1. Nemene la sipu kii me jëne tro la fami a madrin?

AJA i Iehova tro la fami a mele madrin. Ame la kola hamën hnene Wesi Ula i Nyidrë ene la Tusi Hmitrötr, la itre trepene meköti nyine eatrongë angatr itre atren la fami, hatrene hi laka, Akötresieti a ajan tro la itre atrene la fami a isa kuca la hnëqa i angatr. E kola cilaxom hnene la itre atrene la fami la isa hnëqa i angatr thenge la eamo i Akötresie, ene pe hetre thangane ka lolo catre koi angatr. Hnei Iesu hna qaja ka hape: “Sisitia pe la manathithi ne la angete denge la wesi ula i Akötesie, me trongën’ ej !”​—Luka 11:28.

2. Nemene la nyine troa wanga atrehmekun nyine jëne manathithi ne la fami?

² Troa hetre manathithi la fami së e hna wanga atrehmekune ka hape, Iehova la qaan la fami, nge Nyidrëti lo hna hëne hnei Iesu ka hape, “Tretretro anganyihunieti.” (Mataio 6:9) Ka xulu la itre fami e celë fen qaathene la Tretretro e koho hnengödrai, nge atre hnyawa hi Nyidrë la nyine troa kuca matre tro angatr a madrin. (Efeso 3:​14, 15) Haawe, nemene la hnei Tusi Hmitrötr hna inin matre isa atre hnene la itre atrene la fami la isa hnëqa i angatr?

3. Nemene la aqane qejepengön hnei Tusi Hmitrötr la aqane nyiqaan la fami, nge pine nemen matre kola qaja ka hape, trenge nyipici?

³ Hnei Iehova hna xupe la lue pane atr, ene Adamu me Eva, me acaasi nyidro trahmanyi me föe ngöne la faipoipo. Hnei Nyidrëti  hna ami nyidroti hnine la ketre paradraiso, ene la ketre hlapa Edena la ëjen, nge hna upi nyidro troa hnaho. Öni Iehova ka hape: “Mana pi me hate, me atiqane la fene hnengödrai.” (Genese 1:​26-​28; 2:​18, 21-​24) Thaa kolo kö a ifejicatre maine edromë pena, pine laka hnei Iesu hna amamane ka hape, nyipici la hna qaja hnei Genese göne la qaan la fami. (Mataio 19:​4, 5) Maine nyipici laka easë a cile kowe la itre jole ka nyimutre nge kola mama laka thaa celë kö la mele hna ahnithe koi së hnei Akötresie, haawe, tro pe së a ce wang la kepin matre kola qaja ka hape, ijije fe troa madrin la fami.

4. (a) Tune kaa la aqane tro la itre atrene la fami, ene angatr isa ala caas a hane kuca matre troa madrin la fami? (b) Pine nemen matre nyipi ewekë troa atre la mele i Iesu hnene la fami maine ej a ajan troa hetrenyi la madrin?

⁴ Maine tro la itre atrene la fami a ihnimi tui Akötresie, ijije hi tro angatr a ixatuanekeun la itre nyine kuca matre troa hetre madrin e hnine la fami. (Efeso 5:​1, 2) Tune kaa la aqane tro sa xome la tulu i Iehova, ngacama thaa öhnyi Nyidrëti kö hne së? Ijije hi tro sa atre la aqane ujë i Iehova, pine laka hnei Nyidrë hna upe kowe la fen la Hupuna i Nyidrë ka caas. (Ioane 1:​14, 18) Ame petre kö ekö lo Hupuna ene Iesu Keriso e celë fen, hnei nyidrë hna xome la tulu ne la Tretretro i nyidrë, celë hi matre ame la easë a goeë Iesu me drei nyidrë, kösë lo easë hi lai a goeë Iehova me drei Nyidrë. (Ioane 14:9) Qa ngöne lai, maine tro sa atre la pengöne la ihnim hnei Iesu hna amaman, me xötrethenge la tulu i nyidrë, atreine hi tro së isa ala caas a kuca matre troa madrin la fami së.

5, 6. (a) Tune kaa la aqane ujë Iesu kowe la ekalesia, matre nyi tulu kowe la itre trahmany? (b) Nemene la hna troa kuca matre troa hane senge la itre ngazo së?

