1. Ka maua pefea ne tatou a mea aogā māfai e tapuaki atu tatou ki te Atua i te auala tonu?

E ATAFAI malosi mai eiloa a Ieova te Atua ki a tatou kae e manako foki ke maua ne tatou a mea aogā mai tena takitakiga alofa. Kafai e tapuaki atu tatou ki a ia i te auala tonu, ka fia‵fia eiloa tatou kae ka puipui foki tatou mai fakalavelave e uke o te olaga nei. Ka maua eiloa ne tatou ana fakamanuiaga mo tena fesoasoani. (Isaia 48:17) E fai mai te fia selau o lotu me e akoako atu ne latou te munatonu e uiga ki te Atua. Kae e ‵kese ‵ki olotou akoakoga e uiga ki te Atua, penā foki loa mo mea kolā e manako a ia ke fai ne tatou.

2. E mafai pefea o iloa ne tatou te auala tonu ke tapuaki atu ei ki a Ieova, kae se a te tala fakatusa telā e fesoasoani mai ke maina tatou i ei?

² E mafai pefea o iloa ne koe te auala tonu ke tapuaki atu ei ki a Ieova? E se fai pelā me e ‵tau o iloilo kae fakatusatusa ne koe a akoakoga a lotu katoa. E ‵tau fua o sukesuke koe ki mea kolā e akoako ‵tonu mai i te Tusi Tapu e uiga ki te lotu tonu. Ke fai se fakatusaga: I fenua e uke, e ‵se sāle a tino i tupe faite. Kafai e ‵tau o mate mai ne koe a tupe faite mai tupe ‵tonu, ne a au mea ka fai? E mata, ka taumafai koe ke masaua a foliga o vaegā tupe faite katoa penā? Ikai. Ka ‵lei atu māfai e fakamāumāu ou taimi o iloilo aka a tupe ‵tonu. Kafai ko iloa ne koe a foliga o tupe ‵tonu, ko mafai ei o iloa ‵lei ne koe a tupe faite. E penā foki loa, kafai ko iloa ‵lei ne tatou te lotu tonu, ko iloa ‵lei foki i ei ne tatou a lotu ‵se.

3. E ‵tusa mo pati a Iesu, ne a ‵tou mea e ‵tau o fai māfai e fia talia tatou ne te Atua?

 ³ E tāua ke tapuaki atu tatou ki a Ieova i te auala telā e talia ne ia. E tali‵tonu te tokoukega o tino me e fiafia te Atua ki lotu katoa, kae e se akoako mai i te Tusi Tapu a te manatu tenā. E se lava fua i te fai atu o se tino me i a ia se Kelisiano. Ne fai mai a Iesu, penei: “E se ‵sao ki te Malo o te lagi a latou katoa kolā e fai mai ki a au, ‘Te Aliki, te Aliki,’ na ko ia fua telā e fai ne ia te loto o toku Tamana telā i te lagi.” Tela la, kafai e fia talia tatou ne te Atua, e ‵tau o iloa ne tatou a mea kolā e manako te Atua ke fai ne tatou kae ke na fai foki a mea konā. Ne taku ne Iesu a tino kolā e seki fai ne latou te loto o te Atua ki “tino amio ma‵sei.” (Mataio 7:21-23) E pelā mo te seai o se aogā o tupe faite, e seai foki se aogā o lotu ‵se. Kae e sili atu i te masei me e mafai o malaia tatou i vaegā lotu penā.

