1. ¿Majqui tsiʼ mele tiʼ pejtelel jiñi cuxul tac bʌ?

«LAC Yum [Jehová] jiñʌch Dios jiñi isujm bʌ, jiñi cuxul bʌ mach bʌ yujilic chʌmel ti pejtelel ora», cheʼ tsiʼ yʌlʌ jiñi xʼaltʼan Jeremías (Jeremías 10:10). Cheʼ jaʼel, jiñʌch tsaʼ bʌ i Mele tiʼ pejtelel chuqui tac cuxul. Cheʼ tsiʼ yʌlʌyob jiñi lamital ángelob yaʼ bʌ añob ti panchan: «Jatet tsaʼ mele pejtelel chuqui tac an. Ti pejtelel tsaʼ mejli chaʼan cheʼʌch a wom» (Apocalipsis [Revelación] 4:11). Cheʼ jaʼel, cheʼ bʌ Pablo tiʼ tsʼijbube majlel jiñi Timoteo, tsiʼ yʌlʌ: «Dios muʼ bʌ i yʌqʼuen i cuxtʌlel pejtelel chuqui an» (1 Timoteo 6:13). Jin chaʼan, jiñi laj cuxtʌlel jiñʌch lac majtan tilem bʌ ti Dios.

2. ¿Chuqui miʼ chʌn aqʼueñonla Dios chaʼan chʌn cuxul mi la cajñel?

² Jehová muʼto i chʌn aqʼueñonla laj cuxtʌlel (Hechos 17:28). Jiñʌch miʼ yʌqʼueñonla i bʌl lac ñʌcʼ, jiñi jaʼ, jiñi icʼ, jiñi lum baʼ chumulonla (pejcan Hechos 14:15-17). Jehová miʼ yʌqʼueñonla tiʼ pejtelel jiñi, chaʼan wen utsʼat miʼ yajñel jiñi laj cuxtʌlel. Pero chaʼan mi lac wen qʼuel ti utsʼat jiñi laj cuxtʌlel, yom mi laj cʌmben i mandar yicʼot yom mi lac jacʼben (Isaías 48:17, 18).

3. ¿Bajcheʼ yilal tsiʼ qʼuele Dios cheʼ tiʼ tsʌnsayob Abel?

³ Dios yom chaʼan mi laj qʼuel ti ñuc laj cuxtʌlel i chaʼan yambʌ lac piʼʌlob. Laʼ laj qʼuel jumpʼejl ejemplo. Jiñi Caín, i yalobil Adán yicʼot Eva, tsaʼ wen michʼa i qʼuel i yijtsʼin i cʼabaʼ Abel. Jehová tsiʼ wʌn sube Caín chaʼan tiʼ caj i michʼajel, tajol miʼ mejlel ti yajlel ti tsʌts bʌ mulil, pero maʼañic tiʼ chʼujbibe i tʼan Jehová. «Caín tsaʼ tejchi i contrajin i yijtsʼin. Tsiʼ tsʌnsa.» (Génesis 4:3-8.) Jiñi muʼ bʌ i yʌjlel ti Biblia miʼ pʌs chaʼan Jehová tsiʼ yʌqʼue i toj i mul Caín chaʼan tiʼ caj tiʼ chaʼle tsʌnsa (Génesis 4:9-11).

4. ¿Bajcheʼ tsiʼ pʌsʌ Dios yaʼ tiʼ Mandar Moisés chaʼan bajcheʼ yom mi laj qʼuel jiñi cuxtʌlel?

⁴ Cheʼ bʌ añix ñumen cabʌl mil jab, Jehová tsiʼ yʌqʼue mandar tac jiñi israelob chaʼan miʼ chʼujutesañob cheʼ bajcheʼ yom. Jehová tsiʼ cʼʌñʌ jiñi xʼaltʼan Moisés chaʼan miʼ yʌcʼ jiñi mandar, tiʼ pejtelel jiñi mandar tac tsaʼ cʌjñi bajcheʼ i Mandar Moisés. Junchajp ticʼojel muʼ bʌ i yʌl yaʼ tiʼ Mandar Moisés jiñʌch: «Mach a chaʼlen tsʌnsa» (Deuteronomio 5:17). Cheʼ ti ajqʼui ili ticʼojel tiʼ tojlel jiñi israelob, tsiʼ pʌsʌ Dios chaʼan mucʼʌch i qʼuel ti ñuc jiñi cuxtʌlel i chaʼan tiʼ pejtelel wiñicob xʼixicob (quixtañujob) yom miʼ qʼuelob tiʼ ñuc i cuxtʌlel i piʼʌlob jaʼel.

