1. ¿Ajkia kinchijki nochi katli itstokej?

NOPA tlajtolpanextijketl Jeremías kiijtok: “ToTeko [Jehová], san yajaya nopa Dios tlen melauak uan tlen itstok” (Jeremías 10:10). Ya kinchijki nochi katli itstokej. Yeka ne iluikak, se keskij tlen nopa 144,000 kiijtojkej: “Ta tijchijchijki nochi tlen onka. Kena, nochi tlen onka eltok pampa eltoya mopakilis para ma onka, uan yeka tijchijchijki” (Apocalipsis [Revelación] 4:11). Uan kema David kiueyichijki Jehová kiijtok: “Ta titechmaka yolistli” (Salmo 36:9). Uajka toTeotsij techmakatok tonemilis tlen tlauel ipati.

2. ¿Kenijkatsa kichijtok toTeotsij ma tiitstokaj?

² Jehová kichiua ma tiitstokaj (Hechos 17:28). Ya techmakatok tlen tijkuaj, atl tlen tikij, ajakatl tlen tikijiyotilanaj uan ni Tlaltipaktli kampa tiitstokej (xijpoua Hechos 14:15-17). Tlaj tijnekij tiyolpakisej ika ni tlamantli, moneki ma tikixmatikaj toTeotsij itlanauatiljuaj uan ma tijneltokakaj (Isaías 48:17, 18).

3. ¿Tlake kichijki toTeotsij kema Caín kimiktik Abel?

³ ToTeotsij kineki ma tijpatiitakaj tonemilis uan sekinok  ininnemilis. Ma tikitakaj tlake kichijki Caín katli eliyaya Adán uan Eva ininkone. Kema tlauel kualanki iuaya iikni Abel, Jehová kiiljuik amo ma kualani pampa ueliskia kichiuas se ueyi tlajtlakoli. Caín amo kineltokak, ‘kiteuik iikni Abel uan kimiktik’ (Génesis 4:3-8). Yeka Biblia kiijtoua Jehová kitlatsakuiltik Caín (Génesis 4:9-11).

4. ¿Kenijkatsa moneki tikitasej tonemilis kej kinextik toTeotsij ipan nopa Tlanauatili tlen kimakakej Moisés?

⁴ Kema ya panotoya miak xiuitl, Jehová kiniljuik israeleuanij kenijkatsa kinekiyaya ma kitekipanokaj. Yeka nopa Tlanauatili katli kimakakej Moisés kiijtouayaya: “Amo xitemiktikaj” (Deuteronomio 5:17). Ni tlanauatili kinextia toTeotsij tlauel kipatiita maseualmej ininemilis, uan tojuantij nojkia kej nopa moneki ma tijchiuakaj.

5. ¿Kenijkatsa moneki tikitasej kema mokonetlauisouaj?

⁵ ¿Kenijkatsa kinita toTeotsij pilkonetsitsij katli ayamo tlakatij? Ipan Tlanauatili tlen kimakakej Moisés kiijtouayaya amo ma kinmiktikaj pilkonetsitsij katli ayamo tlakatiyayaj, pampa Jehová kipatiita ininnemilis (xijpoua Éxodo 21:22 uan 23, uan Salmo 127:3). Uajka siuamej amo kuali ma mokonetlauisokaj.

6. ¿Kenke moneki amo ma tikinkualankaitakaj sekinok?

⁶ Kema amo tikinkualankaitaj maseualmej, tijnextiaj tijpatiitaj ininnemilis. Biblia kiijtoua: “Ajkeya kikokolia [o kikualankaita] iikni ipan Cristo itstok keja se temiktijketl. Uan inkimatij se temiktijketl axkipia yolistli tlen yankuik para nochipa” (1 Juan 3:15). Uajka, tlaj amo titekualankaitasej uelis nochipa tiitstosej, pampa kema se tekualankaita techiuilia tlen amo kuali (1 Juan 3:11, 12). Yeka moneki nochi ma tikiniknelikaj.

