1. Kuchi usoko muuhasa kupwa ni uwahililo?

 YEHOVA ZAMBI kanazange usoko we uwahilile. Liji lienyi, Mbimbiliya, linahana usongwelo kuli asoko eswe ni kulumbununa milimo yize Zambi anazange hanga mutu mweswe alinge mu usoko. Nyi eswe mu usoko malinga milimo yo nikulita ni usongwelo wa Zambi, usoko muupwa ni uwahililo unji. Yesu kambile ngwenyi: “Kawaha waze akwivwa liji lia Zambi nikulifunga!”—Luka 11:28.

2. Yika twatamba kulinga mba usoko upwe ni uwahililo?

² Nyi mutufupa usoko wetu uwahilile, twatamba kunyingika ngwetu Yehova, yoze Yesu te akuvuluka ngwenyi “Tata,” mwe watangile usoko. (Mateu 6:9) Usoko weswe hano hashi wakatuka kuli Tata yetu wa mu malilu—yoze wanyingika kanawa yize yakuneha uwahililo mu usoko. Yika mba, Mbimbiliya yakulongesa hakutwala ku mulimo wa mutu ni mutu mu usoko?

3. Kuchi Mbimbiliya yinasolola uputukilo wa usoko, nawa kuchi tunanyingika ngwetu yize yinambe yili yamwenemwene?

³ Yehova katangile atu atangu, Alama ni Eva, yaanunga mu  ulo, yapwa lunga ni pwo. Yaasa mu paraisu yipema hano hashi—mu munda wa Endene—nawa yalweka hanga apwe ni ana. Yehova yamba ngwenyi: “Semenu nuliokese, nukazalise hashi.” (Uputukilo 1:26-28; 2:18, 21-24) Chino hi chishima cha kutomba ko, mumu Yesu kasolwele ngwenyi sango jize jili ha mukanda wa Uputukilo hakutwala ku uputukilo wa usoko jili jamwenemwene. (Mateu 19:4, 5) Chipwe ngwe twakupinda ni ukalu weka ni weka, mwono nawa kuushi ngwe chize Zambi azangile, alioze tutalenu chize usoko muuhasa kupwa ni uwahililo.

4. (a) Kuchi mutu ni mutu mahasa kukwasa usoko hanga upwe ni uwahililo? (b) Mumu liaka kulilongesa yitanga ya Yesu muchihasa kukwasa usoko hanga apwe ni uwahililo?

⁴ Mutu ni mutu mahasa kukwasa hanga usoko upwe ni uwahililo ha kwimbulula zango lia Zambi ni kulisolola. (A-Efwesu 5:1, 2) Mba kuchi mutuhasa kwimbulula Zambi yoze kutushi kumona? Mutuhasa kunyingika kanawa yitanga ya Yehova mumu Mwanenyi mutangu yoze atumine hano hashi kayisolwele. (Yoano 1:14, 18) Muze Yesu Kristu apwile hano hashi, iye kembulwile kanawa Tato wa mu malilu, kashika waze amwene Yesu ni kumupanjika kapwile ngwe kali hamwe ni Yehova ni kumupanjika. (Yoano 14:9) Kashika, ni mutulilongesa zango lize Yesu asolwele ni kwimbulula chilweza chenyi, mutuhasa kukwasa usoko wetu hanga upwe ni uwahililo.

5, 6. (a) Kuchi chize Yesu akufunga chikungulwila chili chilweza kuli malunga? (b) Yika chatamba kulinga mba mutu amukonekene shili yenyi?

⁵ Mbimbiliya yinambe ngwo malunga kaatamba kufunga mapwo jo ngwe chizechene Yesu akufunga tumbaji twenyi. Tala shimbi yino ya Mbimbiliya: ‘Yenu malunga, zangenu akwenu-mapwo, chizechene ngwe Kristu nawa wazangile Chikungulwila, kashika walikunjikile . . . Nawa chatamba malunga kuzanga akwo-mapwo chizechene ngwe mijimba  yo ene. Yoze mazanga mukwo-pwo, kanalizange iye mwene, mumu niumwe kechi kupwa ni kole ha musunya wenyi mwene nilimwe tangwa, alioze maulela, maufunga, chizechene ngwe Kristu nawa akulinga ni Chikungulwila.’—A-Efwesu 5:23, 25-29.

