1. ¿Jara kakumajalaka napüshuaʼa na katoʼuchiikana?

NAASHIN Pablo, Jeʼwaa, nia chi ‹Maleiwa matüjainkai ouktaa› (2 Corinto 6:16). Nukumajala napüshuaʼa na katoʼuchiikana. Müshii na aapieekana nüchiki: ‹Pia kakumalaka tü kasakat süpüshua› (Alateetkat Mapeena 4:11). Müshi David nümüin Jeʼwaa: «Pia chi shikiishikai tü kataakalü oʼuu» (Salmo 36:9, TNM). Sutuma tia, nüsülajala wamüin Maleiwa tü kataakalü oʼuu.

2. ¿Kasa naapaka wamüin Jeʼwaa süpüla ayatüin katüin woʼu?

² Otta müsia, ayatüsü katüin woʼu nutuma Jeʼwaa (Aluwataaushikana 17:28). Naapüin wamüin eküülü, wüin, tü jouktai wasanalaakat otta tü Mmakat (paashajeʼera Aluwataaushikana 14:15-17). Naapüin shia wamüin süpüla talatüin waaʼin. Süpüla talatüin maʼin waaʼin, watüjaainjatü aaʼu tü nuluwataakalü anain Maleiwa otta waainjainjatü shia (Isaías 48:17, 18).

3. ¿Jamüsü nümüin Maleiwa nuʼutünüin aaʼin Abel?

³ Keeʼireesü naaʼin Maleiwa kojutüin wamüin tü kataa oʼuu wanainkat otta tü nanainkat na waneeinnua.  Wekirajaa süchiki tü naainjakat Caín, chi nüchonkai Adán sümaa Eva. Jashichijaashi nia nümüin Abel, chi nimüliakai. Nüchiaain nia Jeʼwaa suulia kaainjalaa sutuma üttüin naaʼin. Akaisaʼa nnojolin jaa nümüin. ‹Anaataashi nooʼomüin chi nimüliakai, nuʼutaka naaʼin› (Génesis 4:3-8). Sutuma tia, müliashi maʼin Caín nutuma Jeʼwaa (Génesis 4:9-11).

4. Süpüla kojutüinjatüin wamüin tü kataakalü oʼuu, ¿jamüsü nünüiki Maleiwa nükajee Moisés?

⁴ Mapa, süpüla naainjain na israeliitakana tü keeʼireekat naaʼin Jeʼwaa, nüküjüin namüin tü naainjainjatkat nükajee Moisés. Makalaka shia tü pütchi aapünakat nümüin Moisés sümünüin. Süpüshi pütchikat tia, müsü mayaa: «Nnojo puʼutüin saaʼin wayuu» (Mateo 5:21). Pütchikat tia, shiiʼiyatüin namüin na israeliitakana kojutüin nümüin Maleiwa tü kataakalü oʼuu makalaka kojutüinjatüin wamüin tü kataa oʼuu nanainkat na waneeinnua.

5. ¿Anainjatü wamüin tü ojutiraakat joʼuu?

⁵ ¿Jamüsü nünüiki Maleiwa nachiki na joʼuu süleʼeruʼukana nei? Saashin tü pütchi aapünakat nümüin Moisés, nnojoishi oʼutünajachin aaʼin wanee joʼuu eeka süleʼeruʼuin nii. Müsia, kojutüsü maʼin nümüin Jeʼwaa tü kataa oʼuu nünainkat (paashajeʼera Éxodo 21:22, 23; Salmo 127:3). Makalaka mojuin tü ojutiraakat joʼuu.

6. ¿Jamüsü nnojoluinjatka üttüin waaʼin sünain wayuu?

⁶ Süpüla kojutüin wamüin tü kataakalü oʼuu, kojutüinjana wamüin na waneeinnua. Müsü tü Wiwüliakat: ‹Chi eekai kanain naaʼin nuwalayuu, uwomuyuushi nia. Jee meeʼiranajaainyülia naaʼin süpüla eeinjachin nia nümaa Maleiwa waneepia› (1 Juan 3:15). Kateere woʼu waneepia, nnojoluinjatü üttüin waaʼin sünain wayuu süka eein atkawaa sutuma (1 Juan 3:11, 12). Choʼujaasü maʼin aijiraainjanain waya.

