1, 2. Be noar Bab igar odurdagmalad indasale, ¿ibu be nase egisedi, geb ibigar nue we ibmar be nase egised abelege?

BE IDDOARSUNNAD bei dii oisguegala be dii saboged tanque yagine dule arbag inanusu eyodiye, we dii gobsar sun be burgwed, ¿ibu be imasale? Sun be yog baidsig dii amiedgi binsaaliled. Auggi sun be binsadabaloed: “¿We dii isgusad an gobsamodibe?”.

² Noar Bab Dummad igar odurdagmalad, dii isgusadyobi gumogad. Bibliagi soglenaid wemar igi Babga arbabuggwa nued surye ar e ibmar odurdaglegedi, geb e ibmar imaglegedi sunnasurye (2 Corintios 6:17). We ibmar wisgued nue abeleged degiile nabir anmar “Babilonia neggwebur nue nug niggad” gine nooed, ar we bela neg dirbimaggar Bab Dummad igar oisgussiidid (Apocalipsis 18:2, 4). ¿Bad be egi nosmoga? Be egi nosmogale, nued be imasdo. Auggi unnila be noar Bab Dummad igar odurdagmaladgi noedbi unnisulid. Be nase egisbalidi: “¿Wis anba an wemarba ibmar imagdii?” Anmar daggoena ibu ibmarmar indagleged abelege.

3. a) ¿Ibu ibmar abar dulemar ebumala Babse golega, ega naggulegegardibe geb ibigala dulemarga beedse guardae we ibmar indaggega? b) Noar Bab igar odurdagmalad ibmar ebuged be nigmogale, ¿igi be imaggoe?

³ Abar dulemar Babse golega diggasurgus Cristo cruzgi nai sedidamalad, nan Maríadibe. Be we ibmar nigmogale sun be soged sun ande we ibmarsuli Babse golosogeye. Geb bamaladdina na neggi nussu sedididamogad ega naggulegega. Be we ibmar nigmogale sun be binsaed an we ibmarsulile doa anga naggulegoye. Sun gadi be we ibmar binaler binaled. Auggi Jehová sogoedid igi anmar ega ibmar imaggoe geb doa anmar bendaggoedi. Bibliagindina soglenaid Jehová abesurye anmar we ibmar ebugedi (Éxodo 20:4, 5 absogo; Salmo 115:4-8; Isaías 42:8; 1 Juan 5:21). Degsoggu Bab igar sunsogedbali be nagubiele, be we ibmar osuloger gebed, ar noar Bab igar odurdagmalad we ibmar ebumalad. Jehovádina “we ibmar isdar dagged” degsoggu deyob be dagmogadid (Deuteronomio 27:15).

4. a) ¿Ibiga nuedsuli dule burgwismaladga ibmar imaggedi? b) ¿Ibiga Jehová israel neggweburga sogsa mer burgwarmaladga ibmar imagmaloye, geb mer nerganse idagmaloye?

 ⁴ Noar Bab igar odurdagmalad sogmarbalid burgwismaladgala nabir ibmar imagleye. Abar dulemar Biblia durdagged iduale binsamalanad dule burgwisad e burba gudi daye. Geb abar burgwismaladi emar bendaggedga gusdamarye geb bamaladdina emar oaggalodamarye. Degsoggu sun be ibmar imasmogar imasmogad dule burgwaled dobedbali. Auggi we libro capítulo 6 gine be durdasad dule burgwismalad dula gudidisurye. Degsoggu nuedsuli burgwarmaladgala ibmar imaggedi. Dulemar soggalile be sergan gudiye, we be gwenad gudisulid, niamala gordidi daed. Aagala Jehová Israel neggweburga sogsad mer bibbisaar burgwarmaladga ibmar imagmaloye, mer nerganse idagmaloye (Deuteronomio 18:10-12 absogo).

5. Be ibmar ebudimodibe Babse golega, bega naggulegegardibe, ¿ibu be imagger gebe?

⁵ Be ibmar ebudimodibe Babse golega, bega naggulegegardibe, ¿ibu be imagger gebe? Bibliagi we ibmargi sunmagnaid nueggwa absogo daggega igi Bab Dummad we ibmar dagmoga. Bane bane be Jehováse golo be e igar sunsogedbali aggamogaga geb be ega sogo an bendagye an we ibmar isdar dagmogaga (Isaías 55:9).

