1. Uw rogon me yag e felfelan’ nga lan e tabinaw?

BAADAG Jehovah Got ni nge felfelan’ e tabinaw rom. Thin rok ni bay u Bible e be yog e n’en ni baadag ni nge rin’ gubin e girdi’ u lan e tabinaw. Faanra fol girdien e tabinaw ko re fonow ney ma ra fel’ rogorad riy. I gaar Jesus: “Ri kab felan’ e piin ni kar rung’aged e thin rok Got ma kar pired ni yad be fol riy!”​—Luke 11:28.

2. Ra nge yag e felfelan’ nga lan e tabinaw, ma mang e thingari tamilang u wan’uy?

² Faanra tamilang u wan’dad ni Jehovah e ‘Chitamangidad’ ma ir e sunmiy e tabinaw, ma aram e rayog ni nge yag e felfelan’ nga lan e tabinaw rodad. (Matthew 6:9) Bay e tabinaw ni bochan e Chitamangidad nu tharmiy. Ma ir e manang e n’en nra yibnag e felfelan’ nga lan e tabinaw. (Efesus 3:14, 15) Ere, mang e be yog e Bible u murung’agen e n’en nib milfan ko girdi’ u lan e tabinaw?

3. Mang e be yog e Bible u murung’agen rogon ni sum e tabinaw? Uw rogon ma kad nanged nib riyul’ e re thin nem?

³ Jehovah e ir e sunmiy e gal nsom’on e girdi’ ni aram Adam nge Efa, me ir e m’agpa’row. I tayrow nga lan ba paradis ni ka nog e milay’ nu Eden ngay, me yog ngorow ni gaar: “Mu diyengow nge yoor pi fakmew, nge wer e piin ni owchemew nga gubin yang u fayleng ngar pired riy mi yad suwey.” (Genesis 1: 26-28; 2:18, 21-24) Re thin ney e gathi ba yat ya yog Jesus nib riyul’ fare thin u Genesis ni murung’agen e bin som’on e tabinaw. (Matthew 19:4, 5) Ngad guyed ko mang fan nrayog ni nge yag e felfelan’ nga lan e tabinaw rodad ni yugu aram rogon ni boor e magawon rodad. De lemnag Got ni nge magawon e yafas ko girdi’ u lan e tabinaw ni bod rogon ni gad be guy e chiney.

4. (a) Uw rogon me felfelan’ girdien e tabinaw? (b) Mang fan nib t’uf ni ngan fil murung’agen Jesus nfaanra nge yag e felfelan’ nga lan e tabinaw?

⁴ Rayog ni nge felfelan’ e girdi’ u lan e tabinaw ni faan yad ra folwok rok Got ngaur t’ufeged yad. (Efesus 5:1, 2) Machane, uw rogon ni ngad folwokgad rok Got ni yugu aram rogon ndabiyog ni ngad guyed? Rayog ni ngad nanged rarogon e ngongol rok Jehovah ya ke pi’ e bin nganni’ i Fak ni Jesus Kristus ke yib nga fayleng. (John 1:14, 18) Nap’an ni immoy Jesus u fayleng ma i folwok ko Chitamangin nu tharmiy. Aram fan ni piin ni ur guyed Jesus nge piin ni ur motoyilgad ngak e bod ni kar guyed Jehovah ma kar rung’aged laman. (John 14:9) Ere, faan gad ra fil murung’agen e t’ufeg rok Jesus ma gad folwok ko ngongol rok, ma ra ayuwegdad ni ngad felfelan’naged girdien e tabinaw rodad.

5, 6. (a) Uw rogon ni nge folwok e piin figirngiy u rogon ni i t’ufeg Jesus e ulung rok kakrom? (b) Mang e thingar ni rin’ me yag ni ngaun n’ag fan e kireb u lan e mabgol?

⁵ Be yog e Bible ni thingari ngongol e piin figirngiy ngak e piin leengirad ni bod rogon e ngongol rok Jesus ngak pi gachalpen. Mu lemnag e re fonow ney ni gaar: “Piin ni pumoon, ngari t’uf e piin nleengimed romed ni bod rogon feni t’uf girdien e galesiya rok Kristus me pi’ e pogofan rok ni fan ngorad . . . Pumoon e thingari t’uf rorad e piin nleengirad ni bod rogon nib t’uf dowrad rorad. Re moon nib t’uf leengin rok e aram e be t’ufeg ir. Ya dariy be’ ni kaa fanenikay e birok e dowef. Ya ma duruw’iy ma ma ayuweg, ni bod rogon e n’en ni ma rin’ Kristus ngak girdien e galesiya.”​—Efesus 5:23, 25-29.

