1, 2. Khottea dhorma thaun bhair sorlea uprant ami amkam koslo prosn vicharunk zai, ani oxem korop kiteak gorjechem?

CHINTAT, tumi ravtat tea ganvant pieunchem udok pidd’ddear zalam. Tem piet zalear, tumcho jiv vochonk xokta. Tumi kitem kortolim? Dubhav viret, tumi borem udok khoim melltta tem sodhtolim. Punn tachea uprantui tumchea monant prosn ieunk xokta, pidd’ddear zal’lem udok pieun mhaka kitem-i zaunk na nhoi?

² Aiz sonvsarantle sogle khotte dhorm pidd’ddear zal’lea udka bhaxen asat. Bible-a pormonnem he dhorm, khotte xikounnek ani chali-ritik lagon pidd’ddear zaleat. (2 Korintkarank 6:17) Tea pasot, tumi “vorixtt Babilon”, mhunnche sonvsarantlea soglea khottea dhorma thaun bhair sorop gorjechem. (Prokasovnni 18:2, 4) Punn khottea dhorma thaun bhair sorlench mhunn zaina. Tumi tumkanch vicharunk zata, ‘khottea dhormachi kosli-i xikounn hanv azun porian pallit asa kai?’

3. (a) Bible-a pormonnem imajeo uzar korop sarkem kai, ani thoddeank hem manun gheunk kiteak kotthin zaunk xokta? (b) Tumchea lagim khottea dhormantli kosli-i vost aslear, tumi kitem korunk zai?

³ Khub vorsam thaun lok Devachea bhoktent imajeo uzar kortat. Tumi-i ghoddie toxench kortat astolim. Imajeo nastana ami Devak koxi bhokti diunk zata mhunn tumi ghoddie chint’tit. Thoddeo imajeo tumchea kallzak khub lagim asot. Punn ami Devachi bhokti koxi korunk zai hem toch amkam sangonk xokta. Bhokti kortana, ami imajeo uzar kel’leo Devak naka oxem Bible xikoita. (Suttka 20:4, 5 vachat; Stotr 115:4-8; Izaias 42:8; 1 Juanv 5:21) Taka lagon, khotte bhoktent mellon aslolea soglea vostuncho nas korun, ami Devak manvota tem korunk fuddem sorop gorjechem. Dev murteank ani imajeank “vitteta.” (Dusri Somurt 27:15) Devachea nodrent heo vostu mhelleo asat, ani ami-i tankam teach nodren pollounk zai nhoi?

4. (a) Meloleanchi bhokti kiteak korchi nhoi? (b) Kosleach torechea ghaddiponnant bhag gheuncho nhoi mhunn Jehova amkam kiteak sangta?

 ⁴ Khubxea dhormanche lok meloleanchi bhokti kortat. Bible-achi somzonni mellchea adim thoddim zann, melolim khoim tori jivim asat ani tim amkam borem vo vaitt korunk xoktat mhunn patietalim. Tumi-i ghoddie aplea meloleam pasot khub-kitem kelam astolem. Punn, melolim khoinch jivim nant ani tim amkam borem vo vaitt korunk xokonant mhunn ami odheai 6-ant xiklim. Taka lagon, melolea lagim ulouncho proitn kelear pasun tacho kainch faido na. Melolim amkam kitem tori kollounk sodhtat oxem amkam disot, punn khorem mhunnttlear, oslea vellar meloleanchea nanvan devchar amkam fosoitat. Teach pasot Jehova Devan Israel porjek, meloleank apouncho proitn korcho nhoi ani ghaddianger voichem nhoi mhunn sanglolem.—Dusri Somurt 18:10-12.

5. Adim tumi imajeanchi ani meloleanchi bhokti kortalim zalear, atam tumi kitem korunk zai?

⁵ Adim tumi imajeanchi ani meloleanchi bhokti kortalim zalear, atam tumi kitem korunk zata? Imajeam vixim Bible kitem sangta tem vachun, tancher niall korat. Devak imajea vixim koxem dista tem chintat. Dev chint’ta teach bhaxen chintunk ani taka manvota tem korunk, tache lagim sodanch magnnem korun adar magat.—Izaias 55:9.

