1. ¿Né kueraaski iámindu ambeni enga tsípiti jaka?

PROFETA Jeremiasi uandaspti: “Jeobajkusï Tata Diosïti. Ima Tata Diosï tsípitisti” (Jeremías 10:10). Ima Kueraajpiristi iámindu amberi enga tsípiti jaka. I ambeksï uandaspti máru ánjilicha auandarhu: “Tʼu kueraaska iámindu ambe, ka jimbokari tʼu ísï uékaska, ísï jimbosïksï jarhani jati ka kueraakatenksï” (Jaŋaskuecha [Apocalipsis] 4:11). Ka pirekua ma jimbo, Dabidi i ambe arhispti Jeobani: “Tʼurisï íntspijka tsípikuani” (Salmo 36:9). Ísï jimbo, tsípikua, Tata Diosïri regalu máesti.

2. ¿Ambejtsïni íntskusïni Tata Diosï parachi tsípiti jarhani?

² Ístu, Jeobasï újti eskachi tsípiti jauaka (Ukuecha 17:28). Jeobajtsïni íntskusïndi tʼirekua parachi arhani, itsï parachi itsïmani, tarhiata parachi jirejtani ka ini echerini engachi jimbo irekani jaka (arhinta je Ukuecha 14:15-17). Ka íntskusïndijtsïni i ambe parachi agustu irekani. Peru parachi meru sési irekani, jatsiskachi para mítiani Tata Diosïri mandamientuechani ka kurhajchaani (Santiagu 1:25).

3. ¿Néna exespi Tata Diosï enga Kaini uándikupka Abelini?

³ Tata Diosï uékasïndi eskachi jukaparharaaka juchari tsípikuani ka ístu máteruecheri. Ju je exeni ejemplu ma. Kaini,  Adani ka Ebaeri uájpa, kánikua ikiaspti imeri ermanu sapichu jingoni, enga Abeli arhinhaenga. Jeoba arhispti Kainini eska indeni ikiatapu jimbo, úpiringa kʼéri pekadu ma úni, peru Kaini no kasu úkuspti. “Ataspti imeri ermanuni Abelini ka uándikuspti.” (Génesis 4:3-8.) Biblia uandasïndi eska Jeoba kastigarispka Kainini, jimboka uándikuspka ermanuembani (Génesis 4:9-11).

4. ¿Néna xarhataspi Tata Diosï, Moisesiri leichani jimbo, na engachi jatsika para exeni tsípikuani?

⁴ Uánikua uéxurhini tátsekua, Jeoba íntsaaspti israelitechani leichani parakaksï marhuakupiringa ísï eska ima na jaiapanhintajka. Jeoba, profeta Moisesini jimbo íntspiaspti ini leichani, jimboksïsï Moisesiri lei arhinhajti. Ka Moisesiri leichaksï i ambe juramusïrendi: “Asï uándikpi” (Roma 13:9). I juramukua xarhatakuaspti israelitechani eska Tata Diosï jukaparharasïnga kʼuiripuecheri tsípikuani, ka eskachi iámindu jatsiska para májkueni úni.

5. ¿Nénachi jatsiski para exeni abortuni?

⁵ ¿Ka na exesïni Tata Diosï imani charhakuechani engaksï útasï amamberi matrisirhu jarhajka? Moisesiri leichaksï uandasïrendi eska no sésispka uándikuni charhakuni ma enga nótki andajpenuaenga. Jo ísïsti: ístu ima tsípikua kánikua jukaparhasti para Jeoba (arhinta je Éxodo 21:22, 23; Salmo 127:3). I ambe arhikuekasïndi eska no sési jarhaska abortarini.

6. ¿Andichisï no jatsi para kurhunhiani máteruechani?

⁶ Parachi jukaparharani tsípikuani, ístuchi jatsiska para sési kaani máteruechani. Biblia uandasïndi: “Ima enga ikiajka exeni ermanuembani, uándikpitisti. Ka chájtsï mítiska eska ima enga uándikpini jámajka, nómindu jatsi[a]ka tsípikua para méntkisï” (1 Juanu 3:15). Engachi uékaaka irekani para méntkisï, nochi jatsiska para máteruechani kurhunhiani, jimboka sáno iámindu no sési kámberakuecha, kurhunhekua jimboksï uénasïnga (1 Juanu 3:11, 12). Jukaparhakuesti jorhenguarhini kánikua uékperani.