⁵ Kola qaja hnei Tusi Hmitrötr ka hape, loi e tro la itre trahmany a hnime la itre föe tune la aqane hnime i Iesu la itretre drei nyidrë. Hanawang la hna amekötin hnei Tusi Hmitrötr, kola hape: “Ange trahmany, hnime ju la ite fö’ i nyipunie, tune lo hnei Keriso hna hnime la ekalesia, me hamë nyidëti kö thatraqan’ ej . . . Tune lai qâ ne la nöjei trahmanyi troa hnime la ite fö’ i angate tune la ite itei angate kö. Ame la ate hnime la fö’ i angeic, te, kola hnimi angeice kö. Ke pa pala kö ate xelene la ngönetei angeice kö ; ngo hna ithu ane me thupën’ ej, kete tui Keriso kowe la ekalesia.”​—Efeso 5:​23, 25-​29.

⁶ Hnei Iesu hna amamane la ketre tulu ka pexej ne ihnim nyine  troa xötrethenge hnene la itre trahmany, ngöne la aqane hnime nyidrëti la ekalesia i nyidrë. Hnei Iesu hna “hnimi angate uti hë la pun,” ene laka, nyidrëti a huujën la mele i nyidrë koi angatr, ngacama nanyi angatr kowe la mele ka pexej. (Ioane 13:1; 15:13) Ketre kola xatuane mina fe la itre trahmany ka hape: “Isa hnime ju la itre ifënekö i nyipunie, nge the akötë angat.” (Kolose 3:​19) Nemen la ka troa xatuan la trahmany troa trongën la eamo celë, e tria pi la aqane ujë ne la föe ngöne la itre xaa ijin? Loi e tro angeic a mekune hmaca ka hape, atr ka ngazo angeic, nge loi e tro angeic a ujë tune lai, matre tro fe Akötresie a hane senge la ngazo i angeic. Nemene la nyine tro angeic a kuca? Loi e tro angeic a atreine kapa la qeje menu ne la itre atr ka ngazo koi angeic, a kola qaja mina fe la föi angeic. Ketre, loi e tro la föe a ujë fe tune lai. (Mataio 6:​12, 14, 15) Hapeu, epuni kö a öhne la kepin matre kola qaja hnene la itre xan ka hape, troa hetre thangan ka loi la faipoipo e hna iqejemenukeu la lue trefën?

7. Nemene la hnei Iesu hna qaja nyine tulu kowe la itre trahmany?

⁷ Itre trahmanyi mina fe a xome hnyawa la tulu i Iesu, laka hnei nyidrëti pala hi hna wangatrun la itretre drei nyidrë. Hnei nyidrëti hna trotrohnine la pengö i angatr, memine la itre hnei angatr hna ajan ngöne la götrane la ngönetrei. Ame ngöne la angatr a kucakuca, hnei nyidrëti hna qaja ka hape: “Trojë fe nyipunie kowe la ga pa ate troa pane mano.” (Mareko 6:​30-​32) Loi e tro mina fe la itre föe a thiina ka menyik. Kola qejepengöi angatr hnei Tusi Hmitrötr ceitune me “inege ka kucakuca” nyine tro la itre trahmanyi a “atrun.” Pine nemen? Pine laka ce nyidroti asë hi a ce kapa la “ihnimi gufa ne mel.” (1 Peteru 3:7) Loi e tro la itre trahmanyi a mekune hmaca laka, ame la ka sisitria koi Akötresie, tre, ene la atr ka mele nyipici, ngo thaa hnene kö ka hape, trahmany angeic nge tune mina fe la föe.​—Salamo 101:6.

8. (a) Tune kaa la aqane tro la trahmanyi a “hnime la ite fö’ i angate tune la ite itei angate kö”? (b) Nemene la aliene kowe la trahmanyi me föe i angeic, ngöne la kola hape, “caa ngönetei”?

