Kapitlu Ħmistax

Qima Approvata minn Alla

Ir-​reliġjonijiet kollha jogħġbuh lil Alla?

Kif nistgħu nagħrfu r-​reliġjon vera?

Min huma l-​aduraturi veri t’Alla llum fuq l-​art?

1. Kif se nibbenefikaw jekk inqimu lil Alla b’mod xieraq?

ALLA ĠEĦOVA jimpurtah ħafna minna u jrid li aħna nibbenefikaw mill-​gwida li hu jagħtina b’tant imħabba. Jekk aħna nqimuh kif jixraq, se nkunu ferħanin u se nevitaw ħafna problemi fil-​ħajja. Se jkollna wkoll il-​barka u l-​għajnuna tiegħu. (Isaija 48:17) Madankollu, hemm mijiet taʼ reliġjonijiet li jsostnu li jgħallmu l-​verità dwar Alla. Iżda, hemm differenza enormi fit-​tagħlim tagħhom dwar min hu Alla u x’jistenna minna.

2. Kif nistgħu nagħrfu liema hu l-​mod xieraq kif inqimu lil Ġeħova, u liema eżempju jgħinna nifhmu dan?

² Kif tistaʼ tkun taf il-​mod xieraq kif tqim lil Ġeħova? M’għandikx għalfejn tistudja u tqabbel it-​tagħlim tar-​reliġjonijiet kollha. Għandek bżonn biss titgħallem dak li l-​Bibbja tgħallem verament dwar il-​qima vera. Biex nagħtu eżempju: F’ħafna pajjiżi teżisti l-​problema tal-​flus foloz. Jekk jitolbuk biex issib dawn il-​flus foloz, kif tagħmel? Toqgħod tistudja l-​flus foloz kollha? Dażgur li le. Ikun iktar għaqli jekk tistudja bir-​reqqa l-​flus tajbin. Wara li tkun taf sew kif tagħraf il-​flus tajbin, int tkun tistaʼ tinduna liema huma l-​flus foloz. Bl-​istess mod, meta nitgħallmu kif nagħrfu r-​reliġjon vera, nistgħu nindunaw liema huma r-​reliġjonijiet foloz.

3. Skond Ġesù, x’għandna nagħmlu jekk irridu li jkollna l-​approvazzjoni t’Alla?

 ³ Huwa importanti li nqimu lil Ġeħova bil-​mod li hu japprova. Ħafna nies jemmnu li r-​reliġjonijiet kollha jogħġbu lil Alla, imma l-​Bibbja ma tgħallimx hekk. M’huwiex biżżejjed li wieħed sempliċement jgħid li hu Kristjan. Ġesù qal: “Mhux kulmin jgħidli, ‘Mulej, Mulej,’ jidħol fis-​saltna tas-​smewwiet, imma min jagħmel ir-​rieda taʼ Missieri li hu fis-​smewwiet.” Għalhekk, biex ikollna l-​approvazzjoni t’Alla, aħna rridu nitgħallmu dak li Alla jitlob minna u nagħmluh. Ġesù sejjaħ lil dawk li ma jagħmlux ir-​rieda t’Alla “intom li tiksru l-​liġi.” (Mattew 7:​21-23) Bħall-​flus foloz, ir-​reliġjon falza m’għandha ebda valur veru. Agħar minn hekk, reliġjon bħal din fil-​fatt tagħmel il-​ħsara.