5. ¿Bajcheʼ yilal yom mi laj qʼuel cheʼ miʼ yʌlo chocob jiñi alʌl cʌntʌbilto bʌ tiʼ ñʌcʼ i ñaʼ?

⁵ ¿Bajcheʼ yilal miʼ qʼuel Dios jiñi alʌl cʌntʌbilto bʌ tiʼ ñʌcʼ i ñaʼ? Jiñi i Mandar Moisés tsiʼ yʌlʌ: «Mi an wiñicob woliyoʼ bʌ ti jatsʼ i miʼ tajob i jatsʼ juntiquil xʼixic cʌntʌbil bʌ i chaʼan i yalobil, mi tsiʼ choco i yal, pero maʼañic miʼ chʌmel jiñi alʌl o jiñi xʼixic, jiñi tsaʼ bʌ i chaʼle jatsʼ, yom miʼ ñumel i toj i mul ti juez cheʼ bajcheʼ cʼamel miʼ cʼajtin i ñoxiʼal jiñi xʼixic. Pero mi jiñi alʌl o jiñi xʼixic miʼ chʌmel, wersa yom miʼ yʌcʼ i cuxtʌlel jiñi tsaʼ bʌ i chaʼle jatsʼ» (Éxodo 21:22, 23, TNM). Cheʼ bajcheʼ tsiʼ yʌlʌ i mandar Moisés, mach weñic cheʼ miʼ tsʌnsañob jiñi alʌl anto bʌ tiʼ malil i ñʌcʼ i ñaʼ. Jehová miʼ qʼuel ti ñuc i cuxtʌlel jiñi alʌl (pejcan Salmo 127:3). Jin chaʼan,  mach wis weñic cheʼ miʼ yʌlo chocob jiñi alʌl cʌntʌbilto bʌ tiʼ ñʌcʼ i ñaʼ.

6. ¿Chucoch mach weñic cheʼ mi lac tsʼaʼlen yambʌ quixtañujob?

⁶ Chaʼan mi laj qʼuel ti ñuc jiñi cuxtʌlel, yom mi lac pʌs wem bʌ lac melbal tiʼ tojlel lac piʼʌlob. Jiñi Biblia mi yʌl: «Majchical jach miʼ tsʼaʼlen i piʼʌlob ajtsʌnsajʌch cheʼ jiñi. La cujilʌch isujm jiñi ajtsʌnsa machʼan i cuxtyʌlel machʼʌ yujil jilel» (1 Juan 3:15, Jini wen bʌ tʼan). Mi com la chumtʌl tiʼ pejtelel ora, yom mi lac locʼ ti lac pusicʼal jiñi tsʼaʼleya am bʌ lac chaʼan tiʼ tojlel yambʌ quixtañu come jiñi tsʼaʼleya miʼ chʼʌm tilel tiʼ pejtelel jontolil tac (1 Juan 3:11, 12). Ñuc i cʼʌjñibal cheʼ mi laj cʌn laj cʼuxbin lac bʌ ti jujuntiquilonla.

7. ¿Baqui bʌ vicio tac miʼ yʌcʼ ti ñaʼtʌntel chaʼan juntiquil maʼañic miʼ qʼuel ti ñuc i cuxtʌlel?

