1. Ngera el klungiaol a bo dengai a dongull er a Dios el ngar er a melemalt el rolel?

A JEHOVAH el Dios a betik a rengul er kid e soal a dengai a klungioled er a ulekrael el lomeskid. A dongull er ngii el ngar er a melemalt el rolel, e ngmo dmeu a rengud e mo cheroid a betok el mondai. Kede dirrek el mo ngmai a klengeltengat me a ngeso er Ngii. (Isaia 48:17) Me nguaisei, engdi ngkmal betok a klechelid el melekoi el kmo te olisechakl a klemerang el kirel a Dios. E kmal kakerous a osisecheklir el kirel a kmo ngtecha Dios e ngera soal a bo doruul.

2. Kede mekera e suubii a melemalt el rolel a dongull er a Jehovah? E ngera el okesiu a ngosukid el mo medengelii tiang?

² Ke mekera e mo medengelii a melemalt el rolel a omongull er a Jehovah? Ngdiak a belkul a omosuub e momekesiu a osisechakl er a rokui el klechelid. Ngbai kirem el mesuub el kmo, ngerang mera el lolisechakl a Biblia el kirel a mera el omengull. El uai tiang: Ngar er a betok el beluu, e ngngar er ngii a mondai el kirel a usbechel a diak el mera el udoud. A lsekum te milskau a ureor el mo osiik aika el diak el mera el udoud, e ke mo mekerang? Ke mo mesuub el kirel a rokui el diak  el mera el udoud? Ngdiak. Ngbai ungil a omchoit a temem el mesuub a mera el udoud. E le obo modengelii a mera el udoud e ngmo beot er kau el dmangch a diak el mera el udoud. Me ngdi osisiu, sel desuubii a rolel e ngsebeched el dongchii a mera el klechelid, e ngmo beot er kid a mo medengei el kmo ngera el klechelid a klsuul.

3. Ngdi ua ledilu Jesus, ngngera kired el meruul a lsoad el nguu a kengei er a Dios?

³ Ngklou a ultutelel el dongull er a Jehovah er a rolel el lekengei er ngii. Te betok a oumerang el kmo a rokui el klechelid a oldeu er a rengul a Dios, engdi a Biblia a diak el olisechakl el uaisei. Ngkmal diak el sebechel a chad el di melekoi el kmo ng Kristiano. A Jesus a dilu el kmo: “Ngdiak el tirikel rokui el dmu er ngak el kmo ‘Rubak, Rubak,’ a mo soiseb ra rengedel a eanged, ngdi tirikel meruul a soal a Demak el ngara eanged a mo soiseb.” Me a leuaisei, a lsoad el mo nguu a kengei er a Dios e ngkmal kired el mo medengei el kmo, ngera soal a doruul e mo meruul. A Jesus a ulemekedong er tirke el diak loruul a soal a Dios el kmo te “meruul a chelebirukel.” (Mateus 7:21-23, BT) Me ngdi ua diak el mera el udoud, a klsuul el klechelid a diak a belkul, ngbai kmal klou a letemellii.

4. Ngera belkul a tekingel a Jesus el kirel aike el eru el rael? E ngii el rael ngmekrolid el mo er ker?

⁴ A Jehovah a mesterir a rokui el chad a techall el mo nguu a diak a ulebengelel el klengar. Engdi a bo dekiei el diak a ulebengelel el ngar er a Baradis, e ngkired el mengull er a Dios el ngar er a melemalt el rolel e kiei el odeuir a rengul. Engdi te betok a diak loruul el uaisei. Sei a uchul me a Jesus a dilu el kmo: “Bo msiseb er obutek el siseball, ele siseball el mor a tellemall a meteu e beot a rael el mor ngii, me te betok el chad a  merael er ngii. Ngdi siseball el mor a klengar a obutek e meringel a rael el mor ngii, me te di kesai el chad a metik er ngii.” (Mateus 7:13, 14) A mera el klechelid a mekrolid el mo er a diak a ulebengelel el klengar, e a klsuul el klechelid a mekrolid el mo er a tellemall. Me a Jehovah a diak el soal a ngii di el chad a bo lengemed, a uchul e ngmla mesterir a rokui el chad a techall el mo mesuub el kirel. (2 Petrus 3:9) Me nguaisei, a rolel a dongull er a Dios a sebechel el mo uchul a klengar me a lechub a kodall.

