1. Tsev neeg yuav tsum ua li cas thiaj muaj kev zoo siab?

VAJTSWV YEHAUVAS xav kom koj tsev neeg muaj kev zoo siab. Nws Txojlus uas yog phau Vajlugkub muaj lus qhuab qhia rau tsev neeg. Cov lus qhia ntawd pab kom txhua tus hauv tsev neeg, nyias paub ua nyias tes haujlwm uas Vajtswv muab rau lawv. Thaum txhua tus hauv lub cuab lub yig ua raws li Vajtswv qhia, ces tsev neeg yuav muaj kev zoo siab. Yexus hais tias: “Cov uas hnov Vajtswv tej lus thiab coj raws nraim thiaj yog cov uas tau nyob kaj siab lug.”​—Luka 11:28.

2. Yuav kom peb tsev neeg muaj kev zoo siab, peb yuav tsum paub txog dabtsi?

² Yuav kom peb tsev neeg muaj kev zoo siab, peb yuav tsum paub tias Yehauvas yog tus tsim lub cuab lub yig. Yexus muab Yehauvas hu ua “Peb leej Txiv.” (Mathai 6:9) Vim peb Leej Txiv uas nyob saum ntuj ceeb tsheej, thiaj li muaj txhua tsev neeg hauv ntiajteb no. Yog li ntawd, Yehauvas yeej pab tau kom lub cuab lub yig muaj kev zoo siab. (Efexau 3:14, 15) Ua li phau Vajlugkub qhia tias txhua tus hauv lub cuab lub yig yuav tsum coj li cas?

3. Raws li phau Vajlugkub qhia, lub cuab lub yig pib li cas, thiab vim li cas peb ntseeg tau tias tej uas phau Vajlugkub qhia txog muaj tseeb tiag?

³ Yehauvas yog tus tsim thawj nkawm niam txiv, Adas thiab Eva. Yehauvas tsim nkawd los nyob ua ke ua txwj ua nkawm. Nws tsim tau ib lub vaj zoo nkauj heev rau nkawd nyob, hu ua Edee. Nws kuj hais kom nkawd muaj tub muaj ki. Yehauvas hais tias: “Cia li muaj tub ki huaj vam coob puv nkaus ntiajteb.” (Chiv Keeb 1:26-28; 2:18, 21-24) Zaj no tsis yog ib zag dab neeg lossis ib zaj kwv huam xwb. Ua cas peb ho paub li ntawd? Rau qhov Yexus twb qhia lawm tias lub cuab lub yig yeej pib raws li phau ntawv Chiv Keeb qhia. (Mathai 19:4, 5) Txawm tias peb ntsib ntau yam kev nyuaj siab, thiab lub neej tamsim no tsis zoo li Vajtswv lub ntsiab thaum chiv thawj lawm, los tsev neeg tseem nrhiav tau kev zoo siab. Cia peb kawm ntxiv txog qhov no.

4. (1) Txhua tus hauv tsev neeg yuav tsum coj li cas, thiaj muaj kev zoo siab? (2) Ua li cas qhov uas peb kawm txog Yexus lub neej yuav pab tau kom peb tsev neeg muaj kev zoo siab?

⁴ Tsev neeg yuav tsum ua li cas, thiaj muaj kev zoo siab? Txhua tus hauv tsev neeg yuav tsum xyaum muaj kev hlub li Vajtswv. (Efexau 5:1, 2) Tiamsis peb twb tsis pom Vajtswv, peb yuav ua li cas xyaum coj li nws? Peb yuav xyaum tau Yehauvas los ntawm nws tus Tub Yexus Khetos uas Nws tau txib los hauv ntiajteb no. (Yauhas 1:14, 18) Yexus coj ib yam nkaus li nws Leej Txiv Yehauvas. Thaum tibneeg nrog Yexus ua ke thiab mloog Yexus tej lus qhuab qhia, cuag li lawv twb tau nrog Yehauvas ua ke thiab mloog Yehauvas tej lus qhuab qhia lawm thiab. (Yauhas 14:9) Yog li ntawd, yog tias peb kawm thiab xyaum txojkev hlub uas Yexus muaj, ces peb txhua tus yuav pab tau kom peb tsev neeg muaj kev zoo siab dua.

5, 6. (1) Yexus txojkev hlub rau nws cov thwjtim tseg tus qauv zoo li cas rau cov txiv xyaum? (2) Ob niam txiv yuav tsum ua li cas Vajtswv thiaj yuav zam txim rau nkawd?

