1. Kwa ki kapab fer ou lavi fanmiy ere?

ZEOVA i anvi ki ou lavi fanmiy i ere. I donn bann gidans dan son Parol, Labib, pour bann fanmiy. I dekrir rol sak manm fanmiy. Kan tou manm fanmiy i desarz zot rol an akor avek konsey Bondye, zot ganny bann bon rezilta. Zezi ti dir: ‘Ere dimoun ki ekoute e obei parol Bondye.’—Lik 11:28.

2. Ki nou bezwen rekonnet pour nou fanmiy ere?

² Pour nou fanmiy ere, nou bezwen premyerman rekonnet ki Zeova ki’n konmans lafanmiy. Zezi ti apel li “nou Papa.” (Matye 6:9) Tou fanmiy lo later i egziste akoz nou Papa dan lesyel e definitivman i konnen kwa ki fer en fanmiy ere. (Efezyen 3:14, 15) Ki Labib i dir lo rol sak manm fanmiy?

3. Ki mannyer Labib i dekrir konman lafanmiy imen ti konmanse, e ki mannyer nou konnen sa i vre?

³ Zeova ti kree premye koup imen, Adan ek Ev, e ini zot ansanm konman msye ek madanm. I ti met zot dan  en zoli zarden lo later ki ti apel zarden Edenn e dir zot fer zanfan. Zeova ti dir: “Fer zanfan e vin bokou, ranpli later.” (Zenez 1:26-28; 2:18, 21-24) Sa pa zis en zistwar oubyen en lezann akoz Zezi ti montre ki sa ki Zenez i dir lo lorizin fanmiy i vre. (Matye 19:4, 5) Kantmenm nou rankontre bokou problenm e sa lavi ki nou pe viv i pa sa ki Bondye ti oule, annou vwar akoz i posib pour nou fanmiy ere.

4. (a) Ki mannyer sak manm fanmiy i kapab ede fer lavi fanmiy ere? (b) Akoz etidye lavi Zezi i tre enportan pour fer en fanmiy ere?

⁴ Sak manm fanmiy i kapab ede fer lavi fanmiy gou ler zot imit Bondye par montre lanmour. (Efezyen 5:1, 2) Me ki mannyer nou kapab imit Bondye, vi ki nou pa kapab vwar li? Nou kapab aprann ki mannyer Zeova i azir akoz I ti anvoy son Garson premye ne lo later. (Zan 1:14, 18) Ler Zezi Kri ti lo later, i ti imit son Papa dan lesyel sitan byen, ki ou a krwar Zeova menm ki ou ti pe vwar e ekoute. (Zan 14:9) Alor ler nou aprann konsernan lanmour ki Zezi ti montre e swiv son legzanp, nou tou nou pou kapab fer nou lavi fanmiy pli gou.

5, 6. (a) Ki mannyer fason ki Zezi ti tret kongregasyon i en legzanp pour bann msye swiv? (b) Ki nou bezwen fer pour ganny pardonnen nou pese?

⁵ Labib i dir ki bann msye i devret tret zot madanm parey Zezi ti tret son bann disip. Get sa konsey ki Labib i donnen: ‘Zot, bann mari, kontan zot madanm parey Kris in kontan kongregasyon e in donn son lavi pour li. . . . Bann zonm devre alor, kontan zot madanm parey zot kontan zot prop lekor. Sa ki kontan son madanm, i kontan son prop lekor. Annefe napa personn ki’n deza ay son prop lekor, okontrer, i nouri li e pran byen swen avek li, parey Kris i fer pour kongregasyon.’—Efezyen 5:23, 25-29.

 ⁶ Lanmour ki Zezi ti annan pour son bann disip i en legzanp parfe pour bann msye swiv. Zezi ti “kontan zot ziska lafen.” I ti sakrifye son lavi pour zot, menm si zot ti enparfe. (Zan 13:1; 15:13) Bann msye i ganny ankouraze pour fer parey: “Kontan zot madanm e pa tret zot dir.” (Kolosyen 3:19) Kwa ki pou ed en msye aplik sa konsey, sirtou si parler son madanm pa azir dan en fason responsab? I devret mazinen ki li osi i fer fot e mazinen ki i bezwen fer pour Bondye pardonn li. Ki i bezwen fer? I bezwen pardonn bann ki fer pese kont li, e sa i enkli son madanm. Byensir, son madanm osi i bezwen fer parey. (Matye 6:12, 14, 15) Se pour sa rezon ki serten dimoun i dir en maryaz reisi i en linyon ant de dimoun ki pare pour pardonnen.

