1. Tuin nge thil nung zawng zawngte siam?

ZAWLNEI Jeremia chuan: “LALPA erawh chu Pathian tak a ni, Pathian nung . . . a ni e,” tiin a sawi a. (Jeremia 10:10) Chu bâkah, Pathian Jehova chu thil nung zawng zawngte Siamtu a ni. Vân lama thil siamte chuan a hnênah: “Nangin engkim i siam a, i duh avânga awm leh siam a ni bawk,” tiin an sawi. (Thu Puan 4:10, 11) Pathian fakna hlaah, Lal Davida chuan: “Nunna tuikhur chu i hnênah a awm,” a ti. (Sâm 36:9) Chuvângin, nunna hi Pathian thilpêk a ni.

2. Kan nun châwm tûrin Pathianin eng nge a tih?

² Jehova chuan kan nunna pawh a châwm bawk a. (Tirhkohte 17:28) Kan chaw ei te, kan tui in te, boruak kan hîp luh te, leh kan chênna he lei pawh hi ama min pêk a ni. (Tirhkohte 14:15-17) Jehova chuan nun hlimawm tak kan neih theih dân tûrzâwngin kan nunna a châwm a. Mahse, nun chu a hlimawm thei ang bera hmang tûr chuan, Pathian Dânte kan zir a, kan zawm a ngai a ni.—Isaia 48:17, 18.

3. Abela thah a ni chu Pathianin engtin nge a thlîr?

³ Pathian chuan nunna—keimahni leh mi dangte nunna—zah tûrin min duh a. Entîr nân, Adama leh Evi hun lai khân, an fapa Kaina chu a nau Abela chungah a lo thinur ta êm êm a. Jehova chuan Kaina chu a thinurna chuan sual  pawi tak a khawihtîr thei tih a vaukhân a ni. Kaina chuan chu vaukhânna chu a ngaihsak lo. “A nau Abela chu a bei a, a that ta mai a.” (Genesis 4:3-8) Jehova chuan Kaina chu a unaupa a thah avângin a hrem a ni.—Genesis 4:9-11.

4. Mosia dânah khân, engtin nge Pathianin nun thlîr dân dik tak chu a sawi uar?

⁴ Kum sâng tam tak a liam hnuah, Jehova chuan Israel mite chu a pawm tlâka rawng an bâwl theih nâna ṭanpui tûrin dân a pe a. Chûng dânte chu zâwlnei Mosia kaltlanga pêk a nih avângin, a châng chuan Mosia Dân tia koh a ni bawk. Mosia Dân a ṭhen lai chuan: “Tual i that tûr a ni lo,” a ti a ni. (Deuteronomy 5:17) Hei hian Israelte chu Pathianin mihring nun a hlutzia leh mite chuan mi dangte nunna an hlut tûr a nihzia a târ lang a ni.

5. Engtin nge nau tihtlâk chu kan thlîr ang?

⁵ A nih leh nu pum chhûnga awm nausên la piang lo nunna hi a hlu ve em? Mosia dânah chuan nu pum chhûnga nautê insiam lai thihtîr chu thil dik a ni lo. Ni e, nausên la piang lo nunna pawh chu Jehova tân chuan a hlu a. (Exodus 21:22, 23; Sâm 127:3) A awmzia chu nau tihtlâk chu thil dik a ni lo tihna a ni.

6. Engvângin nge mi kan huat loh vang?

⁶ Nunna zahnaah chuan mi dangte thlîr dân dik neih pawh a tel a ni. Bible chuan: “Tupawh a unau hua chu tualthat a ni: tualthattu tumah chatuana nunna pai reng rêng an awm lo tih in hre si a,” tiin a sawi. (1 Johana 3:15) Chatuana nunna neih kan duh chuan, huatna hi tharum thawhna awmtîrtu ber a nih avângin, thinlung chhûnga mi huatna kan neih rêng rêng chu kan paih bo vek a ngai a. (1 Johana 3:11, 12) Inhmangaih tawn dân kan zir chu a pawimawh hle a ni.