⁸ Kola qaja hnei Tusi Hmitrötr ka hape, ame la trahmany “troa hnime la ite fö’ i angate tune la ite itei angate kö.” Celë hi matre hnei Iesu hna qaja ka hape, ame trahmanyi me föe i angeic tre “tha ala lue hmaca kö, ngo ca ngönetei hë.” (Mataio 19:6) Haawe, angatr a thupën matre thaa tro kö a itrotrij nge troa ce meköle hmaca pena ha me ketre atr, ngo nyidroti hmekuje hi. (Ite Edomë 5:​15-​21; Heberu  13:4) Atreine hi tro nyidroti a traqa kowe lai, e tro nyidro a iatrene la itre aja ka eje thei nyidro. (1 Korinito 7:​3-5) Ngo hetrenyi la ketre nyine amekunën ka lolo catr, kola hape: “Pa pala kö ate xelene la ngönetei angeice kö ; ngo hna ithu ane me thupën’ ej.” Nyipi ewekë troa hnime hnene la itre trahmanyi la itre ifënekö i angatr tui angatre kö, me mekune ka hape, hnëqa i angatre lai qaathene la sipu he i angatr, ene Keriso Iesu.​—Efeso 5:​29; 1 Korinito 11:3.

9. Nemene la thiina i Iesu hna qaja ngöne Filipi 1:8, nge pine nemen matre loi e eën hnene la itre trahmany la thiina cili kowe la itre föe i angatr?

⁹ Hna ithanatan hnei Paulo aposetolo la ‘hni ka menyike i Keriso Iesu.’ (Filipi 1:8) Celë hi thiina ka akeukawan la itre hni së, nge ka amadrinëne la itre föe, ene pe nyudren a hane xötrethenge nyidrë. (Ioane 20:​1, 11-​13, 16) Nge kola hane kapa fe hnene la itre föe la ihnimi ne la itre trahmanyi angatr.

10. Nemene la aqane amamai tulu Iesu kowe la itre föe?

¹⁰ Ame la fami tre celë hi ketre organizasio, nge nyipi ewekë troa hetre he ne ej, matre troa elemeken cememine la thiina ka menyik. Tui Iesu laka hetre hnei nyidrëti fe hna troa drengethenge, ene la He i nyidrë. “Akötesieti la he i Keriso,” ketre tune mina fe “trahmanyi la he i fö.” (1 Korinito 11:3) Ketre tulu ka lolo la aqane drengethenge Akötresie hnei Iesu, ketre tu së, hetre hne së asë hi hna troa drengethenge.

11. Nemene la aqane tro ujë la föe kowe la trahmanyi nyiidro, nge nemene la thangane la aqane ujë i nyiidro?

¹¹ Ka hetre ngazon asë hi la itre atr, celë hi matre thatreine kö tro angatre a itre hene fami ka pexej. Nge ame föe tre, nemene la nyine tro nyiidro a kuca? Thaa tro kö angeic a wajahuje la trahmanyi angeic, maine tro pena a ithepe hnëqa matre tro hmaca pena ha a he ne la fami. Tro la föe a mekune hnyawa laka ame la ka sisitria koi Iehova, tre ene la föe ka thiina ka menyik me ka ipië. (1 Peteru 3:4) Maine tro angeic a ujë tune lai, tro ha hmaloi koi angeic troa drengethenge la aja i Akötresie ngacama tru la itre itupathi ka tru. Kola qaja fe hnei Tusi Hmitrötr ka hape: “Ame la föe kete troa metötëne la trahmany.” (Efeso 5:​33) Ngo tune kaa e thaa hane kö a hane kepe Keriso hnene la trahmany ene la he i angeic? Kola ithuecatr hnei Tusi Hmitrötr kowe la itre föe ka hape: “Denge thenge ju la ite fö’ i  nyipunie ; thatraqan’ e hetete tha denge thenge la wesi ula, mate ahmalanyi angate hnene la thina ne la ite ifënekö i angat, ngo tha hnei wesi ula ; e goeëne hnei angate la thina i nyipunie a pë ethan, nge kola qou.”​—1 Peteru 3:​1, 2.