4. Se a te mea e fakauiga ki ei a pati a Iesu e uiga ki auala e lua, kae e iku atu ki fea a auala takitasi konā?

⁴ E tuku mai ne Ieova ki tino katoa i te lalolagi a te avanoaga ke maua te ola se-gata-mai. Kae ke maua te ola se-gata-mai i te Palataiso, e ‵tau o tapuaki atu faka‵lei tatou ki te Atua kae ke ola foki nei i se auala telā e fiafia a ia ki ei. Se mea fakafanoanoa, me e ita fitifiti a tino e tokouke ke fai penā. Tenā loa te pogai ne fai mai ei a Iesu, penei: “Ulu atu koutou ki te mataloa mataliki; me i te mataloa mataefa e faigofie ei te auala e tau atu ki te malaia, e tokouke foki latou kolā e olo atu i ei. Ka ko te mataloa mataliki e faigata te auala e tau atu ki te ola, e timomo foki a tino e maua ne latou.” (Mataio 7:13, 14) E iku atu te lotu tonu ki te ola se-gata-mai. Kae ko lotu ‵se e iku atu ki te fakaseaiga io me ko te malaia. E se manako a Ieova ke fakaseai io me ke malaia so se tino, kae tenā eiloa te pogai e tuku atu ei ne ia te avanoaga ki tino i koga katoa ke fakamasani atu ki a ia. (2 Petelu 3:9) Tela la, a te auala e tapuaki atu ei tatou ki te Atua, e mafai eiloa o iku atu ki te ‵tou ola io me ko te ‵tou ‵mate.

5. E mafai pefea o iloa ne tatou a tino kolā e ‵kau atu ki te lotu tonu?

⁵ E mafai pefea o maua te ‘auala ki te ola’? Ne fai mai a Iesu  me ka lavea atu te lotu tonu i olaga o tino kolā e ‵kau atu ki ei. Ana muna: “E iloa ne koutou a latou i olotou fua. . . . A te lakau ‵lei e fua mai ei fuaga ‵lei.” (Mataio 7:16, 17) I nisi fakamunaga, ka laveagofie a tino kolā e ‵kau atu ki te lotu tonu e auala i olotou talitonuga mo olotou amioga. E tiga eiloa e se ‵lei katoatoa latou kae fai mea ‵se foki, e taumafai eiloa a tino tapuaki ‵tonu katoa o fai te loto o te Atua. Ke na onoono aka tatou ki fakailoga e ono kolā e iloa ei a tino kolā e ‵kau atu ki te lotu tonu.

6, 7. Se a te kilokiloga a tavini a te Atua ki te Tusi Tapu, kae ne tuku mai pefea ne Iesu se fakaakoakoga ‵lei i te feitu tenei?

⁶ E fakavae ne tavini a te Atua olotou akoakoga ki te Tusi Tapu. E fai mai eiloa penei te Tusi Tapu: “Me i Tusitusiga Tapu katoa ne aumai mai te Atua, kae aogā ki te akoakoga o te mea tonu, ki te polopoloki, ki te fakatonu o te mea ‵se, mo te akoako atu ki te olaga ‵lei, ko te mea ko te tino telā e tavini ki te Atua, ke maua ne ia te fakamaoniga, ke lava tena uta e fai ei ne ia so se galuega ‵lei.” (2 Timoteo 3:16, 17) Ne tusi atu te apositolo ko Paulo ki ana taina Kelisiano, penei: “I te avatuga ne matou a te talaiga a te Atua, ne lagona kae talia foki ne koutou, e se ona ko te mea se talaiga a se tino, ka ko te talaiga eiloa a te Atua, kae tonu eiloa me e a te Atua.” (1 Tesalonia 2:13) Tela la, e se fakavae a talitonuga mo faifaiga a te lotu tonu ki manatu o tino io me ko olotou tuu. E fakavae eiloa ki te Muna a te Atua, ko te Tusi Tapu.

