1. Inyoin bo elacet lokaiyalama kotoma aijar nakokale?

EKOTO Edeke Yawe aijar nakokale kon korai naejai aiyalama. Ijaikinit Akekirot, Ebaibuli, aicoreta nejai nginidiopet kokale, itetemit nuekoto Edeke kesi aswam. Neitodolikinata lukokale aswamisiokec koipone kalo icorakitor Edeke, nuetakanunete eraasi nuisialamikinete. Abala Yesu ebe: “Isirerengitoi luiirarete akirot naka Edeke, koricata da!”​—Luka 11:28.

2. Kanu ikalia adumun aiyalama, inyo ekoto kesi amisikin?

² Aiyalama nakokale esipo noi koipone lo oni amisikin ebe egeunit ekale kanejai Yawe, loanyarit Yesu “Papakosi.” (Matayo 6:9) Ejaasi ikalia kere kotoma akwap kanuka Papawok loejai toma akuj​—loejeni cut iboro luijaikinite ikalia aiyalama. (Ipeson 3:14, 15) Kanukangun, anyoika bodo isisianakin Ebaibuli nukamunitos aswam naka nginidiopet kokale?

3. Epone ani itetemitor Ebaibuli ageunet naka ekale loka itunga, ido kanukinyo ijenia oni ebe nuinera ngesi eraasi nukabeit?

³ Abu Yawe kosub itunga lusodit, Adam ka Keba, kosodi  aimorikikin kesi nepepe kwape ekilokit ka aberu. Kibwaik kesi ore loebus kakwap​—omanikor loka Eden​—kosodi alimokin kesi aur idwe. “Kouriaros, kipuaros, kilelebunos akwap.” (Ageun 1:26-28; 2:18, 21-24) Mam nu eraasi awaragan, araibo numam etakanunitos, naarai abu Yesu kitodu ebe nuinera eitabo loka Ageun nuikamunitos ageunet naka ekale eraasi nukabeit. (Matayo 19:4, 5) Karaida kijaar oni atiokisio nuipu ido da komam aijar ejai kwape alosikinitor Edeke, kaanyutu ber oni eipone loepedorere adumun aiyalama kokale.

4. (a) Epone ani epedoria nginidiopet kokale ayatakin ayaun aiyalama toma okale? (b) kanukinyo eraar aisisia aijar naka Yesu naepol noi kanu ayaun aiyalama okale?

⁴ Nginidiopet kokale epedori aingarakin ayaun aiyalama okale koipone loaputorit Edeke kotoma aitodunit amina. (Ipeson 5:1, 2) Epone bodo ani ipedoria oni aputor Edeke kwape mam oni kipedoria aanyun ngesi? Ipedori oni aisisiaun epone lo iswama Yawe naarai abu kijuk Okoku ke lokiyai abunere kokuju kiton akwap. (Yokana 1:14, 18) Neajaar Okoku loka Edeke, Yesu Kristo toma akwap, aputorit ngesi Papake lokokuju ejok noi osubite bala aite ka aipup Yesu arai bala ajaut ka aipup Yawe. (Yokana 14:9) Kanukangun, aisisia nukamunitos amina nabu Yesu kitodu ka atupaar akewanyunet, epedori aingarakin nginidiopet kaoni aiyatakin ayaun aiyalama okale.

5, 6. (a) Epone loayaitor Yesu ekanisa ijaikinit ikiliok aanyunet naka epone ani? (b) Inyo ibusakinit aswam kanu adumun aitimio naka adiakanareta?

⁵ Ebala Ebaibuli ebe ibusakinit ikiliok ayait angorokec kwape ayaitori Yesu ikesisiak. Koany aicorakinet na naka Ebaibuli: ‘Yes ikiliok kominasi angorokus kwape Kristo da keminar ekanisa koinakin kanukeŋ kwape kwaŋin da ibusakinit ikiliok aminenena angorokec kwape awatekec ikulepek. Loemina akeberu eminakina bon. Naarai emamei etuŋanan  lo elait akekuwan elopet, konye itani ka aricit, kwape Kristo da iswamaikinitor ekanisa.’​—Ipeson 5:23, 25-29.

