1, 2. Ka álügüdahani lunbei hadügüni lárigiñe hígiruni relihión mama inarüniti, ani ka uagu gayara lubéi hariñagun súdini lan hadügüni?

SAMINA humá lun hamuga híchugun fe fuihali lan somu gürigia iwiyei péisiniti aramudaguarügü yarafa ñein lubéi haganawa. Buinhali sun fulasu lau péisini ani lídanñein peliguru hibagari. Ka gayarabei hadügüni? Chóuruti háluguña lan hamuga háguyun lidoun amu fulasu. Gama lumoun, íbini hidin ñéingiñe súnwandan mosu lan hóunabun aban álügüdahani súdiniti: “Anihein funa san péisini ligía nuagu?”.

² Susereti aban katei libe le, lau relihión mama inarüniti. Arufudahatu Bíbülia wiye lan dandu le harufudahabei kei le hadügübei (2 Korintuna 6:17). Ligía súdini lubéi háfuridun tídangiñe “Babilónia to Wéiriboun”, óundaruni lánina relihión mama inarüniti (Arufudúni 18:2, 4). Adüga humaali san? Anhein ítara liña lubéi, buiti hadüga. Gama lumoun, mabuídurügüti háfuridun lídangiñe relihión mama inarüniti. Mosu giñe hálügüdagun hungua: “Aniheingua funa san lídangiñe échuni lánina áhuduraguni mama inarüniti lidan nibagari?”. Ariha wama fiú hénpulu.

3. a) Ka tariñagubei Bíbülia luagu hayusurún guáriua ani ka uagu hénrengu lubéi houn fiú gürigia hánharun lun le lasaminarubei Bungiu hawagu guáriua. b) Anhein gama hubéi somu katei le lánina áhuduraguni mama inarüniti, ka lunbei hadügüni lau?

³ Añahein gürigia lúmagiñe saragu irumu gamatiña guáriua o latarü hábiñe. Anihein giñe san katei burí le huma? Anhein ítara liña lubéi, gayarabei madariragun humá hungua buidu lun hafurieidun lun Bungiu sin hayusurun somu katei arihúati. Gayarati giñe sandí humá ínsiñeni luagu burí katei le. Gama lumoun, Bungiu desidírübei ida luba lan lahudurawagun lun, ani arufudahatu Bíbülia mabuseerun lan wayusurun guáriua (aliiha huméi Áfuriduni 20:4, 5; Sálumu 115:4-8; Isaíasi 42:8; 1 Huan 5:21). Ligíati, lun luéigiñe humá lóubadina áhuduraguni inarüniti, mosu hagünrinchaguni sun katei le lánina áhuduraguni mama inarüniti. Houcha humá harihini kei Heowá, ladüga “mínsiñeti katei ligía lun” (2 Lúrudu 27:15).

4. a) Ka uagu meseriwin lubéi wíchugun kultu houn wagüchagu? b) Ka uagu leweridiraña Heowá lumutuniña luéi hadügün furumiñeguarügü katei le gánibei hama máfianu?

⁴ Komunti giñe kultu houn agüchagu lidan saragu relihión  mama inarüniti. Lubaragiñe hasubudiruni inarüni le tídanbei Bíbülia, afiñetiña meha fiú gürigia hawinwanduña lan hilaaña lidan somu fulasu marihúaditi ani gayara lan híderaguniña o hadügün dañu houn. Gayarati adüga humá meha óunwenbu áfaaguni lun hagalumaruniña hiduheñu ha hilaañabaña. Gama lumoun, furendeihadün lidan kapítulu 6 tidan líburu to, masigi hamá hilaaña awinwanda lidan ni aban fulasu. Ligía meseriwin lubéi hálugun hadimurehan hamá. Hámagiñe máfianu liabin sun uganu le genegebei lúmagiñeti lan somu iduhei hilaali. Ligía leweridirunbaliña Heowá lumutuniña ísüraelina luéi hóuchun hadimurehan hama hilaaña o furumiñeguarügü échuni le gánibei hama máfianu (aliiha huméi 2 Lúrudu 18:10-12).

5. Ka gayarabei hadügüni anhein yusu hubéi guáriua o adüga humá kultu houn hagüchagu?

⁵ Ka gayarabei hadügüni anhein yusuwa habéi guáriua lidan hani relihión o anhein adügǘwa lubéi kultu houn agüchagu? Aliiha huméi bérusu burí le arufudubalin ka lan lasaminarubei Bungiu luagun burí échuni le. Furíei humá lun Heowá sagü weyu; ariñaga huméi lun busén humá luéigiñe humá lóubadina áhuduraguni inarüniti ani amuriaha hugíame lun líderagunün asaminara kei ligía (Isaíasi 55:9).

