1. Hitho ya kũgĩa na gĩkeno thĩinĩ wa famĩlĩ nĩ ĩrĩkũ?

JEHOVA NGAI endaga mũtũũrĩre waku wa famĩlĩ ũgĩe na gĩkeno. Kiugo gĩake, Bibilia, kĩheaga o mũndũ thĩinĩ wa famĩlĩ ũtaaro, na gĩgataarĩria ũrĩa Ngai endaga o mũndũ eke. Rĩrĩa andũ othe thĩinĩ wa famĩlĩ meka kũringana na motaaro ma Ngai-rĩ, moimĩrĩro makoragũo marĩ mega mũno. Jesu oigire ũũ: “Gũkena-rĩ, nĩ andũ arĩa maiguaga Ũhoro wa Ngai, makaũrũmagia.”—Luka 11:28.

2. Gĩkeno kĩa famĩlĩ kiumanaga na ithuĩ kũmenya ũndũ ũrĩkũ?

² Gĩkeno kĩa famĩlĩ kaingĩ kiumanaga na ithuĩ kũmenya atĩ famĩlĩ yoimire kũrĩ Jehova, ũrĩa Jesu eetire “Ithe witũ.” (Mathayo 6:9) Famĩlĩ ciothe gũkũ thĩ ciĩ kuo nĩ ũndũ wa Ithe witũ wa matu-inĩ, na hatarĩ nganja nĩoĩ kĩrĩa kĩrehaga gĩkeno thĩinĩ wa famĩlĩ. (Aefeso 3:14, 15) Kwoguo-rĩ, Bibilia nĩ ĩrutanaga o mũndũ thĩinĩ wa famĩlĩ agĩrĩirũo nĩ gwĩka atĩa?

3. Bibilia ĩtaaragĩria atĩa kĩambĩrĩria kĩa famĩlĩ, na tũmenyaga atĩa atĩ ũrĩa yugaga nĩ wa ma?

³ Jehova oombire andũ a mbere, Adamu na Hawa, na akĩmanyitithania marĩ ta mũthuri na mũtumia. Akĩmaiga thĩinĩ wa mũgũnda mũthaka wetagwo Edeni ũtuĩke mũciĩ wao, na akĩmera magĩe ciana. Jehova akiuga ũũ: “Ciarai mũno, mũthegee, mũiyũre thĩ.” (Kĩambĩrĩria 1:26-28; 2:18, 21-24) Rũu to rũgano tu, tondũ Jesu nĩoonanirie atĩ ũrĩa ibuku rĩa Kĩambĩrĩria riugaga wĩgiĩ kwambĩrĩria kwa mũtũũrĩre wa famĩlĩ nĩ wa ma. (Mathayo 19:4, 5) O na gũtuĩka nĩtũcemanagia na mathĩna maingĩ na ũtũũro ndũtariĩ ta ũrĩa Ngai aatanyĩte-rĩ, reke tuone kĩrĩa kĩngĩtũma gĩkeno thĩinĩ wa famĩlĩ kĩhoteke.

4. (a) O mũndũ thĩinĩ wa famĩlĩ angĩongerera gĩkeno atĩa thĩinĩ wa mũciĩ? (b) Kwĩruta ũhoro wa Jesu nĩ kwa bata mũno nĩkĩ harĩ kũgĩa na gĩkeno thĩinĩ wa famĩlĩ?

⁴ O mũndũ thĩinĩ wa famĩlĩ no ateithie kũrehe gĩkeno thĩinĩ wa mũtũũrĩre wa famĩlĩ angĩtũkia Ngai harĩ kuonania wendo. (Aefeso 5:1, 2) No rĩrĩ, tũngĩhota gũtũkia Ngai atĩa na tũtingĩhota o na kũmuona? No twĩrute ũrĩa Jehova onanagia wendo tondũ nĩ aatũmire Mũrũ wake wa irigithathi kuuma matu-inĩ oke gũkũ thĩ. (Johana 1:14, 18) Jesu Kristo rĩrĩa aarĩ gũkũ thĩ-rĩ, eekaga o ta Ithe wake wa igũrũ ũũ wega atĩ kuona Mũrũ ũcio na kũmũthikĩrĩria kwarĩ o ta ũndũ ũmwe na gũkorũo hamwe na Jehova na kũmũthikĩrĩria. (Johana 14:9) Kwoguo-rĩ, tũngĩĩruta igũrũ rĩgiĩ wendo ũrĩa Jesu oonanirie na tũrũmĩrĩre ngerekano yake, ithuothe no tũteithie kũrehe gĩkeno thĩinĩ wa famĩlĩ.