⁶ Amina naetodikit Yesu atukot naka ikesisiak, ijaikinit aanyunet naedolit mama ejaasi ikiliok. Abu Yesu “Komina kesi aitodol awasia,” koinak akeijar kanukec karaida mam kesi adolitos. (Yokana 13:1; 15:13) Kwape kwangin, isinyikokitai ikiliok: “Yes ikiliok kominas akusiŋor siridedeŋanakinete kes.” (Ikolosain 3:19) Inyoin epedori aingarakin ekilokit aitosom aicorakinet kwangin, kanoinoi nemam akeberu icesawan itosoma apirianut? Ibusakinit ngesi aiitun ebe ibucanari nges da kanu ebeit nges aswam, tetere edumuni aitimio naka Edeke. Anyoika bo ngun? Ibusakinit ngesi aitim ngul lu ibucaneret kamakeng aimoriarit akeberu da. Kwape kwangin, ibusakinit aberu da aswan ngun. (Matayo 6:12, 14, 15) Imisik ijo akiro nuebalatar ice ebe, edukone loejok erai aimorikikinet naka itunga iyaarei lu itimonoros?

7. Nunyoika nuabu Yesu kojeni, ido ani aanyunet ijaikinitos ngun ikiliok?

⁷ Ibusakinit bobo ikiliok da ajenun ebe abu duc Yesu kitodikinit ekesisiak apodokinit. Abu kopodokinite akalanyanut ka eipud kec da. Neapasitor kes, kwape aanyunet, abu kotema: “Kogitunos yesi bonik aibois naesil kibworas nenidiokasilon.” (Marako 6:30-32) Kwape kwangin, ibusakinit ikiliok da apodonikit angorokec. Enyarit Ebaibuli angor “kwape ibore yenitelekarit akalanyanut” nuicorakinit Ebaibuli ikiliok “aitopolorit.” Kanukinyo? Naarai ikiliok nepepe kangor eraasi “ikerumak luka aisianut naka aijar.” (1 Petero 3:7) Ibusakinit ikiliok ajenun ebe amunonut konye mere araut ekiliot araibo nat araut aberu ngesi eyinakin ituganan erai yeniketiai kakonyen nuka Edeke.​—Isabulin 101:6.

8. (a) Epone ani eraar ebe ekilokit “loemina akeberu eminakina bon”? (b) Inyoin bo apolou naka araut ‘adiope kuan’ kanejai ekilokit ka akeberu?

⁸ Ebala Ebaibuli ebe ekilokit “loemina akeberu eminakina bon.” Naarai etunganan ka akeberu ‘mam bobo eraas iarei  dimarai adiopetekuan,’ kwape abu Yesu kidunitor. (Matayo 19:6) Kanukangun, ekoto kesi ainac adoteu konye kojanakinos bon. (Awaragasia 5:15-21; Iburanian 13:4) Epedorete kes aswam ngun arai isimonikis eipud lokangin diopet. (1 Ikorinton 7:3-5) Kojenu aisitunet na: ‘Emamei etunganan lo elait akekuwan elopet konye itani ka aricit.’ Ibusakinit ikiliok aminenena angorokec kwape eminatotor kes bonik kiiutunitos ebe ejai kes da abongonokin akou kec, Yesu Kristo.​—Ipeson 5:29; 1 Ikorinton 11:3.

9. Ani bo eipone loka Yesu loelimunitai kotoma Ipilipin 1:8, ido inyo ibusakinitor ikiliok aitodikin akecengor eipone ngon?

⁹ Inerit ekiyakia Paul kwape ‘ajaar amina naka Yesu Kristo.’ (Ipilipin 1:8) Amina naka Yesu arai epone loesiyengunit, loaminakinit angor nu apotu koraunos akesisiak. (Yokana 20:1, 11-13, 16) Ido ipudas angor da amina kanejaasi ikiliokokec.