4. Xi jfisser il-​kliem taʼ Ġesù dwar iż-​żewġ toroq, u kull waħda minnhom fejn twassal?

⁴ Ġeħova jagħti lil kulħadd fuq l-​art l-​opportunità biex jikseb il-​ħajja taʼ dejjem. Iżda, biex ikollna ħajja taʼ dejjem f’Ġenna taʼ l-​art, irridu nqimu lil Alla kif jixraq u ngħixu issa b’mod li hu jaċċetta. Diżgrazzjatament, ħafna jirrifjutaw li jagħmlu dan. Ġesù għalhekk qal: “Idħlu mill-​bieb id-​dejjaq; għax wiesgħa u spazjuża hi t-​triq li tieħu għall-​qerda, u ħafna jgħaddu minnha; filwaqt li dejjaq hu l-​bieb u mħarbta hi t-​triq li tieħu għall-​ħajja, u ftit huma dawk li jsibuha.” (Mattew 7:​13, 14) Ir-​reliġjon vera twassal għall-​ħajja taʼ dejjem. Ir-​reliġjon falza twassal għall-​qerda. Ġeħova ma jridx li xi ħadd jinqered, u għalhekk qed jagħti l-​opportunità lin-​nies kullimkien biex jitgħallmu dwaru. (2 Pietru 3:9) Tabilħaqq, mela, il-​mod kif inqimu lil Alla jfisser jew ħajja jew mewt għalina.

KIF NAGĦRFU R-​RELIĠJON VERA

5. Kif nistgħu nagħrfu lil dawk li jipprattikaw ir-​reliġjon vera?

⁵ ‘It-​triq tal-​ħajja’ kif nistgħu nsibuha? Ġesù qal li r-​reliġjon vera kienet se tidher fil-​ħajja tan-​nies li jipprattikawha.  “Mill-​frott tagħhom tagħrfuhom,” hu qal. “Kull siġra tajba tagħmel frott tajjeb.” (Mattew 7:​16, 17) Fi kliem ieħor, dawk li jipprattikaw ir-​reliġjon vera kienu se jintgħarfu mit-​twemmin u mill-​kondotta tagħhom. Għalkemm m’humiex perfetti u jiżbaljaw, l-​aduraturi veri bħala grupp ifittxu li jagħmlu r-​rieda t’Alla. Ejja nikkunsidraw sitt fatturi li jgħinuk tagħraf lil dawk li jipprattikaw ir-​reliġjon vera.

6, 7. Il-​qaddejja t’Alla kif iqisuha l-​Bibbja, u Ġesù kif tana eżempju f’dan ir-​rigward?

⁶ Il-​qaddejja t’Alla jibbażaw it-​tagħlim tagħhom fuq il-​Bibbja. Il-​Bibbja nfisha tgħid: “L-​Iskrittura kollha hi mnebbħa minn Alla u tiswa biex tgħallem, twiddeb, tikkoreġi, tiddixxiplina fis-​sewwa, sabiex il-​bniedem t’Alla jkun kapaċi għalkollox, armat bis-​sħiħ għal kull għemil tajjeb.” (2 Timotju 3:​16, 17) Lill-​Kristjani sħabu, l-​appostlu Pawlu kitbilhom: “Meta rċivejtu l-​kelma t’Alla, li smajtu mingħandna, ma lqajtuhiex bħala l-​kelma tal-​bnedmin, imma bħalma hi tassew, bħala l-​kelma t’Alla.” (1 Tessalonikin 2:​13) Għalhekk, it-​twemmin u l-​prattiċi tar-​reliġjon vera m’humiex ibbażati fuq l-​opinjonijiet jew it-​tradizzjonijiet tal-​bnedmin, imma huma bbażati fuq il-​Kelma mnebbħa t’Alla, il-​Bibbja.

⁷ Ġesù Kristu tana l-​eżempju xieraq billi bbaża t-​tagħlim tiegħu fuq il-​Kelma t’Alla. F’talba lil Missieru tas-​sema, hu qal: “Kelmtek hi l-​verità.” (Ġwanni 17:17) Ġesù kien jemmen il-​Kelma t’Alla, u kulma kien jgħallem kien fi qbil maʼ l-​Iskrittura. Ġesù spiss kien jgħid: “Hu miktub.” (Mattew 4:​4, 7, 10) Imbagħad kien jikkwota skrittura. Bl-​istess mod, in-​nies t’Alla llum ma jgħallmux l-​ideat tagħhom stess. Huma jemmnu li l-​Bibbja hi l-​Kelma t’Alla, u jibbażaw it-​tagħlim tagħhom b’mod sod fuq dak li tgħid.

