1. ¿Dios munashca shina paita adorashpaca ima bendicioncunatataj chasquishun?

JEHOVÁ DIOSCA achcatami ñucanchijta cˈuyan. Chaimantami alli ñanta pushasha nin. Pai munashca shina adorashpaca, llaquicunapi mana urmashunchu, cushillami causashun, paipaj bendicionta, paipaj ayudatami chasquishun (Isaías 48:17). Shinapish cunan punllacunapica achca religioncunami tiyan. “Ñucanchijmi Diosmanta alli yachachinchij” nishpapish, Dios pi cashcata, imata munashcata yachachishpaca cada religionmi chˈican chˈican yuyaicunata yachachin.

2. ¿Jehová Diosta ima shina adorana cashcata yachangapajca imatataj rurana cangui? Shuj chˈimbapuraita rurai.

² ¿Jehová Diosta ima shina adorana cashcata yachangapajca imatataj rurana cangui? ¿Tucui religioncuna imata yachachishcatachu ricuna cangui? Mana. Ashtahuanpish alli religión ima shina cashcatami Bibliapi ricuna cangui. Shuj chˈimbapuraita rurashun: Achca llajtacunapimi falso billetecuna tiyan. Falso billetecunata chˈicanyachichun canta churajpica, ¿tucui falso billetecuna ima shina cashcatachu ricunguiman? Mana. Ashtahuanpish alli billete ima shina cashcatami alli ricunguiman ¿nachu? Alli billete ima shina cashcata yachashpaca, jahuallami falso billetecunata rijsingui.  Shinallataj alli religión ima shina cashcata yachashpaca, jahuallami panda religioncunata rijsingui.

3. Jesús yachachishca shinaca, ¿Diospaj ñaupajpi alli ricuringapajca imatataj rurana canchij?

³ Ñucanchijca Jehová munashca shinami paita adorana canchij. Huaquincunaca, tucui religioncunatami Diosca chasquin nincunami. Shinapish Bibliaca mana chaita yachachinchu. Shinallataj “ñami crij canchij” nishpallaca mana purinachu canchij. Jesusca cashnami nirca: ‘“¡Mandaj Jesús, Mandaj Jesús!” nijcunaca, Dios Mandacunpica mana tucuicuna yaicungacunachu. Ashtahuanpish jahua pacha ñuca Yayapaj munaita rurajcunami, chaimanca yaicungacuna’ nircami. Shinashpaca Diospaj munaita rurajcunallami Diospaj ñaupajpica alli ricurincuna. Diospaj munaita mana rurajcunataca Jesusca: “millaita rurajcuna” nircami (Mateo 7:21-23). Panda religioncunaca falso billetecuna shinami can. Mana valinchu. Achcatami llaquichin.

4. a) ¿Ishqui ñancunamanta parlashpaca Jesusca imatataj yachachirca? b) ¿Chai ñancunaca maimantaj pushan?

⁴ Jehová Diosca tucui gentecuna huiñaita causachunmi munan. Paraíso Allpapi huiñaita causangapajca paitami adorana canchij, pai munashca shinami causana canchij. Shinapish achca gentecunami chaita mana rurasha nincuna. Chaimantami Jesusca: ‘Quichqui punguta yaicuichij. Chingarinaman pushaj punguca anchomi, ñanpish yallitaj anchomi. Chaitaca achcacunami yaicuncuna. Causaiman pushaj punguca quichquimi, ñanpish quichquimi. Chaitaca ashacunallami chasquincuna’ nircami (Mateo 7:13, 14). Cai versocunapi ricushca shinaca, alli religionca causaimanmi pushan. Panda religioncunaca huañuimanmi pushan. Shinapish Diosca gentecuna huañuchunca mana munanchu. Chaimantami paita rijsichun tiempota cushpa caticun (Ezequiel 18:23). Shinashpaca Diosta alli adorashpaca huiñaitami causashun. Mana alli adorashpaca huañushunmi.

5. ¿Alli religiontaca ima shinataj rijsi tucunchij?

⁵ Jesús yachachishca shinaca, “causaiman pushaj ñanta” o alli religiontaca jahuallami rijsi tucunchij. Jesusca: ‘Tucui alli yurapimi alli grano pˈucun’. ‘Chaimanta paicunapi pˈucushca granota ricushpami pi cashcata rijsinguichij’ nircami (Mateo 7:17, 20). Shinashpaca Diosta alli servijcunaca paicunapaj crishcacunahuan, paicunapaj causaihuanmi alli religionpi cashcata ricuchin. Juchayujcuna cashcamanta pandarishpapish tucuicunami Diospaj munaita rurancuna. Cunanca alli religionta rijsingapaj 6 yuyaicunata ricushun.

