1. Tanbasá mak diʼak mai ita atu adora Maromak iha dalan neʼebé loos?

MAROMAK JEOVÁ hanoin tebes ita no hakarak atu ita moris ho diʼak hodi tuir ninia matadalan. Se ita adora nia iha dalan neʼebé loos, ita sei sai kontente no bele hasees an husi problema barak. No mós ita sei simu ajuda no bensaun husi nia. (Isaías [Yesaya] 48:17) Maibé, iha relijiaun atus ba atus neʼebé dehan katak sira hanorin lia-loos kona-ba Maromak. No sira iha hanorin neʼebé la hanesan kona-ba sé mak Maromak no saida mak Maromak nia hakarak husi ita ema.

2. Oinsá mak ita bele hatene dalan neʼebé loos atu adora Maromak Jeová? Ezemplu saida mak ajuda ita atu komprende kona-ba ida-neʼe?

² Oinsá mak ita bele hatene dalan neʼebé loos atu adora Maromak Jeová? Ita la presiza estuda no kompara buat neʼebé relijiaun hotu hanorin. Ita presiza deʼit aprende saida mak Bíblia loloos hanorin kona-ba adorasaun neʼebé loos. Porezemplu: Iha rai barak, iha problema kona-ba osan falsu. Se Ita-nia serbisu mak haketak osan falsu husi osan loos, oinsá mak  Ita bele halo nuneʼe? Tanba iha osan falsu oioin, Ita tenke hanoin-hetan osan falsu sira-neʼe hotu ka lae? Lae. Diʼak liu gasta tempu atu hatene didiʼak osan loos deʼit. Kuandu Ita hatene ona osan loos nia oin, Ita bele hatene mós osan falsu. Hanesan neʼe mós, kuandu ita aprende oinsá atu hatene relijiaun neʼebé loos mak ida-neʼebé, ita bele hatene mós relijiaun falsu sira.

3. Tuir Jesus nia liafuan, ita tenke halo saida atu Maromak bele simu ita?

³ Importante mak ita adora Maromak Jeová iha dalan neʼebé nia simu. Ema barak fiar katak relijiaun hotu halo Maromak kontente, maibé Bíblia la hanorin hanesan neʼe. Atu hatete deʼit katak ita mak ema kristaun ida, neʼe mós latoʼo. Jesus hatete: “Laʼós ema hotu neʼebé dehan mai haʼu: ‘Naʼi, Naʼi’, sei tama ba Ukun lalehan nian, maibé ema neʼebé halo tuir haʼu-nia Aman iha lalehan nia hakarak mak sei tama.” Nuneʼe, atu Maromak bele simu ita, ita tenke aprende buat neʼebé Maromak hakarak no tenke halo tuir. Jesus bolu sira neʼebé la halo tuir Maromak nia hakarak nuʼudar ema neʼebé “halo aat”. (Mateus 7:21-23) Hanesan osan falsu, relijiaun falsu la iha folin. Aat liután mak relijiaun falsu sira-neʼe halo susar mai ita.

4. Jesus nia liafuan kona-ba dalan rua katak sá? Dalan ida-idak lori ema ba neʼebé?

⁴ Maromak Jeová fó oportunidade ba ema atu moris ba nafatin. Maibé, atu bele moris ba nafatin iha mundu foun, agora ita tenke adora Maromak iha dalan neʼebé loos no moris tuir ninia hakarak. Triste katak ema barak lakohi halo nuneʼe. Tan neʼe, Jesus  hatete: “Laʼo liuhusi odamatan kloot bá, basá dalan boot no luan mak lori ema ba mate, no ema barak laʼo liuhusi nia. Maibé odamatan kloot no dalan kiʼik tebes mak lori ema ba moris, no ema uitoan deʼit mak hetan nia.” (Mateus 7:13, 14) Relijiaun loos lori ema ba moris rohan-laek. Relijiaun falsu lori ema ba mate. Maromak Jeová lakohi ema atu mate, tan neʼe mak nia fó oportunidade ba ema iha rai hotu atu aprende kona-ba nia. (2 Pedro 3:9) Nuneʼe, dalan neʼebé ita hili atu adora Maromak bele lori ita ba moris, ka mate.