7. Nunna zah lohna lantîrtu thil chîn ṭhenkhat chu engte nge ni?

⁷ Keimahni nunna ngei zahna lantîr chungchâng ve thung hi le? A tlângpui thuin mite chuan thih an duh lo va; mahse, ṭhenkhatte chuan nawmsip bâwl nân ringawtin thih hlauhawm tak thilte pawh an ti ṭhîn. Entîr nân, mi tam takte chuan intihhlim nân zûk leh hmuam an ti a, ruihhlote  an ngai bawk a ni. Chutiang thilte chu taksa tân a hlauhawm a, a hmangtute’n an thih phah fo ṭhîn. Chutiang hmangtu chuan nunna a zah lo tihna a ni a. Chûng thil chînte chu Pathian mithmuhah a thianghlim lo. (Rom 6:19; 12:1; 2 Korinth 7:1) Pawm tlâka Pathian rawngbâwl tûr chuan, chutiang thil chînte chu kan bânsan a ngai a. Chutianga bânsan mai chu harsa hle mah se, Jehova chuan kan mamawh ang ṭanpuina chu min pe thei a. Tin, kan nun chu ama min pêk thilpêk hlu tak anga cheibâwl tuma kan thawh rimna chu a ngaihlu a ni.

8. Engvângin nge himna ngaihtuah mi nih a ngaihzia chu rilruah kan vawn reng ang?

⁸ Nunna kan zah chuan, himna ngaihtuah mi nih a ngaihzia kan hre reng ang. Ngaihsam tak kan ni lo vang a, intihhlim nân emaw, rilru tihphâwklêk nân emawa kan nunna atâna thil hlauhawm tûr chu kan ti lo vang. Motorcycle emaw, motor emaw kan khalh hunah kan fîmkhur ang a, nunna atâna hlauhawm thei chi infiamna chu kan pumpelh ang. (Sâm 11:5) Hmân lai Israelte tâna Pathian dân pêk chuan: “In thar [a chung zâwl] in sak chuan chuta mi an tlâka in in chu thisen chhuahna in a nih loh nân in in chung in hung tûr a ni,” a ti a. (Deuteronomy 22:8) Chu dânin a târ lan thu bul nêna inmilin, tuemaw a chêtsuala na taka a inhliam loh nân, in in luhna kailâwnte chu ṭha taka enkawl reng tûr a ni. Motorcycle emaw, motor emaw i nei a nih chuan, khalh chhuah tlâkin a ṭha tâwk ngei tih chian ang che. I in emaw, i motorcycle emaw, i motor emaw chu i tân leh mi dangte tâna hlauhawm nihtîr suh ang che.

9. Nunna kan zah chuan, engtin nge rante kan cheibâwl ang?

⁹ A nih leh, ran nunna hi a hlu ve em? Siamtu tân chuan a hlu ve tho a ni. Pathian chuan ei atân te, silhfên atân te, a nih loh leh hlauhawm laka invên nân tea ran thah chu a phal a. (Genesis 3:21; 9:3; Exodus 21:28) Amaherawhchu, ran chunga nunrâwn emaw, intihhlim nâna sapelh emaw chu a dik lo, chu chuan nunna thianghlimna zah lohzia nasa tak a lantîr a ni.—Thufingte 12:10.

10. Engtin nge Pathian chuan nunna leh thisen a inzawm tlat tih a târ lan?

¹⁰ Kaina’n Abela a thah hnu khân, Jehova chuan: “I nau thisen aw chuan lei aṭangin mi au asin,” tiin Kaina chu a hrilh a. (Genesis 4:10) Pathianin Abela thisen chungchâng a sawi khân, Abela nunna a sawina a ni. Kaina chuan Abela nunna chu a lâksak a, tûnah chuan Kaina chu hrem a ngai ta. Abela thisen, a nih loh leh nunna chu Jehova hnênah phuba lâksak tûra au chhuak ang maia sawi theih a ni. Thisen leh nunna inzawm dân chu Nova dam laia Tuilêt a thlen hnu khân târ lan leh a ni a. Tuilêt a thlen hma chuan mihringte chuan thei rah, thlai, buh, leh thei pil sak chite chauh chu an ei ṭhîn a. Tuilêt hnuah chuan Jehova’n Nova leh a fate hnênah: “Thil nung che thei tinrêngte chu in tân ei tûr a ni ang a; thlai hring ka pêk che u ang khân engkim ka pe vek a che u,” tiin a hrilh a ni. Amaherawhchu, Pathian chuan he khuahkhirna hi a siam a ni: “Sa a nunna (a thisen) chawpin in ei tûr a ni lo,” tiin. (Genesis 1:29; 9:3, 4) Jehova chuan thil siamte nunna leh thisen chu a thlunzawm tlat tih a chiang hle.

