1. Xú káʼnii gambáyulú á mu nduʼyamajkuíí xó má eyoo Dios rá.

JEOBÁ DIOS nañewunlú májánʼ wéñuʼ ga̱jma̱a̱ ikhaa nandoo rí mambáyulúʼ consejo ndrígóo. Á mu nduʼyamajkuíí xó má eyoo ikhaa, makuwáanʼ gagi, maʼni tsajkurámáánʼ ga̱jma̱a̱ mambáyulúʼ (Isaías 48:17). Mú rígá mbaʼa wéñuʼ religión bi̱ nuthi rí nusngáa rí gajkhun ga̱jma̱a̱ numuu Dios mú rí nusngáa religión rúʼko̱ na̱nguá nindxu̱u̱ mbríguu ga̱jma̱a̱ rí naʼsngúlúʼ Dios ga̱jma̱a̱ rí ikhaa gíʼthu̱u̱n muʼni.

2. Xú káʼnii gándoo gátayamajkuíí Jeobá xó má eyoo ikhaa, ga̱jma̱a̱ ndiéjunʼ xkri̱da gándoo gájma̱ʼ rá.

² Xú káʼnii gándoo gáta̱ya̱a̱ ikháánʼ rí xú káʼnii gíʼmaa matayamajkuíí Jeobá rá. Na̱nguá má eyóoʼ matanigajmaa ga̱jma̱a̱ ma̱ta̱ya̱a̱ ndiéjunʼ eʼsngáa xúgíʼ religión. I̱ndó gíʼmaa majmañaaʼ ndiéjunʼ ñajunʼ rí phú eʼsngáa náa Biblia rí xú káʼnii gíʼmaa mbiʼyamajkuíí Dios. Muʼgíiʼ mbá xkri̱da: Náa mbaʼa xuajin narígá xkujndu ga̱jma̱a̱ numuu mbújkha̱a̱ rí minduwaʼ. Á mu ikháánʼ nuxnaʼ mbá ñajunʼ náa matraʼwi̱i̱ mbújkha̱a̱ rí minduwaʼ ga̱jma̱a̱ mbújkha̱a̱ rí gajkhun. Xú káʼnii gándoo gátatsiʼnuʼ mámbá mbújkha̱a̱ rá. Lá ndayóoʼ magida̱ʼ edxa̱ʼ xú káʼnii nindxu̱u̱ mbújkha̱a̱ rí minduwaʼ ráʼ. Na̱nguá. Itháan májánʼ gáʼni rí matanigajmaa xú káʼnii phú nindxu̱u̱ mbújkha̱a̱ rí gajkhun. Xúʼko̱ má kaʼnii religión ma̱ngaa, ndayóoʼ mbuʼyáá xú káʼnii nindxu̱u̱ religión rí gajkhun.

3. Xó má Jesús niʼthí, ndiéjunʼ gíʼmaa muʼni mu Dios maʼndoo kaʼyulúʼ rá.

³ Gíʼdoo wéñuʼ numuu mbuʼyamajkuíí Jeobá xó má eyoo  ikhaa. Mbaʼin xa̱bu̱ nundxa̱ʼwa̱míjna̱ rí Dios naniguʼ xúgíʼ religión, mu raʼkháa rúʼko̱ rí naʼsngáa náa Biblia. Mú, mbáa xa̱bu̱ xándoo maʼthí rí nindxu̱u̱ cristiano, numuu rí Jesús niʼthí: “Numu ri raʼka mba xuguinʼ tsi nutenʼ: Señor, Señor, mataʼan naʼ xta tsi naʼtañajun mikui. Indo tsi naʼnembanu ri nando Tateʼ tsi xta mikui”. Ikha jngó, Dios maʼndoo kaʼyulúʼ i̱ndó á mu najmañulúʼ rí ikhaa na̱ndu̱ʼu̱lú ga̱jma̱a̱ á mu rí nuʼgíiʼ nuʼni. Bi̱ tseni rí nandoo Dios, Jesús nixná mbiʼñún, ikháanʼ bi̱ “nini mba xugui ri ramajan” (Mateo 7:21-23). Religión dí ragájkhun nindxu̱u̱ xóo mbújkha̱a̱ rí minduwaʼ rí nda̱a̱ nditháan numuu. Ga̱jma̱a̱ religión rígi̱ nindxu̱u̱ ra̱májánʼ wéñuʼ.

