1. Ghorabo koso khuxal zaum ieta?

TUMCHO ghorabo khuxal aslolo Jehova Devak zai. Ghorabeant aslolea zonn ekleachi zobabdari kitem ti Bible-ant sarki dakhoilea. Sogleamnim tea pormonnem vaglolem Devak zai. Ghorabeantlim soglim, Devan sanglolea porim choltat zalear to ghorabo khuxal zaunk pavta. Jezun mhunnttlem, “Devachem utor aikotat ani samballtat tim odik bhagi!”—Lukas 11:28.

2. Ghorabo khuxal uronk kitem zannam zavop gorjechem?

² Jezun, Jehova Devak ‘Amcho Bap’ mhunnttla. (Matev 6:9) Ani ghorabo khuxal kortolim zalear, Jehova Devan ghorabo ghoddun haddla hem zannam zavop chodd gorjechem. Sonvsarant aslole sogle ghorabe amchea sorginchea Bapan ghoddleat ani tanche khuxalkaie pasot kitem gorjechem tem toch boro zannam. (Efezkarank 3:14, 15) Ghorabeant, zonn ekleachea zobabdare vixim Dev Bible-ant kitem sangta?

3. Ghorabeachea survate vixim Bible kitem sangta, ani tem sot mhunn amkam koxem kolltta?

³ Jehovan, Adanv ani Evek rochlim ani tankam ghov-bail mhunn ektthaim haddlim. Tannem, tankam eke sobit bagent, mhunnche Eden bagent dovorlim ani bhurgim zaum mhunn axirvad diun mhunnttlem, “Choddat ani vaddat ani prithum bhorat.” (Utpoti 1:26-28; 2:18, 21-24) Hi fokot ek kanni nhoi, karonn Utpoti pustokant poilea ghorabea vixim sanglam tem sot mhunn Jezun dakhoun dilem. (Matev 19:4, 5) Aiz jivitant zaite tras-koxtt asat ani prithum ek sobit bag koxi na, torui astana ami amcho ghorabo khuxalbhorit korunk zata. Koso, tem atam ami polloum-ia.

4. (a) Ghorabo khuxal dovrunk zonn eklean kitem korunk zai? (b) Ghorabo khuxal dovrunk Jezuchea jivita vixim zannam zavop kiteak gorjechem?

⁴ Jehova Devan jea ritin munxank mog dakhoila teach ritin zonn eklean ghorabeant mog dakhoit zalear, ghorabo khuxal zaum ieta. (Efezkarank 5:1, 2) Ami Jehovak pollounk xokonant zalear, tannem dakhoila tea ritin dusreank mog koso dakhounk zata? Jehova Dev munxam sovem koso vavurta, tem ami tachea malgoddea putachea udharonnantlean zannam zaunk zata. (Juanv 1:14, 18) Sonvsarant astana Jezu Krist sarko aplea Bapa bhaxen vaglo ani takach lagon Jezuk polloun ami Bapak polloilolea bhaxen zata. (Juanv 14:9) Tor Jezun munxank koso mog dakhoilo, tea vixim xikon ani tachi dekh gheun zonn eklean aplo ghorabo khuxal dovrunk vavrop gorjechem.

5, 6. (a) Jezun jea ritin aplea sobhent aslolea xisancho mog kelo tem ghovank koxem ek borem udharonn zaun asa? (b) Devachem bhogsonnem mellttolem zalear kitem korunk zai?

⁵ Jezu aplea xisam sangata vaglo, toxench ghovamnim aplea bailam sangata vagonk zai. Bible sangta, “Tumi potimno, aikat: zoso Kristan Povitr-Sobhecho mog kelo ani tiche khatir Aplo jiv dilo, toxench tumi tumchea potinincho mog korat. . . . Hech porim, aplo mog korta toso, potimnim aplea potinincho mog korunk zai. Aple potinicho mog korta to aploch mog korta. Konnuch monis aple kuddicho dves korina, punn ti posta ani ticho poramos korta; Krist-ui Povitr-Sobhe thaim toxench korta.”—Efezkarank 5:23, 25-29.