10. Epone ani ijaikinitor Yesu aanyunet nejaasi angor?

¹⁰ Erai ekale atukot, ido kanu aswam ejok, ekoto ojai ekayaiton. Yesu da ejatotor ediopet loenonokikinit ngesi kwape Akou ke. “Akou naka Kristo ngesi Edeke,” kwape “ekilokit da erai akou naka aberu.” (1 Ikorinton 11:3) Anonokikinit naka Yesu Kristo nejai ayait naka Edeke erai aanyunet naejok noi, kwape kijaar oni da kere kaloiyait lo ibusakinit oni anonokikinit.

11. Epone bo ani ibusakinitor aberu asesen okilenike, ido anyoika nuejokuka nuetakanunete kanu iponesioke?

¹¹ Kwape eratotor itunga lumam edolitos, ediakanarete ikiliok ido mam etapit kes ayait ikalia kec ejok. Kanukangun, nunyoika ibusakinit aberu aswam? Mam ibusakinit nges amwangit nuiswamai okilenike arai aitam ayangari apolouke kwape akou naekale. Ejok aberu aiitun ebe kakonye nuka Edeke, aiyapepera ka aiyapaara ngesi eraasi nuketia loepol. (1 Petero 3:4) Koipone lo aitodunit  iponesio kwangun, epatanikin ngesi aitodun anonokikit naekoto Edeke, karaida kojautene loetiono. Kaiyatakinit ebala Ebaibuli ebe: “Koyoŋitenenei aberu da okilenike.” (Ipeson 5:33) Dobo do arai mam nges ecamunit Kristo kwape Akouke? Isinyikokinit Ebaibuli: ‘Aŋor kwape kwangin da kononokikis ikiliokokus tetere ice karaida mam erimasi akirot kiriasi iponesio lu aŋoroke komamei akirot naeanyuniata iponesiokus lu esegara ka luka ayoŋit.’​—1 Petero 3:1, 2.

12. Kanukinyo mam eroniar aberu alimun akeomisio koipone loayongit?

¹² Karaida mam okileneke erai loiyuunit, kelimu aberu aomisioke kayongit mam ngesi erai naemwangit okilenike. Aticepak edolit akeomisioit, ido epedori ekale kere adumun ajokis arai epupok ngesi akeomisioit. Karaida mam Aburam acamunit nuabala Sara akeberu kanu ationis najai toma okale, abu Edeke kolimok ngesi: “Kopupenenei eporotoke.” (Ageun 21:9-12) Karaida, arai ejaasi nuaseu ekilokit aswam ido kocamanara kede ikisila luka Edeke, itoduni aberu akenonokikinit arai kigang nueseunit okilenike.​—Aswamisio 5:29; Ipeson 5:24.

13. (a) Inyoin bo isinyikokit Tito 2:4, 5 angor nuedukokina aswam? (b) Anyoika bo nu ebala Ebaibuli nuikamunitos atiakakin ka alacakin?

¹³ Kanu aitodolikin akeswam, epedori aberu aswam nuipu kanu aidar ekaleke. Kwape aanyunet, itodunit Ebaibuli ebe angor nuedukokina ebeit “araut nu eminasi ikiliokokec, kalueminasi ikecedweda, koraasi nuecoito, nuesegara, nuiswamaete ore, nuejok, nuenonokinito ikiliokokec.” (Tito 2:4, 5) Aswam kwangin kwape aberu ka toto, ebuni ainakin ngesi adumun amina naepolo noi kaibuses kanejai ekaleke. (Awaragasia 31:10, 28) Kanukangun, kwape eraar edukone aimorikikinet naka itunga lumam edolitos, epedori ejautene ece loerono noi ayaun atiakakin araibo alacakin. Ecamakit Ebaibuli atiakakin kanu ace akiro. Konye, mam ebeit ayangarit  atiakakin kede aijalijala, naarai icorakinit Ebaibuli ebe: “Kinyek aberu aisac okilenike; . . . bobo da kinyek ekiliokit aireŋear akeberu.” (1 Ikorinton 7:10, 11) Konye adoteu bon kanejai idiopet kaluedukokina nges apetetait neacamakitotor aiwadikaeta nuka Ebaibuli alacakin.​—Matayo 19:9.