⁶ Rayog ni nge folwok e piin figirngiy u rogon ni i t’ufeg Jesus e ulung rok kakrom. I t’ufeg Jesus pi gachalpen “nge yan i mada’ ko tomur” me pi’ e yafas rok ni fan ngorad ni yugu aram rogon ndar flontgad. (John 13:1; 15:13) Ku arrogon e piin figirngiy ni kan fonownagrad ni kan gaar: “Nge t’uf romed pi leengimed, ma dab um gelniged e thin ngorad.” (Kolose 3:19) Uw rogon ni nge fol e en figirngiy ko re fonow ney ni ki mada’ nga nap’an ni ke oloboch e ppin rok? Dabi pagtalin ni ku arrogon ir ni ma oloboch yu ngiyal’ maku thingari n’ag Got fan e kireb rok. Ere, mang e thingari rin’? Thingari n’ag fan e kireb ni ke rin’ be’ ngak ni kub muun leengin ngay. Maku arrogon e n’en thingari rin’ e en leengiy. (Mu beeg e Matthew 6:12, 14, 15.) Aram fan ni yima yog nfaanra i n’ag ba wu’ i mabgol fan e kireb rorow ma ra fel’ e mabgol rorow.

7. Mang e ma lemnag Jesus nrayog ni nge folwok e piin figirngiy riy?

 ⁷ Thingari nang e piin figirngiy ni Jesus e gubin ngiyal’ ni ma lemnag rarogon pi gachalpen. Manang e tin dabiyog rorad nge tin nib t’uf rorad. Bod ni, bay bayay ni kar magargad me gaar ngorad: “Mmarod nga darod nga bang ndariy be’ riy nga yugu mtoffangad buchuuw.” (Mark 6:30-32) Ere, ku arrogon e piin leengiy ni nga i lemnag e piin figirngiy rarogorad. Ya be yog e Bible ni “yad mmeewar ko pumoon” ere thingari tay e pumoon rorad “farad.” Mang fan? Ya piin figirngiy nge piin leengiy e “ra pi’ Got e tow’ath rorad” ni taareb rogon, ni aram e yafas. (1 Peter 3:7) Ere, thingar i lemnag e piin figirngiy ni yul’yul’ e ir e ra fal’eg be’ u wan’ Got ni yugu demtrug ko be’ ni pumoon fa be’ nib pin.​—Psalm 101:6.

8. (a) Mang fan fare thin ni be gaar, “re moon nib t’uf leengin rok e aram e be t’ufeg ir”? (b) Mang fan fare thin nra mabgol l’agruw ni’ ma “kar taab girdi’gow”?

⁸ Be yog e Bible ni “re moon nib t’uf leengin rok e aram e be t’ufeg ir,” ya yog Jesus ni “gathi ku yow ba ruw ni girdi’, ya kar taab girdi’gow.” (Matthew 19:6) Ere, thingari dabi par bagayow nge be’ ni gathi mabgol rok. (Proverbs 5:15-21; Hebrews 13:4) Rayog ni ngar folgow ko re fonow n’ey nfaanra nga i bagayow me lemnag e n’en nib t’uf rok bagayow. (1 Korinth 7:3-5) Bfel’ fare thin ni gaar: “Dariy be’ ni kaa fanenikay e birok e dowef. Ya ma duruw’iy ma ma ayuweg.” Ere thingari t’ufeg e en figirngiy leengin ni bod rogon ni ma t’ufeg ir, ma dabi pagtalin ni Jesus Kristus e ir lolugen.​—Efesus 5:29; 1 Korinth 11:3.

9. Mang fel’ngin Jesus e be weliy e Filippi 1:8 murung’agen? Mang fan ni nga i t’ufeg e piin figirngiy leengirad?

⁹ I weliy apostal Paul murung’agen e ‘t’ufeg’ ni bay  rok Jesus Kristus. (Filippi 1:8) Rib manigil e re t’ufeg nem ni immoy rok Jesus ya rib fel’ u wan’ e piin nib pin nra manged pi gachalpen. (John 20:1, 11-13, 16) Ku arrogon e piin leengiy ni yad ma yim’ ni bochan ni ngaun t’ufegrad.

