14-нҗи бап

Машгаланы нәдип багтлы этмели?

Машгалада әриң борҗы

Машгалада аялың борҗы

Ата-энәниң борҗы

Машгала багтлы болар ялы, чагалар нәдип гошант гошуп билер?

1. Машгаланы нәме багтлы эдйәр?

ЕХОВА ХУДАЙ машгаламызың багтлы болмагыны ислейәр. Мукаддес Язгыларда машгаланың хер бир агзасының этмели борҗы гөркезилйәр. Эгер-де оларың хер бири өз борҗуны ерине етирсе, онда нетиҗесем говы болар. Иса пыгамбер: «Худайың сөзүни эшидип, оны ерине етирйәнлер хас хем багтлыдыр!» дийди (Лука 11:28).

2. Машгалаң багтлы болмагы үчин нәмә дүшүнмели?

² Машгалаң багтлы болмагы үчин, оны Ехова Худайың дөредендигине дүшүнмели. Иса Месих хем Ехова «Атамыз!» дийди (Матта 6:9). Хер бир машгала гөкдәки Атамызың өңүнде борчлы ве ол машгаланың багтлы болмагы үчин нәме герекдигини говы билйәр (Эфеслилер 3:14, 15). Машгала агзаларына Худайың берен борҗы барада Мукаддес Язгыларда нәме дийилйәр?

МАШГАЛАНЫ ДӨРЕДЕН — ХУДАЙ

3. Мукаддес Язгыларың айтмагына гөрә, машгала нәдип дөреди ве нәме үчин муңа ынанып билерис?

³ Ехова Худай Адам ата билен Хов энәни ярадып, олары  әр-аял этди. Худай олары аҗайып Эрем багында, ягны Җеннетде ерлешдирди. Ехова оларың чагаларының болмагыны иследи. Ол Адам ата билен Хов энә: «Хасыллы болуң ве көпелиң ве ер йүзүни долдурың» дийди (Барлык 1:26—28; 2:18, 21—24). Бу роваят дәл, чүнки илкинҗи машгаланың дөрейши барада Барлык китабында языланларың хакыкатдыгыны Иса-да тассыклады (Матта 19:4, 5). Биз дүрли кынчылыклара душ гелсегем, хәзирки дурмуш Худайың илкинҗи ниетинден тапавутланса-да, машгаланы багтлы эдип боляр. Нәдип?

4. а) Машгала багтлы болар ялы хер бир адам нәме этмели? б) Машгала багтлы болар ялы нәме үчин Иса Месих барада билим алмалы?

⁴ Машгалада хер бир адам сөймекде Худайдан гөрелде алса, машгала багтлы болар (Эфеслилер 5:1, 2). Йөне биз Худайы гөрмесек, ондан нәдип гөрелде алып билерис? Ехова ере илкинҗи доглан Оглы Иса Месихи иберди, бизем ондан өвренип билерис (Яхя 1:14, 18). Иса гөкдәки Атасына шейле бир меңзейәрди велин, оны диңлейән ве гөрйән адамлар, Ехованың өзи билен гүррүңдеш болян ялыды (Яхя 14:9). Шонуң үчин Иса Месих барада билим алып, онуң сөйши ялы сөйсек, машгаламызы багтлы эдип билерис.

ӘРЛЕР ҮЧИН ГӨРЕЛДЕ

5, 6. а) Иса иманлылар йыгнагына нәхили гараяр ве әрлер Исадан нәме өвренип билер? б) Гүнәлеримизиң багышланмагы үчин нәме этмели?

⁵ Мукаддес Язгылар әр аялына Исаның шәгиртлерине гарайшы ялы гарамалы диййәр: «Эй әрлер, Месихиң иманлылар йыгнагыны сөйши ялы сиз хем аялыңызы сөйүң. [Чүнки ол йыгнак үчин] Өзүни пида этди. Шунуң ялы хем әрлер аялыны өз тени кимин сөймелидир. Аялыны сөййән өзүни сөййәндир. Чүнки хич ким хич хачан өз тенини йигренмән, гайтам, Месихиң иманлылар  йыгнагыны эдиши ялы, оны иймитлендирип тимарлаяндыр» (Эфеслилер 5:23, 25—29).

