1. ¿Toni tikseliskej komo tikueyichiuaj Dios kemej yejuatsin kineki?

JIOVA DIOS techteltasojta. Uan kemej kineki maj kuali tinemikan, techmaka tajtolmej tein ika timoojtokaltiskej. Komo tikueyichiuaj kemej yejuatsin kineki, tiyolpakiskej uan tiktayoualuiskej miak kuejmolmej itech tonemilis. Uan no, tikpiaskej itatiochiualis uan inepaleuil (Isaías 48:17). Sayoj ke moajsij tel miak taneltokalismej. Maski nochin kijtouaj tamachtiaj tein kijtoua Dios, tataman kimelauaj akoni yejuatsin uan tein kichia maj tikchiuakan.

2. ¿Keniuj uelis tikonmatis kemej moneki tikonueyichiuas Dios kemej yejuatsin kineki, uan toni neskayot uelis tiktaliskej?

² ¿Keniuj uelis tikonmatis kemej moneki tikonueyichiuas Jiova kemej yejuatsin kineki? Amo onkak keyej tionmomachtis tein kineltokaj itech taneltokalismej uan tikonitas ox mouika tein kineltokaj oso tatamamej. Sayoj moneki tionmomachtis tein yekmelauj tamachtia Biblia keniuj moneki yeski taueyichiualis tein melauak. Maj tiktalikan se neskayot. Kemej tejuatsin tikonmati, itech miak uejueyi altepemej, tel onkak tomin tein amo kualtia. Axkan, xionmonemili ke mitsoniluiaj xikonijita amatomin tein amo kualtia uan tein kualtia. ¿Keniuj  tikonmatis katiyejua kualtia uan katiyejua amo? ¿Moneki tikonixmatis sejse toni kichiua maj amo kualtia? ¿Amo okachi kuali yeskia xikonixmati amatomin tein kualtia? Keman tikonyekixmatisya, uelis tikonixmatis katiyejuan tein amo kualtiaj. No ijkon, ijsiujka se kiixmati katiyejuan taneltokalismej tein amo melaujkej, keman timomachtiaj keniuj moneki yeski taneltokalis tein melauak.

3. Kemej kijtoua Biblia, ¿toni moneki tikchiuaskej komo tiknekij maj Dios techseli?

³ Motelneki maj tikueyichiuakan Jiova kemej yejuatsin kineki. Miakej kinemiliaj ke Dios kiyolpaktia nochin taneltokalismej, sayoj ke amo yejua tein tamachtia Biblia. Nion no sayoj moneki tikijtoskej ke titaneltokanij, ta Biblia kijtoua: “Xiktakamatinemikan nochi ten namechnextilia in Tajtoltsin de Dios; uan amo sayo xikakikan. Porin komo sayo nankikakij [...] uan amo nankitakamatinemij, ijkuakon nanmokajkayauaj san namejuan”. Yejua ika, Dios techselis sayoj komo timomachtiaj tein techtajtania uan tikchiuaj. Akin amo kichiuaj itanejnekilis Dios, Jesús kintokaytij ‘tachiuanij ika ten amo kuali’ (Santiago 1:22; Mateo 7:23). Kemej tomin tein amo kualtia, taneltokalis tein amo melauak, amo kipia ipatiuj. Uan tein okachi amo kuali, porin kiualkui miak kuejmolmej.

4. ¿Toni kiixnextia ome ojti tein Jesús ika tajtoj, uan kani teojtokaltiaj?