5, 6. (a) Athuri nĩ atĩa merutaga kuumana na ũrĩa Jesu ekagĩra gĩkundi? (b) Mũndũ agĩrĩirũo nĩ gwĩka atĩa nĩguo oherũo mehia?

⁵ Bibilia yugaga atĩ athuri magĩrĩirũo gũtuga atumia ao o ta ũrĩa Jesu aatugaga arutwo ake. Ta wĩcirie watho ũyũ wa Bibilia: “Inyuĩ athuri-rĩ, endagai atumia anyu o ta ũrĩa  Kristo nake endire kanitha, akĩya kwĩneana nĩ ũndũ waguo . . . O ũguo noguo athuri nao maagĩrĩirũo nĩ kwendaga atumia ao ene, o ta arĩ o mĩĩrĩ yao ene. Mũndũ ũrĩa wendaga mũtumia wake, nĩwe wĩendaga: nĩ ũndũ gũtirĩ kwonwo mũndũ ũthũire mwĩrĩ wake mwene; no nĩ kũũhe aũheaga irio na akaũikaragia wega, o ta ũrĩa Kristo nake ekaga kanitha.”—Aefeso 5:23, 25-29.

⁶ Wendo ũrĩa Jesu endete arutwo ake naguo nĩũigĩire athuri kĩonereria gĩkinyanĩru mũno. Jesu ‘aamendire nginya o kĩrĩkĩrĩro,’ akĩruta muoyo wake nĩ ũndũ wao, o na gũtuĩka matiarĩ akinyanĩru. (Johana 13:1; 15:13) No taguo, athuri meragwo ũũ: “Na inyuĩ athuri-rĩ, endagai atumia anyu, na tigagai kũmakũũma.” (Akolosai 3:19) Nĩ kĩĩ kĩngĩteithia mũthuri kũhũthĩra ũtaaro ta ũcio, mũno makĩria rĩrĩa mũtumia wake ahĩtia? Agĩrĩirũo aririkane mahĩtia make we mwene, na ũrĩa agĩrĩirũo gwĩka nĩguo Ngai amuohere. Ũguo nĩ atĩa? No mũhaka ohere arĩa othe mamũhĩtagĩria, na nĩ hamwe na mũtumia wake. O nake mũtumia agĩrĩirũo nĩ gwĩka o ũguo. (Mathayo 6:12, 14, 15) Nĩ wona kĩrĩa gĩtũmaga amwe moige atĩ nĩguo mũtũũrĩre wa famĩlĩ ũgacĩre, no nginya andũ erĩ mahikanĩtie makorũo meharĩirie kuohanĩra?

7. Nĩ ũndũ ũrĩkũ Jesu aaririkanaga wĩgiĩ arutwo ake, na aaigĩire athuri kĩonereria kĩrĩkũ?

⁷ Athuri magĩrĩirũo kuona atĩ Jesu hingo ciothe nĩ aacayagĩra arutwo ake. Nĩ aaririkanaga ũrĩa matangĩhota gwĩka, o hamwe na mabataro mao. Kwa ngerekano-rĩ, rĩrĩa arutwo ake maarĩ anogu aamerire ũũ: “Ũkai inyuĩ inyuiki kũrĩa gũtarĩ andũ, mũkahurũke hanini.” (Mariko 6:30-32) Atumia o nao nĩ mendaga gwĩcirio mũno. Bibilia yugaga atumia ‘matirĩ na hinya mwĩrĩ,’ na athuri maathĩtwo ‘mamatĩage.’ Nĩkĩ? Tondũ athuri na atumia, othe nĩ agai a “wega ũrĩa wa muoyo.” (1 Petero 3:7) Athuri magĩrĩirũo kũririkana atĩ wĩhokeku wa mũndũ nĩguo ũtũmaga etĩkĩrĩke nĩ Ngai, no ti ũndũ wa gũtuĩka nĩ mũthuri kana mũtumia.—Thaburi 101:6.

8. (a) Nĩ na njĩra ĩrĩkũ mũthuri ũrĩa ‘wendete mũtumia wake, nĩwe wĩendete’? (b) Gũkorũo mũthuri na mũtumia marĩ “mwĩrĩ ũmwe” nĩ kuuga atĩa?