⁶ Исаның иманлылар йыгнагына болан сөйгүси — әрлер үчин говы гөрелде. Иса шәгиртлерини «ахырына ченли сөйди». Шәгиртлери бикәмил болса-да, олар үчин җаныны пида этди (Яхя 13:1; 15:13). Мукаддес Язгыларда: «Эй әрлер, аялыңызы [хемише, ТД] сөйүң, олара ёвуз болмаң» дийилйәр (Колоселилер 3:19). Аялы пайхассыз бир иш эденде-де, әри бу маслахата эерер ялы нәме көмек эдер? Ол өзүниңем ялңышяндыгыны ве Худайың багышламагына мәтәчдигини унутмалы дәл. Худай багышлар ялы, ол нәме этмеликә? Әр өзүне гаршы гүнә эдйәнлери, шол санда хем аялыны багышламалы. Бу сөзлер аяла-да дегишли (Матта 6:12, 14, 15). Бири-бирине гечиримлик эдйән әр-аяла, йөне ере «багтлы машгала» дийилмейәр.

7. Иса нәмәни гөз өңүнде тутярды ве әрлер ондан нәме өвренип билер?

⁷ Шейле-де әрлер Иса Месихиң өз шәгиртлериниң аладасыны эдендигини билмели. Ол шәгиртлериниң мүмкинчилигини ве башарҗак затларыны гөз өңүнде тутярды. Мысал үчин, олар яданда Иса: «Сизиң еке өзүңиз бир чола ере гелиң-де, бираз дем-дынч алың» дийди (Маркус 6:30—32). Аяллар хем аладасының эдилмегине мынасып. Мукаддес Язгылар аяллара «эҗиз гап» диййәр, әрлер олары «сыламалы». Нәме үчин? Себәби эркек адам ялы аял машгала-да «яшайыш мерхеметиниң мирасдашларыдыр» (1 Петрус 3:7). Худая адамларың җынсы дәл-де, вепалылыгының гымматлыдыгыны әрлер ятда сакламалы (Зебур 101:6).

8. а) Нәме үчин «аялыны сөййән өзүни сөййәндир» дийсе болар? б) Әр-аяла «бир тендир» диймек нәмәни аңладяр?

⁸ Мукаддес Язгылар: «Аялыны сөййән өзүни сөййәндир» диййәр. Чүнки Исаның айтмагына гөрә, әр-аял инди «ики дәл, бир тендир» (Матта 19:6). Бу диңе  әр-аялың җынсы гатнашыкда болуп билйәндигини гөркезйәр (Сүлейманың тымсаллары 5:15—21; Еврейлер 13:4). Олар бири-бириниң зерурлыгыны хөвес билен канагатландырса, никада вепалы боларлар (1 Коринтослылар 7:3—5). Мукаддес Язгылар: «Чүнки хич ким хич хачан өз тенини йигренмән,... оны иймитлендирип тимарлаяндыр» дийип ятладяр. Әр өзүни сөйши ялы, аялыны-да сөймели ве Иса Месихе табын болмалы (Эфеслилер 5:29; 1 Коринтослылар 11:3).

9. Филипилилер 1:8-де Исаның хайсы хәсиети барада айдыляр ве ондан әрлер нәдип гөрелде алып билер?

⁹ Павлус ресул Иса Месихиң йыгнагы сөендигини айдяр (Филипилилер 1:8). Исаның сөйгүси көп адамлары, хатда онуң шәгирди болан аяллары хем өзүне чекйәрди (Яхя 20:1, 11—13, 16). Аял хем әриниң сөймегини ислейәр.

АЯЛЛАРА ГӨРЕЛДЕ

10. Иса аяллара нәхили гөрелде галдырды?