4. Ndiéjunʼ eyoo gáʼthi a̱jma̱ kamba̱a̱ rí niʼthí Jesús, ga̱jma̱a̱ náa gáʼga kaguáanʼ mámbá kamba̱a̱ rígi̱ rá.

⁴ Jeobá naxnún xúgínʼ xa̱bu̱ rí ma̱ndoo makuwa kámuu mbiʼi. Mu ma̱ndoo makuwáanʼ kámuu mbiʼi náa tsu̱du̱u̱ Ku̱ba̱ʼ mitsaan, gíʼmaa rí mbuʼyamajkuíí ga̱jma̱a̱ muʼni xó má eyoo ikhaa. Mú, mbaʼin xa̱bu̱ na̱nguá eñún gúní, ikha jngó Jesús niʼthí: “Ataʼaʼla, naʼ xkrugua ri chimajñaʼ, numu ri pu-majñaʼ xkrugua, jame pu-majñaʼ jamba ri naka jagun xabo naʼ ri nandatiguin, mapu-mbaʼin xabo tsi natuʼun iki. Numu ri chimajñaʼ xkrugua, jame chimajñaʼ-ma jamba ri naka jagun xabo naʼ ri mbuya, jame rambaʼin tsi nuxkama xkrugua ruʼkue” (Mateo 7:13, 14). Religión rí gajkhun na̱jkha̱ kaguáanʼ makuwáanʼ kámuu mbiʼi, ga̱jma̱a̱ religión dí ragájkhun na̱jkha̱ kaguáanʼ náa makhañúlúʼ. Jeobá tsíyoo rí nimbáa xa̱bu̱ makhañúu, ikha jngó naniñuʼ rí xúgínʼ xa̱bu̱ majmañún ga̱jma̱a̱ numuu ikhaa (2 Pedro 3:9). Rí xú káʼnii eʼyamajkuíí Dios ma̱ndoo maʼga̱ kaguáanʼ makuwáanʼ kámuu mbiʼi o maʼga̱ kaguáanʼ makhañulú.

5. Xú káʼnii gándoo gúʼyáá tsíin kuwa náa religión rí gajkhun rá.

⁵ Xú káʼnii gándoo guxkamaa “jamba ri naka jagun xabo naʼ ri mbuya” rá. Jesús niʼthí dí ra̱mingíjyúuʼ gáʼni muniʼnúnʼ bi̱ kuwa náa religión dí gajkhun á mu nduʼyáá xú káʼnii kúwi̱i̱n.  Jesús niʼthí: “Ri nuni [majmanuwáanʼla] gajma”, numuu “xugui ixi ri majan, majan-ma xndu ijma” (Mateo 7:16, 17). Bi̱ kuwa náa religión rí gajkhun najmaʼnuʼ ga̱jma̱a̱ numuu rí kuwa runimbu̱ún ma̱ngaa rí kuwa runi. Maski ajndu ni̱ndxu̱ún xa̱bu̱ aʼkhá, mú nugimi̱jna̱ muni rí nandoo Dios. Guʼyáá mbá majun rí xú káʼnii gándoo muniʼnuʼ religión rí gajkhun.

6, 7. Ndiéjunʼ endxaʼwamíjna̱ xa̱bi̱i̱ Dios ga̱jma̱a̱ numuu Biblia, ga̱jma̱a̱ xú kaʼnii nindxu̱u̱ xkri̱da rí nigíiʼ Jesús rá.