⁷ Ne tuku mai ne Iesu se fakaakoakoga ‵lei me ne fakavae ne ia ana akoakoga ki te Muna a te Atua. I tena ‵talo ki tena Tamana faka-te-lagi, ne fai atu a ia, penei: “Tau muna se munatonu.” (Ioane 17:17) Ne talitonu a Iesu ki te Muna a te Atua, kae ne fetaui ‵lei a mea katoa ne akoako atu ne ia mo te Tusi Tapu. Ne masani sāle o fai atu a Iesu, penei: “Muna a te Tusi.” (Mataio 4:4, 7, 10) Ne siki atu ei ne Iesu a pati mai te Tusi Tapu. E penā foki eiloa a tino o te Atua i aso nei, e se akoako atu ne latou olotou manatu. E tali‵tonu latou me i te Tusi Tapu ko te Muna a te Atua, kae e fakavae eiloa olotou akoakoga ki ei.

8. Ne a mea e aofia i te tapuaki atu ki a Ieova?

 ⁸ A tino kolā e ‵kau atu ki te lotu tonu e tapuaki atu fua ki a Ieova kae fakasalalau atu foki ne latou tena igoa. Ne folafola mai Iesu, penei: “Tapuaki ki te Aliki [ko Ieova] tou Atua, me ko ia fua e tavini koe ki ei!” (Mataio 4:10) Tela la, e se tapuaki atu a tavini a te Atua ki se isi tino aka, kae na ko Ieova fua e tokotasi. E aofia i te tapuakiga tenei a te fakailoa atu ki tino a te igoa o te Atua tonu mo mea e uiga ki a ia. E fai mai te Salamo 83:18, penei: “Ko te mea ke iloa ne latou me ko koe fua te Aliki [ko Ieova] e tokotasi, ko te pule tafasili i te lalolagi kātoa.” Ne fakaasi mai ne Iesu te auala ke fesoasoani atu ei ki nisi tino ke iloa ne latou te Atua, i tena ‵talo, penei: “Ko oti ne fakaasi atu ne au a tou igoa ki a latou kolā ne tuku mai ne koe ki a au mai i te lalolagi.” (Ioane 17:6) E penā foki eiloa a tino tapuaki ‵tonu i aso nei, e akoako atu ki nisi tino e uiga ki te igoa o te Atua, ana fuafuaga, mo ana uiga.

9, 10. Ne a auala e fakatau fakaasi atu ei ne Kelisiano ‵tonu te alofa?

⁹ E fakatau fakaasi atu ne tino o te Atua a te alofa tonu. Ne fai mai Iesu, penei: “Tenā te mea e iloa ei ne tino katoa ko oku soko koutou, manafai e fakatau a‵lofa koutou!” (Ioane 13:35) Ne fakatau fakaasi atu ne Kelisiano mua a te vaegā alofa tenā. E malosi atu te alofa i lō te fakailoga tino ona ko olotou lanu, olotou telega, io me ko olotou fenua kae e fai ei ke ‵kau fakatasi a tino e pelā me se kautaina fealofani telā e se mafai o fakamakosugina. (Faitau te Kolose 3:14) E se maua ne tino i lotu ‵se a te vaegā alofa fakataina penā. E iloa pefea ne tatou te mea tenā? E fakatau tamate ne latou a tino ona ko te kese‵kese o olotou fenua io me ko olotou telega. E se puke atu a Kelisiano ‵tonu ki meatau ke tamate ei olotou taina Kelisiano io me ko nisi tino. E fai mai te Tusi Tapu, penei: “Tenei te mea e iloa ei a te kesekesega o fanau a te Atua mo fanau a te Tiapolo: so se tino e se fai ne ia a te mea tonu, io me se alofa ki tona taina, e se se tama a te Atua. . . . E ‵tau mo tatou o fakatau a‵lofa. E se ‵tau mo tatou o fai pelā mo Kaino; e kau i te Tino Masei, kae ne tamate foki ne ia a tena taina.”—1 Ioane 3:10-12; 4:20, 21.

