1. Wetin go mek famili dɛn gladi?

JIOVA GƆD want mek famili dɛn gɛt gladi at. Insay in Wɔd di Baybul, i sho wetin i want mek ɔlman na di famili du. We ɔlman na di famili du wetin Gɔd want, dat go mek ɔlman gladi. Jizɔs bin se: “Mɔ blɛsin de fɔ di pipul dɛn we yɛri Gɔd in wɔd ɛn du wetin Gɔd tɛl dɛn.”—Lyuk 11:​28.

2. Wetin ɔlman na di famili fɔ no we go mek dɛn gɛt gladi at?

² Di men tin we go mek famili dɛn gladi, na we ɔlman no se di Pɔsin we mek di famili na Jiova, we Jizɔs kɔl wi “Papa.” (Matyu 6:​9) Na wi Papa we de na ɛvin, na in mek ɔl di famili dɛn na di wɔl. I no wetin go mek di famili gɛt gladi at. So, wetin di Baybul se ɔlman na di famili fɔ du?

3. Aw di Baybul se famili bigin, ɛn aw wi no se dat na tru?

³ We Jiova mek Adam ɛn Iv, i mek dɛn ɔl tu bi man ɛn wɛf. Dɔn i put dɛn na di gadin we bin de na Idɛn ɛn tɛl dɛn fɔ bɔn pikin dɛn. I tɛl dɛn se: “Una bɔn bɔku pikin dɛn, fɔ mek una de ɔlsay na di wɔl ɛn kɔntrol di wɔl.” (Jɛnɛsis 1:​26-28; 2:​18, 21-24) Wi no se dis nɔto lay lay stori  bikɔs Jizɔs bin sho se wetin di Baybul tɔk bɔt aw famili bigin, na tru. (Matyu 19:​4, 5) Lɛ wi si aw famili dɛn go ebul gɛt gladi at pan ɔl we prɔblɛm dɛn bɔku, ɛn di wɔl nɔ de lɛk aw Gɔd bin want am.

4. (a) Aw ɔlman na di famili go ɛp fɔ mek di famili gɛt gladi at? (b) Wetin mek we wi lan bɔt Jizɔs go ɛp fɔ mek wi famili gladi?

⁴ Gɔd lɛk ɔlman. So ɔlman na di famili go ɛp fɔ mek di famili gladi we dɛn tray fɔ tan lɛk Gɔd. (Lɛta Fɔ Ɛfisɔs 5:​1, 2) Bɔt aw wi go ebul fɔ tan lɛk Gɔd we wi nɔ de si am? Wi go tan lɛk am we wi lan bɔt am. Ɛn wi go ebul du dat we wi lan bɔt di tin dɛn we in wangren Pikin bin de du we i bin de na di wɔl. (Jɔn 1:​14, 18) We Jizɔs bin de na di wɔl, i bin de falamakata in Papa gud gud wan. Na dat mek we pipul dɛn bin de si Jizɔs ɛn yɛri we i de tɔk, i bin tan lɛk se dɛn de nia Jiova ɛn de lisin to am. (Jɔn 14:​9) So, if wi lan bɔt di we aw Jizɔs bin de sho lɔv ɛn falamakata am, dat go ɛp wi fɔ mek wi famili gladi.

5, 6. (a) Aw maredman dɛn go falamakata di we aw Jizɔs bin de trit in disaypul dɛn? (b) Wetin pɔsin fɔ du fɔ mek Gɔd fɔgiv am?

⁵ Di Baybul se maredman dɛn fɔ trit dɛn wɛf dɛn lɛk aw Jizɔs bin de trit in disaypul dɛn. Di Baybul se: “Man fɔ lɛk in wɛf lɛkɛ aw Krays lɛk di chɔch sote i day . . . Man fɔ lɛk in wɛf lɛkɛ aw i lɛk in yon bɔdi. Di man we lɛk in wɛf, lɛk insɛf. Nɔbɔdi nɔ de we nɔ lɛk insɛf, na dat mek pɔsin de it ɛn ol in bɔdi gud, lɛkɛ aw Krays de du fɔ di chɔch.”—Na wi mek am italiks; Lɛta Fɔ Ɛfisɔs 5:​23, 25-29.