12. Pine nemen matre nyipi ewekë fe tro la föe a hane qaja cememine la metrötr la itre mekuna i nyiidro?

¹² Maine ka hmi maine thaa ka hmi pena la föi nyiidro, loi e troa metrötre pala hi hnei nyiidro ngacama isazikeu la aqane waipengöne nyidro la ketre mekun. E ka loi la aqane mekune i nyiidro, haawe troa kepe thangane ka loi hnene la fami e tro la trahmanyi a drei nyiidro. Ngacama hace koi Aberahama troa kapa la mekune i Sara föi angeic göi troa nyinyin la jol ka eje ngöne la hnalapa i nyidro, ngo öni Akötresieti koi angeic ka hape: “Denge thenge ju la hna qaja koi ’ö hnei Sara.” (Genese 21:​9-​12) Eje hi laka, e ase hë la trahmany axeciën la ketre mekun nge ka ce tro hi memine la itre Trenge Wathebo i Akötresie, troa mama la ipië ne la föe e tro nyiidro a sajuën lai mekun hna xom.​—Ite Huliwa 5:​29; Efeso 5:​24.

13. (a) Nemene la ithuecatr hna hamën ngöne Tito 2:​4, 5 thatraqane la itre ka faipoipo? (b) Nemene la hna qaja hnei Tusi Hmitrötr göne la itre trefën ka isa lapa me ka sei hna cil?

¹³ Ijije hi tro la föe a kuca hnyawa la itre hnëqa i angeic ka nyimutre e hnine la fami. Hanawang la ketre ceitun, kola amamane hnei Tusi Hmitrötr ka hape, ame koi itre ka faipoipo, tro angatr a “isa hnimi föen, me hnime la ite nekö i angat, me mekune amekötin, me pë ethan, me itete huliwa ngöne la hnalapa, me thina ka loi, me denge thenge la ite fö’ i angat.” (Tito 2:​4, 5) Ame la föe nge thin ka huliwa tune lai, tre tro ha hnim me metrötrë eahlo hnene la fami i eahlo. (Ite Edomë 31:​10, 28) Ame hnine la faipoipo, tre kola ce mel la lue atr ka ngazo, qa ngöne lai, hna traqa la itre xaa jole ka tru, ene pe, isa lapa pi hi me sei hna cil hnei itre xan. Hna nue hnene la Tusi Hmitrötr troa isa lapa qa ngöne la hna traqa la itre xaa jole ka tru. Ngo ame pë hë göi sei hna cil, thaa nyine tro kö a xoma hmalohmaloeën, öni Tusi Hmitrötr: “The tro kö la fö’ a tro tije la trahmany ; . . . nge the tro kö la trahmanyi a helëne la fö’ i angeic.” (1 Korinito 7:​10, 11) Nge caasi hi lo kepin hnei Tusi Hmitrötr hna amekötin göi sei hna cil, troa sei hna cil hmekuje hi e hna nyi xetë la ketre e nyidro lue ka faipoipo.​—Mataio 19:9.

14. Tune kaa la aqane ujë Iesu kowe la itre nekönatr, nge nemene la ka nyipi ewekë koi nyudren, ewekë nyine troa kuca hnene la itre keme me thin?

¹⁴ Hnei Iesu hna hamën la ketre tulu ka lolo catr kowe la itre keme me thin, ngöne la aqane ujë nyidrëti kowe la itre nekönatr. Ame ngöne lo kola sewe nyudren hnene la itre xan troa tro koi Iesu, öni nyidrëti koi angatr ka hape: “Nuepi la ite nekönat’ e troa tro koi ni, nge the shewe nyudeni kö.” Kola qaja hnei Tusi Hmitrötr ka hape, thupene jë hi lai hnei nyidrë hna “xepe angat, me ati ime hui angat, me amanathithinyi angat.” (Mareko 10:​13-​16) Pine laka hnei Iesu hna xomi ijine troa nyipiewekën la itre nekönatr, hapeue fe nyipunie itre keme me thin, hetre ijine kö hnei epuni hna xome amë thatraqai nyudren? Loi e troa tru la traem hna xome amë koi angatr, itre ijine lai ka nyipi ewekë catr koi angatr. Nyipi ewekë tro epuni a thele ijine troa ini angatr, celë hi hnei Iehova hna inin me upe la itre keme me thin troa kuca.​—Deuteronomi 6:​4-9.