⁶ Jezun jea ritin aplea sobhent aslolea xisancho mog kelo, tem ghovank ek borem udharonn zaun asa. Jezun xevottak porian tancho mog kelo. Te patki asunui Jezun tanchea pasot aplo jiv dilo. (Juanv 13:1; 15:13) Bible ghovank sangta, “tumchea potinincho mog korat ani tanche thaim khoraien vagum nakat.” (Koloskarank 3:19) Apli bail chukta tednam, tika mog dakhounk, ghovak koxi modot zatoli? Oslea vellar tannem apunnui chukeo korta mhunn ugddas dovrunk zai. Taka Devachem bhogsonnem mellttolem zalear tannem aplea add patok kortoleank, mhunnche aplea bailek pasun bhogsunk toiar asonk zai. Tachea bailenui toxench korchi goroz asa. (Matev 6:12, 14, 15 vachat.) Ghov ani bail, eka-mekak kallzant thaun bhogxitat tednam tanchem kazari jivit sukhachem zaunk xokta.

7. Jezuk aplea xisam vixim kosli somjikai asli, ani ghovamnim Jezuchi dekh koxi gheunk zata?

⁷ Ghovamnim Jezuchem udharonn sodanch  ugddasak dovrunk zai. Jezuk aplea xisanchi porva asli. To tancheo gorzo ani unnemponnam somzotalo. Ek pavtt te thokleat tem polloun tannem mhunnttlem, “Eke eksure svater tumi ekvodde ieiat ani matso visov gheiat.” (Marku 6:30-32) Ghovanui toxench aplea bailek somzon gheunk zai. Bible-ant, bailank “osokt” mhunnttlolem asa ani tankam “favo to man” diunk ghovank adnea dilea. Oxi adnea kiteak dilea astoli? Karonn ghov ani bail dogaim, Dev dita tea ‘sasnnik jivitachim’ daiji zaun asat. (1 Pedru 3:7) Dev, dadlea vo baile modem ontor korina. Devak manvololim zaunk, taka visvaxi asop chodd gorjechem hem ghovan ugddas dovrunk zai.—Stotr 101:6.

8. (a) Aple bailecho mog korta to ghov aploch mog korta oxem kiteak mhunnonk zata? (b) Ghov ani bail “dogam nhoi, punn ek” mhunn dakhounk tannim kitem korunk zai?

⁸ Zo ghov “aple potinicho mog korta to aploch mog korta” oxem Bible sangta. Karonn Jezun sanglolea porim ghov ani bail “dogam nhoi, punn ek.” (Matev 19:6) Ghovan aplea bailek soddun vo bailen aplea ghovak soddun anik konnachea-i lagim kuddicho sombond dovrunk zaina. (Mhonn’nneo 5:15-21; Hebrevank 13:4) Ghov-bailen eka-mekak visvaxi ravop gorjechem. Oxem kortolim zalear tannim apleach vixim chintunk zaina, punn eka-mekacheo gorzo somzon gheunk zai. (1 Korintkarank 7:3-5) “Konnuch monis aple kuddicho dves korina, punn ti posta ani ticho poramos korta.” Hem ugddas dovrun, ghovan aplo mog korta tosoch aplea bailecho mog korunk zai. Karonn dadleachem mostok Jezu Krist zal’lean, dadlean taka hixob diuncho poddttolo.—Efezkarank 5:29; 1 Korintkarank 11:3.

9. Filipkarank 1:8-ant Jezuchea khoinchea gunna vixim sanglam, ani ghovamnim aplea bailank ho gunn kiteak dakhounk zai?

 ⁹ Jezun moipaxi mog dakhoilo, mhunn Bible amkam sangta. (Filipkarank 1:8) Tacho moipaxi mog polloun xisam modem aslolea ostoreank khub borem dislem. (Juanv 20:1, 11-13, 16) Toxench bailo, aplea ghovam thaun moipaxi mog anvddetat.

10. Jezun bailank ek borem udharonn koxem dovorlam?

¹⁰ Ghorabo mhunnttlear ek lhan songotton. To bore toren choltolo zalear taka ek mukheli asonk zai. Jezu Kristak pasun ek mukheli asa. “Dor eke bailechem mostok ticho poti” toxench “Kristachem Mostok Dev.” (1 Korintkarank 11:3) Jezu sodanch Devak khalto ravlo. Ani hem bailank ek borem udharonn, karonn tannim aplea ghovank khaltim ravop gorjechem zaun asa.