⁶ Bi̱ ni̱ndxu̱ún xa̱bi̱i̱ Dios nusngáa xó má e̱ʼkha̱ raʼthí náa Biblia. Náa Biblia naʼthí: “Xoguiʼ ri ajŋgo Dios nini xabu, Espíritu su Micaʼjui ndeyicun muni, ica riʼcui mambayuʼlu muʼninuʼ ri ŋacun, jma maʼni mbuʼya naʼ ri raʼqui iʼni, jma magüicaʼlu muri maʼsngaʼlu xujaʼni guiʼmaʼlu macuhua mejanʼ jmbu, muri xuʼcui su xabiu Dios manindxu mejanʼ, aʼcui ri maʼŋgo maʼni xoguiʼ ini ri mejanʼ” (2 Timoteo 3:16, 17). Apóstol Pablo niʼnirámáʼ ajngáa rígi̱ náa a̱ngui̱i̱n cristianos: “Riguiʼ numu jŋgo ri camba nutun nuxnala sinumala Dios, muri ri riʼdo icanʼxuʼ nitanʼla ri ajŋgo Dios, icanʼla nijuarigu, xuri ajŋgo Dios raʼcaʼ xuri ajŋgun xabu” (1 Tesalonicenses 2:13). Ikha jngó, rí nusngáa ga̱jma̱a̱ rí nuni religión rí gajkhun na̱nguá e̱ʼkha̱ náa rí nundxa̱ʼwa̱míjna̱ ga̱jma̱a̱ rí nuni xa̱bu̱. Xúgíʼ rí nuni nagájnuu náa Biblia, rí nindxu̱u̱ Ajngá rawunʼ Dios.

⁷ Jesucristo nigíiʼ xkri̱da, numuu rí ikhaa niʼsngáa xó má e̱ʼkha̱ raʼthí náa Ajngá rawunʼ Dios. Índo̱ niʼtájkháan náa Anu̱u̱ bi̱ xtáa mekhuíí niʼthí: “Ajngaʼ ñajun ri gako” (Juan 17:17). Jesús niʼnimbo̱o̱ rí xtáa raʼthí náa Ajngá rawunʼ Dios, ga̱jma̱a̱ xúgíʼ rí niʼsngáa nindxu̱u̱ mbríguu xó má eʼthí náa Escrituras. Ikhaa niʼthí má xúʼko̱: “Ajŋga raunʼ Dios naʼtan”, ga̱jma̱a̱ nda̱wa̱á niguxnuu mbá texto ndrígóo Biblia (Mateo 4:4, 7, 10). Xúʼko̱ ma rí mbiʼi xúgi̱, bi̱ ni̱ndxu̱ún xa̱bi̱i̱ Dios na̱nguá esngáa rí nakumu̱ún ikhiin. Nakumu̱ún rí Biblia nindxu̱u̱ Ajngá rawunʼ Dios ga̱jma̱a̱ nusngáa xóo má eʼthí.