⁶ Di we aw Jizɔs lɛk in disaypul dɛn sho aw maredman dɛn fɔ lɛk dɛn wɛf dɛn. Jizɔs “sho dɛn se di lɛk we i lɛk dɛn go de sote go.” I ivin day fɔ dɛn pan ɔl we dɛn nɔ pafɛkt. (Jɔn 13:​1; 15:​13) Semweso, di Baybul tɛl maredman dɛn se: “Una fɔ lɛk una wɛf, una nɔ fɔ dil tranga wan wit dɛn.”  (Lɛta Fɔ Kɔlɔse 3:​19) Wetin go ɛp maredman fɔ du wetin di Baybul se, mɔ if in wɛf du tin dɛn we nɔ fayn? I fɔ mɛmba se insɛf kin mek mistek. I fɔ mɛmba bak wetin i fɔ du fɔ mek Gɔd fɔgiv am. Wetin i fɔ du? Insɛf fɔ fɔgiv di wan dɛn we de du am bad, we min se i fɔ fɔgiv in wɛf. Ɛn in wɛf sɛf fɔ du di sem tin. (Rid Matyu 6:​12, 14, 15.) Na dat mek pipul dɛn kin se mared-os we swit na say usay di man ɛn di uman de fɔgiv dɛnsɛf.

7. Wetin Jizɔs bin no bɔt in disaypul dɛn? Aw maredman dɛn go falamakata am?

⁷ I fayn fɔ mek maredman dɛn mɛmba se Jizɔs bin de tink bɔt wetin in disaypul dɛn ebul fɔ du ɛn wetin dɛn nɔ ebul fɔ du. Lɛk wan tɛm we in disaypul dɛn bin taya, Jizɔs tɛl dɛn se: “Una lɛ wi go blo na ples we pipul nɔ de.” (Mak 6:​30-32) Maredman dɛnsɛf fɔ de tink bɔt wetin dɛn wɛf dɛn ebul fɔ du ɛn wetin dɛn nɔ ebul fɔ du. Di Baybul se uman dɛn “nɔ gɛt trɛnk lɛkɛ man,” ɛn maredman dɛn fɔ “rɛspɛkt” dɛn wɛf dɛn. Wetin mek? Di Baybul se bikɔs Gɔd go gi maredman ɛn mareduman dɛn “layf we go de sote go.” (Pita In Fɔs Lɛta 3:​7) Maredman dɛn fɔ mɛmba se na we pɔsin fetful to Gɔd go mek Gɔd lɛk am, nɔto we di pɔsin na man ɔ na uman.—Sam 101:​6.

8. (a) Wetin mek di Baybul se maredman “we lɛk in wɛf, lɛk insɛf”? (b) Wetin di Baybul min we i se di man ɛn in wɛf “nɔto tu pipul igen, dɛn tu dɔn de lɛkɛ wan pɔsin”?

⁸ Di Baybul se maredman “we lɛk in wɛf, lɛk insɛf.” Wetin mek di Baybul se so? Jizɔs se na bikɔs di man ɛn in wɛf “nɔto tu pipul igen, dɛn tu dɔn de lɛkɛ wan pɔsin.” (Na wi mek am italiks; Matyu 19:​6) So na dɛn tu nɔmɔ fɔ du mami ɛn dadi biznɛs; dɛn nɔ fɔ du am wit ɔda pɔsin. (Prɔvabs 5:​15-21; Di Ibru Pipul Dɛn 13:​4) Wetin go ɛp dɛn fɔ du dat? Na we dɛn rɛdi fɔ du wetin dɛn kɔmpin want, nɔto jɔs wetin dɛn want. (Fɔs Lɛta Fɔ Kɔrint 7:​3-5) I fayn fɔ mɛmba se: “Nɔbɔdi nɔ de we nɔ lɛk insɛf, na dat mek pɔsin  de it ɛn ol in bɔdi gud.” Maredman dɛn fɔ lɛk dɛn wɛf dɛn lɛk aw dɛn lɛk dɛnsɛf. Ɛn dɛn fɔ mɛmba se na so di wan we de oba dɛn we na Jizɔs Krays, want dɛn fɔ du.—Na wi mek am italiks; Lɛta Fɔ Ɛfisɔs 5:​29; Fɔs Lɛta Fɔ Kɔrint 11:​3.