7. ¿Kasa nnojoluinjatka waainjain kojutüle wamüin tü kataakalü oʼuu?

 ⁷ ¿Kojutüinjatü wamüin tü kataa oʼuu wanainkat? Nnojoishii waya oukteein. Akatsaʼa eein na achajaakana mojuu akuwaʼipaa süpüla talatüin naaʼin. Akamüjüshii yüi, kokaiina otta asüshii wunuʼu sümaa nnojoluin ayuulin naya. Ayuuisü jee ouktüsü wayuu sutuma. Eeka naainjain tia, nnojotsü kojutüin namüin tü kataakalü oʼuu. Tia aainjünakat yarüttüsü nümüin Maleiwa (paashajeʼera Roma 6:19; 2 Corinto 7:1). Süpüla waʼyataain nümüin, wooʼulaainjatü shia. Jaʼitairü kapüleein wamüin, nükaaliinjeena waya Jeʼwaa. Kojutüsü nümüin süpüshuaʼa tü kasa waainjakat süpüla kojutüinjatüin wamüin tü kataa oʼuu nüsülajakat wamüin.

8. ¿Jamüsü waaʼinmajüinjatka wakuwaʼipa waneepia?

⁸ Kojutüle wamüin tü kataakalü oʼuu waaʼinmajüinjatü wakuwaʼipa. Nnojoleena waya achajaain mojuu akuwaʼipaa süpüla talatüin waaʼin. Nnojoluinjatü maaʼin waaʼin sünain oʼuniraa kemion, wisiküleeta otta sünainpünaain waya tü ashaittaa müliakalü atuma wayuu (Salmo 11:5). Müshi Jeʼwaa namüin na israeliitakana: ‹Pukumajüle pipia, anainjatü sukumajia saajuna putuma süpüla nnojolinjachin kaainjalain pia sujutuule wayuu saaʼujee› (Deuteronomio 22:8, TNM). Pütchikat tia sükaaliinjain pia süpüla pütüjaain saaʼu tü paainjainjatkat. Pukumajüle luma, ana putuma sukumajia süpüla nnojoluinjatüin seewaain wayuu sutuma. Keʼejenale pia kemion otta wisiküleeta ana maʼin putuma shia. Jülüja paaʼin pipia otta peʼejena suulia peewaain otta seewaain wayuu sutuma.

9. ¿Kasa nnojoluinjatka waainjain süka mürüt kojutüle wamüin tü kataakalü oʼuu?

⁹ Kojutüsü nümüin Maleiwa tü kataa oʼuu sünainkat mürüt. Nuuʼulaain Maleiwa woʼutüin saaʼin mürüt süpüla weküin, washeʼin otta süpüla nnojoluin ouktüin waya sutuma  (Génesis 3:21; 9:3; Éxodo 21:28). Akanasaʼa na müliakana atuma mürüt otta noʼutüle saaʼin süpüla ashaittaa, mojusü tü naainjakat otta nnojotsü kojutüin namüin tü kataakalü oʼuu (Proverbios 12:10).

10. ¿Jamüsü sünainpünaaka tü kataakalü oʼuu tü ishakat?

¹⁰ Ouktapa Abel nutuma Caín, müshi Jeʼwaa nümüin Caín: «Aʼwaatüsü tü nüshakat chi pimüliakai mmaapüjee sünain achuntaa pasalawaa» (Génesis 4:10). Tü nüshakat Abel shia tü kataa oʼuu nünainkat naashin Maleiwa. Nuʼuta aaʼinchi Caín chi nimüliakai, makalaka müliainjachin nia. Müsü suchuntakai pasalawaa nüsha Abel nümüin Jeʼwaa. Süchikijee tü juya miyoʼushaatakat, aküjünüsü süchikuaʼa sünainpünaain tü kataakalü oʼuu tü ishakat. Süpülapünaa tia juyakat, ekünapuʼusü neʼe süchon aʼttiee. Mapa, niiʼiratüin shia Jeʼwaa. Müshi nia nümüin Noé otta na nüchonniikana: ‹Teʼitaain sümüin wayuu kasa eekai shipiajatüin sainküin mma süpüla jiküin shiʼiruku›. Süchikijee tia, nümaka Maleiwa: ‹Nnojoluinjatü jiküin süsha› (Génesis 1:29; 9:3, 4). Naashin Jeʼwaa, tü kataakalü oʼuu sünainpünaasü tü ishakat.