⁶ Zango lia Yesu ha chikungulwila cha tumbaji twenyi linasolola chilweza chipema kuli malunga. Yesu “waazangile ndo ku songo,” iye yahana mwono wenyi hali ayo chipwe ngwe te yihenge. (Yoano 13:1; 15:13) Chizechene nawa, malunga kanalweze ngwo: ‘Zangenu akwenu-mapwo. Kanda nupwa asasu kulimika no.’ (A-Kolosu 3:19) Yika muyikwasa lunga hanga akaule shimbi yacho, chipi-chipi nyi mukwo-pwo ha mashimbu akwo keshi kusolola yitanga yipema? Katamba kwiwuluka ngwenyi neye kakulinga uhenge uze atamba kumukonekena kuli Zambi. Yika atamba kulinga? Katamba kukonekena mukwo-pwo ngwe chizechene akukonekena atu eka. Ewa, mukwo-pwo neye katamba kulinga chochene. (Tanga Mateu 6:12, 14, 15.) Unanyingika yize amwe akwambila ngwo ulo upema ndo uze uli ni atu aali waze akulikonekena?

7. Yika Yesu te akunyingika hali tumbaji, kuchi yino yili chilweza kuli malunga?

⁷ Malunga kaatamba kunyingika nawa ngwo Yesu kapwile ni kuvwila tumbaji twenyi keke. Iye kanyingikine yize mahasa kulinga ni yize yafupiwa kuli ayo. Chakutalilaho, limwe tangwa muze tumbaji te anahongo iye yaamba ngwenyi: “Tweyenu ukawenu ku puya, nukahwime hakepe.” (Marku 6:30-32) Mapwo noo katela kwevwila keke yinji. Mbimbiliya yinambe ngwo ayo kali ngwe “chikwachilo chilelu” kashika malunga anaalweze hanga aase “ulemu.” Mumu liaka? Mumu ayo eswe, malunga ni mapwo, kapwa “maswana-ni-akwo ja vumbi lia mwono.” (1 Petulu 3:7) Malunga kaatamba kwiwuluka ngwo chuma chakulemesa mutu hi kupwa lunga chipwe pwo ko, alioze ushishiko, we wakulemesa mutu kumeso ja Zambi.—Samu 101:6.

8. (a) Mumu liaka ambila ngwo lunga ‘yoze wakuzanga mukwo-pwo kakulizanga iye mwene’? (b) Kupwa “musunya umuwika” yika chinalumbunuka kuli lunga ni pwo?

⁸ Mbimbiliya yinambe ngwo lunga “yoze mazanga mukwo-pwo, kanalizange iye mwene.” Mumu lunga ni mukwo-pwo  ‘hi aali nawa ko, alioze musunya umuwika’ ngwe chize Yesu ambile. (Mateu 19:6) Kashika usolo wa kulimona watamba kupwa wika mukachi ka ayo aali. (Yishima 5:15-21; A-Hepreu 13:4) Mahasa kuchilinga nyi mutu ni mutu masolola zango hali mukwo. (1 A-Korindu 7:3-5) Kashika tala ulemu wa maliji wano: ‘Mumu niumwe kechi kupwa ni kole ha musunya wenyi mwene nilimwe tangwa, alioze maulela, maufunga.’ Lunga katamba kuzanga mukwo-mapwo ngwe chize akulizanga mwene, ni kunyingika ngwo makakumbulula chiteli chenyi kuli mwata wenyi Yesu Kristu.—A-Efwesu 5:29; 1 A-Korindu 11:3.

9. Ndako yika ya Yesu yize anavuluka mu A-Fwilipu 1:8, nawa mumu liaka malunga atamba kuyisolola kuli mapwo jo?

⁹ Postolo Paulu kahanjikile ha “zango lia Yesu Kristu.” (A-Fwilipu 1:8) Zango lia Yesu, liapwile ni kuhuzulula mbunge ja atu, kashika mapwo waze apwile tumbaji twenyi te akuwahilila chinji ha zango lienyi. (Yoano 20:1, 11-13, 16) Ni mapwo kakuzanga malunga jo asolwele zango liacho.