⁴ Jiova kichiua maj nochin uelikan kipiakan nemilis nochipaya. Sayoj ke, uelis tinemiskej nochipaya itech Xochital, komo tikueyichiuaj uan timoojtokaltiaj kemej yejuatsin kineki. Semi tetayokoltij tikijtoskej ke miakej amo kinekij kichiuaskej. Yejua ika Jesús kijtoj: “Xikalakikan itech ne ojtsin de Dios kampa ne kalteno amo patauak. Porin ne kalten uan ne ueyi ojti semi patauke kampa yajtokke in tagayot para ajsitiue tech ne ixpoliuilis, uan miakke  tagayot youe tech ne patauak ojti [...]. Uan amo patauak ne kalteno uan semi pitsauak ne ojti kampa yajtokke in taneltokani para ajsitiue tech ne yek nemilis. Uan amo miakke moajsitiue tech nijin ojti” (Mateo 7:13, 14). Kemej tikitaj, taneltokalis tein melauak techojtokaltia itech nemilis, uan tein amo melauak itech ixpoliuilis. Axkan, Jiova amo kineki maj nion se ixpoliui, yejua ika kinkaua maj nochin uelikan kiixmatikan (2 Pedro 3:9). Tein melauj, kemej tikueyichiuaskej Dios, uelis techuikas itech nemilis oso itech mikilis.

5. ¿Keniuj uelis tikmatiskej akonimej kiueyichiuaj Dios kemej yejuatsin kineki?

⁵ ¿Keniuj uelis tikajsiskej ‘ojti kampa tiajsitiuij itech ne yeknemilis’? Jesús kijtoj ke amo ouij tikmatiskiaj akonimej kiueyichiuaj Dios kemej yejuatsin kineki, komo tikinitaj keniuj monejnemiltiaj. Kijtoj ijkon: “Nankinyekixmatiske [...] ika ne tachiualis ten yejuan kichiutinemij”, ta “nochi in kuouit ten kuali, yejua ne kitemaka kuali takilome” (Mateo 7:16, 17). Kemaj, akin kiueyichiuaj Dios kemej yejuatsin kineki, moixmatij ika tein kineltokaj uan tein kichiuaj. Maski no tajtakouanij uan no mopolouaj, nochin mochikauaj kichiuaskej itanejnekilis Dios. Maj tikitakan chikuasen taman tein techpaleuis maj tikinixmatikan.

6, 7. ¿Keniuj kiitaj Biblia itekitikauan Dios, uan toni neskayot kikauak Jesús ika nejon?

⁶ Itekitikauan Dios kikixtiaj itech Biblia tein tamachtiaj. Yejua iTajtol Dios kijtoua: “Nochi in Tajkuilolamatsitsin nochi yejuan Dios kichiuak ika ichikaualisuan. Ika ya nojon [...] uelis se kuitinemis para ika se tamachtijtinemis uan no para ika se kintaneltoktijtinemis in tagayot  ma kikautiyakan nintajtakoluan. Uan [...] ika kinyolmelautiyas uan para ika se kinmachtijtiyas in taneltokani de keniu chipaukanemiske. Uan [...] in tekitike de Dios mochiuaki [...] kuali kuatamatok, uan ijkon uelis kichiutiyas miak tataman den kuali tekit” (2 Timoteo 3:16, 17). Tatitanil Pablo kintajkuilouilij ikniuan akin kichiuayaj kemej Cristo ijkon: “Kuak namejuan nankiselijke ya in Tajtoltsin de Dios tenika tamechnojnotske, [...] nankiselijke totajtoluan amo keme kuak tagayot tamechnojnotstinemiaj san. Ta, [...] keme kuak Dios namechnojnotstok” (1 Tesalonicenses 2:13). Yejua ika, akin kiueyichiuaj Dios kemej yejuatsin kineki, tein tamachtiaj uan tein kichiuaj amo kikixtiaj itech uejkauj talnamikilismej nion no itech inintanemililuan takamej. Ta, kikixtiaj itech Biblia, iTajtol Dios tein kipia itanemililuan.

