1. Ngera mo uchul a deurreng er a telungalek?

A JEHOVAH el Dios a soal a telungalek er kau a lebo er ngii a deurreng er ngii. A Biblia a meskid a ulekrael el kirel a telungalek, e mesaod a ngerachel el mla er a Dios el kirir a rederta el chedal a telungalek. Me a rechedal a telungalek sel loltaut aika el ngerechelir el oltirakl a omellach er a Dios, e ngmo uchul a deurreng. A Jesus a dilu el kmo: “Te bai ngeltengat tirkel rongesii a tekingel a Dios e mo oltirakl er ngii!”​—Lukas 11:28.

2. Ngmekera e mo er ngii a deurreng er a telungalek?

² A lebo er ngii a deurreng er a telungalek er kid e ngkired el mo medengei el kmo a telungalek a mla er a Jehovah el mei, el ngii a ‘Demad’ el uaike el dilu Jesus. (Mateus 6:9) Ngii a uchul a telungalek me ngulterekokl el medengei el kmo ngerang a mo uchul a deurreng er a telungalek. (Efesus 3:14, 15) Me ngngera ngolisechakl a Biblia el kirel a ngerechelir a rederta el chedal a telungalek?

3. Ngmekera Biblia a losaod er a uchelel a telungalek, e ngera me kede medengei el kmo aika el tekoi a klemerang?

³ A Jehovah a milebeterir a rekot el chad, el Adam me  a Eva, e milekur a chebechiielir. Ngiltiterir el mo kiei er a sers er a Eden el ngii a mle klebokel el baradis el ngar tia el chutem, e dilu er tir me bo loungalek. Ngdilu er tir el kmo: “Bo le betok a re ngelekiu, ma ruldidellel a rsechiu bo le kiei er ker me ker er a beluulchad.” (Genesis 1:26-28; 2:18, 21-24) Tiang a diak el delbochel el cheldecheduch, e le Jesus a ulechotii el kmo a tekoi el lolekoi a Genesis el kirel a uchelel a telungalek a klemerang. (Mateus 19:4, 5) Me alta kede chelebangel a kmal betok el mondai me a klengar a diak el oltirakl er a moktek er a Dios, engdi me bo desa el kmo ngera me ngdirk sebechel el mo er ngii a deurreng er a telungalek.

4. (a) Ngmekera derta el chedal a telungalek a lolengeseu el melisiich er a deurreng er a telungalek? (b) Ngera me a omesubel a klengar er a Jesus a klou a ultutelel el kirel a deurreng er a telungalek?

⁴ A rederta el chad er a telungalek a sebechir el olengeseu er a telungalek el mo er ngii a deurreng er ngii sel loukerebai er a Dios a lolecholt a bltikerreng. (Efesus 5:1, 2) Engdi kede mekerang a doukerebai er a Dios a lak el sebeched el mesang? Ngsebeched el mo medengei a blekerdelel a Jehovah e le ngii el ulderchii a di ta el Ngelekel el mei er a chutem. (Johanes 1:14, 18) A Jesus Kristus er a lengar er a chutem, e nguleltirakl a blekerdelel a Demal er a bek el tekoi el lurruul. Me sel domes e dorrenges er ngii, e ngdi ua domes e dorrenges er a Jehovah. (Johanes 14:9) Me sel dosuub er a bltikerreng el lullecholt er ngii a Jesus e doltirakl er a kerebil, e a rederta er kid a mo sebeched el olengeseu el menglou er a deurreng er a telungalek er kid.

5, 6. (a) Ngmekera omerellel a Jesus el mo er a ongdibel e ungil el kerebai el kirir a rebechiil el sechal? (b) Ngera kirel a chad el meruul er ngii me lemusubes er a kngtil?

⁵ A Biblia a melekoi el kmo a omerellir a rebechiil el sechal el mo er a rebecherir a kirel el mo ua omerellel  a Jesus el mo er a redisaiplo er ngii. Ka molatk er tia el ulekrael el ngar er a Biblia el kmo: “Kemiu el sechal, moubltikerreng er a re bechemiu el di ua teletelel a Kristus er a loubltikerreng er a ikelesia me ng uldersii a klengar er ngii el kirel. . . . A re sechal a kirir el mo betik a rengrir er a re becherir el di ua le betik a rengrir er a di bedengir. A chad el betik a rengul er a bechil a di ngii el betik a rengul er ngii. Ng diak a chad el di ngii louketui er a bedengel. Ng bai omeka er ngii e mengedmokl er ngii, el di ua Kristus a lomekerreu er a ikelesia.”​—Efesus 5:23, 25-29.