10. Chilweza chika cha Yesu chize mapwo atamba kukaula?

¹⁰ Usoko uli ululikiso uze watamba kupwa ni mwata mba ukalakale kanawa. Chipwe Yesu neye kali ni Mwata yoze akuzeyela. Kashika Mbimbiliya yinambe ngwo, “Zambi iye mutwe wa Kristu” ngwe chizechene nawa “lunga, iye mutwe wa pwo.” (1 A-Korindu 11:3) Kuzeya cha Yesu ku Wata wa Zambi chili chilweza chipema, mumu tulieswe tuli ni umwe mwata yoze twatamba kuzeyela.

11. Ndako yika pwo atamba kusolola kuli mukwo-lunga, nawa kuchi ndako yenyi muyihasa kukwasa mukwo-lunga?

¹¹ Ha mukunda wa shili malunga ha mashimbu akwo kakuhengesa, nawa keshi kuhasa kupwa miata apema mu usoko.  Ha chino, yika pwo chamutamba kulinga? Iye katambile kulelesa mukwo-lunga hanji kweseka kumutambula wata. Pwo katamba kwiwuluka ngwenyi ku manyonga ja Zambi, kupwa ni spiritu ya kushimbika ni ya uhumikizo chili chilemu chinji. (1 Petulu 3:4) Nyi pwo mapwa ni spiritu yacho, muchipwa chashi kusolola uzeyelo uze Zambi azanga, chipwe ha mashimbu a yeseko. Mbimbiliya yinambe ngwo: “Ha kutwala kuli pwo akavwile woma mukwo-lunga.” (A-Efwesu 5:33) Kuchi pwo malinga nyi mukwo-lunga keshi kutayiza wata wa Kristu? Nihindu Mbimbiliya yinambe kuli mapwo ngwo: ‘Zeyelenu kuli akwenu-malunga; hanga chipwe kachi amwe keshi kwononoka ku lie liji lia Zambi, akaazuke ni liji liakuhi kukwenda cha akwo-mapwo, ha kutwala ku kwenda chenu cha kulinanga hamwe ni woma.’—1 Petulu 3:1, 2.

12. Mumu liaka hi chipi ko nyi pwo masolola limwe nyonga ni uhomboloji weswe?

¹² Mukwo-lunga chipwe kapwa mukwa-kufuliela nyi ka, hi kuhona vumbi ko nyi pwo masolola ni uhomboloji weswe nyonga lize linalise ni lia mukwo-lunga. Nyonga lienyi mulihasa kupwa lipema, nawa usoko weswe muuhasa kuyuka nyi lunga mamupanjika. Chipwe tuhu Apalahama kakatayijile muze mukwo-pwo Sara amuhele chiyulo chipema hanga ahwise mulonga mu usoko wo, alioze Zambi yamba kuli Apalahama ngwenyi: “Panjika ku liji lienyi.” (Tanga Uputukilo 21:9-12.) Kashika, nyi lunga makwata chiyulo chize kuchehukile shimbi ja Zambi, mukwo-pwo masolola uzeyelo wenyi ni kumukwasa.—Yilinga 5:29; Efwesu 5:24.

13. (a) Yika atamba kulinga mapwo ali ku malo kulita ni Titu 2:4, 5? (b) Yika Mbimbiliya yinambe ha kulihandununa ni kulilakula?

¹³ Nyi pwo malinga milimo yenyi kanawa, mahasa kufunga usoko. Chakutalilaho, Mbimbiliya yinambe ngwo mapwo waze ali ku malo katamba “kuzanga akwo-malunga ni ana jo. Apwe akwa mana, akwa kutoma, akwa kufunga mazuwo jo, apema, akwa kuzeyela kuli akwo-malunga.” (Titu 2:4, 5) Chisemi wa pwo yoze malinga chocho mazuka zango ni vumbi linji kuli usoko wenyi. (Tanga Yishima 31: 10, 28.) Ulo uli kulinunga cha atu aali a uhenge, kashika ha mashimbu akwo ayo maahasa kulipinjisa ni kulihandununa hanji kulilakula. Mbimbiliya yinambe yuma yize muyihasa kuhandununa lunga ni pwo. Chipwe chocho, hi chipema ko kunyonga ngwetu kulihandununa chili chuma chilelu, mumu Mbimbiliya yinatoweza ngwo: “Pwo kanda alihandununa ni mukwo-lunga. . . . Lunga kanda akahichika mukwo-pwo.” (1 A-Korindu 7:10, 11) Mbimbiliya yinambe ngwo lunga ni pwo mahasa kulilakula ha mulonga wa utanji wika.—Mateu 19:9.

