1. Ke ki pudi pui pa vida di familia sedu filis?

JEOVA DEUS misti pa bu vida di familia sedu filis. * Si Palabra Biblia, ta da orientasons pa kada membru di familia, i ta fala di ke ki Deus misti pa kada kin fasi. Ora ki membrus di familia sigi konsiju di Deus, e ta tene bon rusultadu. Jesus fala: ‘Filis i kilis ku ta obi palabra di Deus, e ta fasi suma ki fala.’ — Lukas 11:28.

2. Ke ki no dibi di rukuñisi pa no familia tene filisidadi?

² Filisidadi di familia ta dipindi ciu di no rukuñisi di kuma, Jeova ku oriẑina familia, algin ku Jesus coma di “No Pape.” (Mateus 6:9) Suma no Pape ku sta na seu ku oriẑina familia, i sibi diritu ke ki pudi pui pa familia sedu filis. (Efésius 3:14, 15) Asin, ke ki Biblia ta sina aserka di ke ki kada membru di familia dibi di fasi?

3. Ke ki Biblia fala aserka di kumsada di familia umanu, i kuma ki no sibi kuma kila i bardadi?

³ Jeova kumpu purmeru jintis, Adon ku Eva, i junta  elis suma omi ku minjer. I pui elis na un paraisu bunitu na Tera — jardin di Eden — i fala elis pa e tene fijus. Jeova fala: “Bo padi ciu, bo inci mundu.” (Kumsada 1:26-28; 2:18, 21-24) Es i ka un simplis storia, pabia Jesus mostra kuma, ke ki purmeru livru di Biblia fala aserka di kuma ki vida di familia kumsa, i bardadi. (Mateus 19:4, 5) Mesmu pa manera ku no sta na pasa manga di purblemas, i vida aos ka sedu suma ki Deus mistiba, no na jubi kuma ki pusivel tene filisidadi na familia.

4. (a) Kuma ki kada membru di familia pudi kontribui pa filisidadi di familia? (b) Ke ku manda studa vida di Jesus i importanti dimas pa filisidadi di familia?

⁴ Kada membru di familia pudi kontribui pa familia sedu filis si e kopia Deus na mostra amor. (Efésius 5:1, 2) Ma, suma no ka ta oja Deus, kuma ku no pudi kopial? No pudi aprindi kuma ki Jeova ta aẑi pabia i manda si purmeru Fiju di seu pa Tera. (Jon 1:14, 18) Ocal na Tera, si Fiju, Jesus Kristu, kopia diritu si Pape ku sta na seu, e ku manda oja Jesus i obil i suma sta ku Jeova i obil. (Jon 14:9) Asin, aprindi aserka di amor ki Jesus mostra i sigi si izemplu, pudi juda kada un di nos kontribui pa vida di familia sedu mas filis.

5, 6. (a) Kuma ki manera ki Jesus trata kongregason disa un izemplu pa omis? (b) Ke ki dibi di fasidu pa tene purdon di pekadu?

⁵ Biblia fala ki omis dibi di trata se minjeris suma ki Jesus trata si disipulus. Jubi es orientason di Biblia: “Abos omis, bo ama bo minjer suma ku Kristu ama igreẑa, i da si vida pa el. . . . Asin ku omi dibi di ama si minjer suma si kurpu propi. Kin ku ama si minjer, i ama si kabesa. Nunka ningin ka nfastia si propi kurpu, ma i ta alimental, i ta toma konta del, suma ki Kristu ta fasi pa igreẑa.” — Anos ku pui italiku. — Efésius 5:23, 25-29.

 ⁶ Amor di Jesus pa si igreẑa o kongregason di disipulus disa un izemplu perfeitu pa omis. Jesus “ama elis te na fin,” i da si vida pa relis, mesmu manera ke sedu mperfeitu. (Jon 13:1; 15:13) Di mesmu manera, omis faladu: ‘Bo kontinua ama bo minjeris; ka bo sedu brabu pa elis.’ (Kolosensis 3:19) Ke ki pudi juda un omi aplika es konsiju, spesialmenti ora ku si minjer ka aẑi diritu? I dibi di lembra kuma el tambi i ta yara, i lembra di ke ki i pirsisa di fasi, pa risibi purdon di Deus. Ke ki i dibi di fasi? I dibi di purda kilis ku ta peka kontra el, kila ta nklui si minjer. Minjer tambi dibi fasi mesmu kusa. (Lei Mateus 6:12, 14, 15.) Bu nota ke ku manda i ta faladu kuma bon kasamenti i union di dus jintis ku ta purda n̈utru?