6, 7. a) ¿Ibigala Navidad onoye sogdamala geb Cristo sordagan ebbenne buggusmalad we iba onosmardibe? b) ¿Doamargala gwaluleged iba onodamalana gebbe Jesús sordagan buggusmalad ibagi?

⁶ Anmar bela ibamar onolegedbali aggadmodibe sun anmar Babga isgudoed. Be daggena Navidad. Ar soglegendo Navidadgi Jesucristo gwaluleged iba onoleye, geb belagwablesaar Cristo sordaganye sogmalad we iba onomalad. Auggine, soglenasulid Cristo sordagan gebbe buggudmargua we iba onomalanye. Libro Los orígenes sagrados de las cosas profundas  gine soglenaid: “Cristo gwalulesad sorba dos siglos nasadgine dulemar bibbisaar wissurmalanad ibu ibagi Jesús gwalulesa geb wisgubi gussurmarbalid nue ingu gwalulesa”.

⁷ Geb anba Jesús sordagan wisigusmalana ingua nue Jesús gwalulesa, ega e gwaluleged iba onogosurmarbalinad. ¿Ibigala? Ar emardina wismalanad “we ibamar onolegedi [...] Babgine danisuli” (Las cosas nuestras de cada día). Bibliagine unnila sognai dule warbogala e gwaluleged iba onolesye, auggine wemar Jehovágala arbasurmalanad (Génesis 40:20; Marcos 6:21). We iba Jehovágala onolesulinad, ibmar bamaladga onolegenad. Soggwen anmar sogoena, roma dorgana mayo 24 gine e nan dummad Diana nugad gwalulesad iba onodamalanad geb banegine dad ibe Apolo gwaluleged iba onodamarbalinad. Degsoggu Bab Dummad sogsasulid gwaluleged iba onomaloye, ar Cristo sordagangadsulid.

8. ¿Ibigala ebbenne gwaluleged iba onodamalana?

⁸ Ebbenne Cristo sordagan buggusmaladi unnila we ibmar wisidbarbi Jesúsgala e gwaluleged iba onossurmalad. Wismarbalinad ibmar baid ular gwaluleged iba onoledabarye. Ar griegomar geb roma dorgan buggidar bab dummagan niggansoggua, binsadamalad we bab dummagan ángelmar barmiardaye dulemar bendaggega. Geb dule wargwen we bab dummad gwalulesad ibagi gwalulenamogale e ángel daggwissoye geb dungumaidba bendagdioye. Geb “we ángel sunmasdaye bab dummad dule gwalulesad ibagi gwalulesmogadbogwa” (The Lore of Birthdays [La tradición de los cumpleaños]). Aagala Jehová nued dagsulid Navidad onogedi Jesús gwaluleged iba onogedye soglegedi (Isaías 65:11, 12). Degidde, ¿ibigala belasaar dulemar Navidad onoedbimarsunna?

9. ¿Ibiga diciembre 25 sulesa Jesús gwalulesad iba onogega?

⁹ Jesús Nabbanegse arbid sorbali, undar birgamar nanasadgine diciembre 25 gine Jesús gwaluleged iba onodmalad.  Auggi Jesúsdina diciembregine gwalulessulid, * nue be iddodele octubre nii siggi gwalulesar gebed. Ar degidde ¿ibiga diciembre 25 susmala? Abar dulemar Cristo sordaye sogdidiinadi “yamo ibamar Babgadsulidi, Babgadyobi imagbi guarmalad. [...] Ar Romagine Bab igar wissurmalad diciembre 25 gine” dad ibe gwaluleged iba onodamalanad (Enciclopedia de la Religión Católica). Diciembregine dad bolle ganaidba neg diobbidasoggua dulemar Bab igar wissurmaladi, binsadamalad dad diggasur nadye degsoggu gannar sedagegala ega ibmar imaggar damala. Geb binsadamala diciembre 25 gine dad iddagga gunoniggoye neg uwe saega. Geb Bab igar idudimaladi we iba odononimalad “Cristogad[yobi]” dagle imaggega, Bab igar wissurmalad nabir eba aggamalaga. *

10. ¿Ibigala ebbenne abar dulemar Navidad onosurmalana?

