1. Con nos lo beneficia si nos ta adora Dios den e manera corecto?

YEHOVA DIOS ta profundamente interesa den nos y kier pa nos beneficia di su guia amoroso. Si nos ta ador’e den e manera corecto, nos lo ta felis y nos lo evita hopi problema den bida. Ademas nos lo tin su bendicion y su yudansa. (Isaias 48:17) Sinembargo, tin cientos di religion cu ta pretende di ta siña e berdad tocante Dios. Pero nan ta diferencia masha hopi den nan siñansanan tocante ken Dios ta y kico e ta spera di nos.

2. Con nos por haya sa cua ta e manera corecto pa adora Yehova, y ki ehempel por yuda nos compronde esaki?

² Con bo por sa cua ta e manera corecto pa adora Yehova? Bo no tin nodi studia y compara siñansanan di tur e tantisimo religionnan cu tin. Solamente bo tin cu haya sa ta kico Bijbel ta siña realmente tocante adoracion berdadero. Un ehempel: Den hopi pais, tin problema cu placa falso. Si bo haya un trabou di identifica e placa falso ei, con lo bo hacie? Lo bo siña for di cabes con tur tipo di placa falso ta? No. Lo ta mas sabi pa studia e placa autentico. Unabes bo haya sa con e placa autentico ta, lo bo por reconoce placa falso. Asina tambe, unabes nos haya sa con pa identifica e religion autentico of berdadero, nos por reconoce e religionnan cu ta falso.

3. Segun Hesus, kico nos tin cu haci si nos kier Dios su aprobacion?

 ³ Ta importante pa nos adora Yehova na e manera cu e ta aproba. Hopi hende ta kere cu tur religion ta agrada Dios, pero Bijbel no ta siña esei. Anto djis declara cu bo ta un cristian tampoco no ta basta. Hesus a bisa: “No ta tur hende cu bisa mi: ‘Señor, Señor’, lo drenta e reino di shelo; ma esun cu haci e boluntad di mi Tata cu ta den shelo.” Pesei, pa nos haya Dios su aprobacion, nos tin cu siña kico Dios ta rekeri di nos y hacie. Hesus a yama esnan cu no ta haci e boluntad di Dios hende cu ta “haci inikidad” of maldad. (Mateo 7:21-23) Mescos cu placa falso, religion falso no tin ningun balor. Piyo ainda tal tipo di religion de echo ta perhudicial.

4. Kico e palabranan di Hesus tocante e dos camindanan ta nifica, y na unda cada caminda ta hiba?

⁴ Yehova ta duna tur hende riba tera e oportunidad di haya bida eterno. Pero pa nos haya bida eterno den Paradijs, nos tin cu adora Dios corectamente y biba awor na un manera cu ta aceptabel p’e. Lamentablemente, hopi hende ta nenga di haci esaki. Ta pesei Hesus a bisa: “Drenta door di e porta smal, pasobra hancho ta e porta y espacioso e caminda cu ta hiba na destruccion, y hopi ta esnan cu ta drenta door di dje. Pasobra chikito ta e porta y smal e caminda cu ta hiba na bida, y poco ta esnan cu ta hay’e.” (Mateo 7:13, 14) Religion berdadero ta hiba na bida eterno. Religion falso ta hiba na destruccion. Yehova no kier pa ningun hende bai destrui, y ta pesei e ta duna hende na tur parti e oportunidad di siña tocante dje. (2 Pedro 3:9) Pesei en realidad, e manera cu nos ta adora Dios ta nifica sea bida of morto pa nos.

5. Con nos por reconoce esnan cu ta practica e religion berdadero?

⁵ Con bo por haya “e caminda cu ta hiba na bida”? Hesus a bisa cu e religion berdadero lo ta bisto na e manera  di biba di e hendenan cu ta practic’e. E di: “Na nan fruta boso lo conoce nan. . . . Tur bon palo ta duna bon fruta.” (Mateo 7:16, 17) Cu otro palabra, lo reconoce hende cu ta practica e religion berdadero na nan creencianan y nan conducta. Aunke adoradonan berdadero no ta perfecto y nan ta comete eror, como grupo nan ta purba haci e boluntad di Dios. Laga nos considera seis caracteristica cu ta identifica esnan cu ta practica e religion berdadero.

