1. Gini aundo rengbe ani ka gbiaha ka ani airiso Mbori ngba ruru gene?

YEKOVA MBORI naberãpa rani aberã na kini idi ani gbia undo be agu arugute ko afuhe furani. Ka ani airiso Mbori ngba ruru gene, ani duadu na ngbarago na ki neke dungu fudifudiapai. Si ka sa gupai a nga ani gbia undo gbiati amaku beko. (Yesaya 48:17) Ono tie, badungu apambori duho areme nga gu naya wẽ si nayugo rengo tipa Mbori. Ono si nayugo apai ni bakiakia tipa Mbori na gupai ko akpinyemuhe berani.

2. Wai rengbe ani ka ino gu ndikidi gene si aida ani irisi Yekova ngbaha, na gini kpiapai naundo rani ani girogo gipai yo re?

² Wai rengbe mo ka ino gu ndikidi gene si aida mo niirisi Yekova ngbaha? Si aidanga mo wisigi agu ayugopai nga ga apambori awisigo dunduko mbata te. Gupai si aidaha nga mo wiriki agu apai nzunzu Ziazia Kekeapai ayugoho tipa ndikidi irisombori. Ani bingo kpiapai: Rogo dungu aringara, pai gudu ho nga ga fotokopi marã. Ka i fu sunge foro nga ga dungura afotokopi marã, mo mangihe wai? Ya mo gupai ka mo mangihe nga ka kparia angbatunga afotokpi marã dunduko ki zi paha ku riro yo? Oó. Gu  ngba nga ka kparia ndikidi marã tipa ka inoho wenengai. Fuo ino mo gu marã nga ndikidihe, mo nika ino gu marã aino nga fotokopi. Wakina gure a, ka ani ini ndikidi pambori, si nika undo rani ani ini agu apambori angianga ndikidihe ya.

3. Ringbisihe kuti gupai Yesu agumbaha, ginipai si aida ani mangihe tipa Mbori idi na ani?

³ Si ni nyanyakipa pai ani irisi Yekova ngba gu gene ko aidaha. Dungu aboro idi kuti gupai nga, apambori dunduko ngba ti Mbori, ono Ziazia Kekeapai ayugongo pai wa gure te. Na anga gupai si aidaha gbua nga boro ya wẽ Kristano nga ní te. Yesu aya: “Agu yo naya ti re, ‘Gbia, Gbia,’ i aríma nga ku rogo gu ngbi nga ga ngbangbaturũ dunduko te; kina gu ni namanga wa Buba akpi nyemu he du ngbangbaturũ yo.” Tipa Mbori idi na ani, ani duwa ka ani wiriki gupai ko akpinyemuhe berani na ani kini mangihe. Agu aboro amanganga gupai Mbori akpinyemuhe ya, Yesu aya tipa yo wẽ i nga “amangi irairapai.” (Matayo 7:21-23) Zire apambori wakina fotokopi marã adunga sunge ti ni ya. Gu gberẽ berewe nga, agu apambori re namanga aboro amanga gbegberẽ.

4. Rogo gupai yo Yesu apehe tipa agene ue nga gine, na wari agu agene du ue re andu kuhoni?

⁴ Yekova fu momu fu agu aboro dunduko du auru kpotosende i gbia nyenye unga. Ono tipa ani gbia nyenye unga Paradizo yo, ani duwa ka ani airiso Mbori ngba ruru gene na kini raki awere ngba gu gene ko aidaha. Ono tie, badungu aboro aidanga ka manga gipai re te. Si du Yesu aya ti ni wẽ: “Oni rími rogo pangipangi ngbadimo; bambiko gu ngbadimo na gu gene nangbe koyo du kpio ni, si du ni kikii he,  ni basisi he, dungu aboro narima koyo. Bambiko gu ngbadimo na gu gene nangbe koyo du unga ni, si du ni pangipangi he, ni fitikiri he, aboro nabi he ni kina umba yo.” (Matayo 7:13, 14) Ndikidi pambori nandu na boro sa nyenye unga. Zire pambori nandu na boro sa kpio. Yekova aidanga boro kpi te, na si du ko afu momu ti ni fu aboro rogo arago dũ i wirikipai tipa ko. (2 Petero 3:9) Sidu tie, gu gene ani airiso Mbori ngbaha, si rengbe ka ndu na ani singia sa unga watadu sa kpio.