5. Kede mekera e dongcheterir a rengar er a mera el klechelid?

⁵ Ngmekera e sebeched el metik er a ‘rael el mora klengar’? A Jesus a dilu el kmo, a mera el klechelid a obeketakl el loeak a rolel a klengar er a rechad er ngii. Ngdilu el kmo: “Kom mo medengelterir el okiu a omerellir. . . . A ungil a dbechel el kerrekar ourodech a ungil rodech.” (Mateus 7:16, 17) Me tirke el ngar er a mera el klechelid a sebeched el dongcheterir el oeak a klaumerang er tir me a omerellir. Me alta te diak el mecherrungel e mo meruul a cheleuid, engdi te ua ta el cheldebechel el dmak e meruul a soal a Dios. Ka me bo domes a elolem el tekoi el olengchelir a rengar er a mera el klechelid.

6, 7. Ngua ngera osengir a remesiungel a Dios el kirel a Biblia? E ngera el kerebai a lebilecherei a Jesus el kirel tiang?

⁶ A rechedal a Dios a melai a uchetemel a osisecheklir er a Biblia. A Biblia a kmo: “A Dios a dilokou a Chedaol Llechukl el rokui er a dingerir a re milluches, el kired el olab el olisechakl a klemerang, e mellach, e mesmechokl, e olecholt a meral rolel a ungil klengar, me bo le sebechel a chad el ungil kldmokl e ulsemuul el kirel a bek el ungil ureor.” (2 Timothy 3:16, 17) Me a apostol  el Paulus er a loluches el mo er a rekldemel el Kristiano e ngdilu el kmo: “Ser a kimngai a tekingel a Dios, el eko olisechakl er kemiu, e kom rirenges e ngmai el diak el leko ng tekingel a chad, e bai ngilai el kmal meral tekingel a Dios.” (1 Thesalonika 2:13) Me nguaisei, a tekoi el loumerang me a tekoi el loruul a rengar er a mera el klechelid a mengai er a Tekingel a Dios el Biblia el diak el oltirakl er a uldesuir a rechad me a lechub a siukang er a beluu.

⁷ Me a Jesus Kristus a milecherei a ungil el kerebai e le ngmle blechoel el melai a osisecheklel er a Tekingel a Dios. Ngar er a nglunguchel el mo er a Demal e ngdilu el kmo: “A tekingem a klemerang.” (Johanes 17:17) Me nguluumerang er a Tekingel a Dios, me a rokui el tekoi el lullisechakl a uleltirakl a Bades. Ngmle blechoel el melekoi el kmo: “A Chedaol Llechukl a kmo.” (Mateus 4:4, 7, 10) E a uriul e ngmillekoi a tekoi el llechukl er a bades. Me ngdi osisiu, a rechedal a Dios er chelechang a diak el lolisechakl a di uldesuir. Te oumerang el kmo a Biblia a Tekingel a Dios, me te ousbech er ngii el uchetemel a osisecheklir.

8. Ngera uldimukl er a omengull er kid el mo er a Jehovah?

⁸ A rengar er a mera el klechelid a mengull er a Jehovah el di ngii el tang e olecholt er a ngklel. A Jesus a dilu el kmo: “Mongull el meluluuch er a Rubak el Dios er kau, e di le ngii el tang cho mosiou er ngii!” (Mateus 4:10) Me a remesiungel a Dios a di ta el Jehovah a longull er ngii. Tia el omengull a uldimukl er ngii a bo louchais er a rokui el chad er a ngklel me a dirrek el blekerdelel. A Psalm 83:18 a kmo: “Ng di kau el tang a RUBAK, ke ngarbab el merreder er a beluulchad el rokir.” Me a Jesus er a lolengeseu er a rebebil el mo medengelii a Dios e ngkiltmeklii a kerebai el kired. Ngmiluluuch el kmo:  “Ak mla mo ochotii a ngklem er tirikel chad el mngiliiteterir ra belulechad el meskak.” (Johanes 17:6, BT) Me a rengar er a mera el omengull er chelechang a olisechakl er a rebebil el kirel a ngklel a Dios, me a moktek er ngii, me a blekerdelel.