⁵ Phau Vajlugkub qhia tias cov txiv yuav tsum hlub lawv  cov pojniam ib yam li Yexus hlub nws cov thwjtim. Xav txog nqe Vajlugkub no: “Cov txiv, cia li hlub nej cov pojniam ib yam li Khetos hlub pawg ntseeg thiab muab nws tus kheej this pawg ntseeg . . . Ib yam li ntawd, cov txiv yuav tsum hlub tus pojniam ib yam li nws hlub nws lub cev. Tus uas hlub nws tus pojniam kuj yog nws hlub nws tus kheej. Rau qhov tsis muaj leejtwg yuav ntxub nws lub cev tsuas muaj uas yug thiab tu kom zoo xwb ib yam li Khetos tu pawg ntseeg.”​—Efexau 5:23, 25-29.

⁶ Yexus txojkev hlub rau nws cov thwjtim yog ib tug qauv zoo heev rau cov txiv xyaum. Yexus “hlub [lawv] mus txog thaum kawg.” Txawm tias lawv yog neeg txhaum, los Yexus txaus siab hlo tuag txhiv lawv. (Yauhas 13:1; 15:13) Ib yam li ntawd, phau Vajlugkub txhawb cov txiv li no: “Cia li hlub nej tus pojniam, tsis txhob ua nruj ua tsiv rau nws.” (Khaulauxi 3:19) Thaum tus pojniam tsis xyuam xim es ho ua tau tej yam tsis tshua zoo, dabtsi yuav pab kom tus txiv ua tau raws li nqe Vajlugkub no? Tus txiv yuav tsum nco ntsoov tias nws kuj tau ua yuam kev dua lawm thiab. Yog tias nws xav kom Vajtswv zam nws lub txim, nws yuav tsum zam txim rau cov uas ua txhaum rau nws thiab. Yog li ntawd, nws yuav tsum zam txim rau nws tus pojniam. Tus pojniam los yuav tsum ua ib yam li ntawd thiab. (Nyeem Mathai 6:12, 14, 15.) Twb yog vim li no, ib txhia thiaj hais tias, yuav kom kev txwj nkawm nyob ruaj khov, ob niam txiv yuav tsum txawj sib zam txim.

7. Yexus paub xav txog nws cov thwjtim li cas, thiab nws tseg tau tus qauv zoo li cas rau cov txiv xyaum?

⁷ Zoo rau cov txiv nco ntsoov tias Yexus paub xav txog nws cov thwjtim thiab. Nws paub thaum lawv qaug zog lossis thaum lawv yuav tsum tau so. Zoo li, muaj ib zaug Yexus paub tias lawv sab heev, nws thiaj hais rau lawv tias: “Nej cia li nrog kuv mus rau ib qho chaw uas tsis muaj neeg es so kom los siav mentsis.” (Malakau 6:30-32) Cov txiv los yuav tsum paub xav txog lawv cov pojniam thiab. Phau Vajlugkub qhia tias “pojniam tsis muaj zog.” Cov txiv yuav tsum “saib  taus” lawv. Vim li cas? Rau qhov Vajtswv “pub txojsia rau [cov pojniam] thiab rau [cov txiv] ib yam nkaus.” (1 Petus 3:7, TMZ) Cov txiv yuav tsum nco ntsoov tias yam uas muaj nqes rau Vajtswv yog qhov uas peb muab siab npuab Nws, tsis yog qhov uas peb yog pojniam lossis yog txivneej.​—Ntawv Nkauj 101:6.

8. (1) Ua li cas thiaj hais tau tias tus txiv uas hlub nws tus pojniam “kuj yog nws hlub nws tus kheej”? (2) Qhov uas ob niam txiv “koom ua ib lub cev” yog li cas tiag?

⁸ Phau Vajlugkub qhia tias tus txiv uas “hlub nws tus pojniam kuj yog nws hlub nws tus kheej.” Phau Vajlugkub qhia li no rau qhov zoo li Yexus tau hais, tus txiv thiab nws tus pojniam “tsis ua ob lub cev tiamsis koom ua ib lub cev xwb.” (Mathai 19:6) Yog li ntawd, cov uas muaj txwj nkawm ib leeg yuav tsum txaus siab rau ib leeg, tsis txhob mus “deev luag poj luag txiv.” (Paj Lug 5:15-21; Henplais 13:4) Lawv yuav tsum txaus siab rau lawv tus txwj nkawm li cas? Lawv yuav tsum tsis txhob cais chaw pw. Lawv yuav tsum paub xav txog lawv tus txwj nkawm, tsis yog xav txog lawv tus kheej xwb. (1 Khaulee 7:3-5) Tseem ceeb rau peb nco ntsoov li no: “Tsis muaj leejtwg yuav ntxub nws lub cev tsuas muaj uas yug thiab tu kom zoo xwb.” Yog li ntawd, tus txiv yuav tsum hlub nws tus pojniam ib yam li nws hlub nws tus kheej. Tus txiv yuav tsum nco ntsoov tias nws lub taubhau yog Yexus Khetos. Yexus yuav suav txim rau nws yog tias nws tsis coj li ntawd.​—Efexau 5:29; 1 Khaulee 11:3.