⁷ ¿Chucoch yom mi laj qʼuel ti ñuc laj cuxtʌlel? Maʼañic majqui yom bʌ chʌmel, an cabʌl wiñicob xʼixicob muʼ bʌ i yʌqʼueñob i yilan wocol i cuxtʌlel chaʼan jach toʼo yomob. Cheʼ bajcheʼ jiñi muʼ bʌ i ñucʼob cʼujts, jiñi marihuana o muʼ bʌ i cʼʌñob yan tac bʌ droga. Ili droga tac miʼ cʼamʼesañonla yicʼot miʼ mejlel i tsʌnsañonla. Jiñi quixtañu cheʼ bʌ miʼ melob bajcheʼ jiñi woli (choncol) i pʌsob chaʼan maʼañic miʼ qʼuelob ti ñuc i cuxtʌlel. Ili mach utsʼatic miʼ qʼuel Dios (pejcan Romanos 6:19; 12:1; 2 Corintios 7:1). Chaʼan miʼ mejlel lac melben i yeʼtel Dios, yom mi laj cʌy lac mel jiñi tsaʼix bʌ la cʌlʌ. Tajol wocol ti cʌyol mi caj la cubin, pero Jehová miʼ mejlel i coltañonla. Miʼ wen qʼuel ti ñuc cheʼ mucʼʌch lac chaʼlen wersa laj qʼuel laj cuxtʌlel bajcheʼ jumpʼejl ñuc bʌ majtañʌl tsaʼ bʌ i yʌqʼueyonla.

8. ¿Chucoch yom mi laj qʼuel ti wen jiñi i pam la cotot yicʼot jiñi laj carro?

⁸ Mi mucʼʌch laj qʼuel ti ñuc laj cuxtʌlel, mi caj laj cʌntan lac bʌ chaʼan maʼañic chuqui mi lac chaʼlen. Maʼañic mi caj lac mel muʼ bʌ mejlel i yʌqʼueñonla lac sʌt laj cuxtʌlel. Yom wen tsajilonla cheʼ mi caj lac ñijcan jiñi carro, maʼañic mi caj lac chaʼlen alas baqui miʼ mejlel lac low lac bʌ o lac sʌt laj  cuxtʌlel, cheʼ bajcheʼ jiñi lucha libre o yan tac bʌ alas (Salmo 11:5). Junchajp jiñi Mandar tsaʼ bʌ i yʌqʼue Jehová jiñi israelob ti wajali mi yʌl: «Cheʼ maʼ mel tsijiʼ bʌ a wotot, yom maʼ joy tsʼajquiben i jol yaʼ baʼ mi laʼ letsel ame yajlic juntiquil, ame añic a mul cheʼ jiñi» (Deuteronomio 22:8). Jiñi mandar añʌch jumpʼejl principio muʼ bʌ i subeñet chuqui yom maʼ mel. Jumpʼejl ejemplo jiñʌch cheʼ yom maʼ wen qʼuel yaʼ tiʼ pam a wotot mi maʼañic chuqui an muʼ bʌ mejlel i yʌcʼ ti yajlel o i low juntiquil quixtañu. Mi an a carro, yom maʼ wen qʼuel mi maʼañic chuqui jejmen (asiyem) i chaʼan. Yom maʼ qʼuel ti wen jiñi a wotot o carro chaʼan maʼañic maʼ lojwel o maʼ low yambʌ a piʼʌlob.

9. Mi mucʼʌch laj qʼuel ti ñuc laj cuxtʌlel, ¿bajcheʼ yilal mi caj laj qʼuel jiñi añimal tac?

⁹ ¿Bajcheʼ yilal miʼ qʼuel Dios i cuxtʌlel jiñi añimal tac? Chʼujulʌch miʼ qʼuel jaʼel. Jehová miʼ yʌcʼ ti tsʌnsʌntel jiñi añimal tac chaʼan jach miʼ cʼuxtʌl, chaʼan miʼ mejlel pisil o chaʼan maʼañic miʼ ticʼlan quixtañu (Génesis 3:21; 9:3; Éxodo 21:28). Jiñi yʌlo jach bʌ miʼ low o miʼ tsʌnsan añimal tac woli (yʌquel) i pʌs chaʼan maʼañic miʼ qʼuelben ti ñuc i cuxtʌlel (Proverbios 12:10).

10. ¿Bajcheʼ tsiʼ pʌsʌ Dios chaʼan jiñi cuxtʌlel lʌcʼʌ lajal bajcheʼ jiñi chʼichʼ?