11. Aplea ghova thaim eke bailecho sobhav koso asonk zai, ani tichea vagnnukecho tacher kitem porinnam zaunk xokta?

¹¹ Munis patki zal’lean, thodde pavtt ghov aplea ghorant mukhelponn choloitana chukonk xokta. Tednam bailen kitem korunk zai? Tinnem aplea ghovacheo chukeo dusreanchea mukhar dakhounk zaina. Toxench, tinnem mukhelponn aplea hatant gheunk zaina. Ek xant ani dulob sobhav, Deva mukhar chodd moladik mhunn bailen ugddas dovrunk zai. (1 Pedru 3:4) Osle gunn asot zalear, kotthin poristhitint pasun ghovak khalti ravonk tika sompem zatolem. Bible sangta, “potinin aplea potik man diuncho.” (Efezkarank 5:33) Punn, ticho ghov bhavarthant na, zalear kitem? Oslea poristhitint Bible bailank mhunntta, “Tumi, bailamno, tumchea ghovank khalteo zaiat. Oxem tanche modle konnui ozun Sobd manun gheunk  naslole asat zalear, utram vinnem aplea potininche chalinuch te jikhun ietole, kiteak apleo potinim mannsugen ani nirmollponnan jietat mhunn te polletole.”—1 Pedru 3:1, 2.

12. Bailen respedan aplea ghovak suchounni dili zalear tem chuk kai?

¹² Ghov sakxi asum vo nasum, tachi bail respedan taka kitem-i korunk suchoita zalear, ti taka man dina oxem zata kai? Na! Ghoddie ti sangta tem sarkem asonk xokta ani tichem sangnnem ak’khea ghorabeak boreak poddonk xokta. Adim, ek pavtt Saran aplea ghovak, Abrahamak ek suchounni dili. Punn tem Abrahamak manvonk na. Tednam Devan taka mhunnttlem, “Sara tuje lagim magta titlem-i tika di.” (Utpoti 21:9-12 vachat.) Punn ghov jednam Devachea kaideam pormonnem nirnnoi gheta, tachea bailen to manun gheun taka man diunk zai.—Itihas 5:29; Efezkarank 5:24.

13. (a) Titak 2:4, 5-ant bailank kitem sanglolem asa? (b) Vegllim ravchea vixim ani divors diunchea vixim Bible kitem sangta?

¹³ Bailen khubxea ritimnim aplo ghorabo samballunk  zata. Bible sangta, kazari bailamnim “ap-aplea ghovacho mog korunk ani aplea bhurgeanchi opurbai korunk xikchem, toxench teo moriadicheo, nirmoll jivitacheo, aplea ghora-daracheo, moipaxi, ani ap-aplea ghovak khalteo zauncheo.” (Titak 2:4, 5) Ek bail vo avoi zal’lean ti hea toren vagli zalear, tichim ghorchim ticho mog kortolim ani tika man ditolim. (Mhonn’nneo 31:10, 28 vachat.) Patki zal’lean, ghov-bailam chuktat ani taka lagon thoddea kotthin poristhitint tim eka-meka thaun vegllim ravtat vo tancho divors zata. Bible-a pormonnem, thoddeach karonnak lagon kazari zoddpeamnim vegllim ravonk zata. Torui, oxem panvl gheunchea poilim ghov-bailamnim gombir ritin  chintunk zai. Karonn Bible sangta, “bail aplea ghova thaun veglli sorchi nhoi; . . . ani ghov aple baile thaun vegllo sorcho nhoi.” (1 Korintkarank 7:10, 11) Kazari zoddpeam modem eklean pozoddponn kelem zalearuch ghov-bailecho divors zaunk xokta mhunn Bible dakhoita.—Matev 19:9, Povitr Pustok—Novo Korar.