9. Wetin Lɛta Fɔ Filipay 1:​8 tɔk bɔt Jizɔs? Wetin mek man dɛn fɔ trit dɛn wɛf dɛn da we de?

⁹ Di apɔsul Pɔl bin rayt bɔt di we aw Jizɔs bin lɛk pipul dɛn wit ɔl in at. (Lɛta Fɔ Filipay 1:​8) Na dat mek pipul dɛn bin lɛk fɔ de nia am, mɔ di uman dɛn we bin bi in disaypul dɛn. (Jɔn 20:​1, 11-13, 16) Mareduman dɛn kin want mek dɛn man dɛn sho se dɛn rili lɛk dɛn.

10. Wetin Jizɔs du we mareduman fɔ falamakata?

¹⁰ Fɔ lɛ famili kɔmɔt fayn, na di man fɔ de bifo. Ivin Jizɔs gɛt Pɔsin we de oba am. Di Baybul se “na Gɔd in wangren de oba Krays” lɛk aw “na di man de oba in wɛf.” (Fɔs Lɛta Fɔ Kɔrint 11:​3) Di we aw Jizɔs put insɛf ɔnda Gɔd, na fayn we we wi fɔ falamakata bikɔs wi ɔl gɛt pɔsin we wi fɔ put wisɛf ɔnda.

11. Aw mareduman fɔ trit in man? Wetin go apin if di mareduman de fred Gɔd?

¹¹ Man dɛn nɔ pafɛkt ɛn bɔku tɛm, dɛn kin du tin dɛn we dɛn nɔ fɔ du. Bɔt, wetin di uman fɔ du? I nɔ fɔ mɔlɛs in man ɔ tray fɔ put insɛf oba in man. Di uman fɔ mɛmba se Gɔd lɛk uman we de tɔk ɛn du tin saful saful. (Pita In Fɔs Lɛta 3:​4) If di uman du dat, i go izi fɔ am fɔ put insɛf ɔnda in man, ivin we dɛn gɛt prɔblɛm. Pantap dat, di Baybul se: “Ɔl mared uman fɔ rɛspɛkt in man.” (Lɛta Fɔ Ɛfisɔs 5:​33) Bɔt wetin di uman fɔ du if in man nɔ want put insɛf ɔnda Jizɔs? Di Baybul tɛl uman dɛn se: “Una dɛn mareduman fɔ de du ɔl wetin una man dɛn tɛl una fɔ du, so dat if ɛni wan pan dɛn de we nɔ biliv Gɔd in wɔd, una go mek dɛnsɛf kam biliv pan Gɔd bay aw una de du. Una nɔ go gɛt fɔ tɔk  to dɛn bɔt Gɔd igen sɛf, bikɔs dɛn go si se una de waka tret ɛn una de fred Gɔd.”—Pita In Fɔs Lɛta 3:​1, 2.

12. Wetin mek i nɔ bad fɔ lɛ di uman tek tɛm tɛl in man aw i ɔndastand sɔntin?

¹² Nɔto ɔltin di man ɛn di uman go ɔndastand di sem we, ilɛksɛf dɛn ɔl tu de wɔship Gɔd di rayt we ɔ di man gɛt in yon rilijɔn. If di uman tɔk sɔntin we in man nɔ gri wit, dat nɔ min se i nɔ gɛt rɛspɛkt fɔ in man. Bɔt i fɔ tek tɛm tɔk to am. Ɛn i kin bi se wetin i tɔk na tin we go bɛnifit ɔlman na di famili, if di man lisin to am. Wan tɛm, Sera bin tɛl Ebraam fɔ du sɔntin we Ebraam nɔ bin lɛk. Bɔt Gɔd tɛl Ebraam se: “Du ɛnitin we Sera se.” (Rid Jɛnɛsis 21:​9-12.) Bɔt if di man dɔn disayd fɔ du sɔntin we nɔ pwɛl Gɔd in lɔ, in wɛf fɔ sɔpɔt am.—Di Apɔsul Dɛn Wok [Akt] 5:​29; Lɛta Fɔ Ɛfisɔs 5:​24.