⁶ A bltikerreng er a Jesus el mo er a ongdibel er a redisaiplo er ngii a kot el ungil el kerebai el kirir a rebechiil el sechal. E le alta redisaiplo er ngii a dimlak el cherrungel, engdi Jesus a “mle betik a rengul er tir el mor a ulebongel,” e tilengetengii a klengar er ngii el kirir. (Johanes 13:1; 15:13) Me nguaisei, a rebechiil el sechal a muchelechel el kmo: “Bo le betik a rengmiu er a re bechemiu, e lak bo meterkakl er tir.” (Kolose 3:19) Ngngera mo ngosuir a bechiil el sechal el mo oltaut er tia el omellach, el ileakl aike el taem el bechil a mo cheleuid a omerellel? Ngkirel el mo melatk a cheleuid el riruul me sel kirel meruul er ngii me bo el sebechel el nguu a klausubes er a Dios. Tiang ngerang? Ngkirel el ousubes er tirke el mlo mekngit el mo er ngii, el uldimukl er a bechil. Me nguaisei, a bechil me ngdirrek el kirel el meruul er a osisiu el tekoi. (Monguiu er a Mateus 6:12, 14, 15.) Me ngsebechem el mesa sel uchul me a rebebil a kmo, a ungil el chebechiil a deleuill er a reteru el chad el sebechir el kausubes?

7. Ngera el tekoi a lullatk a Jesus? Tia nguchul a ngera el kerebai el kirir a rebechiil el sechal?

⁷ A rebechiil el sechal a dirrek el kirir el mo omtab er a blekerdelel a Jesus el mle blechoel el melatk er a redisaiplo er ngii. Ngmillatk aike el sebechir el meruul me aike el ousbech. El uai tiang, sera lemesaul a bedengir, e ngdilu  er tir el kmo: “Mei me doibngid el mor a diak a re chad er ngii e mtelkib el olengull.” (Markus 6:30-32) Me a rebechiil el redil a dirrek el rredemelel a chouaisei el omelatk. A Biblia a mesaod er tir el kmo te ‘mechitechut el klekedall’ el kirir a rebechiil el sechal el mo ‘mengull’ er tir. E ngerang? E le rebechiil el sechal me a rebechiil el redil a dul “oudiukes ra grazia ra klengar.” (1 Petrus 3:7, BT) A rebechiil el sechal a kirir el melatk el kmo, ngblakerreng er a chad a rullii el mo mekreos er a osengel a Dios el diak el ultuil er a kmo ngsechal me a lechub e ngredil.​—Psalm 101:6.

8. (a) Ngmekera bechiil el sechal el “betik a rengul ra bechil a betik a rengul ra di ngii”? (b) A ‘ta el chelechad’ ngera belkul el kirel a bechiil el sechal me a bechiil el redil?

⁸ A Biblia a melekoi el kmo a bechiil el sechal el “betik a rengul ra bechil a betik a rengul ra di ngii.” E le ngua lullekoi a Jesus, a chad me a bechil el redil a dikea “le terung, e te bai mla mo tal chelechad.” (Mateus 19:6) Me a tekoi er a durs a kirel el di ngar er a delongelir el terung. (Osisechakl 5:15-21; Hebru 13:4) Ngsebechir el meruul er tiang a lsekum ngmo diak di lolatk er a di tir e bai mo melatk aike el lousbech a tang me a tang. (1 Korinth 7:3-5) Ngutebengall a uleklatk el kmo: “Ng diak a chad el di ngii louketui er a bedengel. Ng bai omeka er ngii e mengedmokl er ngii.” Me a rebechiil el sechal a kirir el mo betik a rengrir er a rebecherir el di ua lebetik a rengrir er a di tir, e lak lobes el kmo ngkirir el mo mesaod er tir el mo er a bderrir, el Jesus Kristus.​—Efesus 5:29; 1 Korinth 11:3.

9. Ngera el blekerdelel a Jesus a losaod er ngii a Filipi 1:8? Ngera me a rebechiil el sechal a kirir el olecholt er tia el blekeradel el mo er a rebecherir?

⁹ A apostol el Paulus a millekoi el kirel a “mekeald el bltikerreng ra Kristus Jesus.” (Filipi 1:8, BT) Tia el mekeald el bltikerreng el lullecholt er ngii a Jesus a kmal mle  sorir a rechad, el uldimukl er tirke el redil el mle disaiplo er ngii. (Johanes 20:1, 11-13, 16) Me a rebechiil el redil a oureng a chouaisei el mekeald el bltikerreng el mla er a rebecherir.