¹⁰ Cheʼ bʌ Caín tiʼ tsʌnsa Abel, Jehová tsiʼ sube: «I chʼichʼel a wijtsʼin tsaʼ bʌ a tsʌnsa woliʼ cʼajtibeñon yubil chaʼan mij qʼuextʌbeñet a mul» (Génesis 4:10). Cheʼ bʌ tsiʼ taja ti tʼan Dios i chʼichʼel Abel, tsiʼ taja ti tʼan i cuxtʌlel jaʼel. Come Caín tiʼ tsʌnsa i yijtsʼin i tsaʼ aqʼuenti i toj i mul. Lajalʌch cheʼ bajcheʼ i chʼichʼel o i cuxtʌlel Abel woliʼ cʼajtiben Jehová chaʼan miʼ yʌqʼuen i toj i mul Caín. Cheʼ bʌ tsaʼix ñumi jiñi ñuc bʌ Butʼjaʼ cheʼ tiʼ yorajlel Noé, tsaʼ chaʼ caji ti qʼuejlel ti ñuc jiñi cuxtʌlel yicʼot jiñi chʼichʼ. Cheʼ bʌ maxto ñumen jiñi ñuc bʌ Butʼjaʼ, jiñi quixtañujob cojach tsiʼ cʼuxuyob wut teʼ tac yicʼot pimel. Pero ti wiʼil tsaʼ qʼuextʌyi. Jehová tsiʼ sube Noé yicʼot i yalobilob: «I  bʌlʌch laʼ ñʌcʼ pejtel cuxul tac bʌ muʼ bʌ ti xʌmbal». Pero Dios tsiʼ yʌcʼʌ yambʌ ticʼojel: «Mach laʼ cʼux yicʼot i chʼichʼel come ticʼbil. Jiñʌch i cuxtʌlel» (Génesis 1:29; 9:3, 4). Wen tsiquil chaʼan Jehová miʼ qʼuel ti ñuc jiñi cuxtʌlel lʌcʼʌ lajal bʌ bajcheʼ jiñi chʼichʼ.

11. Cheʼ bʌ tiʼ yorajlel Noé cʼʌlʌl wʌle ora, ¿chuqui an ticʼbil i chaʼan Dios chaʼan bʌ jiñi chʼichʼ?

¹¹ Junchajp bajcheʼ mi lac pʌs chaʼan mucʼʌch laj qʼuel ti ñuc jiñi chʼichʼ jiñʌch cheʼ maʼañic mi laj cʼux. Jiñi i Mandar Jehová tsaʼ bʌ i yʌqʼue jiñi israelob, tsiʼ yʌlʌ: «Cheʼ an bʌteʼel mi teʼlemut muʼ bʌ i chucob [...] wersa mi caj i becbeñob i chʼichʼel ti lum cheʼ miʼ tsʌnsañob. Come [...] tsac subeyob jiñi israelob mach mejlic i wis cʼuxob jiñi chʼichʼ [...]» (Levítico 17:13, 14). Anquese ili ticʼojel tsaʼ ñaxan aqʼuenti Noé, pero cheʼ bʌ tsaʼ ñumi 800 jab tsaʼ chaʼ aqʼuenti jiñi israelob come wen anto i cʼʌjñibal jiñi Mandar. Tsiquil chuqui ñaʼtʌbil i chaʼan Jehová: Jiñi i wiñicob miʼ mejlel i cʼuxbeñob i bʌcʼtal añimal tac, pero mach weñic cheʼ miʼ cʼuxbeñob i chʼichʼel. Yom miʼ becbeñob i chʼichʼel jiñi añimal ti lum, lajal bajcheʼ choncol i chaʼ sutqʼuibeñob i cuxtʌlel tiʼ tojlel Dios.

12. ¿Baqui bʌ jiñi mandar tsaʼ bʌ ajqʼui ti ñaxam bʌ siglo chaʼan jiñi chʼichʼ anto bʌ i cʼʌjñibal wʌle ora?