 ⁸ Bibilia yugaga atĩ mũthuri “ũrĩa wendaga mũtumia wake, nĩwe wĩendaga.” Gĩtũmi nĩ ũndũ, mũthuri na mũtumia wake o ti ‘erĩ [rĩngĩ], no nĩ mwĩrĩ ũmwe,’ o ta ũrĩa Jesu oigire. (Mathayo 19:6) Kwoguo matiagĩrĩire kwĩrirĩria kana gũkorũo na itherũ na mũndũ matahikanĩtie nake. (Thimo 5:15-21; Ahibirania 13:4) No metheme gwĩka ũguo korũo mahingia bata wa mũndũ na ũrĩa ũngĩ matekwĩyenda. (1 Akorintho 7:3-5) Magĩrĩirũo kũririkana atĩ “gũtirĩ kwonwo mũndũ ũthũire mwĩrĩ wake mwene; no nĩ kũũhe aũheaga irio na akaũikaragia wega.” Athuri mabataire kwenda atumia ao o ta ũrĩa meendete o ene, makĩririkanaga atĩ o nao marĩ rungu rũa mũtwe wao, Jesu Kristo.—Aefeso 5:29; 1 Akorintho 11:3.

9. Nĩ wendo wa mũthemba ũrĩkũ ũgwetetwo thĩinĩ wa Afilipi 1:8, na athuri maagĩrĩire kuonia atumia ao wendo ta ũcio nĩkĩ?

⁹ Mũtũmwo Paulo nĩ aaririe ũhoro wa ‘tha [wendo mwororo, NW ] iria ĩĩ na Kristo Jesu.’ (Afilipi 1:8) Wororo ũcio wa Jesu nĩ wacanjamũraga, na atumia arĩa maarĩ arutwo ake nĩ maagucagĩrĩrio nĩguo. (Johana 20:1, 11-13, 16) Atumia o nao nĩmendaga wendo mwororo kuuma kũrĩ athuri ao.

10. Jesu aigĩte kĩonereria atĩa harĩ atumia?

¹⁰ Tondũ famĩlĩ ĩkoragwo na andũ aigana ũna-rĩ, nĩĩbataraga mũndũ wa kũmĩtongoria nĩgetha ĩthiĩ wega. O na Jesu nĩ arĩ Ũrĩa athĩkagĩra arĩ ta Mũtwe wake. “Mũtwe wa Kristo nĩwe Ngai,” o ta ũrĩa “mũtwe wa mũndũ-wa-nja [arĩ] mũndũ mũrũme.” (1 Akorintho 11:3) Wathĩki wa Jesu harĩ ũtongoria wa Ngai nĩ kĩonereria gĩkinyanĩru, tondũ ithuothe nĩ tũrĩ na ũrĩa twagĩrĩirũo nĩ gwathĩkĩra.

11. Mũtumia agĩrĩirũo nĩ kuona mũthuri wake atĩa, na mĩtugo yake ĩngĩkorũo na moimĩrĩro marĩkũ harĩ mũthuriwe?

¹¹ Arũme ti akinyanĩru na nĩmahĩtagia, na kaingĩ makaremwo gũtongoria famĩlĩ wega. Kwoguo-rĩ, mũtumia abataire  gwĩka atĩa? Ndagĩrĩirũo kwagĩra mũthuri gĩtĩo kana kũgeria kũmũtunya ũtongoria. Mũtumia agĩrĩirũo kũririkana atĩ ũhooreri na gũkindĩria ngoro nĩ cia bata mũno maitho-inĩ ma Ngai. (1 Petero 3:4) Gwĩka ũguo nĩ gũkũmũteithia gwathĩka ũrĩa Ngai endaga, o na rĩrĩa atarĩ ũhũthũ gwĩka ũguo. Ningĩ Bibilia yugaga ũũ: “Mũtumia ndakaage gwĩtigĩra mũthuriwe.” (Aefeso 5:33) Ĩ angĩkorũo mũthuri ndetĩkĩrĩte Kristo arĩ ta Mũtwe wake? Bibilia ĩraga atumia ũũ: “Athĩkagai nĩ athuri anyu, nĩguo atĩ angĩkorũo nĩharĩ amwe mataiguaga Ũhoro, mahote kũgarũrũo ngoro, Ũhoro ũtarĩ ho, nĩ mĩikarĩre ya atumia ao, nĩ ũndũ wa kuonaga ũrĩa mũikaraga na mĩikarĩre ya ũthingu, na mwĩ na gĩtĩo.”—1 Petero 3:1, 2.