9. Raws li Filipi 1:8, Yexus coj tus cwj pwm zoo li cas, thiab vim li cas cov txiv yuav tsum coj li ntawd rau lawv cov pojniam thiab?

⁹ Tus tubtxib Povlauj tau qhia tias ‘Yexus Khetos muaj lub siab khuvleej.’ (Filipi 1:8) Qhov uas Yexus muaj lub siab khuvleej thiab hlub tshua, yeej txhawb tau tibneeg kawg li. Nws tus cwj pwm rub tau cov pojniam los ua nws cov thwjtim. (Yauhas 20:1, 11-13, 16) Tej pojniam kuj ntshaw kom lawv cov txiv muaj lub siab khuvleej thiab hlub tshua lawv li ntawd thiab.

10. Yexus tseg tus qauv zoo li cas rau cov pojniam xyaum?

¹⁰ Lub cuab lub yig zoo li ib lub koom haum. Yuav kom ib lub koom haum khiav haujlwm zoo, yuav tsum muaj ib tug ua lub taubhau, lossis ua tus coj. Txawm Yexus los, nws kuj muaj ib lub Taubhau uas nws yuav tsum zwm rau thiab. Phau Vajlugkub qhia tias “Vajtswv yog Khetos lub taubhau.” Ib yam li ntawd, “tus txiv yog tus pojniam lub taubhau.” (1 Khaulee 11:3) Qhov uas Yexus zwm rau nws lub taubhau yog ib tug qauv zoo heev rau sawvdaws xyaum, rau qhov peb txhua tus puavleej muaj ib lub taubhau uas peb yuav tsum tau zwm rau thiab.

11. Tus pojniam yuav tsum coj tus cwj pwm zoo li cas rau nws tus txiv, thiab nws tus qauv yuav pab tau nws tus txiv li cas?

¹¹ Cov txiv yeej yog tibneeg txhaum. Yog li ntawd, yuav muaj tej lub sijhawm tus txiv yuav coj tsis tau zoo tiav log raws li phau Vajlugkub qhia. Thaum muaj li ntawd tus pojniam yuav tsum ua li cas? Tus pojniam yuav tsum tsis txhob thuam nws tus txiv, lossis txeeb ua lub taubhau. Tus pojniam yuav tsum nco ntsoov tias qhov uas tseem ceeb rau Vajtswv, yog qhov uas nws txo hwjchim, muaj lub siab mos siab muag thiab lub siab tus yees. (1 Petus 3:4) Yog tias tus pojniam xyaum coj tus cwj pwm zoo li ntawd, yuav pab tau nws. Txawm yuav nyuaj los, tus pojniam yuav nyob tau hauv qab nws tus txiv txojkev tswjhwm raws li Vajtswv pom zoo. Phau Vajlugkub qhia ntxiv tias: “Cov pojniam los yuav tsum hwm nws tus txiv.” (Efexau 5:33) Tiamsis, yog tias tus txiv ho tsis kam nyob hauv qab Yexus Khetos txojkev tswjhwm, tus pojniam yuav tsum ua li cas? Phau Vajlugkub txhawb cov pojniam li no: “Nej yuav tsum nyob hauv nej tus txiv qab kev tswjhwm. Txawm yog cov txiv qee leej tsis ntseeg Vajtswv txojlus los qhov uas cov pojniam xyaum zoo yuav coj tau cov txiv los ntseeg tsis txog hais ib los li, rau thaum lawv pom nej ua lub neej dawb huv thiab hwm lawv.”​—1 Petus 3:1, 2.