15. Nemene la nyine troa kuca hnene la itre keme me thin göi troa thupën la itre nekö i angatr?

¹⁵ Pine laka kola elë catr pala hi la ngazo ngöne la fene celë, nyipi ewekë tro la itre keme me thin a thupëne la itre nekö i angatr, wanga troa huli nyudren kowe la ngazo hnene la itre atr ka ngazo thiina, caasi hi la aqane huliwa i angatr memine la itre ka thele tha, ene lo itre ka troa iuku kowe la ngazo. Pane mekune ju së lo aqane thupëne hnei Iesu la itretre drei nyidrë, itre hnei nyidrëti hna  hnime hnyawa me hëne ka hape, “ange nekönate fe.” Ame ngöne lo kola xölehuji nyidrë me humuthi nyidrë, hnei Iesu hna kuca matre troa nue pe la itretre drei nyidrë. (Ioane 13:33; 18:​7-9) Maine itre kem me thine nyipunie, nyipi ewekë tro nyipunie a hmekën la itre nyinyithiina i Diabolo troa akötrën la itre nekö i epun. Nyipi ewekë troa canga thuemacanyi nyudren. * (1 Peteru 5:8) Kola kökötre catr enehila la itre iakötrë ka traqa koi nyudren, itre iakötrë ne la ngönetrei, me ngöne la ua, me ngöne la aqane ujë.

16. Nemene la ini tro la itre keme me thin a xom qa ngöne la aqane wenë Iesu la aqane ujë ka menu ne la itretre drei nyidrë?

¹⁶ Ame ngöne la jidr qëmekene tro Iesu a mec, hnene la itretre  drei nyidrë hna ikelikelë matre troa atre la ka sisitria e angatr. Thaa hnei Iesu kö hna elëhni pine la aqane ujë i angatr, ngo hnei nyidrëti pe hna catre haji angatr cememine la ihnim me amamane koi angatre la tulu nyine troa kuca. (Luka 22:​24-​27; Ioane 13:​3-8) Haawe, itre keme me thin, tro fe kö epuni a hane thele jëne troa amekötin tui Iesu la itre nekö i nyipunie? Maine nyipici laka ka loi troa haji angatr, ngo tro pala hi a trongën “thenge la meköt,” nge thaa loi kö e troa elëhni. Thaa ajane kö nyipunie troa kökötre la aqane ithanata “kösë hna thine hnei taua.” (Ieremia 30:11; Ite Edomë 12:18) Loi e hajine hnyawa la nekönatr, matre tro pë hë angeic a öhne e thupen la eloine la ewekë cili.​—Efeso 6:4; Heberu 12:​9-​11.

17. Nemene la itre aqane amamai tulu ka loi Iesu kowe la itre nekönatr?

¹⁷ Hapeu, ijije kö tro la itre nekönatr a hane kapa la ini qaathei Iesu? Eje hi! Jëne la tulu ne idrengethenge i nyidrë, hnei Iesu hna amamane la aqane tro la itre nekönatr a drengethenge la itre keme me thine i angatr. Kola qaja hnei nyidrëti ka hape, “ame lo hnei Tetetroti hna ini ni, te, celë hi hnenge hna qaja.” Öni nyidrëti fe ka hape: “Ini a kuca pala hi la nöjei ewekë nyine amadi nyidë.” (Ioane 8:​28, 29) Hnei Iesu hna drengethenge la Tretretro i nyidrë e koho hnengödrai, nge kola upe hnei Tusi Hmitrötr la itre nekönatr troa drengethenge la itre keme me thine i angatr. (Efeso 6:​1-3) Ngacama Iesu ekö la ketre nekönatr ka pexej, ngo hnei nyidrëti pala hi hna drengethenge lo kem me thine i nyidrë, ene Iosefa me Maria lue atr ka thaa pexeje kö. Celë hi ka hamë madrine ka tru kowe la nöjei atrene la hnepe lapa i Iesu!​—Luka 2:​4, 5, 51, 52.

18. Pine nemen matre Iesu pala hi a drengethenge la Tretretro i nyidrë e koho hnengödrai, nge drei la ka madrin ngöne la kola drengethenge enehila hnene la itre nekönatr la itre keme me thine i nyudren?