10. Ngmekera Jesus e ungil el kerebai el kirir a rebechiil el redil?

¹⁰ A bo el ungil a telungalek e ngkirel el ngar er ngii a bdelul. Ngmo lmuut er a Jesus me ngdirrek el mle chederedall er a Bdelul. “A bdelul a Kristus a Dios” el ua “bdelul a redil a bechil.” (1 Korinth 11:3) A omengull er a Jesus el mo er a omengederederel a Dios a kmal ungil el kerebai el mei er kid e le kede rokui el di ngar er ngii a dechederedall er ngii.

11. Ngkirel a bechiil el redil el mo ua ngera blekerdelel el bedul a bechil, e tia ngera sebechel rullii?

¹¹ A chad a diak el cherrungel a uchul me ngdiak el sebechel el churrengelii a ngerechelel el bdelul a delengchokl. Me ngera kirel a bechiil el redil el meruul er ngii? Ngdiak el kirel el melenguul er a bechil me a diak bo lomerober er a omengederederel. Ngbai kirel el melatk el kmo, a chelellakl e medemedemek el reng a kmal mekreos er a osengel a Dios. (1 Petrus 3:4) Me sel lolecholt er a chouaisei el blekeradel, e ngmo beot er ngii el oltaut er a ngerechelel er a Dios el mo mengull er a bechil el mo lmuut er a chelsel a meringel el blekeradel. A Biblia a dirrek el melekoi el kmo: “Re bek el redil a kmal kirir el mengull er a re becherir.” (Efesus 5:33) Engdi ngmo mekerang a lsekum a bechil a diak el kengei er a Kristus el Bdelul? A Biblia a mengelechel er a rebechiil el redil el kmo: “Ng kiriu el . . . mo orrenges a tekingir a re bechemiu, ma le ngar ngii er tir a diak loumerang a tekingel a Dios, e lak a ngeral molekoi, e bai di bo loeak a ungil el blekerdeliu el obult el mo oumerang, ele te mo omes el kmo kom meral mengull e ungil omerelliu.”​—1 Petrus 3:1, 2.

12. Ngera me ngdiak el mekngit a lsekum a bechiil el redil a oeak a omengull e lolecholt er a uldesuel?

 ¹² A lengar er a ta el omengull me a lak, me a bechiil el redil a sebechel el ochotii a omengull el mo er a bechil sel loba delemedemek e louchais er a uldesuel el ngii a ngodech er a uldesuel a bechil. Ngsebechel a osengel er a tekoi el mo uchul a klungiolel a telungalek er tir a lsekum a bechil a orenges er ngii. Me alta Abraham a dimlak el kengei er a uldesuel a Sara el kirel a ungil el semecheklel a mondai er a telungalek er tir, engdi a Dios a dilu er ngii el kmo: “Bor a ikel ledu er kau a Sara.” (Monguiu er a Genesis 21:9-12.) Me nguaisei, engdi a lsekum a bechiil el sechal a mla oterekeklii a uldesuel el ngii a diak el omtok a llechul a Dios, e a bechiil el redil a olecholt a omengull sel lolisiich er a uldesuel a bechil.​—Rellir 5:29; Efesus 5:24.

13. (a) Ngera el omengelechel el ngar er a Titus 2:4, 5 a mo er a rebechiil el redil? (b) Ngera ngmelekoi a Biblia el kirel a rebechiil el chad el mo chacheroid me a lechub e te merort a chebechiielir?

¹³ A bechiil el redil a kmal betok a sebechel el meruul el omekerreu er a telungalek er ngii el mo kutmeklii a ngerechelel el bechiil el redil. El uai tiang, a Biblia a olecholt el  kmo a rebechiil el redil a kirir el mo “betik a rengrir er a re becherir, ma re ngelekir, e mo ultebechel, e klikiid, e meses e ungil er a ngerechelir er a blai, e orrenges a tekingir a re becherir.” (Titus 2:4, 5) A bechiil el redil el dirrek el chedil el meruul aika el tekoi a mo ngmai a omengull me a bltikerreng er a telungalek er ngii. (Monguiu er a Osisechakl 31:10, 28.) Me nguaisei, a chebechiil a deleuill er a reteru el diak el mecherrungel el chad me ngsebechel el mo duubech a blekeradel el mo uchul e te mo chacheroid me a lechub e te mo merort a chebechiielir. Me a Biblia a kongei er a rebechiil el chad el mo chacheroid er a chelsel a ileakl el blekeradel. Engdi tia diak di el beot el tekoi, e  le omellach er a Biblia a kmo: “A redil kele longoit ku er a bechil . . . ma sechal me kele lorort er a chebechielel.” (1 Korinth 7:10, 11) Me a Biblia ochotii el kmo, ngkmal di ta el laokreng a uchul me a chad a sebechel el mo merort er a chebechiil.​—Mateus 19:9.

