1. Ihs me kapikada mour koaros?

SOUKOHP Seremaia mahsanih me Siohwa “me Koht mehlel” oh “Koht ieias.” (Seremaia 10:10) Patehng met, Siohwa Koht iei Sounkapikpen mour koaros. Tohnleng kan patohwanohng ih: “Komwi me ketin wiadahr mehkoaros, oh pwehki kupwuromwien, me mehkoaros mihmiehki oh momourki.” (Kaudiahl 4:11) Nan ehu koul en kaping ong Koht, Nanmwarki Depit patohwan: “Komwi me poahsoan en mour koaros.” (Melkahka 36:9) Eri, mour iei kisakis ehu sang rehn Koht.

2. Dahme Koht kin ketin wia pwehn kamakamour kitail?

² Siohwa pil kin ketin kamakamourih kitail. (Wiewia 17:28) E kin ketikihda mwenge me kitail kin tungoale, pihl me kitail kin nim, kisinieng me kitail kin esingengki, oh sahpw me kitail kin kousoan powe. (Wadek Wiewia 14:15-17.) Siohwa kin ketin wia met ni ahl ehu me kin wiahiong mour en kaperen. Ahpw, pwe kitail en ahneki peren unsek nan atail mour, kitail anahne sukuhlki sapwellimen Koht kosonned akan oh peikiong.​—Aiseia 48:17, 18.

3. Ia sapwellimen Koht madamadau ong kamakamalahn Eipel?

³ Koht kupwurki kitail en wauneki atail mour oh pil ahn  meteikan. Karasepe, duwehte ni mwehin Adam oh Ihp, neira pwutak Kain inenen lingeringerda pahn rie pwutak tikitik Eipel. Siohwa mahsanihong Kain me eh lingeringer kakete kahrehiong ih nan dihp laud. Kain pohnsehsehla kaweido. E “sohpeiongete rieo, oh kemehla.” (Senesis 4:3-8) Siohwa ketin kaloke Kain pwehki eh kemehla rie pwutako.​—Senesis 4:9-11.

4. Nan kosonned en Moses, ia duwen Koht eh ketin kasalehda duwen kesempwalpen mour?

⁴ Sounpar kid kei mwuri, Siohwa ketikihong mehn Israel kan kosonned kan pwehn sewesei irail en papah ih ni pwung. Pwehki eh ketin doadoahngki Moses pwehn kihong irail kosonned pwukat, ekei pak kosonned pwukat kin adaneki Kosonned en Moses. Ehu kisehn Kosonned en Moses kin mahsanih: “Dehr kemehla aramas.” (Deuderonomi 5:17) Met kasalehiong mehn Israel akan me Koht ketin kesempwalki mour en aramas oh aramas en pil kesempwalki mour en meteikan.

5. Ia pahn atail madamadau ong kauwehla liseian?

⁵ A ia duwen mour en seri men me saikinte ipwidi? Nin duwen Kosonned en Moses, ma aramas emen kahrehda seri men me mihmihte nan kapehden ine en mehla, met mehkot sapwung. Kosonnedo mahsanih: “Ma ohl kan pahn peipene oh re uhdahn kahrehiong lih liseian men en medekla oh nah seri ipwidi ahpw sohte mehla wiawi, ohlo pahn uhdahn ale kalokepe nin duwen me ahn liho pwoudo pahn kapwukoahkiong; oh e pahn wia met nin duwen me pwung ong kopwung. Ahpw ma mehla wiawi, eri kumwail anahne dupungki mour ong mour.” (Eksodus 21:22, 23, NW) Ei, mouren seri me mi nan kapehden ineo pil kin inenen kesempwal ong Siohwa Koht. (Wadek Melkahka 127:3.) Met wehwehki me kauwehla liseian mehkot sapwung.

6. Dahme kahrehda kitail en dehpa kailongki meteikan?

⁶ Wauneki mour pil kin pid ahneki madamadau pwung  ong meteikan. Paipel mahsanih: “Mehmen me kin kailongki rie, ih sounkam aramas emen, oh kumwail ese me sounkam aramas sohte kak ahneki mour soutuk.” (1 Sohn 3:15) Ma kitail men ale mour soutuk, kitail anahne kihsang nan atail mohngiong kailongki meteikan, pwe kailok me kin kahrehda wiewia lemei. (1 Sohn 3:11, 12) E kesempwal kitail en sukuhlki limpoakpene.