6, 7. a) ¿Diosta alli servijcunaca imatataj Bibliamanta crincuna? b) ¿Imatataj Jesuspish rurarca?

⁶ Diosta alli servijcunaca Bibliamantami yachachin. Bibliallatajmi cashna nin: ‘Diospaj Shimica, paillataj quillcachishca cashcamantami yachachingapaj, ima shina cashcata rimangapaj, cunangapaj, cashcata ruraj cachun yachachingapajpish alli. Diospajta ruraj runaca, tucuita alli ruranapajca alli allichishca alli yachaj cachunmi cashna yachachinga’ ninmi (2 Timoteo 3:16, 17). Apóstol Pablopish cashnami nirca: “Taita Diospaj Shimita cancunaman ñucanchij huillajpi uyashpaca, mana runacunapaj shimita shinallachu chasquircanguichij. Ashtahuanpish Taita Diospaj Shimitaj cashcatami chasquircanguichij” nircami (1 Tesalonicenses 2:13). Shina cajpica, alli religionca gentecunapaj yuyaicunata yachachinapaj randica Biblia yachachishcatami yachachin, Bibliapi mandashcatami pajtachin.

⁷ Jesusmi chaita rurachun yachachirca. Pai yachachicushpapish Bibliamantami yachachirca. Paipaj Yayata mañashpaca: “Cambaj Shimica manataj llullajchu” nircami (Juan 17:17). Diospaj Shimipi crishcamantami Jesús yachachicushpaca: ‘Quillcachishcapica cashnami nin’ nishpa Bibliamanta yachachij carca (Mateo 4:4, 7, 10). Cunan punllacunapi Diosta alli servijcunapish mana paicunapaj quiquin  yuyaicunatachu yachachin. Ashtahuanpish Biblia Diospaj Shimi cashcata crishcamantami Bibliamanta yachachincuna.

8. ¿Diosta alli servijcunaca ima shinataj Jehová Diosllata adorancuna?

⁸ Alli religionpi cajcunaca Jehová Diosllata adorashpami paipaj shutita yachachin. Jesusca cashnami nirca: “[Jehová, NM] Diosllata adorangui, paipajllata rurangui” nircami (Mateo 4:10). Diosta alli servijcunaca, Diospaj shutita yachachishpa, pai ima shina cashcata huillashpami Jehová Diosllata adorancuna. Bibliapica: “Cambaj shuti Jehová cashcata gentecuna yachachun. Allpa jahuapica canllami ashtahuan Jatun Dios cangui” ninmi (Salmo 83:18, NM). Diosta alli servijcunaca Jesús yachachishca shinami Diosmanta yachachin. Jesusca cashnami paipaj Yayaman nirca: “Cai pachapi causajcunamanta agllashpa ñucaman cushcacunamanca [cambaj shutitami, NM] huillarcani” nircami (Juan 17:6). Cunan punllacunacamami Diosta alli servijcunaca Diospaj shutita, pai imata munashcata, pai ima shina cashcatapish shujtajcunaman yachachin.

9, 10. ¿Diosta alli servijcunaca ima shinataj cˈuyanacushcata ricuchin?

⁹ Diosta alli servijcunaca shungumantami cˈuyanacuncuna. Jesusca: ‘Caishuj chaishuj cˈuyanacujpimi, cancunataca ñuca yachacujcuna cashcata tucuicuna rijsingacuna’ nircami (Juan 13:35). Jesusta punta catijcunaca chashnami cˈuyanacurcacuna. Cunanpish Jesusta catijcunaca cˈuyaimantami huajcha o charij cashcata, maijan llajtamanta cashcata, blanco o runa cashcata mana ricuncuna. Ashtahuanpish huauqui panicuna tucushpami shujlla shina causancuna (Colosenses 3:14-ta rezai). Panda religioncunapi cajcunaca mana cˈuyanacunchu. Chaimantami shujtaj llajtamanta cajpi, shujtaj laya gentecuna cajpica huañuchinllacuna. Diosta alli servijcunaca paicunapaj huauqui panicunata o shujtaj gentecunatapish macanacuicunapi huañuchinaman mana rinchu. Bibliapica cashnami nin: ‘Diospaj  huahuacuna cajtapish, Diablopaj huahuacuna cajtapish ricunallami. Maijanpish cashcata mana ruraj, paipaj huauquita mana cˈuyajca, mana Diospajchu. Caishujhuan chaishujhuanmi cˈuyanacuna. Ama Caín shina cashunchij. Paica Diablopaj cashpami, paipaj huauquitaca huañuchirca’ (1 Juan 3:10-12; 4:20, 21).