7. ¿Kenijkatsa miakej kinextiaj amo kipatiitaj ininnemilis?

 ⁷ ¿Kenijkatsa uelis tijnextisej tijpatiitaj tonemilis? Maske amo aka kineki mikis, miakej moyolpakiltiaj ika tlen ueliskiaj mikisej, yeka sekij tlachichinaj o kitekiuiaj drogas. Ni kintlanauia uan yeka miakej mikij. Katli kitekiuiaj drogas amo kipatiitaj ininnemilis uan kisokiuiaj inintlakayo (xijpoua Romanos 6:19; 12:1, uan 2 Corintios 7:1). Tlaj tijnekij kuali tijtekipanosej toTeotsij moneki amo tijtekiuisej drogas. Maske ouij tijmatisej, Jehová techpaleuis. Ya tlauel kipaktia kema tijchiuaj kampeka tijpatiitasej tonemilis katli ya techmakatok.

8. ¿Kenke moneki nochipa ma timomaljuikaj?

⁸ Tlaj tijpatiitaj tonemilis moneki nochipa ma timomaljuikaj. Yeka, moneki timomokuitlauisej kema tijchiuasej se tlenijki uan amo timoyolpakiltisej tlen ika ueliskia timikisej, moneki amo chikauak tijuikasej tocarro uan amo timauiltisej ika tlen ueliskia timokokosej (Salmo 11:5). Yeka, Jehová kinnauatik israeleuanij ma kichiuakaj ni: “Kema akajya tlen inmojuantij kichiuas se kali yankuik, moneki kitlalilis se tepamitl itejteno kalpani, uan keja nopa axkiuikas tlajtlakoli ipampa ieso se tlen axmomokuitlauis uan mokuatepexiuis tlen kalpani uan mikis” (Deuteronomio 22:8). Ni tlanauatili nojkia moneki tijneltokasej. Yeka, ipan tochaj moneki kuali eltos nopa kaltemitl, pampa tlaj uetsis uelis kikokos se akajya.

9. ¿Kenijkatsa uelis tijnextisej tijpatiitaj tlapialmej ininnemilis?

⁹ ¿Kenijkatsa kinita toTeotsij nopa tlapialmej? Nojkia tlauel kinpatiita. Ya kiijtoua kuali tikinmiktisej tlaj tikinkuasej, ika timoyoyontisej o pampa tijnekij timomanauisej (Génesis 3:21; 9:3; Éxodo 21:28). Tlaj se akajya san tlemach kinchiuilia o kinmiktia san pampa kineki, kinextia amo kipatiita nemilistli (Proverbios 12:10).

10. ¿Kenijkatsa kinextik toTeotsij tonemilis eltok ipan toeso?

¹⁰ Kema Caín kimiktik Abel, Jehová kiiljuik: “Ieso nechtlajtlania chikauak ma nimitstlatsakuilti” (Génesis 4:10). Kema toTeotsij kiijtok Abel ieso, kiijtosnekiyaya Abel inemilis. Uajka monekiyaya ma kitlatsakuiltikaj Caín pampa kimiktijtoya iikni. Yeka, Abel ieso o inemilis kejuak kitlajtlaniyaya Jehová ma kitlajtolsenkaua Caín. Teipa, kema itstoya Noé uan ya panotoya miak tonali kema tlauel uetski atl, toTeotsij sampa kiijtok tonemilis eltok ipan toeso. Maske uejkajkia kikuayayaj san tlen eliyaya milaj, teipa ayokmo kej nopa elki pampa Jehová kiniljuik: “Uelis inkinkuasej nochi tlapialmej pampa niinmechmaka nochi tlen itstokej para inmotlakualis”. Uan teipa nojkia kinnauatik: “Amo xijkuakaj nakatl ika ieso” (Génesis 1:29; 9:3, 4). Ni kinextia Jehová kiijtoua tonemilis eltok ipan toeso.