8. Ndiéjunʼ eyoo gáʼthi rí matayamajkuíí Jeobá rá.

⁸ Bi̱ kuwa náa religión rí gajkhun nduyamajkuíí mbáwíi Jeobá ga̱jma̱a̱ nuthi rí mbiʼyuu. Jesús niʼthí: “¡Ayuʼ kaníí, Satanás!  Numuu rí kiʼniraʼmáʼ: Jeobá Dios ndrígáʼ gíʼmaa rí matayamajkuíí, ga̱jma̱a̱ i̱ndó ikhaa gíʼmaa rí matani mba̱a̱” (Mateo 4:10). Ikha jngó xa̱bi̱i̱ Jeobá nduyamajkuíí i̱ndó Jeobá. Rí matayamajkuíí Jeobá nandoo gáʼthi rí marathu̱u̱n eʼwíínʼ xa̱bu̱ xú káʼnii mbiʼyuu ga̱jma̱a̱ xú káʼnii xa̱bu̱ nindxu̱u̱ Jeobá. Náa Salmo 83:18 naʼthí: “Mu xa̱bu̱ mbuyáá rí ikháánʼ mbiʼyaʼ Jeobá, i̱ndó ikháánʼ ni̱ndxa̱ʼ bi̱ phú Mba̱a̱ náa xúgíʼ tsu̱du̱u̱ ku̱ba̱ʼ”. Mínaʼ má Jesús niʼthúu̱n Anu̱u̱ ajngáa rígi̱: “Niniloʼ ri mamañu xabo mbiʼyaʼ tsi niraxniʼ mbuju jani naʼ numba” (Juan 17:6). Xúʼko̱ má eni xa̱bi̱i̱ Dios rí mbiʼi xúgi̱, nusngúún xa̱bu̱ rí xú káʼnii mbiʼyuu Dios, rí wíji̱ maʼni ga̱jma̱a̱ rí xú káʼnii xa̱bu̱ nindxu̱u̱ Jeobá.

9, 10. Xú káʼnii esngajma rí nandún kuyamijná bi̱ phú gajkhun ni̱ndxu̱ún cristianos rá.

⁹ Bi̱ ni̱ndxu̱ún xa̱bi̱i̱ Jeobá nandún kuyamijná gajkhun. Jesús niʼthí: “Ri xkuaʼni gunila, aʼkue ri mba xuguinʼ xabo muninuhuanʼla ri tsi nasjngun ñajuanʼla, xi naʼne akianʼla juyamijna” (Juan 13:35). Cristianos bi̱ nikuwa nákha ginii nindúún kuyamijná xúʼko̱ kaʼnii. Rí nandún kuyamijná xa̱bi̱i̱ Dios naʼni rí ní xaxmiéjunʼ á mu ikhiin ñajúnʼ i̱mba̱ raza, á mu ni̱ndxu̱ún xa̱bu̱ bi̱ guáʼdáá wéñuʼ ga̱jma̱a̱ bi̱ raguáʼdáá wéñuʼ ga̱jma̱a̱ tséʼniuu á mu naguwáʼ náa i̱ʼwáʼ xuajin, ga̱jma̱a̱ naʼni rí mambaxúún májánʼ wéñuʼ (atraxnuu Colosenses 3:14). Xa̱bu̱ bi̱ kuwa náa religión dí ragájkhun na̱nguá eñún kuyamijná ga̱jma̱a̱ nuradímíjná numuu rí naguwáʼ náa i̱mba̱ xuajin, o ni̱ndxu̱ún i̱mba̱ raza. Bi̱ phú gajkhun ni̱ndxu̱ún cristianos na̱nguá ejmúún ajua̱nʼ mu muradíin eʼwíínʼ a̱ngiu̱ún ga̱jma̱a̱ tseni má náa eʼwíínʼ xa̱bu̱ ma̱ngaa. Náa Biblia naʼsngáa: “Nando nduʼya sin su ñajunʼ iʼjio Dios ga sin su ñajunʼ iʼjio guixa, muri xoguinʼ su siñu uni ri mejanʼ cami ni senigunʼ cuñu xabu numba gajmiñi; xabu suguiʼ rañajunʼ iʼjio Dios [...;] mamba su icanʼlu guiʼma maʼni aʼtiun caʼyo dxaju su ñajunʼ naʼ Cristo. Xuʼni xuri neʼni Caín su nembaxu jma guixa ga ndexiya dxiyu” (1 Juan 3:10-12; 4:20, 21).

