15-нҗи бап

Худая яраян сежде

Хемме динлер Худая яраярмы?

Хакыкы дини нәдип танамалы?

Шу гүнлер хак Худая ким сежде эдйәр?

1. Эгер Худая догры сежде этсек нәхили пейдасы бар?

ЕХОВА ХУДАЙ бизи сөййәр ве дурмушда герекли гөркезме берйәр. Худая догры сежде этсек, багтлы боларыс ве кынчылыклара учрамарыс. Шейле-де Худай бизе берекет берер ве көмек эдер (Ишая 48:17). Йөне дүнйәде йүзлерче дин бар. Шол диндәки адамлар Худай барада хакыкаты өвредйәндирлер өйдйәр. Эмма оларың Худай барада ве онуң кадалары барада өвредйән затлары бири-биринден тапавутланяр.

2. Ехова яраян дини нәдип танап болар ве оны билмәге хайсы мысал көмек эдер?

² Ехова яраян дини нәдип танап болар? Мунуң үчин хемме динлериң таглыматыны өвренип, олары деңешдирмек хөкман дәл. Мукаддес Язгыларың нәме өвредйәнини ве онуң хакыкы сежде барада нәме айдяныны билмели. Бир мысала середели. Көп юртларда галп пул себәпли кынчылык дөрейәр. Эгер саңа галп пулы аныкламалы дийселер нәме эдердиң? Әхли галп пулларың нәхили боляныны барлап гөрермидиң? Ёк. Муңа дерек хакыкы пулуң нәхили боляныны билмек үчин вагт сарп этсең пайхаслы боларды. Хакыкы пулуң нәхили боляныны билсең, галп пулы тапавутландырып билерсиң. Шонуң ялы-да хайсы диниң хакыкыдыгыны билсек, хайсы динлериң яландыгыны билерис.

3. Исаның айтмагына гөрә, Худая ярамлы яшамак үчин нәме этмели?

 ³ Ехованың ислейши ялы сежде этмели. Көп адамлар әхли дин Худая яраяндыр өйтсе-де, Мукаддес Язгылар башгача өвредйәр. Хатда Худая ынанмак хем етерлик дәл. Павлус ресул шейле дийди: «Олар Худайы танаяндыкларыны сөзләп, эдйән ишлери билен Оны инкәр эдйәр. Олар йигренҗи, сөзе гулак асмаз болуп, хич бир оңат ише ярарлы дәлдир» (Титус 1:16). Худая ярамлы яшамак үчин онуң талапларыны билмели ве ерине етирмели. Иса Месих Худайың ислегини ерине етирмейәнлере «беткәрлер» дийди (Матта 7:21—23). Галп пулуң хүммети болмайшы ялы, ялан диниңем гымматы ёк. Гайтам, ол зыянлы.

4. Иса Месих хайсы ики ёл барада айтды ве бу ёллар нирә элтйәр?

⁴ Ехова хер бир адама ер йүзүнде болҗак Җеннетде эбеди яшамага мүмкинчилик берйәр. Җеннетде эбеди яшамак үчин, Худая догры сежде эдип, оңа ярамлы яшамалы. Гынансак-да, көп адамлар догры сежде этмек ислемейәр. Шонуң үчинем Иса: «Дар гапыдан гириң; чүнки хеләкчилиге гетирйән гапы гиң, ёл инли, ол гапыдан гирйәнлер көпдүр. Йөне яшайша гетирйән гапы дар, ёл инсиз, оны тапянлар аздыр» дийди (Матта 7:13, 14). Хакыкы дин эбеди яшайша, ялан дин болса хеләкчилиге элтйәр. Ехова хич кимиң хеләк болмагыны ислемейәр, шонуң үчинем өзи барада билмәге әхли адамлара мүмкинчилик берйәр (2 Петрус 3:9). Бизиң гелеҗегимиз Худая эдйән сеждәмизе баглы.

ХАКЫКЫ ДИНИ НӘДИП ТАНАМАЛЫ?

5. Хакыкы дине уйянлары нәдип танамалы?

⁵ «Яшайша гетирйән... ёлы» нәдип танамалы? Иса Месих диндарларың өзүни алып баршындан хакыкы  дини танап боляндыгыны айтды. Иса: «Сиз олары мивелеринден танарсыңыз... Хер бир оңат агач оңат миве берйәндир» дийди (Матта 7:16, 17). Башгача айданыңда, хакыкы дине уйянлары оларың таглыматындан хем-де өзүни алып баршындан танап боляр. Хак Худайың бикәмил гуллукчылары ялңышсалар-да, Худайың ислегини ерине етирмәге җан эдйәрлер. Хакыкы дине уйянлары танамак үчин, алты саны айратынлыга середелиң.

6, 7. Худайың гуллукчылары Мукаддес Язгылара нәхили гараяр ве Иса Месих нәхили гөрелде галдырды?