⁷ Jesucristo kikauak neskayot. Yejua kikixtiaya itech iTajtol Dios tein tamachtiaya. Itech netataujtil tein kichiuak iuan Dios akin nemi iluikak, kijtoj: “Motajtolis yejua ne yek melau tajtolis” (Juan 17:17). Jesús kineltokaya tein kijtoua iTajtol Dios, uan nochi ixnesia itech Biblia tein tamachtiaya. Semi kijtouaya: “Kijtoa in Tajkuilolamatsin de Dios”, uan ompa, kijtouaya se texto itech Biblia (Mateo 4:4, 7, 10). No ijkon axkan, itekitikauan Dios amo tamachtiaj inintanemililuan, ta kineltokaj ke Biblia yejua iTajtol Dios uan senkis itech moixyekanaj.

8. ¿Toni iuan mouika keman kiueyichiuaj Jiova?

⁸ Akin moajsij itech taneltokalis tein melauak, sayoj kiueyichiuaj Jiova uan kiteixmatiltiaj itokay. Jesús tamachtij: “Xikmouistiliti in Totekotsin to Dios uan sayo Yejuatsin xikmouiskatekitilijtinemi” (Mateo 4:10). Kemaj, itekitikauan Dios sayoj kiueyichiuaj Jiova, uan amo okseok. Tein melauj, yejuan kiueyichiuaj Jiova keman kiteixmatiltiaj itokay Dios melauak uan ikualneskayouan.  Salmo 83:18 kijtoua: “Tejua, akin motokay Jiova, sayoj tejua okachi tiUeyichiujkej itech nochi taltikpak”. Kitojtokaj neskayot tein kikauak Jesús ijkuak kinpaleuiaj oksekin maj kiixmatikan Dios. Yejua kiluij Dios nejin tajtolmej: “Nikinixmatiltijya motokay takamej tein tinechinmakak akin kiskej itech taltikpak” (Juan 17:6, TNM). No ijkon axkan, akin yekmelauj itekitikauan Dios, kiteixmatiltiaj itokay, Jiova, itanejnekilisuan uan ikualneskayouan.

9, 10. ¿Keniuj motasojtaj akin yekmelauj kichiuaj kemej Cristo?

⁹ Itekitikauan Dios motasojtaj se iuan okse, uan amo sayoj yejuan. Jesús kijtoj: “Komo namejuan nanmoyoltasojtatinemij, ijkuakon nochi in taltikpakuani kajsikamatiske ke melau nannomomachtijkauan” (Juan 13:35). Ijkon motasojtayaj akin yekinika kichiuayaj kemej Cristo. Netasojtalis tein mopialiaj itekitikauan Dios, kinpaleuia maj amo kinchikoitakan akin chijchipaujkej oso maseualmej, akin kipiaj tomin oso amo uan akin seko kayomej, uan kinsentilia kemej yekmelauj iknimej (xikonixtajtolti Colosenses 3:14). Akin moajsij itech taneltokalis tein amo melauak, amo ijkon motasojtaj. Komo motasojtaskiaj, amo momijmiktiskiaj sayoj porin chijchipaujkej, maseualmej oso seko kayomej. Akin yekmelauj kichiuaj kemej Cristo, amo kikuij tepos tein ika kinmiktiskej ininikniuan itech taneltokalis oso okse aksa. Biblia tamachtia: “Moixmatij nekes den melau ikonetsitsin de Dios ijkuin: Nochi nekes ten pouij iuan Dios, [...] kitakamatinemij ten Dios kimonekiltia uan kintasojtatinemij nintasojikniuan. Uan no moixmatij ne den ikoneuan den amokuali Satanás porin yejuan nojonkes amo ijkon kichiutinemij. [...] Ma timosepantasojtakan se uan okse. Uan ma amo xikchiuakan keme ne tagat Caín kichiuak. Yejua pouiaya iuan in amokuali  Satanás; ika ya nojon kimiktij iikniu” (1 Juan 3:10-12; 4:20, 21).