¹² Jiñi xñoptʼañonbʌla ili ora, aqʼuebilonla jaʼel jumpʼejl mandar lajal bʌ bajcheʼ tsaʼ bʌ aqʼuenti Noé. Ti ñaxam bʌ siglo, jiñi apóstolob yicʼot jiñi ancianojob jiñobʌch tsaʼ bʌ i ñaxan acʼʌyob i bʌ tiʼ tojlel jiñi xcʌntʼañob i chaʼan Jesús, chaʼan miʼ ñaʼtʌntel baqui bʌ mandar yom miʼ jacʼob jiñi xñoptʼañob. Jiñi tsaʼ bʌ cʼoti i ñaʼtañob, jiñʌch iliyi: «Jiñi Chʼujul bʌ i Chʼujlel [o i yespíritu] Dios tiʼ wen cotyʌyon lojon c pensalin. Cheʼ jiñi ti lojon c ñaʼtyʌ chaʼan mach yom mi lojon c lolon subeñetla cabʌl chʌ bʌ yom mi laʼ mel. Jin jach jiñi mandar muʼ bʌ yʌleʼ: Maʼ mi laʼ cʼuxe weʼel tsaʼ bʌ ajqʼui melel bʌ dios tac. Maʼ mi laʼ cʼuxeʼ chʼichʼ. Maʼ mi laʼ cʼuxeʼ yʌtsʼʌl bʌ añimal. Cʌñʌtyan laʼ bʌ chaʼan maʼan tʼan yicʼot yambʌ mach bʌ laʼ wijñamic mach bʌ laʼ ñoxiʼalic» (Hechos 15:28, 29, Jini wen  bʌ tʼan; 21:25). Jin chaʼan mach weñic cheʼ mi laj ‹cʼuxeʼ jiñi chʼichʼ›. Tiʼ wut Dios, wen ñuc i cʼʌjñibal cheʼ maʼañic mi lac mel jiñi, lajal bajcheʼ maʼañic mi lac chʼujutesan diosteʼ tac yicʼot cheʼ maʼañic mi lac mel tsʼiʼlel.

13. ¿Baqui bʌ lajiya miʼ pʌsbeñonla chaʼan cheʼ mi la cʌcʼ ti ochel chʼichʼ ti lac bʌcʼtal yaʼʌch ochem jaʼel ti jiñi mandar chaʼan mach yomic mi laj cʼux jiñi chʼichʼ?

¹³ Ti jiñi mandar woli bʌ laj qʼuel, ¿yaʼ ba ochem jaʼel chaʼan mach yomic cheʼ miʼ yochel chʼichʼ ti lac bʌcʼtal? Yaʼʌchi. Laʼ la cʌl jumpʼejl lajiya. Mi jiñi doctor miʼ subeñet chaʼan maʼañic maʼ jap lembal, ¿yom ba i yʌl chaʼan mach mejlic a jap pero mucʼʌch mejlel a wʌcʼ ti ochel ti a chijil? Mach cheʼiqui. Cheʼ lajal jaʼel, cheʼ bʌ jiñi Biblia mi yʌl chaʼan mach wis yomic cheʼ mi laj cʼux jiñi chʼichʼ, woliʼ taj ti tʼan jaʼel chaʼan mach wis yomic miʼ yochel ti lac bʌcʼtal. Mi com lac jacʼ jiñi mandar, mach yomic mi la cʌcʼ ti ochel chʼichʼ ti lac bʌcʼtal.

14, 15. Mi jiñi doctor miʼ subeñetob chaʼan yom miʼ yochel chʼichʼ ti a bʌcʼtal, ¿chuqui mi caj a mel yicʼot chucoch?

¹⁴ Pero ¿ixcu mi an juntiquil xñoptʼan wen lojwem bʌ o yom ti orajach miʼ pʼojʼel? Laʼ lac ñaʼtan chaʼan jiñi doctor miʼ subeñet chaʼan mi maʼañic mi a wotsʌbentel chʼichʼ, mi caj a chʌmel. La cujil chaʼan jiñi xñoptʼan mach yomic chʌmel. Come mach yomic i sʌt i cuxtʌlel tsaʼ bʌ aqʼuenti bajcheʼ jumpʼejl majtan tilem bʌ ti Dios, cojach mi caj i mejlel i chʼʌm yan tac bʌ tsʼac mach bʌ xʌcʼʌlic yicʼot chʼichʼ chaʼan maʼañic chuqui miʼ chaʼlen.