12. Puas txhaum rau tus pojniam ua tib zoo hais nws tus txiv?

 ¹² Yuav muaj tej lub sijhawm uas tus pojniam tsis xav li tus txiv xav. Txawm nws tus txiv ntseeg Yehauvas los tsis ntseeg, yeej tsis txhaum yog tias tus pojniam ua tib zoo hais nws tus txiv. Tej zaum qhov uas tus pojniam pom zoo li ntawd kuj yog lawm thiab. Yog tias nws tus txiv mloog nws hais, tej zaum yuav pab tau tag nrho lub cuab lub yig. Thaum muaj teeb meem rau Aplahas thiab Xala nkawd lub cuab lub yig, Xala kuj hais Aplahas thiab. Aplahas tsis kam ua li nws tus pojniam Xala hais, tiamsis Vajtswv hais rau Aplahas tias: “Xala hais li cas rau koj cia li ua li ntawd.” (Nyeem Chiv Keeb 21:9-12.) Yog li ntawd, tsis txhaum rau tus pojniam pab hais nws tus txiv. Tiamsis yog tias tus txiv txiav txim siab yuav ua ib yam twg uas tsis hla Vajtswv txoj cai, nws tus pojniam yuav tsum mloog lus thiab pab txhawb yam uas nws tus txiv txiav txim siab ua ntawd.​—Tubtxib Tes Haujlwm 5:29; Efexau 5:24.

13. (1) Titau 2:4, 5 txhawb kom cov pojniam ua li cas? (2) Phau Vajlugkub qhia li cas txog kev sib cais thiab kev sib nrauj?

¹³ Thaum tus pojniam ua tes haujlwm uas Vajtswv muab pub rau nws, nws yuav pab tau nws lub cuab lub yig  zoo heev. Zoo li phau Vajlugkub qhia tias cov pojniam uas muaj txiv lawm yuav tsum “hlub lawv tus txiv thiab lawv tej menyuam, thiab paub tswj lawv lub siab, ua neeg dawb huv, tu vaj tu tsev zoo, muaj siab khuvleej, nyob hauv tus txiv qab kev tswjhwm.” (Titau 2:4, 5) Tus niam tsev uas coj li no, nws tsev neeg yuav hlub thiab saib taus nws. (Nyeem Paj Lug 31:10, 28.) Tiamsis vim peb yog tibneeg txhaum xwb, tej zaum ib txhia txwj nkawm yuav muaj teeb meem loj. Thaum kawg, ib txhia kuj tau sib cais lossis sib nrauj lawm. Phau Vajlugkub qhia li cas txog qhov no? Muaj qho zaus uas phau Vajlugkub kuj tso cai rau kev sib cais. Tiamsis kev sib cais tsis yog lam tau lam cais tsis muaj hauv paus hauv ntsis. Phau Vajlugkub qhia tias: “Tus pojniam tsis txhob tso  tus txiv tseg. . . . Thiab tus txiv los tsis txhob muab tus pojniam nrauj.” (1 Khaulee 7:10, 11) Vajlugkub tsuas tso cai rau kev sib nrauj, yog tias ib tug tau ua txhaum kev nkauj kev nraug lawm xwb.​—Mathai 19:9.

14. Yexus hlub cov menyuam li cas, thiab cov menyuam xav tau dabtsi los ntawm lawv niam lawv txiv?

¹⁴ Yexus tseg tus qauv zoo heev rau cov niam txiv xyaum, kom lawv txawj hlub lawv cov menyuam ib yam li Yexus. Thaum muaj neeg txwv tsis pub cov menyuam los cuag Yexus, nws hais rau lawv tias: “Cia cov menyuam yaus los cuag kuv, tsis txhob tav lawv.” Phau Vajlugkub hais tias “Yexus txawm puag cov menyuam ntawd thiab tsa tes npuab lawv thiab foom koob hmoov rau lawv.” (Malakau 10:13-16) Yexus twb siv sijhawm nrog cov menyuam yaus ua ke. Yog li ntawd, koj yuav tsum tau siv sijhawm li ntawd los nrog koj tus tub tus ntxhais thiab, puas yog? Cov menyuam xav kom koj siv sijhawm ntau los nrog lawv ua ke, tsis yog koj yuav siv sijhawm mentsis xwb. Koj yuav tsum siv sijhawm los qhuab qhia lawv. Yehauvas tau sam hwm kom cov niam txiv ua li ntawd.​—Nyeem Kevcai 6:4-9.