5. Wai rengbe ani ka ino agu aboro namanga ndikidi pambori?

⁵ Wai rengbe mo ka gbia ‘gu gene nangbe koyo du unga ni’? Yesu aya wẽ i nika ino ndikidi pambori ti gu raka nga ga agu aboro du rogoho. Sangbako nga: “Oni aína yo ti zuzuyo. . . . Wene ngua nazu wene rinde; ono gbegberẽ ngua nazu gbegberẽ rinde.” (Matayo 7:16, 17) Ka pehe ngba kura gene, agu aboro namanga ndikidi pambori, i naino yo ti gayo aida na gayo mangaapai. Wa vura duhe nga ndikidi airisimbori nga kpakpa aboro na i naingapai ainga, i naˈasadatiyo nyanyaki ka manga gupai Mbori akpinyemuhe. Ani wisigingo apai sita nga gu i aino agu aboro ti ni namanga ndikidi pambori.

6, 7. Wai ga Mbori aboro abi Ziazia Kekeapai, na wai Yesu amoi wene kpiapai rogo gipai re?

⁶ Ndikidi airisimbori namaamburu agu apai i ayugoho rii Ziazia Kekeapai. Ziazia Kekeapai nitihe naya: “Ziazia Kekeapai dunduko si aye be ga Mbori Toro si ki rengbe tipa yugopai, tipa zapai, tipa ruga aboro, na tipa raba aboro rogo rurupai; ya ga Mbori boro du ziazia, aũ manga wene apai dunduko ki du  be ni.” (2 Timoteo 3:16, 17) Gu mokedi nangia Pauro akepai fu agu aKristano naadu Tesaronika yo ki ya: ‘Oni adi gupai oni agi kugume berani nga kina ga Mbori pai, oni adianga ha wa ka si angia ga aboro pai te, ono niga Mbori pai.’ (1 ATesaroniko 2:13) Sidu, agu aida na mangaapai nga ga ndikidi pambori, mburuhe rii agu aberã nga ga aboro watadu sino atitase te. Mburuhe rii Sangba Mbori nga Ziazia Kekeapai gako toro adu kugiipa kehe.

⁷ Yesu Kristo amoi wene kpiapai ni maako mburu agu apai ko anaayugoho rii Sangba Mbori. Yesu aya fu Mbori rogo kpee yo wẽ: “Ga pai nga rengo.” (Yoane 17:17) Yesu aima ida kuti Sangba Mbori, na gako ayugopai dunduko anaandu na kina gupai Ziazia Kekeapai apehe. Gupai Yesu anaapehe gbe nga: “Si ni keke he ya . . . . ” (Matayo 4:4, 7, 10) Tifuo gure, ko kini gumba gupai du rogo Ziazia Kekeapai. Wakina gure a, ga Mbori aboro areme ayugongo gayo aberãpai te. Gupai idiyo kutini nga Ziazia Kekeapai nga Sangba Mbori, na i namaamburu gayo ayugopai riihe.

8. Gini apai iriso Yekova akodaha?

⁸ Agu aboro du rogo ndikidi pambori nairiso kina Yekova sa, na kini yugu rimoko fu aboro. Yesu aya: “Mo irisi Gbia nga gamo Mbori mo rá fu kina ko.” (Matayo 4:10) Rimo Mbori rogo Pa Fu Rugute ni Ue he 6:13, nga gu veresi Yesu adihe ki gumbaha kuari re. Sidu, ga Mbori aboro airisongo kura mbori berewe kpara ti Yekova te. Gi irisombori re nakoda undo aboro i ini rimo ndikidi Mbori na gu ngbatunga boro nga ko. Atambuahe 83:18 naya: “Kina ro sa, du rimoro nga Yekova, nga gu Ko nga Bahe ki  susi auru kpotosende dunduko.” Yesu amoi kpiapai ni undoko aboro i ini Mbori, a wa ko agumbaha rogo kpee fu Mbori ki ya: “Mi yugu rimoro fu agu aboro mo afu yo fere zegino.” (Yoane 17:6) Wakina gure a, ndikidi airisi Mbori nayugo rimo Mbori fu aboro, na ga Mbori aringbisapai, gbiati asino Mbori.