7. Ki Zezi ti pran an konsiderasyon, e ki legzanp sa i kite pour bann msye?

⁷ I byen pour bann msye gard antet ki Zezi ti touzour montre konsiderasyon pour son bann disip. I ti pran an konsiderasyon zot limit ek zot bezwen fizik. Par egzanp kan zot ti fatige, i ti dir: “Vin avek mwan dan en landrwa trankil kot zot a kapab repoze an-pe.” (Mark 6:30-32) Bann madanm osi i merit en pe konsiderasyon. Labib i dir zot “annan en natir pli feb” e bann msye i ganny demande pour “tret zot avek respe.” Akoz? Akoz msye ensi ki madanm i partaz menm “kado lavi ki Bondye in donnen.” (1 Pyer 3:7) Bann msye i devret mazinen ki fidelite ki fer en dimoun presye devan Bondye, pa si i en zonm oubyen en madanm.—Psonm 101:6.

8. (a) Akoz en msye “ki kontan son madanm, i kontan son prop lekor”? (b) Lefe ki en msye ek son madanm i “en sel,” ki sa i vedir?

⁸ Labib i dir en msye “ki kontan son madanm, i kontan son prop lekor.” Sa i akoz en zonm ek son madanm “nepli de me en sel,” parey Zezi ti dir. (Nou ki’n met an italik;  Matye 19:6) Alors zot pa devret annan en lot dimoun an deor zot maryaz. (Proverb 5:15-21; Ebre 13:4) Zot pou kapab fer sa si zot pran lentere kanmarad aker olye konn zis zot lekor. (1 Korentyen 7:3-5) Remark sa ki Labib i dir: “Napa personn ki’n deza ay son prop lekor, okontrer, i nouri li e pran byen swen avek li.” Bann msye i bezwen kontan zot madanm parey zot kontan zot prop lekor. Zot bezwen mazinen ki zot osi zot bezwen rann kont avek zot sef, Zezi Kri.—Nou ki’n met an italik; Efezyen 5:29; 1 Korentyen 11:3.

9. Ki kalite Zezi ti annan ki ganny mansyonnen dan Filipyen 1:8? Akoz bann msye i devret demontre sa kalite anver zot madanm?

⁹ Zapot Pol ti koz lo ‘sa profon lafeksyon ki Kris-Zezi i annan.’ (Filipyen 1:8) Sa i en kalite ki ti rekonfort lezot, en kalite ki ti atir bann madanm ki ti vin son disip. (Zan 20:1, 11-13, 16) Sa i montre ki bann madanm i byen bezwen lafeksyon zot msye.

10. Ki legzanp Zezi in kite pour bann madanm?

¹⁰ En fanmiy i parey en lorganizasyon, e pour keksoz mars byen i bezwen annan en sef. Menm Zezi i annan en Sef ki i bezwen soumet avek. “Bondye i sef Kris,” zis parey “en mari i sef son madanm.” (1 Korentyen 11:3) Soumisyon Zezi anver lotorite Bondye i en bon legzanp, akoz nou tou nou annan en sef ki nou bezwen soumet avek.

11. Ki latitid en madanm i devret annan anver son msye, e ki lefe son kondwit i kapab annan?

¹¹ Bann zonm enparfe i fer fot e souvan zot pa arive vin sa sef ideal pour lafanmiy. Alor ki en madanm i bezwen fer? I pa devret abes son msye oubyen sey pran son plas konman sef. I byen pour en madanm gard antet ki en latitid trankil e dous i annan en gran valer dan lizye Bondye. (1 Pyer 3:4) Si i demontre sa kalite latitid, i pou vwar li  pli fasil pour soumet, menm dan bann sitiasyon vreman difisil. Deplis, Labib i dir fodre “ki sak madanm i respekte son mari.” (Efezyen 5:33) Me si sa msye pa aksepte Kris konman son Sef? Labib i konsey bann madanm: “Zot bann madanm, soumet sakenn avek son msye, pour ki, par zot kondwit, si serten parmi zot msye pa obei parol Bondye, zot a kapab kanmenm aksepte lafwa san laparol. Sa bann zonm i a war ki zot kondwi zot dan en fason drwat e avek respe.”—Nou ki’n met an italik; 1 Pyer 3:1, 2.