6, 7. a) Afuranguagüda huméi ka lan hefeduhabei gürigia lidan duusu-hati ani anhein efeduha habalin kristiánugu ha lánina furumiñeti sígulu. b) Ka meha uma lúarada lefeduhóun lagunfulirún irumu lidan hadaani furumiñetiña lani Hesusu disipulugu?

⁶ Gayarati lawiyedun wáhuduragun lau relihión mama inarüniti ánhein gádan lubaliwa somu fedu komunti. Kéiburi lefeduhóun nasirua lan Hesukrístu, libe-agei relihión ha ariñagubaña kristiánugu hamá efeduha hamuti. Gama lumoun, úati ni kata arufuduti efeduha hamani lani Hesusu disipulugu lidan furumiñeti sígulu. Ariñagatu líburu Los orígenes sagrados de las cosas profundas: “Lidan bián sígulu le asigirubei  lárigiñe nasirua lan Kristu, úati meha asubudirúti kátima lan weyu nasirua lan, ani fiúrügüñanu busentiña hasubudiruni”.

⁷ Ani lun hamuga subudi hamuti lani Hesusu disipulugu weyu le nasirua lubéi, mefeduhan habéi yebe lagunfulirun irumu. Ka uéigiñe? Ladüga ariñagatu The World Book Encyclopedia, hawagu furumiñetiña kristiánugu “ariha hamuti meha lefeduhóun lagunfulirún irumu, kei échuni ubouaguna”. Biángubei lagunfulirún irumu le uágubei tadimureha Bíbülia hani meha biama gumadimatiña ha máhuduraguntiña lun Heowá (Agumesehani 40:20; Márükosu 6:21). Sun burí efeduhani ligía adügüwati meha houn búngiugu mama inarünitiña. Kei hénpulu, efeduha hamuti meha rómana tagunfulirun würi bungiu Diana irumu 24 lidan seingü-hati ani larugan, aba hefeduhani le lani Apolo lubungiute Weyu. Ligíati lefeduhóun lagunfulirún irumu múaranti luma échuni hani kristiánugu, lídangiñeti láhudurawagun houn búngiugu ubouaguna.

8. Afuranguagüda huméi ka lan afiñeni lídanbei lagunfulirún irumu.

⁸ Anihein giñe amu resun le arufudubei mefeduhan hamani meha lani Hesusu disipulugu lagunfulirun irumu, ladüga úara lan échuni le luma afiñeni le burí siñati lafuranguagüdǘniwa lau resun. Afiñetiña meha saragu güriegu hama rómana gani lan kada gürigia aban sífiri le óunigirubalin dan le nasirua lan luma lidan sun libagari. “Sífiri le gamadaguati luma bungiu le agunfulirubei irumu weyuméme le nasirua lan gürigia ligía” tiña líburu The Lore of Birthdays. Maweiyasunbei Heowá agundaara lau aban efeduhani le íchugubalin Hesusu úara luma afiñeni le siñabei lafuranguagüdǘniwa lau resun (Isaíasi 65:11, 12). Kati uagu híbebei gürigia efeduhei nasirua lan Kristu?

9. Ka uagu lanúadirua 25 lidan Duusu-hati lun laritawagun nasirua lan Hesusu?

⁹ Saragu sígulu lárigiñe liabin Hesusu ubouagun, aba  lanuadirún 25 lidan duusu-hati lun laritawagún nasirua lan. Gama lumoun mama lidan Duusu-hati nasirua lan Hesusu, * genegeti lidan lan Diisi-hati. Kati uéigiñe lanúadirua 25 lidan Duusu-hati? Gayarati ladüga lan busén hamá ha ariñagubaña kristiánugu hamá “hasansiruni efeduhani ubouaguna luagu efeduhani kristiánu. [...] Adüga hamuti ha mámabaña kristiánugu lidan uburugu Roma weyu 25 lidan duusu-hati lun hefeduhani luéyuri nasirua lan ‘Weyu magañeirúati’” (Enciclopedia de la Religión Católica). Lidan lidaani lidiliga, dan le máfuachun lan Weyu ábaha hadügün ha mámabaña kristiánu aban fedu lun lagiribudun Weyu lídangiñe lidise luéiyasun lun líchuguni lileitin luma lara houn. Afiñetiña meha gumese lan Weyu agiribuda 25 lidan Duusu-hati. Lidan hálugun lábutigu relihión hadügüniña ubouaguna kristiánugume aba hadügüni fedu le lun larihíniwa kamá “kristiánu”. *