¹⁰ Rí phú nandún kuyamijná gajkhun naʼni rí xúradíin  eʼwíínʼ xa̱bu̱, mú raʼkháa i̱ndó rúʼko̱, nandoo gáʼthi xóo itháan. Bi̱ phú gajkhun ni̱ndxu̱ún cristianos najmún májánʼ wéñuʼ mbiʼi ndrígu̱ún, tsiakii ndrígu̱ún ga̱jma̱a̱ najmún rí guáʼdáá mu mumbayumijná ga̱jma̱a̱ muxnamijná tsiakii (Hebreos 10:24, 25). Numbayumíjná índo̱ nuraʼníí gamiéjunʼ ga̱jma̱a̱ tseni nduwiinʼ eʼwíínʼ. Ikhiin nunimbu̱ún consejo ndrígóo Biblia náa naʼthí rí gíʼmaa muñu “ri mejanʼ jndo xoguinʼ xabu” (Gálatas 6:10).

11. Náa numuu rí phú ndayóoʼ muʼnimbulúʼ kuʼyáá Jesús xóo mbá rí nixná Dios mu maʼni káwáanʼ rá.

¹¹ Bi phú gajkhun ni̱ndxu̱ún cristianos nunimbu̱ún kuyáá Jesucristo numuu rí Dios nijmiuu mu maʼni káwíin. Náa Biblia naʼthí: “Ri ndahua imba tsi maʼnejahuiñalo, numu ri nda mbiʼyu imba naʼ ago miku ri nijanu xabo, ri mago maʼnejahuiñalo” (Hechos 4:12). Xó má ndiʼyáá náa capítulo 5, Jesús nixnáximinaʼ makhañúu mu maʼni káwíin xa̱bu̱ bi̱ nunimbu̱ún (Mateo 20:28). Ma̱ngaa, Jeobá nigíiʼ xóo Rey náa Reino mu maʼtáñajunʼ náa xúgíʼ tsu̱du̱u̱ Ku̱ba̱ʼ. Ikha jngó, Dios gíʼthu̱u̱n rí muʼnimbulúʼ kuʼyáá Jesús ga̱jma̱a̱ muʼni xó má eʼsngáa ikhaa. Mu ma̱ndoo makuwáanʼ kámuu mbiʼi. Náa Biblia naʼthí: “Tsi najumu-jaʼyo Ada, ndaʼya asjndo jamu, indo tsi tsijumu-[j]aʼyo Ada, maxaʼya” (Juan 3:36).

12. Ndiéjunʼ eyoo gáʼthi rí xanindxulú náa numbaaʼ rígi̱ rá.

¹² Bi̱ phú gajkhun ni̱ndxu̱ún xa̱bi̱i̱ Dios na̱nguá kaʼñúún náa numbaaʼ rígi̱. Jesús niʼthúu̱n: “Raʼka naʼ numba rigueʼ itañajunloʼ-jun” (Juan 18:36). Tséʼniuu má náa xuajin kuwa, bi̱ phú gajkhun ni̱ndxu̱ún discípulos ndrígóo Cristo nunimbu̱ún náa Reino bi̱ xtáa mekhuíí. Ikha jngó tsixudamijna náa política. Mú, á mu eʼwíínʼ xa̱bu̱ nandún makuwa náa mbá partido político, o nandún muni votar mu makhánun ñajunʼ, xa̱bi̱i̱ Dios nuniñunʼ rí eʼwíínʼ xa̱bu̱ muni má rí edxawamíjna̱. Maski ajndu ikhiin na̱nguá eruguambáá náa política, ikhiin nduyamajkuíí rí naʼthí náa xtángoo. Náa numuu rá. Numuu rí náa Ajngá rawunʼ Dios naʼthúún bi̱ ni̱ndxu̱ún cristiano rí “muni ri nutan xabu ñajunʼ” (Romanos 13:1). Mú, índo̱ Xa̱bu̱ Ñajunʼ nanda̱ʼa̱ mbá rí tséʼkha̱ raʼthí náa xtángoo ndrígóo Dios, bi̱  ni̱ndxu̱ún xa̱bi̱i̱ Dios nduyaridá xkri̱da ndrígu̱ún apóstoles, bi̱ nithi: “Pu-ndaʼyo ri manimbaʼxoʼ-juyaxoʼ ri naʼtan Dios guini, xo ri nutan xabo” (Hechos 5:29; Marcos 12:17).