¹⁰ Машгала — әр-аялың бирлешмегидир, эмма онуң абаданчылыгы үчин кимдир бири ёлбашчы болмалы. Хатда Иса-да бир баша боюн боляр. «Аялың баяры эркек» болшы ялы, «Месихиң баяры хем Худайдыр» (1 Коринтослылар 11:3). Иса Атасына табын болуп, бизе аҗайып гөрелде галдырды, чүнки хер кес кимдир бирине табын болмалы.

11. Аял әрине нәхили гарамалы ве ол өзүни шейле алып барса нәхили нетиҗе гетирер?

¹¹ Әрлер бикәмил боланы үчин, кәте говы машгалабашы болуп билмейәр. Шейле ягдайда аял өзүни нәхили алып бармалы? Ол әрини кемситмели я-да машгалабашы борҗуны өз элине алҗак болмалы дәл. Аял юмшак ве юваш рухы Худайың гыммат сайяндыгыны билмели (1 Петрус 3:4). Эгер-де аял шейле этсе, онда кынчылыкларда-да машгалабаша боюн болмак еңил дүшер. Шейле-де Мукаддес Язгылар: «Аял хем әрини сыласын»  диййәр (Эфеслилер 5:33). Йөне әри Иса Месихе боюн болмаса нәме этмели? Мукаддес Язгылар аяллары шейле үндейәр: «Өз әриңизе табын болуң. Шейдип, эгер кәбирлери Худайың сөзүне боюн болмаян болса, сизиң горкы ичиндәки пәк эдим-гылымыңызы гөрүп, өз хатынының яшайшы аркалы гүррүңсиз Месихе газанылсын» (1 Петрус 3:1, 2).

12. Өз пикириңи айтмак нәме үчин әриңе хормат гоймазлык дәл?

¹² Өз пикириңи сыпайылык билен айтмак, әриңе боюн болмаяндыгыңы аңлатмаяр. Әри имандаш болмаса-да, аял өз нәразылыгыны юмшаклык билен айдып билер. Белки, аялының теклиби догрудыр ве машгаласына пейда-да гетирер. Ыбрайым бир меселеде аялы билен ылалашмадык вагты, Худай оңа: «Сараның айдан сөзүне гулак ас» дийди (Барлык 21:9—12). Эмма әриниң карары Худайың кануныны бозмаян болса, аялы әрине гулак асмалы ве голдамалы (Ресулларың ишлери 5:29; Эфеслилер 5:24).

13. а) Титус 2:4, 5-нҗи аятлар аяллары нәмә үндейәр? б) Мукаддес Язгылар айры яшамак ве никаны бозмак барада нәме диййәр?

¹³ Аял борҗуны ерине етирсе, машгаланың багтлы болмагына ярдам эдер. Меселем, Мукаддес Язгылар аяллары «өз әрлерини, чагаларыны сөййән, сагдын дүшүнҗели, пәк, өйүнде ишеңңир, оңат ве өз әрлерине табын болмагы» үндейәр (Титус 2:4, 5). Бу маслахата эерйән аяллары әри-де, чагалары-да сөер ве сылар (Сүлейманың тымсаллары 31:10, 28). Ника ики саны бикәмил адамың бирлешиги боланы үчин, айры яшамаклыга я-да никаны бозмаклыга элтип билер. Мукаддес Язгылар кәбир ягдайларда әр-аяла айры яшамага ёл берйәр. Йөне муңа йүзлей гарамалы дәл, чүнки Мукаддес Язгылар: «Аял әринден айрылмасын... Әр-де аялыны ташламасын» диййәр (1 Коринтослылар 7:10, 11, ТД). Мукаддес Язгылар, диңе әр-аялың бири зына этсе, никаны бозмага ёл берйәр (Матта 19:9).

 АТА-ЭНЕЛЕРЕ ГӨРЕЛДЕ

14. Иса Месих чагалара нәхили гараярды ве олар нәмә мәтәч?