7. Ke ki Jesus ta lebaba en konta, i kal izemplu ki disa pa omis?

⁷ I bon tambi pa omis nota kuma, Jesus sempri ta mostra konsiderason pa si disipulus. I ta lebaba en konta se limitasons ku nesesidadi fisiku. Pur izemplu, oca e staba kansadu, i fala elis: “Bo bin no bai na utru kau ku jintis ka sta nel pa bo diskansa un bokadu.” (Markus 6:30-32) Minjeris tambi pirsisa di mostradu konsiderason. Biblia fala delis suma ‘kurpu mas fraku’ ku omis dibi di “rispita.” Pabia di ke? Pabia tantu omis suma minjeris ‘ten parti juntu na vida ku Deus da elis.’ (1 Pedru 3:7) Omis dibi di lembra kuma, ke ki mas importanti na ujus di Jeova i fidelidadi, i ka mporta si algin sedu macu o femia. — Salmu 101:6.

8. (a) Pabia ki no pudi fala kuma un omi “ku ama si minjer, i ama si kabesa”? (b) Pa un omi ku si minjer, ke ki signifika sedu “un kurpu son.”?

⁸ Biblia fala kuma un omi “ku ama si minjer, i ama si kabesa.” Pabia, suma ki Jesus fala, un omi ku si minjer “ka ta sedu mas dus, ma e ta sedu un kurpu son.” (Anos ku pui italiku; Mateus 19:6) Asin e dibi di limita se nteresi  seksual so entri elis. (Ditus 5:15-21; Ebreus 13:4) E pudi fasi kila si e ta preokupa ku nesesidadi di n̈utru. (1 Koríntius 7:3-5) I bon lembra des: “Nunka ningin ka nfastia si propi kurpu, ma i ta alimental, i ta toma konta del.” (Anos ku pui italiku.) Omis ten di ama se minjeris suma ke ama se kabesa, lembra kuma e na presta konta pa se propi ŝef, Jesus Kristu. — Efésius 5:29; 1 Koríntius 11:3.

9. Kal kualidadi di Jesus ku faladu na Filipensis 1:8, i ke ku manda omis dibi di mostra es kualidadi pa se minjeris?

⁹ Apostulu Paulu fala di preokupason ku Jesus tene pa utrus. (Filipensis 1:8) Preokupason di Jesus seduba un kualidadi ku ta anima, kusa ku atraiba minjeris ku bin torna si disipulus. (Jon 20:1, 11-13, 16) I minjeris misti pa se omis mostra preokupason pa relis.

10. Kuma ki Jesus disa un bon izemplu pa minjeris?

¹⁰ Pa un familia funsiona ben, i pirsis un kabesa. Te mesmu Jesus tene kin ki sta bas del suma si Kabesa. “Deus i kabesa di Kristu” suma ki “omi tambi i kabesa di minjer.” (1 Koríntius 11:3) Submison di Jesus pa ŝefia di Deus i un bon izemplu, pabia anos tudu no tene un kabesa ku no dibi di sta bas del.

11. Kal atitudi ki un minjer dibi di tene pa si omi, i kal ki pudi sedu rusultadu di si konduta?

¹¹ Omis mperfeitu ta yara, i manga di bias, e ka ta sedu un bon kabesa di familia. Pa kila, ke ki un minjer dibi di fasi? I ka dibi di dispreza ke ki si omi ta fasi o tenta toma si lugar. I bon pa un minjer lembra di kuma na ujus di Deus, un spiritu ketu i mansu tene balur garandi. (1 Pedru 3:4) Ora ki mostra es spiritu, i na oja kuma i na mas fasil sta bas di si omi suma ki Deus fala, mesmu ora ku purblemas ten. Alen des, Biblia fala: “Minjer dibi  di rispita si omi.” (Anos ku pui italiku; Efésius 5:33) Ma si kontra omi ka rukuñisi Kristu suma si Kabesa? Biblia fala pa minjeris: “Bo baŝa pa bo omis. Asin, si utrus ka seta palabra di Deus, e pudi ngañadu sin palabra, pa bon komportamentu di se minjeris. E ta rapara kuma ku bo ta yanda na bon manera.” — 1 Pedru 3:1, 2.