8. Il-​qima lil Ġeħova x’tinvolvi?

⁸ Dawk li jipprattikaw ir-​reliġjon vera jqimu biss lil Ġeħova u jxandru ismu. Ġesù ddikjara: “Qim lil Ġeħova Alla  tiegħek, u lilu biss agħti servizz sagru.” (Mattew 4:​10) B’hekk, il-​qaddejja t’Alla ma jqimu lil ħadd ħlief lil Ġeħova. Din il-​qima tinkludi li jmorru jgħidu lin-​nies l-​isem taʼ l-​Alla veru u x’tip taʼ Alla hu. Salm 83:19 (83:​18, NW) jistqarr: “Biex jagħrfu li Jaħweh [jew Ġeħova] hu ismek, li int waħdek l-​Għoli fuq l-​art kollha.” Ġesù tana l-​eżempju kif nistgħu ngħinu lil oħrajn isiru jafu lil Alla, bħalma qal f’talba: “Urejt ismek lill-​bnedmin li tajtni mid-​dinja.” (Ġwanni 17:6) Bl-​istess mod, l-​aduraturi veri llum jgħallmu lil oħrajn dwar l-​isem t’Alla, l-​iskopijiet, u l-​kwalitajiet tiegħu.

9, 10. Il-​Kristjani veri b’liema modi juru mħabba lejn xulxin?

⁹ In-​nies t’Alla juru mħabba ġenwina u mingħajr egoiżmu għal xulxin. Ġesù qal: “B’dan ikun jaf kulħadd li intom dixxipli tiegħi, jekk ikollkom l-​imħabba bejnietkom.” (Ġwanni 13:35) L-​ewwel Kristjani kienu juru mħabba bħal din lejn xulxin. L-​imħabba li Alla jridna nuru tegħleb l-​ostakli razzjali, soċjali, u nazzjonali u tgħaqqad lin-​nies flimkien f’rabta li ma tinħallx taʼ fratellanza vera. (Kolossin 3:​14) Il-​membri tar-​reliġjonijiet foloz m’għandhomx din il-​fratellanza mibnija fuq l-​imħabba. Dan kif nafuh? Huma joqtlu lil xulxin minħabba differenzi nazzjonalistiċi jew etniċi. Il-​Kristjani veri ma jaqbdux l-​armi biex joqtlu lil ħuthom Kristjani jew lil xi ħaddieħor. Il-​Bibbja tistqarr: “Ulied Alla u wlied ix-​Xitan jidhru ċar minn dan il-​fatt: Kulmin ma jipprattikax il-​ġustizzja ma joriġinax minn Alla, lanqas min ma jħobbx lil ħuh. . . . Għandna nħobbu lil xulxin; mhux bħal Kajjin, li oriġina mill-​Ħażin u qatel lil ħuh.”​—1 Ġwanni 3:​10-12; 4:​20, 21.

¹⁰ M’għandniex xi ngħidu, l-​imħabba ġenwina ma tfissirx biss li ma noqtlux lil oħrajn. Il-​Kristjani veri jużaw bla egoiżmu l-​ħin, l-​enerġija, u r-​riżorsi tagħhom biex jgħinu u jinkuraġġixxu lil xulxin. (Ebrej 10:​24, 25) Huma jgħinu  lil xulxin fi żmien taʼ niket, u jġibu ruħhom bl-​onestà m’oħrajn. Fil-​fatt, huma japplikaw f’ħajjithom il-​parir tal-​Bibbja biex ‘jagħmlu t-​tajjeb maʼ kulħadd.’—Galatin 6:​10.