14. Epone ani abu Yesu koyangaritor idwe, ido inyoin bo ipudas idwe kanejaasi auriak kec?

¹⁴ Abu Yesu kijaik auriak aanyunet naedolit koipone loayaitor ngesi idwe. Ne atamitotor icetunga aimik idwe adolokin Yesu abu kotema atiar: “Kocamut idwe ludidik abunere mama ajai, sirikisimika kes.” Ebala Ebaibuli ebe abu ngesi, “kotun kes, kidokok akekanin, kisirereŋ da.” (Marako 10:13-16) Kwape abu Yesu koyangaikina apak kede idwe, mam do ijo da ibusakinit aswam kwape kwangin kede ikon idwe lusap ka lupesur? Ekotosi kesi apak kon naepol. Ekoto ijo adumun apak aisisianakin kes, naarai ngun nu icorakinit Yawe auriak aswam.​—Ikisila 6:4-9.

15. Anyoika ebeit auriak aswam kanu ayuarit ikecedwe?

¹⁵ Kwape iyatar duc akwap na aroniar noi, ekot auriak  aidar noi idwekec kanoinoi kanejaasi itunga ngul luepedorete amunar kesi, kwape nat ngun luebuete aisiol idwe. Koany epone loabu Yesu koyuaritor ikekiyakia, luamina konyarite kesi “idwe ludidik.” Nekamunere ngesi do koyapiei aiyar, abu Yesu kitisi kesi. (Yokana 13:33; 18:7-9) Kwape aurian, ekoto ijo kokapakina aidar ikonidwe kanejaasi aswamisio nuka Satan nuepedorete amunar kesi. Ekoto ijo ailing aikwenyar kesi.  * (1 Petero 5:8) Etiono noi kwana aidar idwe koipone loakuwan, lomoyo, ka aanyun da ebe ejokuka ekeceponesio.

16. Inyoin bo epedorete ikauriak aisiasiaun koipone loabu Yesu koyangaritor adiakanareta nuka ikesisiak?

 ¹⁶ Kakware narokor Yesu ketwana, apotu ikesisiak kopegata bonik araibo ngai erai loapolon kakesi. Aibois na nges anyunyurikin kakes, abu Yesu kiyatak aicor kesi kamina kotoma oinerike ka aanyunet da. (Luka 22:24-27; Yokana 13:3-8) Arai irai ijo aurian, ipedori kereka ijo aisisiaun epone loibeitor ijo aitetenia ikonidwe, kotupite aanyunet naka Yesu? Abeit, ekotosi kesi aicorio, konye ibusakinit aicor kesi ‘koipone loedolitor’ ido mere cut kanyunyura. Mam ekoto ijo aisud akiro “kwape aicum kekileng.” (Yeremia 30:11; Awaragasia 12:18) Aicorio ibusakinit aijakin koipone kalo epedoria ikonikoku aanyun kokau ebe arai teni naebusakinit.​—Ipeson 6:4; Iburanian 12:9-11.

17. Epone ani abu Yesu kitodikitor idwe aanyunet naedolit?

¹⁷ Epedorete kereka idwe aisisiaun kanejai Yesu? Eebo, epedorete! Kotoma aanyunet ke elopet, abu Yesu kitodu epone lo epedorata idwe arimarit auriakec. Abala ngesi ebe: “Kwape kesisianakinia Papa, enera kwangin.” Eyatakinit ngesi: “Eswamaenenei nuekoto ŋesi apaarasia kere.” (Yokana 8:28, 29) Arimarit Yesu Papake lokokuju, ido elimokinit Ebaibuli idwe da arimarit auriakakec. (Ipeson 6:1-3) Karaida kerai Yesu ikoku yen adolit, abu korimarite auriakake lukakwap, Yosep ka Maria, lumam adolitos. Abu cut ngin koinak luokale kere aiyalama!​—Luka 2:4, 5, 51, 52.