14. Ngmle ua ngera omerellel a Jesus el mo er a remekekerei el ngalek, e ngera te ousbech er ngii a rengalek er a redemerir me a rederrir?

¹⁴ A Jesus a ulechotii a kot el ungil el kerebai el kirir a ruungalek. A rebebil er a lolasem el merrob er a rengalek me lak lebo lekeed er ngii, e ngdilu el kmo: “Bechititerir a re mekekerei el ngalek me le mer ngak, e lak molekebai er tir.” Me a Biblia a ouchais el kmo “ng ulemechull er tir el ngalek, e ulemor a chimal er tir e ulemekngeltengat er tir.” (Markus 10:13-16) A lsekum a Jesus a milengoit a taem el obengterir a rengalek, e kau ngdiak el dirrek el kirem el meruul el uaisei el mo er a rengelekem? Te ousbech er a klou el temem, el diak di el derstelkib er ngii. Ngkirem el mengoit a taem el olisechakl er tir, e le Jehovah a kmo tiang a kirir a ruungalek el meruul er ngii.​—Monguiu er a Duteronomi 6:4-9.

15. Ngera sebechir a ruungalek el meruul el mo omekerreu er a rengelekir?

¹⁵ Sel lorael a beluulechad el lmuut el mo mekngit, e a rengalek a mo ousbech er a redemerir me a rederrir el mo omekerreu er tir er a rechad el sorir el melemall er tir, el uai tirke el sorir el meruul a mekngit el tekoi er a durs el obengterir. Ka molebedebek er a rolel a Jesus a lulemekerreu er a redisaiplo er ngii, el lulemekedong er tir el kmo “rengelekei.” Sera lemudechem el mlochu er a kodall, e ngkiltmeklii a rolel a chiis el kirir. (Johanes 13:33; 18:7-9) Me a omoungalek, e ngkmal kirem el mo kerekikl er a bek el tekoi el loruul a Diabelong el melasem el mo melemall er a rengelekem. Ngkmal di cheroid e  ke mengelechel er tir er aike el sebechel el mo duubech. * (1 Petrus 5:8) E le ngkmal betok a tekoi er chelechang el sebechel el mo uchul a telemellel a bedengir, me a klereng er tir, me a rolel a lolilt a ungil me a mekngit.

16. Ngera sebechir a ruungalek el suubii er a omerellel a Jesus el kirel a chelitecheterir a redisaiplo er ngii?

¹⁶ Sel kesus er a uchei er a kodellel, e a redisaiplo er a Jesus a mle kaititekangel er a delongelir el kmo ngtecha er tir a mle kot el ngarbab. Me nguaisei, a Jesus a dimlak el bo el kesib a rengul er tir, ngbai uleba bltikerreng e millemolem el olengeseu er tir el oeak a tekingel me a omerellel. (Lukas 22:24-27; Johanes 13:3-8) Ngsebechem el mesa rolel a moukerebai er a Jesus sel momeklemalt er a rengelekiu? Ngmera el tekoi el kmo te ousbech a omellach, engdi a omellach el domesterir a kirel el “tabesul” e diak el oeak a ngasechereng. Ngkmal diak el soam el di diak momdasu e dmu tekoi el sebechel el mo “ua saider el merus.” (Jeremia 30:11, NW; Osisechakl 12:18) Me a rolel a omollach er a rengelekem a kirel el rullii a ngalek el mo sebechel el mesang er a uriul el kmo, ngmle melemalt.​—Efesus 6:4; Hebru 12:9-11.

17. Ngoeak a ngera el rolel e a Jesus a kiltmeklii a kot el ungil el kerebai el kirir a rengalek?

¹⁷ Ngsebechir a rengalek el ngmai a klubelir er a Jesus? Chochoi! Ngoeak a kerebil, e a Jesus a ulechotii a rolel a rengalek a lolengesenges er a redemerir me a rederrir. Ngdilu el kmo: “Ak bai di melekoi a ikel lulsisecheklak a Chedam el melekoi.” E dilechelii el kmo: “Ele kblechoel  el meruul a ungil er a rengul.” (Johanes 8:28, 29) A Jesus a ullengesenges er a Demal el ngar er a eanged me a Biblia a melekoi er a rengalek el kmo ngkirir el olengesenges er a redemerir me a rederrir. (Monguiu er a Efesus 6:1-3.) Me alta Jesus a mle cherrungel, engdi ngullengesenges er a demal me a delal er a Josef me a Maria el tir a dimlak lemecherrungel. Tia el tekoi a ulterekokl el millisiich er a deurreng er a derta el chad er a telungalek er ngii!​—Lukas 2:4, 5, 51, 52.