6, 7. Con sirbidonan di Dios ta mira Bijbel, y con Hesus a pone un bon ehempel den esaki?

⁶ Sirbidonan di Dios ta basa nan siñansanan riba Bijbel. Bijbel mes ta bisa: “Tur Scritura ta inspira pa Dios y ta util pa siñansa, pa reprendemento, pa coreccion, pa educa den husticia, pa e hende di Dios por ta perfecto, ekipa pa tur bon obra.” (2 Timoteo 3:16, 17) Apostel Pablo a skirbi na su compañeronan cristian: “Ora boso a ricibi for di nos e palabra di Dios su mensahe, boso a acept’e no como palabra di hende, ma pa loke e ta berdaderamente, e palabra di Dios.” (1 Tesalonicensenan 2:13) Pues anto, creencia- y practicanan di e religion berdadero no ta basa riba punto di bista ni tradicion humano. Nan ta basa riba Dios su Palabra inspira, Bijbel.

⁷ Hesucristo a pone e ehempel corecto door di basa su siñansanan riba e Palabra di Dios. Den oracion na su Tata celestial, el a bisa: “Bo palabra ta berdad.” (Huan 17:17) Hesus a kere den e Palabra di Dios, y tur loke el a siña tawata cuadra cu e Scritura. Hopi biaha Hesus a bisa: “Ta para skirbi.” (Mateo 4:4, 7, 10) Anto caba Hesus tawata cita un texto di Bijbel. Di igual manera, Dios su pueblo djawe no ta siña hende nan propio ideanan. Nan ta kere cu Bijbel ta e Palabra di Dios, y nan ta basa nan siñansanan firmemente riba loke e ta bisa.

8. Kico adora Yehova ta encera?

⁸ Hende cu ta practica e religion berdadero ta adora Yehova  so y ta haci su nomber conoci. Hesus a declara: “Adora SEÑOR [“Yehova”, NW] bo Dios, y sirbi e so.” (Mateo 4:10) Pues, sirbidonan di Dios no ta adora ningun otro cu no ta Yehova. E adoracion aki ta encera cu nan ta laga hende sa con e nomber di e Dios berdadero ta y ki sorto di Dios e ta. Salmo 83:18 ta declara: “Abo so, kende su nomber ta SEÑOR [“Yehova”, NW], ta e Haltisimo riba henter tera.” Hesus tawata un ehempel den yuda hende siña conoce Dios, manera el a bisa den oracion: “Mi a manifesta bo nomber na e hendenan cu bo a duna mi for di mundo.” (Huan 17:6) Asina tambe, adoradonan berdadero djawe ta siña hende tocante Dios su nomber, su proposito y su cualidadnan.

9, 10. Den ki maneranan cristiannan berdadero ta demostra amor pa otro?

⁹ Dios su pueblo ta demostra amor sinsero y sin egoismo na otro. Hesus a bisa: “Na esaki tur hende lo sa cu boso ta mi disipel, si boso tin amor un pa otro.” (Huan 13:35) E cristiannan di prome tawatin e amor ei pa otro. E tipo di amor cu Dios ta instrui nos pa nos tin ta supera bareranan racial, social y nacional, anto e ta hala hende hunto den un laso inkebrantabel di berdadero hermandad. (Colosensenan 3:14) Miembronan di religion falso no tin un hermandad amoroso asina. Con nos por sa esei? Pasobra nan ta mata otro debi na diferencianan nacional of etnico. Cristiannan berdadero no ta coi arma pa mata nan rumannan cristian ni ningun otro hende. Bijbel ta declara: “Na esaki e yiunan di Dios y e yiunan di Diabel ta conoci: esun cu no ta practica husticia no ta di Dios, ni esun cu no ta stima su ruman. . . . Nos mester stima otro; no manera Cain, kende tawata di e malbado, y a mata su ruman.”—1 Huan 3:10-12; 4:20, 21.

¹⁰ Claro cu amor sinsero ta nifica mas cu keda sin mata otro hende. Cristiannan berdadero boluntariamente ta uza  nan tempo, energia y recursonan pa yuda otro y anima otro. (Hebreonan 10:24, 25) Nan ta yuda otro den tempo di angustia, y nan ta trata otro hende cu honestidad. De echo, nan ta aplica den nan bida e conseho di Bijbel pa “haci bon na tur hende.”—Galationan 6:10.