13. Ndiéjunʼ eni ga̱jma̱a̱ numuu Reino ndrígóo Dios bi̱ phú ni̱ndxu̱ún discípulos ndrígóo Jesús ga̱jma̱a̱ ndiéjunʼ rí eni xá.

¹³ Bi̱ phú ni̱ndxu̱ún discípulos ndrígóo Jesús nutaraʼa rí Reino ndrígóo Dios nindxu̱u̱ náa guáʼthi̱i̱n makuwá xa̱bu̱. Jesús niʼtariyaʼ: “Jame miʼtaraʼa apa ajnga ri majan nuxiʼ numu ri  naʼ-tañajun mba xuguinʼ xabo gentil, aʼkue ri mariguo” (Mateo 24:14). Bi̱ phú gajkhun ni̱ndxu̱ún xa̱bi̱i̱ Jesucristo na̱nguá etun eʼwíínʼ xa̱bu̱ rí munimbu̱ún náa Xa̱bu̱ Ñajunʼ rí ikhiin munimbaníí xkujndu ndrígu̱ún. Ikhiin nutaraʼa rí Reino ndrígóo Dios nindxu̱u̱ náa guáʼthi̱i̱n makuwá xa̱bu̱ (Salmo 146:3). Jesús niʼsngúlúʼ muʼtájkáan xúgi̱ kaʼnii: “Gaʼka ri naratañajun. Gambanu xo ri nandaʼ Ikan, xoma ri nambanu mikui, xuʼkue-ma gambanu mbayi guejio manga” (Mateo 6:10). Náa Biblia naʼtáriyaʼ rí Reino bi̱ xtáa mekhuíí ‹maʼni gámbíin xúgínʼ reino bi̱ kuwa xúgi̱, ga̱jma̱a̱ xúʼko̱ ikhaa maʼga̱nú maʼtáñajunʼ asndu kámuu mbiʼi› (Daniel 2:44; Revelación 16:14; 19:19-21).

14. Tsíin xa̱bíi bi̱ nusngajma rí ni̱ndxu̱ún religión rí gajkhun rá.

¹⁴ Atraxi̱mínáʼ: “Xú káʼnii nindxu̱u̱ i̱mba̱ religión rí naʼsngáa xúgíʼ rí naʼthí náa Biblia ga̱jma̱a̱ naʼsngáa rí Dios mbiʼyuu Jeobá rá. Ndiéjunʼ nindxu̱u̱ i̱mba̱ religión náa nusngajma rí nandún kuyamijná, bi̱ nusngajma rí guáʼdáá fe náa Jesús, bi̱ na̱nguá endawamijna náa numbaaʼ ga̱jma̱a̱ bi̱ nutaraʼa dí Reino ndrígóo Dios nindxu̱u̱ náa guáʼthi̱i̱n makuwá májánʼ wéñuʼ xa̱bu̱ rá. Xúgíʼ religión dí rígá náa tsu̱du̱u̱ Ku̱ba̱ʼ, xú káʼnii nindxu̱u̱ religión rí naʼni xúgíʼ rígi̱ rá.” Rí narígá nasngájma kaʼwu rí ikhiin ni̱ndxu̱ún bi̱ nutaraʼa numuu Jeobá (atraxnuu Isaías 43:10-12).