12. Akoz i pa mal pour en madanm eksprim son lopinyon avek respe?

¹² Menm si son msye i annan menm krwayans avek li ou non, en madanm pa pe mank respe si i eksprim en pwennvi diferan avek son msye san ofans li. Son pwennvi i kapab byen e lafanmiy antye i kapab benefisye si son msye i ekout li. Kantmenm Abraam pa ti dakor ler son madanm Sara ti sizer en solisyon pratik pour en problenm ki ti annan kot lakour, Bondye ti dir Abraam: “Ekout son lavwa.” (Zenez 21:9-12) Byensir, ler en msye i fer en desizyon final ki pa neseserman kas lalwa Bondye, son madanm i soumet avek li par siport sa desizyon.—Akt 5:29; Efezyen 5:24.

13. (a) Ki Tit 2:4, 5 i ankouraz bann madanm pour fer? (b) Ki Labib i dir lo separasyon ek divors?

¹³ Ler en madanm i desarz son rol, i kapab pran byen swen avek son fanmiy. Par egzanp, Labib i montre ki bann madanm marye i devret “kontan zot mari ek zot zanfan, pour ki zot a rezonnab, byen tenir zot, konn byen okip zot lakour, obei zot mari.” (Tit 2:4, 5) En madanm ki azir koumsa anver son msye ek zanfan, pou toultan ganny lanmour ek respe son fanmiy. (Proverb 31:10, 28) Me vi ki maryaz i en linyon ant de dimoun enparfe, parfwa i fini par en separasyon oubyen divors akoz serten  sitiasyon ki tre grav. Labib i permet de dimoun marye separe dan serten ka. Me separasyon pa devret ganny pran alalezer akoz Labib i dir: “En madanm pa devre separe avek son mari . . . e en mari pa devre divors son madanm.” (1 Korentyen 7:10, 11) Zis ler enn ant zot i tronp kanmarad ki zot kapab divorse dapre Labib.—Matye 19:9.

14. Ki mannyer Zezi ti tret bann zanfan, e ki zanfan i bezwen avek zot paran?

¹⁴ Fason ki Zezi ti tret bann zanfan i en legzanp parfe pour bann paran swiv. Kan lezot ti esey anpes bann zanfan al kot Zezi, i ti dir: “Les bann zanfan vin kot mwan, pa anpes zot.” Apre, Labib i dir i ti “pran bann zanfan dan son lebra, enpoz lanmen lo zot e beni zot.” (Mark 10:13-16) Zezi ti fer letan pour bann zanfan. Eski ou pa devret fer parey pour ou prop zanfan? Zot pa bezwen zis en pti gin ou letan, me bokou ou letan. Ou bezwen pran letan pour ansenny zot, akoz sanmenm ki Zeova i demann paran pour fer.—Deterononm 6:4-9.

15. Ki paran i kapab fer pour protez zot zanfan?

 ¹⁵ Sa lemonn pe vin pli move zour an zour. Bann zanfan i bezwen zot paran pour protez zot kont bann dimoun danzere, parey bann ki abiz zanfan seksyelman. Mazinen ki mannyer Zezi ti protez son bann disip, ki i ti apel “mon bann pti zanfan.” Kan i ti ganny arete e pe al ganny touye, Zezi ti fer en fason pour son bann disip sove. (Zan 13:33; 18:7-9) Ou ki en paran, ou bezwen vizilan akoz Dyab pe sey fer tou pour fer ditor ou zanfan. Ou bezwen averti zot davans. * (1 Pyer 5:8) Zanmen zot in  deza ganny pli menase fizikman, spirityelman, e moralman ki la aktyelman.

16. Ki paran i kapab aprann avek lafason ki Zezi ti reazir anver lenperfeksyon son bann disip?

¹⁶ Sa zour swar avan Zezi ti mor, son bann disip ti pe diskite antre zot lekel parmi zot ki pli enportan. Olye ankoler avek zot, avek lanmour Zezi ti kontinyen ansenny zot par son parol ek legzanp. (Lik 22:24-27; Zan 13:3-8) Si ou en paran, eski ou vwar ki mannyer ou kapab swiv legzanp Zezi ler ou koriz ou zanfan? I vre ki zot bezwen disiplin, me disiplin i devret ganny donnen dan “en degre apropriye.” Pa zanmen disiplin ou zanfan dan lakoler. Pa dir nenport kwa san reflesir konmsi ou “pe donn bann kou lepe.” (Zeremi 30:11; Proverb 12:18) Donn ou disiplin en fason ki ou zanfan demen pou apresye ki ou’n disiplin zot koumsa.—Efezyen 6:4; Ebre 12:9-11.

