1. Uw rogon nra fel’ rogodad ni faan gad ra liyor ku Got nrogon nib m’agan’ ngay?

RI MA runguydad Jehovah Got ma baadag ni nge pow’iydad. Faan gad ra liyor ngak nrogon nib m’agan’ ngay, ma gad ra felfelan’ ma ra m’ay boor e magawon rodad. Maku ra flaabnagdad ma ra ayuwegdad. (Isaiah 48:17) Machane bay bokum miriay raba’ e teliw ni yad ma yog ni yad ma machibnag e tin riyul’ u murung’agen Got. Machane der tamilangnag e machib rorad ko mini’ Got nge mang e baadag Got ni ngad rin’ed.

2. Uw rogon ni gad ra fil kanawoen nib mat’aw ni ngan liyor ngak Jehovah? Mang fanathin e ra ayuwegdad ni ngad nanged e ba’ nriyul’ e teliw?

² Ra diin ma ga nang e bin riyul’ e kanawo’ ni ngan liyor riy ngak Jehovah? De t’uf ni ngam taareb rogonnag e machib ko urngin raba’ e teliw. Kemus ni ngar mu fil e n’en ni be yog e Bible u murung’agen e bin riyul’ e liyor. Baaray rogon nrayog ni ngan susunnag: Boor e nam ni ma fal’eg e girdi’ nib kireb e salpiy riy ni gathi ir e bin riyul’ e salpiy. Faan manga ka nog ngom ni ngam sapnag e salpiy nde riyul’, ma uw rogon ni ga ra nang e tin de riyul’ e salpiy? Gur, ga ra fil nge mit ngom urngin mit e salpiy nde riyul’? Danga’. Ya ra mom boch nfaanra ngam fil ngam nang e bin riyul’ e salpiy. Ma tomuren ni kam nang e bin  riyul’ e salpiy ma rayog ni ngam nang e salpiy nde riyul’. Taareb rogon ko pi yurba’ i teliw. Nap’an ni gad ra nang e ba’ nriyul’ e teliw ma rayog ni ngad nanged e pi yurba’ i teliw ni googsur.

3. Mang e yog Jesus ni thingar da rin’ed ni faanra gad baadag ni nge felfelan’ Got ngodad?

³ Ba ga’ fan ni ngad liyorgad ku Jehovah u rogon nib m’agan’ ngay. Boor e girdi’ e ma lemnag ni urngin raba’ e teliw e ba fel’ u wan’ Got, machane der yog e Bible ni aram rogon. Dabi fel’ ni kemus ni nge yog be’ ni ir reb e Kristiano. Ya ke gaar Jesus: “Gathi gubin e girdi’ ni ma piningeg ni ma lungurad Somol, Somol, e yad ra yan nga suwon Got u tharmiy, ya ke mus ni piin ni yad ma rin’ e n’en ni baadag e Chitamag nu tharmiy ni ngar rin’ed e yad ra yan ngay.” Thingar da filed e pi n’en nib m’agan’ Got ngay ni ngad rin’ed ma gad fol riy, mfin aram e ra felfelan’ Got ngodad. I yog Jesus ni piin ndarur rin’ed e tin nib m’agan’ Got ngay e ‘yad e piin ni yad ma rin’ e kireb.’ (Matthew 7:21-23) Pi yurba’ i teliw ni googsur e dariy ban’en nra fel’ ngay ni bod e salpiy nde riyul’. Ma rayog ni nge gafgow e girdi’ ni bochan e pi yurba’ i teliw ni googsur.

