o Iopu, ne maua ei ne Ieova se tali mautinoa ki pati sē ‵tau a Satani. Ne fai tonu a Iopu mo fai se taugasoa o Ieova, kae ne fakamanuia eiloa ne te Atua a ia ona ko tena fakamaoni.—Iopu 42:12-17.

14, 15. E aofia pefea a tino katoa i pati ‵toa a Satani e uiga ki a Iopu?

¹⁴ E se ko Iopu tokotasi fua ne aofia i te kinauga telā ne fakasae aka ne Satani e uiga ki te fakamaoni ki te Atua. E aofia foki koe i ei. E fakaasi manino mai te mea tenei i te Faataoto 27:11, telā e fai mai i ei a Muna a Ieova, penei: “Taku tama, a koe ke atamai kae ka fiafia malosi eiloa au. Ka isi se tali e mafai o avatu ne au ki so se tino telā e fakamasei ne ia au.” E fakaasi mai ne pati konei, kolā ne tusi i te fia selau tausaga mai tua o te mate o Iopu, me koi fakaitaita atu eiloa Satani ki te Atua kae fakamasei foki ne ia a tavini a te Atua. Kafai e ola tatou i se vaegā olaga telā e fiafia ki ei a Ieova, e fesoasoani atu eiloa tatou ki te faiga o se tali ki ‵losiga ‵se a Satani, kae e fai foki i ei ne tatou te loto o te Atua ke fiafia. E a, ne a ou lagonaga e uiga ki te mea tenā? E taulia tatou ke fai ‵tou tusaga i te avatuga o se tali ki pati ‵loi a te Tiapolo, faitalia me e ‵tau o fai ne tatou a nisi ‵fuliga i ‵tou olaga, i ne?

 ¹⁵ Onoono la, me ne fai atu a Satani, penei: “A te tagata e mafai fua o tiakina ana mea katoa manafai ko manako ke ola a ia.” (Iopu 2:4) Mai te fakaaogāga ne ia o te pati “te tagata,” ne fakaasi manino mai i ei ne Satani me e se fakauiga fua ana pati ki a Iopu, kae ki tino katoa foki. E tāua ‵ki eiloa te manatu tenā. Ko fakafesili foki ne Satani tou fakamaoni ki te Atua. E manako te Tiapolo ke se fakalogo koe ki te Atua kae ke tiakina foki ne koe au amioga fakamaoni māfai ko ‵tupu a fakalavelave. E taumafai pefea Satani o fai te mea tenei?

16. (a) Ne a togafiti e fakaaogā sāle ne Satani i tena taumafai ke ‵fuli keatea a tino mai te Atua? (e) E fakaaogā pefea ne te Tiapolo a togafiti konei ki a koe?

¹⁶ E pelā mo te mea ne fakaasi mai i te Mataupu e 10, e fakaaogā sāle ne Satani a auala kese‵kese i tena taumafai ke ‵fuli keatea a tino mai te Atua. I te feitu e tasi, e oso atu a ia e pelā me se “leona fekai, e salasala ki te tino ke kai ne ia.” (1 Petelu 5:8) Kāti ko taumafaiga a Satani ko fai ei ke ‵teke atu ou taugasoa, ou kāiga, io me ko nisi tino ki au taumafaiga ke sukesuke ki te Tusi Tapu kae tautali atu foki ki mea konā. * (Ioane 15:19, 20) I te suā feitu, “e mafai ne [Satani] o sui ona foliga ke pelā mo se agelu o te mainaga.” (2 Kolinito 11:14) E mafai o fakaaogā ne te Tiapolo a auala ‵funa ke takitaki ‵se kae fakakolekole ne ia koe ke ‵teke atu ki se olaga amio atua. E mafai foki o fakaaogā ne ia a te loto vāivāi, mai te faiga ke manatu aka koe me e se mafai lele eiloa o fakafiafia atu koe ki te Atua. (Faataoto 24:10) Faitalia me e fai a Satani pelā me se “leona fekai” io me e fakaloiloi mai e pelā me se “agelu o te mainaga,” e ‵pau faeloa ana pati fakaitaita: Ne fai mai a ia, me kafai e fe‵paki koe mo tofotofoga io me ko fakaosoosoga, ka fakagata aka ei ne koe tou tavini atu ki te Atua. E mafai pefea o tali atu koe ki ana pati fakaitaita kae fakatalitonu atu tou fakamaoni ki te Atua, e pelā mo te mea ne fai ne Iopu?

17. Se a te ‵toe pogai tāua e faka‵logo ei tatou ki fakatonuga a Ieova?

¹⁷ E mafai o tali atu koe ki pati fakaitaita a Satani mai i te ola i se vaegā olaga telā e fiafia ki ei te Atua. Ne a mea e aofia i ei? E tali mai te Tusi Tapu, penei: “Alofa ki te Aliki [ko Ieova] te otou Atua mo otou loto kātoa, mo otou agaga kātoa, mo otou malosi kātoa.” (Teutelonome 6:5) Kafai e gasolo aka o malosi tou alofa ki te Atua, ka momea aka foki te fia fai ne koe o mea kolā e manako a ia ki ei. Ne tusi mai te apositolo ko Ioane, penei: “Tenei te uiga o te alofa ki te Atua: ko te fakalogo ki ana fakatonuga.” Kafai e alofa koe ki a Ieova mo tou loto kātoa, ka iloa ne koe me i “ana fakatonuga e se na ‵mafa foki mō tatou.”—1 Ioane 5:3.

18, 19. (a) Ne a nisi fakatonuga a Ieova? (Ke onoono ki te pokisi “ ‵Kalo Keatea Mai Mea Kolā e Takalialia ki ei a Ieova.”) (e) E iloa pefea ne tatou me e se fakatonu mai te Atua ke fai ne tatou a mea kolā e se mafai ne tatou o fai?