13. (a) Wetin Taytɔs 2:​4, 5 tɛl mareduman dɛn fɔ du? (b) Wetin di Baybul tɔk bɔt we uman de lɛf in man in os? Wetin di Baybul tɔk se go mek mared skata?

¹³ Bɔku tin de we mareduman kin du fɔ kia fɔ di famili. Fɔ ɛgzampul, di Baybul tɛl mareduman dɛn “fɔ lɛk dɛn man ɛn dɛn pikin, ɛn dɛn . . . fɔ ebul kɔntrol dɛnsɛf ɛn dɛn nɔ fɔ miks pan dɔti layf, dɛn fɔ de du dɛn os biznɛs gud, dɛn fɔ de du wetin dɛn man tɛl dɛn fɔ du.” (Taytɔs 2:​4, 5) Ɛni mareduman we de du dis go mek ɔlman na di famili lɛk ɛn rɛspɛkt am. (Rid Prɔvabs 31:​10, 28.) Maredman ɛn mareduman dɛn nɔ pafɛkt. So wan wan tɛm, dɛn kin gɛt prɔblɛm. Sɔm pan dɛn prɔblɛm ya kin mek di uman lɛf in man in os ɔ mek di mared skata. Rizin dɛn de na di Baybul we go alaw di uman fɔ lɛf in man in os. Bɔt fɔ mek di uman lɛf di man in os na siriɔs tin bikɔs di Baybul se mareduman nɔ fɔ lɛf in man, ɛn di man insɛf nɔ fɔ lɛf in wɛf. (Fɔs Lɛta Fɔ Kɔrint 7:​10, 11) Di wangren tin we go mek mared skata, na we di man ɔ di uman du mami ɛn dadi biznɛs wit ɔda pɔsin.—Matyu 19:​9.

14. Aw Jizɔs bin de trit pikin dɛn? Wetin mama ɛn papa dɛn fɔ du fɔ dɛn pikin dɛn?

¹⁴ Mama ɛn papa dɛn kin lan frɔm di we aw Jizɔs bin de trit pikin dɛn. Wan tɛm we sɔm pipul dɛn bin de tray fɔ stɔp di pikin dɛn mek dɛn nɔ kam to Jizɔs, i tɛl di pipul dɛn se: “Una mek di pikin dɛn kam to mi, una nɔ tap dɛn.” Dɔn di Baybul se “Jizɔs tot di pikin dɛn, put in an pan dɛn ed ɛn blɛs dɛn.” (Mak 10:​13-16) If Jizɔs bin de spɛn tɛm wit pikin dɛn, yu nɔ tink se mama ɛn papa dɛn fɔ du di sem tin fɔ dɛn pikin dɛn? Mama ɛn papa dɛn fɔ spɛn bɔku tɛm wit dɛn pikin dɛn. Dɛn fɔ fɛn tɛm fɔ tich dɛn, bikɔs na dat Jiova tɛl mama ɛn papa dɛn fɔ du.—Rid Ditarɔnɔmi 6:​4-9.