7. ¿Ambe bisiuechaksï xarhatasïni eskachi no jukaparharasïnga tsípikuani?

 ⁷ ¿Ka nénachi uá xarhatani eskachi jukaparharasïnga juchari tsípikuani? Kasi no nema uékasïndi uarhini, peru uánikuechaksï imani ambe úsïndi enga uáka uándikuani. Máruksï tsitisïndi tabaku ambe úrani, mariuana ka iámindu jásï drogaecha. I ambe no sési útspisïndi ka uánikuaksï niárasïndi jamberi uarhini. Ísï jimbo, ima enga i járhati bisiuechani jatsiajka, xarhatasïndi eska no jukaparharasïnga tsípikuani. Para Tata Diosï ikichakueni jásï ambestiksï i járhati bisiuecha (arhinta je Roma 6:19; 12:1; 2 Korintu 7:1). Parachi úni marhuakuni Jeobani ísï eska ima na jaiapanhintajka, jatsiskachi para jurajkuani ini bisiuechani, nájkirukajtsïni kánikua úkua jukachiaka. Jeobajtsïni uáti jarhuatani, ka ima kánikua jukaparharasïndi engachi jánguarhintajka ísï exeni juchari tsípikuani komueska ambakiti regalu ma engajtsïni ima íntskuka.

8. ¿Andichisï jatsi para méntkisï jánguarhintani eska jucha o máteru nema no no sési ambe úkuarhinchaaka?

⁸ Engachi jukaparharaska tsípikuani, jánguarhintaakachi paraka jucha o máteru nema, no no sési ambe úkuarhinchaaka. Jatsiskachi para xéparini jámani, ka no úni ima ambe engachi jimbo úkuarhinchaaka ambe ma. Jatsiskachi para trokani sési kámani, no uinhamu ka níjtu kauirini, níjtu imani ambe chʼanani engachi jimbo uáka no sési ambe úkuarhinchani, komueska toru jataani, karate o máteru ambe (Salmo 11:5). Lei enga Jeoba íntsaapka israelitechani, ísï uandasïrendi: “Engari kʼumanchikua ma uáka, jimajkani jatsiskari para asotearhu, barda sapichu ma jatsirhukuni, parakari tʼu no kulpa jatsiaka enga nema [...] jima uératini uekorhintaaka” (Deuteronomio 22:8). I lei prinsipiu ma jukasti engajtsï cha jatsika para chúxapani. Ma ejemplu ariisti, chájtsï jatsiska para exeni eska chári patiurhu no jauaka ambe ma, enga nemani uáka kuaskuni, ka niárani kánikua no sési ambe úkuarhinchani. Engajtsï troka ma kámajka, jatsiskajtsï para exeni eska sési jauaka. Asï jurajku je eska chári  kʼumanchikua o chári troka, jindeuaka ma ambe enga jimbo cha, o máteru nema uáka no sési ambe úkuarhinchani.

9. ¿Nénachi kaaua animalichani engachi jukaparharaska tsípikuani?

⁹ ¿Néna exesïni Tata Kueraajpiri animalicheri tsípikuani? Ístu kánikua jukaparharasïndi. Ima uandasïndi eskachi uáka uándikuani animalichani parachi tʼireni, xukuparhani o para tsípikua kuájchakuni (Génesis 3:21; 9:3; Éxodo 21:28). Peru ima enga no sési kájka animalichani, o ísku jatini uándikuani o uarhipetaraani, no sési ambe úsïndi ka xarhatasïndi eska no jukaparharasïnga tsípikuani (Proverbios 12:10).

10. ¿Néna xarhataspi Tata Diosï eskaksï sáno májkueniska tsípikua ka iurhiri?