11. Nova dam lai aṭang tawh khân, Pathianin thisen chu eng anga hman nge a khap?

¹¹ Thisen kan zahna chu ei lohna hmangin kan lantîr a. Jehova chuan Israelte hnêna Dân a pêkah chuan heti hian thupêk a chhuah a ni: “[Tupawh] ram vâk a, sa emaw, sava emaw, ei theih chi a rawn hawn chuan a thisen chu a tichhuak ang a, vaivutin a vûr tûr a ni. . . . Israela thlahte hnênah chuan, ‘Eng sa thisen mah in ei tûr a ni lo,’” tiin. (Leviticus 17:13-16) Nova hnêna pêk ṭan ran thisen ei khapna Pathian thupêk chu a hnu kum 800 vêlah pawh a la ding reng a ni. Jehova thlîr dân chu a chiang hle: A chhiahhlawhte chuan sa an ei thei a, mahse a thisen erawh an ei thei lo. Thisen chu leiah an leih baw tûr a ni a—chu chu thil nungte nunna Pathian hnêna pêkkîrna tia sawi theih a ni.

12. Kum zabi khatnaah khân thlarau thianghlim chuan tûn thlenga hman tûr thisen chungchânga thupêk eng nge a chhuah?

¹² Kristiante hnênah pawh chutiang bawk thupêk chu pêk  a ni. Kum zabi khatnaa tirhkohte leh Isua hnungzuitute zînga hma hruaitu mi dangte chu Kristian kohhran zawng zawngte zawm tûr thupêk rêlho tûrin an inhmukhâwm a. Heti hian thutlûkna an siam ta a ni: “Thlarau thianghlim leh keinin, hêng thu pawimawh lo hi chu, phurrit zual in chungah nghat lo ila a ṭha kan ti; milem biakna sa ei te, sa thisen ei te, sa rehhlum ei te, inngaih te bâng ula kan ti,” tiin. (Tirhkohte 15:28, 29; 21:25) Chuvângin, ‘thisen chu kan ei tûr a ni lo.’ Pathian mithmuhah chuan, thisen kan ei loh chu milem biakna leh nungchang bawlhhlawhna pumpelh ang tlukin a pawimawh a ni.

13. Thisen ei lo tûra thupêk chuan thisen dawn a huam tel chhan entîrna pein hrilhfiah rawh.

¹³ Thisen ei loh tûr tih thupêk hian thisen dawn a huam tel em? Huam tel e. Entîr nân: Doctor-in zû in lo tûrin hrilh ta che se la. Chu chu, zû i in lo vang a; mahse, i thisen zâmah i chiu lût thei tihna a ni em? Ni lo ve! Chutiang bawk chuan thisen ei loh tûr tih chu eng kawng zâwng maha kan taksa chhûnga lâk luh rêng rêng loh tûr tihna a ni. Chuvângin, thisen ei lo tûra thupêk awmzia chu, tumahin kan thisen zâma thisen an chiu luh kan phal lo vang tihna a ni.

14, 15. Doctor chuan thisen pêk ngei a ngai tih a sawi chuan, Kristianin engtin nge a tih ang a, engvângin nge?

¹⁴ A nih leh, Kristian pakhat chu nasa taka inhliamin emaw, inzai pui a tawh ngaiin emaw awm ta se engtin nge ni ang? Doctor chuan thisen pêk a ngai a, chutilochuan a thi ang, lo ti ta se. Chu Kristian chuan thih a duh lo ngei ang a. Pathian thilpêk hlu tak a nunna chhan a tumna lamah, thisen tel lo inenkawlna dang chu a pawm ngei ang. Chuvângin, thisen tel lova inenkawlna awm theite chu zawngin a pawm ang.

¹⁵ Kristian chuan he khawvêla tlêma a dam rei deuh nân, Pathian dân a bawhchhia ang em? Isua chuan heti hian a sawi a ni: “Tupawh a nun humhim duh apiangin a chân ang a; tupawh keimah avânga a nun chân apiangin  a humhim ang,” tiin. (Matthaia 16:25) Thih chu kan duh hauh lo. Mahse, Pathian dân bawhchhiaa tûna kan nun hi chhan kan tum chuan, chatuana nun kan chân mai a hlauhawm ang. Chuvângin, engemaw avânga kan thi a nih chuan, Nunna Min Petu chuan thawhlehnaah min hre reng ang a, nunna hlu tak chu min pe lêt leh dâwn tih ring nghet tlat chunga Pathian dân rinchhan chu a finthlâk a ni.—Johana 5:28, 29; Hebrai 11:6.