¹⁵ Mi juntiquil xñoptʼan miʼ yʌcʼ ti ochel chʼichʼ tiʼ bʌcʼtal, ¿woli ba i ñusan ti chan i Mandar Dios chaʼan jach yom to miʼ ñumen tamʼan i jabilel? Jesús tsiʼ yʌlʌ: «Majqui jach miʼ ñop i bajñel cʌntan i cuxtʌlel mi caj i sʌt i chʼujlel. Majqui jach miʼ yʌcʼ i cuxtʌlel chaʼañon maʼañic mi caj i sʌt i chʼujlel» (Lucas 17:33). Maʼañic juntiquil yom bʌ chʌmel. Pero mi chaʼan jach mach com la chʌmel mi lac ñusʌben i mandar Dios, mi caj lac sʌt laj cuxtʌlel mach bʌ añic miʼ jilel. Ñumen utsʼat bʌ miʼ mejlel lac mel jiñʌch mi lac jacʼ jiñi mandar tilem bʌ  ti Dios come lac wenlelʌch. La cujilix chaʼan mi tsaʼ chʌmiyonla, mi caj i chaʼ cʼajtesañonla jiñi tsaʼ bʌ i yʌqʼueyonla laj cuxtʌlel cheʼ baqui ora miʼ chaʼ tejchesañonla yicʼot miʼ chaʼ aqʼueñonla jiñi laj cuxtʌlel (Juan 5:28, 29; Hebreos 11:6).

16. ¿Chuqui maʼañic mi caj i melob jiñi i wiñicob Dios chaʼan jiñi chʼichʼ?

¹⁶ Jiñi xucʼul bʌ i wiñicob Dios maʼañic mi caj i ñusʌbeñob i mandar Dios tiʼ caj jiñi chʼichʼ. Jin chaʼan, maʼañic miʼ cʼuxob yicʼot maʼañic miʼ cʼʌñob bajcheʼ tsʼac chaʼan miʼ lajmel i cʼamʌjelob. * Jehová yujil chaʼan mi caj i tajob i wenlel jiñi xñoptʼañob cheʼ maʼañic miʼ cʼʌñob jiñi chʼichʼ come jiñʌch tsiʼ mele. ¿Muʼ baʼ ñop jatet jaʼel jiñi?

17. Ti wajali yaʼ ti Israel, ¿baqui tsiʼ yʌlʌ Dios chaʼan yaʼ jach yom miʼ cʼʌjñel jiñi chʼichʼ?

¹⁷ Jiñi i Mandar Moisés tsiʼ wen tsictesa baqui jach tsaʼ cʼʌjñi ti wajali jiñi chʼichʼ. Cheʼ bʌ Jehová tsiʼ yʌqʼue i mandar jiñi israelob chaʼan bajcheʼ yom miʼ chaʼleñob chʼujutesaya, tsiʼ yʌlʌ: «Come i chʼujlel muʼ bʌ i yʌqʼuen i cuxtʌlel jiñi alʌcʼʌl an tiʼ chʼichʼel. Tsaʼix cʌqʼueyet chaʼan maʼ tsijcan yaʼ ti pulʌntib chaʼan i ñusʌntel laʼ mul tiʼ qʼuexol i cuxtʌlel» (Levítico 17:11). Cheʼ bʌ jiñi israelob miʼ chaʼleñob mulil, cojach miʼ mejlel ti ñusʌbentelob i mul cheʼ bʌ miʼ yʌcʼob jiñi tsʌnsʌbil  bʌ añimal yicʼot miʼ chʼʌmbeñob majlel tsʼitaʼ i chʼichʼel yaʼ ti pulʌntib ti tabernáculo, ili tsaʼ cʌjñi ti wiʼil bajcheʼ i templo Dios. Cojach tsaʼ cʼʌjñi jiñi chʼichʼ bajcheʼ jiñi.