¹⁰ Enga Kaini, uándikupka Abelini, Jeoba arhispti: “Chíti ermanueri iurhiri, uinhachaparini uandajpaxatirini echerirhu uératini” (Génesis 4:10). Enga Tata Diosï uandapka Abeliri iurhirini, imeri tsípikuanisï arhikuekani japti. Kaini uándikuspti ermanuembani ka jatsispti para kastigarinhani. Ísïspti enajki Abeliri iurhiri, o imeri tsípikua, uandajpani japiringa Jeobani paraka no ísku pakarapiringa imeri uarhikua. Enga na nitamapka Noeri Dilubiu, Tata Diosï ménderu xarhataspti na enga sáno májkuenika [jukaparhakueka] tsípikua ka iurhiri. Ante de Dilubiu, kʼuiripuecha i ambejkuksïsï uáendi arhani: fruta, berdura, mámaru jásï granu ka fruta kʼarhiri. Peru tátsekua i ambe mójtakurhispti. Jeoba arhispti Noeni ka imeri uájpechani: “Iámindu animalini enga manakuarhijka ka enga tsípiti jaka, uákajtsï arhani”. Peru Tata Diosï arhiaspti ma ambe engaksï no jatsipka para úni: “Peru kʼuiripita imeri tsípikua jingoni —imeri iurhiri— nójtsï jámaaka arhani” (Génesis 1:29; 9:3, 4). Xarharasïndi eskaksï tsípikua ka iurhiri sáno májkueniska para Jeoba.

11. ¿Néna uandaspi Tata Diosï eskaksï no úrapiringa iurhirini desde Noeri tiempu jimbo?

¹¹ Ma ambe jimbo engachi xarhatajka eskachi jukaparharasïnga iurhirini, jindesti no arhani. Ima leini enga Jeoba  íntskuapka israelitechani, i ambe juramuspti: “Enga ma israelita [...] niuaka ataani animalichani, ka uándikuni animali juátarhu anapuni ma o pájaruni ma enga újka anhani, jatsisti para tsïtakuni iurhirini ka tʼupuri atajchakurani. Jimbokani [...] ji arhiaska israelitechani: ‘Nójtsï jatsiska para arhani iurhiri no ma jásï kʼuiripitaeri [...]’” (Levítico 17:13, 14). Ima juramukua enga Tata Diosï íntskupka Noeni sáno ochosientu uéxurhinisï antesi, para no arhani animalicheri iurhirini, útasï marhuasïrendi. Ixú xarharasïndi na enga eratsienga Jeoba: imeri jántspirichaksï úsïrendi arhani animalicheri kʼuiripitani, peru iurhirini nómbe. Jatsisïrendiksï para echerirhu tsïtani, ini ambe úparini, ísïspti, enajkiksï Jeobani íntskuntani japi animaliri tsípikuani.

12. ¿Náki juramukua iurhiriri ambeksï intsïnhaspi primeru siglurhu anapuecha espiritu santu jimbo ka enga marhuajka iásï jamberi?

¹² Kristianuechajtuchi sáno májkueni jásï juramukua ma intsïnhaska. Primeru siglurhu, apostulicha ka máteruecha engaksï orhejtsïkukuauenga Jesusiri jorhenguarhitichani, tánguarhisptiksï para exeni náki juramukuechani jatsispiksï para kristianuecha kurhajchaani. Ka i ambeksï uandaspti: “Jimboka Espiritu Santu ka ístu jucha sési exeska nóksïni juramuchini másteru ambe enga úkua jukaka, sino solu indeni ambe engamindu uétarhijka. Ka i jindeesti: eskajtsï no auaka iduluecheri kéjtsïtakuani, ka ni iurhirini, ka níjtujtsï auantaani animalichani engaksï pirajchakukateaka [engaksï no tsïtakuajka iurhirini], ka nójtujtsï ísku jándi úkuarhini” (Ukuecha 15:28, 29; 21:25). Ísï jimbo ‘nochi auaka iurhirini’. I ambe, xáni jukaparhakuesti para Tata Diosï, komueska no jámani idoluechani kómarhiani ka níjtu ísku jándikua ambe úni.