11. Dicon ta importante pa nos acepta Hesucristo como esun cu Dios ta uza pa salba nos?

¹¹ Cristiannan berdadero ta acepta Hesucristo como esun cu Dios ta uza pa salba nos. Bijbel ta bisa: “No tin salbacion den ningun otro; pasobra no tin bou di shelo ningun otro nomber cu a wordo duna na hende, pa medio di cual nos mester wordo salba.” (Echonan 4:12) Manera nos a mira den Capitulo 5, Hesus a duna su bida como un rescate pa humanidad obediente. (Mateo 20:28) Ademas, Hesus ta Dios su Rei nombra den e Reino celestial cu lo goberna henter e tera. Y un rekisito di Dios ta pa nos obedece Hesus y aplica su siñansanan si nos kier haya bida eterno. Ta pesei Bijbel ta declara: “Esun cu kere den e Yiu tin bida eterno; ma esun cu no obedece e Yiu lo no mira bida.”—Huan 3:36.

12. Kico no ser parti di mundo ta encera?

¹² Adoradonan berdadero no ta parti di mundo. Den Hesus su huicio dilanti di e gobernante Romano Pilato, Hesus a bisa: “Mi reino no ta di e mundo aki.” (Huan 18:36) Sin importa den cua pais Hesus su berdadero siguidonan ta biba, nan ta subditonan di Hesus su Reino celestial y pues nan ta keda strictamente neutral den e asuntonan politico di mundo. Nan no ta tuma parti den e conflictonan di mundo. Sinembargo, Yehova su adoradonan no ta interferi cu loke otro hende ta scohe pa haci den asunto di join un partido politico, presenta nan mes como candidato politico of votamento. Y aunke Dios su adoradonan berdadero ta neutral den politica, nan ta cumpli cu lei. Dicon? Pasobra e Palabra di Dios ta manda nan “somete nan mes na e autoridadnan cu ta goberna.” (Romanonan 13:1) Ora  tin un conflicto entre loke Dios ta rekeri y loke e sistema politico ta rekeri, adoradonan berdadero ta sigui e ehempel di e apostelnan, kendenan a bisa: “Nos mester obedece Dios mas cu hende.”—Echonan 5:29; Marco 12:17.

13. Con Hesus su berdadero siguidonan ta mira e Reino di Dios, y pesei ki accion nan ta tuma?

¹³ Hesus su berdadero siguidonan ta predica cu e Reino di Dios ta e unico speransa pa humanidad. Hesus a predeci:  “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.” (Mateo 24:14) En bes di anima hende pa depende riba gobernantenan humano pa soluciona nan problemanan, berdadero siguidonan di Hesucristo ta proclama Dios su Reino celestial como e unico speransa pa humanidad. (Salmo 146:3) Hesus a siña nos pidi den oracion pa e gobierno perfecto ei ora el a bisa: “Cu bo reino bin. Cu bo boluntad sosode na tera mescos cu den shelo.” (Mateo 6:10) E Palabra di Dios a predeci cu e Reino celestial aki “lo garna y pone un fin na tur e reinonan aki [cu ta existi awor], ma e mes lo dura pa semper.”—Daniel 2:44.

14. Cua grupo religioso abo ta kere ta cumpli cu e rekisitonan di adoracion berdadero?

¹⁴ A base di loke nos a caba di considera, puntra bo mes: ‘Cua grupo religioso ta basa tur su siñansanan riba Bijbel y ta haci Yehova su nomber conoci? Cua grupo ta expresa amor manera cu Yehova ta siña nos, ta eherce fe den Hesus, no ta parti di mundo y ta proclama cu e Reino di Dios ta e unico speransa berdadero pa humanidad? Di tur e gruponan religioso na mundo, cua ta esun cu ta cumpli cu tur e rekisitonan aki?’ Echo ta mustra bon cla cu ta Testigonan di Yehova.—Isaias 43:10-12.