11. ¿Kenijkatsa amo kineki toTeotsij ma motekiui estli kej kinauatik Noé?

¹¹ Uelis tijnextisej tijpatiitaj estli tlaj amo tijkuasej. Uejkajkia Jehová tlanauatik: “Intla israelitajmej [...] tlapeuatij uan kimiktisej se tlamantli tlapiali o tototl tlen tlapajpaktik para inkikuasej, moneki nopona kampa kimiktisej, kitoyauasej tlalchi ieso uan ipani kitemilisej tlali. Pampa [...] nikiniljuijtok ma axkikuakaj estli” (Levítico 17:13, 14). Maske panotoya se ochocientos xiuitl kema kinauatijtoyaj Noé amo ma kikuakaj tlapialmej inineso, israeleuanij nojkia monekiyaya amo ma kikuakaj. Kej ni Jehová kinextik uelis kikuaskiaj san tlapialmej ininnakayo uan inineso amo. Monekiyaya kitoyauaskiaj, pampa kej nopa, kejuak sampa kimakaskiaj toTeotsij nopa tlapiali inemilis.

12. ¿Tlake kinnauatijkej Cristo itokilijkauaj amo ma kichiuakaj uan nama nojua moneki ma tijneltokakaj?

 ¹² Cristo itokilijkauaj nojkia ya nopa kinnauatiaj. Nopa apóstoles uan sekinok katli tlayakanayayaj mosentilijkej pampa kinekiyayaj kiitasej tlake tlanauatili kinamikiyaya kineltokaskiaj. Uan Jehová itonal kinpaleuik ma kikuamachilikaj ayokmo monekiyaya kinnauatiskiaj ma kichiuakaj miak tlamantli, san monekiyaya amo ma kikuakaj tlakualistli tlen kinchiuiliaj teotsitsij tlen amo melauakej, amo ma kikuakaj estli yon tlapialmej tlen san kinkechpatskatokej uan amo ma momekatikaj (Hechos 15:28, 29; 21:25). Uajka, amo kuali ‘tijkuasej estli’, pampa ni tlanauatili tlauel ipati kej kema technauatiaj amo ma tikinueyichiuakaj tlaixkopinkayomej uan amo ma timomekatikaj.

13. ¿Kenke kema technauatiaj amo ma tijkuakaj estli nojkia kiijtosneki amo ma techtlalilikaj?

¹³ Kema technauatiaj amo ma tijkuakaj estli, nojkia kiijtosneki amo uelis timotlalilisej. Tlaj se tepajtijketl mitsiljuiskia amo xikiji vino, ¿kiijtosneki kena uelis mitstlalilisej ipan motlalo? Amo. Uajka, kema techiljuiaj amo ma tijkuakaj estli nojkia kiijtosneki amo ma techtlalilikaj ipan totlakayo.

14, 15. ¿Tlake kichiuaskia se toikni tlaj kiiljuiskiaj moneki kitlalilisej estli, uan kenke kichiuaskia nopa?

¹⁴ ¿Tlake panoskia tlaj se toikni tlauel mokokojtok o moneki kitekisej? Uelis tepajtianij kiiljuisej mikis tlaj amo kitlalilisej estli. Uan pampa ni toikni amo kineki mikis, kiniljuia ma kipajtikaj ika sekinok pajtli uan amo ma kitlalilikaj estli.

¹⁵ ¿Tlaixpanoskia se toikni san pampa kinekiskia nojua itstos se kentsi? Jesús kiijtok: “Tlen kineki momanauis para axmikis ipampa nechixmati, kipolos ialma [o inemilis]. Pero tlen nechtokilis yonke moneki mikis  nopampa na, kipantis yolistli” (Mateo 16:25). Tlaj tikixpanoskiaj toTeotsij pampa amo tijnekij timikisej, amo uelis tiitstosej nochipa. Yeka, moneki timotemachisej Biblia nelia techpaleuia. Tlaj timikisej, toTeotsij techyolkuis uan kichiuas sampa ma tiitstokaj (Juan 5:28, 29; Hebreos 11:6).