13. ¿Náki ejemplu xarhatasïni eska iurhiri jatantani jindeska no kurhajchani juramukuani enga uandajka eskachi no jatsiska para iurhiri jiókuarhini?

¹³ ¿Inchaakusïni iurhiri jatantani imani juramukuarhu enga uandajka eskachi no auaka iurhiri? Jo, inchaakusïndi. Eranhaska je i ambe. Engaksïni doktori arhipiringa eskajtsï  no jámaaka alkoli arhani, ¿i ambe arhikuekasïni eskajtsï nóteru uákia arhani, peru eskajtsï kʼóru uáka benecharhu jukani? Nómbe. Ka ístu májkuenisti, no jiókuarhini iurhirini arhikuekasïndi no ma ambe jimbo jiókuarhini eskajtsïni iurhiri jatsirantaaka. Ísï jimbo, parachi úni kurhajchani ini juramukuani, jatsiskachi para no jiókuarhini eskajtsïni iurhiri jatsirantaaka.

14, 15. ¿Ambe úpirini kristianu ma engaksï doktoricha arhipiringa eska jatsiska para iurhiri jatantani ka andisï i ambe úpirini?

¹⁴ Peru ¿ambe úkuarhipirini enga kristianu ma kánikua no sési japiringa jimboka úkuarhinchaska ambe ma o enga kʼéri operasioni ma uétarhinchapiringa? Ju je eranhaskani eskaksï doktoricha arhisïnga eska jatsiska para iurhiri jatantani, ka eska uarhiaka enga no jiókuarhiska. Seguruchi jarhaska eska kristianu no uékasïnga uarhini. Ka jimboka no uékasïnga tsïtani tsípikuani, jimboka regalu máeska Tata Diosïri, jiókuarhiati máteru jásï ambe engaksï doktoricha úrajka, peru enga jimbo no no sési úranhaaka iurhiri. Jimbosï jiókuarhipirindi ambe ma, uánikua ima amberi enga úranhani jakaia iásï paraka ma kʼuiripu no iurhiri jatantaaka.

¹⁵ ¿Tekaapirini kristianu ma uanajchakuni Tata Diosïri juramukuani, no masi para sánderu tiempu irekani? Jesusi uandaspti: “Nákinterku nema enga uékajka kuájpikuarhini para tsípikua jatsini, masi uáka tsïtani. Ka nákinterku nema enga jindeni jimbo tsïtaaka tsípikuani, jatsiati tsípikua” (Mateu 16:25). No nema uékasïndi uarhini. Peru engachi uékaaka kuájpini tsípikuani, no kurhajchaparini Tata Diosïri juramukuechani, uákachi tsïtani irekakuani enga jindeuaka para méntkisï. Ísï jimbo, jatsiskachi para mintsikani eska inde ambe engajtsïni Tata Diosï juramuchijka, sésiska para jucha. Ka uákachi seguru jarhani eska engachi niáraska uarhini, Tata Kueraajpirijtsïni miántaati tsíntskuarhu, ka íntskuntaatijtsïni ménderu tsípikuani (Juanu 5:28, 29; Ebreu 11:6).

16. ¿Ambeksïsï méntku eratsitini jaki úni iurhirini jingoni, imecha engaksï jurhimbikua jingoni marhuakujka Tata Diosïni?

¹⁶ Ima engaksï jurhimbikua jingoni marhuakujka Tata  Diosïni, méntkuksï eratsitixati kurhajchani Tata Diosïri juramukuani enga iurhiriri ambe uandajka. Ísï jimbo, nóksï ma ambe arhasïndi enga iurhiriri jingoniuaka ka níjtuksï úrajki iurhirini paraksï sési pʼikuarherantani. * Kánikuaksï sési mítitixati eska ima enga iurhirini Kueraaka sánderu sési mítiska, ambe sánderu sésiski para imecha. ¿Májkuentsï eratsisïni chájtu?