15. Wetin mama ɛn papa dɛn go du fɔ lɛ bad tin nɔ mit dɛn pikin dɛn?

¹⁵ Di wɔl de bad ɛvride, so mama ɛn papa dɛn fɔ mek shɔ se bad pipul dɛn nɔ kam nia dɛn pikin dɛn. Dɛn fɔ du dat bikɔs sɔm pipul dɛn de we lɛk fɔ du mami ɛn dadi biznɛs wit pikin dɛn. Jizɔs bin se in disaypul dɛn tan lɛk in pikin dɛn. I bin ivin tɔk fɔ dɛn fɔ mek dɛn nɔ du dɛn bad. Yu mɛmba  wetin i du di nɛt we sɔm pipul dɛn kam ol am fɔ go kil am? I fɛn we so dat in disaypul dɛn go go. (Jɔn 13:​33; 18:​7-9) Mama ɛn papa dɛn fɔ ebul no di difrɛn difrɛn we dɛn we Setan de tray fɔ du bad to dɛn pikin dɛn, ɛn dɛn fɔ rɛdi fɔ mek dat nɔ apin. Dɛn fɔ de wɔn dɛn pikin dɛn bifo di tin apin. * (Pita In Fɔs Lɛta 5:​8) Di tin dɛn we de mek pikin nɔ kɔmɔt fayn, dɔn bɔku na di wɔl tide pas aw dɛn bin de trade.

16. Wetin mama ɛn papa dɛn go lan frɔm di we aw Jizɔs bin trit in disaypul dɛn we dɛn du bad?

¹⁶ Di nɛt bifo di de we dɛn kil Jizɔs, di disaypul dɛn bin de agyu bɔt udat impɔtant pas in kɔmpin. Jizɔs nɔ bin vɛks pan  dɛn. Bifo dat, i tek tɛm tɔk to dɛn ɛn sho dɛn wetin fɔ du. (Lyuk 22:​24-27; Jɔn 13:​3-8) If yu na pɔsin we gɛt pikin, na fɔ falamakata Jizɔs we yu de sho yu pikin aw fɔ du di rayt tin. Wan wan tɛm, yu go gɛt fɔ pɔnish yu pikin. Bɔt yu fɔ pɔnish am ‘bay aw i biev’ ɛn nɔ pɔnish am we yu at wam. If yu nɔ tink bifo yu tɔk, di tin we yu tɔk go “kɔt shap lɛk sɔd.” (Jɛrimaya 30:​11; Prɔvabs 12:​18) Yu fɔ no aw yu de pɔnish yu pikin so dat leta, i go si se i bin bɛtɛ we yu pɔnish am.—Lɛta Fɔ Ɛfisɔs 6:​4; Di Ibru Pipul Dɛn 12:​9-11.

17. Aw Jizɔs sho pikin dɛn wetin fɔ du?

¹⁷ Ɛnitin de we pikin dɛn go lan frɔm Jizɔs? Yɛs, bɔku tin de we dɛn go lan frɔm am. We dɛn lan bɔt di tin dɛn we Jizɔs du, dɛn go lan fɔ du wetin dɛn mama ɛn papa tɛl dɛn fɔ du. Jizɔs insɛf tɔk se: “Na wetin mi Papa tɛl mi fɔ tɔk nɔmɔ a de tɔk.” I tɔk bak se: “Ɔltɛm a de du dɛn tin we i lɛk.” (Jɔn 8:​28, 29) Jizɔs bin de du ɔl wetin in Papa bin tɛl am fɔ du, ɛn di Baybul se pikin dɛn fɔ du wetin dɛn mama ɛn papa tɛl dɛn fɔ du. (Rid Lɛta Fɔ Ɛfisɔs 6:​1-3.) Pan ɔl we Jizɔs na Gɔd in Pikin, i bin de du wetin Meri ɛn Josɛf bin de tɛl am fɔ du. Dat go mɔs dɔn ɛp fɔ mek ɔlman na di famili gladi!—Lyuk 2:​4, 5, 51, 52.

18. Wetin mek Jizɔs du ɔltin we in Papa tɛl am fɔ du? Udat dɛn go gladi we pikin dɛn du wetin dɛn mama ɛn papa tɛl dɛn fɔ du?