11. Għala hu importanti li naċċettaw lil Ġesù Kristu bħala l-​mezz tas-​salvazzjoni li pprovda Alla?

¹¹ Il-​Kristjani veri jaċċettaw lil Ġesù Kristu bħala l-​mezz tas-​salvazzjoni li pprovda Alla. Il-​Bibbja tgħid: “F’ħadd iżjed m’hemm salvazzjoni, għax m’hemmx isem ieħor taħt is-​sema li ngħata lill-​bnedmin u li bih nistgħu niġu salvati.” (Atti 4:​12) Bħalma rajna f’Kapitlu 5, Ġesù ta ħajtu bħala fidwa għall-​bnedmin ubbidjenti. (Mattew 20:28) Barra minn hekk, Ġesù hu s-​Sultan maħtur t’Alla fis-​Saltna tas-​sema li se taħkem fuq l-​art kollha kemm hi. U Alla jitlob minna li nobdu lil Ġesù u napplikaw it-​tagħlim tiegħu jekk irridu li jkollna l-​ħajja taʼ dejjem. Għalhekk il-​Bibbja tgħid: “Min jeżerċita l-​fidi fl-​Iben għandu l-​ħajja taʼ dejjem; min ma jobdix lill-​Iben ma jarax il-​ħajja.”​—Ġwanni 3:​36.

12. X’jinvolvi li ma nkunu ebda parti mid-​dinja?

¹² L-​aduraturi veri m’huma ebda parti mid-​dinja. Meta kien għaddej ġuri quddiem il-​ħakkiem Ruman Pilatu, Ġesù qal: “Is-​saltna tiegħi mhix parti minn din id-​dinja.” (Ġwanni 18:36) Jgħixu f’liema pajjiż jgħixu, is-​segwaċi veri taʼ Ġesù huma sudditi tas-​Saltna tas-​sema tiegħu, u b’hekk huma jżommu newtralità stretta fil-​kwistjonijiet politiċi taʼ din id-​dinja. Huma ma jxaqilbu lejn ebda naħa fil-​konflitti tagħha. Madankollu, l-​aduraturi taʼ Ġeħova ma jindaħlux jekk xi ħadd jagħżel li jingħaqad maʼ xi partit politiku, joħroġ għall-​elezzjoni, jew jivvota. U filwaqt li l-​aduraturi veri t’Alla huma newtrali rigward il-​politika, huma jobdu l-​liġijiet. Għala? Għaliex il-​Kelma t’Alla tikkmandahom biex ‘ikunu sottomessi lejn l-​awtoritajiet superjuri’ governattivi. (Rumani 13:1) Meta jkun hemm konflitt bejn dak li Alla jitlob minnhom u dak li  titlob minnhom is-​sistema politika, l-​aduraturi veri jsegwu l-​eżempju taʼ l-​appostli li qalu: “Jeħtieġ li aħna nobdu lil Alla bħala ħakkiem iktar milli lill-​bnedmin.”​—Atti 5:​29; Marku 12:17.

13. Is-​segwaċi veri taʼ Ġesù kif iqisuha s-​Saltna t’Alla, u għalhekk x’jagħmlu?

¹³ Is-​segwaċi veri taʼ Ġesù jippridkaw li s-​Saltna t’Alla hija  l-​unika tama għall-​bnedmin. Ġesù bassar: “Din l-​aħbar tajba tas-​saltna tiġi pridkata fl-​art abitata kollha bħala xiehda lill-​ġnus kollha; u mbagħad jiġi t-​tmiem.” (Mattew 24:14) Minflok ma jinkuraġġixxu lin-​nies biex jistrieħu fuq il-​mexxejja umani għas-​soluzzjoni tal-​problemi tagħhom, is-​segwaċi veri taʼ Ġesù Kristu jxandru li s-​Saltna t’Alla tas-​sema hi l-​unika tama għall-​bnedmin. (Salm 146:3) Ġesù għallimna nitolbu għal dak il-​gvern perfett meta qal: “Ħa tiġi saltnatek. Ħa jkun li trid int, kif fis-​sema, ukoll fuq l-​art.” (Mattew 6:10) Il-​Kelma t’Alla bassret li din s-​Saltna tas-​sema se “tfarrak u ttemm is-​saltniet l-​oħra kollha [li jeżistu issa], waqt li hi tibqaʼ wieqfa għal dejjem.”​—Danjel 2:​44.