15. Cov niam txiv yuav tiv thaiv lawv cov menyuam li cas?

¹⁵ Lub qab ntuj no tsuas muaj phem zuj zus ntxiv lawm xwb. Cov niam txiv hajyam yuav tsum tiv thaiv lawv tej menyuam ntawm cov tibneeg uas nyiam muab tej menyuam yuam ua dev ua npua. Peb pom tias Yexus tau tiv thaiv nws cov thwjtim, uas nws hlub. Nws muab nws cov thwjtim hu ua “cov menyuam.” Thaum muaj neeg tuaj ntes Yexus mus tua, Yexus hais li no rau lawv txog nws cov thwjtim: “Tso cov neeg no mus.” (Yauhas 13:33; 18:7-9) Ntxwg Nyoog yeej yuav nrhiav kev los ua phem rau koj cov menyuam. Yog li ntawd, koj tus ua niam ua txiv, yuav tsum tau ceev faj txog qhov ntawd. Koj yuav tsum tau ceeb toom koj cov menyuam  ua ntej txog tej no. * (1 Petus 5:8) Tsis tau muaj ib lub caij uas yuav phem npaum li lub caij no. Yog li ntawd, cov niam txiv yuav tsum tiv thaiv lawv cov menyuam ntawm cov neeg uas xav haub ntxias tej menyuam mus ua phem ua qias. Thiab lawv yuav tsum tiv thaiv cov menyuam txojkev ntseeg. Tsis tas li ntawd xwb, lawv yuav tsum pab kom lawv cov menyuam paub qhov zoo ntawm qhov phem.

16. Cov niam txiv yuav kawm li cas los ntawm qhov uas Yexus qhuab qhia nws cov thwjtim?

¹⁶ Hmo ua ntej Yexus tuag, Yexus cov thwjtim sib cav tias leejtwg yog tus loj dua. Yexus tsis npau taws rau lawv, tiamsis nws ua siab ntev qhia lawv, kom lawv thiaj nkag siab, thiab nws tseg tau tus qauv zoo heev rau lawv xyaum. (Luka 22:24-27; Yauhas 13:3-8) Koj tus uas yog niam yog txiv yuav xyaum Yexus tus qauv li cas thaum koj qhuab ntuas koj cov menyuam? Yeej yuav muaj tej lub caij uas koj yuav tau ntuas koj cov menyuam. Tiamsis koj yuav tsum ntuas “npaum li uas tsim nyog xwb,” tsis txhob qhia ua npau taws vog rau lawv. Tsis txhob lam tau lam hais tej lus khawb siab uas “zoo yam nkaus li rab ntaj chob.” (Yelemi 30:11; Paj Lug 12:18) Yog tias koj ntuas koj cov menyuam raws kev raws cai, ces lawv yuav pom tias qhov uas koj ntuas lawv yeej tsim nyog lawm.​—Efexau 6:4; Henplais 12:9-11.

17. Yexus tus qauv pab tau tej menyuam li cas?

¹⁷ Yexus tus qauv pab puas tau tej menyuam? Yeej pab tau! Yexus tus qauv qhia tias tej menyuam yuav tsum mloog niam txiv lus. Yexus hais tias, “leej Txiv qhia li cas kuv kuj hais li ntawd.” Yexus hais ntxiv tias: “Kuv pheej ua raws li  nws lub siab nyiam.” (Yauhas 8:28, 29) Yexus yeej ua raws li nws Leej Txiv saum ntuj ceeb tsheej hais. Phau Vajlugkub qhia tias tej menyuam los yuav tsum mloog lawv niam lawv txiv lus thiab. (Nyeem Efexau 6:1-3.) Yexus yog Vajtswv tus Tub. Tiamsis nws niam thiab nws txiv, uas yog Maivliag thiab Yauxej yog neeg txhaum xwb. Txawm li ntawd los, Yexus tseem mloog nkawd lus. Qhov uas Yexus ua li ntawd yeej pab tau kom lawv lub cuab lub yig muaj kev zoo siab!​—Luka 2:4, 5, 51, 52.

18. Vim li cas Yexus ua raws li nws Leej Txiv saum ntuj hais, thiab thaum tej menyuam mloog lawv niam lawv txiv lus, lawv yuav ua rau leejtwg zoo siab?