6, 7. (a) Lok Natalanchi porob kiteak monoitat? Jezuche xis ti porob monoitale kai? (b) Adlea Kristanvanchea kallar khoincho lok zolmdis monoitale ani kiteak?

⁶ Ami khottea dhormank mellon aslolim festam vo  porbo monoilear, amchi bhokti Devak manvochi na. Sonvsarbhor choddxe Kristi dhorm Natalanchi porob, Jezu Kristacho zolmdis mhunn monoitat. Punn, Jezuchea adlea xisamnim tacho zolmdis monoilo mhunn khoinch puravo na. Sacred Origins of Profound Things hem pustok mhunntta, “Jezu melea uprant 200 vorsam meren, konnakuch to kednam zolmol’lo tachi khobor nasli, ani choddxea lokank hea vixim poddonui vochonk naslem”.

⁷ Jezuchea xisank tachea zolmdisa vixim khobor asli zalearui, te to dis monounche nasle. Karonn The World Book Encyclopedia hem pustok sangta, “zolmdis monovpachi chal, kudd’ddea devank bhoztolea lokam modem suru zal’li” mhunn adle Kristanv zannam asle. Bible-ant fokot don munxanchea zolm disachi khobor sanglea. He donui munis Jehovachi bhokti korinasle. (Utpoti 40:20; Marku 6:21) Thodde lok kudd’ddea devank mhoima diunk tancho zolmdis monoitale. Udharonnak, Mai-achea 24 tarker adlea Romantle lok Daina hea devicho zolmdis monoitale. Tachea dusrea disa, te Apolo hea suria devacho zolmdis monoitale. Hem dakoita ki zolmdis monovpachi chal adlea Kristanv lokam modem nhoi, punn khottea devank mantolea lokam modem suru zal’li.

8. Zolmdis monovop khottea patiennecher adarit asa oxem ami kiteak mhunnonk zata?

⁸ Anik ek karonnak lagon adle Kristanv Jezucho zolm dis monoi nasle. Zolmdis monovop khottea patiennecher adarit asa mhunn te zannam asle. Adle Grik ani Romi lok, zonn eka munxachea zolmdisak ek atmo ieta ani jivitbhor tachi rakhonn korta mhunn mantale. The Lore of Birthdays hem pustok sangta, ‘Tanchea  zolmdisak zolmololea deva thaim, hea atmeacho koslo tori sombond asa mhunn manun, te lok aplo zolmdis monoitale.’ Punn, khottea xikounnecher adarit asloleo porbo, ami Jezuchea nanvan monoitat zalear Jehovak tem avddona. (Izaias 65:11, 12) Toxem zalear, sonvsarantlo lok Natalanchi porob kiteak monoitat?

9. Dezembr 25 tarik Jezucho zolmdis mhunn kiteak monounk lagle?

⁹ Jezu moron sumar 200-300 vorsam uprant, lok Dezembrachi 25 tarik Jezucho zolmdis mhunn monounk lagle. Punn Jezu tea disa zolmonk naslo. Tacho zolm, Otumbr mhoineant zalo mhunn kolltta. * Toxem zalear, lok tacho zolmdis Dezembrachea 25 tarker kiteak monoita? Apunn Kristanv mhunn mantale tea lokank “ho dis Romi lokanchea festa disa dovrunk zai aslo. Romi lok hem fest ‘suria devacho zolmdis’ mhunn monoitale.” (The New Encyclopædia Britannica) Xim-anchea disamnim suriachi gormi unni zatali tednam kudd’ddea devank manpi lok suria pois bonvddek voita mhunn somzon, tacho uzvadd ani gormi porot mellchea pasot festam ani zagronnam kortale. Dezembrachea 25 tarker, suria aple bonvdde thaun portota mhunn te somzotale. Kudd’ddea devank mantolea lokank Kristanv korunk, dhormik fuddareamnim tanchi porob Kristanv dhormant apnnaili. *