9, 10. Te mekerang a remera el Kristiano a lolecholt a bltikerreng er a delongelir?

⁹ A rechedal a Dios a olecholt er a mera el bltikerreng er a delongelir. A Jesus a dilu el kmo: “Cho bo mkaubltikerreng, e a rokui el chad a mo medengei el kmo kom obengkek.” (Johanes 13:35) A rekot el Kristiano a mla er ngii tia el bltikerreng er a delongelir. Me a bltikerreng el mukrael er a Tekingel a Dios a sebechel somesemii a mera el klodam e mo mesisiich er a klekakiakl er a delongelir a rechad el kakerous a belurir, ngderuchellir, me a chiro er a bedengir. (Monguiu er a Kolose 3:14.) A rengar er a klsuul el klechelid a diak tia el bltikerreng er a delongelir. Kede mekera medengei? E le tir el omekoad er a rebebil er tir el chad er a ngodech el beluu me a lechub e ngkebliil. A remera el Kristiano a diak el ngar er a mekemad el mo omekoad er a rudam er tir me a lechub a ngii di el chad. A Biblia a kmo: “Tiakid a meketeklii a klekakerous er a re ngelekel a Dios ma re ngelekel a Diabelong: ngikel diak loruul a melemalt el tekoi ma lechub e ng diak le betik a rengul er a tar ngii a diak le ngelekel a Dios. . . . Ng kired el kaubltikerreng. Ng diak le kired el mo ua Kain; ng mle chedal Ngikel Mekngit e milekodir ochellel er a Abel.”​—1 Johanes 3:10-12; 4:20, 21.

¹⁰ Me nguaisei, a mera el bltikerreng a diak di el belkul a kmo ngdiak bo domekoad er a rebebil. A remera el Kristiano a kongei el ousbech a temir, me a klisichir, me a kloklir el kaingeseu e kasisiich er a delongelir.  (Hebru 10:24, 25) Te kaingeseu er a delongelir sel temel a chelebuul. E melemalt a omerellir el mo er a rechad. Nguaisei, te oltaut er sel omellach el ngar er a Biblia el kmo ‘moruul a ungil el mor a re bek el chad.’​—Galatia 6:10.

11. Ngera me ngklou a ultutelel a dekengei el kmo a Jesus Kristus a rolel a osobel el mla er a Dios?

¹¹ A remera el Kristiano a kongei el kmo a Jesus Kristus a rolel a osobel el mla er a Dios. A Biblia a kmo: “A chelsel a beluulchad el rokir e ng diak a ngklel a di tal chad el bla le beskid a Dios el sebechel el osebelid. A osobel a di de betik er ngii er a Jesus e merkong.” (Rellir 4:12) Me ngua dulsaod er a 5 el Bliongel, a Jesus a uldersii a klengar er ngii el olubet el kirir a rebekongesenges el chad. (Mateus 20:28) Ngdirrek el mla metutk er a Dios el mo King er a Renged el ngar er a eanged el mo mengedereder er a beluulechad. Me a lsoad a diak a ulebengelel el klengar e a Dios a mengerechir er kid el mo olengesenges er a Jesus e oltirakl a osisecheklel. Sei a uchul me a Biblia a kmo: “Ngikel oumera er a Ngalek oba diak a ulebengelel klengar; e ngikel diak lorrenges er a Ngalek a diak loba klengar.”​—Johanes 3:36.

12. Ngera uldimukl er a lak deteloi er a beluulechad?

¹² A remera el mengull er a Dios a diak el teloi er a beluulechad. Sera lebo er a kerrekeriil er a medal a chad er a Rom el Pilatus, e a Jesus a dilu el kmo: “A rengedek a diak le renged er tial beluulchad.” (Johanes 18:36) Me ngar er a chelsel a ngii di el beluu el lekiei er ngii, e a remera el oltirakl er a Jesus a chederedall er a Rengedel el ngar er a eanged, me ngdiak bo el teloi er a balatiks me a ngii di el klautok er tia el beluulechad. Me nguaisei, engdi te diak el bo losaod e lorrob er a rebebil el sorir el mo chedal a cheldebechel er a balatiks, te remurt  el mo er a deruchall er a buai, me a lechub e te sengkio. Me alta ngdiak lolab el mo er a ngii di el cheldebechel er a balatiks, engdi te kerekikl el oltirakl a mla moterekokl el llach er a beluu. E ngerang? E le Tekingel a Dios a mellach er tir el mo “oltirakl er a re merreder er a beluu.” (Rom 13:1) Engdi a lsekum e ngmo omtok a llechul a Dios, e te oltirakl er a kerebai er a rechapostol el dilu el kmo: “Kemam a kiram el olengesenges er a Dios el kuk ngar uchei er a kim olengesenges er a re chad.”​—Rellir 5:29; Markus 12:17.