18. Ngera me a Jesus a mle blechoel el olengesenges er a Demal el ngar er a eanged? E techa mo dmeu a rengul sel sekum a rengalek a olengesenges er a redemerir me a rederrir?

¹⁸ Ngoeak a ngera el rolel e a rengalek a sebechir el mo ua Jesus el uleldeu er a rengul a demal me a delal? Nguaisei, ngsebechel el mo meringel er a remekekerei el chad el olengesenges er a redemerir me a rederrir, engdi Dios a soal a loruul el uaisei. (Osisechakl 1:8; 6:20) A Jesus a mle blechoel el olengesenges er a Demal el ngar er a eanged, el mo lmuut er a chelsel a meringel el taem. A ta el taem e a Dios a mle soal a Jesus a bo loruul er a tekoi el kmal mle meringel, e a Jesus a dilu el kmo: “Mnguu tial kob [el tekoi el mle kirel el meruul er ngii] er a ringel el choridii er ngak.” Me nguaisei, engdi a Jesus a rirellii tia el tekoi e le ngmle medengei el kmo a Demal a mle medengelii a ungil el kirel. (Lukas 22:42) Me a rengalek sel losuub el mo bekongesenges, e te odeuir a rengrir a redemerir me a rederrir me a dirrek el Demerir el ngar er a eanged. *​—Osisechakl 23:22-25.

19. (a) Ngmekera Satan e mengesuseu er a rengalek? (b) A mekngit el omerellir a rengalek ngerang rullii el mo er a rechedam me a rechedil?

¹⁹ A Diabelong a milengesuseu er a Jesus, me ngulterekokl el mo mengesuseu er a remekekerei el chad el mo  meruul a mekngit. (Mateus 4:1-10) Ngousbech a orimel el mla er a rekldemed el sebechel el mo meringel er kid el oltngakl. Me ngkmal klou a ultutelel el kirir a rengalek el diak bo lobengterir tirke el meruul a mekngit. (1 Korinth 15:33) A ngelekel a Jakob er a Dina a mlo sechelirir a rechad el dimlak longull er a Jehovah, e tia mlo uchul a klou el tellemall. (Genesis 34:1, 2) Ka molebedebek er a klou el klengiterreng el mo er ngii sel sekum a ta el chedal a telungalek a mo er a deleboes el omeruul!​—Osisechakl 17:21, 25.

20. Ngera kirir a rederta el chedal a telungalek el meruul me bo el ngar er ngii a deurreng er a telungalek er tir?

²⁰ A mondai er a telungalek a beot a semecheklel a lsekum e ngmotirakl a omellach er a Biblia. E le doltirakl aika el omellach e ngmo uchul a deurreng er a telungalek. Me kemiu el bechiil el sechal, bo el betik a rengmiu er a rebechemiu me a omerelliu el mo er tir bo el ua omerellel a Jesus el mo er a ongdibel er ngii. Kemiu el bechiil el redil, bo mchederdall er a rebechemiu e moltirakl er a kerebai el kirel a ungil el bechiil el redil el ngar er a Osisechakl 31:10-31. Kemiu el oungalek, molisechakl er a rengelekiu. (Osisechakl  22:6) Kemiu el chedam, bo mungil el ‘mtebechelii a telungalek er kemiu ma re kiei er a blimiu.’ (1 Timothy 3:4, 5; 5:8) Me kemiu el ngalek, molengesenges er a redemmiu me a redelemiu. (Kolose 3:20) Ngdiak a chad er a telungalek el cherrungel, e le rokui el chad a di mo meruul a cheleuid. Me bo el ngariou a rengmiu e mkaiuengit a klausubes er a delongeliu.

21. Ngera el ungil el omelatk a ngar er ngii el kirel a ngar medad, e mekera bo el deu a rengud er a klengar er a telungalek er kid er chelechang?

²¹ A Biblia a ngar er ngii a kmal betok el mekreos el omellach me a ulekrael el kirel a klengar er a telungalek. Ngdirrek el olisechakl er kid el kirel a beches el beluulechad er a Dios me a baradis el chutem el mo mui er a redmeu a rengrir el chad el mengull er a Jehovah. (Ocholt 21:3, 4) Ngmera el ungil el omelatk el kirel a ngar medad! Ngdirrek el sebeched er chelechang el mo dmeu a rengud er a klengar er a telungalek er kid a bo doltirakl a omellach er a Dios el debetik er a Tekingel el Biblia.