12. Ke ku manda i ka mal pa un minjer spresa si opinion ku rispitu?

¹² I ka mporta si omi i un kriston o nau, i ka falta di rispitu si un minjer spresa si opinion di un bon manera, mesmu si sedu opinion diferenti di si omi. Si ideia pudi sta sertu, i tudu familia pudi benefisia si omi obil. Abraon ka konkordaba ku si minjer Sara, ku dal un ideia pratiku pa suluson di un purblema na kasa, ma Deus falal: “Obi tudu ke ku Sara na falau.” (Lei Kumsada 21:9-12.) I bardadi kuma, ora ki un omi toma un disison aserka di un asuntu ku ka sta kontra lei di Deus, si minjer dibi di seta kil disison. — Atus 5:29; Efésius 5:24.

13. (a) Ke ki Titu 2:4, 5 fala pa minjereris kasadu fasi? (b) Ke ki Biblia fala aserka di siparason ku divorsiu?

¹³ Un minjer pudi kumpri si funson na familia di manga di manera. Pur izemplu, Biblia mostra ki minjeris kasadu dibi di “ama se omis, ku se fijus, pa e sibi guberna se kabesa, pa e sedu puru, e sedu bon, pa e sibi guberna se kasa diritu, e rispita se omis.” (Titu 2:4, 5) Un minjer o mame ku ta aẑi des manera na gaña amor ku rispitu di si familia. (Lei Ditus 31:10, 28.) Suma kasamenti i un union di dus jintis mperfeitu, sertus situasons pudi rusulta na siparason o divorsiu. Biblia ta pirmiti siparason na sertus situasons. Ma, siparason i un kusa seriu, pabia Biblia konsija: “Minjer ka dibi di bandona si maridu. . . . Maridu tambi pa i ka larga si minjer.” (1 Koríntius 7:10, 11) I so pekadu seksual di parti di omi o minjer ku ta da basi bibliku pa divorsiu. — Mateus 19:9.

14. Kuma ki Jesus trataba mininus, i ke ki mininus pirsisa di se papes ku mames?

¹⁴ Jesus disa un izemplu perfeitu pa papes ku mames pa manera ki trata mininus. Oca utrus na tentaba tuji mininus pertusi di Jesus, i fala: “Bo disa mininus bin pa mi. Ka bo tuji elis, pabia Deus ta rena riba di jintis suma elis.” Dipus Biblia fala: “I barsa elis, i pui si mon riba di kada un, i ora pa elis.” (Markus 10:13-16) Suma Jesus pasaba tempu ku mininus, sera ki bu ka dibi di fasi mesmu kusa pa bu propi fijus? E ka pirsisa so un bokadu di bu tempu, ma un bon parti del. Bu pirsisa di ranja tempu pa sina elis, pabia i kila ku Jeova fala pa papes fasi. — Lei Ripitison di Lei 6:4-9.

15. Ke ki papes ku mames dibi di fasi pa proteẑi se fijus?

¹⁵ Nkuantu es mundu na torna kada bias mas mau, mininus pirsisa pa papes proteẑi elis di jintis ku na misti fasi elis mal, suma kilis ku misti viola elis. Jubi kuma ki Jesus proteẑi si disipulus, kilis ki coma ku amor di “fijus.” Oca i prindidu i staba kuas pa matadu, Jesus punta multidon: “Si i ami ku bo na buska, bo disa esis pa e bai.”  (Jon 13:33; 18:7-9) Suma pape o mame, bu pirsisa di sta atentu kontra tentativa di Diabu di fasi bu fijus mal. Bu pirsisa di avisa elis antis. * (1 Pedru 5:8) Nunka antis i ten amiasa garandi kontra se suguransa fisiku, spiritual i moral suma gosi.

16. Ke ki papes ku mames pudi aprindi di manera ki Jesus lida ku mperfeison di si disipulus?

¹⁶ Na noiti antis di Jesus muri, si disipulus na diskutiba aserka di kin ki seduba mas garandi entri elis. En ves  di paña raiba kontra elis, ku amor Jesus kontinua juda elis atraves di palabra ku izemplu. (Lukas 22:24-27; Jon 13:3- 8) Si bu sedu pape o mame, sera ki bu oja kuma ku bu pudi sigi izemplu di Jesus na manera ku bu ta kuriẑi bu fijus? I bardadi kuma e pirsisa di disiplina, ma i dibi di dadu “na midida justu”, nunka ku raiba. Bu ka dibi di papia sin sintidu “suma ponta di spada.” (Jeremias 30:11; Ditus 12:18) Disiplina dibi di dadu di un manera ki mas tardi bu fiju na oja kuma i bon. — Efésius 6:4; Ebreus 12:9-11.