13. A remera el oltirakl er a Jesus ngera osengir el kirel a Rengedel a Dios? E ngera te meruul er ngii?

¹³ A remera el oltirakl er a Jesus a omerk el kmo ngdi ta el Rengedel a Dios a sebechel el sumechokl a mondai er a klechad. A Jesus a dilu el kmo: “Tial Ebangkelio el kirel ngii el Renged a mo mosisechakl er a beluulchad el rokir el kirel el mo ocholt el mor a rokui el chad, e sola e ng mochu er ngii a ulebongel er a beluulchad.” (Mateus 24:14) Me a remera el oltirakl er a Jesus Kristus a diak lolisiich er a rechad el mo omes er tirke el merreder el kirel a semecheklel a mondai er tir, e te bai omerk el kmo ngdi ta el Rengedel a Dios el ngar er a eanged a sebechel el sumechokl a mondai er a klechad. (Psalm 146:3) A Jesus a ullisechakl er kid el mo meluluuch el kirel tia el kabelment el kmo: “A Rengedem le mei; bo le motaut a soam er a beluulchad el ua ingii er a eanged.” (Mateus 6:10) A Tekingel a Dios a ulemlaoch el kmo tia el Renged a mo “okngemed a ikel bebil er a renged el rokui [aike el mengedereder er chelechang] e sola e ngii a mo medechel el mo cherechar.”​—Daniel 2:44; Ocholt 16:14; 19:19-21.

14. Kau ke oumera el kmo ngera el klechelid a oltirakl aike el kirir a rengar er a mera el omengull el meruul?

¹⁴ Me sel momtab aika el bla desaod, e di lekau el  oker el kmo: ‘Ngera el klechelid a melai a rokui el osisecheklel er a Biblia e olecholt er a ngklel a Jehovah? Te ngera olecholt er a bltikerreng er a Dios, e oumerang er a Jesus, e diak el teloi er a beluulechad, e omerk el kmo a Rengedel a Dios a di ta el uchul a osebelel a klechad? Ngera er aike el rokui el klechelid er a beluulechad a meruul aikang?’ Ngbleketakl el kmo te di Resioning er a Jehovah.​—Monguiu er a Isaia 43:10-12.

15. Ngera kirel el mo uldimukl er a klaumerang er kid er a Dios a lsekum e ngsoad el mo odeuir a rengul?

¹⁵ Ngdiak el sebeched el di oumerang el kmo ngngar er ngii a Dios e ngodeuir a rengul. E le Biblia a melekoi el kmo a remekngit el anghel me te oumerang el kmo ngngar er ngii a Dios. (Jakobus 2:19) Me nguaisei, engdi te diak loruul a soal a Dios e diak el oba kengei er Ngii. Me a bo denguu a kengei er a Dios e ngdiak di doumerang el kmo ngmera el ngar er ngii, ngdirrek el kmal kired el mo meruul a soal. Ngkired el mo cheroid er a klsuul el klechelid e mo urrekodel er a mera el omengull.

16. Ngkired el mo mekerang el kirel aike el tekoi el chelsechusem er a klsuul el klechelid?

¹⁶ A apostol el Paulus a ulechotii el kmo ngkmal diak el kired el mo teloi er a klsuul el omengull. Ngmilluches el kmo: “Ma Dios a melekoi el kmo, ‘Mcheridemiu er tir, e mngeseklemiu er tir. Lak mongesechusem er kemiu, me bo le sebechek el ngoikemiu.’” (2 Korinth 6:17; Isaia 52:11) Me a remera el Kristiano a mengeroid er tir er a ngii di el tekoi el chelsechusem er a klsuul el omengull.