¹⁴ Иса Месих ата-энелериң чагалара нәхили гарамалыдыгы барада говы гөрелде галдырды. Хачан-да Исаның янына чагалары гойбермән сакланларында, ол: «Дегмәң, чагалар мениң яныма гелсин, олары бөкдемәң» дийди. Мукаддес Язгыларда Иса «чагалары гуҗаклап, элини үстлеринде гоюп, олара ак пата берди» дийилйәр (Маркус 10:13—16). Эгер-де Иса Месих чагалара вагт сарп эден болса, онда бизем чагаларымыза вагт сарп этмели дәлми? Чагалара сәхелче вагт дәл-де, көп вагт сарп этмели. Олара өвредип тербие бермели, чүнки муны ата-энелерден Ехова талап эдйәр (Кануның гайталанышы 6:4—9).

15. Ата-энелер чагаларыны нәдип горамалы?

¹⁵ Замана гитдигиче эрбетлешйәр, шонуң үчин ата-энелер чагаларыны бозук адамлардан горамалы. Меселем, кәмиллик яшына етмедик чагалары аздырян ахлаксыз адамлардан горамалы. Иса Месихиң «чагалар» дийип, атландыран шәгиртлерини нәдип горанына үнс бер. Хачан-да Исаны туссаг эдип өлдүрҗек  боланларында, ол шәгиртлерини гойбермеклериниң аладасыны этди (Яхя 13:33; 18:7—9). Эгер чагаң бар болса, Иблис зыян етирмез ялы, олара хас-да үнсли болмалы. Бу залым дүнйәдәки ховплы затлар барада чагалара өңүнден дуйдурмалы * (1 Петрус 5:8). Олара беден, рухы ве ахлак тайдан хенизе ченли шейле улы ховп абанманды.

16. Иса Месих шәгиртлериниң бикәмиллигине нәхили гарады ве ата-энелер ондан нәхили гөрелде алып билер?

¹⁶ Иса Месихиң өлдүрилҗек гиҗеси шәгиртлери  өз араларында кимиң улудыгы хакда җедел этдилер. Иса олара гахарланмагың дерегине, ене-де сөйги билен дүшүндирди ве гөрелде гөркезип сапак берди (Лука 22:24—27; Яхя 13:3—8). Ата-энелер чагалара тербие берениңизде, нәдип Исаның гөрелдесине эерип билерсиңиз? Элбетде, темми бермели, йөне чәгини билмели. Чагалардан гахарыңы чыкармалы дәл. «Гылыҗың санҗылышы ялы», ойланышыксыз сөзлерден гача дурмалы (Еремия 30:11; Сүлейманың тымсаллары 12:18). Темми берениңде, чагалар онуң пейдалыдыгына дүшүнер ялы эдип темми бермели (Эфеслилер 6:4; Еврейлер 12:9—11).

ЧАГАЛАРА ГӨРЕЛДЕ

17. Иса Месих чагалара нәхили гөрелде галдырды?

¹⁷ Чагалар Иса Месихден гөрелде алып билерми? Элбетде! Иса ата-энә гулак асмагы гөрелде гөркезди. Иса: «Атаның өвреденлерини айдярын... Мен хемише Оңа яраян затлары эдйәрин» дийди (Яхя 8:28, 29). Иса гөкдәки Атасына гулак асярды. Мукаддес Язгыларам чагаларың ата-энесине гулак асмагыны үндейәр (Эфеслилер 6:1—3). Иса кәмил болса-да, ердәки бикәмил ата-энесине, ягны Юсуп билен Меръеме гулак асярды. Бу, элбетде, машгаланың багтлы болмагына гошант гошандыр (Лука 2:4, 5, 51, 52).

18. Иса Месих гөкдәки Атасына нәме үчин хемише табын болярды ве чагаларың гулак асмагы кими бегендирйәр?