 ¹⁰ E tonu, e se fakauiga fua te alofa tonu ki te sē tamate ne tatou o nisi tino. E fakaaogā faeloa ne Kelisiano ‵tonu olotou taimi, olotou malosi, mo olotou tupe ke fakatau fesoasoani kae fakatau fakamalosi aka ei latou. (Epelu 10:24, 25) E fakatau fesoasoani atu latou i taimi o fakalavelave kae fakamaoni foki latou i olotou faifaiga katoa. A te ‵tonuga loa, e fakagalue aka ne latou i olotou olaga a te fakatonuga i te Tusi Tapu ke “fai te mea ‵lei ki tino katoa.”—Kalatia 6:10.

11. Kaia e tāua ei ke talia ne tatou a Iesu Keliso e pelā me ko te ‵tou Fakaola mai te Atua?

¹¹ E talia ne Kelisiano ‵tonu a Iesu Keliso e pelā me ko te ‵tou Fakaola mai te Atua. E fai mai te Tusi Tapu, penei: “E se maua te fakaolataga i so se tino, me e seai ake foki se igoa i lalo o te lagi ne tuku mai ki tino ke maua i ei ne tatou a te ola.” (Galuega 4:12) E pelā mo te mea ne lavea atu ne tatou i te Mataupu e 5, ne tuku atu ne Iesu tena ola e pelā me se taulaga mō tino faka‵logo. (Mataio 20:28) E se gata i ei, ne ‵tofi aka ne te Atua a Iesu ke fai mo fai te Tupu i tena Malo faka-te-lagi telā ka pule mai ki te lalolagi kātoa. Kae e manako te Atua ke faka‵logo tatou ki a Iesu kae tau‵tali atu foki ki ana akoakoga māfai e fia maua ne tatou te ola se-gata-mai. Tenā eiloa te pogai e fai mai ei te Tusi Tapu, penei: “A te tino telā e talitonu ki te Tama, ko i ā ia te ola se gata mai; ka ko te tino telā e se fakalogo ki te Tama, ka se lavea ne ia te ola.”—Ioane 3:36.

12. Ne a mea e aofia i te sē fai mo fai ne vaega o te lalolagi?

¹² E se fai a tino tapuaki ‵tonu mo fai ne vaega o te lalolagi. I te taimi ne fakamasino ei a Iesu i mua o te sui o Loma ko Pilato, ne fai atu a ia, penei: “E se mai te lalolagi nei a toku malo.” (Ioane 18:36) Faitalia te fenua e ‵nofo atu latou i ei, e fai a soko ‵tonu o Iesu mo tino o tena Malo faka-te-lagi kae e tumau latou i te sē ‵kau ki se feitu i faifaiga fakapolitiki a te lalolagi. E se ‵kau atu latou ki olotou taua. Kae e se fakalavelave atu foki latou ki mea e filifili ki ei a nisi tino e uiga ki te lotou ‵kau atu ki se potukau fakapolitiki, te lotou fai mo fai ne sui o te malo, io me ko te faiga o olotou palota. Kae e tiga eiloa e se ‵kau atu a tino tapuaki ‵tonu o te Atua ki se feitu i vaegā mea  penā, e faka‵logo eiloa latou ki tulafono a te malo. Kaia? Me e fakatonu mai te Muna a te Atua ki a latou ke “faka‵logo ki pule o te malo.” (Loma 13:1) Kafai ko fe‵paki a mea e manako te Atua ki ei mo mea kolā e fakatonu mai ne malo fakapolitiki, e fakaakoako atu eiloa a tino tapuaki ‵tonu ki te kau apositolo, kolā ne fai mai, penei: “E ‵tau mo matou o faka‵logo ki te Atua i lō te faka‵logo ki tino.”—Galuega 5:29; Maleko 12:17.

13. E pefea te kilokiloga a soko ‵tonu o Iesu ki te Malo o te Atua, kae ne a olotou mea e fai ona ko te lotou kilokiloga tenā?