17. Di kal manera ku Jesus disa un izemplu perfeitu pa fijus?

¹⁷ Sera ki mininus pudi aprindi di Jesus? Sin, e pudi! Atraves di si propi izemplu, Jesus mostra kuma ki fijus dibi di obdisi se papes. Jesus fala: “Suma ña Pape ta nsinan, asin ku N ta fala.” I kontinua: “N ta fasi sempri kusas ki gosta.” (Jon 8:28, 29) Jesus seduba obdienti pa si Pape ku sta na seu, i Biblia fala ki fijus dibi di obdisi se papes ku mames. (Lei Efésius 6:1-3.) Jesus seduba un fiju perfeitu, ma mesmu asin, i obdisi si mame Maria ku si padrastu Jose ku seduba mperfeitu. Ku serteza, kila kontribuiba pa filisidadi di tudu membru di familia di Jesus! — Lukas 2:4, 5, 51, 52.

18. Ke ku manda Jesus sempri ta obdisi si Pape ku sta na seu, i kin ku ta fika kontenti ora ki mininus obdisi se papes aos?

¹⁸ Sera ki mininus nota maneras ke pudi sedu suma Jesus i pui se papes fika kontenti? I bardadi kuma, i ta ten bias ku mininus ta pensa kuma i difisil obdisi se papes, ma i kila ku Deus misti pa mininus fasi. (Ditus 1:8; 6:20) Sempri Jesus ta obdisi si Pape ku sta na seu, mesmu bas di situasons difisil. Un bias, oca i seduba vontadi di Deus pa i fasi un kusa difisil, Jesus fala: “Tiran es kopu  [un kusa ki Deus misti pa i fasi] di sufrimentu.” Ma, Jesus fasi ke ki Deus pidil pa i fasi, pabia i sibiba kuma, si Pape sibi ke ki minjor pa rel. (Lukas 22:42) Aprindi sedu obdienti na pui pa mininus fasi se papes ku mames juntu ku se Pape ku sta na seu fika kontenti dimas. * — Ditus 23:22-25.

19. (a) Kuma ki Satanas ta tenta mininus? (b) Kal efeitu ku mau komportamentu di mininus pudi tene na se papes?

¹⁹ Diabu tentaba Jesus, i no pudi sta sertu di kuma i na tenta tambi mininus pa fasi ke ki mal. (Mateus 4:1-10) Satanas Diabu ta usa preson di kolegas, ku pudi sedu difisil di risisti. Asin, i importanti pa mininus ka ndianta ku kilis ku ta viola leis di Deus! (1 Koríntius 15:33) Fiju femia di Jako, Dina, ta ndiantaba ku kilis ku ka ta adoraba Jeova, i kila tisi manga di purblema. (Kumsada 34:1, 2) Pensa na kuma ki familia na fika tristi si un di si membrus nvolvi na pekadu seksual! — Ditus 17:21, 25.

20. Pa tene un vida di familia filis, ke ki kada membru di familia dibi di fasi?

²⁰ Ora ki konsijus di Biblia pudu na pratika i ta sedu fasil di lida ku purblemas di familia. Na bardadi, aplika ki konsijus i pudi pui pa familia sedu filis. Pa kila, omis, bo ama bo minjer, i bo trata elis suma ki Jesus trata si kongregason. Minjeris, bo sta bas di ŝefia di bo omi, i bo sigi izemplu di minjer kapas ku faladu del na Ditus 31:10-31. Papes ku mames, bo eduka bo fijus. (Ditus 22:6) Papes, ‘bo guverna bo kasa diritu.’ (1 Timótiu 3:4, 5; 5:8) Mininus, bo obdisi bo papes ku mames. (Kolosensis 3:20) Ningin i ka perfeitu na familia, pabia tudu ta yara. Pa kila, sedu umildi, bo pidi n̈utru purdon.

21. Kal speransa maravilyosu ku sta no dianti, i kuma ku no pudi tene vida di familia filis aos?

²¹ Na bardadi, Biblia tene manga di bon konsijus ku orientasons aserka di vida di familia. Alen di kila, i ta sinanu aserka di novu mundu di Deus i un paraisu na Tera ku na bin inci di jintis filis ku ta adora Jeova. (Apokalipsi 21:3, 4) Speransa maravilyosu ku sta no dianti! Mesmu gosi, no pudi tene vida di familia filis si no aplika instrusons di Deus ku sta na si Palabra, Biblia.