10. Lidan dan le sügühalibei, ka uagu mefeduhan habalin meha fiú gürigia luéyuri nasirua lan Hesusu?

¹⁰ Lüha lasubudirúniwa ubouaguna lan lébuna lefeduhóun nasirua lan Hesusu. Kei mama lubéi Bíbülia lebunaboun, migirúnti meha lun lefeduhóun Alundu ni lidan fiú kolonia merigana lidan sígulu 17. Sun meha le midinti awadigimarida lun lerederun lúbiñe lidan weyu ligía, mosu meha lafayeihan luagu lidurun. Gama lumoun, murusun  dan lárigiñe ábaya lagiribudun binadu burí échuni, ani ruwati iseri lanwoun. Ábaya laweiridun lefeduhóun nasirua lan Hesusu ani ítaramemegili lidan saragu ageiraü. Gama lumoun, gürigia ha busenbaña hagundaaragüdüni Bungiu subudi hamuti lídangiñe lan relihión mama inarüniti liabin fedu le, ligía mefeduhan habalin ni le, ni amu fedu le ñǘbuinti lídangiñe relihión mama inarüniti. *

11. Afuranguagüda huméi ka lan uagu añahein lubéi gürigia efeduhatiña somu fedu ani ka katei lunbei súdini lan woun.

¹¹ Añahein gürigia subudi hamuti anihein lan fedu lídangiñe relihión mama inarüniti liabin, kéiburi lefeduhóun nasirua lan Kristu, ani mafiñetiña wuriba lan lefeduhóuniwa. Ariñagatiña úaali lan asaminaruti lídangiñeti lan áhuduraguni mama inarüniti, ani aban lan ókaasion lun hóundaragun familia. Saminatün san ítara? Anhein ítara liña lubéi, chóuruti línsiñe lan hufamilia hun adügübei lun hénrengu lan luéigiñe humá lóubadina áhuduraguni inarüniti, mama ladüga línsiñe relihión mama inarüniti hun. Chouru huméi busén lan Heowá le adügübaliña familia, buidu lan hanaagun hungua hama hiduheñu (Éfesuna 3:14, 15). Gama lumoun, anihein amu manera lun hadügüni, gúndaagüda huméime Bungiu. Ariñagati apostolu Pábulu: “Houcha humá hafurendeiruni ka lan hínsiñebei lun Wabureme” (Éfesuna 5:10).

12. Ka uma gayara lan konpararü wamani ka lan uagu mosu lubéi wadisedun luéi échuni luma fedu le wíyeti lagumeseha?

¹² Háfuga saminatün mama lan ligíameme lébuna hefeduhan gürigia uguñe weyu kei lidan binadu dan. Súdiniti san halíagiñe lan lagumesera? Anha. Anhaün hamuga ariha aban bímetu lidan léibaaguagüle duna wíyeti. Héigiboun hamuga? Ua, ladüga wíyetu. Anihein burí fedu buiti larihín kei bímetu tugía, ani lídangiñe iwiyei liabin. Anhein busén wabéi  wawinwanduni áhuduraguni inarüniti mosu wasaminarun kei profeta Isaíasi. Ariñagati houn kristiánugu inarünitiña: “Maguura humá ni kata le wíyeti” (Isaíasi 52:11).

13. Ka lérengunga umabei gayara lan hadunragun ladüga madan lanün somu fedu?

¹³ Gayarati hadeirun lérengunga danme desidírü humá hígirun somu efeduhani. Kaba hadüga anhein ua lubéi gunfuranda hamani hupaanagu lidan wadagimanu ka lan uéigiñe madan lubanün somu fedu? Anhein ichugúa idewesei hun lidan efeduhani lánina Duusu-hati, maribanbei san hárügüdüni? Kaba hadüga anhein amu lubéi hafiñen luéi hani weiriei o weiriou? Ka lunbei hadügüni lun maritagun hamá hisaanigu heferidiruña lan katei buiti lau mefeduhan hamá?

14, 15. Ka gayarabei hadügüni anhein ariñaga somu gürigia hun lun buidu lan hásügürüni fedu o busén lan líchugun aban idewesei hun?

¹⁴ Mégeiwati lichú aau lun lasubudirúniwa kaba lan adügǘwa lidan kada kesi. Lun lariñawagun hun lun hásügürün aban buiti fedu, gayarati heteingiruni. Anhein aban lubéi gürigia le harihubei estodi, kéiburi aban paaná lidan wadagimanu, háfuga busenbadün hariñagun amu katei lun. Furumiñeguarügü katei desidírü humá, adüga huméi lau inebesei. Ariñagatu Bíbülia: “Lunti gúndaawa lan lau hiyanun súnwandan, lunti giñe semé lan, lunti giñe hasubudiruni ida luba lan hóunabuniña gürigia” (Kolosana 4:6). Afuranguagüda huméi hafiñen lau inebesei. Ariñaga huméi furangu mariban lan harihini óundaruni hama iduheñu ni lichugún idewesei gama lumoun, himei humá hadügüni lidan amu ókaasion.