10. Mang e ma rin’ Jesus ni nge folwok e piin leengiy riy?

¹⁰ Tabinaw e ba ulung nfaanra nge maruwel nib fel’ rogon mab t’uf be’ ni mang llug riy. Mus ngak Jesus ni bay Be’ ni Lolugen ni ma fol rok. “Got e lolugen Kristus” ni bod rogon ni “pumoon e ir lolugen leengin.” (1 Korinth 11:3) Rayog ni ngad folwokgad u rogon ni ma fol Jesus rok e En ni Lolugen ya gad gubin ni bay be’ ni lolugdad.

11. Susun ni nge uw rogon e ngongol rok e en leengiy ngak figirngin? Faanra ba fel’ e ngongol rok e en leengiy, ma mang angin?

¹¹ Piin ni pumoon e dar flontgad, ere ku yad ma oloboch. Ere, mang e nge rin’ e en leengiy? Thingar dabi gathibthibnag e n’en ni ma rin’ e pumoon rok fa i guy rogon ni nge mang ir e gagiyegnag e tabinaw. Thingar dabi pagtalin e piin leengiy ni baadag Got e girdi’ nib sumunguy mab gapas. (1 Peter 3:4) Faanra aram rogon e en leengiy ma ra pirieg nib mom ngak ni nge fol ko pumoon rok ni ki mada’ ko ngiyal’ nib mo’maw’ ngak ni nge fol. Ku be yog e Bible ni gaar: “Urngin e ppin ni thingari ta’ fan figirngin.” (Efesus 5:33) Machane uw rogon nfaanra der fol figirngin be’ rok Kristus ni ir Lolugen? Be fonownag e Bible e piin leengiy ni gaar: “Ku er rogomed pi leengiy nthingar um folgad rok pi figirngimed, ni fan e faanra ba’ boch i yad ndawori mich e thin rok Got u wun’rad ma rayog ni nge mich u wun’rad ni bochan pangimed. Ma aram e dakuriy fan  bbugithin ni nga mogned ngorad, ya bay ra guyed rogon feni machalbog pangimed nge rogon ni gimed be ta’ farad.”​—1 Peter 3:1, 2.

12. Mang nde kireb ni nge weliy e en leengiy rogon e tafinay rok u fithik’ e sumunguy?

¹² Ra yog e en leengiy rogon e tafinay rok u fithik’ e sumunguy ma gathi aram e be darifannag e pumoon rok ni yugu demtrug ko taareb e michan’ rorow fa danga’. Ya rayog nib puluw e n’en ni be lemnag ma ra yib angin ko tabinaw. Yugu aram rogon nde m’agan’ Abraham nga rogon ni ke yog Sarah ni ngan pithig reb e magawon u tabinaw, me yog Got ngak ni gaar: “Mu rin’ e tin ni ke yog Sarah ngom.” (Mu beeg e Genesis 21:9-12.) Ere, faanra turguy e en figirngiy ban’en nde togopuluw ko motochiyel rok Got ma thingari fol leengin riy.​—Acts 5:29; Efesus 5:24.

13. (a) Mang e be yog e Titus 2:4, 5 ni nge rin’ e piin leengiy? (b) Mang e be yog e Bible u murung’agen e mabgol nra be’ ma be par u bang nge ngan dar?

¹³ Boor e kanawo’ nrayog ni nge rin’ e en leengiy e  maruwel rok riy ni nge ayuweg e tabinaw rok. Be yog e Bible ni piin ni ppin ni kar uned ko mabgol e nge “t’uf figirngirad nge pi fakrad rorad, ma nge yog nra t’ared lanin’rad ko tin nde mat’aw ma ngar pired ni yad mmachalbog, ma ngar ngongliyed e maruwel nib fel’ u tabinaw rorad, ma yad be fol ko thin rok figirngirad.” (Titus 2:4, 5) Ra t’ufeg chon e tabinaw reb i leengiy ni aray rogon e ngongol rok. (Mu beeg e Proverbs 31:10, 28.) Machane, bochan ndawori flont e piin mabgol, ma yu ngiyal’ e ma sum e magawon nrib gel ma aram me bagayow fa gal wu’ i mabgol me par rok fa ra dargow. Rogon ni be yog e Bible e bay tapgin mfini  yag ni nge bagayow fa gal mabgol me par rok. Machane dabi chuw bagayow ni bochan e magawon nib achig, ya be yog e Bible ni gaar: “Be’ ni ppin ni ke mabgol e thingari dabi chuw rok e pumoon rok . . . ma be’ ni pumoon ni ke mabgol e thingari dabi n’ag leengin.” (1 Korinth 7:10, 11) Kemus nrogon me dar e mabgol e faanra par bagayow fagali mabgol nge be’ ni gathi mabgol rok.​—Matthew 19:9.