10. Adim thodde lok Natalam kiteak monoi nasle?

 ¹⁰ Natalachi porob, khottea devanchea festank zuddloli asa mhunn thoddeank khobor asli. Tea pasot 17-vea xekddeant, England-ant ani America-chea thoddea ganvamnim Natalam monovop kaidea add aslem. Hea disa konnui kamak vochonastana ghora ravlear taka dondd farik korchem poddttalem. Punn thoddea tempan, lok porot hi porob monounk lagle. Thoddeo adleo ani noveo chali-riti tantunt mellon aileo. Aiz Natalam ek vhodd porob mhunn sonvsarbhor monoitat. Punn khottea dhorma thaun suru zal’leo porbo khore Kristanv monoinant karonn, te sodanch Devak manvota tem kortat. *

11. Thoddim zannam festam kiteak monoitat, punn ami kitem korop chodd gorjechem?

¹¹ Natalam ani toxinch her festam khottea dhorma thaun suru zalim mhunn thodde lok manun ghetat. Punn tim monoilear, kainch chuk na oxem tankam dista. Him festam monoitana, te khottea dhormancho ugddas korinant mhunn sangtat. Ani oslim festam, ghorabeantlea lokank ektthaim ieunk soeg ditat oxem tankam dista. Tumkam-i ghoddie oxem disot. Tor, hem dakhoita tumkam khottea dhormancho nhoi punn aplea ghorcheancho mog asa, ani taka lagon tumkam ghoddie Devak manta tem korunk kotthin zait. Punn, ugddas dovrat, Devanuch ghorabo ghoddun haddla. Ani tumi tumchea ghorcheancho mog kel’lo taka zai.  (Efezkarank 3:14, 15) Punn ghorcheank khuxal korunk, Devak borem disona tem korop sarkem kai? Na. Kitem korop chodd gorjechem tem dakhounk Apostl Paulu boroita, “Somiak kitem odik man’ta tem sodun kaddat.”—Efezkarank 5:10.

12. Khottea dhorma thaun suru zal’leo porbo ani festam monovop chukichem mhunn dakhounk udharonn diat.

¹² Festam vo porbo monoitana, ami tim koxim suru zalim hea vixim chintunk favona oxem tumkam dista zait. Punn tanchea survate vixim zannam zavop gorjechem kai? Hoi! Chintun polloiat. Tumkam rebeant poddloli ek choklett disli zalear, tumi ti kaddun khatolim kai? Kednanch na. Teach bhaxen, aichea kallachim festam ani porbo mhelleo asat. Tumi Devak manvota tem kortolim zalear, Izaias provadean sanglam tem motint dovrop gorjechem. Tannem mhunnttlem, “Kosleach mhelle vostuk hat lavum nakat!”—Izaias 52:11.

13. Tumi festam monoinant tednam, tumkam kosleo addkolleo ieunk xokta?

¹³ Tumi festam monoinant mhunn, tumkam thoddeo addkolleo ieunk xoktat. Udharonnak, tumchea sangata kam kortat te lok, tumi porbo kiteak monoinant mhunn vicharit. Thodde, tumkam Natalanchem dennem di-it. Tem dennem tumi gheunk zata kai? Ani tumcho ghov vo bail, Bible xikoita  tem patiena zalear kitem? Tumi festam monoinant dekhun tumchim bhurgim dukhi zaunk xokta. Oslea vellar tumi kitem kortolim?

14, 15. Konnui tumkam festanchim porbim vo dennem diunk sodhtat zalear tumi kitem kortolim?

¹⁴ Dor eka poristhiti vixim tumi chintun pollounk zai. Konnem-i tumkam festachim porbim dilear, tumi tache upkar manunk zata. Punn, porbim ditolo tumkam boro vollkhota zalear tumi taka vaitt disona toxem, tumchea patienne vixim sangonk zata. Bible sangta, “Tumchem ulovop sodam godd ani mittan ruchichem kel’lea sarkem zaum-di. Teach borabor zonn-ekleak favo toslo zobab diunk zanno zaiat.” (Koloskarank 4:6) Ugddas dovrat, ami kednanch dusreanchea patiennecho okman korunk zaina. Dennem diunk vo gheunk ami her vellar fatti soronant, punn festanchea vellar ami oxem korinant mhunn dakhoun divop gorjechem.