5. Oinsá mak ita bele hatene ema neʼebé halaʼo relijiaun loos?

⁵ Oinsá mak ita bele hetan ‘dalan atu lori ba moris’? Jesus hatete katak ita bele hatene relijiaun neʼebé loos husi hahalok neʼebé ema hatudu, hodi dehan: “Liuhusi sira-nia hahalok imi bele hatene sira. . . . Ai-hun hotu neʼebé diʼak sei fó fuan diʼak.” (Mateus 7:16, 17) Liafuan neʼe katak, hanesan ita bele hatene ai husi nia fuan, ita bele hatene ema neʼebé halaʼo relijiaun loos liuhusi buat neʼebé sira fiar no sira-nia hahalok. Maski sira ema sala-naʼin, sira nuʼudar grupu, koko makaʼas atu halo tuir Maromak nia hakarak. Mai ita haree dalan neen atu hatene ema neʼebé halaʼo relijiaun loos.

6, 7. Saida mak Maromak nia atan sira-nia hanoin kona-ba Bíblia? Oinsá mak Jesus fó ezemplu kona-ba ida-neʼe?

⁶ Maromak nia atan uza Bíblia nuʼudar sira-nia hanorin nia hun. Bíblia hatete: “Maromak mak leno Eskritura hotu no neʼe diʼak atu hanorin, atu hatudu  sai buat neʼebé sala, atu hadiʼa buat hotu, no atu fó dixiplina tuir Maromak nia matadalan neʼebé loos, atu nuneʼe Maromak nia atan sira bele sai kompletu hodi prontu atu halo serbisu diʼak hotu.” (2 Timóteo 3:16, 17) Apóstolu Paulo hakerek ba nia maluk kristaun: “Kuandu imi simu Maromak nia liafuan, neʼebé imi rona husi ami, imi simu ida-neʼe, laʼós nuʼudar ema nia liafuan, maibé, nuʼudar Maromak nia liafuan.” (1 Tesalónika 2:13) Tan neʼe, sira-nia fiar no hahalok laʼós husi ema nia hanoin ka tradisaun. Sira-nia fiar mai husi Maromak nia Liafuan, Bíblia.

⁷ Jesus Kristu fó ezemplu hodi hanorin husi Maromak nia Liafuan. Iha orasaun ba ninia Aman iha lalehan, nia hatete: “Ita-nia liafuan mak lia-loos.” (João 17:17) Jesus fiar Maromak nia Liafuan, no buat hotu neʼebé nia hanorin mai husi Eskritura. Dala barak Jesus hatete: “Hakerek nanis ona.” (Mateus 4:4, 7, 10) Depois, nia repete tuir eskritura ida. Hanesan neʼe mós, Maromak nia povu ohin loron la hanorin sira rasik nia hanoin. Sira fiar katak Bíblia mak Maromak nia Liafuan, no buat hotu neʼebé sira hanorin mai husi Bíblia.

8. Ema neʼebé adora Maromak Jeová sei halo saida?

⁸ Ema neʼebé halaʼo relijiaun loos adora Maromak Jeová mesak deʼit no haklaken nia naran. Jesus hatete: “Ó tenke adora Jeová ó-nia Maromak, no ba nia deʼit mak ó tenke halo serbisu santu.” (Mateus 4:10) Tan neʼe, Maromak nia atan sira adora Maromak Jeová mesak deʼit. No mós, sira fó-hatene ema seluk kona-ba Maromak nia naran no kona-ba ninia hahalok sira. Eskritura iha Salmo (Mazmur)  83:18 hatete: “Ita, neʼebé naran Jeová, Ita mesak deʼit mak Maromak Aas Liu Hotu iha mundu tomak.” Jesus ajuda ema atu hatene Maromak no nia hatudu ezemplu diʼak kona-ba neʼe. Iha ninia orasaun, nia hatete: “Ema sira neʼebé Ita fó mai haʼu husi mundu neʼe, haʼu halo sira hatene kona-ba Ita-nia naran.” (João 17:6) Hanesan neʼe mós ohin loron, ema neʼebé adora Maromak iha dalan neʼebé loos, hanorin ema seluk kona-ba Maromak nia naran, ninia hakarak, no mós ninia hahalok.