¹⁸ Ne a fakatonuga a Ieova? E aofia i ei a nisi amioga kolā e ‵tau o ‵teke atu tatou ki ei. E pelā mo te pokisi telā e fakaulutala penei, “ ‵Kalo Keatea Mai Mea Kolā e Takalialia ki ei a Ieova.” Ka maua atu ei ne koe i konā a te fakasologa o amioga kolā e taku fakamasei ne te Tusi Tapu. I te taimi e kilo muamua atu ei koe ki ei, e mafai o foliga mai me e se ma‵sei a nisi amioga kolā e aofia i te fakasologa tenā. Kae kafai ko oti ne faitau kae mafaufau ‵loto koe ki tusi siki i olotou tafa, kāti ka mafai o maina koe me e ‵tonu ‵ki a tulafono a Ieova. A te faiga o ‵fuliga i au amioga kāti ko te ‵toe tofotofoga faigata eiloa ki a koe. Kae ko te ola i se vaegā olaga telā e fiafia ki ei te Atua e maua ne koe i ei te lotomalie mo te fiafia lasi. (Isaia 48:17, 18) Kae e mafai eiloa o ola koe i te vaegā olaga tenā. E iloa pefea ne tatou te mea tenā?

¹⁹ E seki fakatonu mai aka eiloa a Ieova ke fai ne tatou a mea kolā e se mafai ne tatou o fai. (Faitau te Teutelonome 30:11-14) E sili atu tena malamalama i lō tatou e uiga ki mea kolā e mafai ne tatou o fai mo mea kolā e se mafai ne tatou o fai. (Salamo 103:14) E mafai foki o tuku mai ne Ieova te malosi ke faka‵logo tatou ki a ia. Ne tusi mai te apositolo ko Paulo, penei: “Me i te Atua e tausi tena folafolaga, kae se mafai foki o talia ne ia ke fakaosoosogina koutou ke sili atu i te otou malosi o ‵teke te fakaosoosoga; kae i te taimi e fakaosoosogina ei koutou, ka tuku atu ne ia a te malosi  e kufaki ei ne koutou, kae fai foki ne ia se ala e ‵sao ei koutou.” (1 Kolinito 10:13) E mafai eiloa o tuku atu ne Ieova te “‵mana” ke fesoasoani atu ei ki a koe ke kufaki. (2 Kolinito 4:7) I te otiga ne kufaki ne ia a tofotofoga e uke, ne mafai ei o fai mai a Paulo, penei: “E mafai ne au o fai a mea katoa konā, ona ko te fakamalosi mai o Keliso ki a au.”—Filipi 4:13.

20. Ne a uiga fakaatua kolā e ‵tau o fakamalosi aka ne koe, kae kaia e tāua ei a uiga konei?

²⁰ E tonu, e uke atu a mea e aofia i te fakafiafia atu ki a Ieova i  lō te ‵teke atu fua ki mea kolā e takalialia a ia ki ei. E ‵tau foki o fiafia koe ki mea kolā e fiafia a ia ki ei. (Loma 12:9) E fia fakamasani atu koe ki tino kolā e ‵pau otou faka‵tauga, mea kolā e fia‵fia koutou ki ei mo otou amioga, i ne? E penā foki a Ieova. Tela la, taumafai ke fiafia koe ki mea kolā e fakatāua ne Ieova. E fakamatala mai a nisi mea konei i te Faitau te Salamo 15:1-5, telā e fakaasi mai i ei a vaegā tino kolā e manako te Atua ke fai mo fai ana taugasoa. E fakaasi atu ne taugasoa o Ieova a te mea telā e taku ne te Tusi Tapu ki ‘fuataga o te agaga.’ E aofia i ei a uiga pelā mo “te alofa, te fiafia, te filemu, te kufaki, te mataalofa, te ‵lei, te fakamaoni, te loto malalo, mo te loto pulea.”—Kalatia 5:22, 23.

21. Ne a mea ka fesoasoani atu ki a koe ke fakamalosi aka ei a uiga fakaatua?

 ²¹ A te faitau mo te sukesuke faeloa ki te Tusi Tapu ka fesoasoani atu ke fakamalosi aka ei ne koe a uiga fakaatua konei. Kae kafai ko iloa ne koe a mea kolā e manako te Atua ke fai ne koe, ka fesoasoani atu ei ke ‵fuli ou mafaufauga ke ‵pau mo mafaufauga o te Atua. (Isaia 30:20, 21) Kafai e fakamalosi aka ne koe tou alofa ki a Ieova, ka momea aka foki ei tou fia ola i se vaegā olaga telā e fiafia ki ei te Atua.

22. Ne a mea ka fakataunu ne koe māfai e ola koe i se vaegā olaga telā e fiafia ki ei te Atua?

²² E ‵tau o taumafai malosi koe ko te mea ke ola koe i se vaegā olaga telā e fiafia ki ei a Ieova. E faka‵pau ne te Tusi Tapu a te ‵fuliga o tou olaga ki te tapalega o uiga mua e pelā mo te tapalega keatea o se gatu kae pei ki uiga fou e pelā me ne gatu ‵fou. (Kolose 3:9, 10) Ne tusi mai te faisalamo e uiga ki fakatonuga a Ieova, penei: “E maua ne au te taui ‵lei i a au ne tausi ki ei.” (Salamo 19:11) Ka mafai foki o iloa ne koe me i te ola i se vaegā olaga telā e fiafia ki ei te Atua, ka lasi ‵ki eiloa te taui e maua mai i ei. Mai te fai penā, ka tuku atu ne koe i ei se tali ki pati fakaitaita a Satani kae fai foki i ei ne koe te loto o Ieova ke fiafia!