14. Jezu bhurgeam thaim koso vaglo, ani avoi-bapain bhurgeank kitem diunk zai?

¹⁴ Avoi-bapain aplea bhurgeank koxem vagounk zai hea vixim-i Jezun ek borem udharonn dovorlam. Ek pavtt lhan bhurgim Jezu lagim ieunk sodhtalim tednam xisamnim tankam addailim. Jezun tankam mhunnttlem, “Supurlea bhurgeank Mhoje sorxem ieunk diat; tankam addainakat.” Bible fuddem sangta, “Tannem tankam vengent gheun ani tancher Aple hat dovrun tankam axirvad dilo.” (Marku 10:13-16) Jezun lhan bhurgeam pasot vell kaddlo zalear, tumi-i tumchea bhurgeank vell diunk zai nhoi? Tankam thoddoch vell dilo mhunn zaina, tumi tankam choddan-chodd vell diunchi goroz asa. Tankam Deva vixim xikounk tumi vell kaddunk zai, karonn Jehovan, avoi-bapaink hich zobabdari dilea.—Dusri Somurt 6:4-9 vachat.

15. Avoi-bapain aplea bhurgeank rakhonk kitem korunk zai?

¹⁵ Hea vaittponnan bhorlolea sonvsarant, avoi-bapain aplea bhurgeank rakhpachi goroz asa. Karonn thodde munis bhurgeancher vaitt nodor ghaltat ani tankam pidd’ddear korunk sodhtat. Jezu aplea xisank ‘supurle bhurge’ koxe lekhtalo. Tor tankam rakhonk tannem kitem kelem? Jezuk dhorun vhoronk aile tednam tannem aplea xisank thoim thaun vochonk vatt keli.  (Juanv 13:33; 18:7-9) Avoi-bapaino, tumchim lhan bhurgim Devcharachea fasant poddona zaunk, tumi-i chotur asonk zai. Tankam tumi adinch xittkaunchi goroz asa. * (1 Pedru 5:8) Aichea hea bhirankull kallar, bhurgeank soglea vatten rakhop chodd gorjechem.

16. Jezuche xis chuktale tednam to tanche thaim koso vaglo tem polloun, avoi-bapaink kitem xikonk melltta?

¹⁶ Jezu morchea adlea rati, tache xis apnnam modem konn vhodd, hachea vixim vad-vivad korunk lagle. Tancher ragar zaunche bodlek, Jezun tankam mogan somzaile ani tanche pasot lhanvikaiechi ek dekh dovorli. (Lukas 22:24-27; Juanv 13:3-8) Avoi-bapaino, bhurgeank xist dita astana Jezuchem hem udharonn tumi koxem apnnaunk zata? Tankam xist divop gorjechem, punn tankam “Favo titlich” xist divop chodd mhotvachem, ani ti xist kednanch ragan diunk zaina. Ugddas dovrat, chintinastana uloilolim utram tumchea bhurgeank “torvari bhaxen toptat.” Tea pasot tumi chintun ulovop gorjechem. (Jeremias 30:11; Mhonn’nneo 12:18) Xist bore toren dili zalear, bhurgeank faideak poddtta, ani ti tanchea boreak mhunn fuddem tim somzonk pavtat.—Efezkarank 6:4; Hebrevank 12:9-11.

17. Jezun bhurgeank koslem udharonn dovorlam?

¹⁷ Bhurgeamnim aplea avoi-bapaichem sangnnem aikonk zai. Hea vixim Jezun ek borem udharonn dovorlam. Jezu sodanch aplea Bapachem sangnnem aikotalo. Jezun mhunnttlem, “Bapan Mhaka xikoilam  toxem Hanv uloitam.” Tannem fuddem sanglem, “Taka man’ta tench Hanv sodam kortam.” (Juanv 8:28, 29) Jezun aplea sorginchea bapak man dilo tosoch, Bible bhurgeank, tanchea avoi-bapaink man diunk sangta. (Efezkarank 6:1-3 vachat.) Jezu sompurnn aslo, tannem kednanch chuk korunk na, punn tachim sonvsari avoi-bapui chuktalim. Torui astana, tannem aplea avoi-bapaichem aikolem. Haka lagon, Jezuchea ghorantlim soglim khuxal aslim.—Lukas 2:4, 5, 51, 52.