11. ¿Kasa nnojoluinjatka aainjünüin süka tü ishakat soʼujee nükalia Noé?

¹¹ Kojutüle wamüin tü ishakat, nnojoleerü shia weküin. Müshi Jeʼwaa namüin na israeliitakana: ‹Nulojule mürüt wanee israeliita, shiale wanee wüchii, amülainjatü nutuma tü süshakat otta nojoitüinjatü shia. Süka tamüin namüin na israeliitakana: «Nnojo jiküin süsha mürüt» › (Levítico 17:13, 14, TNM). Tia nümakat Jeʼwaa nümüin Noé 800 juya paala, ayatayülia shia maaʼulu. Naashin Jeʼwaa na aʼyataashiikana nümüin, eeshii süpüla neküin shiʼiruku mürüt. Akatsaʼa nnojoluinjatüin neküin tü süshakat. Amülainjatü natuma saaʼu tü mmakat. Sükajee  tia, müsü naleʼejirakai nümüin Jeʼwaa tü kataa oʼuu sünainkat tü mürütkalüirua.

12. ¿Kasa pütchi noonooinjatka amaa na anoujashiikana soʼu nükalia Jesuu otta maaʼulu?

¹² Wanaawasü tia sümaa tü aluwataanakalü anain waya. Soʼu nükalia Jesuu, outkajaashii na aluwataaushiikana otta waneeinnua tooloyuu süpüla naashajaain süchiki tü pütchi noonooinjatkalü amaa na anoujashiikana. Keraapa shia natuma, müshii naya: ‹Tü jaaʼinrüinjatkat shia: nnojoluinjana jia sünainpünaain isha, mürüt eeka suʼutuushin aaʼin sümüin tü maleiwayaasükalüirua, mürüt eeka süülüüshin otta amaʼüjirawaa akuwaʼipaa› (Aluwataaushikana 15:28, 29; 21:25, TNM). ‹Nnojoluinjana waya sünainpünaain tü ishakat›. Kojutüsü maʼin tia nümüin Maleiwa. Müsü aka saaʼin nnojorüle sünainpünaain waya kamaleiwaseyaa otta amaʼüjirawaa akuwaʼipaa.

13. ¿Kasa shiyaawaseka nnojoluinjatüin weʼiteʼerüin isha wanain?

¹³ Tü eʼitawaakat isha wanain, ¿sünainpünaasüche tü nümakat Jeʼwaa süchiki tü ishakat? Aa. Weʼitaa wanee shiyaawase. Nümüle chi tottootkai pümüin: «Nnojo püsüin yootshi», ¿piʼitaajeetche shia pütaluʼu? Nnojorüleejaa. Nnojoliire sünainpünaweein waya tü ishakat, nnojotsü weʼitaainjatüin shia wataluʼu.

14, 15. Nümüle chi tottootkai nümüin wanee anoujashi: «Anasü shiʼitaanüle isha pünain», ¿kaseerü naainjaka? ¿Jamüsü naainjainjatka tia?

¹⁴ ¿Kaseetkaʼa naainjain wanee anoujashi mayeinre maʼin nia sümaa nuwaʼnnajachin? Nümüle chi tottootkai nümüin: «Nnojorüle piʼitaain isha pünain oukteechi pia». Wayuukai chia, nnojoishi oukteein. Sükajee kojutüin nümüin tü kataakalü oʼuu, nnojoishi nia eiyajaain süka wunuʼu eekai kaʼakain isha. Makalaka nüchajaain eekai nnojoluin kaʼakain isha.