¹⁰ Tein melauj netasojtalis kinpaleuia maj amo temiktikan. Uan amo sayoj yejua, ta kinolinia maj kichiuakan okseki taman. Akin yekmelauj kichiuaj kemej Cristo, kikuij inintonal, chikaualis uan tein kipiaj, uan ika mopaleuiaj uan moyolchikauaj se iuan okse (Hebreos 10:24, 25). Mopaleuiaj itech ouijkayomej uan mouikaj melaujkej iniuan oksekin. Kitakamatij tayolmajxitilis tein kitemaka Biblia kampa kijtoua: “Ma tikinpaleuijtiyakan nochi tagayot” (Gálatas 6:10).

11. ¿Keyej motelneki maj tikselikan Jesús kemej akin Dios kikui tein ika techmakixtis?

¹¹ Akin yekmelauj kichiuaj kemej Cristo, kiseliaj Jesucristo kemej akin Dios kikui akin ika kinmakixtis. Biblia tamachtia: “Amo aken ok uelis temakixtis. [...] Porin Totajtsin Dios amo techmaka ok okse tokaytsin tenika se tagat nikan taltikpak uelis momakixtis” (Hechos 4:12). Kemej tikitakej itech capítulo 5, Jesús kitemakak inemilis uan ika nejon uelis momakixtiskej akin tatakamatij (Mateo 20:28). Uan no, Jiova kimakak tanauatil kemej Tekiuaj itech iluikak Tekiuajyot tein taixyekanas itech nochi taltikpak. Yejua ika, Dios kichia maj tiktakamatikan Jesús uan maj tiktojtokakan itamachtilisuan. Sayoj ijkon uelis tinemiskej nochipaya. Yejua ika Biblia kijtoua: “Ten takuautamatiske iuan ne Ikonetsin Dios, [...] kipiaske ne yek nemilis nachipa. Pero nochi ne naken amo [...] tatakamatiske iuan Ikonetsin Dios, [...] amo kipiaske ne yek nemilis” (Juan 3:36).

12. ¿Toni kijtosneki maj amo se monejnemilti kemej taltikpakneminij?

¹² Akin yekmelauj itekitikauan Dios amo monejnemiltiaj kemej taltikpakneminij. Keman Jesús moajsia iixpan  tekiuaj romano Pilato akin kiixkomakatoya, kiluij: “Notekiuajyo amo poui nikan taltikpak” (Juan 18:36, TNM). Kampa yeski nemiskej, akin yekmelauj imomachtijkauan Cristo, mokauaj maj kinixyekana iluikak Tekiuajyot. Yejua ika amo pouij itech taltikpak tekiuajyot nion no itech kuejmolmej tein ompa kipiaj. Axkan, komo oksekin kinekij pouiskej itech se partido político, kinekij tekiuajtiskej oso tekiuajixtaliskej, yejuan amo kinpaleuiaj maj kiixpejpenakan akoni kitojtokaskej. Maski amo mokalakiaj itech tekiuajyot, kitakamatij tanauatilmej. ¿Keyej? Porin iTajtol Dios kinnauatia akin kichiuaj kemej Cristo, maj ‘kintakamatiyakan nochi nojon tekiuanij’ (Romanos 13:1). Sayoj ke keman tekiuanij tajtanij maj kichiuakan teisa tein kitapanauilia itanauatiluan Dios, kitojtokaj neskayot tein kikaujkej tatitanilmej keman kijtojkej: “Semi moneki ke ma tiktakamatikan Totajtsin Dios uan ma amo achto tikintakamatikan in tagayot” (Hechos 5:29; Marcos 12:17).

13. Akin yekmelauj imomachtijkauan Jesús, ¿toni kineltokaj ke kichiuas iTekiuajyo Dios, uan ika nejon, toni kinolinia maj kichiuakan?