¹⁸ Aw pikin dɛn go ebul falamakata Jizɔs ɛn mek dɛn mama ɛn papa gladi? Na tru se wan wan tɛm, i nɔ kin izi fɔ mek pikin dɛn du wetin dɛn mama ɛn papa tɛl dɛn fɔ du. Bɔt Gɔd want mek pikin dɛn du wetin dɛn mama ɛn papa tɛl dɛn fɔ du. (Prɔvabs 1:​8; 6:​20) Jizɔs bin du ɔltin we in Papa tɛl am fɔ du, ivin we i nɔ kin izi fɔ am. Wan tɛm we Gɔd bin want mek Jizɔs du sɔntin we nɔ bin izi fɔ du, Jizɔs bin pre to Gɔd se: “Nɔ mek a sɔfa dis sɔfa we a fɔ sɔfa.” Bɔt pan ɔl dat, Jizɔs bin du wetin Gɔd want, bikɔs i no se in Papa no  wetin fayn fɔ am. (Lyuk 22:​42) We pikin dɛn lan fɔ du wetin dɛn mama ɛn papa want, dat go mek dɛn mama ɛn papa ɛn Jiova, gladi pasmak. *—Prɔvabs 23:​22-25.

19. (a) Aw Setan kin mek pikin dɛn du bad? (b) Aw mama ɛn papa dɛn go fil if dɛn pikin du bad tin?

¹⁹ We Jizɔs bin de na di wɔl, Setan bin de tray fɔ mek i du bad. Ɛn wi shɔ se Setan go tray bak fɔ mek pikin dɛn du bad. (Matyu 4:​1-10) Setan gɛt bɔku we fɔ mek pikin dɛn du bad. Wan we aw i kin du dis na dɛn kɔmpin dɛn i kin yuz. I nɔ kin izi fɔ lɛ pikin dɛn nɔ du wetin dɛn kɔmpin dɛn se. Na dat mek pikin dɛn nɔ fɔ kip kɔmpin wit pɔsin we de du bad. (Fɔs Lɛta Fɔ Kɔrint 15:​33) Jekɔb in gyal pikin we nem Dayna, bin de kip kɔmpin wit pipul dɛn we nɔ bin de wɔship Jiova. Dat bin mek bɔku bad bad tin dɛn apin. (Jɛnɛsis 34:​1, 2) Yu tink se ɛni famili de we go gladi if wan pɔsin na di famili de liv fri layf?—Prɔvabs 17:​21, 25.

20. Wetin ɔlman na di famili fɔ du so dat dɛn go gladi?

²⁰ Famili dɛn go ebul fɔ bia wit dɛn prɔblɛm dɛn if dɛn du wetin di Baybul se. Na dat na di men tin we go mek  gladi at de na di famili. So, maredman dɛn fɔ lɛk dɛn wɛf, ɛn dɛn fɔ trit dɛn lɛk aw Jizɔs de trit in disaypul dɛn. Mareduman dɛn fɔ put dɛnsɛf ɔnda dɛn man, ɛn dɛn fɔ du wetin Prɔvabs 31:​10-31 tɔk se gud uman fɔ du. Mama ɛn papa dɛn fɔ gi dɛn pikin dɛn gud trenin. (Prɔvabs 22:​6) Papa dɛn ‘fɔ si se ɔltin go fayn na dɛn os.’ (Fɔs Lɛta To Timoti 3:​4, 5; 5:​8) Ɛn pikin dɛn fɔ du wetin dɛn mama ɛn papa tɛl dɛn fɔ du. (Lɛta Fɔ Kɔlɔse 3:​20) Bikɔs ɔlman na di famili nɔ pafɛkt, wan wan tɛm wi kin du bad to wi kɔmpin dɛn. So i fayn fɔ mek wi put wisɛf dɔŋ ɛn beg fɔ wetin wi du.

21. Wetin na di wɔndaful tin we Gɔd dɔn prɔmis? Aw wi go ebul gɛt gladi at na wi famili rayt naw?

²¹ Di Baybul rili gɛt bɔku tin dɛn we go ɛp famili dɛn fɔ gɛt gladi at. Apat frɔm dat, i de ivin tich se di wan ol wɔl go bi Paradays, usay pipul dɛn we gɛt gladi at ɛn we de wɔship Jiova, go de. (Rɛvɛleshɔn 21:​3, 4) Yu nɔ tink se na wɔndaful tin dis we Jiova dɔn prɔmis? Bɔt ivin naw, wi go ebul fɔ gɛt gladi at na wi famili we wi du wetin Gɔd tɛl wi fɔ du insay in Wɔd, di Baybul.