14. Uw rogon e ngongol rok Jesus ngak e piin bitir? Mang e ba t’uf rok e piin bitir?

¹⁴ Rayog ni nge folwok e gallabthir u rogon ni i ngongol Jesus ngak e piin bitir. Nap’an ni guy boch e girdi’ rogon ni ngar taleged e piin bitir ndab ra chugurgad ngak Jesus, me gaar ngorad: “Mpaged e pi bitir nir ngar bad ngog! Dab mu taleged yad.” Ki yog e Bible ni “kunuy Jesus fapi bitir ngak me tay pa’ nga dakenrad, ni aram e ke yibilayrad.” (Mark 10:13-16) I tay Jesus e tayim ni fan ko piin bitir, ere ku arrogon e gallabthir ni ku thingar ra ted e tayim ni fan ko bitir rorad. Thingar ni tay ba ngiyal’ ni ngan fil e thin rok Got ngorad, ya aram rogon ni baadag Jehovah ni nge rin’ e gallabthir.​—Mu beeg e Deuteronomy 6:4-9.

15. Mang e thingari ayuweg e gallabthir e bitir rorad riy?

¹⁵ Chiney nri be gel e kireb u fayleng e ba t’uf ko gallabthir ni ngar ayuweged e bitir rorad rok e piin ni ma guy rogon ni nge rin’ e kireb ngorad fa gafgownagrad. Mu lemnag rogon ni ma ayuweg Jesus pi gachalpen ni ma yog e “pi fakag” ngorad. Nap’an nni kol Jesus u m’on ni ngan li’ ngem’ me gaar ngak fapi girdi’: “Faanra i gag e gimed be gayeg, me ere mpaged e tin  ni baaray e girdi’ nga ranod.” (John 13:33; 18:7-9) Ere, piin gallabthir e thingar ra nanged e pi n’en ni ma gay Moonyan’ rogon ni nge rin’ ngak e bitir rorad. Thingar ni ginangrad u m’on riy ya ngaur pired ma yad manang. (1 Peter 5:8) Ireray e ngiyal’ ni ngan ayuwegrad u gubin mit e magawon nra yib ngorad.

16. Mang e ra fil e gallabthir u rogon e ngongol rok Jesus ngak pi gachalpen?

¹⁶ Fare nep’ ni yim’ Jesus riy e i maluagthin pi gachalpen ko mini’ e arorad nib ga’ u fithik’rad. De puwan’ Jesus ngorad ya fonownagrad ko thin rok nge ngongol rok. (Luke 22:24-27; John 13:3-8) Faanra gur reb e gallabthir, ma gur, rayog nim folwok ku Jesus u rogon ni ngam yal’uweg e bitir rom? Riyul’ ni thingar ni llowan’nagrad, machane ngan rin’ u rogon nib “mat’aw” ma gathi u fithik’ e damumuw. Thingar ni lem u m’on ni ngan non ya ra danga’ ma rayog ni ngan “maad’ad nga laniyan’ be’ nib toar ni bod bangi sayden.” (Jeremiah 30:11, BT; Proverbs 12:18, BT) Faanra ngan gechignag e bitir ma thingar ni rin’ u reb e kanawo’ nrayog ni nge nang fan ni kan gechignag.​—Efesus 6:4; Hebrews 12:9-11.

17. Uw rogon ni ke dag Jesus e ngongol nib fel’ nrayog ni nge folwok e piin bitir riy?

¹⁷ Gur, rayog ni nge fil e piin bitir ban’en rok Jesus? Rayog, ya rogon e ngongol ni i tay e be dag rogon ni nga i fol e piin bitir ko gallabthir rorad. I gaar: “Gu be yog e tin ni ke yog e en ni Chitamangiy ngog ni nggog . . . ya gubin ngiyal’ ma gu be rin’ e tin nib m’agan’ ngay.” (John 8:28, 29) Ma fol Jesus ko Chitamangin nu  tharmiy, maku arrogon e piin bitir ni be yog e Bible ni ngar folgad ko gallabthir rorad. (Mu beeg e Efesus 6:1-3.) Yugu aram rogon nib flont Jesus, machane i fol ku Josef nge Maria ni gallabthir rok ndawor ra flontgow. Dabisiy ni ke yibnag e re n’em e felfelan’ nga lan e tabinaw rok Jesus!​—Luke 2:4, 5, 51, 52.