4. Mang fan e thin rok Jesus u murung’agen fagal pa’ i kanawo’? Ra reb fagal pa’ i kanawo’ ma be sor i yan ngan?

⁴ Ke bing Jehovah e kanawo’ ngak urngin e girdi’ nu fayleng ni nge yag e yafas ni manemus ngorad. Faanra nge yag e yafas ni manemus u Paradis ngodad, ma thingar da liyorgad ngak Got u rogon nib m’agan’ ngay. Boor e girdi’ e dubrad ni ngar liyorgad ngak Got nrogon nib m’agan’ ngay. Aram fan ni gaar Jesus: “Marod ko bin nib wen’in e garog, ya ba ga’ langan e garog ko nifiy, ma kanawo’ ni yan ngay e mmom, ma boor e girdi’ ni be yan u daken. Ma garog ko yafos e ba wen’in, ma kanawo’ ni yan ngay e mmo’maw’, ma ba lich e girdi’ ni be pirieg.” (Matthew 7:13, 14) Ba’ nriyul’ e teliw e ra pow’iy e girdi’ i yan ko yafas  ni manemus. Ma pi yurba’ i teliw ni googsur e yira thang. Dabun Jehovah ni nge yim’ be’, ere aram fan ni ke bing e kanawo’ ngak urngin e girdi’ ni ngar filed murung’agen. (2 Peter 3:9) Ere, rogon ni gad be liyor ku Got e ra turguy ko gad ra par ni gad ba fas fa gad ra yim’.

5. Uw rogon nrayog ni ngad nanged e piin ni ma fol ko ba’ nriyul’ e teliw?

⁵ Uw rogon ni ngan pirieg e ‘kanawo’ nra yan ko yafos’? I yog Jesus nra m’ug e ba’ nriyul’ e teliw ko ngongol ni yad ma rin’. Ya gaar: “Gimed ra nangrad ko ngongol rorad.” Miki gaar: “Ba ke gek’iy nib fel’ rogon e ra k’uf ma ba fel’ wom’engin.” (Matthew 7:16, 17) Yira nang e piin ni yad ba muun ko ba’ nriyul’ e teliw u daken e machib rorad nge ngongol rorad. Yugu aram rogon ni dar flontgad ma yad ma oloboch, machane yad ma guy rogon ni ngar rin’ed e tin nib m’agan’ Got ngay. Ngad weliyed nel’ ban’en ni ma m’ug rok e piin ni yad ba muun ko ba’ nriyul’ e teliw.

6, 7. Uw rogon e Bible u wan’ e pi tapigpig rok Got? Uw rogon ni i dag Jesus e kanawo’ ngodad?

⁶ Pi tapigpig rok Got e yad ma machibnag e thin nu Bible. Be gaar e Bible: “Ya urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoliyed nga babyor, me ir e ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got, ya en ni be pigpig ngak Got e nge par ni ke bung rogon nrayog ni nge rin’ urngin mit e ngongol nib fel’.” (2 Timothy 3:16, 17) I yol apostal Paul ngak e pi Kristiano kakrom ni gaar: “Gu feked e thin rok Got i yib ngomed mi gimed rung’ag nge mu’ mi gimed fol  riy, ma da mu lemniged ni thin rok e girdi’, ya mu lemniged ni thin rok Got, ni er e bin ni ir, ya ri ir e thin rok.” (1 Thessalonika 2:13) Machib nge ngongol rok e piin ni ma fol ko ba’ nriyul’ e teliw e gathi sum ko lem rok e girdi’ ara yalen ko girdi’. Ya ke sum ko Thin Rok Got nu Bible.

⁷ I dag Jesus e kanawo’, ya machib rok e ba puluw ko Thin rok Got. Nap’an ni i meybil ngak e Chitamangin nu tharmiy, me gaar: “Mu fil ngorad e tin nib riyul’, ni er e thin rom.” (John 17:17) Ba mich e Thin rok Got u wan’ Jesus, ma urngin ban’en ni i machibnag e bpuluw ko thin nu Bible. Boor yay ni i yog Jesus ni gaar: “Fare babyor nib thothup e be gaar.” (Matthew 4:4, 7, 10) Ma aram e ra beeg e n’en ni bay ko Bible. Ku arrogon e ngiyal’ ney nder ma machibnag e girdi’ rok Got e pi n’en ni sum u lanin’rad. Ya ba mich u wun’rad ni Bible e ir e Thin rok Got, ma urngin e machib rorad e ba puluw ko Bible.