¹⁸ Ijije kö tro la itre nekönatr a thele la itre aqane xötrethenge hnyawa la tulu i Iesu, me amadrinën la itre keme me thine i angatr? Nyipici, ame ngöne la itre xaa ijin kola mekun hnene la itre nekönatr ka hape, ma jol e troa drengethenge la itre keme me thine i angatr, ngo celë hi ewekë lai hnei Akötresieti hna upe la itre nekönatr troa kuca. (Ite Edomë 1:8; 6:​20) Hnei Iesu pala hi hna drengethenge la Tretretro i nyidrë e koho hnengödrai, ngacama jole ju hë la itre ewekë hnei nyidrëti hna cile qëmeke kow. Traqa pi hi koi Iesu ngöne la ketre ijin la ketre jol ka tru, ngo öni nyidrëti jë hi  ka hape: ‘Pane ananyine pi la inege celë [ketre hna amekötin].’ Ngo hnei Iesu hna kuca la hnei Akötresie hna upi nyidrë troa kuca, pine laka hnei nyidrë hna wanga atrehmekune laka atre kö la Tretretro i nyidrë e koho hnengödrai la ka loi kowe la mele i nyidrë. (Luka 22:42) Maine tro la itre nekönatr a inin troa drengethenge, tro hë angatr a amadrinën la itre keme me thine i angatr memine fe la Tretretro i angatr e koho hnengödrai. *​—Ite Edomë 23:​22-​25.

19. (a) Tune kaa la aqane tupathe Satana la itre nekönatr? (b) Nemene la thangane elanyi kowe la itre keme me thin e kuca jë la ngazo hnene la itre nekö i angatr?

¹⁹ Hnei Diabolo hna tupathi Iesu, nge xecie mina fe koi së laka tro angeic a tupathe la itre thöth matre tro nyudren a kuca la ngazo. (Mataio 4:​1-​10) Atraqatr la itre iakötrë i Satana lo Diabolo, matre jole catr e troa xomihnine itre ej. Celë hi matre, nyipi ewekë catr tro la itre nekönatr a thupën la aqane tro angatr a ce elo! (1 Korinito 15:33) Hnene la nekö i Iakobo jajiny Dina la ëjen, hna thele sine ce elo thene la itre ka thaa hmi kö koi Iehova, ene pe kola traqa la itre hulö. (Genese 34:​1, 2) Pane mekune ju la akötr ka eje thene la fami, ngöne la kola kuci ngazo la ketre atren!​—Ite Edomë 17:​21, 25.

20. Maine kola ajan troa hetrenyi la madrin e hnine la fami, nemene la isa hnëqa ne la itre atren?

²⁰ Hmaloi hi troa cile kowe la itre jol e hnine la fami, e hna trongëne  hnyawa la eamo qa hnine la Tusi Hmitrötr. Eje hi laka, troa manathith la fami e hna trongëne la eamo cili. Celë hi matre, itre trahmanyi fe; hnime ju la itre ifënekö i epun, nge xomi nyudrene jë tune la aqane ujë i Iesu kowe la ekalesia i nyidrë. Itre föe, metrötrëne ju la trahmanyi nyipunie, lo he ne la fami, nge xome jë la tulu ne la föe ka atrein hna qaja ngöne Ite Edomë 31:​10-​31. Itre keme me thin, inine jë la itre nekö i epun. (Ite Edomë 22:6) Itre kem, ‘musinëne aloine jë la hnepe lapa i epun.’ (1 Timoteo 3:​4, 5; 5:8) Nge itre nekönatr, drengethenge ju la itre keme me thine i nyipunie. (Kolose 3:​20) Pëkö ka pexej e hnine la fami, itre atr ka ngazo asë hi. Haawe, loi e troa hetrenyi la hni ka ipië, me atreine kapa la qeje menu i itre xan.

21. Nemene la itre hna thingehnaean ka lolo hna nyiqaane amamane koi së, nge tune kaa la aqane troa hetrenyi enehila la madrin e hnine la fami së?

²¹ Nyipici, eje e hnine la Tusi Hmitrötr la itre eamo ka lolo me ini thatraqane la mele ne la fami. Ketre, eje a ini së la pengöne la fene ka hnyipixe i Akötresie, memine la paradraiso e celë fen ka tiqa hnene la itre atr ka madrin ka hmi koi Iehova. (Hna Amamane 21:​3, 4) Drei la hna thingehnaean ka lolo hna canga amamane koi së! Tune mina fe enehila, ijije hi tro sa madrin hnine la fami, e hne së hna trongën la ini qaathei Akötresie ka meköle hnine la Wesi Ula i Nyidrë, ene la Tusi Hmitrötr.