18. Mang fan ni i fol Jesus ko Chitamangin nu tharmiy? Mini’ e ra felfelan’ nfaanra be fol e piin bitir?

¹⁸ Gur, rayog ko bitir ni ngar boded Jesus ngar felfelan’naged e gallabthir rorad? Riyul’ ni yu ngiyal’ e ba mo’maw’ ko bitir ni ngar folgad rok e gallabthir rorad, machane aram e n’en ni baadag Got ni nge rin’ e bitir. (Proverbs 1:8; 6:20) Gubin ngiyal’ ni i fol Jesus ko Chitamangin u tharmiy, ngki mada’ ko ngiyal’ nib mo’maw’ rok ni nge fol. Bay ba ngiyal’ ni m’agan’ Got ngay ni nge rin’ Jesus ban’en nib mo’maw’, me gaar Jesus: “Chitamag, faanra mm’agan’um ngay ma ga fek e re kap ney [ban’en nthingari rin’] ngam chuweg rog.” Machane me rin’ Jesus e n’en ni yog Got ngak ni nge rin’, ya ke nang ni manang e Chitamangin e n’en nib fel’ ni fan ngak. (Luke 22:42) Faanra i fol e bitir ma aram e yad ra felfelan’nag e gallabthir rorad nge Jehovah. *​—Proverbs 23:22-25.

19. (a) Uw rogon ni ma waliy Satan e piin bitir? (b) Faanra un e bitir ko ngongol nib kireb, ma mang wenegan nra yib ngak e gallabthir?

¹⁹ I guy Moonyan’ rogon ni nge waliy Jesus nge denen, ere ku ma guy rogon ni nge waliy e piin fel’ yangaren ni ngar rin’ed e kireb. (Matthew 4:1-10) Ma fanay Satan e towasar ko pi taab yangar rorad ya nge  mo’maw’ ngorad ni ngar siyeged e kireb. Ere, rib ga’ fan ni nge dab i chag e piin bitir ngak e piin nib kireb e ngongol rorad! (1 Korinth 15:33) Dinah ni fak Jakob e chag ngak e piin ndarur pigpiggad ngak Jehovah, me sum e magawon nib ga’ ni bochan. (Genesis 34:1, 2) Aygum lemnag gelngin e kireban’ nra tay e tabinaw rok be’ nfaanra un ko ngongol ndarngal!​—Proverbs 17:21, 25.

20. Mang e thingari rin’ chon e tabinaw me yag e felfelan’ nga lan e tabinaw?

²⁰ Ra mom ni ngan pithig e magawon u tabinaw nfaanra ni fol ko fonow nu Bible. Ireray e n’en nra yibnag e felfelan’ nga lan e tabinaw. Ere, gimed e piin figirngiy, mu t’ufeged pi leengimed mi gimed ngongol ngorad ni bod rogon ni i ngongol Jesus ngak girdien e ulung rok. Gimed e piin leengiy, mu folgad rok figirngimed ni yad lolugmed mi gimed ngongol ni bod fare pin ni kan weliy murung’agen  u Proverbs 31:10-31. Ma gimed e gallabthir, mu skulnaged pi fakmed. (Proverbs 22:6) Pi matam, “mu gagiyegniged girdien e tabinaw romed nib fel’ rogon.” (1 Timothy 3:4, 5; 5:8) Ma gimed e piin bitir, mu folgad ko gallabthir romed. (Kolose 3:20) Dariy be’ u lan e tabinaw nib flont, ya urngin e girdi’ ni ma oloboch. Ere, nge be’ me sobut’nag laniyan’ me wenig ni ngan n’ag fan e kireb rok.

21. Mang e bay nga m’on nib fel’ ni fan ngodad? Uw rogon me yag e felfelan’ nga lan e tabinaw rodad?

²¹ Boor e thin nu Bible nib fel’ nrayog ni nge fonownag e tabinaw. Maku be fil e Bible ngodad murung’agen e ngiyal’ nra paradisnag Jehovah e fayleng me pigpig e girdi’ ngak u fithik’ e felfelan’. (Revelation 21:3, 4) Rib fel’ e n’en ni bay nga m’on ni fan ngodad! Machane, mus ko ngiyal’ ney ma rayog ni nge yag e felfelan’ nga lan e tabinaw rodad ni faan gad ra fol ko thin rok Got u Bible.