15. Mú ndiéjunʼ gíʼthu̱u̱n Dios muʼni rá.

¹⁵ Raʼkháa i̱ndó ndayóoʼ matatsimbaʼ náa Dios. Náa Biblia na̱ʼkha̱ raʼthí rí asndu xa̱bu̱ wéñiʼ nakumu̱ún rí xtáa Dios (Santiago 2:19). Mú nakujmaa kaʼwu rí ikhiin tseni rí nandoo Jeobá ga̱jma̱a̱ ikhaa tsimbáñun rí nuni. Mu muʼni rí nanigu̱ʼ Dios raʼkháa i̱ndó ndayóoʼ muʼnimbulúʼ rí ikhaa xtáa, ma̱ngaa ndayóoʼ muʼni rí nandoo ikhaa. Ma̱ngaa, gíʼmaa magajnaʼlú náa religión dí ragájkhun ga̱jma̱a̱ makuwáanʼ náa religión rí gajkhun.

16. Ndiéjunʼ gíʼmaa muʼni mu xákuwáanʼ náa religión dí ragájkhun rá.

¹⁶ Apóstol Pablo nisngajma dí ragíʼmaa mbuʼyamajkuíí xúgíʼ rí nindxu̱u̱ minduwaʼ. Ikhaa niʼnirámáʼ: “Agajnuʼla naʼ iquin,  [ga̱jma̱a̱ guniwajimína] —eʼthí Jeobá—, xuni icanʼla nditan ri ñajunʼ misaga. Aʼcui ri Icun majuariguanʼla” (2 Corintios 6:17; Isaías 52:11). Ikha jngó, bi̱ gajkhun ni̱ndxu̱ún cristianos tseni nimbáa rí kaʼyoo náa religión dí ragájkhun.

17, 18. Ndiéjunʼ nindxu̱u̱ “Babilonia ri ñajunʼ xuajin apa”, ga̱jma̱a̱ náa numuu rí gíʼmaa magajnáaʼlú nacha̱ wéñuʼ ikhí rá.

¹⁷ Náa Biblia naʼsngáa rí xúgíʼ religión dí ragájkhun nindxu̱u̱ “Babilonia ri ñajunʼ xuajin apa” (Rí huasjŋgajma Juan 17:5). * Ajngáa rígi̱ naʼni marmáʼáan a̱jkiu̱lú kuʼyáá xuajin Babilonia dí nirígá nákha wajyúúʼ, náa phú nigi̱ʼdu̱u̱ nirígá religión dí ragájkhun nda̱wa̱á rí nixnúu Ruʼwambiiʼ nákha mbiʼi rí nixtáa Noé. Xúgíʼ rí xtáa raʼsngáa ga̱jma̱a̱ rí xtáa raʼni religión dí ragájkhun rí mbiʼi xúgi̱ nigi̱ʼdu̱u̱ nirígá náa xuajin Babilonia nákha wajyúúʼ. Mbá xkri̱da, xa̱bu̱ bi̱ nikuwa náa xuajin Babilonia ndiyamajkhún mbaʼin dios bi̱ ni̱ndxu̱ún Trinidad, ga̱jma̱a̱ xúʼko̱ má rí mbiʼi xúgi̱, mbaʼa religión nduyamajkhún mbaʼin dios bi̱ ni̱ndxu̱ún Trinidad. Mú náa Biblia nasngájma kaʼwu rí xtáa mbáwíi Dios bi̱ gajkhun, Jeobá, ga̱jma̱a̱ Jesucristo nindxu̱u̱ A̱ʼdióo (Juan 17:3). Ma̱ngaa xa̱bu̱ bi̱ nikuwa náa xuajin Babilonia ninimbu̱ún rí xa̱bu̱ nduya nda̱wa̱á rí nakháñun ga̱jma̱a̱ rí ma̱ndoo mumíniʼ náa infierno. Rí mbiʼi xúgi̱, mbaʼa religión nusngáa rí alma ga̱jma̱a̱ espíritu rí tsikháñuu ma̱ndoo mbayamínuʼ náa infierno.