17, 18. Ngera “Kloul Babilon”? E ngera me ngorechudel el de ‘tobed ra chelsel’?

¹⁷ A Biblia a olecholt el kmo aike el rokui el bedengel a klsuul el klechelid a uldimukl er a “Kloul Babilon.” * (Ocholt 17:5, BT) Uriul er a Ieleb er a taem er a Noah, e a klsuul el klechelid a ulemuchel er a mats er a Babilon er a irechar. E betok el osisechakl me a omeruul el debetik er a chelsel a klsuul el klechelid a ulemuchel er tia el mats. El uai tiang, a rechad er a Babilon a milengull a Trinidad, el ngii a uldekial a tedei el kakerous el chelid  el mo dmak el di mo chimo el chelid. Chelecha el sils, e a Trinidad a kmal klou a ultutelel el osisechakl er a betok el klechelid. Me nguaisei, engdi a Biblia a bleketakl el lolisechakl el kmo ngngar er ngii a di ta el mera el Dios, el Jehovah e a Jesus Kristus a Ngelekel. (Johanes 17:3) A rechad er a Babilon a dirrek el uluumerang el kmo, a uriul er a lemad a chad e ngngar er ngii a delebengel el melemolem el ngar, e a delebengel a dirrek el sebechel el mo chuarm er a beluu er a ngau. Chelecha el sils, e a oumesingd el klechelid a oumerang el kmo, sel lemad a chad e ngsebechel el mo chuarm er a beluu er a ngau.

¹⁸ Me a omengull er a Babilon er a irechar el mla oberk er a beluulechad el rokir a uchul, me ngsebeched el mesa el kmo a Kloul Babilon a melutk er a cheldellel aike el rokui el klsuul el klechelid. A Dios a ulemlaoch el kmo tia el cheldellel a klsuul el klechelid a kmal di mo mereched a telemellel. Ngsebechem el mesa klungel a ultutelel a bom cheroid er a ngii di el tekoi el chelsechusem er a Kloul Babilon? A Jehovah el Dios a soal a omereched el ‘tobed ra chelsel’ er chelecha el dirk el ngar er ngii a taem.​—Monguiu er a Ocholt 18:4, 8, BT.

19. A omngiltii el mo mesiou er a Jehovah, e ngera sebechem el mo ngmai?

¹⁹ A omelilt el moruul er ngii el mo diak mngar er a klsuul el klechelid a sebechel el mo uchul me a rebebil a mo diak el sorir kau. Engdi a omosiou er a Jehovah el obengterir a rechedal, e ke mo ngmai a lmuut el betok er aike el bo moriid. Ke mo uai a rekot el disaiplo er a Jesus el chiloit a tekoi me bo el sebechir el mo oltirakl er ngii, me ngmo er ngii a betok el rudam me a rudos er kau el kldemem er a klaumerang. Ke mo chedal a  klou el telungalek er a rebetok el miliol el mera el Kristiano el meliuekl er a beluulechad, el tir a mo olecholt a mera el bltikerreng el eko er kau. Ngdirrek el mo er ngii a kmal ungil el omeltkem el mo kiei el diak a ulebengelel er a chelsel “sel mel beluulchad.” (Monguiu er a Markus 10:28-30.) E a omerolel a taem e tirke el chilitau el klaumerang er kau a uchul, a locha mo sorir el mo medengei a osisecheklel a Biblia e mo ta er a mengull er a Jehovah.

20. Ngua ngera el klengar er a ngar medad el klebesei a kltmokl el kirir a rengar er a mera el klechelid?

²⁰ A Biblia a olisechakl el kmo a Dios a di kmedung e ngmo okngemedii tia el mekngit el blekeradel er a beluulechad e mo mtechir er a melemalt el beches el blekeradel el ngar er a cheungel a omengederederel a Rengedel. (2 Petrus 3:9, 13) Ngkmal mo mengasireng a blekeradel er a beluulechad er isel taem! Ngmo er ngii a di ta el mera el klechelid el mera el rolel a omengull er a chelsel tia el melemalt el beches el blekeradel. Me ngdiak lochotel a llomeserreng omruul a tekoi me bo mteloi er a rengar er a mera el omengull er chelecha taem?