⁶ Худайың гуллукчыларының таглыматы Мукаддес Язгылара эсасланяр. Онуң Сөзүнде шейле дийилйәр: «Язгыларың хеммеси Худайың ылхамы болуп, Худай адамы хер бир оңат иш үчин тайын, кәмил болар ялы, өвретмек, кәемек, ёла гетирмек, догрулыкда тербиелемек үчин пейдалыдыр» (2 Тимотеос 3:16, 17). Павлус ресул имандашларына шейле дийди: «Сиз Худайың сөзүни бизден эшидип кабул эдеңизде муны адам сөзи хөкмүнде дәл-де, хакыкатда болшы ялы, Худайың сөзи хөкмүнде кабул этдиңиз» (1 Селаниклилер 2:13). Гөршүмиз ялы, хакыкы диниң таглыматы адамларың гарайшына ве дәп-дессурына эсасланмаяр. Оларың таглыматы Худайың Сөзүне — Мукаддес Язгылара эсасланяр.

⁷ Иса Месих Худайың Сөзүне эсасланып, говы гөрелде галдырды. Ол гөкдәки Атасына дога эденде: «Сениң сөзүң хакыкатдыр» дийди (Яхя 17:17). Иса Месих Худайың Сөзүне ынанярды ве хемише оңа эсасланып өвредйәрди. Ол көпленч делил гетиренде: «Язылгыдыр» диййәрди (Матта 4:4, 7, 10). Соңра Язгылардан аят гетирип тассыклаярды. Шонуң ялы-да Худайың хәзирки гуллукчылары өз дүшүнҗесини яйратмаяр. Олар Мукаддес Язгыларың Худайың Сөзүдигине берк  ынанярлар, шонуң үчинем диңе Язгылара эсасланып өвредйәрлер.

8. Ехова сежде этмек нәмәни аңладяр?

⁸ Хакыкы дине уйян адамлар диңе Ехова Худая сежде эдйәр хем-де онуң адыны танадяр. Иса: «Өз Худайың Реббе сежде эт, диңе Оңа гуллук эт» дийди (Матта 4:10). Месихчилер диңе Ехова Худая сежде эдйәр. Худайың ады ве аҗайып хәсиетлери барада гүррүң бермек хем догры сеждәниң бир гөрнүши. Мукаддес Язгыларда: «Эй Ехова, Реббимиз! Бүтин ер йүзүнде Сениң адың нәхили дабаралы!» дийилйәр (Зебур 8:1). Иса адамлара Худайы танадып, бизе гөрелде галдырды. Ол Ехова дога эдип шейле дийди: «Мен дүнйәден Маңа берен өз адамларыңа Сениң адыңы танатдым» (Яхя 17:6). Шу гүнлерем хак Худайың гуллукчылары адамлара онуң ады, ниети ве аҗайып хәсиетлери барада өвредйәр.

9, 10. Месихчилериң бири-бирине болан сөйгүси нәмеден гөрүнйәр?

⁹ Худайың гуллукчылары бири-бирини ак йүрекден сөййәр. Иса: «Бири-бириңизе сөйгиңиз болса, сизиң Мениң шәгирдимдигиңизи хеммелер билер» дийди (Яхя 13:35). Илкинҗи месихчилерем бири-бирини шейле сөййәрди. Сөйги үчин социал, милли, җынс тапавуды ёк, ол адамлары доганлык гатнашыгы билен бирлешдирйәр (Колоселилер 3:14). Ялан дине уйян адамларың доганлык сөйгүси ёк. Муны биз ниреден билйәрис? Олар миллетара ве тире-тайпа даваларда өз имандашларыны өлдүрйәр. Месихчилер доганларыны я-да башга адамлары өлдүрмек үчин элине яраг алмаяр. Мукаддес Язгыларда шейле дийилйәр: «Худайың балалары билен Иблисиң балалары шундан беллидир: догрулыгы ерине етирмейән, доганыны сөймейән адам Худайдан дәлдир... Бири-биримизи сөелиң. Иблисден  болан, өз доганыны өлдүрен Кабыл ялы болмалың» (1 Яхя 3:10—12; 4:20, 21).

¹⁰ Адам өлдүрмәниң билен ак йүрекден сөйдүгиң дәл. Месихчилер адамлара көмек этмек хем-де имандашларыны рухландырмак үчин вагтыны, гүйҗүни ве серишдесини гайгырмаяр (Еврейлер 10:24, 25). Олар догручыл яшаяр ве кын гүнде бирек-биреги голдаяр. Олар Мукаддес Язгылардакы хеммелере «ягшылык этмели» диен маслахата эерйәрлер (Галатялылар 6:10).

11. Худайың Иса Месих аркалы гутулыш берҗекдигине нәме үчин ынанмалы?