18. ¿Chuqui bʌ wenlel yicʼot baqui bʌ bendición miʼ mejlel lac taj cheʼ bʌ Jesús tsiʼ beque i chʼichʼel ti laj caj?

¹⁸ Jiñi isujm bʌ xñoptʼañob mach xicʼbilobix chaʼan miʼ jacʼob jiñi i Mandar Moisés, jin chaʼan maʼañix miʼ yʌcʼob jiñi tsʌnsʌbil bʌ añimal tac yicʼot maʼañix miʼ chʼʌmbeñob majlel i chʼichʼel yaʼ ti pulʌntib (Hebreos 10:1). Jiñi chʼichʼ tsaʼ bʌ cʼʌjñi ti pulʌntib ti wajali ti Israel jiñʌch miʼ pʌs chaʼan jiñi muʼ bʌ caj i yʌcʼ i cuxtʌlel ti wiʼil: Jiñʌch i Yalobil Dios, Jesucristo. Cheʼ bajcheʼ ti laj cʌñʌ yaʼ ti cʌntesʌntel 5, Jesús tsiʼ yʌcʼʌ i cuxtʌlel bajcheʼ juntiquil quixtañu cheʼ bʌ tsiʼ beque i chʼichʼel ti laj caj. Ti wiʼil tsaʼ letsi majlel ti panchan yicʼot tsiʼ yʌqʼue ti junsujtel jach Dios i tojol i chʼichʼel tsaʼ bʌ i beque (Hebreos 9:11, 12). Cheʼ bajcheʼ jiñi, tsiʼ tojo lac mul yicʼot tsiʼ jambeyonla  jumpʼejl bij chaʼan mi lac taj laj cuxtʌlel mach bʌ yujilic jilel (Mateo 20:28; Juan 3:16). Wen ñuc i cʼʌjñibal cheʼ bʌ tsiʼ yʌcʼʌ i chʼichʼel Jesús ti laj caj (1 Pedro 1:18, 19). Mi caj lac taj laj coltʌntel mi añʌch lac ñopoñel cheʼ bʌ tsiʼ beque i chʼichʼel Jesús.

19. ¿Chuqui yom miʼ mel jiñi xñoptʼan chaʼan mi yʌl jiñi tʼan: «Mach chʌn c wentajix laʼ cuxtʌlel ti laʼ pejtelel»?

¹⁹ Wocolix i yʌlʌ jiñi Dios xcʼuxbiya bʌ come tsiʼ yʌqʼueyonla lac majtan, jiñʌch laj cuxtʌlel. Cheʼ mucʼʌch laj cʼuxbin tsaʼ bʌ aqʼuentiyonla, mi caj lac pʌs cheʼ mi lac subeñob jiñi wiñicob xʼixicob mi añobʌch i ñopoñel ti jiñi i cuxtʌlel tsaʼ bʌ i yʌcʼʌ Jesús, mi caj i mejlelob ti chumtʌl tiʼ pejtelel ora. Tijicña mi caj lac mel iliyi come lajal bajcheʼ Jehová, mi laj qʼuel ti ñuc jiñi i cuxtʌlel lac piʼʌlob (pejcan Ezequiel 3:17-21). Mi mucʼʌch lac mel ti tsʼʌcʌl iliyi, mi caj mejlel la cʌl jiñi tʼan tsaʼ bʌ i yʌlʌ jiñi apóstol Pablo: «Mach chʌn c wentajix laʼ cuxtʌlel ti laʼ pejtelel. Maʼañic tsac chaʼle bʌqʼuen, pero tsʼʌcʌl tsac subeyetla i tʼan Dios» (Hechos 20:26, 27). Miʼ mejlel lac pʌs chaʼan mucʼʌch laj qʼuel ti ñuc jiñi cuxtʌlel yicʼot jiñi chʼichʼ cheʼ mi laj cʌntesan jiñi wiñicob xʼixicob chaʼan miʼ cʌñob Dios yicʼot chaʼan miʼ cʌñob chuqui albil i chaʼan.