16. Pathian chhiahhlawhte chuan thisen chungchângah eng nge an tum ngheh tlat?

¹⁶ Tûn laiah hian, Pathian chhiahhlawh rinawmte chuan thisen chungchânga a kaihhruaina zawm chu an tum nghet tlat a. Thisen chu engti kawng mahin an ei lo vang a. Damdawia inenkawlna atân pawh an hmang hek lo vang. * Thisen Siamtu chuan an tâna ṭha ber tûr chu a hria tih an hre chiang hle a ni. Siamtuin kan tâna ṭha ber tûr a hria tih i ring em?

17. Hmân lai Israel ramah, Pathian Jehova pawm theih thisen hman dân dik awmchhun chu eng nge ni?

¹⁷ Mosia Dân chuan thisen hman dân dik awmchhun chu a târ lang a. Hmân lai Israelte Pathian biaknaa thiltih ngai chungchângah, Jehova chuan heti hian thu a pe a ni: “Tisa nunna chu thisenah chuan a awm si  a: in nunna atâna inremna siamna tûra maichâm chunga ka pêk che u a ni: nunna atâna inremna siamna chu thisen ngei chu a ni si a,” tiin. (Leviticus 17:11) Israel mite’n thil an tih sual hunah, rana inthâwi a, chu ran thisen chu biak bûk maichâmah emaw, a hnua an neih biak in maichâmah emaw thehin an sualte ngaihdam a ni thei a. Thisen hman dân dik awmchhun chu chutianga inthâwina atân chauh a ni.

18. Isua thisen chhuahna aṭangin eng hlâwkna leh malsâwmna nge kan neih theih?

¹⁸ Kristian dikte chu Mosia Dân hnuaiah an awm tawh lo; chuvângin, rana inthâwina an hlân tawh lo va, maichâmah thisen an theh tawh hek lo. (Hebrai 10:1) Amaherawhchu, hmân lai Israel rama awm maichâm chunga thisen an thehna chuan Pathian Fapa, Isua Krista inthâwina hlu tak chu a lo entîr lâwk a ni. He lehkhabu Bung 5-naa kan zir tawh ang  khân, Isua chuan a mihring nunna chu inthawina atâna a thisen chhuahin a hlân a. Chu mi hnuah chuan vânah a lâwn chho va, Pathian hnêna a thisen hlu tak chu hlânin, vawi khatah a tling tla ta nghâl a ni. (Hebrai 9:11, 12) Chu chuan kan sualte ngaihdamna kawng min siamsak bâkah, chatuana kan nun theihna kawng min hawnsak bawk. (Matthaia 20:28; Johana 3:16) Chutianga thisen hman chu a va pawimawh bîk tehrêng êm! (1 Petera 1:18, 19) Isua thisen chhuak kan rin chauhvin chhandam kan ni thei dâwn a ni.

19. ‘Mi zawng zawng thisena hul’ tûr chuan eng nge kan tih ngai?

¹⁹ Nunna min pêk avângin Pathian Jehova chungah kan va lâwm tak êm! Chu chuan Isua tlanna kan rinna aṭanga chatuana nun neih theihna hun ṭha tak awm chu mi dangte hrilh tûrin min chêttîr tûr a ni lâwm ni? Pathian anga mite nun ngaihsakna chuan châk tak leh ṭhahnemngai taka mi dangte hrilh tûrin min chêttîr ang. (Ezekiela 3:17-21) He mawhphurhna hi taima taka kan hlen chuan, tirhkoh Paula angin: “Mi zawng zawng thisenah ka hul a ni. . . . Pathian rêl zawng zawng azain in hnênah hrilh ka tîm loh kha,” tiin kan sawi ve thei ang. (Tirhkohte 20:26, 27) Mite hnêna Pathian leh a thiltumte hrilh chu nunna leh thisen zahna sâng ber kan neihzia lantîr dân kawng ṭha ber a ni.