1, 2. Azovy aby olo nanjary kamaradiny Jehovah?

OLO karakory ma tianao hatao kamarady? Mety ho olo mitovy hevitry aminao, olo tia raha tianao ndreky man̈aja raha hajainao. Mety ho tianao koa olo araiky tsara toetry, mivolan̈a ndreky man̈ano ny marin̈y ndreky tsara fan̈ahy.

² Jehovah nifidy olo sasany ataony kamarady. Ohatra, ­Jehovah nivolan̈a fa Abrahama kamaradinany. ( Vakia Isaia 41:8; Jakoba 2:23.) Nivolan̈a koa izy fa Davida ‘lelahy ­tiany fonany’, fotony tiany toetrinany. (Asan’ny Apostoly 13:22) “Ten̈a tian̈a” koa ivolan̈any paminan̈y Daniela.—Daniela 9:23.

3. Nan̈ino olo sasany nataony Jehovah kamarady?

³ Ino nahavy Abrahama ndreky Davida ndreky Daniela nanjary kamaradiny Jehovah? Karaha ty nivolan̈iny taminy Abrahama: “Anao nan̈eky volan̈anaka.” (Genesisy 22:18) Ke olo manetry ten̈a ndreky man̈eky raha koraniny fo ataony Jehovah kamarady. Ty volan̈anany tamindro Israelita aby io: “Tandrin̈esa feonaka, baka Zaho hanjary Zan̈aharinaro,  anaro hanjary olonaka.” (Jeremia 7:23) Anao koa hanjary kamaradiny Jehovah, izikoa anao man̈araka volan̈anany!

4, 5. Karakory ataony Jehovah man̈ampy olonany?

⁴ Mba diniha hely hatsaran̈a ho azonao, izikoa anao loso kamaradiny Zan̈ahary. Baiboly mivolan̈a fa Zan̈ahary mitady fomba ‘han̈aboahany angovonany hamonjian̈a olo tsy miala aminany amy fo jiaby.’ (2 Tantara 16:9) Karakory ataony Jehovah mampiasa angovonany han̈ampian̈a anao? Amy Salamo 32:8 mivolan̈a: “Zaho [Jehovah] han̈ano raha hahavy anao hahadiniky raha, baka io hambarako anao lalan̈a tokony himboanao. Zaho han̈ambara anao hevitry, baka io masonaka hitsinjo anao.”

⁵ Mamparavoravo raha ataony Jehovah zen̈y! Izy han̈amia torohevitry ndreky hiaro anao, izikoa anao man̈eky raha volan̈iny. Tiany han̈ampy anao hiaritry raha ratsy mahazo anao, na raha mila hampivadiky anao. ( Vakia Salamo 55:22.) Ke anao koa manompo Jehovah amy fo jiaby, anao hatoky karaha ataony panoratra Salamo nivolan̈a karaha ty: “Nataoko talohako tio fo Jehovah. Zaho tsy mety hangozohozo, fotony izy ankavanan̈anaka.” (Salamo 16:8; 63:8) Jehovah ten̈a mahavita man̈ampy anao han̈ano raha mamparavoravo izy. Fa aleva onon̈o fa misy fahavalonany meloko mahita anao man̈ano zen̈y.

6. Ino raha nivolan̈iny Satana momba olombelon̈o?

⁶ Nazavain̈y tamy Toko faha-11 tamy boky ty raha nataony Satana Devoly, koa fa nanohitry zony Jehovah hitondra. Izy nivolan̈a fa Zan̈ahary pavandy, tsy man̈ano raha marin̈y, fotony ry Adama zen̈y tsy nimboany hanapakevitry amy raha tsara ndreky ratsy. Iro fivadiany koa fa nanota ke nahainaro taranakandro, nivolan̈a koa Satana fa tsisy olo ten̈a tia Zan̈ahary zen̈y. Karaha ty raha tiany hambara: ‘Tsy  fitiavan̈a anompoanolo Zan̈ahary. Ambilà baka zaho hitsapa iro, zahako iro tsy hiala aminao zen̈y!’ Tantarany Joba amy Baiboly ao ahitan̈a tsarabe fa zen̈y ankitin̈y raha tan̈atiny jeriny Satana. Azovy ma Joba io? Karakory nataony Satana nankaratsy izy?