¹¹ Хакыкы дине уйян адамлар Худайың Иса Месих аркалы гутулыш берҗекдигине ынанярлар. Мукаддес Язгылар шейле диййәр: «Башга хич кимде гутулыш ёкдур; биз ол аркалы гутулар ялы, гөк астында ынсанлара берлен гайры ат ёкдур» (Ресулларың ишлери 4:12). 5-нҗи бапдан билшимиз ялы, Иса гулак асян адамлар үчин җаныны төлег хөкмүнде гурбан этди (Матта 20:28). Шейле-де биз Худай оны дүнйәниң үстүнден хөкүм сүрҗек гөкдәки Патышалыгың Патышасы эдип белләндигини билдик. Худай эбеди яшамак ислейәнлерден, Иса Месихе гулак асып, онуң таглыматына эермеги талап эдйәр. Чүнки Мукаддес Язгыларда шейле дийилйәр: «Огла иман эден эбеди яшар. Огла иман этмедик яшайыш гөрмез» (Яхя 3:36).

12. Бу дүнйәден дәл диймек нәме?

¹² Хак Худайың гуллукчылары бу дүнйәден дәл. Иса судуң өңүнде дурка, Рим хөкүмдары Пилатуса: «Мениң патышалыгым бу дүнйәден дәл» дийди (Яхя 18:36). Иса Месихиң хакыкы шәгиртлери хайсы дөвлетде яшасалар-да, өзлерини гөкдәки Патышалыгың раяты хасаплаяр ве бу дүнйәниң сыясы ишлеринде битараплылыгы саклаяр. Олар давалара гошулмаяр. Муңа гарамаздан, Ехованың гуллукчылары башга адамлара  партия гирмәге ве өз кандидатурасыны сесе гоймага я-да сайлава гатнашмага пәсгел бермейәр. Месихчилер сыясы ишлерде битарап болсалар-да, дөвлет канунына табын болярлар. Нәме үчин? Себәби Худайың Сөзи «ёкары [дөвлет] хәкимиетлере табын болмага» чагыряр (Римлилер 13:1). Эмма дөвлет кануны Худайың канунына гаршы геленде, месихчилер ресулларың гөрелдесине эерйәр. Олар: «Адамдан зыяда Худая  боюн болмалыдыр» дийдилер (Ресулларың ишлери 5:29; Маркус 12:17).

13. Иса Месихиң шәгиртлери Худайың Патышалыгына нәхили гараяр ве олар нәме эдйәр?

¹³ Иса Месихиң хакыкы шәгиртлери Худайың Патышалыгының адамзат үчин еке-тәк умытдыгы барада вагыз эдйәр. Иса Месих шейле дийди: «Патышалык барадакы бу Хош Хабар хемме миллетлере гүвәлик хөкмүнде дүнйәниң әхли еринде вагыз эдилер; ахырзамана шонда гелер» (Матта 24:14). Исаның шәгиртлери ер йүзүндәки хөкүмете дәл-де, Худайың Патышалыгына умыт этмәге чагыряр, чүнки диңе шол Патышалык адамзадың кынчылыгыны чөзүп билер (Зебур 146:3). Иса пыгамбер: «Патышалыгың гелсин; Гөкде болшы ялы, ерде-де Сениң ислегиң амала ашсын» дийип, гөкдәки хөкүмет барада дога этмеги өвретди (Матта 6:10). Мукаддес Язгыларда бу Патышалык хәзирки «патышалыкларың әхлисини юмруп ёк эдер, өзи болса эбеди галар» диен пыгамберлик бар (Даниел 2:44).

14. Сениң пикириңче, хайсы дин — хакыкы дин?

¹⁴ Шулары гөз өңүнде тутуп, өзүңе шейле сораглары бер: хайсы диниң таглыматы Мукаддес Язгылара долы эсасланяр? Кимлер бири-бирини ак йүрекден сөййәр ве Иса Месихе иман эдйәр? Кимлер бу дүнйәниң ишлерине гошулман, Худайың Патышалыгының адамзат үчин еке-тәк умытдыгы барада вагыз эдйәр? Бу шертлери ким ерине етирйәр? Элбетде, Ехованың Гүвәчилери (Ишая 43:10—12).

СЕН НӘМЕ ЭДЕРСИҢ?

15. Худайың бардыгына ынанмак етерликми?

¹⁵ Худая ярамлы яшамак үчин, оңа ынанмак етерлик дәл. Чүнки Мукаддес Язгыларың айтмагына гөрә, җынларам Худайың бардыгына ынаняр (Якуп 2:19).  Эмма Худайың ислегини ерине етирмейәнлиги үчин, олар Худая ярамаяр. Худая ярамлы яшар ялы, онуң бардыгына-да ынанмалы, ислегини-де ерине етирмели. Биз ялан динден чыкып, хакыкы дини кабул этмели.