8. Mang e ku ma rin’ e piin ni ma liyor ku Jehovah?

⁸ Piin ni ma fol ko ba’ nriyul’ e teliw e goo Jehovah e yad ma liyor ngak ma yad ma lingagilnag fithingan. I gaar Jesus: “Mu ta’ fan Somol [“Jehovah,” NW] ni Got rom ma yigoo ir e ngam pigpig ngak!” (Matthew 4:10) Ere, pi tapigpig rok Got e goo Jehovah e yad ma liyor ngak. Piin ni ma liyor ku Jehovah e yad ma fil ngak yugu boch e girdi’ rarogon nge fithingan e bin riyul’ e Got. Be gaar e Psalm 83:18, NW: “Nge nangem e girdi’ ni fithingam e Jehovah ni gur e Th’abi Tolang u ga’ngin yang e fayleng.” I dag Jesus e kanawo’ u rogon ni ngan ayuweg yugu boch e girdi’ ni ngar nanged Got, ya i gaar ko meybil rok: “Ku gog fithingam ngak e piin ni kam pi’rad ngog u fayleng.” (John 17:6, NW) Piin ni ma liyor ngak Got e yad ma fil ngak e girdi’ fithingan nge pi fel’ngin nge tin nib m’agan’ Got ngay.

9, 10. Mang boch ban’en ni ma rin’ e tin riyul’ e Kristiano ni ngar daged e t’ufeg ngorad?

⁹ Girdi’ rok Got e ra bagayad ma ma t’ufeg bagayad.  I gaar Jesus: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) Aram rogon e t’ufeg ni i dag e tin som’on e Kristiano. Fare t’ufeg ni be weliy e Bible murung’agen e bay u thilin e piin nib thilthil e nam rorad nge yalen rorad ma ra kunuy e girdi’ nga taabang mar walaggad. (Mu beeg e Kolose 3:14.) Re t’ufeg ney e dariy u fithik’ girdien e pi yurba’ i teliw ni googsur. Uw rogon ni gad ra nang? Yad ma un ko mahl mar lied yad ni bochan e ba thil e nam rorad nge yalen rorad. Machane tin riyul’ e Kristiano e darur uned ko mahl ya dubrad ni ngar lied pi walagrad ara yugu boch e girdi’. Be gaar e Bible: “Baaray e re n’en nib gagiyel nib thil u thilin e piin ni pi fak Got nge piin ni pi fak moonyan’: en nde rin’ e tin nib mat’aw ara de t’uf rok e en ni walagen ni girdien Kristus e gathi ir be’ ni fak Got. . . . Thingari bagadad me t’uf rok bagadad. Thingar dab da boded Kain ni i par nib mil fan ngak Faanem nib Kireb, me li’ walagen ni pumoon nge yim’.”​—1 John 3:10-12; 4:20, 21.

¹⁰ Ra ngan dag e bin riyul’ e t’ufeg ma gathi kemus ni be yip’ fan ndab nli’ be’ ngem’. Piin Kristiano e yad ma fanay e tayim rorad, nge gelngirad, nge tirorad ban’en ni fan e ngar ayuweged fa ra pied e athamgil nga lanin’rad. (Hebrews 10:24, 25) Yad ma ayuweged yad u fithik’ e gafgow ma yad ba yul’yul’ ngorad. Ya yad ma fol ko fare fonow nu Bible ni be yog ni “ngar ngongliyed e ngongol nib fel’ ngak urngin e girdi’.”​—Galatia 6:10.

11. Mang fan nthingari mich u wun’dad nu daken Jesus Kristus e ra yag e yafas ni manemus riy ngodad?

¹¹ Mmich u wan’ e tin riyul’ e Kristiano ni kemus nu daken Jesus Kristus e ra yag e yafos ngak e girdi’ riy. Be gaar e Bible: “Ke mus ni Jesus e rayog rok ni nge thapeg e girdi’ ngak Got; ya dakuriy yugu reb e ngachal nga bayang u roy u fayleng ni pi’ Got ngak e girdi’, ni ir e rayog rok ni nge  thapegdad ngak Got.” (Acts 4:12) Kad weliyed u lan e Guruy ni 5 ni pi’ Jesus e yafas rok ni nge biyuliy e girdi’ ni yad ma fol rok Got. (Matthew 20:28) Miki dugliy Got Jesus ni nge Pilung u Gil’ilungun u tharmiy, ma ra gagiyegnag e fayleng ni polo’. Ma baadag Got ni ngad folgad ma gad rin’ e n’en ni ke machibnag Jesus ni faanra gad ba adag e yafas ni manemus. Aram fan ni gaar e Bible: “En nra mich u wan’ e en ni Fak Got e aram e ke yog e yafos ndariy n’umngin nap’an ngak; ma en ndabi fol rok e en ni Fak Got e dabiyog e yafos ngak.”​—John 3:36.