9, 10. Ema kristaun loos hatudu domin ba malu iha dalan saida deʼit?

⁹ Maromak nia povu hatudu domin neʼebé loos ba malu. Jesus hatete: “Ho ida-neʼe mak ema hotu sei hatene katak imi haʼu-nia dixípulu sira, se imi iha domin ba malu.” (João 13:35) Ema kristaun sira iha apóstolu sira-nia tempu iha domin hanesan neʼe. Domin neʼebé loos la haree ema nia kór, rasa, no nasaun, no mós la husik buat ida atu haketak sira. (Koloso 3:14) Ema neʼebé tuir relijiaun falsu la iha domin hanesan neʼe ba sira-nia maluk. Oinsá mak ita hatene ida-neʼe? Maski sira-nia relijiaun hanesan, maibé sira oho malu tanba rai ka rasa la hanesan. Ema kristaun neʼebé loos la kaer surik ka kilat atu oho sira-nia maluk kristaun ka ema seluk. Bíblia hatete: “Nuneʼe, ita bele hatene Maromak nia oan no Diabu nia oan liuhusi ida-neʼe: Ema hotu neʼebé iha toman atu halo hahalok laloos la mai husi Maromak, nuneʼe mós ho ema neʼebé la hadomi ninia maluk. . . . Ita tenke hadomi malu; ita labele sai hanesan Caim, ida neʼebé mai husi aat-naʼin no oho ninia alin.”—1 João 3:10-12; 4:20, 21.

 ¹⁰ Klaru, domin neʼebé loos laʼós katak la oho ema deʼit. Ema kristaun loos uza sira-nia tempu, forsa, no osan atu ajuda malu no fó laran-manas ba malu, hodi la hanoin sira-nia an deʼit. (Ebreu 10:24, 25) Sira ajuda malu iha tempu neʼebé susar, no sira la bosok ema seluk. Tuir loloos, sira halo tuir konsellu husi Bíblia neʼebé haruka atu “halo buat neʼebé diʼak ba ema hotu”.—Galásia 6:10.

11. Tanbasá mak importante atu simu Jesus Kristu nuʼudar dalan neʼebé Maromak fó atu hetan salvasaun?

¹¹ Ema kristaun loos simu Jesus Kristu nuʼudar dalan neʼebé Maromak fó atu hetan salvasaun. Bíblia hatete: “La iha salvasaun liuhusi ema seluk, basá la iha naran seluk iha lalehan nia okos neʼebé Maromak hili tiha ona atu salva ita.” (Apóstolu 4:12) Hanesan ita aprende iha Kapítulu 5, Jesus fó ninia moris nuʼudar sakrifísiu atu salva ema neʼebé halo tuir. (Mateus 20:28) Liután neʼe, Maromak hili Jesus nuʼudar Liurai ba ninia Governu iha lalehan atu ukun mundu tomak. No mós, Maromak hatete katak se ita hakarak moris ba nafatin, ita tenke halo tuir Jesus no ninia hanorin. Tan neʼe, Bíblia hatete: “Ema neʼebé hatudu fiar ba Oan-Mane hetan moris rohan-laek; no ema neʼebé lakohi halo tuir Oan-Mane sei la haree moris.”—João 3:36.