¹⁵ Konnui tumkam ek dennem diunk sodhta zalear tumi kitem kortolim? Dor eka poristhitint tumi chintun tharaunk zai. Tumkam dennem ditolo zor mhunntta, “tumi hi porob monoina mhunn Hanv zannam, tori astana, hanv hem tuka diunk sodhtam.” Oslea vellar, tumi ghoddie tem dennem gheit. Karonn oxem korun, tumi tea porbent bhag ghetat oxem zaina. Punn, dennem ditoleak tumchea patienne vixim khobor na zalear, tumi tea vixim taka sangonk zata. Oxem kel’lean, tumi festachea vellar taka dennem kiteak dinant hem to somzotolo. Punn, zor eklo dennem diun tumi tumchea patiennent ghott na, vo aplea faideak Devachea khuxe add voitole mhunn dakhounk sodhta zalear, tachea koddlean dennem ghevop sarkem nhoi.

16. Porbanchea vellar tumi somjikai koxi dakhounk zata?

¹⁶ Tumchim ghorchim tumchi patienni manun ghenant zalear kitem korchem? Hea vellar tumi somjikai dakhounk zai. Tim pallttat, ti dor ek chal-rit chukichi mhunn tumi sangonk zaina. Zoxem dusreamnim tumchea patiennek man dilolo tumkam zai, toxench tumi-i tanchea patiennek man diunk zai. (Matev 7:12 vachat.) Tumchim ghorchim porbo monoitana, oslea koslea-i kamant vantto gheum nakat, jea udexim tumi tantunt bhagidar zatolim. Sogleoch vostu Devachea khuxe add astat oxem na, taka lagon tumi somjikai dakhounk zai. Punn tumchem ontoskornn sodanch nitoll dovrunk vavrat.—1 Timotak 1:18, 19 vachat.

17. Tumi porbo monoinant mhunn tumchim bhurgim niraxi zaina zaunk tumi kitem korunk zata?

¹⁷ Tumi porbo monoinant mhunn tumchim bhurgim niraxi vo dukhi zait, tednam tumi kitem kortolim? Tumchea bhurgeank dennem divop gorjechem ani tem tumi kednam-i diunk zata. Porbenchea vellaruch dennem diunk zai oxem na. Gorje pormonnem, tumi tankam favo teo vostu diunk zata. Ani sogleant borem dennem mhunnttlear, tumcho vell ani mog.

18. Sobhent ektthaim ailolea udexim tumkam Devak manvota tem korunk koxi modot mellttoli?

¹⁸ Devachem kalliz khuxal korunk tumi soglea torechi khotti bhokti soddun, Devak manvota tem korunk zai. Tumi oxem korunk sodhtat mhunn koxim dakhoitolim? Bible sangta, “Pritimog dakhounk ani boreo kornnio korunk ekamekak hurba diunk vavrum-ia. Zomati bhorun ektthaim zaunchi amche  modem sonvoi asa ti thoddim zannam moddtat. Ami toxem korchem nhoi.” (Hebrevank 10:24, 25) Mittingek ektthaim ieun tumi Devak manvota tea ritin tachi bhokti korunk pavtolim. (Stotr 22:22; 122:1) Oslea mittingek, tumkam visvaxi bhav-bhoinnam koddlean “dhir” mellttolo.—Romkarank 1:12.

19. Tumi Bible-ant xikleant tem dusreank sangop kiteak gorjechem?

¹⁹ Khori bhokti korunk fuddem sorleant mhunn dakhounk tumi Bible-ant xikleant tem dusreank sangop gorjechem. Sonvsarantlem vaittponn polloun aiz khubxim munxam “dukh kortat ani vilaptat.” (Ezekiel 9:4) Oslea munxank tumi, Dev fuddarak kitem boremponn haddttolo tem sangonk zata. Zoxim tumi khorea Kristanvam sangata mellon ietolim, ani Bible-ant xiklolea vostum vixim dusreank sangtolim, khottea chali-ritim pasot aslolo tumcho mog unno zait voitolo. Devak manvota tem korit zalear, tumkam jivitant khuxalkai ani zaitim besanvam mellttolim.—Malaki 3:10.