¹³ Akin yekmelauj imomachtijkauan Jesús, kitetapouiaj ke sayoj iTekiuajyo Dios kiualkuis tein kuali. Jesús kijtojka: “Uan nejin kuali tanauatilmej ika tekiuajyot motetapouis semanauak taltikpak kampa nemij uan ijkon nochin kimatiskej; uan ompa ejkos tamilis” (Mateo 24:14, TNM). Akin yekmelauj itatojtokakauan Jesucristo, amo tayolchikauaj maj takuaujtamatikan ke taltikpak tekiuanij kimelauaskej kuejmolmej. Ta kitetapouiaj ke sayoj iTekiuajyo Dios tein moajsi iluikak, kiualkuis tein kuali (Salmo 146:3). Tein melauj, Jesús technextilij maj titajtanikan itech tonetataujtiluan, maj ejko nejon tekiuajyot tein okachi kuali keman kijtoj: “Maj uiki motekiuajyo. Maj mochiua motanejnekilis, kemej iluikak, no ijkon nikan  taltikpak” (Mateo 6:10, TNM). ITajtol Dios kijtoua ke nejin iluikak Tekiuajyot ‘peuak tayekantinemi uan kinixpatkayotij nochi in tayekananij de nikan taltikpak. Ika ya nojon Yejuatsin tayekantinemis sen nochipa uan sen nochipa’ (Apocalipsis 11:15).

14. Kemej tejuatsin tikonnemilia, ¿akonimej kichiuaj tachiualismej tein kinextia ke yejuaya taneltokalis tein melauak?

¹⁴ Ika nochi tein tikitakej achto, xionmotajtani: “¿Katiyejua  taneltokalis kikixtia itech Biblia nochi tein tamachtia, uan kiteixmatiltia ke itokay Dios yejua Jiova? ¿Akonimej mopialiaj netasojtalis kemej iknimej, kineltokaj Jesús, amo monejnemiltiaj kemej taltikpakneminij, uan kiteixmatiltiaj ke sayoj iTekiuajyo Dios kiualkuis tein kuali? Itech nochi taneltokalismej tein moajsij itech taltikpak, ¿katiyejua kichiua nejin tachiualismej?”. Ika inintachiualis, moyekita ke yejuan itaixpantijkauan Jiova (xikonixtajtolti Isaías 43:10-12).

15. Komo tikneltokajya ke Dios nemi, ¿toniok moneki tikchiuaskej?

¹⁵ Amo sayoj moneki tikneltokaskej ke Dios nemi uan ika nejon tikyolpaktiskej. Ta Biblia kijtoua ke amokuali ejekamej no kineltokaj ke Dios nemi (Santiago 2:19). Sayoj ke, moyekita ke amo kichiuaj itanejnekilis Jiova nion no kipiaj ipoujkaitalis. Yejua ika amo sayoj moneki maj tikneltokakan ke Dios nemi uan ika nejon tikyolpaktiskej, ta no maj tikchiuakan itanejnekilis. Uan no, moneki tikisaskej itech taneltokalis tein amo melauak uan tiyaskej itech taneltokalis tein melauak.

16. ¿Toni moneki tikchiuaskej uan ijkon amo tipoujtoskejok itech taneltokalis tein amo melauak?

¹⁶ Tatitanil Pablo kinextij maj amo tipouikan itech taneltokalis tein amo melauak. Kijkuiloj: “Xikisakan uan ximosekokaua[ka]n [...]. Uan amo ximokalakijtinemikan ok tech ninpitsotiknemilis. Uan komo ijkon nankichiutiyoue, ijkuakon Nejuatsin namechchiua ke nannoaxkauan ya” (2 Corintios 6:17; Isaías 52:11). Yejua ika, akin yekmelauj kichiuaj kemej Cristo, kikauaj nochi tein kipia ke kiitas ika taneltokalis tein amo melauak.

17, 18. ¿Toni ‘Ueyi Babilonia’, uan keyej moneki maj niman ‘tikisakan ompa’?