¹⁰ Bad diggasurgus dulemar wismala Navidad Babgadsuli. Aagala ebbenne Inglaterragine geb mergi neggi we iba onogoye igar masulinad. Degsoggu dule Navidad onogega arbaabsulile egi mani galesdaed. Undar birgamar nanassulid gannar we ibamar onolealid geb bamalad ibamar agga onoledbalid. Wegi Navidad iba dummadgala gunoniggid emi ibagine bela neggweburmargine onolegusmogad. Dulemar Bab Dummad nued oiddobimaladdina  wismalad we iba onogedi Babgi danisuli geb ibu iba baid Babgadsurdibe onosurmarbalid. *

11. ¿Ibigala abar dulemar iba onodamala geb ibugi bur anmardi binsaoe?

¹¹ Abar dulemar wismalanad abar ibamar Babgadsur nanae, anmar sogoena Navidad onogedi, auggi we ibamar onoleger issaggwa dagsurmalad. Ar abar binsamalad we iba Bab issaggwa dagsurye. Na gwenadgan buraggwa bugguega we iba onoleye. ¿Be deyob binsamoga? Degiile be na gwenadgan sabedbali we iba onodaer gebed, be binsasulir gebed we iba Bab issaggwa dagmaye. We ibmarbali bega undar guer gebed be Bab igar sunsogedba naguega. Mer benguo Jehová abeged be na gwenadganbo nued gudi gued ar aaga anmar obinyisad (Efesios 3:14, 15). Auggi nabir be ibmar baid imasaled be na gwenadganbo nued gudi guega geb nued be Bab Dummad oiddobaliga. Apóstol Pablo sogsad ibu ibmargine bur anmar binsaoe sogsagu ‘nue dagdi gumalo ibu ibmar bur Bab nued dagge’ (Efesios 5:10, TNM).

12. ¿Abar ibamar ibu ibmaryobi nuegansur nanaye be sogsale?

¹² Sun be binsasale ar ebbenne ibigala we iba onolegena, emi ibagindina bar aagala onolesuliddeye. Auggi, bur nue abeledibe anmar wisgued ¿ibigala we iba onoleali? Nue wisgued abeleged. Sin neg yabba pastilla melledi be daggalir, ¿be masale? Be massuliled ar sunnasulid. We pastillayobi abar ibamar nuegan daglenana inigwale, igar isganagine daninanaed degsoggu iba nuegansulid. Bab igar sunsogedbali anmar nagubimogale profeta Isaíasyobi anmar binsamogar gebed. Dulemar Babba nue nanamaladgala sogsad: “Melle ibmar swilidigsulid [...] ebumalo” (Isaías 52:11).

13. ¿Igi sun begala neg gudagoe be ibamar onosulidba?

¹³ Sun begala beedse gudagoed we ibamar onoged indagge be soggalile. ¿Igi be imasale be arbaedgine be sordagan aggu iddomalale, we ibamar onolegedga ibmar imaglealir ibigala bedina imagsurdae? ¿Ar dule Navidadgi begala regalo uggalirdina? ¿Bur nuedile be abin regalo suele? ¿Igi be sabaloe be sui, be omedibe beyobi Biblia sogedba ibmar imagsulile? ¿Igi be sabaloe be mimmigan mer binsaega we iba onosulidba ibmar nuegan nigguosurmarye?

14, 15. ¿Igi be saoe dule bega soggalir “feliz navidad” bega regalo uggalirdibe?

¹⁴ Nue binsaed abelege deyob bega neggualir igi be abin sadaoe. Dule bega soggalir “feliz navidad”, “feliz año nuevodibe”, unnila sun be abin ega soged “nuedye”. Auggi we dule bali bali be dagdiirdina, be walig arbaeddibe sun aagardina nueggwa be soged ibiga be we ibmar imagsuli. Auggi ega soged idu nueggwa be binsaoed. Bibliagi soglenaid: “Nuedgi, degi, nabir iddolegedgi be sunmagdii gumar. Deyob geb be[mar] wisgumaloed, igi nabir bemar dulemar abinsaoe” (Colosenses 4:6). Emarga sogsoggalile ibiga bedi we ibmar imagsuli idu nueggwa binsadao mer be abin sae iddomalaga. Nueggwa emarga sogo an issaggwa dagsurye regalo imagged geb buraggwa anbagguleged auggine we ibagindi an imagsurye.