7. Ia ekei wiewia kan me kin kasalehda me kitail sohte wauneki mour?

⁷ A ia duwen kasalehda wauneki pein atail mour? Aramas tohto sohte kin men mehla, ahpw ekei kin wia soahng keper kan ong mehn kamweit. Karasepe, aramas tohto kin simoak, kang pwuh, de pil ale mehn kasahliel teikan ongete mehn kaperenih irail. Soangen mehn kelitepw pwukat kin kauwehla paliwar oh kin kalapw kemehla aramas akan me kin doadoahngki. Aramas emen me kin doadoahngki mehn kelitepw pwukat sohte kin wiahki mour mehkot sarawi. Soangen wiewia pwukat me samin mwohn silangin Koht. (Wadek Rom 6:19; 12:1; 2 Korint 7:1.) Pwe kitail en kak papah Koht ni ahl me e ketin kupwurki, kitail anahne kesehla soangen wiewia pwukat mendahte ma met pahn inenen apwal. Siohwa kak ketikihong kitail sawas, oh e kin ketin kesempwalki atail kin nantihong wiahki atail mour kisakis kesempwal sang reh.

8. Dahme kahrehda kitail en tamataman anahnepen liksang soahng keper kan ong kitail oh meteikan?

⁸ Ma kitail kin wauneki mour, kitail pahn kin tamataman anahnepen liksang soahng keper kan ong kitail oh meteikan. Kitail sohte pahn kin soukautih oh wiahki mehkot keper mehn kamweit de mehkot kaperen. Kitail sohte pahn tangahki sidohsa ni ahl me keper de wia mwadong kan me kasalehda lemei oh keper. (Madiu 4:5-7) Sapwellimen Koht kosonned ong mehn Israel en mahs ko mahsanih: “Ni amwail pahn kin kauwada ihmw kapw ehu, kumwail pahn kanahieng kihong kehl ehu me kapil keilen pwelengen  ihmwo. Eri, kumwail sohte pahn pwukoahki ma emen pwupwudi sang powe oh mehla.” (Deuderonomi 22:8) Pwehn pahrekiong mouren kaweid en kosonned wet, tehk soahng kan me duwehte kehndakehn imwomw en mwahu oh kehlail pwe emen de kirisdi de pwupwudi oh kahrehda ohla laud. Ma mie weromw sidohsa, kilang mwahu pwe en dehr keper en doadoahngki. Ke dehr mweidohng imwomw de weromw sidohsa en keper ong uhk de pil meteikan.

9. Ma kitail kin wauneki mour, ia pahn atail wiewia ong mahn akan?

⁹ A ia duwen mour en mahn akan? Met pil wia mehkot sarawi ong Sounkapikadao. Koht ketin mweidohng aramas en kemehla mahn akan pwehn wia mehn mwenge, likou de en doare mour sang mehkot keper. (Senesis 3:21; 9:3; Eksodus 21:28) Ahpw sapwung en wiakauwe de kemehla mahn akan pwe en wiahki mehn mwadong. Met kin kasalehda mwamwahliki mour, me iei mehkot sarawi.​—Lepin Padahk 12:10.

10. Ia duwen Koht eh ketin kasalehda me nta kin weliwelian mour?

¹⁰ Mwurin Kain eh kemehla rie pwutak Eipel, Siohwa mahsanihong Kain: “Ntahn riomwo liklikwerih ie sang nanpwel.” (Senesis 4:10) Ni ahnsou me Koht mahsanih duwen ntahn Eipel, e kin mahmahsanih duwen ahn Eipel eh mour. Kain kihsangehr ahn Eipel eh mour, oh met Kain pahn ale kalokepe. Met kin rasehng ahn Eipel nta de mour kin liklikwerih Siohwa en kapwungala mwekid wet. Mwurin Nohlik en ni mwehin Nohao, Siohwa ketin pwurehng kasalehda me nta kin weliwelian mour. Mwohn Nohliko, aramas kin kangte wahn tuhke kan, wahn sahpw kan, oh weren tuhke kan. Mwurin Nohliko, Siohwa mahsanihong Noha oh nah pwutak kan: “Kumwail kak tungoale soahng me momour koaros oh pil tuhke koaros. I kihong kumwail koaros pwe kumwail en wiahki amwail mehn tungoal.” Ahpw, Koht pil mahsanih:  “Ihte me kumwail sohte pahn tungoalehn: uduk me mie nta, I sohte mweidada pwehki mour mi nan nta.” (Senesis 1:29; 9:3, 4) E kin sansal me Siohwa kin ketin kasalehda me nta kin weliwelian mour.