¹⁵ Süpüla katüin noʼu chi wayuu anoujashikai, ¿eʼrüinjaiche  nia wayumüin nümüin Maleiwa? Müshi Jesuu: ‹Chi eekai naaʼinmajiraweein suulia ouktaa, amülouijeechi. Otta chi eekai nuʼutünüin aaʼin sünainjee niʼyataain tamüin toʼtteʼereechi› (Mateo 16:25). Nnojoishii oukteein waya. Weʼrüle wayumüin sümüin tü Nünüikikat Maleiwa süpüla katüin woʼu, nnojoleerü katüin woʼu waneepia. Tü anakat maʼin shia weʼitaale waaʼin sünain anainjatüin wakuwaʼipa sutuma tü nuluwataakalü anain waya Maleiwa. Ouktüle waya nüsoʼireʼereerü waaʼin Jeʼwaa (Juan 5:28, 29; Hebreokana 11:6).

16. ¿Kasa noonooka maʼin amaa na anoujashiikana nünain Maleiwa?

¹⁶ Oonooshii maʼin na anoujashiikana sümaa tü nümakat Maleiwa süchiki tü ishakat. Makalaka nnojoluin neküin otta neʼitaain shia nataluʼu. * Nanouja anainrü nütüjaain saaʼu Jeʼwaa tü anakat napüleerua. ¿Punouja anainrü shia?

17. ¿Kasa naainjainjatka na israeliitakana süka tü ishakat?

¹⁷ Tü pütchi aapünakat nümüin Moisés, shiiʼiyatüin tü aainjünajatkat süka tü ishakat. Müshi Jeʼwaa namüin na israeliitakana: «Tü kataakalü oʼuu sünainsü tü ishakat otta teʼitaain shia jümüin saaʼu tü aʼajüleekat süpüla  sülatinnüin jaainjala» (Levítico 17:11, TNM). Kaainjarale na israeliitakana, aʼajüinjana mürüt nümüin Maleiwa otta süpüshi tü süshakat neʼikajaainjatü eemüin tü aʼwaajüleekat süpüla motuin naaʼin Maleiwa tü naainjalakat. Müsü tü aainjünajatkat süka tü ishakat.

18. ¿Kasa moteetka naaʼin Jeʼwaa otta aapüneetka wamüin sükajee amülain nüsha Jesukürisüto?

¹⁸ Na anoujashii shiimainshiikana, nnojotsü naainjainjatüin tü pütchi aküjünakat nümüin Moisés. Nnojoishii aʼajüin naya mürüt nümüin Maleiwa otta nnojotsü neʼikajaain tü süshakat eemüin wanee aʼwaajülee (Hebreokana 10:1). Tia, shiyaakuayaasü naapajiraainjachin nikii Jesukürisüto maʼaka wekirajaain suluʼu ekirajaaya 5. Süchikijee tia oʼunüshi nia sirumatuʼumüin otta naapaka nümüin Maleiwa watua neʼe sujutü tü nüsha amülakat (Hebreokana 9:11, 12). Sutuma tia, motusü naaʼin Maleiwa  tü waainjalakat otta eesü süpüla katüin woʼu waneepia (Mateo 20:28; Juan 3:16). Tü aainjünakat süka tia ishakat anashaatasü maʼin (1 Pedro 1:18, 19). Kateerü woʼu weʼitaale waaʼin sünain naapajiraain nikii Jesuu waaʼu.

19. ¿Kasa naainjainjatka chi eekai nunoujain süpüla ‹nnojoluin nüsirüin wayuu eeka amülouilin›?

¹⁹ ¡Talatüshii maʼin waya sükajee nüsülajüin wamüin Maleiwa tü kataakalü oʼuu! Sutuma tia, anasü maʼin waküjüle namüin na wayuukana eein süpüla katüin noʼu waneepia nanoujale sünain naapajiraain nikii Jesuu waaʼu. Waainjeerü shia sümaa talatüin waaʼin sutuma kojutüin wamüin tü kataakalü oʼuu maʼaka naaʼin Jeʼwaa (paashajeʼera Ezequiel 3:17-21). Waainjale maʼin tia, meerü wanüiki maʼaka naaʼin Pablo: ‹Nnojolichipajaʼa tayain kasirüin jaraire amülouilin. Süka taküjüin jümüin tü naaʼinreekat Maleiwa› (Aluwataaushikana 20:26, 27). Kojutüle wamüin tü kataakalü oʼuu otta tü ishakat, aküjeena waya pütchi sümüin wayuu nüchiki Maleiwa otta süchiki tü naainjainjatkat.