16. ¿Tlake mosentlalijtokej toTeotsij itekipanojkauaj amo kichiuasej ika estli?

¹⁶ Jehová itekipanojkauaj mosentlalijtokej kineltokasej kema kinnauatia amo ma kitekiuikaj estli. Yeka amo kikuaj yon amo kinekij ma kintlalilikaj estli maske kiniljuiaj ika nopa uelis mochikauasej. * Motemachiaj san toTeotsij kimati tlake uelis kinpaleuis, pampa ya kichijki estli. ¿Nojkia tijneltoka nopa?

17. ¿Kenijkatsa kiniljuik toTeotsij nopa israeleuanij kinamikiyaya kitekiuiskiaj estli?

¹⁷ Nopa Tlanauatili tlen kimakakej Moisés kinextik kenijkatsa kinamikiyaya motekiuis estli. Nopaya Jehová kiniljuik israeleuanij: “Iyolis nopa tlapiali mokaua ipan ieso tlen kipixtok ipan itlakayo. Uan nopa estli niinmechmakatok para inkiijtselosej ipan nopa tlaixpamitl para ika  intlaxtlauasej uan inkiixtsakuasej inmotlajtlakoljuaj” (Levítico 17:11). Uajka, kema kinekiyayaj ma kintlapojpoljuikaj, monekiyaya kimiktiskiaj se tlapiali uan kiuikaskiaj se achi ieso kampa tlaixpamitl o kampa teokali. San kej nopa kinamikiyaya kitekiuiskiaj estli.

18. ¿Tlake tlateochiualistli uelis tijselisej ika Jesús ieso katli kitoyajki, uan kenijkatsa techpaleuia?

¹⁸ Cristo itokilijkauaj ayokmo kichiuaj tlen kiijtoua nopa Tlanauatili tlen kimakakej Moisés. Yeka, amo kinmiktiaj tlapialmej kej se tlakajkaualistli yon amo kiuikaj inineso kampa se tlaixpamitl (Hebreos 10:1). Tlen israeleuanij kichiuayayaj ika nopa estli, kiixnextik tlen Jesucristo kichiuaskia. Ipan tlamachtili makuili, tikitakej Jesús motemaktilik uan techmakixtik ika ieso tlen kitoyajki  kej se tlakajkaualistli. Teipa yajki iluikak uan kimaktilito toTeotsij nopa ieso tlen tlauel ipati katli kitoyajtoya, uan ni sampatsi kichijki (Hebreos 9:11, 12, TNM). Yeka uelis techtlapojpoljuisej uan nochipa tiitstosej (Mateo 20:28; Juan 3:16). Nelia tlauel kuali motekiuik Jesús ieso (1 Pedro 1:18, 19). Uajka, uelis timomanauisej tlaj tijneltokasej Jesús ieso nelia uelis techmakixtis.

19. ¿Tlake moneki tijchiuasej uan kiampa nojkia tikijtosej “axnotlajtlakol tlaj sekij axkineltokatokej Jesús”?

¹⁹ ¡Tlauel tijtlaskamatiliaj toTeotsij pampa kichijtok ma tiitstokaj! Yeka, tikiniljuiaj maseualmej uelis itstosej nochipa tlaj kineltokasej Jesús techmakixtik ika inemilis. Ni tijchiuaj ika miak pakilistli, pampa Jehová uan tojuantij tlauel tijpatiitaj ininnemilis (xijpoua Ezequiel 3:17-21). Tlaj tijchiuasej ni, tikijtosej kej apóstol Pablo: “Axnotlajtlakol tlaj sekij axkineltokatokej Jesús [...]. Pampa niinmechyolmelajkia senkistok nochi tlen toTeko kineki xijmatikaj” (Hechos 20:26, 27). Uajka, tlaj titemachtisej tlen toTeotsij uan tlen mosentlalijtok kichiuas, tijnextisej tijpatiitaj tonemilis uan estli.