17. Ki bon legzanp Zezi in kite pour bann zanfan swiv?

¹⁷ Eski bann zanfan i kapab aprann keksoz avek Zezi? Wi. Par son legzanp, Zezi in montre bann zanfan ki zot devret obeir zot paran. I ti dir: “Mon dir zis sa ki mon Papa in dir mwan dir.” Apre i ti azoute: “Mon touzour fer sa ki fer li plezir.” (Zan 8:28, 29) Zezi ti obeir son Papa dan lesyel e Labib i demann bann zanfan pour obeir zot paran. (Efezyen 6:1-3) Kantmenm Zezi ti en zanfan parfe, i ti obeir son paran enparfe, Zozef ek Mari. Sa ti sirman kontribye pour fer sak manm fanmiy Zezi ere!—Lik 2:4, 5, 51, 52.

18. Akoz Zezi ti toultan obeir son Papa dan lesyel, e lekel ki kontan kan zanfan i obeir paran ozordi?

¹⁸ Eski bann zanfan i vwar ki mannyer zot kapab vin pli parey Zezi e fer zot paran kontan? I vre ki parfwa zanfan i kapab vwar li difisil pour obeir zot paran, me se sa  ki Bondye i oule zanfan fer. (Proverb 1:8; 6:20) Zezi ti toultan obeir son Papa dan lesyel, menm dan bann sitiasyon difisil. En fwa kan Bondye ti oule Zezi i fer en keksoz ki ti difisil, Zezi ti dir: “Eparny mwan sa lakoup [en keksoz ki i ti ganny demande pour fer].” Toudmenm, Zezi ti fer sa ki Bondye ti demann li akoz i ti realize ki son Papa ti pli konnen ki li. (Lik 22:42) Ler zanfan i aprann obeir, zot fer zot paran ek zot Papa dan lesyel vreman kontan. *—Proverb 23:22-25.

19. (a) Ki mannyer Satan i tant bann zanfan? (b) Ler zanfan i mal konport zot, ki lefe sa i kapab fer lo paran?

¹⁹ Dyab ti tant Zezi, e nou asire i tant bann zenn osi pour fer sa ki mal. (Matye 4:1-10) I servi zot kanmarad lekol pour met presyon lo zot e sa i kapab difisil pour reziste. Alor, bann zenn i devret vey zot frekantasyon! (1 Korentyen 15:33) Fiy Zakob, Dina, ti frekant bann dimoun ki pa ti ador Zeova e sa ti anmenn bokou problenm apre. (Zenez 34:1, 2) Mazinen konman en manm fanmiy i kapab bles son fanmiy si i tonm dan en move lavi!—Proverb 17:21, 25.

20. Pour nou lavi fanmiy ere, ki sak manm fanmiy i devret fer?

²⁰ I pli fasil pour fer fas avek problenm fanmiy kan konsey Labib i ganny aplike. Nou kapab dir, aplik konsey Labib i lakle pour fer en fanmiy ere. Alor bann msye, kontan zot madanm e tret zot parey Zezi i tret son kongregasyon. Bann madanm zot, soumet avek lotorite zot msye, e swiv legzanp sa madanm debouryer dan Proverb 31:10-31. Paran, edik byen zot zanfan. (Proverb 22:6) Zot bann papa, ‘diriz byen zot lakour.’ (1 Timote 3:4, 5; 5:8) Zanfan, obeir zot paran. (Kolosyen 3:20) Napa personn dan ou fanmiy ki parfe, nou tou nou fer fot. Alors, abes ou e demann pardon.

21. Ki bann zoli promes ki pe esper nou, e ki mannyer nou kapab annan en fanmiy ere konmela menm?

²¹ Vreman dan Labib i annan en kantite konsey ek lenstriksyon itil pour bann fanmiy. Deplis, i ansenny nou konsernan nouvo lemonn Bondye ek en paradi isi lo later ki pou ranpli avek bann dimoun ere ki ador Zeova. (Revelasyon 21:3, 4) Pa en bann zoli promes ki pe esper nou! Menm konmela nou kapab annan en fanmiy ere si nou aplik lansennyman Bondye ki dan son Parol, Labib.