¹⁰ Ashtahuanpish shungumanta cˈuyanacushcamantami, Diosta alli servijcunaca paicunapaj tiempohuan, fuerzahuan, cullquihuan caishujmanta chaishujmanta ayudanacushpa causancuna (Hebreos 10:24, 25). Llaquilla cajpi ayudashpa, mana shuhuashpa, mana llullashpami cˈuyaita ricuchincuna. “Tucuicunapaj allita rurashunchij” nishpa Bibliapi yachachishcatami pajtachincuna (Gálatas 6:10).

11. ¿Diosta alli servijcunaca imamantataj Jesuspi crin?

¹¹ Diosta alli servijcunaca quishpichingapaj Jesucristota Dios cachashcatami crin. Bibliapica: “Pi shujtaj Quishpichijca mana tiyanchu. Cai pachapi causajcunata quishpichichunca Taita Diosca pi shujtajtaca mana cushcachu. Jesusllami quishpichi tucun” ninmi (Hechos 4:12). Capítulo 5-pi ricushca shinaca, allita rurajcunata quishpichingapajmi Jesusca huañurca (Mateo 20:28). Shinallataj, Jehová Diosca jahua pachamanta cai Allpata mandachunmi Jesusta agllarca. Chaimantami Diosca Jesusta cazuchun, pai yachachishcata catichun munan. Bibliapica: “Maijanpish Churita crijca, huiñai causaitami charin. Ashtahuanpish Churita mana crijca, huiñai causaitaca mana charinchu. Taita Diosca paitaca pˈiñacunllami” ninmi (Juan 3:36).

12. ¿Diosta alli servijcunaca ima shinataj cai pachapaj ruraicunapi mana chagrurin?

¹² Diosta alli servijcunaca cai pachapaj ruraicunapi mana chagrurinchu. Pilatopaj ñaupajpi cashpaca Jesusca: “Ñuca mandaj canaca mana cai pachamantachu” nircami (Juan 18:36). Diosta alli servijcunapish maijan llajtamanta cashpapish, jahua pachamanta mandaj Jesustami cazuncuna. Chaimantami politicapi, macanacuicunapi mana chagrurincuna.  Shinapish candidato tucusha nijcunata, partido politicocunapi yaicusha nijcunata, votota cunaman risha nijcunataca Diosta alli servijcunaca mana jarcanchu. Politicapi mana chagrurishpapish paicunaca autoridadcunata cazunmi. Romanos 13:1-pica: “Jatun mandajcunataca tucuicuna cazuchun” ninmi. Shinapish autoridadcuna Dios mandashcata ama cazuchun nijpica, Diosta alli servijcunaca apostolcuna shinami: “Runacunata cazunapaj randica, Taita Diostami cazuna canchij” nincuna (Hechos 5:29; Marcos 12:17).

13. a) ¿Diosta alli servijcunaca imatataj yachachin? b) ¿Diosta alli servijcunaca imatataj mañancuna?

 ¹³ Diosta alli servijcunaca Diospaj Mandanami gentecunata ayudanga nishpami yachachin. Jesusca cashnami nirca: “Dios Mandacun alli huillaitaca, tucui cai pachapi causajcunamanmi huillashpa yachaj chayachishca canga. Chai qˈuipami cai shina causaica tucuringa” nircami (Mateo 24:14). Diosta alli servijcunaca autoridadcunami llaquicunata tucuchinga nishpaca mana yachachinchu. Ashtahuanpish Diospaj Mandanami llaquicunata tucuchinga nishpami yachachin (Salmo 146:3). Jesusca: “Can Mandana punlla ña chayamuchun. [Jahua pachapipish, NM], cai pachapipish can munashcata rurachun” nishpa mañanguichij nircami (Mateo 6:10). Diospaj Mandanamanta parlashpaca Bibliapica: ‘Chai mandanaca, shujtaj mandanacunataca tucuitami ñutushpa chingachinga. Paica manataj chingaringachu’ ninmi (Daniel 2:44; Apocalipsis 16:14; 19:19-21-ta rezai).

14. ¿Maijan religiontaj Biblia yachachishcata pajtachin?

¹⁴ Caicama yachacushcata yuyarishpa cashna tapuri: “¿Maijan religiontaj Bibliamanta yachachin, Jehová shutita yachachin, cˈuyanacushpa causan, Jesuspi crin, cai pacha ruraicunamanta caruyashpa causan, Diospaj Mandanami gentecunata ayudanga nishpa yachachin?” Achca religioncuna tiyajpipish shujlla religionmi chai tucuita pajtachin. Chai religionca Testigo de Jehovacunami can (Isaías 43:10-12-ta rezai).