11. Soangen doadoahngki nta dah me Koht ketin keinapwih sangete nan mwehin Noha?

¹¹ Kitail kin kasalehda atail wauneki nta sang ni atail sohte kin tungoale. Nan Kosonnedo me Siohwa ketikihong mehn Israel akan, e mahsanih: “Kumwail sohte pahn tungoale nta ahnsou me kumwail pahn tungoale uduk . . . Dehr tungoale nta, a kumwail kakerehiong nanpwel duwehte pihl.” (Deuderonomi 12:23, 24) Sapwellimen Koht kehkehlik en dehr kang ntahn mahn me e kehkehlikihong Noha mpen sounpar 800 mwowe wie manamante. Kupwuren Siohwa inenen sansal: Sapwellime ladu kan kak tungoale uduk en mahn akan ahpw ren dehr tungoale nta. Irail en kakerehdi ntao nan pwehl. Ni ahl wet irail kin kapwurelahng Koht mour en mahno.

12. Kehkehlik dah me pid nta me kohwohng Kristian akan ni mwehin wahnpoaron ko me pil wie doadoahkte ahnsouwet?

¹² Soangen kehkehlikohte pil kohwong Kristian akan. Wahnpoaron akan oh ohl teikan me kin ahneki pwukoa nanpwungen sapwellimen Sises tohnpadahk kan mwurin eh pwoula, tuhpene pwehn pilada soangen kehkehlik dah kan me koaros nan mwomwohdisohn Kristian en kin kapwaiada. Irail pwungkihdahr met: “Se sohte pahn katautauwihkin kumwail mehkot likin soangen kosonned pwukat me konehng: kumwail dehr tungoale mwenge kan me meirongalahr ong dikedik en eni kan; dehr tungoale nta; dehr tungoale mahn mwopwula [de “mahn me kamakamala ahpw nta sohte kohsang”]; oh kumwail en pil liksang nenek.” (Wiewia 15:28, 29; 21:25) Kahrehda, kitail en “dehr tungoale nta.” Mwohn silangen Koht, atail wia met inenen kesempwal duwehte atail kin liksang kaudok ong dikedik en eni kan oh pil tiahk samin me pid wia nsenen pwopwoud.

13. Menlau karasahda dahme kahrehda kehkehlik en liksang nta pil pid doken nta.

 ¹³ Ia duwe, kehkehlik en dehr tungoale nta pil kin pidada en dehr ale doken nta? Ei. Karasepe: Ma toahkte men padahkihong uhk ken liksang sakau en wai, eri ia duwe, met wehwehki me ke sohte kak nim sakau en wai ahpw ke kak doakoahlong sakau en wai nan selin nta kan? E sansal me soh! Duwehte met, liksang nta wehwehki en dehr kihong nan paliwaratail. Kahrehda kehkehlik en liksang nta kin wehwehki me kitail sohte pahn mweidohng aramas sohte lipilipil men en doakoahlong nta nan atail selin nta kan.

14, 15. Dahme Kristian emen pahn wia ma toahkte kan nda me e uhdahn pahn ale doken nta? Dahme kahrehda?

¹⁴ A ia duwen ma Kristian emen ohla laud de anahne pwal laud? Medewehla me toahkte kan nda me e uhdahn anahne ale doken nta pwe ma soh, ah e pahn mehla. Ni mehlel, Kristiano pahn sohte men mehla. Pwehn kolokol sapwellimen Koht kisakis kesempwal en mour, e pahn ale wiepen epwelpen soumwahu teikan me sohte pidada doadoahngki nta ni ahl sapwung. Kahrehda, e pahn rapahki soangen epwelpen soumwahu teikan likin doken nta ma mie oh e pahn ale ekei epwel pwukat.

¹⁵ Ia duwe, Kristian emen pahn kauwehla sapwellimen Koht kosonned pwehn ekiste kareireila eh mour ahnsouwet? Sises mahsanih: “Aramas emen me men doarehla eh mour e pahn pwupwusang; a mehmen me men tounmeteikihla eh mour, pwehki ngehi, e pahn diar.” (Madiu 16:25) Kitail sohte men mehla. Ahpw ma kitail song en doarehla atail mour en ahnsou wet ni atail kauwehla sapwellimen Koht kosonned, kitail pahn kakete katihasang mour soutuk. Eri, e wia elen loalokong en uhdahn kamehlele me sapwellimen Koht kosonned kan me pwung. Kitail uhdahn koapworopworki me ma kitail pahn mehla, Meno me ketikihda atail mour pahn ketin tamataman kitail oh pahn ketin kaiaskitailda.​—Sohn 5:28, 29; Ipru 11:6.