7, 8. a) Ino ma tsy nampiran̈a Joba taminolo tanàna araiky taminany? b) Izikoa volan̈a Satana zahan̈a, ino nahavy Joba nanompo Zan̈ahary?

⁷ Joba io lelahy tsara toetry niain̈y kadiriny 3 600 taon̈o loso zay. Jehovah nivolan̈a: ‘Tsisy olo karaha izy tambony tany. Izy lelahy tsisy tsin̈y, marin̈y ndreky matahotro Zan̈ahary, baka io fady izy man̈ano ratsy.’ (Joba 1:8) Joba nan̈ano raha namparavoravo Zan̈ahary fo.

⁸ Nivolan̈a Satana fa tsy fitiavan̈a nanompoany Joba Zan̈ahary. Izy nivolan̈a karaha ty tamy Jehovah: “Tsy anao ma niaro izy ndreky tran̈onany ndreky harian̈anany jiaby? Anao nitahy asany tan̈anany, ke tany jiaby feno biby tariminy. Ampara baka tan̈anao, azafady, adosoa aminany raha jiaby anan̈any, zahako izy tsy han̈ozon̈o anao zen̈y.”—Joba 1:10, 11.

9. Satana koa fa nankaratsy Joba, karakory nataony Jehovah? Nan̈ino izy nan̈ano zen̈y?

⁹ Raha tiany Satana volan̈iny amy zen̈y, matoa Joba manompo Jehovah, ao raha tadiaviny. Ke izy nivolan̈a fa Joba io koa tojy raha manahiran̈a, hivadiky amy Zan̈ahary edy. Ino amy zay raha nataony Jehovah? Nambelany Satana hitsapa jery Joba baka ho hita fa Joba io ten̈a tia Izy ankitin̈y.

10. a) Ino aby fitsapan̈a nahazo Joba? b) Nan̈ano karakory izy tamy zen̈y?

¹⁰ Maro raha nitsapany Satana jeriny Joba. Biby nitariminy nangalarinolo, sasany nivonenolo. ­Ankamarozany piasanany koa nivonenolo. Joba nanjary sahiran̈a mare. Tsy vitanizen̈y fo fa mbala naty koa zanany folo. Tan̈atiny raha ratsy jiaby nahazo Joba zen̈y, ‘izy tsy nanota sady tsy nan̈amia tsin̈y Zan̈ahary foeky.’—Joba 1:22.

11. a) Ino koa raha nivolan̈iny Satana momba Joba? Karakory nataony Jehovah? b) Karakory nataony Joba, ndray izy narary mare?

 ¹¹ Satana tsy nan̈eky resy. Izy mety nieritreritry fa mbala din̈iny Joba fo izy nanjary tsy nanandraha, naty zanaka ndreky naty piasa in̈y. Fa izikoa izy marary, izy hiala Zan̈ahary edy. Ke nambelany Jehovah amy zay Satana hamparary Joba mare. Joba mbala natoky Zan̈ahary fo. Tamy fonany jiaby, izy ­nivolan̈a karaha ty: “Zaho tsy han̈eky hivadiky zen̈y foeky, nata zaho afaka fahin̈ana.”—Joba 27:5.

12. Karakory nahitan̈a fa vandy fo volan̈a Satana momba Joba?

¹² Joba tsy nahay fa baka amy Satana raha jiaby nahazo izy in̈y. Joba nieritreritry fa Zan̈ahary fo nahavy izy navoa raha zen̈y, fotony tsy hainy fa Devoly io nanohitry zony Jehovah hitondra. (Joba 6:4; 16:11-14) Fa izy tsy nivadiky tamy Jehovah. Hita baka tamy raha nataony Joba fa tsy fitiavanten̈a nahavy izy nanompo Jehovah, fa ten̈a fitiavany Jehovah ankitin̈y. Hita koa fa Satana mavandy!

13. Nataony Jehovah karakory Joba, koa fa tsy nivadiky taminany?

¹³ Vitany Jehovah tsarabe namaly volan̈a Satana in̈y, fotony efa hita fa Joba ten̈a tia izy ankitin̈y. Joba ten̈a kamaradiny Jehovah, ke Jehovah nitahy izy.—Joba 42:12-17.

14, 15. Ino mahavy atsika mivolan̈a fa tsy Joba zaraiky fo nankaratsiny Satana fa olo jiaby koa?