12. Laʼós parte husi mundu neʼe katak sá?

¹² Ema neʼebé adora Maromak iha dalan neʼebé loos laʼós parte husi mundu neʼe. Kuandu Liurai Roma nian naran Pilatos tesi lia ba Jesus iha tribunál, Jesus hatete: “Haʼu-nia ukun laʼós parte husi mundu neʼe.” (João 18:36) Ema neʼebé halo tuir Jesus, maski hela iha nasaun neʼebé deʼit, sira hili  ona atu sai povu ba Maromak nia Ukun neʼebé iha lalehan. Tan neʼe, sira nunka envolve an iha problema polítiku naran deʼit neʼebé mosu iha mundu, no nunka apoia partidu polítiku ruma. Maibé, sira mós la mete ema seluk neʼebé hakarak atu tuir partidu polítiku ruma, sai kandidatu, ka halo votasaun. Maski Maromak nia povu la envolve an iha buat polítiku, sira nafatin halo tuir lei. Tanbasá? Tanba Maromak nia Liafuan haruka sira atu “hakruʼuk ba ukun-naʼin sira” iha governu. (Roma 13:1) Maibé, se buat neʼebé ukun-naʼin sira haruka mak kontra buat neʼebé Maromak nia hakarak, ema neʼebé adora Maromak sei halo tuir ezemplu neʼebé apóstolu sira hatudu. Sira hatete: “Ami tenke halo tuir Maromak nuʼudar ukun-naʼin duké halo tuir ema.”—Apóstolu 5:29; Marcos 12:17.

13. Saida mak Jesus nia dixípulu sira-nia hanoin kona-ba Maromak nia Ukun? Ida-neʼe book sira atu halo saida?

¹³ Ema neʼebé tuir Jesus haklaken katak Maromak nia Ukun deʼit mak bele fó esperansa. Jesus hatete nanis: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, no depois neʼe mundu nia rohan sei mai.” (Mateus 24:14) Duké anima ema atu tau fiar ba ema nia ukun atu rezolve problema, Jesus Kristu nia dixípulu sira neʼebé loos dehan sai katak Maromak nia Ukun deʼit mak bele fó esperansa ba ema. (Salmo [Mazmur] 146:3) Jesus hanorin ita atu harohan ba Maromak atu haraik governu neʼe mai ita, hodi hatete: “Halo Ita-nia Ukun toʼo mai rai. Halo Ita-nia hakarak sai loos iha rai, hanesan iha lalehan.” (Mateus 6:10) Maromak nia Liafuan fó-hatene nanis  katak Ukun neʼe sei “harahun no halakon ukun sira-neʼe hotu [neʼebé agora iha], no ukun neʼe rasik sei hamriik ba nafatin”.—Daniel 2:44.

14. Tuir Ita-nia hanoin, relijiaun ida-neʼebé mak halaʼo adorasaun neʼebé loos?

¹⁴ Husi buat neʼebé ita foin lee, husu ba ita-nia an: ‘Relijiaun ida-neʼebé mak uza Bíblia nuʼudar sira-nia  hanorin nia hun no haklaken Maromak Jeová nia naran? Grupu ida-neʼebé mak halo tuir Maromak kona-ba hatudu domin neʼebé loos, hatudu fiar ba Jesus, la hola parte iha mundu neʼe, no dehan sai katak Maromak nia Ukun deʼit mak fó esperansa neʼebé loos ba ema? Husi relijiaun hotu iha mundu, ida-neʼebé mak halo tuir buat hirak-neʼe hotu?’ Ita bele haree ho klaru katak grupu neʼe mak Testemuña ba Jeová.—Isaías (Yesaya) 43:10-12.

15. Fiar deʼit katak Maromak iha, neʼe latoʼo. Saida tan mak Maromak hakarak ita atu halo?

¹⁵ Fiar Maromak deʼit latoʼo atu halo nia kontente. Tuir loloos, Bíblia hatete katak anju aat sira mós fiar katak Maromak iha. (Tiago 2:19) Maibé, anju aat sira la halo tuir Maromak nia hakarak no Maromak la simu sira. Atu Maromak bele simu ita, ita tenke halo tuir ninia hakarak. No mós, ita tenke haketak an husi relijiaun falsu no kaer metin ba adorasaun neʼebé loos.