14. Liema grupp reliġjuż taħseb li qed iwettaq il-​ħtiġijiet kollha tal-​qima vera?

¹⁴ Fuq il-​bażi taʼ dak li għadna kif ikkunsidrajna, staqsi lilek innifsek: ‘Liema grupp reliġjuż jibbaża t-​tagħlim kollu tiegħu fuq il-​Bibbja u jxandar l-​isem taʼ Ġeħova? Liema grupp juri l-​imħabba bil-​mod li jogħġob ’l Alla, jeżerċita l-​fidi f’Ġesù, m’hu ebda parti mid-​dinja, u jxandar li s-​Saltna t’Alla hija l-​unika tama vera għall-​bnedmin? Mill-​gruppi reliġjużi kollha fid-​dinja, liema grupp iwettaq dawn il-​ħtiġijiet kollha?’ Il-​fatti juru ċar li huma x-​Xhieda taʼ Ġeħova li qed iwettqu dan.​—Isaija 43:​10-12.

INT X’SE TAGĦMEL?

15. Alla x’jitlob iktar minna minbarra li nemmnu li hu jeżisti?

¹⁵ M’huwiex biżżejjed li sempliċement temmen f’Alla biex togħġbu. Wara kollox, il-​Bibbja tgħid li anki d-​demonji jemmnu li Alla jeżisti. (Ġakbu 2:​19) Iżda, huwa ovvju li dawn mhux qed jagħmlu r-​rieda t’Alla u m’għandhomx l-​approvazzjoni tiegħu. Biex inkunu approvati minn Alla, ma rridux biss nemmnu li hu jeżisti imma  rridu wkoll nagħmlu r-​rieda tiegħu. Barra minn hekk, irridu ninqatgħu mir-​reliġjon falza u nħaddnu l-​qima vera.

16. X’għandna nagħmlu jekk qed nieħdu sehem fir-​reliġjon falza?

¹⁶ L-​appostlu Pawlu wera li m’għandniex nieħdu sehem fil-​qima falza. Hu kiteb: “‘Oħorġu minn ġo nofshom, u infirdu minn magħhom,’ jgħid Ġeħova, ‘u tibqgħux tmissu dak li mhux nadif’; ‘u jien nilqagħkom.’” (2 Korintin 6:​17; Isaija 52:11) Il-​Kristjani veri għalhekk jevitaw kwalunkwe ħaġa li għandha x’taqsam mal-​qima falza.

17, 18. X’inhi “Babilonja l-​Kbira,” u għala huwa urġenti li ‘toħroġ minnha’?

¹⁷ Il-​Bibbja turi li l-​forom kollha tar-​reliġjon falza huma parti minn “Babilonja l-​Kbira.” * (Rivelazzjoni 17:5) Dan l-​isem ifakkarna fil-​belt antika taʼ Babilonja, minfejn bdiet ir-​reliġjon falza wara d-​Dilluvju taʼ żmien Noè. Ħafna mit-​tagħlim u l-​prattiċi li huma komuni llum fir-​reliġjon falza oriġinaw żmien twil ilu f’Babilonja. Per eżempju, il-​Babiloniżi kienu jqimu trinitajiet, jew gruppi taʼ tliet allat. Illum, id-​duttrina ċentrali taʼ ħafna reliġjonijiet hija t-​Trinità. Imma l-​Bibbja tgħallem b’mod ċar li hemm biss Alla veru wieħed, Ġeħova, u li Ġesù Kristu hu Ibnu. (Ġwanni 17:3) Il-​Babiloniżi kienu jemmnu wkoll li l-​bnedmin għandhom ruħ immortali li tibqaʼ ħajja wara l-​mewt u li tistaʼ tbati f’post taʼ turment. Illum, it-​twemmin fir-​ruħ jew spirtu immortali li jistaʼ jbati fin-​nar taʼ l-​infern jiġi mgħallem fil-​biċċa l-​kbira mir-​reliġjonijiet.