9, 10. Rogo gini agene ndikidi aKristano ayugo nyemuse tipa akurayo?

⁹ Ndikidi airisimbori nayugo ndikidi nyemuse tipa akurayo. Yesu aya: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yoane 13:35) Agu aKristano naadu mbata aima du na ndikidi nyemuse tipa akurayo. Gu nyemuse Ziazia Kekeapai aya ani yuguhe, si nga gu nyemuse nasa aboro i kpinyemu agu aboro du rangi kpotoyo kia, watadu du ngbatungayo kia, na kini sa aboro i du na zereda dagbayo, na ka i dunga na kparakaro ya, singia i nga airakumuko watadu airarungo. Gi nyemuse re nasa aboro i du ni kpamiakpamiayo wa awirina sa. (Mo gedi AKorosaio 3:14.) Agu aboro du rogo zire apambori, i na nyemuse wa gure dagbayo te. Ani naino gipai re wai? Ani nainoho ti gupai nga i naso avura dagbayo kini imi tiyo. Ndikidi aKristano adianga aũvura ka imo agu akurayo nga aKristano watadu gu kura aboro a te. Ziazia Kekeapai naya: “Gu ni ka amanga nga rurupai ya ga Mbori ni nga ni te, na gu ni adu nga nyemu wirinani ti ni ya. . . . Nyemu akuarani du ti rani; [angianga] wa Kaina adu ni ga gbegberẽ ko ko ki imi wirinako” ya.—1 Yoane 3:10-12; 4:20, 21.

¹⁰ Ono tie, ndikidi nyemuse asanga rani ani he kina imo aboro sa te. Ndikidi aKristano namangasunge na  gayo regbo, gayo ome, na gayo ahe tipa ka undo akurayo na ka nyakasayo. (AEbere 10:24, 25) I naundo akurayo ho du yo ni rogo gberãngbi, na i amanganga akurayo ni biriki te. I namanga gu rugute rogo gayo raka Ziazia Kekeapai afuhe ki ya ani “mangi gu pai amanga ngba angba fu aboro dunduko.”—AGaratio 6:10.

11. Tipagine duhe ti ni ni nyanyakipa pai ka idapa Yesu ni gu boro Mbori asiani ani gbia bata mbiko ní?

¹¹ Ndikidi aKristano idi kuti Yesu ni gu boro Mbori asiani aboro bati mbiko ní. Ziazia Kekeapai naya: “I abata nga mbiko kura boro te; bambiko kura rimo zegino fu yo ku dagba aboro ani abata mbiko ho te.” (Amokedi 4:12) A wa ani abihe rogo Kapita 5, Yesu afu gako unga ni motumo tipa aboro-giasangba gbia unga. (Matayo 20:28) Kurigure, Yesu nga gu boro Mbori namoi ní ni bakindo gu gako Kindo du ngbangbaturũ yo nga gu nika zoga kpotosende dunduko. Mbori naida gupai nga ani naagiasangba Yesu na kini mangi agu apai ko ayuguhe ka ani aida ka gbia nyenye unga. Si du Ziazia Kekeapai aya ti ni: “Gu ni ka idi pa Wiri nyenye unga du adu be ni; ono gu ni ka gia nga sangba Wiri ya, ni bi nga unga te.”—Yoane 3:36.