¹⁵ Anheihti busén lubéi somu gürigia líchugun aban idewesei hun? Samina humá furumiñe ka lan uagu ladügei. Gayarati lariñagun hun: “Subudi naali mefeduhan bani fedu le, gama lumoun busentina nedeweihani le bun”. Lidan kesi le, gayarati hasaminarun mama lan hefeduhaña lau hárügüdüni.  Anhein ibidiñe lubéi hafiñen lun gürigia ligía, gayarati hariñagun lun mefeduhan humá. Ítara luba hafuranguagüdüni ka lan uagu hárügüdei idewesei ani míchutün leweñegua. Gayarati giñe ladügüñein lan lun larufuduni múaran humá lun hafiñen o hadüraagubei lan lilurudun Bungiu luagu umegeguni. Lidan kesi le moun lumuti hárügüdüni.

16. Lidan katei luáguti efeduhani, ida luba hóuserun lau inebesei?

¹⁶ Kaba san hadüga, anhein mama lubéi ligíameme hafiñen hama hufamilia? Mosuya houserun lau inebesei. Mama mosu hasigenehan luagu kada échuni le habusenrunbei ha híbiri hafalarun o luagu kada fedu le habusenrunbei hefeduhan. Inebelá hasaminan hun, ítara kei busén humá inebe lan hisaminan houn (aliiha huméi Matéu 7:12). Lunti harufudun lichú aau luéi hasaminarun amu gürigia hefeduhaña lan hama. Ligíati mosu lubéi hóuserun súnwandan lau aban manera le lunbei lanügün darangilaü lun hisaminan (aliiha huméi 1 Timotéu 1:18, 19).

17. Ka gayarabei hadügüni luéi hasaminarun hisaanigu heferidiruña lan somu katei buiti dan le harihin amu lidan somu fedu?

¹⁷ Ka lunbei hadügüni lun masaminarun hamá hisaanigu heferidiruña lan somu katei buiti ladüga mefeduhan hamá fedu le múaranti tuma Bíbülia? Lidehaba le hadügübei lidan sun irumu. Añahein agübürigu álugatiña ókaasion lun híchugun idewesei houn hasaanigu. Idewesei le buídutimabei lun híchuguni houn hirahüñü, hidaani luma hínsiñehabu.

18. Ida luba líderagunün adamuridaguni hani kristiánugu lun luéigiñe humá lóubadina áhuduraguni inarüniti?

¹⁸ Lun lagundaarun Bungiu hau, mosu maha humá lun áhuduraguni mama inarüniti ani winwan huméime le inarüniti. Ida luba hadügüni? Ariñagatu Bíbülia: “Lunti giñe wáfaagun wíderaguniña wíbirigu lun hínsiñehabu hamá, luma lun hadügüni le buídubei. Wagía afiñetiña, moun  lumuti wafalaruni hénpulu hani ha héchubaña lun midin hamá lidan wadamuridagun, lubaragiñe lira, ru wamá gurasu houn wíbirigu, guentotima lau ariha wamani luagu yarafaali lan luéyuri” (Ebüréu 10:24, 25). Ruti adamuridaguni kristiánu ókaasion buiti lun wáhuduragun lun Bungiu kei aubei labusenra (Sálumu 22:22; 122:1). Leseriwiduba lun “wíchugun gurasu wóuniwagua” (Rómana 1:12).

19. Ka uagu súdini lubéi hadimurehan houn amu luagu le furendei humaali tídangiñe Bíbülia?

¹⁹ Dan hadimurehan luagu le hafurendeirubei lidan haturíahanu Bíbülia hama gefentiña luagu Heowá, luéigiñeñadün lóubadina áhuduraguni inarüniti. Gíbetiña gürigia ha hírubaña luagu burí katei wuribati le adügǘbei ubouagu. Háfuga subuditün gürigia ha sandiguatiña houngua ítara. Ka uagu madimurehan hubéi hama, luagu emenigini tídangiñeti Bíbülia le lunbei lasuseredun ámuñegü? Mígira huméi hadimurehan luagu lubuidun burí katei le furendei humaalibei ni hadamuridagun hama kristiánugu inarünitiña. Ítara, lau lásügürün dan ménrenguntimabei hígiruni échuni lánina áhuduraguni mama inarüniti. Chouru huméi: anhadün awinwandei áhuduraguni inarüniti, gúndaabadün ani gíbebei abinirúni heresibirun (Malakíasi 3:10).