17. Tata Diosï, ¿nénajkusï jiáratapi ióntki israelitechani paraksï úrani iurhirini?

¹⁷ Moisesiri Lei, sési xarhataspti nénajkusï jatsipi para úrakuarhini iurhiri. Enga Jeoba arhistakuapka israelitechani na engaksï jatsipka para kómarhini, ístu arhiaspti: “Jimboka iurhirirhu jarhaska, tsípikua iámindu amberi enga tsípiti jaka, ka ji mísmu peeraska altarirhu para chánksïni jimbo, para euajpintskua ma úni chári tsípikuechani jimbo, jimboka iurhirisï újka eskajtsï euajpinhantaaka” (Levítico 17:11). Engaksï israelitecha pekadu ambe uáenga, úpirindiksï puáminhantani engaksï íntspepiringa animali ma, ka engaksï ma parti iurhiririni altarirhu pápiringa enga tabernakulurhu japka, o sánderu orhepatini imani altarini jimbo enga Tata Diosïri templurhu japka. Ísïjkusï úpirindi úrakuarheni iurhiri.

18. ¿Nénajtsïni marhuachia ka ambe kóntperatechanchi intsïnhaa jimboka tata Jesukristu tsïtaska imeri iurhirini?

 ¹⁸ Jurhimbiti kristianuecha, nóteruksï chúxapasïndia Moisesiri Leini, ka jimboksïsï no kéjtsïtaajti animalichani ka niksï altari ma jimbo pájki inde animalicheri iurhirini (Ebreu 10:1). Peru na engaksï úraenga iurhirini ióntki israelitecha, xarhatasïrendi imani xáni jukaparhakua kéjtsïtakuani enga sánderu orhepatini úkuarhipiringa: Tata Diosïri Uájperi, Jesukristu. Eskachi na jorhenguarhikia kapitulu 5 jimbo, tata Jesukristu íntspespti imeri tsípikuani juchantsïni jimbo, enga íntspipka imeri iurhirini komueska kéjtsïtakua ma. Tátsekua, karhanchintaspti auandarhu ka kéjtsïtakuspti Tata Diosïni ma ueltajku ka para méntkisï, na enga xáni jukaparhakuepka imeri iurhiri (Ebreu 9:11, 12). I ambe, marhuaspti para jucha puáminhantani pekaduechani ka mítachistijtsïni xanharuni ma parachi úni irekani para méntkisï (Mateu 20: 28; Juanu 3:16). Jo, ísï jásï eska na úranhapka iurhiri, kánikua jukaparhakuespti (1 Pedru 1:18, 19). Ka jiájkantkuchisï uáka pʼímutantskateni, engachi mintsikaska eska kánikua jukaparhakueska iurhiri enga Jesusi tsïtaka.

19. ¿Ambe jatsiski para úni kristianu ma para úni uandani “nómbe kʼamanharhintskua jatsiaka enga nema tsïnchiaka”?

¹⁹ ¡Kánikuachi agradesidu pʼikuarherasïnga juchari ambakiti Tata Diosïni jingoni, jimbokajtsïni íntskuska tsípikuani! I ambe engachi jucha pʼikuarherajka Tata Diosïni jimbo, jatsisti para úni eskachi eianguauaka kʼuiripuechani eska engaksï jakajkuska eska tata Jesukristu uarhiska juchantsïni jimbo, uákaksï irekani para méntkisï. Ka ini ambe, kánikua tsípikua jingonchi uáka, jimboka májkueni eska Jeoba, juchajtuchi kánikua jukaparharasïnga máteruecheri tsípikuani (arhinta je Ezequiel 3:17-21). Engachi sési úska ini ánchikuarhitani, uákachi ísï uandani eska apostuli Pablu: “Ji nómbe kʼamanharhintskua jatsiaka enga nema tsïnchiaka, jimbokani ji no méni kuerataska eiangunksïni iámindu ambe enga Tata Diosï tantiarika” (Ukuecha 20:26, 27). Jo ísïsti, ma ambe engachi jimbo uáka xarhatani eskachi jukaparharasïnga tsípikuani ka iurhirini, jindesti eianguaparini máteruechani Tata Diosïri ambe, ka ambe enga ima eratsitini jaka úni.