18. Jezun sodanch aplea sorginchea Bapachem sangnnem kiteak aikolem, ani bhurgim aplea avoi-bapaicheo adnea pallttat tednam konn khuxal zata?

¹⁸ Jezuchi dekh gheun bhurgeamnim aplea avoi-bapaichem kalliz koxem khuxal korunk zata? Ek-ek pavtt aplea avoi-bapaichem aikonk bhurgeank kotthin zata, punn tannim tanchem aikololem Devak zai. (Mhonn’nneo 1:8; 6:20) Jezun sodanch aplea sorginchea Bapachem sangnnem aikolem. Ek pavtt, Jezuk Devachem utor pallunk khub kotthin zalem. Tannem mhunnttlem, “Bapa, Tuji khuxi zalear, Mhojem velem hem patr pois kadd.” Oslea poristhitint pasun, Jezun Devak zai toxench kelem. Karonn kitem borem tem Bap boro zannam, mhunn Jezuk khatri asli. (Lukas 22:42) Aplea avoi-bapaicheo adnea pallun bhurgim tanchem, ani sorginchea Bapachem kalliz khuxal kortolim. *—Mhonn’nneo 23:22-25.

19. (a) Soitan bhurgeancher koxi tallnni haddtta? (b) Bhurgim patkant poddlear tachea avoi-bapaicher kitem porinnam zata?

¹⁹ Devcharan Jezuk tallnnent ghatlo. Tosoch bhurgeancherui tallnni haddun, to tankam vaitt rostear  vhorcho proitn korta. (Matev 4:1-10) To tanchea sangati ixttank uzar korun tancher dobhav haddtta, ani hacho fuddo korunk bhurgeank khub kotthin zata. Bhurgeamnim vaitt sangateam thaun pois ravchem khub gorjechem zaun asa. (1 Korintkarank 15:33) Jakobachi dhuv, Dina, hika kitem ghoddlem tem ugddas korat. Jehovachi bhokti korinant toslea lokam sangata Dinan ixttagot kel’li. Ani tacho porinnam vaitt zalo. (Utpoti 34:1, 2) Chintun polloiat, ghorabeantlo eklo, oslea patkant poddlo zalear tanchea avoi-bapaik kitlem dukh zatolem nhoi!—Mhonn’nneo 17:21, 25.

20. Ghorabo khuxal korunk dor eklean kitem korunk zai?

²⁰ Ghorabeant ietolea koxttank fuddo korunk Bible amkam modot korta. Tantunt dilole sol’le apnnaun, ghorabo khuxal korunk zata. Jezun aplea sobhecho mog kelo tosoch, ghovamnim aplea bailancho mog korunk zai. Toxench, bailamnim aplea ghovank khaltim ravonk zai. Mhonn’nneo 31:10-31-ant sanglolea pormonnem ek bori bail zaunk zai zalear, tinnem aplea ghorabea pasot  vavrop gorjechem. Avoi-bapain aplea bhurgeank nitt vatten cholonk xikounk zai. (Mhonn’nneo 22:6) Bapain aplo ghorabo bore bhaxen samballop gorjechem. (1 Timotak 3:4, 5; 5:8) Ani bhurgeamnim aplea avoi-bapaichem utor aikon gheunk zai. (Koloskarank 3:20) Ghorabeant soglim patki aslolean, tim chuktat. Taka lagon, dor eklean lhanvikai dakhoun, eka-meka lagim bhogsonnem magchi goroz asa.

21. Devan amkam fuddara vixim kitem bhorvonso dila, ani aiz ami amcho ghorabo koso khuxal korunk zata?

²¹ Khorench, ghorabo khuxal korunk Bible-ant khub zannvai ani xikounn melltta. Titlench nhoi, Dev ho sonvsar ek sobit bag kortolo ani munxam tacher khuxalkaien Jehovachi seva kortolim mhunn Bible amkam xikoita. (Prokasovnni 21:3, 4) Devan amkam kitlo boro bhorvonso dila nhoi! Devan Bible-ant diloleo suchounneo jivitant apnnaun ami aiz pasun, amcho ghorabo khuxal korunk zata.