12. Nĩkĩ ti ũũru mũtumia kũruta mawoni na njĩra ya gĩtĩo?

¹² Ti kuuga atĩ mũtumia ndarĩ na gĩtĩo angĩruta mawoni matahaanaine na ma mũthuri wake na njĩra ya gĩtĩo, mũthuri akorũo nĩ etĩkĩtie kana ndetĩkĩtie. Mawoni make hihi no makorũo marĩ mega, na famĩlĩ yothe no ĩgunĩke korũo mũthuri amũthikĩrĩria. O na gũtuĩka Iburahimu ndetĩkanirie na mũtumia wake, Sara, rĩrĩa aamwĩrire ũrĩa mekũnina thĩna waarĩ mũciĩ-rĩ, Ngai erire Iburahimu ũũ: “Ĩtĩkĩra kũigua mũgambo wake.” (Kĩambĩrĩria 21:9-12) Rĩrĩa mũthuri atua itua rĩtareganĩte na watho wa Ngai-rĩ, mũtumia nĩ agĩrĩirũo kũmũnyita mbaru nĩguo onanie wathĩki wake.—Atũmwo 5:29; Aefeso 5:24.

13. (a) Ibuku rĩa Tito 2:4, 5 rĩĩraga atumia arĩa ahiku meke atĩa? (b) Bibilia yugaga atĩa igũrũ rĩgiĩ kweheranĩra na gũtigana?

¹³ Mũtumia no ahingie wĩra wake wega na njĩra ya kũrũmbũiya maũndũ ma famĩlĩ. Kwa ngerekano-rĩ, Bibilia yonanagia atĩ atumia ahiku maagĩrĩire kwendaga “athuri ao o na ciana ciao, na maikarage marĩ na ũũgĩ wa ngoro, na matuĩke a mĩtugo mĩtheru, na marutage wĩra o wa kwao mũciĩ, na matuĩke atugi, na maathĩkage nĩ athuri ao ene.” (Tito 2:4, 5) Mũtumia mũhiku na wĩ na ciana ũrĩa wĩkaga ũguo nĩ arĩendagwo na akaheo gĩtĩo hingo ciothe nĩ famĩlĩ yake. (Thimo 31:10, 28) No tondũ mũthuri na mũtumia ti akinyanĩru-rĩ,  rĩmwe nĩ gũkoragwo na maũndũ maritũ mangĩtũma andũ meheranĩre kana matigane biũ. Bibilia nĩ ĩtĩkĩrĩtie mũthuri na mũtumia meheranĩre nĩ ũndũ wa itũmi imwe. No kweheranĩra ti ũndũ wa itherũ, tondũ Bibilia ĩtaaranĩte ũũ: “Mũtumia ndakanatigane na mũthuriwe,  . . . ningĩ atĩ mũthuri ndakanaingate mũtumia wake.” (1 Akorintho 7:10, 11) Ũmwe wao angĩtharia, norĩo tu hihi mangĩtigana kũringana na Maandĩko.—Mathayo 19:9.

14. Jesu aatugaga ciana atĩa, na ciana nĩ kĩĩ ciendaga kuuma kũrĩ aciari?

¹⁴ Jesu nĩ aaigire kĩonereria gĩkinyanĩru harĩ aciari kĩa ũrĩa magĩrĩirũo gũtuga ciana ciao. Rĩrĩa andũ amwe maageragia kũgiria ciana itigathiĩ harĩ Jesu-rĩ, we oigire ũũ: “Rekei twana tũũke kũrĩ niĩ, mũtige gũtũgiria.” Bibilia yugaga atĩ aacokire “agĩtũiyũkia moko-inĩ make, agĩtũrathima agĩtũigagĩrĩra moko.” (Mariko 10:13-16) Kuona atĩ Jesu nĩ aahũthagĩra mahinda na ciana-rĩ, githĩ o nawe ndagwĩrĩirũo kũhũthĩra mahinda na aarĩ na ariũ aku wee mwene? Nĩ mendaga kahinda gaku kanene to ndagĩka nini tu. Nĩũkũbatara ũkorũo na kahinda ga kũmaruta, tondũ ũguo nĩguo Jehova erĩte aciari meke.—Gũcokerithia Maathani 6:4-9.