16. Ялан динде болсак нәме этмели?

¹⁶ Павлус ресул ялан дин билен хич хили шәрик болмалы дәлдигимизи айтды. Ол шейле дийди: «Реб диййәр: «Мунуң үчин оларың арасындан чыкың, олардан айрылың, мурдара галташмаң, Мен хем сизи кабул эдерин» (2 Коринтослылар 6:17; Ишая 52:11). Шол себәпли месихчилер ялан диндәки затлардан гача дуряр.

17, 18. «Бейик Бабыл» нәме ве нәме үчин ондан тизрәк чыкмалы?

¹⁷ Мукаддес Язгыларда ялан динлере «Бейик Бабыл» дийилйәр * (Ылхам 17:5). Бу ат гадымы Бабыл шәхерини ятладяр. Ол ерде Нухуң тупанындан соң ялан дин дөрәпди. Ялан диниң көп таглыматлары ве дәп-дессурлары шол гадымы шәхерден гелип чыкды. Меселем, Бабылың яшайҗылары троица сежде эдйәрдилер. Шу гүнлер болса Троица — көп динлериң эсасы таглыматы. Эмма Мукаддес Язгыларың өвретмегине гөрә, еке-тәк хак Худай — Ехова, Иса Месих болса онуң Оглы (Яхя 17:3). Бабылың яшайҗылары адам өленсоң яшаян ве эҗир чекйән бакы рухуң бардыгына-да ынанярдылар. Шу гүнлерем бакы рух ве довзах барадакы таглымат көп динлерде бар.

¹⁸ Бабылың ялан таглыматлары ер йүзүне яйрансоң, хәзирки Бейик Бабыл ялан динлериң дүнйә империясыны аңладяр. Худай бу империяның дуйдансыз ёк болҗагыны өңүнден айтды (Ылхам 18:8). Бейик Бабыла дегишли әхли затдан нәме үчин дашлашмалыдыгына  инди дүшүнйәңми? Ехова Худай хениз вагт барка, сениң ялан динден тизрәк чыкмагыңы ислейәр (Ылхам 18:4).

19. Ехова гуллук этсең, саңа нәхили пейда гетирер?

¹⁹ Кәбир адамлар ялан динден чыкяныңы билип, сениң билен гатнашыгыны кесмеги мүмкин. Эмма сен Ехованың халкы билен оңа гуллук этсең, йитирҗек задыңдан тапҗак задың көп болар. Әхли задыны ташлап Исаның ызына дүшен илкинҗи шәгиртлер ялы, көп рухы догандыр уя тапарсың. Сен бири-бирини сөййән миллионларча месихчилериң бүтиндүнйә машгаласының агзасы болуп билерсиң. Шейле-де «гелҗек дөвүрде» эбеди яшамага умыдың болар (Маркус 10:28—30). Сениң бу дини дүшүнҗәң үчин гатнашыгыны кесен адам, вагтың гечмеги билен Мукаддес Язгыларың таглыматы билен гызыкланып, Ехованың гуллукчысы болмагы мүмкин.

20. Хакыкы диндәки адамлара нәме гарашяр?

²⁰ Мукаддес Язгыларда Худайың залым дүнйәни тизден ёк эдип, Патышалыгы аркалы тәзе дүнйәни беркарар этҗеги айдыляр (2 Петрус 3:9, 13). Шонда дурмуш гөр, нәхили аҗайып болар! Ер йүзүнде Худая яраян еке-тәк хакыкы дин болар. Хәзирден башлап, хак Худайың гуллукчыларына гошулсаң пайхаслы болмазмы?

[Чыкгыт]

МУКАДДЕС ЯЗГЫЛАР НӘМЕ ӨВРЕДЙӘР?

▪ Еке-тәк хакыкы дин бар (Матта 7:13, 14).

▪ Хакыкы дини онуң таглыматларындан хем-де диндарларың өзүни алып баршындан танап боляр (Матта 7:16, 17).

▪ Ехованың Гүвәчилериниң дини Худая яраяр (Ишая 43:10).

[Макаланың сораглары]

 [147 Сахыпадакы сурат]

ХАК ХУДАЯ СЕЖДЕ ЭДЙӘНЛЕР

▪ таглыматларыны Мукаддес Язгылара эсасландыряр

▪ диңе Ехова Худая сежде эдип, онуң адыны ыглан эдйәрлер

▪ бири-бирини ак йүрекден сөййәрлер

▪ Худайың диңе Иса аркалы гутулыш берйәндигине ынанярлар

▪ бу дүнйәден дәл

▪ Худайың Патышалыгы адамзат үчин еке-тәк умытдыгыны вагыз эдйәрлер

[150 Сахыпадакы сурат]

Ехова онуң халкы билен гуллук этсең, йитирен задыңдан тапан задың көп болар