18. Kanukinyo abu Yesu korimaritor duc Papake lokokuju ido ingai bo iyalamakin arai erimaritos idwe auriakakec lolo?

¹⁸ Epedorete kerek idwe aanyun epone loepedoriata kesi da aputorit bala Yesu kosodete ayaun aiyalama nejaasi auriakakec? Kabeit, eminas idwe adumun ebe etiono arimarit auriakakec, konye ngun nges ekoto Edeke idwe aswam. (Awaragasia 1:8; 6:20) Arimarit Yesu Papake lokokuju duc, karaida kojautene loetiono. Kwape aanyunet, neakotor  Edeke ngesi aswam nuetioko noi, abu Yesu kotema: “Kolema akoli na [ nuakotoi] kamakaŋ.” Kejaasi ngun da, abu Yesu kiswana nuengisit Edeke, naarai abu komisikinite ebe ejeni Papake nuitelekarito. (Luka 22:42) Neisisiata idwe arimarit, epedoret kesi ainakin auriakakec kede Papakec lokokuju aiyalamakin noi. *​—Awaragasia 23:22-25.

19. (a) Epone ani ecodununa Satan idwe? (b) Inyo eyaunete iponesio luarokok luka idwe nejaas auriak?

¹⁹ Abu Satan kocodu Yesu, ido ekoto oni da aijen ebe epedori bobo acodun idwe aswam nueroko. (Matayo 4:1-10) Itosomai Satan eipud loakote aswam nuiswamaet ipapero kanu aingalingala idwe, eipu loetiono aipikor. Kanukangun, ejok do noi aanyun ebe mam idwe duc eupasi kipapero lueroko iponesio! (1 Ikorinton 15:33) Abu akoke Yakob nanyaritai Dina, koupananasi kaipapero lumam amaenenete Yawe, ido abu na koyau ationis naepol noi. (Ageun 34:1, 2) Komoom ber ijo epone lo epupuna ekale apipil, arai keloma idiopet kotoma okale aswam nukayelo!​—Awaragasia 17:21, 25.

20. Kanu ailel aijar nakokale, nunyoika ebeit nginidiope kokale aswam?

²⁰ Atikiosikio nukokale  epatana aititingikin arai kitosomai aicoreta nuka Ebaibuli. Kabeit, aitosom aicoreta nuka Ebaibuli ngesi elacet loyauni aiyalama toma okale. Kanuka ngun, yes ikiliok kominas angorokus kwape aminar Yesu da ekanisa. Yes da angor kononokitos aiyait naka ikiliokokus kosodete aitup aanyunet naka aberu naitetemitai kotoma Awaragasia 31:10-31. Yesi auriak, kisisianakis idwekus. (Awaragasia 22:6) Yes da lukapapa, koyaitos ikaliakus ejok. (1 Timoteo 3:4, 5; 5:8;) Ido yes idwe, korimaritos auriakakus. (Ikolosain 3:20) Emamei yen edolit kokale, kere ediakanarete. Kanukangun kiyapepara, ido kitimonoros.

21. Anyoika nueumokina nuejaasi ingaren wok, ido epone ani ipedoria oni ailel aijar nakokale kopukwana?

²¹ Kabeit, ejatotor Ebaibuli kede aicoreta nuipu ka aiteteneta nuikamunitos aijar nakokale. Bobo da, isisianakini oni nuikamunitos akwap naitetet naisumunit Edeke naejaunos itunga luiyalamas, kijanakinete Yawe. (Apukokinio 21:3, 4) Eebo teni eraasi ngun aisumuneta nueumokina nuejaasi ingaren! Karaida kopukwana, ipedori oni ailel aijar nakokale arai kitup oni aicoreta nuejaasi Obaibuli, Akirot naka Edeke.