¹⁷ Biblia tamachtia ke nochin taneltokalismej tein  amo melaujkej pouij itech ‘Ueyi Babilonia’ (Apocalipsis 17:5). * Nejin tokayit techelnamiktia uejkauj altepet Babilonia, kampa peuak taneltokalis tein amo melauak satepan keman panok Tetsaujkakiouit itech itonaluan Noé. Miak tamachtilismej uan tachiualismej, tein axkan motelitaj itech taneltokalismej tein amo melaujkej, ualeujkej itech ne uejkauj Babilonia. ¿Kemej toni? Akin ompa nemiaj kinueyichiuayaj tiotsitsin ejeyi, uan itech totonaluan, tein okachi kineltokaj itech miak taneltokalismej no yejua Trinidad. Sayoj ke Biblia nion tepitsin yejua tamachtia, ta kiyeknextia ke moajsi sayoj se Dios akin melauak, Jiova, uan Jesucristo yejua teKoneuj (Juan 17:3). Akin nemiaj Babilonia no kineltokayaj ke taltikpaknenkej kipia se alma tein amo miki, uan kisentoka nemi satepan keman momikilia inakayo, uan uelis chichinauitiuj kampa onkak tit. Axkan tel miak taneltokalismej tamachtiaj ke tikpiaj se alma oso espíritu tein amo miki, tein uelis tajyouitiuj miktan.

¹⁸ Kemej taueyichiuayaj akin nemiaj ne uejkauj Babilonia, momoyauak semanauak taltikpak itech nejin tonalmej. Yejua ika, semi kinamiki maj tikijtokan ke Ueyi Babilonia tein axkan moajsi, kiixnextia nochin taneltokalismej tein amo melaujkej. Dios kijtoua ke nochi nejon, ejkos ininixpoliuilis keman nion no momattos. ¿Tikonajsikamati tejuatsin keyej motelneki maj senkis tikisakan itech Ueyi Babilonia? Jiova Dios mitsonnejnekilia niman ‘xionkisa’ axkan ke ueliok (xikonixtajtolti Apocalipsis 18:4, 8).

19. ¿Toni tikonajsis tejuatsin komo tikontekitilia Jiova?

¹⁹ Keman tikonnemilis tikonkauas taneltokalis tein amo melauak, sekin xa mouejkatiliskej mouan. Sayoj  ke, ijkuak tikontekitilis Jiova iniuan Itekitikauan, okachi miak tikonajsis ke tein tikonpolos. Ijkon kemej yekinika imomachtijkauan Jesús, akin kikaujkej miak taman uan ijkon kitojtokakej, tejuatsin tikoninajsis moikniuan akin kichiuaj kemej Cristo. Tein melauj, tionpouis kemej yeskia itech se ueyi kalyetouanij akin moajsij semanauak taltikpak, oso se oloch tokniuan akin moajsij millones, uan yejuan mitsonnextiliskej yekmelauj netasojtalis. Uan tikonchias se nemilis nochipaya tein tel kualtsin “tech ne tonal ten uitsa ok” (xikonixtajtolti Marcos 10:28-30). Uan no, akin amo mitsonnotsaskejok porin no taman tiontaneltoka, satepan xa no momachtiskej tein tamachtia Biblia uan mochiuaskej itekitikauan Jiova.

20. ¿Toni kichiaj akin kiueyichiuaj Dios kemej yejuatsin kineki?

²⁰ Biblia tamachtia ke Dios amo uejkaua kinixpolos akin amo yolkualmej, uan mokauaskej sayoj akin yolkualmej uan kinixyekanas iTekiuajyo Dios (2 Pedro 3:9, 13). ¡Tel kualtsin yeski! Uan itech nejon tonalmej sayoj moajsis se taneltokalis, se taueyichiualis tein melauak. ¿Amo tikonnemilia ke moneki tikonchiuas nochi tein moneki, uan ijkon axkanya uelis tionmosentilis iniuan yekmelauj itekitikauan Dios?