12. Mang e ma rin’ e pi Kristiano ni bochan e gathi yad bang ko re fayleng ney?

¹² Piin ni yad ma liyor ku Got e darur uned ko ngongol ko fayleng. Nap’an nni pufthinnag Jesus u p’eowchen Pilate, me gaar: “Gin nsuwog e dariy u roy u fayleng.” (John 18:36) Demtrug e nam ni bay pi gachalpen Jesus riy ma yad ma fol u Gil’ilungun Got. Aram fan ndarur uned nga ngongolen e pi am nu fayleng. Ma piin ni yad ma liyor ku Jehovah e darur uned ko maluagthin nge togopuluw u thilin e am, maku darur togopuluwgad ngak e piin ni kan towaliyrad ni ngar feked reb e liw nib tolang ko am, ara piin ni kar uned ko towal. Yugu aram rogon ni yad ma par u mathilin e ngongol ko pi am nu fayleng, machane yad ma fol ko motochiyel. Mang fan? Ya Thin rok Got e ke tay chilen ngorad ni “thingar ra folgad ko am” ara pi pilung nu fayleng. (Roma 13:1) Ma faanra ba togopuluw e n’en ni ke tay Got chilen ko pi n’en ni be yog e am, ma piin ni ma liyor ku Got e thingar ra folgad ko thin rok e pi apostal ni lungurad: “Thingar gu folgad rok Got ko bin ni nggu folgad rok e girdi’.”​—Acts 5:29; Mark 12:17.

13. Uw rogon Gil’ilungun Got u wan’ e piin ni yad ma folwok rok Jesus? Mang e yad ma rin’ ni bochan e re n’ey?

¹³ Tin nriyul’ i gachalpen Jesus e yad ma machibnag ni kemus ni Gil’ilungun Got e ra pithig e pi magawon nu fayleng.  I gaar Jesus: “Ma re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matthew 24:14) Piin ni ma folwok rok Jesus Kristus e yad ma machibnag ni Gil’ilungun Got u tharmiy e ra pithig urngin e magawon rok e girdi’. (Psalm 146:3) I fil Jesus ngodad ni ngad yibilayed e re am nem ni faani gaar: “Ma ga par ni gur e ga be gagiyegnagmad, min rin’ e tin nib m’agan’um ngay u roy u but’ ni bod rogon ni yibe rin’ u tharmiy.” (Matthew 6:10) Be yog e Thin rok Got nre Gagiyeg nem e ra “thirif u but’ urngin e pi pilung nem nge gagiyeg ni yad be tay [ni be yip’ fan e pi am ni bay e chiney] me mang fa birok e gagiyeg e i par ndariy n’umngin nap’an.”​—Daniel 2:44; Revelation 16:14; 19:19-21.

14. Kun raba’ e teliw e ga be lemnag ni ma fol ko bin riyul’ e liyor?

¹⁴ Am lemnag fapi n’en ni kad weliyed ma ga fithem ko: ‘Kun raba’ e teliw e ba puluw e machib rorad ko thin nu Bible, ma yad be lingagilnag fithingan Jehovah? Mang ulung e bay e t’ufeg rorad, ma ba mich Jesus u wun’rad, ma yad ma par ni yad ba dar ko re fayleng ney, ma yad ma machibnag ni kemus ni Gil’ilungun Got e ra pithig e pi magawon rok e girdi’? U fithik’ urngin raba’ e teliw u fayleng, kun raba’ e ma fol u gubin e pi n’ey?’ Rib tamilang ni kemus ni Pi Mich Rok Jehovah.​—Mu beeg e Isaiah 43:10-12.

15. Mang e ku baadag Got ni ngad rin’ed?

¹⁵ Gathi kemus ni nge mich u wan’um ni bay Got. Ya be yog e Bible nib mich u wan’ e pi moonyan’ ni bay Got. (James 2:19) Machane ba tamilang ni darur rin’ed e tin nib m’agan’ Got ngay. Gathi kemus ni nge mich u wun’dad ni bay Got ya thingar da rin’ed e tin nib m’agan’ ngay. Ku thingar da paloggad ko pi yurba’ i teliw ni googsur ma gad un ko bin riyul’ e liyor.