12. Zanga du ni boro zegino nakoda gini apai?

¹² Ndikidi airisimbori nga aboro zegino te. Ho Yesu adu ni ngbangayo barabangiri gu ga aRomo bazogo nangia Pirato, Yesu aya: “Gi ngbi aenga nga rogo gi zegino te re.” (Yoane 18:36) Ndikidi apefuo Yesu rogo zegino dunduko nara kutiibe ga Mbori Kindo na i arimisongo tiyo ku rogo agu apai nga ga birĩ-zogarago te. I arimisongo tiyo ku rogo agu  atagbagapai nga ga zegino a te. Ono wa vura duhe were, i azanga aboro ti gupai aboro aida ka mangaha te, singia i naida kadu rogo kura riigbu nga ga birĩ-zogarago, i naida ka ru i ba waraga fuyo, watadu i naida ka ba waraga fu boro. Na wa vura duhe nga ndikidi airisimbori arimisongo tiyo ku rogo agu apai nga ga birĩ-zogarago te, i nairisa agu andiko airisa nga ga ringara. Tipagine? Bambiko Sangba Mbori naya fuyo wẽ i “rá ara” fu “abaira tandu” nga ga zegino yo. (ARomo 13:1) Ho duhe ni nga irangbii naya wẽ ndikidi airisimbori mangi gupai Mbori aidanga ha ya, i namangapai wakina gu amokedi amangihe, nga aguyo naya: “Ani gi nga sangba Mbori agia susi ga aboro.”—Amokedi 5:29; Marako 12:17.

13. Wai ndikidi apefuo Yesu abi ga Mbori Kindo, na gipai re nasayo i naamanga wai?

¹³ Ndikidi apefuo Yesu natungusapai tipa ga Mbori Kindo ya si nika mbakada agu apai dunduko nga ga aboro. Yesu aya: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ.” (Matayo 24:14) Ndikidi apefuo Yesu Kristo angarasanga aboro i naamaabangiriyo kuti agu abazogo nga ga zegino yo ya i nika mbakada gayo apai te, ono i natungusapa ga Mbori Kindo ya si du nika mbakada ga aboro apai. (Atambuahe 146:3) Yesu aya furani ani nikpari tipa gu ruru zogarago re niya: “Ga ngbi yé, Ani mángi rogo kpotosende wa mo akpi nyemu he, Wa du he ngbangbaturũ yo.” (Matayo 6:10) Sangba Mbori nape gupai ga Mbori Kindo nika mangaha niya, “si akúadi agi angbi re rukutu ki digisi he dunduko, si ki nye anye kindi.”—Daniere 2:44; Yugoti 16:14; 19:19-21.

14. Gini kanisa duho namanga agu apai si aida ndikidi airisimbori naamangaha?

 ¹⁴ Ringbisihe kuti agu apai ani nabihe re, mo sananga tiro nga: ‘Gini pambori watadu kanisa duho areme namaamburu agu apai si ayugoho rii Ziazia Kekeapai na kini yugu rimo Yekova fu aboro? Gini kanisa duho du na gu nyemuse Mbori aida ani du na  ni, du na idapase kuti Yesu Kristo, arimisongo tihe ku rogo agu apai nga ga zegino ya, na kini tungusipa ga Mbori Kindo ya kinaha nika mbakada agu apai nga ga aboro? Dagba agu apambori watadu akanisa du auru kpotosende dunduko, ginigu namanga agi apai re dunduko?’ Kina ga aDezire Yekova sa.—Mo gedi Yesaya 43:10-12.

15. Ginipai Mbori aidaha berani kurii gu nga ka ida kuti gupai nga ko kina ti ni?

¹⁵ Anga gupai gbua si aida mo mangihe nga mo idi kuti Mbori te. Zavura adaimona, i ima ida kuti gupai nga Mbori kina ti ni. (Yakoba 2:19) Ono wa i navura ida kuti ni wo, i amanganga gupai Mbori akpinyemuhe te, na ko aidanga na yo a te. Tipa Mbori idi na ani, si naida ani idi kuti gupai nga ko kina ti ni na ani kini mangi gupai ko akpinyemuhe. Si naida gupai a nga ani kuru kusayo rogo zire pambori na ki rimi ndikidi pambori.