 ¹³ E talai atu ne soko ‵tonu o Iesu me i te Malo o te Atua ko te fakamoemoega e tasi fua mō tino. Ne ‵valo mai penei a Iesu: “A te Tala ‵Lei tenei e uiga ki te Malo, e fakamatala atu ki te lalolagi kātoa, mo fai te molimau ki tino katoa; ko oko mai ei te gataga.” (Mataio 24:14) I lō te fakamalosi atu ki tino ke fakalagolago atu ki tino pule ke faka‵lei aka ei olotou fakalavelave, e folafola atu ne soko ‵tonu o Iesu a te Malo faka-te-lagi e pelā me ko te fakamoemoega fua e tasi mō tino. (Salamo 146:3) Ne akoako mai a Iesu ki a tatou ke ‵talo atu mō te pulega ‵lei katoatoa tenā i ana muna konei: “Ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi.” (Mataio 6:10) Ne ‵valo mai i te Muna a te Atua me i te Malo faka-te-lagi tenei ka “fakatakavale ne ia a malo katoa konā [kolā koi pule mai nei], kae ka tumau ki te se gata mai.”—Tanielu 2:44.

14. Se a te fakapotopotogā lotu telā e talitonu koe me e fai ne ia te lotu tonu?

¹⁴ Mai i mea kolā ko oti ne mafau‵fau tatou ki ei, fesili ifo ki a koe eiloa, penei: ‘Se a te fakapotopotogā lotu telā e fakavae ana akoakoga katoa ki te Tusi Tapu kae e fakasalalau atu ne latou te igoa o Ieova? Ko oi e fakaasi atu ne latou te alofa e pelā mo te Atua, e fakatuanaki ki a Iesu, e se fai mo fai ne vaega o te lalolagi, kae e folafola atu foki ne latou me i te Malo o te Atua ko te fakamoemoega tonu fua e tasi mō tino? Mai i lotu katoa i te lalolagi, se a te lotu telā e fai ne ia a mea katoa konei?’ E fakaasi manino mai i fakamaoniga ‵tonu me ko Molimau a Ieova.—Faitau te Isaia 43:10-12.

15. Ne a nisi mea e manako te Atua ke fai ne tatou kae e se ko te tali‵tonu fua me e ola tonu a ia?

¹⁵ E se lava fua i te talitonu ki te Atua ke fakafiafia atu ei ki a ia. A te ‵tonuga loa, e fai mai te Tusi Tapu me e tali‵tonu foki a temoni me e isi se Atua. (Iakopo 2:19) Kae e iloa ‵lei ne tatou me e se fai ne latou te loto o te Atua kae e se talia foki ne ia latou. Ke talia tatou ne te Atua, e se ‵tau fua o tali‵tonu tatou ki  a ia kae e ‵tau foki o fai ne tatou tena loto. E ‵tau foki o ‵vae keatea tatou mai lotu ‵se kae taofi ‵mau ki te tapuakiga tonu.

16. Ne a mea e ‵tau o fai ne tatou e uiga ki te ‵kau atu ki lotu ‵se?

¹⁶ Ne fakaasi atu ne te apositolo ko Paulo me e se ‵tau o ‵kau atu tatou ki lotu ‵se. Ne tusi mai a ia, penei: “Ne fai mai te Aliki: ‘E ‵tau o tiakina ne koutou latou, kae fakamavae keatea mo latou. Sa puke ki mea sē ‵mā, ko talia ei ne au koutou.’” (2 Kolinito 6:17; Isaia 52:11) Tela la, e ‵kalo keatea a Kelisiano ‵tonu mai i so se mea telā e aofia i ei a tapuakiga ‵se.

17, 18. Ko oi ‘Papelonia te Sili,’ kae kaia e ‵tau ei o ‘fano’ fakavave ‘keatea’ koe mai i ei?