15. Aciari mangĩĩka atĩa nĩguo magitĩre ciana ciao?

 ¹⁵ O ũrĩa thĩ ĩno ĩrathiĩ na mbere gũthũka-rĩ, ciana nĩ irabatara aciari megũcigitĩra kuuma kũrĩ andũ arĩa marenda gũciĩka ũũru, ta arĩa manyitaga ciana. Ta wĩcirie ũrĩa Jesu aagitĩire arutwo ake arĩa eetire “twana tũtũ,” nĩ ũrĩa aamendete. Rĩrĩa aanyitirũo akuhĩrĩirie kũũragwo-rĩ, Jesu nĩ athondekeire arutwo ake njĩra ya kũũrĩra. (Johana 13:33; 18:7-9) Ũrĩ ta mũciari-rĩ, nĩũbataire kwĩhũga na njĩra cia Mũcukani cia kũgeria gũthũkia ciana ciaku. Wagĩrĩirũo kũmakaania o mbere. * (1 Petero 5:8) Rĩu nĩ hĩndĩ marĩ ũgwati-inĩ mũnene wa kĩmwĩrĩ, kĩĩroho o na wa mĩtugo kũrĩ hĩndĩ ĩngĩ o yothe.

16. Nĩ ũndũ ũrĩkũ aciari mangĩĩruta kuumana na ũrĩa Jesu aarũmbũyanirie na kwaga gũkinyanĩra kwa arutwo ake?

 ¹⁶ Ũtukũ ũmwe mbere ya Jesu gũkua-rĩ, arutwo ake nĩ maakararanirie igũrũ rĩgiĩ nũũ warĩ mũnene gatagatĩ-inĩ kao. Handũ ha kũmarakarĩra-rĩ, Jesu na njĩra ya wendo aathire na mbere kũmoonereria na mĩario na ciĩko. (Luka 22:24-27; Johana 13:3-8) Akorũo wĩ mũciari-rĩ, nĩ ũrona ũrĩa ũngĩrũmĩrĩra kĩonereria kĩa Jesu harĩ ũrĩa ũtaaraga ciana ciaku? Nĩ ma, nĩcibataraga kũrũngwo, no ciagĩrĩire kũrũngwo na “kĩhooto,” kana na mũigana ũrĩa wagĩrĩire, no ti na marakara. Ndũngĩenda kwaria ũtegwĩciria “ta gũthecanga kwa rũhiũ.” (Jeremia 30:11; Thimo 12:18) Mwana agĩrĩire kũrũngwo na njĩra ĩrĩa thutha-inĩ akoona atĩ yaarĩ njagĩrĩru.—Aefeso 6:4; Ahibirania 12:9-11.

17. Jesu aigire kĩonereria gĩkinyanĩru harĩ ciana na njĩra irĩkũ?

¹⁷ Hihi ciana kũrĩ ũndũ cingĩĩruta kuuma kũrĩ Jesu? Ĩĩ nĩ harĩ! Jesu nĩoonanirie na ngerekano yake we mwene ũrĩa ciana ciagĩrĩirũo gwathĩkĩra aciari ao. Oigire ũũ: “Maũndũ maya ngwaria o ta ũrĩa Ithe witũ aandutire.” Agĩcoka akĩongerera ũũ: “Hingo ciothe niĩ njĩkaga o maũndũ marĩa mamũkenagia.” (Johana 8:28, 29) Jesu nĩ aathĩkagĩra Ithe wake wa matu-inĩ, na Bibilia ĩraga ciana ciathĩkagĩre aciari ao. (Aefeso 6:1-3) O na gũtuĩka Jesu aarĩ mwana mũkinyanĩru-rĩ, nĩ aathĩkĩire aciari ake a gũkũ thĩ, Jusufu na Mariamu, na matiarĩ akinyanĩru. Ũndũ ũcio hatarĩ nganja nĩwarehagĩra andũ othe thĩinĩ wa famĩlĩ gĩkeno!—Luka 2:4, 5, 51, 52.

18. Nĩkĩ gĩatũmaga Jesu hingo ciothe aathĩkĩre Ithe wake wa matu-inĩ, na nũũ ũkenaga rĩrĩa ciana ciathĩkĩra aciari ao thikũ ici?