15. ¿Diospaj ñaupajpi alli ricuringapajca imatataj rurana canchij?

¹⁵ Diospaj ñaupajpi alli ricuringapajca “crinimi” nishpallaca mana purinachu canchij. Bibliapi nishca shinaca supaicunapishmi Dios tiyashcata crin (Santiago 2:19). Crishpapish supaicunaca Diospaj munaita mana rurancunachu. Chaimantami Diospaj ñaupajpi mana alli ricurincuna. Shinashpaca Diospaj ñaupajpi alli ricuringapajca Diospaj munaitami  pajtachina canchij. Shinallataj panda religionmanta llujshishpami, alli religionman yaicuna canchij.

16. ¿Panda religionpi ama chagruringapajca imatataj rurana canchij?

¹⁶ Apóstol Pablopish panda religionpi ama chagrurichun nishpami cashna quillcarca: ‘“Paicunapaj chaupimanta llujshimuichij, chˈicanyarichij. Shinallataj: Ima mapata ama japirichijchu. Chashna rurajpica, cancunataca chasquishami” ninmi Jatun Diosca’ nircami (2 Corintios 6:17; Isaías 52:11). Chaimantami Diosta alli servijcunaca panda religionpaj ruraicunapi mana chagrurincuna.

17, 18. a) ¿Bibliapica imatataj “Babilonia jatun pueblo” nishpa shutichin? b) ¿Imamantataj Babilonia jatun pueblomanta utca llujshina cangui?

¹⁷ Bibliapica tucui panda religioncunatami “Babilonia jatun pueblo” nishpa shutichin (Apocalipsis 17:5). * Noepaj punllacunapi yacu juillu tiyashca qˈuipami ñaupa Babilonia llajtaca tiyarca. Babiloniapimi tucui panda religioncuna callarirca. Babiloniapi causajcunaca, quimsa dioscuna tiyashpapish shujlla diosmi tiyan nishpami crijcuna carca. Cunan punllacunapipish achca religioncunami Yayapish, Churipish, Espíritu Santopish shujlla diosmi can nincuna. Shinapish Bibliapica mana chaita yachachinchu. Bibliapica Jehovallami Dios can. Jesusca Diospaj Churimi can ninmi (Juan 17:3). Shinallataj Babiloniapi causajcunaca huañushca qˈuipaca causashpami catinchij, mana allicunaca llaquita apanamanmi rin nishpami crijcuna carca. Cunan punllacunapipish achca religioncunami huañushca qˈuipaca causashpa catij espirituta o almatami charinchij nincuna, mana allita rurajcunaca infiernopimi rupanaman rin nishpami yachachincuna.

¹⁸ Babiloniapi tiyaj religionmi asha asha tucui Allpapi mirarishca. Chaimantami cunan punllacunapi tiyaj tucui  panda religioncunaca Babilonia jatun pueblo cashcata entendinchij. Chai jatun pueblo ñapish tucurinatami Jehová Diosca huillarca. ¿Imamantataj Babilonia jatun pueblomanta llujshina cangui? Babilonia jatun puebloca ñallami tucuringa. Chaimantami Jehová Diosca utca “llujshichij” nin (Apocalipsis 18:4, 8-ta rezai).

19. ¿Jehová Diosta servi callarishpaca imatataj charingui?

¹⁹ Panda religionmanta llujshijpica huaquin gentecunami canmanta caruyasha ninga. Shinapish Jehová Diosta servi callarishpaca huashaman saquishcatapish yallimi japingui. Jesusta punta catijcunaca tucuita huashaman saquishcamantami achca huauqui panicunata charirca. Canpish Diosta servi callarishpaca muyundij Allpapimi canta cˈuyaj achca huauqui panicunata charingui. “Shamuj punllacunapicarin” paraíso Allpapimi huiñai huiñaita cushilla causangui (Marcos 10:28-30-ta rezai). Shinallataj canmanta caruyaj gentecunapish huaquinpica Bibliamanta yachashpami Jehová Diosta servi callaringa.

20. ¿Alli religionpi cajcunaca ima shinataj causanga?

²⁰ Bibliapi yachachishca shinaca, Jehová Diosca ñallami cai pachapi tiyaj mana alli ruraicunata tucuchishpa mushuj causaita apamunga (Habacuc 2:3; 2 Pedro 3:13). ¡Chaipica cushillami causashun! Jehová Diosta adoraj shujlla religionmi tiyanga. ¿Manachu canca cunanmantapacha Diosta alli servijcunahuan tandanacusha ningui?