¹⁵ ¿Ar dule aa ibagi bega regalo ugbierdina? Be dagger gebed ibiga we dule bega regalo ugbie. Sun dule bega sogeled: “An wisi bedi wissur we iba onoge, auggi an wis bega regalo ugbimogad”. Degiile sun be binsaoe an we ibmar abin susale, an we iba ononamoye soglesuliddeye. Auggi ar dule wissulile be we iba wissur onoye, be ega soger gebed. Degiile dule mag be abin iddogoed ibiga bedi regalo abin ega uggosuli. Auggi sun gusbaliled dule begala regalo  ugdagoed unnila oyogega be ibmar niggubiedbali ibigwesur Bab igargi be annasarye. Degiirdina nuedsulile be abin regalo suedi.

16. Be gwenadgan iba onoalile, ¿igi bedi ibmar imagmogoe?

¹⁶ ¿Igi be saoe be gwenadgan Biblia sogedba dasurmalale? Emarga ibmar soged idu nueggwa be binsa dao. Be gwenadgan we ibamar onobimalale mer emargi nai guo mer we iba onomalaga. Emar na e binsaedba ibmar imagmaloed igi be be binsaedba na ibmar imagbidamoga (Mateo 7:12 absogo). Emar iba onoalir mer bedi emarba ibmar imagmogo. Auggi iba soggwen Bibliagi issaggwaye soglenasulirdi begi sisundo be imaggodibe be imaggosurdibe. Mag iddollebalid be yogasaardina geg ibmar imagged mer sorba be binsadi guega mer an imaggen dagleye (1 Timoteo 1:18, 19 absogo).

17. ¿Ibu be imagger gebe be mimmigan mer binsaega we iba onogosulidba ibmar nued nigguosurmarye?

¹⁷ Bibliagi ibamar nuedsurye soglenaid onosulidba be mimmigan binsaele ibmar nuegan nigguosurmarye, ¿igi be saoe? Begi sisunna birgagine ibu be imagdaoe. Abar babgan iba baid amisdamalad e mimmiganga regalo uggega. Be mimmiganbo be na ibmar imagmogar gebed be mimmigan mag iddogega be nue emar binale, degiile bur ibmar nued ega be ugnaiyob gued.

18. Bab igar iddoged negse nanaed, ¿igi be bendaggoe be e igar sunsogedba nagumogagala?

¹⁸ Nued be Jehová oiddogega noar e igar odurdagmaladgi be banguer gebed, geb bur e igar sunsogedba be naguer gebed. ¿Igi be imasale? Bibliagi soglenaid: “Anmar binsamarsun igi anmar saer gebe, adi, na mudsub mudsub na gaddig sabgumalagar, degi, na ibmar nuegan imagmarbaligar. Melle  dulemar baigan damaladyobi, bular danaggwaa onmagsuli [...] gumalo. Bur na [...] mudsub mudsub ogannobuggwa [...] gumar, adi, gaddig Bab Dummadba nanamalagar. Bab Dummad ibagan warmagdani be[mar] daggarmalar” (Hebreos 10:24, 25). E sogedba anmar ese golegala Jehová abeged anmar igar iddoged negse nanaed (Salmo 22:22; 122:1). Aagi anmar na “mudsub mudsub oganno[goed]” (Romanos 1:12).

19. ¿Ibigala nue abelege, Bibliagine be ibmar durdasad dule bamaladga sogmogadi?

¹⁹ Be Bab igar sunsogedba nagubaligala Jehovági sunmagmaladbo be Biblia durdasad emarga sogmogar gebed. Emi ibagi buggidar dulemar wiledidiid neg undar gunaidba (Ezequiel 9:4). Sun be dulemar deyob iddodidiid dagdimogad. ¿Ibigala geg be aa dulemarga sogmoga Bibliagi ibmar nuegan guoye soglenaidi? Mer Bibliagi sunmagsur guo geb mer Cristo sordagan sunsogmaladba anbaggusuli gubalo. Deyob be imaggele noar Bab igar odurdagmalad ibmar bar imagbisuli be iddodagoed. Geb Bab igar sunsogedba be nagusale yeer iddodi be gudoed geb buggidar be ibmar nuegan niggubaloed (Malaquías 3:10).