14. Yika Yesu apwile ni kulinga hakutwala kuli twanuke, nawa yika ana azanga kuli yisemi jo?

¹⁴ Yesu kahichikile chilweza chipema kuli yisemi ha chize chatamba kufunga ana. Muze amwe akanjishile ana kukundama kuli Yesu, iye yaamba ngwenyi: “Tayizenu ana akepe eze kuli yami; kanda nuakanjisa.” Mbimbiliya yinambe ngwo hohene “Iye yaasa mu kondo, yaawahisa, nikusayika moko jenyi hali ayo.” (Marku 10:13-16) Yesu kapwile ni kuwana shimbu lia kutwama ni twanuke, shina ni yena chenacho wakulinga kuli ana je nyi? Ayo katamba kupwa ni yena ha mashimbu  anji hi ha mashimbu akehe ko. Nwatamba kupwa ni shimbu yakwaalongesa, mumu chenacho Yehova azanga hanga yisemi alinge.—Tanga Shimbi Yamuchiali 6:4-9.

15. Yika yisemi mahasa kulinga hanga afunge ana jo?

¹⁵ Muze hano hashi hanapiha chinji, ana katamba kupwa ni yisemi waze maafunga kanawa mumu lia atu waze akufupa kulinga upi, hanji upangala kuli twanuke. Tala chize Yesu afungile tumbaji twenyi ni zango, waze apwile ni kusanyika ngwenyi “ana akepe.” Muze amukwachile hanga amushihe, iye yaakwasa hanga achine. (Yoano 13:33; 18:7-9) Amu uli chisemi, watamba kukeya ku yeseko ya Ndiapu yize muyihasa kwenyeka ana je. Watamba kwaatoweza. a (1 Petulu 5:8) Musono  yuma yize yakupihisa ana ku mujimba, ku spiritu ni mu mayonga yinoko chinji.

16. Yika yisemi mahasa kulilongesa ku chilweza cha Yesu ha chize alongesele tumbaji twenyi?

¹⁶ Ha ufuku uze Yesu te kanda achifwa, tumbaji twenyi yakokojola ha kufupa kunyingika iya te munene ha kachi ko. Yesu kakatenukinyine, alioze ni zango lieswe yaalongesa nikwaha chilweza. (Luka 22:24-27; Yoano 13:3-8) Nyi uli chisemi, unamono chize muhasa kukaula chilweza cha Yesu hanga ufumbe kanawa ana je? Ewa, ayo kaatamba kwaafumba “ni kulita,” alioze hi ni ufwatulo ko. Kuwatambile kuhanjika kalusulusu “ngwe kutuwa cha katana.” (Jeremia 30:11; Yishima 12:18) Fumbo katamba kulihana nikulita hanga mwana anyingike ulemu wa fumbo liacho.—A-Efwesu 6:4; A-Hepreu 12:9-11.

17. Kuchi Yesu kali chilweza chipema kuli ana?

¹⁷ Kutala ana no mahasa kulilongesa kuli Yesu? Mba, mahasa! Yesu kasolwele chilweza chize muchihasa kukwasa ana ononokene yisemi jo. Iye yamba ngwenyi: “Chizechene ngwe Tata wangulongesele, yenayo nakuhanjika.” Iye yawezelaho nawa ngwenyi: “Nakulinga matangwa eswe yuma yize ya kupemena kuli iye.” (Yoano 8:28, 29) Yesu kononokene kuli Tato wa mu malilu. Kashika, Mbimbiliya yinambe ngwo ana katamba kwononokena yisemi jo. (Tanga A-Efwesu 6:1-3.) Chipwe ngwe Yesu te mwana mungunu, nihindu kononokene kuli yisemi jenyi a hano hashi, Yosefwe ni Maria, waze te yihenge. Achi chanehene uwahililo kuli eswe mu usoko wa Yesu!—Luka 2:4, 5, 51, 52.