16. Mang e thingar da rin’ed ko machib ko pi yurba’ i teliw ni googsur?

 ¹⁶ I tamilangnag apostal Paul nthingar dab da uned ko liyor ni googsur. I yoloy ni gaar: “Me ere yog Somol ni gaar: Thingar mu chuwgad rorad, ngam pithiged gimed rorad. Ma dariy ban’en ni ngkum rin’ed ko n’en nde klin, ma aram e gimed ra yib ngog.” (2 Korinth 6:17; Isaiah 52: 11) Tin riyul’ e Kristiano e thingar ra paloggad ko urngin mit e machib ni googsur.

17, 18. Mang e “Babylon nib Gilbuguwan,” ma mang fan nthingar mu “chuw riy”?

¹⁷ Ke tamilangnag e Bible ni urngin raba’ e teliw ni googsur e bang ko “Babylon nib Gilbuguwan.” * (Revelation 17:5) Re ngachal nem e ma puguran ngodad fare mach nu Babylon kakrom, ni aram e gin ni sum riy e pi yurba’ i teliw ni googsur u tomuren fare Ran ni Tharey e Fayleng u nap’an Noah. Boor e machib nge ngongol ni bay ko pi yurba’ i teliw ni googsur ni sum u Babylon kakrom. Bod ni piyu Babylon e ur liyorgad ko trinitas. Trinitas e ir kenggin e machib u boor raba’ e teliw e ngiyal’ ney. Yad ma yog ni chitamangiy nge fak nge fare kan ni thothup e ba taareb. Machane ba tamilang e machib nu Bible ni be weliy ni kemus ni taareb e Got nriyul’ ni bay ni aram Jehovah, ma Jesus Kristus e Fak Got. (John 17:3) Ku ma machibnag piyu Babylon nap’an nra yim’ be’ ma bay ban’en rok ni ku ma par nib fas nrayog ni nge yan nga bang ngaun gafgownag. Ngiyal’ ney e yooren raba’ e teliw e ma fil e re machib ney.

¹⁸ Bochan ni ke garer e machib nu Babylon kakrom nga gubin yang u fayleng, ma rayog ni nga nog ni Babylon nib Gilbuguwan e be yip’ fan urngin raba’ e teliw ni googsur. I yog Got u m’on riy ni bayi thang e pi yurba’ i teliw ni googsur. Ere, ke tamilang u wan’um fan ni thingar mu chuw u fithik’ urngin ban’en nib sor fan ko Babylon nib Gilbuguwan, fa? Baadag Jehovah Got ni ngam “chuw riy” nib papey ko ngiyal’ ni ka bay e tayim.​—Mu beeg e Revelation 18:4, 8.

19. Mang e ra yag ngom ni faan ga ra pigpig ku Jehovah?

 ¹⁹ Bochan e kam turguy ndab kum un ko teliw ni googsur, ma sana boch e girdi’ e dabkur chaggad ngom. Machane faan gimed ra pigpig e girdi’ rok Jehovah u taabang, ma ra yoor ban’en ni ga ra nang. Bod rogon e tin som’on i gachalpen Jesus ni ur paged boch ban’en ni fan e ngar leked Jesus, ere ku arrogon gur nra yoor pi walagem ni girdien Kristus. Ga ra un nga bokum milyon e girdi’ ni Kristiano ni kar taarebgad ni bod rogon ba tabinaw ni yad ma t’ufeged yad. Maku ra yag e yafas ni manemus ngom ko “bin ni bay yib e tamilang.” (Mu beeg e Mark 10:28-30.) Sana piin ni kar paged gur ni bochan e machib ni kam un ngay e ku rayog ni nge munmun mi yad un i fil e Bible mar liyorgad ngak Jehovah.

20. Mang e bay nga m’on ni fan ngak e piin ni yad ma fol ko ba’ nriyul’ e teliw?

²⁰ Be yog e Bible ni dabki n’uw nap’an ma ra thang Got e re m’ag nib kireb ney, me tay reb e m’ag nib beech mab mat’aw nga lon ni Gil’ilungun e be gagiyegnag. (2 Peter 3:9, 13) Ra fel’ rogon e par e ngiyal’ nem! Kemus ni taareb e teliw nra par u lan e re m’ag nib beech nem. Ere, gab gonop nfaanra mu un ngak e piin ni yad ma liyor ngak Jehovah e ngiyal’ ney.