¹⁴ Tsy Joba zaraiky fo nivolan̈iny Satana fa hivadiky amy Zan̈ahary, fa ndray anao koa. Ahaizantsika zen̈y volan̈a Jehovah aminy Ohabolana 27:11 ty: “Misia jery zanako, ataova raha mamparavoravo fonaka, baka zaho ­hamaly ­araiky mankaratsy zaho io.” Efa taon̈o maro tafarany ­nifatesany Joba nanoratan̈a volan̈a io. Ke hita baka amy zen̈y fa Satana mbala mankaratsy Zan̈ahary ndreky olo manompo izy fo. Izikoa atsika mifen̈y fo hanan̈a fomba fiain̈ana mamparavoravo Jehovah, atsika tsy vitany nan̈ano raha tiany Jehovah fo fa ho tatra koa vandiny  Satana. Marin̈y ndraiky fa mety ho hisy fan̈ovoan̈a tsy maintsy ataonao, kanefa tsy ravoravo anao izikoa mahavita man̈aboaka fa diso volan̈a Satana?

¹⁵ Aleva onon̈o koa volan̈a Satana ty: “Zay raha anan̈anolo hamiany hiarovan̈a ain̈inany.” (Joba 2:4) Hitantsika amy zen̈y fa tsy Joba zaraiky fo nankaratsiny fa olo jiaby koa. Maventy hevitry zen̈y! Nivolan̈a Satana fa anao koa hivadiky amy Zan̈ahary. Anao tsy tiany han̈araka volan̈a Zan̈ahary ndreky han̈araka raha marin̈y nianaranao, izikoa tojy raha manahiran̈a. Ino raha mety hataony Satana?

16. a) Ino aby raha ataony Satana, baka olo hiala amy Zan̈ahary? b) Karakory mety han̈anovany zen̈y, hamangoan̈a anao?

¹⁶ Hitantsika tamy Toko faha-10 fa maro raha ataony Satana, baka olo tsy hanompo Zan̈ahary. Voanalohany, izy mety hanafiky “karaha ataony lion mitreron̈o, mitady olo vonen̈a in̈y.” (1 Petera 5:8) Dikanizen̈y, Satana mety handrisiky naman̈a, havan̈a ndreky olo hafa hisakana anao hianatra Baiboly ndreky han̈araka raha nianaranao. * (Jaona 15:19, 20) Faharoe, izy koa “man̈ano karaha anjeliny mazava.” (2 Korintianina 11:14) Satana fetsy, ke izy mety hamitaka anao, baka anao tsy han̈ano raha mamparavoravo Jehovah. Mety hataony koa raha hampalemy troko anao, baka anao hieritreritry fa tsy ho vitanao eky han̈ano raha mamparavoravo Jehovah. (Ohabolana 24:10) Ke Satana ndray karaha “lion mitreron̈o”, na karaha “anjeliny mazava”, tsy miova raha tiany koran̈iny: Anao tsy hanompo Jehovah eky, izikoa fa tojy raha manahiran̈a na raha mitsapa jery. Karakory hangalanao tahaka raha nataony Joba, baka ho hita tsarabe fa diso ankitin̈y Satana?

17. Nan̈ino ma atsika man̈araka didiny Jehovah?

¹⁷ Baka amy fan̈anovanao raha mamparavoravo Zan̈ahary ahitan̈a fa diso volan̈a Satana in̈y. Ino ma dikanizen̈y? Baiboly mivolan̈a karaha ty: “Tiava Jehovah Zan̈aharinao amy fonao jiaby ndreky ain̈inao jiaby ndreky angovonao jiaby.” (Deoteronomia 6:5) Arakaraka ny itiavanao Jehovah, itiavanao man̈araka volan̈anany. Karaha ty nambarany Apostoly Jaona: “Dikany tia Zan̈ahary zen̈y mitandrin̈y didinany.” Izikoa anao tia Zan̈ahary amy fonao jiaby, ho hitanao fa tsy mavesatra ankitin̈y didinany.—1 Jaona 5:3.

18, 19. a) Ino aby sasany amy didiny Jehovah? (Zahava efajoro,  “AZA ATAO RAHA HALANY JEHOVAH”) b) Nan̈ino atsika mivolan̈a fa Zan̈ahary tsy mitaky raha tsy ho vitantsika?