16. Dahme sapwellimen Koht ladu kan kin koasoanehdi teng me pid nta?

 ¹⁶ Rahnwet, sapwellimen Koht ladu lelepek kan kin koasoanehdi teng en idawehn sapwellime kaweid me pid nta. Irail sohte pahn tungoale nta. Irail pil sohte pahn ale doken nta. * Irail kamehlele me Koht, me ketin kapikada nta, mwahngih dahme keieu mwahu ong irail. Ke kamehlele me e mwahngih met?

17. Nan Israel en mahso, ia ehute elen doadoahngki nta me Siohwa Koht ketin kupwurki?

¹⁷ Kosonned en Moses kasalehda me mie ahl ehute me pwung en doadoahngki nta. Siohwa mahsanihong mehn Israel en mahs ko duwen arail kaudok: “Mour en mehkoaros me momour kin mihmi ni nta, ihme KAUN-O ketin koasoanehkihdi pwe nta koaros en kin wudekiong pohn pei sarawio pwehn kin kihsang dipen aramas akan. Nta, me iei mour, iei me kin kihsang dihp.” (Lipai 17:11) Ni mehn Israel kan ar wiahda dihp, irail kak ale mahkpen diparail kan sang ni arail kihda meirong en mahn. Ekei nta kin kohdiong pohn pei sarawio nan impwal sarawi. Oh re kin wia met nan sapwellimen Koht tehnpas sarawio mwurin e kokoudahr.  Ihte elen doadoahngki nta me pwung iei ong meirong pwukat.

18. Soangen kamwahu oh kapai dah kan me kitail kak alehsang sapwellimen Sises nta?

¹⁸ Kristian mehlel kan sohte kin iang mihmi pahn Kosonned en Moses. Ihme kahrehda irail sohte kin meirongki mahn oh kihong ntahn mahn pohn pei sarawi. (Ipru 10:1) Ahpw kadoadoahkpen nta pohn pei sarawi ni mwehin Israel en mahso kin karasaraskihong meirong kesempwal en sapwellimen Koht Ohlo, Sises Krais. Nin duwen atail sukuhlkier nan Irelaud 5 en pwuhk wet, Sises ketikihda sapwellime mour nin duwen aramas ong kitail ni eh ketin mweidala sapwellime nta en kakerkerdi nin duwen meirong ehu. Mwuri e ahpw ketidahla nanleng oh patohwanohng Koht pahn mehpak pweinen eh tungoal nta kesempwal. (Ipru 9:11, 12) Met wia poahsoanpen mahkpen dipatail kan oh e pil ritingadahng  kitail elen alehdi mour soutuk. (Madiu 20:28; Sohn 3:16) Ia uwen kadoadoahkpen nta wet eh nohn kesempwal! (1 Piter 1:18, 19) Atail pwoson sapwellimen Sises nta kelehpw me kak kihong kitail komour.

19. Dahme kitail en wia pwe kitail en dehr pwukoahki mour en aramas?

¹⁹ Kitail kak kalahngankihong Siohwa Koht kisakis limpoak en mour me e ketikihda! Met sou pahn kamwakid kitail en padahkihong aramas teikan duwen koapworopwor en ahneki mour soutuk me poahsoankihda atail pwoson sapwellimen Sises meirong? Ma kitail kin nsenohki mour en meteikan duwehte Koht eh kin ketin nsenohkin irail, met pahn kamwakid kitail en ngoangki padahkihong irail duwen ire wet. (Wadek Esekiel 3:17-21.) Ma kitail pahn ngoangki kapwaiada pwukoa wet, kitail pahn kak nda duwehte wahnpoaron Pohl: “Ma mehmen kumwail salongala, I sohte pahn pwukoahki, pwehki I sohte ekihsang kumwail ei kasalehiong kumwail unsek en kupwur en Koht.” (Wiewia 20:26, 27) En padahkihong aramas teikan duwen Koht oh sapwellime koasoandi kan iei ahl me keieu mwahu en kasalehda me kitail kin uhdahn wauneki mour oh nta.