16. Ginipai si aida mo mangihe nibipa zire irisombori?

¹⁶ Gu mokedi nangia Pauro ayugu gupai nga si aidanga ani rimisi tirani wagu tooni ku rogo agu apai nga ga zire irisombori te. Ko akepai ki ya: “Oni kúru dagba yo yo, ki kparaka, wo poi Gbia, ka oni zádi nga birikobiriko he ya, mi ki di roni adia kugume.” (2 AKorindo 6:17; Yesaya 52:11) Ndikidi aKristano arimisongo tiyo ku rogo agu apai nabipa zire irisombori te.

17, 18. Gine nga “Babera du ni bakere he,” na tipagine si aida ti ni mo “kúru yo” ni ipo?

¹⁷ Ziazia Kekeapai nayugo gupai nga, gu badungu azire apambori du rogo zegino dunduko, si nga papara  “Babera du ni bakere he.” * (Yugoti 17:5) Gu rimo re natingida rani na pa gu bakporo nangia Babera, nga gu bakporo zire pambori aenge rogoho tingbafuo gu Ime Akangbii naye ti rago Noa. Badungu agu ayugopai na amangapai du areme rogo zire apambori aenge kina Babera yo bakuru kusayo. Ni kpiapai, aBabero anaairisa agu ambori nangia tirinita, watadu ambori babiata. Areme, gu bangua yugopai nga ga dungu apambori nga Tirinita, nga gu yugopai naya Mbori sa aboro kidurogoko yo biata, rengbeyo arengba. Ono Ziazia Kekeapai nayugo gupai ziazia nga ndikidi Mbori ho gbua kina sa, nga Yekova, na Yesu Kristo nga Wiriko. (Yoane 17:3) ABabero aidi kuti gupai a nga boro na kina he rogoniyo nga mbisimo nga gu akpingo ho boro akpi ni ya, na si rengbe arengba ka mbu bambusa yo fuo kpi boro. Areme, dungu apambori nayugo gupai nga mbisimo watadu toro boro narungo rogo we nga iferno.

¹⁸ Wa duhe nga gu irisombori nangia ga aBabero aima gbandaka auru kpotosende dunduko, si ruaru i naayamba agu azire apambori du areme nga Babera. Ziazia Kekeapai naya wẽ Mbori nika gbarasa agu apambori re agbarasa dunduko vuru guru regbo yo. Ya mo mo bi gupai duhe ti ni foro ni nyanyakipa pai mo kpara tiro ti Babera? Yekova Mbori naida mo “kúru yo” ni ipo mbata fu regbo gbarasaha da.—Mo gedi Yugoti 18:4, 8.

19. Gini weneapai mo nika gbiaha mbiko iriso mo Yekova?

¹⁹ Kura aboro rengbe arengba ka mbu ro mbiko mo diberã ka kura kusayo rogo agu apai nga ga zire  pambori. Ono ka mo airiso Yekova na gako aboro, mo nika gbia dungu weneapai susi gu ka mo zangaha. Wakina gu ga Yesu abawiriki naadu mbata nga aguyo nambu apai dunduko ka pekako, mo nika gbia dungu awirina nga akumba na adee. Mo nika du ni papara gu riigbu nga ga ndikidi aKristano nga aguyo du rogo zegino dũ. Agi aboro re nikaa yugo ndikidi nyemuse tipa ro. Mo nika du a na gu bawene maabangirise nga ga gbia nyenye unga “rogo gu ngbi nikadu yo.” (Mo gedi Marako 10:28-30.) Isoke kusa, agu aboro nika sogaro mbiko gamo aida, i nika wisigo agu apai awisigo Ziazia Kekeapai ayugoho na ki da ni airisi Yekova a.

20. Ginipai nika manga ku mbatayo tipa agu aboro namanga ndikidi pambori?

²⁰ Ziazia Kekeapai nayugo gupai nga Mbori ima mbeda ka ye na digido gi zegino re na ki ye na ruru vovo zegino kubaha. (2 Petero 3:9, 13) Gu zegino re nika du ni bawenehe gbe! Na rogo gu vovo zegino re, pambori nika du ho gbua kina sa, nga ndikidihe. Si foro ni patatamana mo mangi agu apai si aidaha tipa kaa koda tiro na ndikidi airisimbori awere.