16. Saida mak ita tenke halo atu la hola parte iha relijiaun falsu?

¹⁶ Apóstolu Paulo hatudu katak ita la bele hola parte iha adorasaun neʼebé la loos. Nia hakerek: “‘Sai husi sira-nia leet, no haketak imi-nia an’, Jeová dehan, ‘no keta kona buat neʼebé la moos’; ‘no haʼu sei simu imi’.” (2 Korinto 6:17; Isaías [Yesaya] 52:11) Tan neʼe, ema kristaun neʼebé loos hadook an husi buat hotu neʼebé iha relasaun ho adorasaun neʼebé la loos.

17, 18. Saida mak “Babilónia Boot”? Tanbasá mak importante atu ita “sai husi” Babilónia Boot agora kedas?

¹⁷ Bíblia hatudu katak relijiaun falsu hotu mak  parte husi “Babilónia Boot”. * (Apokalipse 17:5) Ida-neʼe halo ita hanoin-hetan sidade antigu ida naran Babilónia. Liutiha Rai-Nabeen iha Noé nia tempu, husi sidade neʼe mak hahú relijiaun falsu nia hanorin no lisan neʼebé ema halaʼo toʼo agora. Porezemplu, ema Babilónia adora maromak trindade sira, katak maromak naʼin-tolu neʼebé hamutuk ida deʼit. Ohin loron, relijiaun barak fiar doutrina Trindade nuʼudar hanorin neʼebé importante tebes. Maibé Bíblia hanorin ho klaru katak iha Maromak loos mesak deʼit, naran Jeová, no Jesus Kristu mak ninia Oan. (João 17:3) Ema Babilónia mós fiar katak ema mate nia klamar moris hela no bele hetan terus iha infernu. Ohin loron mós, relijiaun barak hanorin hanesan neʼe.

¹⁸ Tanba ema Babilónia nia adorasaun habelar tiha ona iha mundu tomak, ita bele hatete katak Babilónia Boot reprezenta relijiaun hotu neʼebé kontra hasoru Maromak Jeová. No Maromak fó-hatene nanis katak relijiaun falsu sira-neʼe sei lakon derrepente deʼit. (Apokalipse 18:8) Ita bele komprende ka lae, tansá mak importante duni atu ita haketak an husi buat hotu neʼebé iha relasaun ho Babilónia Boot? Maromak Jeová hakarak atu ita “sai husi nia” agora kedas, molok nia sei lakon.—Apokalipse 18:4.

19. Ita sei hetan saida deʼit kuandu serbí Maromak Jeová?

¹⁹ Kuandu ita deside atu haketak an husi relijiaun falsu, karik ema balu sei hadook an husi ita. Maibé, hodi serbí Maromak Jeová hamutuk ho ninia povu,  ita sei hetan buat barak liu duké buat neʼebé ita lakon. Hanesan Jesus nia dixípulu sira iha tempu uluk neʼebé husik buat barak atu tuir nia, ita mós sei hetan fali maluk kristaun barak hanesan maun no alin. Ita sei sai parte iha família boot ema kristaun loos nian iha mundu tomak, neʼebé hatudu domin neʼebé loos ba malu. No mós, ita sei iha esperansa kapás atu hetan moris rohan-laek “iha tempu neʼebé atu mai”. (Marcos 10:28-30) Karik sira neʼebé hadook an husi ita tanba ita-nia fiar, sei buka-hatene saida mak Bíblia hanorin no ikusmai sei adora Maromak Jeová hamutuk ho ita.

20. Maromak sei fó futuru kapás saida ba ema neʼebé halaʼo relijiaun loos?

²⁰ Bíblia hanorin katak Maromak sei halakon buat aat hotu iha mundu neʼe, no ninia Governu sei ukun mundu iha dalan neʼebé loos. (2 Pedro 3:9, 13) Mundu foun neʼe sei furak tebetebes! No iha neʼebá sei iha relijiaun ida deʼit, katak adorasaun neʼebé loos. Tan neʼe, diʼak atu foti desizaun agora kedas hodi halibur an ho sira neʼebé adora Maromak iha dalan neʼebé loos!