¹⁸ Ciana hihi no cione njĩra iria cingĩtũkia Jesu makĩria na itũme aciari ao makene? Nĩ ma, rĩmwe ciana no cione gwathĩkĩra aciari ta arĩ ũndũ mũritũ, no ũguo nĩguo Ngai endaga ciana ciĩke. (Thimo 1:8; 6:20) Jesu aathĩkagĩra Ithe wake wa matu-inĩ hingo ciothe, ona rĩrĩa gwĩka ũguo kwarĩ ũndũ wĩ hinya. Hĩndĩ ĩmwe rĩrĩa Ngai eendaga Jesu eke ũndũ warĩ  mũritũ-rĩ, Jesu oigire ũũ: “Thengeria gĩkombe gĩkĩ [ũndũ mũna eendagwo eke].” No Jesu eekire ũrĩa Ngai eendaga, tondũ nĩ aamenyaga atĩ Ithe nĩwe woĩ kũmũkĩra. (Luka 22:42) Ciana cingĩĩruta gwathĩka-rĩ, no citũme aciari ao na Ithe wao wa matu-inĩ makene mũno. *—Thimo 23:22-25.

19. (a) Shaitani ageragia ciana na njĩra ĩrĩkũ? (b) Mĩtugo mĩũru ya ciana ĩngĩkorũo na moimĩrĩro marĩkũ harĩ aciari?

¹⁹ Mũcukani nĩ aageririe Jesu, na no tũkorũo na ma atĩ nĩ arĩgeragia ciana ciĩke maũndũ mooru. (Mathayo 4:1-10) Shaitani ũrĩa Mũcukani nĩ ahũthagĩra ũndũ wa arata kũhatĩkana gwĩka maũndũ mooru, na ũndũ ũcio no ũkorũo ũrĩ na hinya kũrega. Kwoguo-rĩ, nĩ ũndũ wa bata mũno ciana itigakorũo na thiritũ na arĩa matarĩ mĩtugo mĩega! (1 Akorintho 15:33) Dina, mwarĩ wa Jakubu, aarĩ na thiritũ na andũ mataathathayagia Jehova, na ũndũ ũcio ũkĩrehe thĩna mũingĩ. (Kĩambĩrĩria 34:1, 2) Ta wĩcirie ũrĩa famĩlĩ ĩngĩtuurũo korũo ũmwe wayo aatonya ũtharia-inĩ!—Thimo 17:21, 25.

20. Nĩguo gũkorũo na gĩkeno thĩinĩ wa famĩlĩ-rĩ, o mũndũ agĩrĩirũo gwĩka atĩa?

²⁰ Nĩ ũhũthũ gũtooria mathĩna ma famĩlĩ  mũndũ angĩhũthĩra motaaro ma Bibilia. Gwĩka ũguo nĩkuo hitho ya kũrehe gĩkeno thĩinĩ wa famĩlĩ. Nĩ ũndũ ũcio-rĩ, inyuĩ athuri, endagai atumia anyu, na mũmatugage o ta ũrĩa Jesu atugaga gĩkundi gĩake. Atumia, athĩkagĩrai ũtongoria wa athuri anyu, na mũrũmĩrĩre ngerekano ya mũtumia ngatha ũrĩa warĩrĩirio thĩinĩ wa Thimo 31:10-31. Aciari, menyeriai ciana cianyu njĩra iria njega. (Thimo 22:6) Maithe, ‘athagai nyũmba cianyu ene’ na njĩra njega. (1 Timotheo 3:4, 5; 5:8) Na inyuĩ ciana-rĩ, athĩkagĩrai aciari anyu. (Akolosai 3:20) Thĩinĩ wa famĩlĩ gũtirĩ mũndũ o na ũmwe mũkinyanĩru, othe nĩmahĩtagia. Kwoguo nĩ twĩnyihie, na tũkahoyaga tuoherũo.

21. Nĩ ciĩrĩgĩrĩro irĩkũ cia magegania twĩrĩgĩrĩire, na tũngĩka atĩa nĩguo tũkenere mũtũũrĩre wa famĩlĩ wĩ na gĩkeno rĩu?

²¹ Nĩ ma Bibilia ĩ na ciugo njega mũno cia ũtaaro na ũrutani wĩgiĩ mũtũũrĩre wa famĩlĩ. Makĩria, nĩĩtũrutaga igũrũ rĩgiĩ thĩ njerũ ya Ngai na paradiso ĩrĩa ĩgakorũo gũkũ thĩ, ĩiyũirũo nĩ andũ me na gĩkeno marathathaiya Jehova. (Kũguũrĩrio 21:3, 4) Icio nĩ ciĩrĩgĩrĩro cia magegania! O na rĩu no tũkenere mũtũũrĩre wa famĩlĩ wĩ na gĩkeno twahũthĩra ũrutani wa Ngai ũrĩa wĩ thĩinĩ wa Kiugo gĩake, Bibilia.