¹⁷ E fakaasi mai i te Tusi Tapu me e aofia a lotu ‵se katoa i ‘Papelonia te Sili.’ * (Fakaasiga 17:5) E fakamasaua mai i te igoa tenā a te fa‵kai mua ko Papelonia, telā ne māfua mai i ei a lotu ‵se mai tua o te Lolo i aso o Noa. Ne māfua mai i Papelonia mua a akoakoga mo faifaiga e uke kolā e lauiloa i lotu ‵se i aso nei. E pelā mo te kau Papelonia, ne tapuaki sāle atu latou ki potukau o atua e taki tolu, io me ko atua tolutasi. I aso nei, a te akoakoga fakavae o lotu e uke ko te Tolutasi. Kae e akoako faka‵lei mai i te Tusi Tapu me e tokotasi fua te Atua tonu, ko Ieova, kae ko Iesu Keliso ko tena Tama. (Ioane 17:3) Ne tali‵tonu foki te kau Papelonia me e isi ne agaga o tino kolā e se mafai o ‵mate māfai ko ‵mate olotou foitino kae e mafai o logo‵mae a agaga konā i se koga o puapuagā. I aso nei, e akoako atu i te ukega o lotu a te talitonuga e uiga ki te agaga telā e tumau i te ola kae e mafai foki o logo‵mae i te afi i seoli.

¹⁸ Ona ko te mea ne salalau atu te tapuakiga a te kau Papelonia ki te lalolagi kātoa, e iloa tonu ne tatou me i Papelonia te Sili i aso nei ko te fakapotopotoga o lotu ‵se katoa i te lalolagi kātoa. Kae ko oti ne ‵valo mai ne te Atua me ka oko fakapoi mai te gataga ki te fakapotopotoga tenei o lotu ‵se. (Fakaasiga 18:8) E mata, e lavea ne koe te tāua ke ‵vae keatea mai so se vaega o Papelonia te Sili? E manako a Ieova te Atua ke na ‘fano fakavave  keatea’ koe mai i ei manū koi isi se avanoaga ke fai penā.​—Faitau te Fakaasiga 18:4.

19. Ne a mea ka maua ne koe mai te tavini atu ki a Ieova?

¹⁹ Kafai e fakaiku aka ne koe ke se toe kau atu ki lotu ‵se, kāti ka se toe fia fai taugasoa atu a nisi tino ki a koe. Kae mai te tavini atu ki a Ieova fakatasi mo ana tino, ka maua eiloa ne koe a mea e uke atu i lō mea kolā e mafai o ‵galo atu i ei. E pelā mo soko o Iesu kolā ne tiakina ne latou a nisi mea ke tau‵tali atu ki a ia, ka maua ne koe a taina mo tuagane faka-te-agaga e tokouke. Ka fai koe mo fai se vaega o te kāiga lasi i te lalolagi kātoa o Kelisiano ‵tonu kolā e lau i miliona kae e fakatau fakaasi atu foki ne latou te alofa tonu. Kae ka maua foki ne koe a te fakamoemoega gali ko te ola se-gata-mai “i aso konei e o‵mai.” (Faitau te Maleko 10:28-30) Fakamuli loa, kāti ka fia suke‵suke a tino kolā ne tiakina ne latou koe ona ko ou talitonuga ki mea kolā e akoako mai i te Tusi Tapu kae ka fai foki latou mo fai ne tino tapuaki ki a Ieova.

20. Ne a mea ‵gali ka maua i aso mai mua nei ne tino kolā e ‵kau atu ki te lotu tonu?

²⁰ E akoako mai i te Tusi Tapu me ko pili o fakaoko mai ne te Atua te gataga ki te lalolagi masei tenei kae ka sui ei ki se lalolagi fou kae amiotonu mai lalo i te pulega o tena Malo. (2 Petelu 3:9, 13) Ko tafaga la te gali o te lalolagi tenā! Ka tasi fua te lotu i te lalolagi fou kae amiotonu tenā, ko te tapuakiga tonu fua e tasi. Se faiga poto ke na kau atu nei koe ki tino tapuaki ‵tonu, i ne?