¹⁸ Cov menyuam yuav nrhiav kev los xyaum Yexus tus qauv li cas, kom lawv niam lawv txiv thiaj muaj kev zoo siab? Muaj tej lub sijhawm, yeej tsis yoojyim rau cov hluas mloog niam txiv lus, tiamsis Vajtswv xav kom lawv ua li ntawd. (Paj Lug 1:8; 6:20) Txawm tias nyuaj npaum li cas los, Yexus yeej ib txwm mloog nws Leej Txiv saum ntuj lus. Muaj ib zaug uas Vajtswv hais kom Yexus ua ib yam nyuaj kawg li, Yexus hais tias: “Thov rho lub khob no ntawm kuv mus.” Lub khob ntawd piv txwv txog yam uas Vajtswv xav kom nws ua. Txawm tias tsis yoojyim ua raws li qhov uas Vajtswv hais, los Yexus yeej paub tias nws Leej Txiv tsuas hais kom nws ua qhov zoo xwb. Nws thiaj ua li Vajtswv hais. (Luka 22:42) Yog tias tej menyuam xyaum mloog lus, lawv yuav ua rau lawv niam lawv txiv, thiab lawv Leej Txiv saum ntuj, zoo siab kawg li. *​—Paj Lug 23:22-25.

19. (1) Xatas ntxias tej menyuam li cas? (2) Thaum tej menyuam tsis mloog lus, ua rau cov niam txiv xav li cas?

¹⁹ Ntxwg Nyoog tau sim Yexus. Yog li ntawd, peb yeej paub tias nws yuav sim ntxias cov hluas mus ua txhaum thiab.  (Mathai 4:1-10) Xatas yuav siv lwm cov hluas los txw kom lawv ua tej yam tsis zoo. Qhov no tsis yoojyim rau cov hluas. Yog li ntawd, tseem ceeb kawg li rau cov menyuam tsis txhob poo tej tibneeg uas nyiam ua txhaum! (1 Khaulee 15:33) Yakhauj tus ntxhais hu ua Dina pheej mus nrog cov neeg tsis pe hawm Yehauvas ua ke. Thaum kawg nws thiaj ntsib teeb meem. (Chiv Keeb 34:1, 2) Xav seb, yog tias muaj ib tug hauv yus lub cuab lub yig mus ua txhaum kev nkauj kev nraug, yeej yuav ua rau tsev neeg nyuaj siab kawg li!​—Paj Lug 17:21, 25.

20. Yuav kom peb tsev neeg muaj kev zoo siab, txhua tus hauv tsev neeg yuav tsum ua li cas?

²⁰ Thaum tsev neeg ua raws li tej lus qhuab qhia hauv phau Vajlugkub, lawv yuav paub tu lawv cov teeb meem dua. Qhov uas peb coj li tej lus qhuab qhia hauv phau Vajlugkub, yog yam uas yuav pab kom peb tsev neeg muaj kev zoo siab. Yog li ntawd, cov txiv, cia li hlub nej cov pojniam. Hlub lawv zoo li Yexus hlub lub koom txoos. Cov pojniam, nej cov txiv yog nej lub taubhau. Nej yuav tsum nyob hauv  qab lawv txojkev tswjhwm. Xyaum tus qauv ntawm Paj Lug 31:10-31, uas qhia txog tus pojniam zoo. Cov niam txiv, nej cia li cob qhia nej cov menyuam. (Paj Lug 22:6) Cov txiv tsev, ‘yug nej tsev neeg’ kom zoo. (1 Timaute 3:4, 5; 5:8) Cov menyuam, mloog nej niam nej txiv lus. (Khaulauxi 3:20) Txhua tus hauv lub cuab lub yig yog neeg txhaum. Yuav muaj tej lub sijhawm uas peb ib leeg yuav ua tsis haum ib leeg siab. Yog li ntawd, ua neeg txo hwjchim, thiab thov kev zam txim ntawm koj tsev neeg.

21. Yuav muaj tej yam zoo twg tshwm sim rau yav tom hauv ntej, thiab peb yuav coj li cas peb lub cuab lub yig thiaj muaj kev zoo siab rau tamsim no?

²¹ Phau Vajlugkub yeej muaj tej lus cob qhia thiab tej lus qhuab ntuas uas zoo kawg li rau tsev neeg tiag. Tsis tas li ntawd xwb, phau Vajlugkub qhia peb txog Vajtswv lub qab ntuj tshiab. Lub qab ntuj tshiab ntawd yuav yog ib lub vaj kaj siab uas tsuas muaj cov tibneeg pe hawm Yehauvas xwb. Lawv yuav muaj kev zoo siab heev. (Qhia Tshwm 21:3, 4) Tej yam uas yuav muaj tshwm sim rau yav tom hauv ntej, zoo kawg li puas yog? Tamsim no los peb kuj nrhiav tau kev zoo siab rau peb lub cuab lub yig, yog tias peb coj raws li Vajtswv tej lus qhuab qhia hauv nws Txojlus, phau Vajlugkub.