¹⁸ Ladarba l-​qima taʼ Babilonja tal-​qedem infirxet maʼ l-​art kollha, Babilonja l-​Kbira taʼ żmienna tistaʼ bix-​xieraq tiġi identifikata bħala l-​imperu dinji taʼ reliġjon falza. U Alla bassar li l-​qerda taʼ dan l-​imperu taʼ reliġjon falza se tiġi ħabta u sabta. (Rivelazzjoni 18:8) Qed tinduna għala huwa vitali li int tinqataʼ minn kull parti taʼ Babilonja  l-​Kbira? Alla Ġeħova jridek ‘toħroġ minnha’ malajr waqt li għad baqaʼ ż-​żmien.​—Rivelazzjoni 18:4.

19. Int x’se tikseb jekk taqdi lil Ġeħova?

¹⁹ Minħabba d-​deċiżjoni tiegħek biex ma tibqax tipprattika r-​reliġjon falza, xi wħud għandhom mnejn iwarrbuk. Madankollu, billi taqdi lil Ġeħova mal-​poplu tiegħu, int se tikseb ferm iktar milli qatt tistaʼ titlef. Bħall-​ewwel dixxipli taʼ Ġesù li ħallew affarijiet oħra biex isegwuh, int maż-​żmien se tikseb ħafna aħwa rġiel u nisa. Se ssir parti minn familja kbira taʼ Kristjani veri madwar id-​dinja, li juruk imħabba ġenwina. U se jkollok it-​tama taʼ l-​għaġeb taʼ ħajja taʼ dejjem “fis-​sistema li ġejja.” (Marku 10:​28-30) Forsi maż-​żmien, dawk li jkunu warrbuk minħabba t-​twemmin tiegħek jaraw x’tgħallem il-​Bibbja u jsiru aduraturi taʼ Ġeħova.

20. X’hemm jistenniehom fil-​futur lil dawk li jipprattikaw ir-​reliġjon vera?

²⁰ Il-​Bibbja tgħallem li Alla dalwaqt se jġib it-​tmiem fuq din is-​sistema mill-​agħar u minflokha se jagħmel dinja ġdida mimlija ġustizzja taħt il-​ħakma tas-​Saltna tiegħu. (2 Pietru 3:​9, 13) X’dinja meraviljuża se tkun din! U f’din is-​sistema ġdida mimlija ġustizzja, se jkun hemm reliġjon waħda biss, u forma waħda vera taʼ qima. Ma jkunx għaqli li int tieħu l-​passi meħtieġa biex tissieħeb maʼ l-​aduraturi veri issa stess?

[Nota taʼ taħt]

DAK LI TGĦALLEM IL-​BIBBJA

▪ Reliġjon vera waħda biss hemm.​—Mattew 7:13, 14.

▪ Ir-​reliġjon vera tintgħaraf mit-​tagħlim u l-​prattiċi tagħha.​—Mattew 7:​16, 17.

▪ Ix-​Xhieda taʼ Ġeħova jipprattikaw il-​qima li hi approvata minn Alla.​—Isaija 43:10.

[Mistoqsijiet taʼ Studju]

 [Kaxxa/Stampa f’paġna 147]

DAWK LI JQIMU LILL-​ALLA VERU

▪ jibbażaw it-​tagħlim tagħhom fuq il-​Bibbja

▪ iqimu biss lil Ġeħova u jxandru ismu

▪ juru mħabba ġenwina lejn xulxin

▪ jaċċettaw lil Ġesù bħala l-​mezz tas-​salvazzjoni li pprovda Alla

▪ m’huma ebda parti mid-​dinja

▪ jippridkaw li s-​Saltna t’Alla hi l-​unika tama għall-​bnedmin

[Stampa f’paġna 150]

Billi taqdi lil Ġeħova mal-​poplu tiegħu, int se tikseb ferm iktar milli qatt tistaʼ titlef