18. Mumu liaka Yesu te akwononokena Tato wa mu malilu, nawa iya mawahilila nyi ana mononokena yisemi jo musono?

¹⁸ Shina ana mahasa kwimbulula Yesu ni kuvwisa yisemi jo kuwaha nyi? Chochene, ha mashimbu amwe, akweze mahasa kumona ngwe chili chikalu kwononokena yisemi jo, alioze Zambi kanazange hanga alinge chocho. (Yishima 1:8;  6:20) Yesu te kakwononokena Tato wa mu malilu mashimbu eswe, chipwe ha mashimbu a yihungumiona. Ha shimbu yize Zambi wafupile ngwenyi Yesu alinge chimwe chuma chikalu, Yesu yamba ngwenyi: “Chiza kama musenge uno [chuma chize Zambi amwichile] kuli yami.” Chipwe chocho, Yesu yalinga yize Zambi amwichile, mumu iye kafulielele ngwenyi Tato kanyingika yize yili yipema hali iye. (Luka 22:42) Ana nyi mapwa ni ndako ya kwononoka, mevwisa kuwaha yisemi jo ni Tato wa mu malilu. b—Yishima 23:22-25.

19. (a) Kuchi Satana akweseka ana? (b) Kuchi yitanga yipi ya ana muyihasa kupinjisa yisemi?

¹⁹ Ndiapu kesekele Yesu, kashika ni akweze nawa mahasa kweseka hanga alinge yuma yipi. (Mateu 4:1-10) Satana kakuzachisa masepa a yitanga yipi hanga atweseke, chino muchihasa kupwa chikalu kwehuka. Kashika chili chilemu ana kuhona kulikata ni masepa waze akwete ndako jipi! (1 A-Korindu 15:33) Ndina, mwana wa Yakomba wa pwo te kakulikata ni atu waze keshi kuwayila Yehova, mba yichineha kapinda munji. (Uputukilo 34:1, 2) Achinyonga yinyengo yize asoko mahasa kwivwa nyi umwe wa mu usoko malinga utanji!—Yishima 17:21, 25.

20. Yika atamba kulinga mutu ni mutu mba apwe ni uwahililo mu usoko?

²⁰ Kukaula shimbi ja mu Mbimbiliya chakukwasa kuhwisa kapinda mu usoko. Chochene, kukaula shimbi jacho che chakuneha uwahililo mu usoko. Kashika, malunga zangenu mapwo jenu, nawa afungenu ngwe chize Yesu akufunga chikungulwila chenyi. Mapwo, zeyelenu ku chiyulo cha malunga jenu, nawa kaulenu chilweza cha pwo wamwenemwene yoze anasolola mu Yishima 31:10-31. Yisemi, fumbenu kanawa ana jenu. (Yishima 22:6) Atata, ‘yulenu mazuwo jenu kanawa.’ (1 Timoteu 3:4, 5; 5:8) Nawa enu ana, ononokenu yisemi jenu. (A-Kolosu 3:20) Mu usoko, niumwe uli mungunu wakwihi, mumu eswe kakuvulumuna. Kashika chatamba kulikehesa ni kulikonekena umwe ni mukwo.

21. Chilakenyo chika chipema tunashimbwila, nawa kuchi mutuhasa kupwa ni uwahililo mu usoko haliapwila?

²¹ Chochene, Mbimbiliya yili ni shimbi ni usongwelo unji hakutwala ku mwono wa mu usoko. Nawa yakulongesa upale wa Zambi ni paraisu hano hashi yize muyikazala to ni atu waze akuwayila Yehova ni chiseke. (Usolwelo 21:3, 4) Chilakenyo chino tunashimbwila, chili chipema chinji! Alioze chipwe haliapwila, mutuhasa kuwahilila mu usoko ha kukaula shimbi ja Zambi jize jili mu Liji lienyi, Mbimbiliya.