¹⁸ Ino aby ma didiny Jehovah io? Sasany amy didy aby io man̈ambara raha tsy tokony hatao. Zahava efajoro “ Aza Atao Raha Halany Jehovah”. Koran̈iny ao raha halany Jehovah. Mety tsy ho ratsy fahitanao sasany amy raha aby io. Anao koa mangala onon̈o tsarabe toko ndreky andininy voasoratra ao, anao han̈eky marin̈y fa tsara man̈araka lalàn̈any Jehovah. Mety tsy ho mora aminao hiala raha efa nahazatra anao! Ten̈a ho afapo ndreky ho sambatra anao, izikoa man̈ano raha mamparavoravo Zan̈ahary. (Isaia 48:17, 18) Matokisa fa ho vitanao man̈ano zen̈y. Ino mahavy atsika mivolan̈a zen̈y?

¹⁹ Jehovah tsy mitaky raha tsy ho vitantsika. ( Vakia Deoteronomia 30:11-14.) Izy ten̈a mahay atsika. Hainy tsarabe raha mety ho vitantsika ndreky tsy ho vitantsika. (Salamo 103:14) Jehovah koa mahavita man̈amia atsika angovo, baka atsika hahavita han̈araka volan̈anany. Apostoly Paoly nivolan̈a: “Zan̈ahary tsy mivadiky amy raha efa nivolan̈iny, ke izy tsy mety han̈ambela anaro hitsapain̈y mandilatra raha tondranaro, fa izikoa fa misy fitsapan̈a, mbala hasiany lalan̈a koa hiboahanaro, baka anaro mahatondra  izy.” (1 Korintianina 10:13) Izy mahavita man̈amia anao “angovo fan̈ampiny”, baka anao mahavita miaritry. (2 Korintianina 4:7) Paoly koa fa baka niaritry raha maro, karaha ty nambarany: “Baka aminy araiky man̈amia angovo zaho in̈y mahavy zaho manan̈a angovo hindesin̈y hiatriky karazandraha jiaby.”—Filipianina 4:13.

20. Ino aby toetry tokony hanan̈anao? Nan̈ino anao mila mifen̈y hanan̈a toetry aby io?

²⁰ Efa tsara izikoa anao efa tsy man̈ano raha halany Jehovah.  Izikoa tianao fo hamparavoravo izy, anao koa mila tia raha tiany. (Romanina 12:9) Olo tia raha tianao, mira hevitry aminao ndreky man̈aja raha hajainao fo tianao atao kamarady, sa karakory? Karaha zen̈y koa Jehovah. Ke mianara ho tia raha tiany. Ho hitanao amy Salamo 15 sasany amy zen̈y. ( Vakia Salamo 15:1-5.) Koran̈iny ao toetrinolo tiany Zan̈ahary hatao ­kamarady. “Vokatrany fan̈ahy” ikahiany Baiboly izio. An̈isanizen̈y “fitiavan̈a, haravoan̈a, fiadan̈ana, maharidraha, hatsarampan̈ahy, man̈ano ny tsara, finoan̈a, malemy toetry, mahafehy ten̈a.”—Galatianina 5:22, 23.

21. Ino raha tokony hataonao, izikoa tianao hanan̈a toetry tiany Zan̈ahary?

 ²¹ Izikoa tianao hanan̈a toetry aby io, anao mila mamaky Baiboly ndreky mianatra izio isanandra. Anao hanjary hitovy hevitry amy Zan̈ahary, izikoa mianatra raha takiny. (Isaia 30:20, 21) Arakaraka ny itiavanao izy han̈anovanao raha mamparavoravo izy.

22. Ino raha ho hita tsarabe, izikoa anao mifen̈y man̈ano raha mamparavoravo Zan̈ahary?

²² Tsy mora man̈ano raha mamparavoravo Jehovah zen̈y, ke atsika mila mifen̈y mare. Volan̈iny Baiboly fa miala amy raha halany Jehovah io mira man̈adoso toetry taloha, baka io misikin̈y toetry vaovao. (Kolosianina 3:9, 10) Ndray izy man̈ano zen̈y, panoratra salamo nivolan̈a karaha ty: “Be ankitin̈y rady azonolo mitandrin̈y izy.” (Salamo 19:11) Ho hitanao raha zen̈y, izikoa anao mifen̈y man̈ano raha mamparavoravo Zan̈ahary. Ho hita amy raha ataonao fa diso volan̈a Satana, ke Jehovah ho ravoravo aminao!