¹⁸ Чагалар Исадан гөрелде алып, ата-энесини нәдип бегендирип билер? Элбетде, ата-энә гулак асмак аңсат дүшйән дәлдир, йөне Ехова чагаларың гулак асмагыны ислейәр (Сүлейманың тымсаллары 1:8; 6:20). Иса кын ягдайда-да гөкдәки Атасына табын болярды. Бир сапар Худайың ислегини ерине етирмек кын боланда, Иса Атасына: «Бу кәсәни [табшырыгы] Менден гечир» дийип хайыш этди. Йөне шонда-да ол Худайың ислегини ерине  етирди, чүнки нәме этмелидигини Атасының говы билйәндигине дүшүнйәрди (Лука 22:42). Чагалар гулак асмагы өвренселер, ата-энесини ве гөкдәки Атасыны бегендирерлер * (Сүлейманың тымсаллары 23:22—25).

19. а) Шейтан чагалара нәме этдирйәр? б) Чага эрбет иш этсе, хоссарларына нәхили тәсир эдер?

¹⁹ Иблис Исаны сынан болса, чагалара-да эрбет иш этдирҗеги гүррүңсиз (Матта 4:1—10). Шейтан Иблисиң хилелериниң бири — дең-душларың тәсири. Олара гаршы дурмак аңсат дәл. Шонуң үчин Худайың ёлундан йөремейәнлер билен достлашмалы дәл (1 Коринтослылар 15:33). Якубың гызы Динаның Ехова гуллук этмейән адамлар билен достлашыгы улы бетбагтчылыга гетирди (Барлык 34:1, 2). Чага ахлаксызлык этсе, хоссарларына нәхили агыр дегер! (Сүлейманың тымсаллары 17:21, 25).

МАШГАЛАНЫ НӘМЕ БАГТЛЫ ЭДЙӘР?

20. Машгала багтлы болар ялы, машгаланың хер бир агзасы нәдип гошант гошуп билер?

²⁰ Мукаддес Язгыларың маслахатыны улансак, машгаладакы  кынчылыклары чөзмек аңсат болар. Худайың Сөзүндәки маслахатлар машгаланы багтлы эдйәр. Әрлер, аялыңызы сөйүң, олара Иса Месихиң иманлылар йыгнагына гарайшы ялы гараң. Аяллар, әриңизе машгалабашы хөкмүнде гараң ве Сүлейманың тымсаллары 31:10—31-нҗи аятлардакы башарҗаң аялдан гөрелде алың. Ата-энелер, чагаларыңыза тербие бериң (Сүлейманың тымсаллары 22:6). Аталар, «өйүңизи оңат доландырың» (1 Тимотеос 3:4, 5; 5:8; Колоселилер 3:20). Чагалар, ата-энеңизе гулак асың. Бикәмил адамларың хеммеси ялңышяр. Шонуң үчин бири-бириңизден өтүнч сораң.

21. Бизе нәхили гелеҗек гарашяр ве машагаламызы хәзирден нәдип багтлы эдип билерис?

²¹ Мукаддес Язгыларда машгаланы багтлы эдйән пейдалы маслахатлар хем-де принциплер бар. Шейле-де онда Худайың тәзе дүнйәси, ягны Җеннет барада айдыляр. Җеннетде Ехованың гуллукчылары багтлы яшар (Ылхам 21:3, 4). Бизе гөр, нәхили аҗайып гелеҗек гарашяр! Мукаддес Язгылардакы Худайың маслахатына эерсек, машгаламызы хәзирден багтлы эдип билерис.

[Чыкгытлар]

МУКАДДЕС ЯЗГЫЛАР НӘМЕ ӨВРЕДЙӘР?

▪ Әрлер аялыны өз тени кимин сөймели (Эфеслилер 5:25—29).

▪ Аяллар машгаласыны сөймели, әрине хормат гоймалы (Титус 2:4, 5).

▪ Ата-энелер чагаларыны сөймели, горамалы ве олара өвретмели (Кануның гайталанышы 6:4—9).

▪ Чагалар ата-энесине гулак асмалы (Эфеслилер 6:1—3).

[Макаланың сораглары]

[139 Сахыпадакы сурат]

Сара аяллара нәхили гөрелде галдырды?

[140 Сахыпадакы сурат]]

Ата-энелер Иса Месихден нәме өвренип билер?

[142 Сахыпадакы сурат]]

Яш оглан-гызлар сынага дүшенде нәмәни унутмалы дәл?