15. Kico Dios ta rekeri fuera di kere cu e ta existi?

¹⁵ Djis kere den Dios no ta basta pa agrad’e. De echo, Bijbel ta bisa cu asta e demoñonan ta kere cu Dios ta existi. (Santiago 2:19) Pero ta bisto cu nan no ta haci Dios su boluntad ni nan no tin su aprobacion. Pa nos haya Dios su aprobacion, no solamente nos tin cu kere cu e ta existi sino tambe nos tin cu haci su boluntad. Tambe nos tin cu separa nos mes di religion falso y acepta adoracion berdadero.

16. Kico un hende mester haci relaciona cu participacion den religion falso?

¹⁶ Apostel Pablo a mustra cu nos no mag participa den  adoracion falso. El a skirbi: “Sali for di meimei di nan y separa boso mes, SEÑOR ta bisa. Y no mishi cu loke ta impuro; y lo mi ricibi boso.” (2 Corintionan 6:17; Isaias 52:11) Pesei cristiannan berdadero ta evita tur loke ta conecta cu adoracion falso.

17, 18. Kico ‘Babilonia e Grandi’ ta, y dicon ta urgente pa “sali for di dje”?

¹⁷ Bijbel ta mustra cu tur e tantisimo formanan di religion falso cu tin ta parti di ‘Babilonia e Grandi.’ * (Revelacion 17:5) E nomber ei ta recorda nos di e antiguo stad di Babilonia, caminda religion falso a cuminsa despues di e Diluvio di tempo di Noe. Hopi siñansa y practica cu awe ta comun den religion falso a origina hopi tempo pasa den Babilonia. Por ehempel, e Babilonionan tawata adora trinidadnan di dios, esta, tres dios den un. Awe, e doctrina di Trinidad ta e doctrina principal di hopi religion. Pero Bijbel ta siña bon cla cu tin un solo Dios berdadero, Yehova, y cu Hesucristo ta su Yiu. (Huan 17:3) Tambe e Babilonionan tawata kere cu hende tin un alma inmortal cu ta keda na bida despues cu e curpa muri y cu e por sufri den un luga di tormento. Awe, mayoria religion ta siña e creencia di e alma of spirito inmortal cu por sufri den fierno di candela.

¹⁸ Siendo cu e adoracion di antiguo Babilonia a plama rond mundo, ta apropiado pa identifica Babilonia e Grandi di tempo moderno como e imperio mundial di religion falso. Y Dios a predeci cu e imperio di religion falso aki lo yega na un fin repentino. (Revelacion 18:8) Bo ta mira dicon ta sumamente importante pa bo separa bo mes for di tur parti di Babilonia e Grandi? Yehova Dios kier pa bo ‘sali lihe for di dje’ mientras cu tin tempo ainda.—Revelacion 18:4.

19. Kico lo bo gana door di sirbi Yehova?

 ¹⁹ Bo decision pa stop di practica religion falso lo por tin como consecuencia cu algun hende ta dicidi di stop di asocia cu bo. Sinembargo, door di sirbi Yehova hunto cu su pueblo lo bo gana mucho mas di loke bo por perde. Mescos cu e prome disipelnan di Hesus cu a bandona otro cos pa siguie, bo tambe lo bin haya hopi ruman homber y ruman mohe spiritual. Lo bo bira parti di un famia mundial grandi cu ta consisti di miyones di cristian berdadero, kendenan ta demostra berdadero amor na bo. Y lo bo tin e speransa maraviyoso di bida eterno den e sistema nobo “cu ta bin.” (Marco 10:28-30) Podise cu tempo e hendenan cu a bandona bo debi na bo creencianan, lo busca manera pa sa kico Bijbel ta siña y bira adorado di Yehova.

20. Ki speransa tin den futuro pa esnan cu ta practica e religion berdadero?

²⁰ Bijbel ta siña cu Dios pronto lo trece un fin na e mal sistema di cosnan aki y lo remplas’e cu un husto mundo nobo bou di e gobernacion di su Reino. (2 Pedro 3:9, 13) Ki un mundo maraviyoso esei lo ta! Y den e husto sistema nobo ei, lo tin un solo religion, un solo forma di adoracion berdadero. Lo ta sabi di bo parti pa dal e pasonan necesario pa asocia cu e adoradonan berdadero for di awor, no ta asina?