¹⁸ Religión dí nirígá nákha wajyúúʼ náa xuajin Babilonia ni̱jkha̱nú nirígá náa xúgíʼ tsu̱du̱u̱ Ku̱ba̱ʼ. Ikha jngó, nuʼthá rí Babilonia rí ñajunʼ xuajin apha dí rígá mbiʼi xúgi̱ nandoo gáʼthi xúgíʼ religión dí ragájkhun dí rígá náa numbaaʼ. Dios niʼtáriyaʼ rí xúgíʼ religión maʼga̱nú mambáa nacha̱ wéñuʼ. Lá nakruaʼaʼ ikháanʼ ndíjkha rí gíʼdoo wéñuʼ numuu magajnáaʼlú mbá kayuʼ náa Babilonia rí ñajunʼ xuajin apha ráʼ. Jeobá Dios nandoo rí ikháanʼ ‹magajnáʼ ikhí› nacha̱ wéñuʼ, nákha xóó rígá mbiʼi (atraxnuu Revelación 18:4, 8).

19. Ndiéjunʼ gakánaʼ rí natane ñajunʼ Jeobá rá.

 ¹⁹ Índo̱ gataʼgíminaʼ matatsiʼñáaʼ religión dí ragájkhun, mbáa makuwa tikhun xa̱bu̱ bi̱ xáʼndún mambaxáʼ gajmiáanʼ. Mú, índo̱ natane ñajunʼ Jeobá gajmiáanʼ bi̱ kuwa náa xuajen Ndrígóo, makánaʼ itháan ki xóo rí mandáti̱ga̱ʼ. Ikháánʼ matagiʼni xó má nigíʼnii discípulos ndrígóo Jesús, bi̱ niniñanʼ xúgíʼ rí guáʼdáá mu magún ki̱dxu̱ʼ á mu ikháánʼ natani xúʼko̱, mi̱dxu̱ʼnú maraʼdiin mbaʼin a̱ngia̱nʼ bi̱ nuni ñajunʼ Dios. Ikháánʼ maraxtaa náa mbá familia bi̱ kuwa náa xúgíʼ tsu̱du̱u̱ ku̱ba̱ʼ, náa kuwa mbaʼin wéñuʼ a̱ngiu̱lú bi̱ ni̱ndxu̱ún cristianos gajkhun bi̱ nusngajma rí nandún kuyamijná gajkhun. Ga̱jma̱a̱ ikhiin guáʼthi̱i̱n makuwa “asjndo jamu tsigu rí maʼkha” (atraxnuu Marcos 10:28-30). Mbáa asndu makuwa xa̱bu̱ bi̱ ní xámbáxu̱u̱n ga̱jma̱á ni̱ndxa̱ʼ numuu rí kuaʼdáá i̱mba̱ religion, mbá maʼga̱nú mbá mbiʼi rí ikhiin majmañún rí nasngáa náa Biblia ga̱jma̱a̱ mani̱ndxu̱ún xa̱bi̱i̱ ndrígóo Jeobá.

20. Ndiéjunʼ gúgiʼnii xa̱bu̱ bi̱ kuwa náa religión rí gajkhun rá.

²⁰ Náa Biblia nasngáa rí Dios maʼni gámbáa numbaaʼ xkawiʼ rígi̱ ga̱jma̱a̱ mani̱i̱ mbá numbaaʼ nuxi̱ʼ náa ní xárígá dí ra̱májánʼ náa maʼtáñajunʼ Reino ndrígóo (2 Pedro 3:9, 13). ¡Ra̱ʼkhá tháán mitsaan wéñuʼ gáʼni numbaaʼ nuxi̱ʼ rígi̱! Ikhí marigá  imbóó religión, rí xó phú gíʼmaa mbuʼyamajkuíí gajkhun Dios. Ikháánʼ gíʼmaa matriʼkuminaʼ mu ma̱ndoo mi̱dxu̱ʼ asndu nákha xúgi̱ náa nagimbíi̱n bi̱ phú ni̱ndxu̱ún xa̱bi̱i̱ Dios.